Ko te Evaselio ʼo Luka ʼe talanoa ki te haga ʼae ʼa Sesu ʼo avahi te takaiga tohi ʼo Esaia ke ina lau pea mo ina toe takai mai. ʼI te fakaʼosi ʼo te Evaselio ʼo Soane, neʼe toe talanoa ai ia Soane ki te takaiga tohi. Pea ʼe ina fakamahino neʼe mole feala ke ina tohi fuli ki tana takaiga tohi te ʼu fakailoga ʼae neʼe fakahoko e Sesu.—Luka 4:16-20; Soane 20:30; 21:25.

Kaʼe neʼe faʼu feafeaʼi te ʼu takaiga tohi? Neʼe hokohoko te ʼu kiliʼi manu mo te ʼu papilusi ke liliu ko he takaiga tohi. Neʼe takatakai ʼi te moʼi ʼakau pea ko te koga ʼae neʼe tohi ʼe tafa ki loto. Ko te ʼu koga tohi neʼe tohi ʼi te laulahi ʼo te takaiga tohi. Pea kapau neʼe loa te takaiga tohi, neʼe fakapipiki te ʼu moʼi ʼakau ʼi ʼona taupotu. Neʼe feala ai kia ia ʼae ʼe ina lau, ke ina folahi ʼaki tona tahi nima pea ke ina toe takai mai ʼaki tona tahi nima ʼo kaku ki tana maʼu te koga tohi ʼe loto ki ai.

ʼE ui ʼi te tikisionalio Fakatohi-tapu, ‘Ko te takaiga tohi (ʼe teitei meta 10) neʼe feala ke tohi katoa ai he tohi.’ (The Anchor Bible Dictionary) Ohage la ʼi te manatu ʼa ʼihi, neʼe ʼaoga ki te Evaselio ʼo Luka ia he takaiga tohi ʼe meta 9 vaelua. ʼI ʼihi temi, ko te ʼu tafaʼaki ʼo te takaiga tohi neʼe fakamomole ʼaki te foʼi maka ʼae ko te kana ʼi muʼa ʼo tona pena.

ʼI te kamata faʼufaʼu ʼo te kau pelepitelo ʼo Iselaele, neʼe ko te pelepitelo lahi pe ʼe tahi, pea neʼe nofo ʼi te tuʼulaga ʼaia ʼi tona maʼuli katoa. (Numelo 35:25) Ko te ʼuluaki pelepitelo lahi, neʼe ko Alone. Pea ʼi te agamahani, neʼe toe maʼu pe te tuʼulaga ʼaia e te foha ʼuluaki ʼo te pelepitelo lahi. (Ekesote 29:9) Tokolahi ʼi te hologa tagata ʼo Alone neʼe ko te ʼu pelepitelo, kaʼe neʼe ko te tokosiʼi pe ia natou neʼe ko he ʼu pelepitelo lahi.

ʼI te temi leva ʼae neʼe puleʼi ai natou e he puleʼaga matapule, neʼe ko te kau takitaki matapule ʼae neʼe natou fakanofo peʼe fakahifo te kau pelepitelo lahi Sutea. Kaʼe ʼe hage pe neʼe natou filifili te ʼu pelepitelo lahi mai te ʼu famili ʼae neʼe tuha mo natou te tuʼulaga ʼaia, kaʼe tafitō ʼi te hologa ʼo Alone. ʼE mahino ia, ko te kupusiga palalau ʼae ko te ʼu “pule faisakilifisio” peʼe pelepitelo pule, ʼe fakaʼuhiga ki te hahaʼi tafitō ʼo te kau pelepitelo. Pea neʼe lagi kau ʼi te kau pelepitelo pule ia te ʼu pule ʼo te ʼu kalasi ʼe 24 ʼo te kau pelepitelo. Ko ʼihi neʼe ko he hahaʼi maʼuhiga ʼo te ʼu famili ʼo te kau pelepitelo lahi, pea ko ʼihi neʼe ko he ʼu pelepitelo lahi neʼe kua fakahifo ohage ko te pelepitelo pule ko Anasi.—1 Koloniko 24:1-19; Mateo 2:4; Maleko 8:31; Gaue 4:6.