1-3. (1) Kotea ʼae ʼe maʼuhiga tafitō kia tatou? (2) Kotea te ʼu fihifihia ʼe feala ke tau mo natou ʼae ʼe kau ki he kokelekasio ʼe lea matapule? Pea kotea te ʼu fehuʼi ʼe tou tali anai ki ai? (Vakaʼi te ʼuluaki pāki.)

IA ʼAHO nei, tokolahi te kau Fakamoʼoni ʼa Sehova ʼe natou gaue ʼo fakahoko te lea fakapolofeta ʼae ke fakamafola te logo lelei “ki te u puleaga fuli, mo te u faahiga fuli, mo te u lea fuli, pea mo te u hahai fuli.” (Apokalipisi 14:6) Ko ʼihi ia natou ʼe natou ako he tahi age lea. ʼE kotou kau koa kia natou ʼaia? ʼE ʼi ai ʼihi ʼe natou misionea peʼe natou olo ki he fenua ʼe ʼaoga ai he kau faifakamafola. Ko ʼihi ʼe natou nonofo ʼi tonatou fenua, kaʼe ʼe natou kau ki te ʼu fono ʼo he kokelekasio ʼe palalau ʼi he tahi age lea.

² ʼE tonu kia natou fuli ʼae ʼe tauhi kia Sehova, ke natou taupau tanatou tui ke malohi. ʼE tonu ki te ʼu matuʼā ke natou tokakaga ki te maʼuli fakalaumalie ʼo ʼanatou fanau. (Mateo 5:3) ʼI ʼihi temi, ʼe feala pe ke tou maʼumaʼua fau, ʼo tupu ai te mole maʼu he temi ke tou fai ai tatatou ako tokotahi. Kaʼe ʼe lahi te ʼu fihifihia ʼe tau mo natou ʼae ʼe kau ki he kokelekasio ʼe lea matapule.

 ³ ʼE maʼua kia natou ʼae ʼe kau ki he kokelekasio ʼe lea matapule, ke natou ako te lea ʼaia. Pea tahi, ʼe toe ʼaoga kia natou ke natou hoko atu tanatou ako te Tohi-Tapu. (1 Kolinito 2:10) Kaʼe ʼe natou lava fai feafeaʼi te faʼahi ʼaia mo kapau ʼe mole natou mahino ki te ʼu fono ʼo te kokelekasio? Pea kotea ʼae ʼe tonu ke fai e te ʼu matuʼā, ʼae ʼe kau ki he kokelekasio ʼe lea matapule, ke malave te moʼoni ki te ʼu loto ʼo ʼanatou fanau?

4. Kotea ʼae ʼe feala ke fakatupu kovi ai ki ʼatatou felogoʼi mo Sehova? Kotou tuku mai he faʼifaʼitaki.

⁴ Kapau ʼe mole tou mahino ki te ʼu akonaki Fakatohi-tapu ʼe fai ʼi he tahi age lea, ʼe feala ke fakatupu kovi ki ʼatatou felogoʼi mo Sehova. ʼI te toe liliu mai ʼa Neemia ki Selusalemi, neʼe ina tokagaʼi ʼe mole popoto ʼihi fanau ʼi te palalau ʼi te lea Fakahepeleo. (Lau ia Neemia 13:23, 24.) Neʼe mole natou mahino ki te Folafola ʼa te ʼAtua. Koia neʼe mole malohi ai te ʼu felogoʼi ʼa te ʼu fanau ʼaia mo Sehova.—Neemia 8:2, 8.

5, 6. Kotea ʼae neʼe tokagaʼi e ʼihi matuʼā? Pea kotea tona tupuʼaga?

⁵ Neʼe ʼi ai ʼihi Kilisitiano neʼe natou olo ʼo kau ki he kokelekasio ʼe lea matapule. Pea neʼe natou tokagaʼi te mole kei maʼu e ʼanatou fanau he ʼu felogoʼi lelei mo Sehova. Neʼe mole mahino katoa te ʼu fanau ki te ʼu fono, koia neʼe mole malave ai te ʼu akonaki ki ʼonatou loto. Neʼe ʼi ai te tehina neʼe higoa ko Petelo, neʼe mavae mo tona kiʼi famili mai ʼOsitalalia ʼo olo ki Amelika Saute. ʼE ina ui fenei: “Ka matou palalau ki te ʼu moʼoni Fakatohi-tapu, neʼe matou palalau fakamalotoloto, pea mo fakaha te ʼu meʼa ʼae ʼe matou logoʼi.” ^[1] (Vakaʼi te nota ʼi te fakaʼosi ʼo te alatike.)—Luka 24:32.

⁶ Ka tou lau he tohi ʼi he lea matapule, ʼe feala pe ke mole malave ki ʼotatou loto ohage ko hatatou lau he tohi ʼi tatatou lea. Pea tahi, ʼe faigataʼa tatatou felogoʼi mo te hahaʼi ʼuhi ko te lea. Koia ʼe feala ke tou lotovaivai ai pea mo logoʼi te kinakina ʼo tatatou tauhi ʼae kia Sehova. Kaʼe kapau ʼe tou loto ke hoko atu tatatou gaue ʼi he kokelekasio ʼe lea matapule, ʼe maʼua ke tou taupau ʼatatou felogoʼi mo Sehova ke malohi.—Mateo 4:4.

7. He koʼe neʼe faigaʼi e te kau Papilone ke tali e Taniela ʼanatou agaʼi fenua pea mo tanatou lotu?

⁷ ʼI te temi ʼae neʼe ʼave ʼaunofo ai ia Taniela pea mo ʼona kaumeʼa ki Papilone, neʼe faigaʼi e te kau Papilone ke tali e Taniela mo ʼona kaumeʼa, ʼanatou agaʼi fenua pea mo tanatou lotu. ʼO feafeaʼi? Neʼe natou akoʼi age kia natou ia “te lea a te kau Kaletea” pea mo tuku age he ʼu higoa Fakapapilone. (Taniela 1:3-7) Ko te higoa ʼae neʼe tuku age kia Taniela neʼe fakaʼuhiga kia Pele, neʼe ko te ʼatua lahi ʼaia ʼo Papilone. Neʼe lagi loto e te Hau ko Nepukatenesale ke tui ia Taniela ʼe malohi age ia te ʼatua ʼo te kau Papilone ʼi tona ʼAtua ko Sehova.—Taniela 4:8.

8. Neʼe lava taupau feafeaʼi e Taniela ʼana felogoʼi lelei mo Sehova?

⁸ ʼI tana nofo ʼae ʼi Papilone, neʼe natou fia foaki kia Taniela te ʼu meʼa kai lelei ʼa te hau. Kaʼe neʼe ina “fakapapau leva . . . i tona loto” ʼe mole talagataʼa anai ki te lao ʼa te ʼAtua. (Taniela 1:8) Neʼe hoko atu pe e Taniela tana ako ia ‘te ʼu tohi taputapu,’ ʼae neʼe tohi ʼi te lea Fakahepeleo. Koia neʼe ina lava  taupau ai ʼana felogoʼi lelei mo Sehova, logo la neʼe maʼuli ʼi he fenua matapule. (Taniela 9:2) Tatau aipe pe neʼe kua taʼu 70 tupu tana nofo ʼae ʼi Papilone, kaʼe neʼe iloʼi pe e te hahaʼi tona higoa Fakahepeleo ʼae ko Taniela.—Taniela 5:13.

9. Kotea te manatu ʼa ia ʼae neʼe ina tohi te Pesalemo 119, ʼo ʼuhiga mo te Folafola ʼa te ʼAtua?

⁹ Neʼe laukovi te ʼu tama ʼaliki kia ia ʼae neʼe ina tohi ia te Pesalemo 119. Neʼe ko he aluʼaga faigataʼa neʼe tau mo ia. Kaʼe neʼe ina maʼu ia te malohi ʼi te Folafola ʼa te ʼAtua, ʼo tupu ai tana mole hage ko te hahaʼi fuli. (Pesalemo 119:23, 61) Koia, neʼe ina tuku ai ia te Folafola ʼa te ʼAtua ke gaue ʼi tona loto.—Lau ia Pesalemo 119:11, 46.

10, 11. (1) He koʼe ʼe tou ako te Tohi-Tapu? (2) Kotea ʼae ʼe tonu ke tou fai? Kotou tuku mai he faʼifaʼitaki.

¹⁰ ʼE moʼoni, ʼe lahi te ʼu gaue ʼe tonu ke tou fakahoko ʼi te kokelekasio peʼe ʼi totatou fale gaue. Kaʼe ʼe tonu kia tatou fuli ke tou toʼo he temi moʼo fai tatatou ako tokotahi pea mo tatatou ako fakafamili. (Efeso 5:15, 16) Ka tou ako te Tohi-Tapu, ʼe mole tonu pe ke tou lau te ʼu tohi pea mo teuteuʼi he ʼu tali ki te fono. ʼE tonu ke tou tuku te Folafola ʼa te ʼAtua ke gaue ʼi ʼotatou loto pea ke ina fakamalohiʼi ai tatatou tui.

¹¹ Koia ʼe maʼua ai ke tou fakapotopoto. Ka tou ako te Tohi-Tapu, ʼe mole tonu pe ke tou fakakaukauʼi te ʼu faʼahi ʼae ʼe ʼaoga ki ʼihi, kaʼe ʼe tonu foki ke tou fakakaukauʼi mo te ʼu faʼahi ʼae ʼe ʼaoga kia tatou totonu. (Filipe 1:9, 10) ʼE tonu ke tou mahino, ka tou fai he ʼu teuteu ki te faifakamafola, peʼe ki te ʼu fono, peʼe ko he akonaki, ʼe mole fakaʼuhiga leva ko te ʼu faʼahi pe ʼaia ʼe ʼaoga kia tatou. Ohage la, ko he tahi ʼe faikuka, ʼe moʼoni ʼe tonu ke ina ʼahiʼahiʼi te meʼa kai ʼae neʼe ina teuteuʼi, ʼi muʼa ʼo tona ʼave ki te hahaʼi. Kaʼe ʼe mole fakaʼuhiga leva neʼe taupau maʼuli ai. Kapau ʼe ina fia taupau tona maʼuli ke tologa, ʼe tonu ke ina teuteuʼi hana meʼa kai maʼa ia. ʼO toe feia pe mo tatou. Kapau ʼe tou fia taupau ke malohi ʼatatou felogoʼi mo Sehova, ʼe tonu ke tou ako tuʼumaʼu te Tohi-Tapu. Kapau ʼe tou fai feia, ʼe fua lelei anai kia tatou.

12, 13. He koʼe neʼe ʼaoga ki ʼihi ke natou ako te Tohi-Tapu ʼi tanatou lea?

¹² Tokolahi ia natou ʼae neʼe olo ʼo kau ki he kokelekasio ʼe lea matapule, neʼe natou tokagaʼi te maʼuhiga ʼae ke natou ako tuʼumaʼu te Tohi-Tapu ʼi te lea ʼae neʼe ‘natou tutupu ake ai.’ (Gaue 2:8) Maʼia mo te kau misionea kua natou mahino, kapau ʼe natou loto ke hoko atu tanatou selevisi ʼi he kokelekasio ʼe lea matapule, ʼe mole tonu pe ke gataʼaki te ʼu akonaki ʼae ʼe natou logo ki ai ʼi te ʼu fono.

¹³ Ko te tehina ko Alain neʼe ina ako te lea Fakapelesia talu mai taʼu ʼe 8, ʼe ina ui fenei: “Ka au teuteuʼi ʼaku fono ʼi te lea Fakapelesia, ʼe au tokagaʼi tafitō te ʼu kupu. ʼI te  faigataʼa ʼo taku mahino ki te ʼu manatu, ʼe mole malave ai ki toku loto. Koia ʼe au toʼo ai he temi ke au ako te Tohi-Tapu pea mo ʼatatou tohi, ʼi te lea ʼae neʼe au tupu ake ai.”

14. Kotea ʼae ʼe tonu ke tokaga lelei ki ai te ʼu matuʼā? Pea kotea tona tupuʼaga?

¹⁴ ʼE tonu ke faigaʼi e te ʼu matuʼā ke mahino ʼanatou fanau ki te moʼoni pea ke malave ki ʼonatou loto. Neʼe hoko te aluʼaga ʼaia kia Serge pea mo tona ʼohoana ko Muriel. Neʼe nā kau ki he kokelekasio ʼe lea matapule lolotoga taʼu ʼe 3. Neʼe ʼi ai tanā tama. Pea neʼe nā tokagaʼi, ʼi tona taʼu 17, neʼe mole kei fia alu ki te faifakamafola pea mo te ʼu fono. ʼE ui fenei e Muriel: “Neʼe mole kei fia alu ʼo faifakamafola, logo la neʼe fiafia ʼi muʼa atu ʼi te alu ʼo faifakamafola ʼi tana lea, ia te Fakafalani.” ʼE ui fenei e Serge: “Neʼe ma tokagaʼi ʼe faigataʼa ki tamā tama tana tuputupu ʼi te faʼahi fakalaumalie. Koia neʼe ma toʼo ai te tonu ʼae, ke matou toe liliu ki tomatou ʼuluaki kokelekasio.”

15. (1) Kotea ʼae ʼe tonu ke vakavakaʼi e te ʼu matuʼā ʼi muʼa ʼo tanā toʼo te tonu ʼae ke natou fetogi kokelekasio? (2) Kotea te tokoni ʼe maʼu e te ʼu matuʼā ia Tetelonome 6:5-7?

¹⁵ ʼE ʼi ai ʼihi matuʼā ʼe natou toʼo te tonu ʼae ke natou toe liliu ki he kokelekasio ʼe palalau ʼi te lea ʼe mahino lelei ki ai ʼanatou fanau. Kotea ʼae ʼe tokoni anai ki te ʼu matuʼā ke natou toʼo te tonu ʼaia? ʼUluaki, ʼe tonu ke nā vakavakaʼi pe ʼe nā maʼu feʼauga te temi mo te malohi ke nā akoʼi te moʼoni ki ʼana fanau.  Kaʼe ʼe mole gata ai, ʼe tonu ke nā toe akoʼi age kia natou mo te lea ʼo te fenua. Lua, ʼe lagi nā tokagaʼi ʼe mole kei fia olo ʼanā fanau ʼo faifakamafola, mo kau ki te ʼu fono, peʼe mole kei natou fia kau ki he kokelekasio ʼe lea matapule. ʼUhi ko te ʼu tupuʼaga ʼaia, ʼe feala ai leva ki te ʼu matuʼā ke nā toʼo te tonu ʼae ke natou toe liliu ki te kokelekasio ʼae ʼe mahino lelei ai ʼana fanau ki te lea. Pea kapau ki muli age, kua natou malolohi ʼi te faʼahi fakalaumalie, ʼe feala pe ki te ʼu matuʼā ke nā toe toʼo te tonu ʼae ke natou toe liliu ki he kokelekasio ʼe lea matapule.—Lau ia Tetelonome 6:5-7.

16, 17. Kotea ʼae neʼe fai e ʼihi matuʼā ke natou akoʼi te moʼoni ki ʼanatou fanau?

¹⁶ ʼE ʼi ai ʼihi matuʼā neʼe natou akoʼi te moʼoni ki ʼanatou fanau ʼi tanatou lea, logo la ʼe natou kau ki he kokelekasio ʼe lea matapule. Ko Charles ko ʼona ʼofafine ʼe toko tolu. ʼE taʼu 13 te muʼa pea ʼe taʼu 9 te muli. Neʼe natou kau ki te kiʼi kutuga ʼe lea Lingala. ʼE ina ui fenei: “Neʼe matou fakatotonu ke matou fai ia tamatou ako Tohi-Tapu pea mo te ako fakafamili ʼi tamatou lea. Kaʼe neʼe matou fai mo he ʼu faʼifaʼitaki mo he ʼu kiʼi gaoʼi ʼi te lea Lingala. Koia neʼe lava ako ai e ʼama taʼahine te lea ʼaia ʼi he aluʼaga fakafiafia.”

¹⁷ Ko Kevin ʼe ko ʼona ʼofafine ʼe toko lua. Neʼe taʼu nima te tahi pea mo taʼu valu te tahi. Neʼe faiga malohi ke ina akoʼi kia naua te moʼoni, koteʼuhi neʼe mole nā mahino katoa ki te ʼu fono ʼuhi ko te lea. ʼE ina ui fenei:  “Neʼe au fai mo toku ʼohoana te ʼu ako ʼo ʼama taʼahine, ʼi tamatou lea, ʼi te Fakafalani. Neʼe matou toe fai te fakatuʼutuʼu ʼae ke matou kau tuʼa tahi ʼi te mahina ki he fono Fakafalani. Pea ʼi te ʼu temi malolō, neʼe matou olo ki te ʼu fakatahi lalahi ʼe fai ʼi te lea Fakafalani.”

18. (1) Kotea te tokoni ʼe tou maʼu ia Loma 15:1, 2? (2) Kotea te ʼu tokoni ʼe foaki mai e ʼihi matuʼā? (Vakaʼi te nota ʼi te fakaʼosi ʼo te alatike.)

¹⁸ ʼE tahi fai e te ʼu matuʼā te tonu ʼae ʼe fua lelei anai ki ʼanatou fanau pea mo ʼanatou felogoʼi mo Sehova. ^[2] (Vakaʼi te nota ʼi te fakaʼosi ʼo te alatike.) (Kalate 6:5) Neʼe fiafia ia Muriel pea mo tona ʼohoana ʼi te kau ki he kokelekasio ʼe lea matapule. Kaʼe neʼe nā toʼo te tonu ʼae ke natou mavae mai te kokelekasio ʼaia ke feala ki tanā tama ke ina fakamalohiʼi tona ʼofa ʼae kia Sehova. (Lau ia Loma 15:1, 2.) ʼI te ʼaho nei, kua mahino kia Serge neʼe ina toʼo ia te tonu ʼae ʼe lelei. ʼE ina ui fenei: “ ʼI tamatou toe liliu mai ki te kokelekasio lea Fakafalani, neʼe tuputupu toku foha ʼi te faʼahi fakalaumalie pea neʼe papitema. Kua pionie temi katoa nei. Pea kua toe fia liliu ʼo kau ki he kutuga ʼe lea matapule.”

19, 20. ʼE tou fakaha feafeaʼi ʼe tou ʼoʼofa ki te Folafola ʼa te ʼAtua?

¹⁹ ʼE ʼofa ia Sehova ki te hahaʼi fuli. Neʼe ina fakafealagia ke fakaliliu te Tohi-Tapu ki te ʼu lea ʼe lauʼi teau tupu, ke feala ki “te tagata fuli” ke natou maʼu ia te ʼatamai malama totonu ʼo ʼuhiga mo te moʼoni. (1 Timoteo 2:4) ʼE ina iloʼi ʼe liliu anai ʼatatou felogoʼi mo ia ʼo malohi mo kapau ʼe tou lau ia te Tohi-Tapu ʼi te lea ʼae ʼe tou mahino lelei ki ai.

²⁰ ʼE tonu kia tatou fuli ke tou gaue kinakina, ke tou taupau ke malohi ʼatatou felogoʼi lelei ʼae mo Sehova. Koia, ʼe tonu ai ke tou ako tuʼumaʼu ia te Tohi-Tapu ʼi te lea ʼae ʼe tou mahino lelei ki ai. Pea ʼe feala ai ke tou toe tokoni ki ʼotatou famili ke malohi tonatou maʼuli fakalaumalie. ʼE tou fakaha ai anai ʼe tou ʼoʼofa moʼoni ki te Folafola ʼa te ʼAtua.—Pesalemo 119:11.