1, 2. He koʼe ʼe fakapotopoto ke ke fakalogo ki tou Tupuʼaga moka ʼe tonu ke ke filifili pe kotea ʼae ka ke fai anai ʼi tou maʼuli? (Vakaʼi te ʼuluaki pāki.)

KAPAU ko koe ko he tupulaga, ʼe mahino ia ʼe foaki atu he ʼu tokoni ʼo ʼuhiga mo tou ka haʼu. ʼE lagi ʼekenaki koe e te kau faiako, mo te hahaʼi faitokoni ʼi tau fale ako, peʼe ko he tahi pe ke ke hoko atu tau ako ʼi te ʼu fale ako maʼoluga peʼe ke ke kumi hau gaue ʼe totogi lelei. Kae ʼe foaki atu e Sehova te tahi age tokoni. ʼE moʼoni, ʼe ina loto ke ke gaue lelei ʼi te fale ako ke lelei ai tou maʼuli. (Kolose 3:23) Kae ʼe ina toe iloʼi foki ko te ʼu tonu maʼuhiga ʼae ʼe ke toʼo ʼi tou temi tupulaga, ʼe ʼi ai anai ʼona fua ki tou maʼuli ʼi te ka haʼu. Koia ʼae ʼe ina foaki atu ai he ʼu pelesepeto moʼo tokoni pea mo takitaki tou maʼuli ke ke fakafiafiaʼi tona loto ʼi te ʼu ʼaho fakamuli ʼaeni.—Mateo 24:14.

² Ke ke manatuʼi ʼe iloʼi e Sehova ia meʼa fuli. ʼE ina iloʼi pe kotea ʼae ka hoko ʼi te ka haʼu, pea mo te ʼaho fakaʼosi ʼo te malama ʼaeni. (Esaia 46:10; Mateo 24:3, 36) Pea tahi ʼae meʼa, ʼe iloʼi koe  e Sehova. ʼE ina iloʼi pe kotea ʼae ʼe feala ke ke fiafia ai pea mo te faʼahi ʼae ʼe feala ke ke lotomamahi ai. ʼE feala ki te ʼu tokoni ʼa te tagata ke hage mai ʼe lelei, kae kapau ʼe mole fakatafito ki te Folafola ʼa te ʼAtua ʼe mole fakapotopoto anai ia.—Taaga Lea 19:21.

3, 4. ʼI te filifili e Atama mo Eva ke nā fakalogo ki he tokoni ʼe kovi, neʼe kotea te ʼu fua kia naua mo tonā hologa?

³ Ko te fai ʼo he ʼu tokoni ʼe kovi neʼe kua fai ia talu mai fualoa. Ko Satana ʼae neʼe ina ʼuluaki foaki ia he tokoni ʼe kovi ki te tagata. Neʼe ina ui kia Atama mo Eva ʼe lahi anai tonā fiafia mo kapau ʼe nā filifili ʼateaina pe tonā faʼahiga maʼuli. (Senesi 3:1-6) Kae neʼe manatu pe ia Satana kia ia totonu. Neʼe ina loto ke fakalogo age ia Atama mo Eva, mo tonā hologa kia ia kae tuku ia Sehova. Kae neʼe mole fai e Satana he meʼa maʼa naua. Neʼe ko Sehova ʼae neʼe ina foaki age te ʼu meʼa fuli ʼae neʼe nā maʼu. Ohage la neʼe ina fakafealagia ke nā ʼohoana, pea ke nā maʼu he ʼoloto matalelei ke nā maʼuʼuli ai, pea mo honā ʼu sino haohaoa ke feala ai hanā maʼuʼuli ʼo heʼe gata.

⁴ Kae meʼa fakaʼofaʼofa foki he neʼe talagataʼa ia Atama mo Eva ki te ʼAtua. ʼI tanā talagataʼa ʼaia, neʼe nā fakamamaʼo ai mai ia te Ia ʼae neʼe ina foaki age te maʼuli, ʼo iku ai ki te malaʼia. Ohage pe ko he ʼu matalaʼi ʼakau neʼe tuʼusi pea fefe, neʼe toe feia mo Atama mo Eva he ʼe ʼaki pe te temi neʼe nā matuʼa pea mo mamate. Neʼe toe maʼuli mamahi mo tonā hologa ʼuhi ko tanā agahala. (Loma 5:12) Tokolahi te hahaʼi ia ʼaho nei ʼe mole natou fia fakalogo ki te ʼAtua kae ʼe natou fai pe te meʼa ʼae ʼe natou loto ki ai. (Efeso 2:1-3) Kotea ʼona fua? ʼE mole feala kia natou ʼae ʼe fakafeagai kia Sehova ke natou toʼo he ʼu tonu ʼe fakapotopoto.—Taaga Lea 21:30.

5. Kotea ʼae neʼe iloʼi papau e te ʼAtua ʼo ʼuhiga mo te tagata, pea neʼe tonu koa ia tana manatu ʼaia?

⁵ Neʼe iloʼi papau e Sehova ʼe ʼi ai anai he hahaʼi, ʼo kau ai mo he kau tupulaga, ʼe natou fia iloʼi anai ia ia pea mo tauhi kia te ia. (Pesalemo 103:17, 18; 110:3) Ko te kau tupulaga ʼaia ʼe maʼuhiga ʼaupito kia Sehova. ʼE ke kau koa kia natou ʼaia? ʼE mahino papau ia, ʼe ke maʼu he ʼu “meʼa ʼe lelei” mai te ʼAtua, pea ʼe ke fiafia ai. ʼE ui fenei ia Pesalemo 103:5, MN: “ ʼE ina fakafimalieʼi ia koe ʼaki he ʼu meʼa ʼe lelei ʼi tou maʼuli katoa, ke fakafoʼou ai tou temi tupulaga ohage ko he akuila.” ʼE tou vakaʼi anai ia meʼa lelei ʼe fa: ko te meʼa kai fakalaumalie, mo he ʼu kaumeʼa lelei, mo he ʼu fakatuʼutuʼu ʼe ʼaoga, pea mo te ʼateaina moʼoni.—Taaga Lea 10:22.

6. He koʼe ʼe tonu ke ke tokaga ki te ʼu meʼa ʼae ʼe ʼaoga kia koe ʼi te faʼahi fakalaumalie, pea ʼe tokoni feafeaʼi atu ia Sehova?

⁶ ʼE mole tou hage ko te ʼu manu koteʼuhi ʼe ʼaoga kia tatou ia te ʼu meʼa fakalaumalie, pea ʼe tou logoʼi te ʼaoga ʼae ke tou iloʼi totatou Tupuʼaga pea mo atolasio kia te ia. (Mateo 4:4) Ka tou fakalogo ki te ʼAtua, ʼe tou maʼu ai ia te ʼatamai, mo te poto, pea mo te fiafia. Neʼe ui fenei e Sesu: “Manuʼia ia natou ʼae ʼe natou mahino ʼe ʼaoga kia natou te ʼu meʼa fakalaumalie.” (Mateo 5:3) ʼAki “te tagata faifekau agatonu mo poto” ʼe foaki mai e te ʼAtua ia te Tohi-Tapu ʼo feia mo he ʼu tohi ʼe tokoni mai ke tou fakamalohiʼi tatatou tui. (Mateo 24:45) ʼE fakahigoa ia te ʼu tohi ʼaia ko te meʼa kai fakalaumalie he ʼe fafaga ʼaki ai tatatou tui pea mo fakamalohiʼi ai ʼatatou felogoi mo Sehova.  Pea ʼe tou fiafia he ʼe mahu te meʼa kai fakalaumalie ʼaia.—Esaia 65:13, 14.

7. Kotea te ʼu fua lelei ʼe ke maʼu ʼaki te meʼa kai fakalaumalie ʼae ʼe haʼu mai te ʼAtua?

⁷ ʼAki te meʼa kai fakalaumalie ʼe ke lava maʼu te poto mo te fealagia fakakaukau, pea ʼe feala ke puipui ai koe ʼi he ʼu aluʼaga kehekehe. (Lau ia Taaga Lea 2:10-14.) ʼE tokoni atu te ʼu kalitate ʼaia ke ke iloʼi te ʼu akonaki loi ohage la, ʼe mole ʼi ai he Tupuʼaga peʼe ke maʼuli fiafia anai mo kapau ʼe ke maʼu paʼaga mo koloaʼia. ʼE toe tokoni atu te ʼu kalitate ʼaia ke ke liʼaki te ʼu holi ʼae ʼe kovi peʼe ko te ʼu agamahani ʼae ʼe fakatupu kovi kia koe. Koia faiga malohi ke ke maʼu ia te poto pea mo te fealagia fakakaukau. Pea ʼe ke mahino ai anai ʼe ʼofa Sehova ia koe pea ʼe ina loto ke ke maʼuli fiafia.—Pesalemo 34:9; Esaia 48:17, 18.

8. He koʼe ʼe tonu ke ke fakaovi ki te ʼAtua ʼi te temi nei, pea kotea te ʼu fua lelei ʼe ke maʼu anai ʼi te ka haʼu?

⁸ Kua vave pe te temi ʼae ka pulihi ai te ʼu faʼahi kehekehe fuli ʼo te malama ʼa Satana. ʼI te temi ʼaia, ʼe ko Sehova tokotahi pe ʼae ʼe feala ke ina puipui koe pea mo foaki atu ia te ʼu meʼa ʼae ʼe ʼaoga kia koe, ʼo lagi kau ai mo tau meʼa kai. (Hapakuke 3:2, 12-19) Koia ʼae ʼe tonu ai ke ke fakaovi ki te ʼAtua ʼi te temi nei pea mo ke fakamalohiʼi ia tau falala ʼae kia te ia. (2 Petelo 2:9) Kapau ʼe ke fai feia, tatau aipe pe kotea ʼae ʼe hoko ʼi ʼou tafaʼaki, kae ʼe ke hage pe anai ko Tavite ʼi tana ui fenei: “ ʼE au tuku tuʼumaʼu ia Sehova ʼi ʼoku muʼa. Mai tona aluʼaga ʼae ʼe nofo ʼi toku toʼomataʼu, ʼe mole au tukia anai ʼi he temi.”—Pesalemo 16:8, MN.

9. (1) Ka tou lau ia Soane 6:44, kotea ʼae ʼe fai e Sehova? (2) Kotea ʼae ʼe fakaofoofo ʼi tatatou hoki felaveʼi ʼae mo he tahi Fakamoʼoni?

⁹ ʼI tau ʼuluaki felaveʼi mo he tahi ʼe mole tauhi kia Sehova, kotea ʼae ʼe ke iloʼi ʼo ʼuhiga mo ia? ʼE lagi ke iloʼi ia tona higoa mo tona fofoga pea mo te agaaga ʼo tona sino, ʼo gata ai pe ia. Kae ʼe mole tatau ia moka ʼe ko hatatou hoki felaveʼi ʼae mo he tahi Fakamoʼoni. ʼE ke iloʼi ʼe ʼofa ia Sehova. ʼE ke iloʼi neʼe sio ia Sehova ki te meʼa ʼae ʼe lelei ʼi tona loto, ʼo ina fakaafe ai ia ia ke liliu ko hana kaugana. (Lau ia Soane 6:44.) Tatau aipe pe kotea tona  haʼuʼaga, kae ʼe lahi te ʼu faʼahi kua ke iloʼi ʼo ʼuhiga mo ia, ʼo feia mo ia ʼo ʼuhiga mo koe.

10, 11. Kotea ʼae ʼe maʼu tatau e te hahaʼi ʼa Sehova, pea kotea te ʼu fua lelei ʼe ke maʼu mai ai?

¹⁰ Ko te faʼahi maʼuhiga ʼae ʼe ke iloʼi moka ʼe ke felaveʼi mo he tahi Fakamoʼoni, ko takolua palalau te “lea maʼa” ʼo te moʼoni. (Sofoni 3:9, MN) Ko tona fakaʼuhiga, ʼe kolua tui ki te ʼAtua, pea ʼe tatau te ʼu lekula ʼae ʼe kolua maʼuliʼi ʼo ʼuhiga mo te aga, ʼo feia mo takolua ʼamanaki ki te ka haʼu. ʼE tokoni atu te ʼu faʼahi ʼaia ke kolua fefalalaʼaki, ʼo feala ai hakolua liliu ko he ʼu kaumeʼa lelei ʼo talu ai.

¹¹ Koia, ʼe feala ai ke ke ui ʼe ke maʼu hou ʼu kaumeʼa ʼe lelei tukupau ʼi tau tauhi kia Sehova. Pea ʼe ʼi ai ʼou kaumeʼa ʼi te malamanei katoa, logo la ʼe heʼeki ke felaveʼi mo natou. ʼI tau manatu, ʼe ʼi ai koa he tahi faʼahi ʼe feala ke ke maʼu ai ia te meʼa ʼofa maʼuhiga ʼaia?

12. Kotea te ʼu fakatuʼutuʼu ʼe feala ke ke fai?

¹² Lau ia Ekelesiasi 12:1-3. ʼE ʼi ai koa hau ʼu fakatuʼutuʼu ʼe ke faigaʼi ke ke fakahoko? Neʼe lagi ke fakatuʼutuʼu ke ke lau te Tohi-Tapu ʼi te ʼaho fuli peʼe ko te hikihiki ʼo ʼau faitali mo ʼau faipalalau ʼi te ʼu fono. Peʼe lagi ʼe ke faigaʼi ke ke faiva ʼi te fakaʼaogaʼi ʼo te Tohi-Tapu ʼi te faifakamafola. Kotea ʼae ʼe ke logoʼi moka ʼe ke fakatokagaʼi ia tau tuputupu peʼe ko ʼihi ʼae ʼe natou fakatokagaʼi te faʼahi ʼaia? ʼE mahino papau ia, ʼe ke fiafia. Kotea tona tupuʼaga? Koteʼuhi, ko tau faiga ʼae ke ke fakahoko ʼau fakatuʼutuʼu ʼe ke fai ai te finegalo ʼo Sehova ohage pe ko Sesu.—Pesalemo 40:9; Taaga Lea 27:11.

13. He koʼe ʼe fakatupu fiafia lahi age tatatou tauhi ki te ʼAtua ʼi hatatou tokakaga ki he ʼu fakatuʼutuʼu ʼi te malama ʼaeni?

¹³ Kapau ʼe ke tokaga tafito ki tau tauhi kia Sehova, ʼe ke fiafia ʼi te gaue ʼaia ʼe ke fai pea ʼe ʼi ai te ʼuhiga moʼoni ʼo tou maʼuli. Neʼe tohi fenei e te apositolo ko Paulo: “Kotou tutuʼu malohi, mo taʼofi maʼu, pea ke lahi tuʼumaʼu ʼakotou gaue ʼi te ʼAliki, ʼi takotou iloʼi ʼae ʼe mole vaʼiganoa takotou gaue kinakina ʼi te ʼAliki.” (1 Kolonito 15:58) Kae ko te hahaʼi ʼae ʼe tokakaga tafito ki ʼanatou fakatuʼutuʼu ʼi te malama ʼaeni, ohage la ke natou maʼu paʼaga peʼe ke natou iloa, ʼe mole natou fiafia moʼoni. Tatau aipe pe hoko ʼanatou fakatuʼutuʼu ʼaia, kae ʼe hage pe ia kia natou ʼe mole he ʼuhiga ʼo ʼonatou maʼuli. (Luka 9:25) ʼE tou vakaʼi anai te aluʼaga ʼaia ʼi te faʼifaʼitaki ʼo te Hau ko Salomone.—Loma 15:4.

14. Kotea ʼae ʼe feala ke ke ako mai te maʼuli ʼo Salomone?

¹⁴ Ko Salomone, neʼe ko he tagata koloaʼia ʼaupito pea mo malohi, pea neʼe ina fai leva tana fakatuʼutuʼu. Neʼe ina ui fenei pe kia ia: “E au ahiahii anai ia koe aki te fiafia, pea e ke kai anai ki te manuia.” (Ekelesiasi 2:1-10) Koia neʼe laga ai e Salomone he ʼu ʼapi matalelei, mo ina fai he ʼu ʼoloto taulekaleka, mo he ʼu malaʼe ʼe to ai te vao ʼakau kehekehe pea neʼe ina maʼu ia meʼa fuli. Kae neʼe ina maʼu ai koa te fiafia? ʼI te sio ʼa Salomone kia meʼa fuli ʼae neʼe ina fai, neʼe ina ui fenei: “Koeni, e vaiga mea fuli.” Neʼe ina toe ui fenei: “E mole hona aoga.” (Ekelesiasi 2:11) ʼE ke taʼofi anai koa te ako ʼaia mai te maʼuli ʼo Salomone?

15. Ohage ko tona ui ia Pesalemo 32:8, he koʼe ʼe ʼaoga ke ke maʼu te tui?

¹⁵ ʼE hoki taʼofi pe e ʼihi he ʼu ako moka natou fai he ʼu lakahala pea moka natou tau mo te ʼu nunuʼa ʼo ʼanatou aga ʼae ʼe kovi. Kae ʼe mole loto e Sehova ke hoko te aluʼaga ʼaia kia koe. ʼE loto e Sehova ke ke fagono pea mo ke talagafua kia te ia. ʼE ʼaoga ke tou maʼu ia te tui moʼo fai te faʼahi ʼaia, kae ʼe mole ke fakahemala anai ʼi he temi ki te ʼu tonu ʼae ʼe ke  toʼo ʼuhi ko tau tui. Pea ʼe mole galoʼi anai e Sehova ʼi he temi ia “te ʼofa ʼae neʼe [ke] fakaha ki tona huafa.” (Hepeleo 6:10) Koia ke ke gaue kinakina ʼo fakamalohiʼi ia tau tui. ʼE ke fai ai anai he ʼu tonu ʼe lelei pea ʼe ke mahino ai anai ki te loto ʼae e tau Tamai ʼe ʼi selo ke ke maʼuli fiafia.—Lau ia Pesalemo 32:8.

16. He koʼe ʼe tonu ke tou fakamaʼuhigaʼi pea mo fakaʼaogaʼi fakapotopoto ia te ʼateaina?

¹⁶ Neʼe tohi fenei e Paulo: “Ko te potu ʼae ʼe maʼu ai te laumalie ʼo Sehova, ʼe maʼu ai te ʼateaina.” (2 Kolonito 3:17) ʼE ʼofa ia Sehova ki te ʼateaina, pea neʼe ina fakatupu ia koe ke ke toe ʼofa ki te ʼateaina. Kae ʼe loto ia ke ke fakaʼaogaʼi fakapotopoto ia tou ʼateaina he ʼe feala anai ke liliu ko hou puipuiʼaga. ʼE lagi sioʼi e ʼihi ʼi ʼou kaugā ako te ʼu ʼata peʼe ko te ʼu pāki ʼae ʼe ha ai te ʼu felaveʼi fakasino heʼe ʼaoga, peʼe natou fai he ʼu aga heʼe ʼaoga, peʼe natou fai he ʼu faigaoʼi fakamataku, peʼe natou fakaʼaogaʼi te toloke mo te kava. ʼI te kamata, ʼe lagi natou maʼu ai he faʼahiga fiafia, kae ko te ʼu nunuʼa ʼae ʼe natou utu mai te ʼu faʼahi ʼaia ʼe fakaʼofaʼofa. Ohage la, ʼe feala ke natou maʼu he ʼu mahaki, peʼe kua liliu te ʼu aluʼaga ʼaia ko honatou mahaki, peʼe ke natou mamate ai. (Kalate 6:7, 8) ʼE lagi manatu e te kau tupulaga ʼae ʼe natou fai te ʼu faʼahi ʼaia ʼe natou ʼateaina, kae ʼi tona fakahagatonu ʼe mole ko ia.—Tito 3:3.

17, 18. (1) He koʼe ʼe tou maʼu te ʼateaina moʼoni moka tou fakalogo ki te ʼAtua? (2) Neʼe feafeaʼi te lahi age ʼo te ʼateaina ʼa Atama mo Eva ʼi te hahaʼi ia ʼaho nei?

¹⁷ Kae ko tatatou fakalogo ʼae kia Sehova ʼe fua lelei kia tatou. ʼE lelei ki totatou maʼuli malolo pea ʼe tou maʼu ai te ʼateaina moʼoni. (Pesalemo 19:8-12) Pea ka ke fakaʼaogaʼi lelei ia tou ʼateaina, ko tona fakaʼuhiga, moka ʼe ke filifili ke ke fakalogo ki te ʼu lao haohaoa mo te ʼu pelesepeto ʼa te ʼAtua, ʼe ke fakaha ai ki te ʼAtua pea mo ʼau matuʼā kua ke fakapotopoto. ʼE mahino ia, ʼe falala anai ʼau matuʼā kia koe pea ʼe toe lahi anai mo te ʼateaina ʼae ka nā tuku atu. Pea ʼe fakapapau mai e Sehova, kua ina vave foaki pe anai ki ʼana kaugana agatonu fuli ia he ʼateaina haohaoa, ʼae ʼe fakahigoaʼi ʼi te Tohi-Tapu ko “te ʼateaina fakakololia ʼo te ʼu fanau ʼa te ʼAtua.”—Loma 8:21.

¹⁸ Neʼe ko te faʼahiga ʼateaina ʼaia neʼe maʼu e Atama mo Eva. ʼI te ʼoloto ʼo Eteni, neʼe ko te meʼa pe ʼe tahi neʼe fakatotonu age e te ʼAtua ke nā fai. Neʼe ʼi ai te fuʼu ʼakau neʼe mole tonu ke nā kai ʼona fuaʼi ʼakau. (Senesi 2:9, 17) ʼI tau manatu la, neʼe heʼe faitotonu koa pea mo fefeka fau ia te ʼAtua ʼi tana foaki kia naua ia te lao ʼaia? Kailoa ia. Ke ke fakakaukauʼi age muʼa pe ko lao ʼe fia neʼe fai e te tagata pea mo tanatou fakakinauʼi te hahaʼi ke natou fakalogo ki ai. Kae neʼe ko te lao pe ʼe tahi neʼe foaki e Sehova kia Atama mo Eva.

19. Ko totatou faʼahiga akoʼi e Sehova mo Sesu ʼe tokoni feafeaʼi mai ke tou maʼu ia te ʼateaina?

¹⁹ ʼE ha te fakapotopoto ʼa Sehova ʼi ʼana felogoi mo tatou. ʼE mole ina foaki mai he ʼu tuʼuga lao, kae ʼe ina akoʼi tatou ʼaki he kataki fualoa ke tou fakalogo ki te lao ʼo te ʼofa. ʼE ina akoʼi tatou ke tou maʼuliʼi ʼana pelesepeto kae ke tou fehiʼa ki te meʼa ʼae ʼe kovi. (Loma 12:9) Neʼe faʼifaʼitakiʼi ia ia e tona ʼAlo ia Sesu, he ʼe  ʼi tana Akonaki ʼi Te Moʼuga ʼo Sinai, neʼe tokoni mai ke tou mahino pe koʼe ʼe fai e te hahaʼi ia te ʼu meʼa ʼae ʼe kovi. (Mateo 5:27, 28) Pea ʼi te malama foʼou, ʼi tona ʼuhiga Hau ʼo te Puleʼaga ʼa te ʼAtua, ʼe hoko atu pe anai e Sesu ia tana akoʼi tatou ke tou maʼu tana manatu ʼo ʼuhiga mo te meʼa ʼae ʼe lelei pea mo ʼae ʼe kovi. (Hepeleo 1:9) Pea tahi ʼae faʼahi, ʼe tokoni mai anai ke tou maʼu he sino mo he ʼatamai ʼe haohaoa. Tou fakakaukauʼi age muʼa, ʼe mole tou toe fia fai anai ia te meʼa ʼae ʼe kovi pea ʼe mole tou toe maʼuli mamahi anai ʼuhi ko te agahala. Pea ʼe tou maʼu anai leva ia “te ʼateaina fakakololia” ʼae neʼe fakapapauʼi mai e Sehova.

20. (1) ʼE fakaʼaogaʼi feafeaʼi e Sehova ia tona ʼateaina? (2) ʼE ke lava faʼifaʼitakiʼi feafeaʼi ia Sehova?

²⁰ Kae maʼia ʼi te malama foʼou, ʼe ʼi ai anai he ʼu tuʼakoi ʼo totatou ʼateaina. ʼO feafeaʼi? ʼE kei ʼaoga pe anai ke takitaki tatou e totatou ʼofa ʼae ki te ʼAtua mo ʼotatou tatau. Ka tou tuku ke takitaki tatou e te ʼofa, ʼe tou faʼifaʼitakiʼi ai ia Sehova. Logo la ʼe maʼu e Sehova ia he ʼateaina ʼe mole hona tuʼakoi, kae neʼe ina tuku ke takitaki ia meʼa fuli ʼae ʼe ina fai e te ʼofa, ʼo kau ai mo ʼana felogoi ʼae mo tatou. (1 Soane 4:7, 8) Koia ʼe tou mahino ai, ʼe hoki feala ke tou maʼu te ʼateaina moʼoni moka tou faʼifaʼitakiʼi ia te ʼAtua.

21. (1) Kotea ʼae neʼe logoʼi e Tavite ʼo ʼuhiga mo Sehova? (2) Kotea ka tou vakaʼi anai ʼi te alatike ʼae ka hoa mai?

²¹ ʼE ke lotofakafetaʼi koa ki te ʼu ‘meʼa lelei’ fuli ʼae ʼe foaki atu e Sehova? Neʼe ina foaki atu te meʼa kai fakalaumalie, mo he ʼu kaumeʼa lelei, mo he ʼu fakatuʼutuʼu ʼe ʼaoga pea mo te ʼamanaki ʼae ke ke maʼu ia he ʼateaina haohaoa ʼi te ka haʼu, pea mo ʼihi meʼa ʼofa fakaofoofo. (Pesalemo 103:5, MN) ʼE lagi ke logoʼi te faʼahi ʼae neʼe logoʼi e Tavite ʼi tana fai te ʼu palalau ʼaeni ʼe tuʼu ia Pesalemo 16:11: “E ke fakaha mai anai kia au te ala o te mauli; e i ai ni fiafia lahi i ou mua, ni mea lelei heegata i tou nima atamai.” ʼI te alatike ʼae ka hoa mai, ʼe tou vakaʼi anai he tahi ʼu moʼoni maʼuhiga ʼe tou maʼu ʼi te kapite 16 ʼo Peasalemo. ʼE tokoni atu anai te ʼu moʼoni ʼaia ke ke iloʼi pe ʼe ke lava maʼu feafeaʼi ia te maʼuli ʼae ʼe lelei tokotahi.