KO DIANA ʼe taʼu 80 tupu. Neʼe kau tona ʼohoana ʼi te mahaki ʼae ko te Lotogalogalo pea neʼe nofo ʼi he fale taupau ʼo te hahaʼi matuʼa lolotoga ni taʼu ʼo kaku ki tana mate. Kua mamate mo ʼana tama ʼe toko lua pea ʼe ina maʼu te kosea ʼo te fatafata. Kae, moka sisio te ʼu tehina mo tuagaʼane kia Diana ʼi te ʼu fono mo te faifakamafola, ʼe fiafia tuʼumaʼu pe ia.

Ko John, neʼe ko te taupau fealuʼaki lolotoga taʼu ʼe 40 tupu. Neʼe ina leleiʼia ʼaupito tana gaue ʼaia pea ʼi tana manatu ʼe mole ina toe fai anai he tahi age gaue. Kae, neʼe tonu leva ke ina tuku tana gaue taupau fealuʼaki ke feala hana tokaga ki he tahi ʼo tona famili ʼe mahaki. Moka felaveʼi ia John mo te ʼu tehina mo tuagaʼane ʼae ʼe natou feiloʼiʼaki ʼi te ʼu fakatahi lalahi, ʼe natou tokagaʼi ʼe mole fetogi ia John ʼe fiafia tuʼumaʼu pe ia.

Kotea ʼae ʼe tokoni kia Diana mo John ke nā maʼu ia te fiafia? ʼE lava maʼu feafeaʼi e he tahi ʼe lotomamahi ia te fiafia? Kapau ʼe mole kei fakahoko e he tahi hona pilivilesio ʼe ina leleiʼia, ʼe ina lava taupau feafeaʼi ia tona fiafia? ʼE ui fenei ʼi te Tohi-Tapu: “Ko ia ʼae ʼe faitotonu ʼe fiafia anai ia Sehova.” (Pesalemo 64:10, MN) Ke feala hatatou mahino ki te moʼoni ʼaia, tou vakaʼi pe kotea ʼae ʼe ina foaki mai ia te fiafia ʼae ʼe tologa pea kotea ʼae ʼe mole ina foaki mai te fiafia.

ʼE ʼi ai ʼihi aluʼaga ʼe tou maʼu ai te fiafia. Ohage la, ko te ʼohoana ʼa he taumatuʼa ʼe femanakoʼaki. Peʼe ko te maʼu fanau ʼa he tahi peʼe ko he pilivilesio foʼou ʼe foaki ki he tahi ʼi te tauhi kia Sehova. ʼE fakatupu fiafia te ʼu aluʼaga ʼaia, koteʼuhi ko te ʼu meʼa ʼofa ʼaia ʼe haʼu fuli mai ia Sehova. Ko te matapuna ʼo te ʼohoana, neʼe ina foaki mai te fealagia ʼae ke tou maʼu fanau, pea mo he ʼu pilivilesio ʼi tana kautahi.—Senesi 2:18, 22; Pesalemo 127:3; 1 Timoteo 3:1.

Kae, ʼe feala pe ke fakatemi te fiafia ʼae ʼe tou maʼu ʼaki te ʼu aluʼaga ʼaia. ʼE moʼoni ko he meʼa fakaʼofaʼofa, kae ʼe feala ki he tahi kua ʼohoana ke hala ki tuʼa peʼe ke mate. (Esekiele 24:18; Oseo 3:1) ʼE feala ke talagataʼa te ʼu fanau ki ʼanatou matuʼā mo te ʼAtua, pea mo fakamavae natou mai te kokelekasio. Ohage la, neʼe mole leleiʼia e Sehova ia te faʼahiga tauhi ʼa te ʼu foha ʼo Samuele kia te ia. Pea ko Tavite neʼe lahi ʼona faigataʼaʼia neʼe tau mo ia  ʼi tona loto famili ʼuhi ko tana agahala mo Pate-Sepa. (1 Samuele 8:1-3; 2 Samuele 12:11) Ka hoko he ʼu aluʼaga feia, ʼe tou maʼu ai te lotomamahi kae mole ko te fiafia.

ʼE toe feia pe, ʼi ʼihi temi ʼe mole kei feala hatatou fakahoko ia he pilivilesio ʼi te tauhi kia Sehova, koteʼuhi ʼe tou mahamahaki, peʼe tonu ke tou tokakaga ki totatou famili, peʼe ʼi ai he ʼu fetogi ʼi te kautahi. Tokolahi ʼe natou fakalaka ʼi te ʼu aluʼaga ʼaia, pea ʼe natou ui ʼe mole galo anai ʼi he temi te fiafia ʼae neʼe natou logoʼi ʼi tanatou fakahoko ʼonatou pilivilesio.

ʼE ha mai ai, ko ʼihi aluʼaga ʼe fakatupu fiafia kae ʼe fakatemi. Kae, ʼe ʼi ai koa he tahi age faʼahiga fiafia ʼe feala ke tou taupau tuʼumaʼu logo la ʼotatou faigataʼaʼia? ʼE mahino ia, koteʼuhi ko Samuele, mo Tavite pea mo ʼihi atu neʼe mole puli tonatou fiafia logo la ʼonatou ʼahiʼahi.

Neʼe iloʼi e Sesu pe kotea ia te fiafia moʼoni. ʼE ui ʼi te Tohi-Tapu, neʼe ‘fiafia ia muʼa ʼo Sehova ʼi te temi fuli pe’ ʼi te lagi. (Taaga Lea 8:30) Kae ʼi tana hifo mai leva ki te kele, neʼe tau ʼi ʼihi temi mo he ʼu faigataʼaʼia. Logo la te ʼu aluʼaga ʼaia, kae neʼe fiafia ia Sesu ʼi te fai te finegalo ʼo tana Tamai. (Soane 4:34) ʼE feafeaʼi ki te ʼu hola fakaʼosi ʼae neʼe lotomamahi ai? ʼE tou lau fenei: “ ʼUhi ko te fiafia ʼae neʼe tuku ki ʼona muʼa, neʼe ina katakiʼi he pou fakamamahi.” (Hepeleo 12:2) Koia ko he tupuʼaga lelei ʼaia ke tou vakaʼi ai te ʼu akonaki ʼa Sesu ʼe lua ʼo ʼuhiga mo te fiafia moʼoni.

ʼI te tahi ʼaho, neʼe toe liliu kia Sesu ʼana tisipulo ʼe toko 70 hili tanatou faifakamafola. Neʼe natou fiafia he neʼe natou fakahoko he ʼu milakulo mo natou kapu te ʼu temonio. Kae neʼe ui fenei e Sesu kia natou: “Tuku takotou fakafiafia ʼi te fakalogo atu ʼa te ʼu laumalie kovi, kaʼe kotou fakafiafia he ʼe kua tohi ʼokotou higoa ʼi selo.” (Luka 10:1-9, 17, 20) ʼEi, ʼe maʼuhiga age te fakafiafiaʼi ʼo te loto ʼo Sehova ʼi te ʼu pilivilesio fuli he ʼe tou maʼu te fiafia moʼoni.

ʼI te tahi ʼaho, neʼe faiakonaki Sesu ia muʼa ʼo he toe hahaʼi kaugā malie. Neʼe punamaʼuli ai he fafine Sutea ki tana faʼahiga faiakonaki pea ina ui, ʼe mahino papau ia ko te faʼe ʼa Sesu ʼe ko he fafine ʼe fiafia ʼaupito ’i tana ma’u hana ki’i tama feia. Kae neʼe tali fenei Sesu: “Kailoa, kaʼe manuʼia ia natou ʼae ʼe natou logo ki te folafola ʼa te ʼAtua pea mo natou  taupau!” (Luka 11:27, 28) Kapau ʼe tou fiameʼameʼa ʼo ʼuhiga mo ʼatatou fanau pea ʼe ko he meʼa fakafiafia ia. Kae ko te aluʼaga ʼae ʼe tou maʼu ai te fiafia moʼoni, ko te maʼu ʼo he ʼu felogoi lelei mo Sehova pea mo tou fakalogo kia te ia.

Koia ʼe tou maʼu he toe fiafia lahi mo kapau ʼe tou tui papau ʼe tou fakafiafiaʼi te loto ʼo Sehova. Ko tatatou tui ʼaia ʼe mole feala ke puli tatau aipe pe fakatupu mamahi ʼotatou ʼahiʼahi. Kae ʼe toe lelesili age tatatou fiafia mo kapau ʼe tou nonofo agatonu ʼi ʼotatou ʼahiʼahi. (Loma 5:3-5) Pea tahi, ʼe foaki e Sehova ia tona laumalie kia natou ʼae ʼe falala kia te ia, pea ko te fiafia ʼe ko he agaaga ia ʼo te fua ʼo te laumalie. (Kalate 5:22) ʼE tokoni mai te faʼahi ʼaia ke tou mahino pe koʼe ʼe ui fenei ia Pesalemo 64:10, MN: “Ko ia ʼae ʼe faitotonu ʼe fiafia anai ia Sehova.”

ʼE tou toe mahino ai foki pe koʼe ʼe lava taupau e Diana mo John ia tonā fiafia logo la ʼonā faigataʼaʼia. ʼE ui fenei e Diana: “Neʼe au maʼu toku nonoʼaga ia Sehova, ohage pe ko he kiʼi toe ʼe kumi nonoʼaga ki ʼana matuʼā.” ʼE ina toe ui fenei: “ ʼE au sio ki tana tapuakina, koteʼuhi ʼe feala ke au faifakamafola tuʼumaʼu mo te fiafia.” Kotea ʼae ʼe tokoni kia John ke ina taupau tona fiafia pea ke maʼumaʼua ʼi te faifakamafola hili tana tuku te gaue taupau fealuʼaki ʼae neʼe ina leleiʼia ʼaupito? ʼE ina ui fenei: “Talu mai te taʼu 1998, ʼi taku liliu ko he faiako ʼi te Ako Ki Te Gaue Fakaminisitelio, neʼe lahi te temi ʼae neʼe au fai ai taku ako tokotahi.” ʼE ina fakamahino, neʼe mole faigataʼa kia ia mo tona ʼohoana te fetogi ʼae neʼe hoko ki tonā maʼuli, koteʼuhi neʼe nā lotolelei tuʼumaʼu ke nā fakahoko he gaue pe neʼe hinoʼi naua ki ai e Sehova. ʼE ui fenei e John: “ ʼE mole ma fakahemala ʼi te fai ʼo te fetogi ʼaia.”

Ko te tokolahi neʼe natou sisio ki te moʼoni ʼo te ʼu palalau ʼo Pesalemo 64:10, MN. Ohage la ko te taumatuʼa neʼe gaue ʼi te Petele ʼo Amelika lolotoga taʼu ʼe 30 tupu. Neʼe kole age leva kia naua ke nā mavae ʼi te Petele ke nā pionie makehe. Neʼe nā ui fenei: “ ʼE tou lotomamahi foki moka ʼe mole kei tou maʼu te meʼa ʼae ʼe tou leleiʼia,” kae neʼe nā toe ui fenei: “ ʼE mole tou lotomamahi leva ʼo talu ai.” Neʼe mole nā fakatuatuai ʼi te faifakamafola mo tanā kokelekasio. Neʼe nā toe ui fenei foki: “Neʼe ma faikole ʼo fakaha lelei te ʼu meʼa ʼae ʼe ma loto ki ai. Pea ʼi te temi leva ʼae neʼe ma fakatokagaʼi ai te tali ʼa Sehova, neʼe ma lotomalohi ai mo fiafia. Hili he kiʼi temi ki tamā tau atu, neʼe liliu ʼihi ʼi te kokelekasio ʼo pionie, pea neʼe tapuakinaʼi maua e Sehova he neʼe ina foaki mai ʼama ako Tohi-Tapu ʼe lua pea ʼe tuputupu lelei.”

ʼE moʼoni, ʼe mole faigafua tuʼumaʼu te maʼu ʼo te fiafia. ʼI ʼihi temi ʼe tou lotomamahi ai. Kae ʼe fakalotofimalieʼi tatou e Sehova ʼaki te ʼu palalau ʼo te Pesalemo 64:10, MN. Tatau aipe pe ʼe tou lotovaivai ʼi ʼihi temi, kae ʼe tou tui papau ʼe tou “fiafia anai ia Sehova” mo kapau ʼe tou nonofo agatonu ʼi te ʼu ʼahiʼahi ʼae ʼe tou tau mo ia. Tou toe fakakaukauʼi mo te temi ʼae ka fakahoko moʼoni ai e Sehova tana fakapapau ʼo ʼuhiga mo “te ʼu lagi foʼou pea mo te kele foʼou.” Ko te ʼu kaugana ʼa te ʼAtua, ʼe natou haohaoa fuli anai pea ʼe natou ‘fakafiafia ʼaupito, pea mo lotofiafia anai ʼo talu ai,’ ʼuhi ko te ʼu gaue fuli ʼae ka fakahoko e Sehova.—Esaia 65:17, 18, MN.

Tou fakakaukauʼi age muʼa pe kotea anai tona fakaʼuhiga kia tatou. ʼE mole tou toe mahahaki anai pea ʼe tou malolohi pe anai ʼi tatatou tuʼutuʼu ake ʼi te uhu fuli. Ko te ʼu mamahi fuli neʼe tou tau mo ia ʼi muʼa atu, ʼe mole tou toe manatuʼi anai. ʼE fakapapau mai e Sehova “ ʼe mole tou toe manatuʼi anai te ʼu meʼa ʼafeā, pea ko te ʼu meʼa ʼaia ʼe mole toe hake anai ki te loto.” ʼE tou fakatalitali anai ʼotatou ʼofaʼaga ʼae neʼe mamate. Pea ʼe tou hage pe anai ko te ʼu matuʼā ʼa te kiʼi taʼahine taʼu 12 ʼae neʼe fakatuʼuake e Sesu: “Neʼe [nā] fiafia ʼaupito.” (Maleko 5:42) ʼE faitotonu moʼoni anai te hahaʼi fuli pe, pea ʼe natou “fiafia anai ia Sehova” ki te heʼe gata.