1-2. ʼE tokoni feafeaʼi mai ia te ʼu palalau ʼa Sehova ia Esaia 65:16, 17 ke tou faʼa kataki?

KO TE fakatahi fakafenua ʼo te taʼu 2017 neʼe ko tona kupu taki “Ke Tou Faʼa Kataki.” Neʼe fakaha ai pe ʼe feafeaʼi hatatou katakiʼi te ʼu fihifihia ʼae ʼe tou tau mo ia. Kae kua hili taʼu ʼe fa talu mai ai, pea ʼe kei tou maʼuʼuli pe ʼi te malama agakovi ʼaeni.

² Ko te ʼu mamahi fea ʼe ke tau mo ia? Neʼe mate koa he tahi ʼi tou famili peʼe ko hou kaumeʼa lelei? ʼE ke tau koa mo hau mahaki kovi peʼe ko te ʼu faigataʼaʼia ʼo te vaivai matuʼa? Neʼe hoko koa he tuʼutamaki fakanatula ʼi tou fenua? Neʼe gaohi koviʼi koa koe, pe neʼe fakatagaʼi koa koe? Peʼe ke tau koa mo he ʼu fihifihia tupu ko te taʼi mahaki, ohage ko te COVID-19? ʼE tou fakaʼamu lahi ki te ʼaho ʼae ka fakagata ai leva te ʼu faigataʼaʼia ʼaia, ka tou galoʼi anai pea ʼe mole toe hoko anai.—Lau ia Esaia 65:16, 17.

3. Kotea ʼae ʼe tonu ke tou fai ʼi te temi nei, pea kotea tona tupuʼaga?

³ Ko te maʼuli ʼi te malama ʼaeni ʼe faigataʼa ʼaupito. Pea ʼe lagi kovi age la ia te ʼu fihifihia ʼae kei toe ke hoko mai. (Mat. 24:21) Koia la ʼae ʼe tonu ai ke tou haga fakamalohiʼi tatatou faʼa kataki. Kotea tona tupuʼaga? He neʼe ui fenei mai e Sesu: “Kapau ʼe kotou faʼa kataki, ʼe kotou haofaki anai tokotou maʼuli.” (Luka 21:19) Pea ʼe tou maʼu anai te malohi mo kapau ʼe tou vakaʼi pe ʼe katakiʼi feafeaʼi e ʼihi te ʼu fihifihi ʼe tatau mo ʼatatou.

4. He koʼe ko Sehova ʼe ko te faʼifaʼitakiʼaga lelei ʼo te faʼa kataki?

⁴ Ko ai te faʼifaʼitakiʼaga lelei ʼo te faʼa kataki? ʼE ko Sehova. ʼE lagi ke punamaʼuli ai. Kapau ko ia, ke ke fakakaukauʼi ia te faʼahi ʼaeni: Ko te Tevolo, ʼe ko te pule ʼo te malamanei. Ko te tupuʼaga la ʼaia ʼo te lahi ʼo te ʼu fihifihia. ʼE feala pe kia Sehova ke ina pulihi te malama ʼaeni ʼi te temi nei. Kae ʼe fakatalitali pe ki  te ʼaho ʼae kua ina fakatuʼutuʼu ki ai. (Loma 9:22) Koia, ʼi muʼa ʼo te hoko mai ʼo te ʼaho ʼaia, ʼe haga katakiʼi pe totatou ʼAtua. Tou vakaʼi faʼahi ʼe hiva ʼe ina katakiʼi.

5. Neʼe feafeaʼi te ʼulihi ʼo te huafa ʼo te ʼAtua? Kotea la tau manatu ʼo ʼuhiga mo te ʼulihi ʼaia ʼo te huafa ʼo Sehova?

⁵ Te ʼulihi ʼo tona huafa. ʼE ʼofa ia Sehova ki tona huafa pea ʼe ina loto ke fakaʼapaʼapa ki ai te hahaʼi fuli. ʼE ui fenei ʼi te Tohi—Tapu: “Ko au ko [“Sehova,” NWT], ko toku higoa aia; pea e mole au foaki anai toku kololia ki he tahi, pee mo toku mauhiga ki te u taulaatua.” (Esa. 42:8) Kae talu mai taʼu ʼe 6 000 mo te ʼulihi ʼo tona huafa. (Pes. 74:10, 18, 23) ʼI te ʼoloto ʼo Eteni, neʼe haga te Tevolo (ko tona fakaʼuhiga “Faifasituʼu”) ʼo tukugakoviʼi te ʼAtua, takua neʼe mole ina fia foaki kia Atama mo Eva te meʼa ʼae neʼe ʼaoga ke nā fiafia ai. (Sen. 3:1-5) Pea talu mai ai mo tana tukugakoviʼi ia te ʼAtua, takua ʼe mole ina fia foaki te ʼu meʼa ʼae ʼe ʼaoga ki te hahaʼi. Neʼe mole leleiʼia e Sesu te ʼulihi ʼaia ʼo te huafa ʼo tana Tamai. Koia la ʼae neʼe ina akoʼi ai ʼana tisipulo ke natou faikole fenei: “Ko tamatou Tamai ʼae ʼe ʼi selo, ke tapuha tou huafa.”—Mat. 6:9.

6. He koʼe neʼe tuku e Sehova he temi loaloaga ke iloʼi ai pe ʼe ko ai ʼae ʼe tonu ke pule ʼi te lagi mo te kele?

⁶ Te fakafeagai ki tana pule. Ko Sehova tokotahi pe ʼae ʼe tonu ke pule ʼi te lagi mo te kele. Pea ʼe ko tana faʼahiga pule pe ʼae ʼe lelei. (Fkha. 4:11) Kae neʼe fakahalaʼi e te Tevolo ia te kau ʼaselo, ʼo toe feia mo te hahaʼi ke natou tui ʼe mole tonu ki te ʼAtua ke pule. ʼE fakamoʼoni pe anai ʼaki te temi, ʼe ko Sehova ʼae ʼe tonu ke pule. Koia la ʼae, neʼe fakaha te poto ʼo te ʼAtua ʼi tana tuku he temi loaloaga ke mahino ai te tagata ʼe mole feala ke lelei tana pule mo kapau ʼe mole fakalogo ki tona Tupuʼaga. (Sel. 10:23) ʼAki te faʼa kataki ʼo te ʼAtua, ʼe tou iloʼi anai pe ʼe ko ai ʼae ʼe tonu ke pule. ʼEi, ʼe tou iloʼi anai ʼe ko tona Puleʼaga tokotahi pe ʼae ka ina fakatuʼu te tokalelei pea mo te fimalie ʼi te kele.

7. Ko ai ʼae neʼe agatuʼu kia Sehova, pea kotea ʼae ka hoko anai kia natou?

⁷ Te agatuʼu ʼa ʼihi ʼo ʼana fanau. Neʼe fakatupu e Sehova te kau ʼaselo pea mo te tagata haohaoa. Kae ko te ʼaselo ko Satana (ko tona fakaʼuhiga “Ko He Tahi ʼe Fakafeagai”) neʼe agatuʼu kia Sehova. Neʼe ina lava fakahalaʼi ia Atama mo Eva, ʼae neʼe nā haohaoa, ke toe agatuʼu mo naua. Pea neʼe toe agatuʼu mo he kau ʼaselo pea mo ʼihi hahaʼi ki te ʼAtua. (Suta 6) Ki muli age, maʼia mo ʼihi ʼi te puleʼaga ʼo Iselaele, ia te hahaʼi ʼae neʼe filifili e te ʼAtua, neʼe natou situʼa kia te ia pea mo tauhi ki te ʼu ʼatua hala. (Esa. 63:8, 10) Neʼe lotomamahi ai ia Sehova. Kae neʼe faʼa kataki pe, pea ʼe hoko atu pe anai tana faʼa kataki ʼo kaku pe ki te temi ʼae ka ina pulihi ai te kau agatuʼu fuli. Ko te kau agatonu ʼe natou fiafia anai ʼuhi he ʼe mole kei natou ʼutakiʼi anai te agakovi ʼi te malama ʼaeni.

8-9. Kotea te ʼu loi ʼe tala e te ʼu fili ʼo Sehova, pea kotea ʼae ʼe feala ke tou fai ʼo ʼuhiga mo te ʼu loi ʼaia?

⁸ Te ʼu loi ʼa te Tevolo. Neʼe lau e Satana ko Sopo, ʼo feia mo te ʼu kaugana agatonu fuli ʼa te ʼAtua, ʼe natou tauhi kia Sehova ʼuhi pe he ʼe ina foaki kia natou te ʼu lelei. (Sopo 1:8-11; 2:3-5) Pea ʼe kei hoko atu pe tana fai te ʼu tukugakoviʼi ʼaia ʼi te temi nei. (Fkha. 12:10) ʼE feala ke tou fakaha ko Satana ʼe gutu loi ʼaki hatatou katakiʼi ʼotatou fihifihia pea mo nonofo agatonu ki te ʼAtua he ʼe tou ʼoʼofa ia te ia. Neʼe fakapale e Sehova ia Sopo, pea ʼe ina toe fakapale anai tatou mo kapau ʼe tou faʼa kataki.—Sakp. 5:11.

⁹ ʼE fakaʼaogaʼi e Satana ia te kau takitaki lotu moʼo lau ko Sehova ʼe ko he ʼAtua ʼe  agakovi pea ʼe ko ia ʼae ʼe ina fakamamahiʼi tatou. ʼE ui e ʼihi kau takitaki lotu, ka mate he kiʼi tamasiʼi, pea ʼe ko te ʼAtua ʼae neʼe ina toʼo maʼa ia, he ʼe ʼaoga kia ia he tahi kiʼi ʼaselo. ʼE ko he toe patapata ʼaia ki te ʼAtua! ʼE tou iloʼi e ko Sehova ʼe ko he Tamai ʼe fonu ʼi te ʼofa. Kapau ʼe tou tau mo he mahaki kovi peʼe kua mate he tahi neʼe tou ʼoʼofa mamahi ai, ʼe mole tou ui ʼe ko te hala ʼa te ʼAtua. Kae ʼe tou tui papau ʼe ʼi ai anai he ʼaho ʼe ina fakamalolo anai te kau mahahaki pea mo fakatuʼuake anai te kau mate. Pea ʼe tou fakaha kia natou fuli ʼae ʼe tou palalau ki ai ko Sehova ʼe ko he ʼAtua ʼofa. Ka tou fai te faʼahi ʼaia, ʼe feala ai kia Sehova ke ina tali kia ia ʼae ʼe laukovi kia te ia.—Taag. 27:11.

10. Kotea ʼae ʼe fakaha mai ia Pesalemo 22:24, 25 ʼo ʼuhiga mo Sehova?

¹⁰ Te mamahi ʼo ʼana kaugana ʼae ʼe ʼofa mamahi ai. Ko Sehova ʼe ko he ʼAtua manavaʼofa. ʼE lotomamahi ʼaupito moka ʼe sio mai ʼe tou mamahi ʼuhi heʼe fakatagaʼi tatou, peʼe tou mahahaki, peʼe ʼuhi ko ʼotatou vaivaiʼaga. (Lau ia Pesalemo 22:24, 25.) ʼE mahino Sehova ki ʼotatou mamahi, ʼe ina loto ke ina fakagata, pea ʼe ko te meʼa ʼaia ka ina fai anai ʼi he ʼaho. (Vakaʼi mo Ekesote 3:7, 8; Esaia 63:9.) ʼI te temi ʼaia, “ʼe ina holoholoʼi anai te ʼu loʼimata fuli mai [ʼotatou] mata, ʼe mole toe ʼi ai anai te mate, mo te putu, mo te lauga pea mo te mamahi.”—Fkha. 21:4.

11. Kotea ʼae ʼe logoʼi e Sehova ʼo ʼuhiga mo ʼana kaugana agatonu ʼae kua mamate?

¹¹ Te mavete mo ʼona kaumeʼa ʼuhi ko te mate. Kotea ʼae ʼe logoʼi e Sehova ʼo ʼuhiga mo te ʼu tagata mo fafine agatonu ʼae kua mamate? ʼE loto moʼoni ke toe sio kia natou. (Sopo 14:15) Fakakaukauʼi age muʼa te toe fia sio ʼa Sehova ki tona kaumeʼa ko Apalahamo. (Sakp. 2:23) Peʼe ko Moisese, ʼae neʼe nā faipalalau ʼo nā “fehagaaki.” (Eke. 33:11) Pea ʼe toe fakaʼamu lahi ke toe logo ki te ʼu hiva fakavikiviki ʼa Tavite  pea mo ʼihi atu tagata faipesalemo. (Pes. 104:33) Logo la kua mamate ʼona kaumeʼa ʼaia, kae ʼe mole galoʼi natou e Sehova. (Esa. 49:15) ʼE ina iloʼi tonatou ʼuhiga takitokotahi. ʼE ui fenei ʼi te Tohi—Tapu: “Kia te ia, ʼe natou maʼuʼuli fuli.” (Luka 20:38) ʼE hoko mai anai te ʼaho ʼae ka ina fakatuʼuake natou. ʼE toe fagono anai ki ʼanatou faikole pea mo tali tanatou tauhi. Kapau ko he tahi neʼe ke ʼofa mamahi ai kua mate, ʼe mahino ia ʼe fakalotofimalieʼi koe e te ʼu manatu ʼaia.

12. He koʼe ʼe lotomamahi ʼaupito ia Sehova ʼi te ʼu ʼaho fakamuli ʼaeni?

¹² Te kau agakovi ʼae ʼe natou gaohi koviʼi te hahaʼi. ʼI te kamata pe ʼo te agatuʼu ʼi Eteni, neʼe iloʼi ai e Sehova ko te ʼu aluʼaga ʼo te malamanei ’e ʼaʼasili kovi age anai, kae ki muli age ʼe toe liliu anai ʼo lelei. ʼE fehiʼa ia Sehova ki te agakovi, mo te heʼe faitotonu, pea mo te agamalohi ʼae ʼe hoko ʼi te malama ʼaeni. Neʼe tokaga tuʼumaʼu pe ia Sehova kia natou ʼae ʼe vaivavai pea ʼe mole he tahi moʼo puipui natou, ohage la ko te ʼu fanau ʼae ʼe hala mo matuʼā pea mo te kau vitua. (Sakl. 7:9, 10) Pea ʼe lotomamahi ʼaupito tafito la moka fakamamahiʼi ʼana kaugana agatonu pea mo pilisoniʼi natou. Tou tui papau ʼe ʼofa Sehova ia tatou fuli ʼaeni ʼe tou faʼa kataki, ohage pe ko ia.

13. Kotea te ʼu aga heʼe ʼaoga ʼe fai e te tagata pea ʼe sio ki ai te ʼAtua? Pea kotea ʼae ka ina vave fai?

¹³ Te kua kovi age ʼo te ʼu aga heʼe ʼaoga. Neʼe fakatupu te tagata ki te pāki ʼo te ʼAtua. Kae ʼe fiafia ia Satana ʼi tana uga natou ke natou fai he ʼu aga heʼe ʼaoga. ʼI te temi ʼo Noe, ʼi te sio ʼa Sehova “kua lahi te agakovi a te tagata . . . nee fakahemala leva . . . i tana fakatupu te tagata i te kele, pea nee mamahi osi tona loto.” (Sen. 6:5, 6, 11) Pea talu mai ai, kua ʼasili kovi age. ʼE fiafia ʼaupito ia Satana ʼi te kua leleiʼia te fai ʼo te ʼu aga heʼe ʼaoga e he tagata mo fafine, peʼe ko ʼae ʼe fai e he tagata mo he tagata peʼe ko he fafine mo he fafine. (Efe. 4:18, 19) Pea ʼe toe fiafia lahi age moka fai e he tahi ʼe tauhi kia Sehova he toe agahala mamafa. Ka kua ʼosi anai te faʼa kataki ʼa Sehova, ʼe ina fakaha anai tona fehiʼa ki te hahaʼi aga heʼe ʼaoga, ʼae ʼe mole fia fetogi.

14. Kotea ʼae ʼe fai e te tagata ki te kele pea mo te ʼu manu?

¹⁴ Te maumauʼi e te tagata te kele ʼae neʼe fakatupu e te ʼAtua. ʼE pule ‘te tagata ki te tagata ke fakamamahii ai ia ia.’ Kae ʼe mole gata aipe, he ʼe mole toe tokaga lelei ki te kele pea mo te ʼu manu, ʼo mulimuli ki te fakatotonu ʼa te ʼAtua ʼi te kamata. (Ekl. 8:9; Sen. 1:28) ʼE ui e ʼihi hahaʼi faifekumi, ʼe ko te miliona faʼahiga manu pea mo fuʼu ʼakau ʼe mole kei tou toe maʼu anai ʼi te ʼu taʼu ka hoko mai, ʼuhi ko te ʼu gaue ʼa te tagata. ʼE mole tou punamaʼuli ai ki te tuʼania ʼa te hahaʼi ʼo ʼuhiga mo te ʼulihi ʼo te kele. Meʼa fakafiafia, he neʼe fakapapauʼi mai e Sehova ʼe ina ‘maumauʼi anai ia natou ʼae ʼe natou maumauʼi te kele’ pea ʼe ina fakaliliu anai te kele ko he palatiso.—Fkha. 11:18; Esa. 35:1.

15-16. Kotea ʼae ʼe ina uga tatou ke tou faʼa kataki ohage ko Sehova? Tuku mai he faʼifaʼitaki.

¹⁵ Kotou fakakaukauʼi age muʼa te ʼu fihifihia fuli ʼae ʼe kei katakiʼi e tatatou Tamai ʼae ʼi selo talu mai fualoa. (Vakaʼi te fakamatala ʼae ʼi te ʼa takai “ ʼE Faʼa Katakiʼi e Sehova.”) ʼE feala pe kia Sehova ke ina maumauʼi ʼi he temi pe te malama agakovi ʼaeni. Kae neʼe fua lelei kia tatou tana faʼa kataki! Tou toʼo he faʼifaʼitaki: Ko he taumatuʼa ʼe fakaha age kia naua, ʼe tupu anai tanā kiʼi tamasiʼi mo he toe mahaki kovi, pea ʼe mole maʼuli fualoa anai. Kae ʼe fiafia pe te taumatuʼa ʼi te tupu mai ʼo tanā kiʼi tamasiʼi, tatau aipe pe ʼe faigataʼa anai hanā tokakaga ki ai. Ko tonā ʼoʼofa ki tanā kiʼi tamasiʼi, ʼae ʼe ina  uga ai naua ke nā katakiʼi te ʼu faigataʼaʼia fuli ke maʼuli fiafia pe tanā kiʼi toe ʼaia.

¹⁶ ʼO toe feia aipe, ko te hologa ʼo Atama mo Eva ʼe natou tutupu ake agahala. Kae ʼe ʼofa pe pea mo tokaga lelei ia Sehova kia natou. (1 Soa. 4:19) ʼO mole hage ko te taumatuʼa ʼo te faʼifaʼitaki ʼi muʼa atu, ko Sehova ʼe feala pe ia ke ina fakagata te ʼu mamahi fuli ʼo ʼana fanau. Pea kua ʼosi ina fakatuʼutuʼu te ʼaho ʼae ka ina fakahoko anai te faʼahi ʼaia. (Mat. 24:36) Ko tona ʼofa ʼaia ia tatou, ʼe ina uga tatou ke tou faʼa kataki, ohage ko ia.

17. ʼE tokoni feafeaʼi mai te ʼu palalau ʼo ʼuhiga mo Sesu ia Hepeleo 12:2, 3 ke tou haga faʼa kataki?

¹⁷ Ko Sehova ʼe ko te faʼifaʼitakiʼaga lelei ʼo te faʼa kataki. Pea neʼe faʼifaʼitakiʼi e Sesu ia te faʼa kataki ʼo tana Tamai. Moʼo haofaki ʼo tatou, neʼe katakiʼi e Sesu te ʼu palalau fakafeagai, mo te ufiufi, pea mo he pou fakamamahi. (Lau ia Hepeleo 12:2, 3.) ʼE mahino ia, neʼe maʼu e Sesu te malohi ke faʼa kataki mai te faʼifaʼitaki ʼa Sehova, ʼae neʼe faʼa kataki. Pea ʼe feala ke toe feia mo tatou.

18. ʼE tokoni feafeaʼi mai ia 2 Petelo 3:9 ke tou mahino ki te ʼu fua lelei ʼo te kataki fualoa ʼa Sehova?

¹⁸ Lau ia 2 Petelo 3:9. ʼE iloʼi lelei e Sehova te temi ʼae ʼe tonu ai ke ina pulihi te malama ʼaeni. Neʼe feala, ʼaki tana kataki fualoa, ke fakatahitahiʼi he toe hahaʼi tokolahi, ʼe toko lauʼi miliona, ʼe natou atolasio mo fakavikiviki kia te ia. ʼE natou fiafia fuli ʼi te kataki fualoa ʼaia ʼa Sehova, he neʼe feala ai ke natou tutupu, mo ako ke natou ʼoʼofa ia te ia, pea mo foaki tonatou maʼuli kia te ia. ʼE ha anai neʼe lelei te tonu ʼae neʼe fai e Sehova ke faʼa kataki, ʼi te ʼaho ʼae ka ina fakapale anai tatou he neʼe tou faʼa kataki ʼo kaku ki te fakaʼosi.

19. Kotea ʼae ʼe tou fakatotonu ke tou fai, pea kotea anai tatatou fakapale?

¹⁹ ʼE tou ako mai ia Sehova pe ʼe feafeaʼi hatatou faʼa kataki, ʼaki te fiafia. Logo la te ʼu mamahi ʼae neʼe tupu ʼuhi ko Satana, kae ko Sehova ʼe ko “te ʼAtua fiafia” pe ia. (1 Tim. 1:11) ʼO toe feia mo tatou, ʼe feala ke tou fiafia ʼi tatatou fakatalitali ki te temi ʼae ka fakatapuha anai e Sehova tona huafa, mo fakalakatonuʼi tona pule, pea mo fakagata te ʼu agakovi mo ʼatatou fihifihia. Tou fakatotonu ke tou faʼa kataki. Pea tou manatuʼi ʼe toe faʼa kataki mo tatatou Tamai ʼae ʼe ʼi selo. Kapau ʼe tou fai te faʼahi ʼaia, ʼe hoko anai kia tatou takitokotahi te ʼu palalau ʼaeni: “Fiafia te tagata ʼae ʼe haga kataki ʼi te ʼahiʼahi, koteʼuhi ʼi tona kua leleiʼia e te ʼAtua, ʼe foaki anai ki ai te pale ʼo te maʼuli, ʼae neʼe fakapapauʼi e Sehova kia natou ʼae ʼe haga ʼoʼofa kia te Ia.”—Sakp. 1:12.