ALATIKE AKO 29
Ke Ke Fakafiafia ʼi Tau Tuputupu
“Ke tahi . . . fiafia ʼo ʼuhiga mo ia totonu pe. ʼE mole tonu ke ina fakatatau ʼana gaue mo te ʼu gaue ʼa he tahi age.”—KAL. 6:4.
KATIKO 34 ʼE Au Haʼele Anai ʼi Te Moʼoni
TE ʼU MANATU FAKANOUNOU *
1. He koʼe ʼe mole fakatatau e Sehova ia tatou ki ʼihi?
KO SEHOVA neʼe ina fakatupu te ʼu fuʼu ʼakau mo te ʼu faʼahiga manu kehekehe. ʼO toe feia pe mo tatou, ʼe tou kehekehe fuli. ʼE ha mai ai ko Sehova ʼe mole ina loto ke tatau fuli te ʼu meʼa ʼae neʼe ina fakatupu. Koia ʼae ʼe mole fakatatau anai koe e Sehova ki he tahi age. ʼE ina sivisivi tou loto, pea ʼe ina iloʼi lelei tou ʼuhiga. (1 Sam. 16:7) ʼE ina toe iloʼi mo te ʼu meʼa ʼae ʼe ke lava fai, mo ʼou vaivaiʼaga, pea mo tou faʼahiga maʼuli ʼi tou lahilahi ake. ʼE mole ina kole atu anai ke ke fai he meʼa ʼe mole ke lavaʼi. ʼE tonu ke tou faʼifaʼitakiʼi ia Sehova, ʼo tou maʼu tona faʼahiga sio ʼae kia tatou. Kapau ʼe tou fai te faʼahi ʼaia, pea ʼe tou maʼu anai he “manatu ʼe fakapotopoto.” ʼE mole tou manatu anai ʼe tou maʼuhiga age tatou ʼi ʼihi peʼe tou manatu ʼe mole hotatou ʼaoga.—Loma 12:3.
2. He koʼe ʼe mole lelei ke tou fakatatau ia tatou ki ʼihi?
2 ʼE moʼoni, ʼe feala ke tou ako mai te faʼifaʼitaki ʼa he tehina peʼe ko he tuagaʼane, ohage la ʼe faiva ʼi te faifakamafola. (Hep. 13:7) Pea ʼe feala ke tokoni mai ke lelei tatatou faifakamafola. (Flp. 3:17) Kae ʼe kehekehe leva hau faʼifaʼitakiʼi he tahi, mo hau fia fakatatau ki ai. Kapau ʼe tou fakatatau ki ʼihi, ʼe feala ke tou maheheka peʼe ke tou lotovaivai, ʼo tou manatu leva ʼe mole hotatou ʼuhiga. Pea ohage pe ko tatatou vakaʼi ʼi te alatike ʼaeni kua ʼosi, kapau ʼe tou kamata fakataupiepie mo ʼihi ʼo te kokelekasio, ʼe fua kovi anai ki ʼotatou felogoi mo Sehova. Koia la ʼae, ʼe fai mai ai e Sehova te tokoni ʼofa ʼaeni: “Ke tahi vakavakaʼi e te tagata ʼana gaue ʼa ia totonu, pea ʼe ina maʼu ai anai he tupuʼaga ke fiafia ʼo ʼuhiga mo ia totonu pe. ʼE mole tonu ke ina fakatatau ʼana gaue mo te ʼu gaue ʼa he tahi age.”—Kal. 6:4.
3. Kotea te ʼu faʼahi neʼe ke tuputupu ai ʼi te faʼahi fakalaumalie pea mo ke fiafia ai?
3 ʼE loto e Sehova ke ke fiafia ʼi tau tuputupu ʼi te faʼahi fakalaumalie. Ohage la, kapau kua ke papitema, ʼe tonu ke ke fiafia ʼi tau fakahoko te fakatuʼutuʼu ʼaia. ʼE ko koe totonu ʼae neʼe ke filifili ia te faʼahi ʼaia, ʼuhi ko tou ʼofa ʼae ki te ʼAtua. Pea manatuʼi mo te tahi ʼu faʼahi ʼae neʼe ke tuputupu ai talu mai ai. Ohage la, kua lagi lahi age tau fia lau pea mo ako ia te Tohi-Tapu. Peʼe kua lagi fakamalotoloto age ʼou faikole. (Pes. 141:2) Peʼe kua ke faiva age ʼi te kamata ʼo he ʼu faipalalau ʼi te faifakamafola, peʼe ko te fakaʼaogaʼi ʼo te ʼu meʼa gaue ki te minisitelio. Pea lagi neʼe tokoni atu ia Sehova ke ke fakahoko lelei ʼou maʼua ʼi tou ʼuhiga tagata peʼe fafine ʼohoana, peʼe tamai peʼe faʼe. ʼE tonu ke ke fiafia ʼuhi ko te ʼu fetogi fuli ʼaia neʼe ke fai.
4. Kotea ʼae ka tou vakaʼi anai ʼi te alatike ʼaeni?
4 ʼE feala ke tou tokoni ki ʼihi ke natou fiafia ʼi tanatou tuputupu ʼi te faʼahi fakalaumalie. ʼE toe feala ke tou tokoni age ke tuku tanatou fakatatau ki ʼihi. ʼI te alatike ʼaeni, ʼe tou vakaʼi anai pe ʼe feafeaʼi te tokoni ʼa te ʼu matuʼā ki ʼanatou fanau, ʼo feia mo te fetokoniʼaki ʼa he taumatuʼa, pea mo te tokoni ʼa te kau tagata ʼafeā pea mo ʼihi ki ʼonatou tehina mo tuagaʼane. ʼE tou toe vakaʼi anai mo he ʼu manatu ʼi te Tohi-Tapu ʼe feala ke tokoni mai ke tou fai he ʼu fakatuʼutuʼu fakapotopoto, ʼo mulimuli ki ʼotatou fealagia mo ʼotatou aluʼaga.
TE ʼU MEʼA ʼE FEALA KE FAI E TE ʼU MATUʼĀ PEA MO TE ʼU TAUMATUʼA
5. ʼO mulimuli kia Efeso 6:4, kotea ʼae ʼe mole tonu ke fai e te ʼu matuʼā?
5 ʼE tonu ke tokakaga te ʼu matuʼā ke ʼaua naʼa nā fakatatau hana tamasiʼi ki he tahi age, peʼe ke nā kole age ke ina fai he meʼa ʼe mole ina lavaʼi. ʼE feala ke lotovaivai ai tanā fanau. (Lau ia Efeso 6:4.) ʼE fakamatala fenei e te tuagaʼane: “ʼI te fale ako, neʼe loto e taku kau faiako ke au gaue lelei age ia natou ʼo taku kalasi. Neʼe toe feia mo taku faʼe, he neʼe ina loto ke au tuku he faʼifaʼitaki lelei ki taku kau faiako pea mo taku matuʼa ʼae neʼe mole tauhi kia Sehova. Neʼe ina loto ke lelei tuʼumaʼu ʼoku nota, kae neʼe mole feala ia. Kua fualoa nei taku kua mavae ʼi te fale ako, kae ʼi ʼihi temi ʼe hage ia kia au ʼe mole fiafia ia Sehova ʼi te ʼu meʼa ʼae ʼe au fai, logo la ʼaku faiga.”
6. Kotea te ako ʼe feala ke taʼofi e te ʼu matuʼā mai ia Pesalemo 131:1, 2?
Pesalemo 131:1, 2. (Lau.) Neʼe ui e te Hau ko Tavite, ʼe mole “tokaga ki ni mea lalahi mo maoluga age” ia ia peʼe ko ni meʼa ʼe mole ina lavaʼi. Neʼe agavaivai, koia la ʼae neʼe “fimalie mo tokalelei” ai. Kotea te ako ʼe feala ke taʼofi e te ʼu matuʼā? ʼE natou agavaivai anai moka ʼe natou mahino ʼe ʼi ai ʼihi faʼahi ʼe mole feala ke natou fai, pea moka ʼe mole natou fakamaʼua he ʼu gaue ki ʼanatou fanau kae ʼe mole natou lavaʼi. ʼE feala ke tokoni te ʼu matuʼā ki ʼanatou fanau ke natou fai hanatou ʼu fakatuʼutuʼu ʼo mulimuli pe ki ʼonatou fealagia. ʼI tanatou fai te faʼahi ʼaia, ʼe mole lotovaivai anai ia te ʼu fanau. ʼE fakamatala fenei e te tuagaʼane ko Marina: “Neʼe mole he temi neʼe fakatatau ai au e taku faʼe ki ʼoku kiʼi tuagaʼane pea mo ʼihi atu fanau. Neʼe ina ui mai ʼe matou tahi maʼu pe ʼona fealagia pea ʼe matou maʼuhiga fuli kia Sehova. Ko tana faʼahiga akoʼi ʼaia ia au, neʼe tokoni mai ke mole au fakatatau ki ʼihi.”
6 ʼE feala ke taʼofi e te ʼu matuʼā he ako mai ia7-8. ʼE fakaha feafeaʼi e he tagata ʼe fakaʼapaʼapa ki tona ʼohoana?
7 ʼE tonu ki he tehina * kua ʼohoana ke fakaʼapaʼapa ki tona ʼohoana. (1 Pet. 3:7) Ohage la, ʼe fakaʼapaʼapa ki tona ʼohoana ʼaki tana fakaha age ʼe maʼuhiga. ʼE mole ina meʼa noaʼi ia ia, peʼe ina kole age he meʼa ʼe mole ina lavaʼi. Pea ʼe mole ina fakatatau ki ʼihi age fafine. Heʼe kotea anai ka logoʼi e tona ʼohoana? Ko totatou tuagaʼane ko Rosa, ʼe ʼohoana mo he tagata ʼe mole tauhi kia Sehova. ʼE ina fakatatau tuʼumaʼu pe ia Rosa ki ʼihi atu fafine. ʼAki te ʼu palalau kona ʼae ʼe fai age e tona ʼohoana, neʼe manatu ai e totatou tuagaʼane ʼe mole kei ʼi ai hona ʼaoga, pea ʼe mole he tahi ʼe ʼofa ai. ʼE ina ui fenei: “ʼE tonu ke fakamanatuʼi tuʼumaʼu mai ʼe au maʼuhiga kia Sehova.” ʼE mole feia te aga ʼa he tehina kua ʼohoana. ʼE fakaʼapaʼapa ia ki tona ʼohoana, he ʼe ina iloʼi ʼe fua lelei anai ki ʼanā felogoi fakataumatuʼa, ʼo toe feia pe mo ʼana felogoi mo Sehova.
8 Ko he tagata ʼe fakaʼapaʼapa ki tona ʼohoana, ʼe ina vikiʼi ia ia, mo ina ui age ʼe ʼofa ia ia pea ʼe maʼuhiga. (Taag. 31:28) Ko te meʼa ʼaia neʼe fai e te ʼohoana ʼo Katerina, ʼae neʼe kua tou ʼosi palalau ki ai ʼi te alatike kua ʼosi. Neʼe tokoni kia ia ke ina lava tauʼi tana manatu ʼae ʼe mole hona ʼuhiga. ʼI te kei veliveli ʼa Katerina, neʼe valokiʼi e tana faʼe pea neʼe ina fakatatau tuʼumaʼu pe ia ia ki ʼihi taʼahine, ʼo kau ai mo ʼona kaumeʼa. Ko te tupuʼaga la ʼaia ʼo te fakatatau e Katerina ia ia ki ʼihi, pea neʼe toe hoko atu pe ʼi tana kua liliu ʼo tauhi kia Sehova. Kae ko te ʼohoana ʼo Katerina, ʼae ʼe ko te tehina, neʼe tokoni kia ia ke ina tuku tana fai te faʼahi ʼaia, kae ke ina maʼu he ʼu manatu ʼe lelei ʼo ʼuhiga mo ia totonu. ʼE ui fenei e Katerina: “Ko toku ʼohoana ʼe ʼofa ia au, ʼe fakamalo mai ki te ʼu gaue ʼae ʼe au fai pea mo faikole maʼa ʼaku. ʼE ina toe fakamanatuʼi mai te ʼu kalitate ʼo Sehova, pea mo tokoni mai ke au fetogi taku faʼahiga manatu.”
TE TOKONI ʼOFA ʼA TE KAU TAGATA ʼAFEĀ PEA MO ʼIHI
9-10. Neʼe tokoni ʼofa feafeaʼi te kau tagata ʼafeā ki he tuagaʼane ke ina tauʼi tana manatu fakataupiepie?
9 ʼE lava tokoni feafeaʼi te kau tagata ʼafeā kia natou ʼae ʼe manatu fakataupiepie? Tou vakaʼi te meʼa ʼae neʼe hoko ki te tuagaʼane ko Hanuni, ʼae neʼe mole fakamalo he tahi ki te ʼu gaue ʼae neʼe ina fai ʼi tana kei veliveli. ʼE ina ui fenei: “Neʼe au umiuminoa, mo au manatu ʼe lelei age te tahi ʼu tamaliki ia au. Pea neʼe au kamata fakatatau au ki ʼihi talu mai taku kei veliveli.” Maʼia pe la ʼi tana kua ʼosi iloʼi ia te moʼoni, neʼe hoko atu pe e Hanuni tana manatu
ʼaia. Koia, neʼe manatu ai leva ko te ʼu gaue ʼae ʼe ina fai ʼi te kokelekasio ʼe mole honatou ʼuhiga. Kae ʼi te temi nei, ʼe ko he pionie fiafia. Kotea ʼae neʼe tokoni ki ai ke ina fetogi tana faʼahiga manatu?10 ʼE ui e Hanuni neʼe tokoni ʼofa age te kau tagata ʼafeā kia ia. Neʼe natou ui age ʼe maʼuhiga ia ia ʼi te kokelekasio. Pea neʼe natou fakamalo age ki te faʼifaʼitaki lelei ʼae ʼe ina tuku. ʼE tohi fenei e Hanuni: “Neʼe tau kole mai e te kau tagata ʼafeā ke au fakalotomalohiʼi he ʼu kiʼi tehina neʼe ʼaoga ki ai he tokoni. Neʼe au logoʼi ai ʼe ʼi ai toku ʼaoga. ʼE au manatuʼi te fakamalo mai ʼa te kau tagata ʼafeā he neʼe au fakalotomalohiʼi te ʼu kiʼi tehina finemui. Pea neʼe malave ʼosi ki toku loto tanatou lau mai ia 1 Tesalonika 1:2, 3. Ko te tokoni lahi mai ʼaia ʼa te kau tagata tauhi ovi lelei, neʼe au mahino ai ʼe ʼi ai toku ʼaoga ʼi te kokelekasio.”
11. ʼE tou tokoni feafeaʼi anai kia natou ʼae ʼe mafasia pea mo agavaivai, ʼae ʼe palalau ki ai ia Esaia 57:15?
11 Lau ia Esaia 57:15. ʼE tokaga moʼoni ia Sehova kia natou ʼae ʼe mafasia pea mo agavaivai. Ko tatou fuli, kae mole gata pe ki te kau tagata ʼafeā, ʼe feala ke tou fakalotomalohiʼi ia natou ʼaia. Pea ʼe tou fai te faʼahi ʼaia, moka tou tokakaga moʼoni ki te ʼu tehina mo tuagaʼane ʼaia. ʼE loto e Sehova ke tou fakaha age kia natou tona ʼofa lahi. (Taag. 19:17) ʼE tou toe tokoni ki ʼotatou tehina mo tuagaʼane ʼaki he agavaivai kae ʼe mole tou fakahaha age ʼotatou fealagia. Pea ʼe mole tou faiga anai ke tokagaʼi tatou e ʼihi he ʼe mole tou loto ke natou maheheka. Kae ʼe tou fia fakalotomalohiʼi ʼotatou tehina mo tuagaʼane ʼaki ʼatatou palalau pea mo te ʼu meʼa ʼae ʼe tou fai kia natou.—1 Pet. 4:10, 11.
12. He koʼe neʼe fia fakatahi te hahaʼi agavaivai mo Sesu? (Vakaʼi te pāki ʼo te takafi.)
12 ʼE lahi te ʼu ako ʼe feala ke tou maʼu mai te aga ʼa Sesu ki ʼana tisipulo. Neʼe ko te tagata lahi ʼaia ʼo te ʼu temi, kae neʼe “agamalū mo agavaivai.” (Mat. 11:28-30) Neʼe mole laupisi ia ʼuhi ko tana poto pea mo te ʼu meʼa ʼae neʼe ina iloʼi. Neʼe faigafua tana ʼu akonaki, pea neʼe ina fakaʼaogaʼi he ʼu fakata neʼe mahino gafua ki ai te hahaʼi pea mo malave ki ʼonatou loto. (Luka 10:21) Neʼe mole hage ia Sesu ko te kau takitaki lotu fiameʼalahi. Kae neʼe faiga ia ke iloʼi e te hahaʼi ʼe natou maʼuhiga ki te ʼAtua. (Soa. 6:37) Neʼe fakaʼapaʼapa ia ki te hahaʼi fuli.
13. Neʼe ha feafeaʼi te agalelei ʼa Sesu pea mo tona ʼofa ʼi ʼana felogoi mo ʼana tisipulo?
13 Neʼe ha te agalelei ʼa Sesu pea mo tona ʼofa ʼi ʼana felogoi mo ʼana tisipulo. Neʼe iloʼi e Sesu neʼe kehekehe ʼonatou fealagia pea mo ʼonatou aluʼaga. Neʼe mole tatau te ʼu gaue ʼae neʼe natou fai ʼi te faifakamafola, kae neʼe fiafia ʼi tanatou tahi fai te meʼa ʼae neʼe natou lavaʼi. Neʼe fakaha e Sesu te faʼahi ʼaia ʼi te lea fakatata ʼo te ʼu taleta. ʼI te lea fakatata ʼaia, neʼe foaki e te pule ki ʼana kaugana takitahi he gaue “ʼo mulimuli ki ʼonatou fealagia.” Ko kaugana ʼe lua neʼe nā gaue kinakina, pea ko te tahi ia naua neʼe laka atu tana gaue. Kae neʼe fakamalo tatau te pule kia naua, ʼo ina ui fenei age: “ʼE lelei ʼosi, tagata faifekau agalelei mo agatonu!”—Mat. 25:14-23.
14. ʼE tou lava faʼifaʼitakiʼi feafeaʼi ia Sesu ʼi tatatou felogoi mo te ʼu tehina mo tuagaʼane?
14 Ko Sesu ʼe kei agalelei pea mo ʼofa tuʼumaʼu pe kia tatou. ʼE ina iloʼi ʼe tou tahi maʼu ʼona fealagia pea ʼe kehekehe ʼotatou aluʼaga. Kae ʼe fiafia moka ʼe tou fai te ʼu meʼa ʼae ʼe tou lavaʼi. ʼE tonu ke tou faʼifaʼitakiʼi ia Sesu. ʼE tou tokakaga anai ke mole manatu e he tehina peʼe ko he tuagaʼane ʼe mole hona ʼaoga, peʼe ke ufiufi ʼi te mole lahi ʼo tana gaue. Kae ʼe tou fakamalo tuʼumaʼu pe anai kia natou he ʼe natou fai te ʼu meʼa ʼae ʼe natou lavaʼi maʼa Sehova.
FAI HE ʼU FAKATUʼUTUʼU ʼE KE LAVA FAKAHOKO
15-16. Kotea te ʼu fua lelei neʼe maʼu e he tuagaʼane he neʼe ina fai he ʼu fakatuʼutuʼu ʼe feala ke ina fakahoko?
15 Moka tou fai he ʼu fakatuʼutuʼu fakalaumalie, ʼe tou fiafia pea ʼe ʼi ai te ʼuhiga ʼo totatou maʼuli. Kae ʼe tonu ke tou fai te ʼu fakatuʼutuʼu ʼae ʼe tou lava fakahoko. ʼE mole tou fakatatau anai mo te ʼu fakatuʼutuʼu ʼae ʼe fai e ʼihi. Kapau ʼe tou fai feia, ʼe tou lotovaivai anai. (Luka 14:28) Tou vakaʼi te faʼifaʼitaki ʼo te tuagaʼane pionie ko Midori.
16 ʼI te kei veliveli ʼa Midori, ko tana matuʼa ʼae neʼe mole ko he Fakamoʼoni ʼa Sehova, neʼe ina fakalainoaʼi ia ia he neʼe ina fakatatau ia ia ki tona kiʼi tehina mo tuagaʼane, pea mo ʼona kaumeʼa ʼi te fale ako. Neʼe ui fenei e Midori: “Neʼe au manatu ai ʼe mole hoku ʼaoga.” Kae ʼi te lahilahi ake ʼa Midori, neʼe ina maʼu leva he ʼu manatu ʼe lelei. ʼE ina ui fenei: “ʼI taku lau te Tohi-Tapu ʼi te ʼaho fuli, neʼe tokalelei ai toku loto pea mo au iloʼi ai ʼe ʼofa ia Sehova ia au.” Pea neʼe toe fai e te tuagaʼane hana ʼu fakatuʼutuʼu fakapotopoto, mo faikole tafito ke ina lava fakahoko tana ʼu fakatuʼutuʼu ʼaia. Pea ʼi tana lava fakahoko tana ʼu fakatuʼutuʼu, neʼe fiafia ai ʼi tana tuputupu ʼi te faʼahi fakalaumalie.
HAGA FAI TE ʼU MEʼA ʼAE ʼE KE LAVAʼI MAʼA SEHOVA
17. ʼE feafeaʼi hatatou ‘hoko atu tatatou fakafoʼou ia tatatou faʼahiga manatu,’ pea kotea ʼona fua lelei?
17 ʼE ʼaoga anai he temi ke tou fetogi ʼatatou manatu ʼae ʼe fakalotovaivai. Koia ʼe foaki mai ai e Sehova te tokoni ʼaeni: “ʼE tonu ke hoko atu takotou fakafoʼou ia takotou faʼahiga manatu.” (Efe. 4:23, 24) Koia la ʼae ʼe tonu ai ke tou faikole, mo ako te Folafola ʼa te ʼAtua pea mo metitasio ki ai. Haga fai te ʼu meʼa ʼaia mo kole kia Sehova ke ina foaki atu tona malohi. Ko tona laumalie maʼoniʼoni ʼe tokoni atu anai ke ʼaua naʼa ke maʼu he ʼu manatu fakataupiepie. Pea ʼe toe tokoni atu anai ia Sehova ke ke iloʼi pe ʼe ke maheka peʼe ke fiameʼalahi, pea ke ke foimo fai he ʼu fetogi.
18. ʼE fakalotomalohiʼi feafeaʼi koe e te manatu ia 2 Koloniko 6:29, 30?
18 Lau ia 2 Koloniko 6:29, 30. ʼE iloʼi e Sehova ʼatatou manatu pea mo te ʼu meʼa ʼae ʼi ʼotatou loto. ʼE ina toe iloʼi tatatou tauʼi ia te ʼu fakaneke kovi ʼo te malamanei, ʼo feia mo ʼotatou vaivaiʼaga. Pea ka sio ia Sehova ki ʼatatou faiga malohi moʼo tauʼi te ʼu aluʼaga ʼaia, ʼe toe lahi age tona ʼofa ia tatou.
19. Ko te fakata fea ʼe fakaʼaogaʼi e Sehova moʼo fakaha mai te meʼa ʼae ʼe ina logoʼi ʼo ʼuhiga mo tatou?
19 Moʼo fakaha mai te meʼa ʼae ʼe ina logoʼi ʼo ʼuhiga mo tatou, ʼe fakaʼaogaʼi e Sehova te fakata ʼo te ʼofa ʼa he faʼe ki hana kiʼi toe meamea. (Esa. 49:15) Tou vakaʼi te fakamatala ʼa he faʼe ʼe higoa ko Rachel. ʼE ina ui fenei: “Neʼe tupu taku kiʼi taʼahine kae neʼe heʼeki hoko tona temi fanauʼi. ʼI taku ʼuluaki sio ki ai, neʼe veliveli ʼosi mo pelepelegesi. ʼI te ʼuluaki mahina ʼo taku kiʼi tamasiʼi, neʼe fakagafua mai e te toketa ke au fua ia ia ʼi te ʼaho fuli ʼae neʼe tuku ai ʼi te lopitali. Neʼe liliu ai ʼo malohi tamā felogoi fakatau faʼe. Ko tona taʼu ono ʼaeni, pea ʼe nounou age ia ia natou ʼae ʼe taʼi tupu tahi mo ia. Kae ʼe au ʼofa mamahi ai, he neʼe faiga malohi ke maʼuli, pea ʼe ina fakafiafiaʼi toku maʼuli.” ʼE fakalotomalohiʼi ia tatatou iloʼi ʼae ʼe feia te ʼofa ʼa Sehova kia tatou, ʼi tana sio mai ʼae ki tatatou faiga malohi ke tou fai ia meʼa fuli ʼe tou lavaʼi maʼa te ia.
20. He koʼe ʼe fiafia te ʼu kaugana ʼa Sehova?
20 ʼE tou kehekehe fuli. Kae ʼe tali koe e Sehova ʼi tona famili he ʼe ke maʼuhiga kia te ia. Neʼe mole taki mai koe e Sehova he neʼe ke poto age koe ia natou ʼae. Kae neʼe ina taki mai koe he neʼe ina iloʼi ko koe ko he tahi ʼe agavaivai pea ʼe ke loto ke ina akoʼi koe, pea mo fai ni fetogi. (Pes. 25:9) Ke ke tui papau ʼe fiafia ia Sehova ʼi tana iloʼi ʼae ʼe ke fai te meʼa ʼe ke lavaʼi ʼi tau tauhi ʼae kia te ia. Ko tau faʼa kataki mo tau agatonu ʼe ha ai ʼe ke maʼu “he loto ʼe lelei mo fakahagatonu.” (Luka 8:15) Koia ke hoko atu tau fai te meʼa ʼae ʼe ke lavaʼi maʼa Sehova. ʼE ke fiafia ai anai ʼo ʼuhiga mo koe totonu.
KATIKO 38 ʼE Ina Fakamalohi Anai Ia Koe
^ pal. 5 Ko Sehova ʼe mole ina fakatatau tatou ki ʼihi. Kae tokolahi ʼe natou fakatatau ki ʼihi, pea ʼe natou manatu ai ʼe mole honatou ʼaoga. ʼI te alatike ʼaeni, ʼe tou vakaʼi anai pe ʼe koʼe ʼe tonu ke tou tekeʼi te faʼahiga manatu ʼaia. ʼE tou toe vakaʼi anai pe ʼe tou lava tokoni feafeaʼi ki totatou famili peʼe ko natou ʼae ʼo te kokelekasio ke natou maʼu te faʼahiga sio ʼa Sehova ʼo ʼuhiga mo natou.
^ pal. 7 Logo la ʼe fakahagahaga te ʼu palalau ʼaeni ki te ʼu tagata ʼohoana, kae ʼe toe fakaʼuhiga ʼihi pelesepeto ki te ʼu fafine ʼohoana.
^ pal. 57 FAKAMATALA ʼO TE ʼU PĀKI: ʼI te ako fakafamili, ʼe fiafia te ʼu matuʼā ʼi tanā sisio ki te ʼu gaue ʼae neʼe tahi fai ʼe ʼanā kiʼi fanau moʼo faʼu te aleka ʼo Noe.
^ pal. 61 FAKAMATALA ʼO TE ʼU PĀKI: Ko he faʼe ʼe ina taupau tokotahi tana kiʼi tamasiʼi, ʼe ina fakatuʼutuʼu ke pionie vaeluaʼi temi. Pea ʼe fiafia ʼi tana lava fakahoko tana fakatuʼutuʼu ʼaia.