Te ’u Fehuʼi ’a Te Kau Lautohi
Kotea te manatu ʼa te kau Fakamoʼoni ʼa Sehova ʼo ʼuhiga mo te fakaʼaogaʼi ʼo te Neti ke maʼu ai e he tahi hona ʼohoana?
ʼE loto moʼoni ia Sehova ke fiafia e he foʼi tokolua ʼe ʼohoana, pea ke nā maʼu he ʼu felogoi ʼe lelei pea mo tologa. (Mat. 19:4-6) Kapau kua ke fia ʼohoana, kotea ʼae ʼe tonu ke ke fai ke ke maʼu hou ʼohoana ʼe lelei? ʼUhi ʼae ko Sehova ʼe ko totatou Tupuʼaga, ʼe ina iloʼi te ʼu meʼa ʼae ʼe tonu ke tou fai ke fua lelei tatatou fakatahi mo he tahi, pea mo totatou maʼuli fakataumatuʼa. Koia la ʼae kapau ʼe ke maʼuliʼi te ʼu pelesepeto ʼae ʼe ina foaki mai, ʼe ke fiafia anai. Tou vakaʼi ʼihi pelesepeto.
ʼE tonu muʼa ke tou mahino ki te faʼahi ʼaeni: “E pikopiko te loto o fakalaka i te u mea fuli, pea e agakovi ia ia.” (Sel. 17:9) Moka ko he foʼi tokolua ʼe fia ʼohoana, ʼe nā felaveʼi mo feoloʼaki fakatahi, pea ʼe vave ai leva tanā femanakoʼaki. Kapau ʼe hoko te faʼahi ʼaia, pea ʼe faigataʼa anai hanā toʼo he ʼu tonu ʼe lelei. Ko natou ʼae ʼe ʼohoana ʼuhi pe ko tanatou femanakoʼaki, ki muli age ʼe feala ke natou lotomamahi. (Taag. 28:26) Koia, ʼe mole lelei ki he tokolua ke nā fefakahaʼaki ʼi te kamata ʼo tanā fakatahi tanā femanakoʼaki, peʼe nā fai ni fakapapau ke nā ʼohoana, kae heʼeki nā feiloʼiʼaki lelei.
ʼE ui fenei ia Taaga Lea 22:3: “E sio te tagata poto ki te kovi pea e nono ia ia; Kae e fakaovi ki ai te kau vale pea e tauteai ai natou.” Moka kumi e he tahi hona ʼohoana ʼi te Neti, kotea te tuʼutamaki ʼae ʼe feala ke hoko? Meʼa fakaʼofaʼofa, he neʼe felaveʼi ʼihi ʼi te Neti mo he ʼu hahaʼi ʼe mole natou feiloʼiʼaki, pea neʼe natou kamata fakatahi ai mo natou. Pea ki muli age, neʼe natou iloʼi ai ko te ʼu hahaʼi ʼaia, neʼe natou kakaʼi natou. Tahi ʼae, ʼi te Neti ko ʼihi neʼe natou loi ʼo ʼuhiga mo natou moʼo kakaʼi pea mo kaihaʼa te falā ʼa ʼihi hahaʼi. ʼI ʼihi temi, ko natou ʼaia neʼe natou ui ko natou ko he ʼu Fakamoʼoni ʼa Sehova.
Tou vakaʼi he tahi tuʼutamaki ʼe feala ke hoko. ʼI te Neti, ʼe ʼi ai ʼihi polokalama ʼe natou filifili he tahi ʼe gali mo koe. Kae ʼi te temi nei, heʼeki iloʼi pe ʼe lelei te ʼu polokalama ʼaia. Pea ʼe mole lelei hakita falala ki he meʼa neʼe faʼu e te tagata moʼo toʼo ai he tonu ʼe maʼuhiga, ohage la pe ʼe ko ai ʼae ʼe tonu ke kita ʼohoanaʼi. ʼE lahi age anai tatatou falala ki te ʼu pelesepeto Fakatohi-tapu ʼi te ʼu polokalama ʼaia.—Taag. 1:7; 3:5-7.
Taaga Lea 14:15: “E tui te tagata vale ki te u mea fuli e fakaha kia ia, kae e tokaga te tagata poto ki ona lakaaga.” ʼE tonu muʼa ke ke iloʼi lelei he tahi ia muʼa ʼo hau ʼohoanaʼi ia ia. Kae ʼe feala ke faigataʼa te faʼahi ʼaia, moka ʼe ke fakaʼaogaʼi ia te Neti. Maʼia pe la pe ʼe ke iloʼi he ʼu meʼa ʼi te Neti ʼo ʼuhiga mo ia, pe ʼe lahi takolua felogoi ʼi te Neti, ʼe feala koa ke ke ui ʼe ke iloʼi lelei ia ia? Ko ʼihi neʼe natou manatu kua natou maʼu honatou foʼi hui. Kae, ʼi tanatou felaveʼi moʼoni leva ʼi he koga meʼa, neʼe natou punamaʼuli ai ʼi tanatou ʼu aga pea mo tanatou ʼu palalau.
ʼE ui fenei ʼi te pelesepeto ʼae iaʼE ui fenei e te tagata faipesalemo: “E mole au lala fakatahi mo te kau faikaka, pea e mole au alu fakatahi mo te kau malualoi.” (Pes. 26:4) Tokolahi ʼe natou manatu ʼe lelei te tohi he ʼu meʼa ʼe mole moʼoni ʼo ʼuhiga mo natou ʼi te Neti ke vikiʼi ai natou. ʼE feala ke natou fufu tonatou ʼuhiga moʼoni moka natou ʼasi ʼi te Neti. Maʼia pe ʼe ui e he tahi ko ia ko he Fakamoʼoni ʼa Sehova, kae ʼe kua papitema koa? ʼE felogoi lelei koa mo Sehova? ʼE fakaʼapaʼapaʼi koa ia ia ʼi tana kokelekasio? Peʼe ina tuku koa he faʼifaʼitaki kovi? Peʼe ko ia koa ko he “fakakaugā kovi”? (1 Ko. 15:33; 2 Tim. 2:20, 21) ʼO mulimuli ki te ʼu pelesepeto Fakatohi-tapu, ʼe feala moʼoni koa kia ia ʼaia ke ʼohoana? ʼE tonu ke ke iloʼi te tali ki te ʼu fehuʼi ʼaia. ʼE feala ke faigataʼa hau tali ki te ʼu fehuʼi ʼaia, mo kapau ʼe mole ke kumi ki he tahi ʼu Fakamoʼoni ʼa Sehova ʼe natou iloʼi lelei ia ia. (Taag. 15:22) Pea ʼe mahino ia, ʼe mole loto e he kaugana ʼa Sehova ke ʼohoana mo he tahi ʼe mole tui kia te ia.—2 Ko. 6:14; 1 Ko. 7:39.
Koia ʼe fakatupu tuʼutamaki te fakaʼaogaʼi ʼo te Neti moʼo kumi ai hokita ʼohoana. ʼE ʼi ai te tahi ʼu puleʼaki ʼe lelei age ke ke maʼu ai he tahi ke kolua ʼohoana. Kofea koa ʼe feala ai ke ke maʼu hou ʼohoana ʼe lelei? Kapau ʼe mole tapuʼi te fakatahitahi ʼa he kaugamalie, ko te kau Fakamoʼoni ʼa Sehova ʼe feala ke natou feiloʼiʼaki ʼi te ʼu fono, ʼi te ʼu fakatahi lalahi, peʼe ʼi tanatou ʼu temi fakafiafia.
Kapau ʼe mole feala ke tou fakatahitahi ohage la ko te temi ʼo te taʼi mahaki COVID-19, ʼe tou fakaʼaogaʼi te Neti mo fai ʼatatou fono. Pea ʼi te ʼu fono ʼaia, ʼe feala ke tou felaveʼi ai mo he ʼu Fakamoʼoni ʼa Sehova selipatea. ʼE feala ai ke ke fakalogo ki hanatou faiakonaki, peʼe ko he faʼifaʼitaki, peʼe ko tanatou fakaha tanatou tui moka ʼe natou fai hanatou ʼu tali. (1 Tim. 6:11, 12) ʼI te ʼosi pe ʼo te ʼu fono ʼe vaevae fakakutuga ai tatou, pea ʼe feala ke ke faipalalau ai mo natou. Pea kapau ʼe tou fakatahitahi ʼi te Neti ʼo fakafiafia mo he tahi ʼu Fakamoʼoni, ko te faigamalie ʼaia ke ke iloʼi lelei ai ia ia ʼae kua ke loto ki ai. (1 Pet. 3:4) ʼAki te temi, ʼi takolua kua feiloʼileleiʼaki, ʼe ke iloʼi ai anai pe ʼe tatau ʼakolua fakatuʼutuʼu pea mo feala hakolua felogoi tahi.
Ko he tahi ʼe selipatea ʼae ʼe mulimuli ki te ʼu pelesepeto Fakatohi-tapu ke ina maʼu ai hona ʼohoana, ʼe mahino ia ʼe maʼuli fiafia anai moka ʼohoana. ʼE hoko moʼoni anai kia ia te taʼaga lea ʼaeni: “Ko te tagata [peʼe ko te fafine] ae e ina mau hona ohoana [ʼe lelei] e ina mau te manuia; ko he kalasia ia e fai e [“Sehova,” NWT] kia ia.”—Taag. 18:22.