1, 2. (1) Kotea te pikipikiga ʼo te ʼofa mo te tui? (2) Kotea te ʼu fehuʼi ka tou vakaʼi anai?

ʼE FAKAPAPAUʼI mai e tatatou Tamai, ia Sehova, ʼe ina tapuakinaʼi anai ʼana kaugana agatonu. ʼE ko hana faʼahiga fakaha ʼaia ʼo tona ʼofa kia tatou. Pea ʼe tou ʼoʼofa ia te ia “koteʼuhi neʼe ʼuluaki ʼofa ia ia tatou.” (1 Soane 4:19) Koia, ʼi te tuputupu ʼo totatou ʼofa kia Sehova, ʼe malohi anai tatatou tui kia te ia. Pea ʼe tou tui papau ʼe fakapale anai e Sehova ia natou ʼae ʼe ʼofa ai.​​—Lau ia Hepeleo 11:6.

² ʼE ko Sehova ʼae ʼe ina fakapale. ʼE ko he koga maʼuhiga ia ʼo tona ʼulugaaga pea mo te ʼu gaue ʼae ʼe ina fai. Koia, ʼe mole katoa anai tatatou tui ki te ʼAtua mo kapau ʼe mole tou tui papau ʼe ina fakapale ia natou ʼae ʼe natou kumi fakamalotoloto ia ia. Kotea tona tupuʼaga? Koteʼuhi “ko te tui ʼe ko te falala malohi ʼe hoko anai te ʼu meʼa ʼae ʼe tou ʼamanaki ki ai.” (Hepeleo 11:⁠1) Ko te tui, ko tona fakaʼuhiga ʼe tou falala moʼoni ʼe tapuakinaʼi anai e te ʼAtua ʼana kaugana. Kotea te ʼu lelei ʼe tou maʼu mai he ʼamanaki ki he fakapale? Neʼe fakapale feafeaʼi e Sehova ʼana kaugana ʼi te temi muʼa pea mo te temi nei? Tou vakaʼi te tali ki te ʼu fehuʼi ʼaia.

3. Kotea te fakapapau ʼae ʼe tuʼu ia Malakia 3:⁠10?

³ ʼE fakapapauʼi e Sehova ʼAtua ʼe ina fakapale anai ʼana kaugana agatonu. ʼE ina loto ke tou foaki age kia te ia te meʼa ʼae ʼe lelei tuku pau pea ke tou falala ʼe ina tapuakinaʼi anai tatou. ʼE ui fenei e Sehova: “Koutou ahiahii au.” ʼE ina hoko atu fenei: “E koutou sio anai pe e mole au avahi anai Kia koutou te u matapa o te atu lagi, pee mole au liligi anai kia koutou te tapuakina o lahi osi.” (Malakia 3:10) Koia, ʼe tou lotofakafetaʼi ki te ʼofa ʼo Sehova ʼo tou tali tana fakaafe ʼae ke tou ʼahiʼahiʼi ia ia.

4. He koʼe ʼe tou falala ki te fakapapau ʼa Sesu ia Mateo 6:⁠33?

⁴ Neʼe fakapapauʼi e Sesu ki ʼana tisipulo kapau ʼe natou fakamuʼamuʼa te Puleʼaga, ʼe tokoni age anai te ʼAtua kia natou. (Lau ia Mateo 6:33.) He koʼe neʼe fai e Sesu te fakapapau ʼaia? Koteʼuhi neʼe ina iloʼi ʼe fakahoko tuʼumaʼu e te ʼAtua ʼana fakapapau. (Esaia 55:11) ʼO feia pe mo tatou, kapau ʼe tou tui kia Sehova, ʼe ina fakahoko moʼoni anai tana fakapapau ʼaeni: “ ʼE mole au tuku anai koe ʼi he temi, pea ʼe mole au liakī anai koe ʼi he temi.” (Hepeleo 13:⁠5) Ko te fakapapau ʼaia ʼe tokoni mai ke tou falala ki te ʼu palalau ʼa Sesu ʼae ʼe tuʼu ia Mateo 6:⁠33.

5. He koʼe ko te tali ʼae neʼe fai e Sesu kia Petelo ʼe ina fakalotomalohiʼi ia tatou fuli?

⁵ ʼI te tahi ʼaho, neʼe fehuʼi fenei age e te apositolo ko Petelo kia Sesu: “Kua matou tuku ia meʼa fuli kaʼe matou mulimuli ia te koe. Kotea ʼae ka matou maʼu ai?” (Mateo 19:27) Neʼe mole fakatonutonuʼi e Sesu ia Petelo ʼi tana fai te fehuʼi ʼaia. Kaʼe, neʼe ui e Sesu ki ʼana tisipulo ʼe fakapale anai natou ʼuhi ko ʼanatou sakilifisio. ʼE kaugā hau fakatahi anai te kau apositolo mo te tahi ʼu kaugana agatonu mo Sesu ʼi te lagi ʼi te ka haʼu. Kaʼe neʼe toe ui e Sesu maʼia mo te temi nei ʼe ʼi ai anai ni fakapale. ʼE ui fenei: “Ko ʼae kua ina tuku ʼona ʼapi, peʼe ko ʼona tehina, peʼe ko ʼona tokolua, peʼe ko tana tamai, peʼe ko tana faʼe, peʼe ko ʼana fanau, peʼe ko ʼona kele ʼuhi ko toku huafa, ʼe ina maʼu anai ʼo tuʼa teau age pea mo ina toe maʼu anai ia te maʼuli heʼe gata.” (Mateo 19:29) ʼE feala ki te ʼu tisipulo fuli ʼa Sesu ke natou maʼu hanatou ʼu tamai, mo hanatou ʼu faʼe, mo honatou ʼu tehina, mo tuagaʼane pea mo hanatou ʼu fanau ʼi te kokelekasio ia ʼaho nei. ʼE mahino papau ia, ko te ʼu faʼahi ʼae kua tou maʼu ia ʼaho nei ʼe maʼuhiga age ia ʼi te ʼu meʼa ʼae neʼe tou tuku kaʼe tou gaue maʼa te Puleʼaga ʼo te ʼAtua.

6. He koʼe ʼe fakapapau e Sehova ʼe ina fakapale anai ʼana kaugana?

⁶ ʼO hilifaki ki te ʼu tapuakina ʼae ʼe tou maʼu ia ʼaho nei, ʼe tou fakatalitali mo he fakaʼamu lahi ki te ʼu tapuakina ʼae ʼi te ka haʼu. (1 Timoteo 4:⁠8) ʼE fakapapau e Sehova ʼe ina fakapale anai ʼana kaugana agatonu pea ʼi tatatou iloʼi te faʼahi ʼaia, ʼe tou lotomalohi ai ʼi te ʼu temi faigataʼa. ʼE tou nonofo agatonu anai koteʼuhi ʼe tou tui papau ko Sehova “ ʼe ina fakapale ia natou ʼae ʼe natou kumi fakamalotoloto ia ia.”​​—Hepeleo 11:⁠6.

7. He koʼe ʼe fakatatau tatatou ʼamanaki ki he foʼi tau?

⁷ ʼI te Akonaki ʼi te Moʼuga, neʼe ui fenei e Sesu: “Kotou fakafiafia lahi koteʼuhi ʼe lahi tokotou fakapale ʼi selo, he neʼe feia te fakatagaʼi ʼo te kau polofeta ʼi te temi muʼa.” (Mateo 5:12) ʼE maʼu anai e ʼihi kaugana ʼa te ʼAtua ia te fakapale ʼae ke olo ki selo. Pea ko ʼihi ʼe natou maʼuʼuli anai ʼo heʼe gata ʼi te palatiso ʼi te kele. ʼE ko te tupuʼaga la ʼaia ke “kotou fakafiafia lahi.” (Pesalemo 37:11; Luka 18:30) Kaʼe ko tatatou ʼamanaki, ʼe hage ko “he foʼi tau ki ʼotatou maʼuli, ʼe tuha mo te falala pea mo tuʼu malohi.” (Hepeleo 6:​17-20) Ohage ko he foʼi tau ʼe tokoni ke tau maʼu te vaka lolotoga he afā, ʼe feala ke tokoni mai tatatou ʼamanaki ke tou nonofo malolohi. ʼE feala ke tou maʼu ai te malohi moʼo katakiʼi te ʼu temi faigataʼa.

8. Kotea ʼae ʼe tokoni mai ke fakasiʼisiʼi ai tatatou tuʼania?

⁸ ʼE feala ki tatatou ʼamanaki ke tokoni mai ki te fakasiʼisiʼi ʼo tatatou loto tuʼania. Pea ko te ʼu fakapapau ʼa te ʼAtua ʼe tokoni mai ke mole tou loto tuʼania, ohage pe ko he faitoʼo ʼe feala ke lelei ai totatou mahaki. ʼE tou logoʼi ai ia he fimalie heʼe tou iloʼi ʼe tokaga anai ia Sehova kia tatou moka tou tuku ʼatatou kavega kia te ia. (Pesalemo 55:​22, MN ) ʼE tou tuku katoa tatatou falala ki te ʼAtua he ʼe ina fakahoko anai “ ʼo lahi maumau age ʼi te ʼu meʼa ʼae ʼe tou kole.” (Efeso 3:20) Koia, ʼe tokoni mai ia Sehova “ ʼo lahi maumau age” anai.

9. ʼE feafeaʼi hatatou maʼu te tapuakina ʼa Sehova?

⁹ ʼE tonu ke tou tui malohi kia Sehova pea mo tou fakalogo ki ʼana fakatotonu ke fakapale ai tatou. Neʼe ui fenei e Moisese ki te puleʼaga ʼo Iselaele: “[ʼE] tapuakina’i anai koe e Sehova tou ʼAtua ʼi te fenua ʼae ka ina foaki atu ke ke maʼu, kehe pe ke ke fakalogo lelei ki te leʼo ʼo Sehova tou ʼAtua, ʼo ke tokaga ʼo maʼuliʼi ia te fakatotonu fuli ʼaia ʼae neʼe au fakatotonu atu ʼi te ʼaho nei. Heʼe tapuakinaʼi moʼoni anai koe e Sehova tou ʼAtua, ohage ko tana fakapapau atu.” (Teutalonome 15:​4-6, MN ) ʼE kotou tui papau koa ʼe tapuakinaʼi anai koutou e Sehova mo kapau ʼe kotou haga tauhi agatonu kia te ia? ʼE mahino ia, ʼe kotou maʼu anai te taʼi tui ʼaia.

10, 11. Neʼe fakapale feafeaʼi e Sehova ia Sosefo?

¹⁰ Neʼe tohi te Tohi-Tapu ke fua lelei kia tatou. ʼE feala ke tou maʼu ai ni faʼifaʼitaki ʼo ʼuhiga mo te fakapale e te ʼAtua ʼana kaugana agatonu ʼi te temi muʼa. (Loma 15:⁠4) Ohage la, neʼe tuku mai e Sosefo ia he faʼifaʼitaki lelei. ʼI te kamata, neʼe fakatau ia ia e ʼona tehina ohage ko he tagata kaugana. Pea ki muli age, ʼi Esipito neʼe tukugakoviʼi hala ia ia e te ʼohoana ʼo tona pule pea neʼe ʼave ai ia ia ʼo pilisoniʼi. ʼI te nofo ʼa Sosefo ʼi te fale pilisoni, neʼe mamaʼo koa mai ia Sehova? Kailoa ia. ʼE ui fenei ʼi te Tohi-Tapu: “Nee nofo leva [Sehova] mo Sosefo, pea nee ina fakaha leva tona agalelei kia ia.” Pea “nee nofo [Sehova] mo ia. Pea nee fakamanuia leva e [Sehova] te u mea fuli ae nee ina fai.” (Senesi 39:​21-23) Logo la te ʼu temi faigataʼa ʼaia kaʼe neʼe fakatalitali ʼaki he kataki fualoa ki tona ʼAtua.

¹¹ ʼI ni taʼu ki muli age, neʼe tuku age e Falaone ia Sosefo mai te pilisoni. Pea neʼe liliu te tagata kaugana agavaivai ʼaia ko te tagata ʼae ʼe tuʼulaga lua pea mo malohi ʼaupito ʼi Esipito. (Senesi 41:​1, 37-43) ʼI te temi ʼae neʼe maʼu ai e Sosefo mo tona ʼohoana ʼanā tama ʼe toko lua, “nee foaki leva e Sosefo ki tona foha uluaki te higoa ko Manase, koteuhi nee ina ui: Kua tuku e te Atua ke au galoi oku mamahi fuli mo taku mamao mai te fale katoa o taku tamai. Pea nee ina foaki leva ki te lua foha te higoa ko Efalaimi, koteuhi nee ina ui: Kua foaki mai e te Atua kia au ni fanau i te fenua aeni nee au mamahi lahi ai.” (Senesi 41:​51, 52) Koia, neʼe fakapale e Sehova te agatonu ʼa Sosefo. Pea neʼe ina fakafealagia ke haofaki te kau Iselaele mo te kau Esipito mai te hoge meʼa kai. Neʼe iloʼi e Sosefo ko Sehova ʼae neʼe ina fakapale pea mo tapuakinaʼi ia ia.​​—Senesi 45:​5-9.

12. Kotea ʼae neʼe tokoni kia Sesu ke nofo agatonu ʼi te temi ʼae neʼe ʼahiʼahiʼi ai?

¹² Neʼe toe fakalogo foki ia Sesu Kilisito ki te ʼAtua logo la te ʼu ʼahiʼahi. Neʼe fakapale ia ia e Sehova. Kotea ʼae neʼe tokoni kia Sesu ke nofo agatonu ai? ʼE ui fenei ʼi te Folafola ʼa Te ʼAtua: “ ʼUhi ko te fiafia ʼae neʼe tuku ki ʼona muʼa, neʼe ina katakiʼi he pou fakamamahi, ʼo ina meʼa noaʼi te ufiufi.” (Hepeleo 12:⁠2) Neʼe maʼu e Sesu te fiafia ʼi tana lava fakatapuha te huafa ʼo te ʼAtua. Pea neʼe fakapale ia Sesu ʼaki tana maʼu ia te ʼofa ʼo tana Tamai pea mo ni pilivilesio fakaofoofo. ʼE ui ʼi te Tohi-Tapu “kua heka leva ʼi te toʼomataʼu ʼo te hekaʼaga fakahau ʼo te ʼAtua.” ʼE toe ui fenei ai: “Neʼe hikihiki ia ia e te ʼAtua ki he tuʼulaga maʼoluga pea mo lotolelei ke ina foaki age kia ia he higoa ʼe maʼuhiga age ʼi te ʼu higoa fuli ʼae.”​​—Filipe 2:⁠9.

13, 14. Kotea te manatu ʼa Sehova ʼo ʼuhiga mo te ʼu gaue ʼe tou fai kia te ia?

¹³ ʼE tou tui papau ʼe maʼuhiga kia Sehova ia meʼa fuli ʼe tou fai age moʼo tauhi kia te ia. ʼE lotomahino moka ʼe tou lotolotolua ʼo ʼuhiga mo tatou totonu peʼe ko ʼotatou fealagia. ʼE tokaga lelei ia Sehova kia tatou moka tou tuʼania ki ʼatatou gaue fakamalama peʼe ko te taupau ʼo totatou kiʼi famili. Pea ʼe lotomahino moka ʼe mole kei lahi tatatou gaue ʼi te tauhi kia te ia ohage ko te temi muʼa koteʼuhi ʼe kua tou mahahaki ʼi te temi nei. Koia, ʼe tou tui papau ʼe maʼuhiga kia Sehova tatatou agatonu logo la ʼe tou tau mo ni fihifihia.​​—Lau ia Hepeleo 6:​10, 11.

¹⁴ Kotou toe manatuʼi foki, ko Sehova ʼe “fagono ki te faikole.” ʼE tou tui papau ʼe fagono mai anai ki ʼatatou faikole moka tou faikole kia te ia. (Pesalemo 65:​2, MN ) ʼE foaki mai anai e “te Tamai ʼo te ʼu manavaʼofa pea mo te ʼAtua ʼae ʼe ina fakafimalieʼi te hahaʼi” ia meʼa fuli ʼe ʼaoga kia tatou ke tou nonofo ovi kia te ia. ʼI ʼihi temi, ʼe feala ke ina fakaʼaogaʼi ʼotatou tehina mo tuagaʼane. (2 Kolonito 1:⁠3) ʼE fiafia ia Sehova moka tou manavaʼofa ki te hahaʼi. ʼE ui fenei: “Ko ia ae e ofa ki ae e masiva e ina foaki [kia Sehova], ae e ina toe liufaki anai kia la o mulimuli ki tana gaue.” (Taaga Lea 19:17; Mateo 6:​3, 4) Koia, ka tou lotofoaki mo tokoni ki ʼotatou tehina mo tuagaʼane, ʼe hage pe kia Sehova neʼe tou foaki age kia te ia. Pea ʼe ina fakapale te taʼi agalelei ʼaia ʼe tou fakaha.

15. Ko te fakapale fea ʼae ʼe kotou fakaʼamu ki ai? (Vakaʼi te ʼuluaki pāki.)

¹⁵ ʼE maʼu anai e te kau Kilisitiano fakanofo “te pale ʼo te faitotonu.” ʼE ko he fakapale ia mai ia Sesu. (2 Timoteo 4:​7, 8) Kaʼe, ʼe mole fakaʼuhiga leva kapau ʼe kehekehe takotou ʼamanaki, ʼe mole kotou maʼuhiga ki te ʼAtua. Ko te toko lauʼi miliona “ ʼihi atu ovi” ʼa Sesu, ʼe natou fakatalitali mo he fakaʼamu lahi ki te fakapale ʼae ke natou maʼuʼuli heʼe gata ʼi te palatiso ʼi te kele. “E natou fiafia lahi [anai] i te tokalelei.”​​—Soane 10:16; Pesalemo 37:⁠11.

16. Kotea te fakalotofimalie ʼe tou maʼu ia 1 Soane 3:​19, 20?

¹⁶ ʼI ʼihi temi ʼe tou logoʼi ʼe mole feʼauga te ʼu gaue ʼae ʼe tou fai ʼi te tauhi kia Sehova. Peʼe tou feʼekeʼaki pe ʼe fiafia te loto ʼo Sehova ʼi te ʼu gaue ʼae ʼe tou fai. ʼE lagi tou logoʼi ʼe mole tou tuha ke tou maʼu ia he fakapale. Kaʼe, ʼaua naʼa galo kia tatou “ ʼe maʼoluga age te ʼAtua ʼi ʼotatou loto pea ʼe ina iloʼi ia meʼa fuli.” (Lau ia 1 Soane 3:​19, 20.) ʼE tou tauhi kia Sehova koteʼuhi ʼe tou tui mo ʼofa kia te ia. Koia, ʼe tou tui papau ʼe ina fakapale anai tatou, tatau aipe pe ʼe hage kia tatou ʼe mole faʼa maʼuhiga te ʼu gaue ʼae ʼe tou fai.​​—Maleko 12:​41-44.

17. Kotea ʼihi fakapale ʼe tou leleiʼia ʼi te temi nei?

¹⁷ ʼE tapuakinaʼi e Sehova tana hahaʼi, tatau aipe pe ʼe tou maʼuʼuli ʼi te ʼu ʼaho fakaʼosi ʼo te malama agakovi ʼa Satana. ʼE tokaga ia ke tou mahu ʼi te ʼatamai malama pea ke tou maʼu te tokalelei ʼi tatatou kau ki te fale tau tehina ʼi te malamanei katoa. (Esaia 54:13) ʼEi, ʼe fakapale tatou e Sehova ʼi te temi nei. Ohage ko tona fakapapauʼi e Sesu, ʼe foaki mai e Sehova he foʼi famili fale tau tehina mo tuagaʼane ʼi te malamanei katoa ʼe fonu ʼi te ʼofa. (Maleko 10:​29, 30) Pea tahi, ʼe fakapale anai natou ʼae ʼe natou kumi fakamalotoloto ia te ʼAtua koteʼuhi ʼe natou maʼu te tokalelei ʼo te loto pea mo te fiafia.​​—Filipe 4:​4-7.

18, 19. Kotea ʼae ʼe logoʼi e te ʼu kaugana ʼa Sehova ʼo ʼuhiga mo ʼonatou fakapale?

¹⁸ ʼE iloʼi e te ʼu kaugana ʼa Sehova ʼae ʼi te malamanei katoa te ʼu fakapapau taulekaleka mai tatatou Tamai. Ohage la, ko Bianca ʼe maʼuli ʼi Siamani, ʼe ina ui fenei: “ ʼE mole au maʼu he kupu feʼauga moʼo fakaha taku lotofakafetaʼi kia Sehova. Neʼe tokoni mai ki ʼoku fihifihia pea neʼe nofo tuʼumaʼu mo au ʼi te ʼaho fuli. ʼE au iloʼi ʼe mole ʼi ai he ʼamanaki ʼo te malama ʼaeni. Kaʼe ʼi taku gaue ia tafa ʼo Sehova, neʼe liliu ai ko hoku puipuiʼaga. Tatau aipe pe kotea te ʼu sakilifisio neʼe au fai kia te ia, kaʼe neʼe ina tapuakinaʼi lahi au.”

¹⁹ Ko Paula ʼe taʼu 70, ʼe maʼuli ʼi Kanata. ʼE tau mo he mahaki ʼe kovi ʼo fakatuʼakoi ai te ʼu gaue ʼae ʼe ina fai. ʼE ina ui ʼe faigataʼa tana fai ni gaue ʼuhi ko tona mahaki kaʼe mole fakaʼuhiga leva ʼe fakatuʼakoi ai tana faifakamafola. ʼE ina ui fenei: “ ʼE lahi te ʼu gaue kehekehe ʼe feala ke au fai ohage la ko te faifakamafola ʼi te telefoni mo te fagonogono faigamalie. ʼE au nofo mo he kaupepa ʼe tohi ai te ʼu vaega Tohi-Tapu mo te ʼu manatu ʼae ʼi ʼatatou tohi. ʼE feala ke au vakaʼi ʼi te temi fuli. ʼI taku fai te faʼahi ʼaia, ʼe au lotomalohi ai. ʼE au maʼu ai ni manatu fakalotomalohi. ʼE fakatemi pe ia te ʼu manatu fakalotovaivai mo kapau ʼe tou tokakaga tafito ki te ʼu fakapapau ʼa Sehova. ʼE nofo tuʼumaʼu ia Sehova mo tatou, tatau aipe pe kotea totatou aluʼaga.” ʼE lagi kehekehe tokotou aluʼaga mo te aluʼaga ʼa Bianca mo Paula. Kaʼe, ʼe feala ke kotou fakakaukauʼi pe neʼe fakapale feafeaʼi koutou e Sehova pea mo natou ʼae ʼi ʼokotou tafaʼaki. ʼI meʼa fakafiafia leva hakotou fakakaukauʼi pe neʼe fakapale feafeaʼi koutou e Sehova ia ʼaho nei pea ʼe feafeaʼi anai hana fakapale koutou ʼi te ka haʼu.

20. Kotea ʼae ʼe tou fakaʼamu ki ai mo kapau ʼe tou haga fai te meʼa ʼae ʼe tou lavaʼi ki te tauhi agatonu kia Sehova?

²⁰ ʼAua naʼa galo kia koutou ʼe “fakapale lahi” anai ʼakotou faikole fakamalotoloto. ʼE mahino papau ia, “ ʼi takotou ʼosi fai te finegalo ʼo te ʼAtua,” ʼe kotou “maʼu [anai] te meʼa ʼae neʼe ina fakapapauʼi atu.” (Hepeleo 10:​35, 36) Koia, tou haga fakamalohiʼi tatatou tui pea mo fai ia te meʼa ʼae ʼe tou lavaʼi ki te tauhi kia Sehova. ʼE tou falala ʼe fakapale anai tatou e Sehova.​​—Lau ia Kolose 3:​23, 24.