ʼE ʼEkenaki Tatou e Te “Meaofa Matalelei” ʼo Te ʼAtua
“Ke fakafetai ki te Atua o uhiga mo tona meaofa matalelei osi.” —2 KOLINITO 9:15.
KATIKO: 121, 63
1, 2. (1) Kotea ʼae ʼe toe kau ki te “meaofa matalelei” ʼo te ʼAtua? (2) Kotea ia te ʼu fehuʼi ka tou vakaʼi anai ʼi te alatike ʼaeni?
NEʼE foaki mai e Sehova ia te meʼa ʼofa lahi ʼi tana fekauʼi mai ki te kele ia tona ʼAlo ko Sesu. (Soane 3:16; 1 Soane 4:9, 10) Neʼe fakahigoaʼi e te apositolo ko Paulo ia te meʼa ʼofa ʼaia ko te “meaofa matalelei.” (2 Kolinito 9:15) He koʼe neʼe fakaʼaogaʼi e Paulo ia te kupusiga palalau ʼaia?
2 Koteʼuhi neʼe iloʼi e Paulo ko te sakilifisio ʼa Sesu ʼe ha ai ko te ʼu fakapapau taulekaleka fuli ʼa te ʼAtua ʼe hoko moʼoni anai. (Lau ia 2 Kolinito 1:20.) Koia, ko te “meaofa matalelei” ʼo te ʼAtua ʼe kau ki ai te sakilifisio ʼa Sesu pea mo te agalelei mo te ʼofa ʼo Sehova ʼae ʼe ina fakaha mai. ʼE mole maʼu he kupu feʼauga moʼo fakaha ia te maʼuhiga ʼo te meʼa ʼofa ʼaia pea ke tou mahino katoa ki ai. Kotea ʼae ʼe tonu ke tou logoʼi ʼo ʼuhiga mo te meʼa ʼofa makehe ʼaia? Pea ʼe ʼekenaki feafeaʼi tatou e te meʼa ʼofa ʼaia ke tou nofo teuteu ki te Fakamanatu ʼo Te Mate ʼo Kilisito ʼi te Feliafa ʼaho 23 ʼo Malesio 2016?
TE MEʼA ʼOFA MAKEHE ʼO TE ʼATUA
3, 4. (1) Kotea ʼae ʼe kotou logoʼi moka foaki atu e he tahi ia he meʼa ʼofa? (2) Ka sakilifisioʼi e he tahi ia tona maʼuli maʼa tatou, kotea ʼae ʼe tou logoʼi?
3 ʼE tou fiafia anai moka foaki mai e he tahi ia he meʼa ʼofa. Kaʼe, ko ʼihi meʼa ʼofa ʼe maʼuhiga age peʼe makehe. Koteʼuhi ʼe feala ke ina fetogi ʼotatou maʼuli. Ohage la, kotou fakakaukauʼi age muʼa neʼe kotou kau ki he faifakapo. Pea ko te tuʼā ʼo te fakapo ʼaia ʼe ko te mate. Kaʼe fokifa pe, ʼe ʼi ai he tahi ʼe mole kotou iloʼi, ʼe lotolelei anai ke mate maʼa koutou. Kotea ʼae ka kotou logoʼi ʼo ʼuhiga mo te sakilifisio ʼaia?
4 Ko te sakilifisio ʼaia ʼe ina ʼekenaki anai koutou ke kotou fai he ʼu fetogi ʼi tokotou maʼuli. ʼE mahino ia, ʼe toe ʼekenaki anai koutou ke lahi age takotou agalelei, mo tokotou ʼofa ki ʼihi pea mo takotou lotofakamolemole kia natou neʼe agakovi atu. Koia, ʼe lagi kotou lotofakafetaʼi anai ki te sakilifisio ʼae neʼe ina fai ʼi tokotou maʼuli katoa.
5. He koʼe ko te sakilifisio faitotogi ʼa Sesu ʼe ko te meʼa ʼofa lahi tokotahi ʼaia neʼe fai e te ʼAtua?
5 Ko te meʼa ʼofa ʼo te ʼAtua ʼae ʼe lahi tokotahi, ʼe ko te sakilifisio faitotogi ʼa Sesu. (1 Petelo 3:18) Kotou fakakaukauʼi age muʼa te aluʼaga ʼaeni: ʼE tou agahala fuli ʼuhi ko Atama pea ko te tuʼā ʼo te agahala ʼe ko te mate. (Loma 5:12) Koia, neʼe fekauʼi e Sehova ia Sesu ke haʼu ʼo mate pea “ke mamahi ia [ʼi] te mate o uhiga mo te u tagata fuli.” Neʼe fai e Sehova te fakatuʼutuʼu ʼaia ʼuhi ko tona ʼofa. (Hepeleo 2:9) Kaʼe, ko te sakilifisio ʼa Sesu ʼe ina pulihi anai te mate ʼo talu ai. (Esaia 25:7, 8; 1 Kolinito 15:22, 26) ʼE maʼuʼuli fiafia mo fimalie anai ia natou fuli ʼae ʼe tui kia Sesu. ʼO toe feia pe mo natou ʼae ʼe kauga hau fakatahi mo Kilisito ʼi te lagi. (Loma 6:23; Apokalipisi 5:9, 10) Kotea ia te tahi ʼu tapuakina ʼe tou maʼu anai ʼuhi ko te meʼa ʼofa ʼo Sehova?
6. (1) Kotea ia te ʼu tapuakina ʼe tou maʼu anai ʼi te ka haʼu ʼuhi ko te meʼa ʼofa ʼo Sehova? (2) Kotou tuku mai ia te ʼu faʼahi ʼe tolu ʼo te meʼa ʼofa ʼo te ʼAtua ʼe ina ʼekenaki anai tatou ke tou fai.
6 ʼUhi ko te meʼa ʼofa ʼo te ʼAtua, ʼe liliu anai te kele ko he palatiso, ʼe fakamalolo anai te kau mahaki pea ʼe fakatuʼuake anai te kau mate. (Esaia 33:24; 35:5, 6; Soane 5:28, 29) Koia, ʼe tou ʼoʼofa mamahi ia Sehova pea mo tona ʼAlo koteʼuhi neʼe nā foaki mai ia te “meaofa matalelei” ʼaia. Kotea ʼae ʼe ina ʼekenaki anai tatou ke tou fai? ʼE ina ʼekenaki anai tatou ke tou fai te ʼu faʼahi ʼaeni ʼe tolu: ʼUluaki, ke tou faʼifaʼitakiʼi ia Kilisito Sesu. Lua, ke tou ʼoʼofa ki ʼotatou tehina mo tuagaʼane. Pea tolu, ke tou lotofakamolemole ki ʼihi.
“E EKENAKI MAUA E TE OFA O KILISITO”
7, 8. ʼE ʼekenaki tatou e te ʼofa ʼo Kilisito ke tou fai tea?
7 ʼUluaki, ʼe tonu ke tou fakaʼaogaʼi totatou maʼuli moʼo fakamaʼuhigaʼi ia Sesu. Neʼe ui fenei e te apositolo ko Paulo: “E ekenaki maua e te ofa o Kilisito.” (Lau ia 2 Kolinito 5:14, 15.) Neʼe iloʼi e Paulo kapau ʼe tou mahino ki te ʼofa ʼo Sesu, ʼe ina ʼekenaki anai tatou ke tou ʼoʼofa mo fakamaʼuhigaʼi ia Sesu. ʼEi, ka tou mahino katoa ki te ʼu faʼahi ʼae neʼe fai e Sehova maʼa tatou, ʼe ina ʼekenaki anai tatou ke tou fakaʼapaʼapaʼi ia Sesu ʼi totatou maʼuli. ʼO feafeaʼi?
8 Ko totatou ʼofa kia Sehova ʼe ina ʼekenaki anai tatou ke tou faʼifaʼitakiʼi ia Sesu. (1 Petelo 2:21; 1 Soane 2:6) Ka tou fakalogo ki te ʼAtua pea mo Kilisito, ʼe tou fakaha ai totatou ʼofa mamahi ia naua. Neʼe ui fenei e Sesu: “Ko ae e ina mau aku fekau pea e ina taupau natou, ko ia aena e ofa ia au. Ko ae e ofa ia au, e ofa anai taku Tamai ia ia, pea e au ofa anai ia ia, pea e au fakaha age anai ia au kia ia.”—Soane 14:21; 1 Soane 5:3.
9. Kotea ia te ʼu fakaneke ʼe tou maʼu ʼi te malama ʼaeni?
Loma 12:2) Kapau ʼe mole tou tokakaga, ʼe feala ke tou to ki te ʼu fakaneke ʼo te malama ʼaeni. Ohage la, ʼe feala ke tou kamata faʼifaʼitakiʼi ia te kau faiako ʼo te malama ʼaeni, mo natou ʼae ʼe logona pea mo natou ʼae ʼe iloa ʼi te ʼu faigaoʼi. (Kolose 2:8; 1 Soane 2:15-17) ʼE feafeaʼi hatatou tekeʼi ia te ʼu fakaneke ʼaia?
9 ʼI te teuteu atu ki te ʼAho Fakamanatu ʼaeni, ʼe lelei ke tou fakakaukauʼi ia tatatou faʼahiga fakaʼaogaʼi totatou maʼuli. Koia, kotou fai kia koutou te ʼu fehuʼi ʼaeni: “ ʼE ʼi ai koa he faʼahi kua au faʼifaʼitakiʼi ai ia Sesu? Ko te faʼahi fea ʼae ʼe tonu ke au tuputupu ai?” ʼE maʼuhiga ke tou fai kia tatou totonu ia te ʼu fehuʼi ʼaia. Koteʼuhi ʼe loto e te malama ʼaeni ke tou faʼifaʼitakiʼi. (10. Kotea ia te ʼu fehuʼi ʼe feala ke tou fai ʼi muʼa ʼo te ʼAho Fakamanatu? Pea kotea ʼae ʼe ina ʼekenaki tatou ke tou fai? (Vakaʼi te ʼuluaki pāki.)
10 ʼE lelei foki mo kapau ʼe tou toʼo he temi ʼi muʼa ʼo te ʼAho Fakamanatu ke tou vakavakaʼi ai ʼotatou mutuʼi meʼa, mo te ʼu ʼata pea mo te ʼu musika. ʼO toe feia pe ki te ʼu faʼahi ʼae ʼe fakahu ki tatatou olotinatea, mo tatatou telefoni toʼotoʼo peʼe ko te tablette. Kotou fai kia koutou te ʼu fehuʼi ʼaeni: “Kapau ʼe sio ia Sesu ki te ʼu mutuʼi meʼa ʼae ʼe au tui, ʼe au ufiufi anai koa?” (Lau ia 1 Timoteo 2:9, 10.) “ ʼE ha koa ʼi ʼoku mutuʼi meʼa ko au ko te tisipulo ʼa Kilisito? ʼE leleiʼia anai koa e Sesu ia te ʼu ʼata ʼae ʼe au sioʼi? ʼE ina leleiʼia anai koa te ʼu musika ʼae ʼe au fakalogo? Kapau ʼe au ʼavage muʼa kia Sesu taku telefoni toʼotoʼo peʼe ko taku tablette, ʼe au ufiufi anai koa ʼi te ʼu meʼa ʼae ka sio ki ai? ʼE faigataʼa anai koa haku fakamahino kia Sesu te tupuʼaga ʼo taku leleiʼia ia te gaoʼi viteo?” ʼE ʼekenaki tatou e totatou ʼofa ʼae kia Sehova ke tou liakī ia te ʼu meʼa fuli ʼae ʼe mole tuha mo he Kilisitiano. (Gaue 19:19, 20) ʼI tatatou foaki totatou maʼuli kia Sehova, neʼe tou fakapapau ke tou fakaʼaogaʼi totatou maʼuli moʼo fakamaʼuhigaʼi ia Kilisito. Koia, ʼe mole ʼaoga anai ke tou taupau he meʼa ʼe feala ke faigataʼa ai tatatou faʼifaʼitakiʼi ia Sesu.—Mateo 5:29, 30; Filipe 4:8.
11. (1) ʼE ʼekenaki feafeaʼi tatou e totatou ʼofa kia Sehova mo Sesu ʼi te gaue faifakamafola? (2) ʼE ʼekenaki feafeaʼi tatou e totatou ʼofa ke tou tokoni ki ʼihi ʼi te kokelekasio?
11 Ko totatou ʼofa ia Sesu ʼe ina ʼekenaki tatou ke tou faʼafai ʼi te faifakamafola. (Mateo 28:19, 20; Luka 4:43) ʼI te teuteu atu ki te ʼAho Fakamanatu, ʼe feala koa ke kotou fakatuʼutuʼu ke kotou pionie vaeluaʼi temi ʼo fai hola ʼe 30 peʼe 50? Ko te tehina kua matuʼa ʼe kua taʼu 84, neʼe manatu ia ʼe mole feala ke ina toʼo te selevisi pionie. Koteʼuhi ʼe kua matuʼa pea mo mahamahaki. Kaʼe, neʼe fia tokoni ia te kau pionie ʼo tana kokelekasio kia ia. Neʼe natou feʼaveʼaki pea mo filifili he telituale ʼe feala tana faifakamafola ai. Ki muli age, neʼe fakahoko e te tehina ia tana fakatuʼutuʼu ʼae ke ina fai ia hola ʼe 30. ʼE feala koa hakotou tokoni ki he tahi ʼi takotou kokelekasio ke ina toʼo te selevisi pionie ʼi te mahina ʼo Malesio peʼe Apelili? ʼE moʼoni, ʼe mole feala ke tou pionie fuli, kaʼe ʼe feala ke tou fakaʼaogaʼi totatou temi mo totatou malohi moʼo hikihiki tatatou tauhi kia Sehova. Ohage ko Paulo, kapau ʼe tou fai te faʼahi ʼaia, ʼe tou fakaha anai ʼe tou fiafia ʼuhi ko te ʼofa ʼo Sesu. Kotea te tahi koga ʼo te ʼofa ʼo te ʼAtua ʼe ina ʼekenaki anai tatou ke tou fai?
ʼE MAʼUA KE TOU FEʼOFAʼOFANIʼAKI
12. Kotea ʼae ʼe ina ʼekenaki tatou ke tou fai ʼuhi ko te ʼofa ʼo te ʼAtua?
12 Lua, ko te ʼofa ʼo te ʼAtua ʼe ina ʼekenaki tatou ke tou ʼoʼofa ki ʼotatou tehina mo tuagaʼane. Neʼe tohi fenei e te apositolo ko Soane: “Nai ofaaga, kapau nee ofa fena te Atua kia tatou, e tonu foki ke tou feofaaki ia tatou.” (1 Soane 4:7-11) Koia, kapau ʼe tou mahino ki te ʼofa ʼo Sehova, ʼe tonu ke tou ʼoʼofa ki ʼotatou tehina mo tuagaʼane. (1 Soane 3:16) ʼE feafeaʼi hatatou fakaha totatou ʼofa kia natou?
13. Kotea ia te faʼifaʼitaki neʼe tuku mai e Sesu ʼo ʼuhiga mo te ʼofa ki ʼihi?
13 ʼAki te faʼifaʼitaki ʼo Sesu, ʼe tou lava ʼoʼofa ai ki ʼihi. ʼI tana nofo ʼi te kele, neʼe tokoni ki te hahaʼi kaʼe tafitō ia te kau agavaivai. Neʼe ina fakamalolo te kau mahahaki, ohage la ko te kau ketu, mo te kau kivi pea mo te kau tuli. (Mateo 11:4, 5) Neʼe mole hage ia Sesu ko te kau takitaki lotu. He neʼe fiafia ʼi te akoʼi ki te hahaʼi te ʼu moʼoni ʼo te ʼAtua. (Soane 7:49) Neʼe ʼofa mamahi ki te hahaʼi agavaivai ʼaia pea neʼe gaue kinakina ʼo tokoni kia natou.—Mateo 20:28.
14. Kotea ʼae ʼe feala ke kotou fai moʼo fakaha tokotou ʼofa ki ʼokotou tehina mo tuagaʼane?
14 ʼI te teuteu atu ki te ʼAho Fakamanatu, ʼe ko he tahi temi lelei ʼaia ke kotou fakakaukauʼi pe ʼe kotou tokoni feafeaʼi ki ʼokotou tehina mo tuagaʼane ʼi tokotou kokelekasio. Kaʼe tafitō la ia natou kua matutuʼa. ʼE feala koa ke kotou olo ʼo ʼaʼahi ia natou ʼaia? ʼE feala koa hakotou ʼave hanatou meʼa kai? ʼE feala koa hakotou tokoni kia natou ʼi he gaue ʼi tonatou loto fale? ʼE feala koa hakotou ʼave ia natou ki te ʼu fono? Pea ʼe feala koa ke kotou kaugā faifakamafola mo natou? (Lau ia Luka 14:12-14.) Kotou tuku ia te ʼofa ʼo te ʼAtua ke ina ʼekenaki koutou ke kotou ʼoʼofa ki ʼokotou tehina mo tuagaʼane.
KOTOU MANAVAʼOFA KI ʼOKOTOU TEHINA MO TUAGAʼANE
15. Kotea ʼae ʼe tonu ke tou mahino ki ai?
15 Tolu, ko te ʼofa ʼo Sehova ʼe ina ʼekenaki tatou ke tou fakamolemole ki ʼotatou tehina mo tuagaʼane. ʼE tou mamate pea mo agahala fuli ʼuhi ko Atama. Koia ʼe mole feala ki he tahi ke ina fai te ʼu palalau ʼaeni: “ ʼE mole ʼaoga kia au te sakilifisio faitotogi ʼa Kilisito.” Maʼia mo te ʼu kaugana agatonu ʼa te ʼAtua ʼe ʼaoga kia natou te sakilifisio ʼaia. Koia ʼaki te sakilifisio ʼaia, ʼe fakamolemole ai ia te ʼu agahala. He koʼe ʼe maʼuhiga ke tou mahino ki totatou ʼuhiga agahala? ʼE tou maʼu tona tali ʼi te lea fakatata ʼa Sesu.
16, 17. Kotea ia te ako ʼe tou maʼu mai te lea fakatata ʼa Sesu?
16 Neʼe talanoa ia Sesu ʼi tana lea fakatata ki he hau neʼe ina fakamolemole ia he toe maʼua lahi ʼo tana tagata kaugana. Ko te maʼua ʼaia, neʼe ko te 60 miliona tenalio. Kaʼe ki muli age, ko te tagata kaugana ʼaia neʼe mole ina fakamolemole ia te maʼua ʼo te tahi tagata kaugana. Neʼe mole lahi te maʼua ʼo te tagata ʼaia he neʼe ko foʼi tenalio pe ʼe 100. Ko te manavaʼofa ʼo te hau neʼe tonu ke ina ʼekenaki ia tana tagata kaugana ke ina fakamolemole ki te tahi tagata kaugana. Neʼe ita te hau ʼi tana logo ʼae neʼe mole fakamolemole e tana tagata kaugana ia he maʼua neʼe mole lahi. Neʼe ina ui fenei: “Tagata faifekau agakovi, nee au fakamolemole katoa tou maua kia koe, koteuhi nee ke kolekole mai kia au; pe nee mole tonu foki ke ke ofa mamahi ki tou kaumea, o hage ko taku ofa mamahi kia koe?” (Mateo 18:23-35) Ohage ko te hau, neʼe fakamolemole e Sehova ia he toe maʼua lahi. Kotea ʼae ʼe ina ʼekenaki tatou ke tou fai ʼuhi ko te ʼofa mo te manavaʼofa ʼo Sehova?
17 ʼI tatatou teuteu atu ki te ʼAho Fakamanatu, tou fai kia tatou te ʼu fehuʼi ʼaeni: “Neʼe au lotomamahi koa ʼuhi ko he tehina? ʼE faigataʼa koa haku fakamolemole ki ai?” Kapau koia, ʼe ko he temi lelei ʼaia ke tou faʼifaʼitakiʼi ia Sehova, heʼe ko he tahi ʼe ‘fakamolemole gafua.’ (Neemia 9:17; Pesalemo 86:5) Kapau ʼe tou lotofakafetaʼi lahi ki te manavaʼofa ʼo Sehova, ʼe tou manavaʼofa anai ki ʼihi pea mo lotofakamolemole. Kapau ʼe mole tou ʼofa pea mo fakamolemole ki ʼotatou tehina mo tuagaʼane, ʼe mole feala anai kia Sehova ke ʼofa pea mo fakamolemole mai kia tatou. (Mateo 6:14, 15) Koia, kapau ʼe tou fakamolemole ki ʼihi, ʼe fakamolemole mai anai ia Sehova. ʼI tatatou fai te faʼahi ʼaia, ʼe tokoni mai anai ke tou maʼu ia he ka haʼu fiafia.
18. Neʼe tokoni feafeaʼi te ʼofa ʼo te ʼAtua ki he tuagaʼane?
18 ʼE mole ko he aluʼaga faigafua tatatou fakalaka ʼi te ʼu vaivaiʼaga ʼo ʼotatou tehina mo tuagaʼane. (Lau ia Efeso 4:2, 32.) Neʼe ko te aluʼaga ʼaia neʼe hoko ki te tuagaʼane ʼe higoa ko Lily. [1] (Vakaʼi te nota ʼi te fakaʼosi ʼo te alatike.) Neʼe tokoni ki he fafine vitua ʼe higoa ko Carol. Ohage la, neʼe ina feʼaveʼaki ia Carol ki ʼana fekau, mo ʼana fakatau pea mo ʼihi atu faʼahi neʼe ina fai maʼa ia. Logo la te ʼu faʼahi fuli neʼe fai e Lily, kaʼe neʼe fatufatuʼi tuʼumaʼu pe e Carol ia ia pea ʼi ʼihi temi neʼe faigataʼa hana tokoni ki ai. Kaʼe neʼe tokagaʼi e Lily ia te ʼu kalitate ʼo Carol pea neʼe tokoni ki ai ʼo kaku ki tana mate. ʼE ina ui fenei: “Kua au fia felaveʼi mo Carol moka fakatuʼuake. ʼE au fia iloʼi ia ia ʼi te temi ʼae kua haohaoa ai.” ʼE mahino ia, ko te ʼofa ʼo te ʼAtua ʼe ina ʼekenaki tatou ke tou fakalaka ʼi te ʼu vaivaiʼaga ʼo ʼotatou tehina mo tuagaʼane. Pea ʼe toe tokoni mai anai ke tou fakaatalitali ki te temi ʼae ka pulihi ai anai ia te ʼu vaivaiʼaga ʼo te tagata ʼo talu ai.
19. Kotea ʼae ʼe ʼekenaki anai koutou ke kotou fai ʼuhi ko te “meaofa matalelei” ʼo te ʼAtua?
19 Neʼe foaki moʼoni mai e Sehova ia he “meaofa matalelei.” ʼOfa pe ke tou haga leleiʼia te meʼa ʼofa ʼaia. ʼI te teuteu atu ki te ʼAho Fakamanatu, ʼe ko he temi lelei ʼaia ke tou metitasio ki te ʼu faʼahi fuli neʼe fai e Sehova mo Sesu maʼa tatou. Ko tonā ʼofa ʼe ina ʼekenaki tatou ke tou faʼifaʼitakiʼi ia Sesu, mo fakaha te ʼofa ki ʼotatou tehina mo tuagaʼane pea mo lotofakamolemole kia natou.
^ [1] (palakalafe 18) Ko ʼihi higoa ʼo te alatike ʼaeni neʼe fetogi.