Kua Kotou Iloʼi Koa?
ʼI te temi ʼo Sesu, neʼe ko te ʼu faʼahiga tukuhau fea neʼe tonu ke totogi e te hahaʼi?
LOLOTOGA ni taʼu, neʼe ko te agamahani ʼa te kau Iselaele tanatou foaki he falā moʼo lagolago ki te tauhi moʼoni. Kae ʼi te temi ʼo Sesu, neʼe lahi te ʼu tukuhau neʼe tonu ke totogi e te kau Sutea, pea neʼe ko he meʼa neʼe mamafa kia natou.
ʼI te taʼu fuli, neʼe tonu ki te hahaʼi tagata Sutea ke natou foaki he vaeluaʼi sikele ʼe tahi (peʼe ko he ʼu talame ʼe lua) moʼo lagolago ki te tauhi ʼae neʼe fai ʼi te tapenakulo, pea ki muli age ʼi te fale lotu. ʼI te temi ʼo te kau Kilisitiano, neʼe fakaʼaogaʼi te foʼi falā ʼaia ki te ʼu gaue fuli ʼae neʼe fai ʼi te fale lotu, ʼae neʼe faʼu e Helote. Neʼe fehuʼi age e ʼihi Sutea kia Petelo pe ʼe kotea la te manatu ʼa Sesu ki te totogi ʼo te tukuhau ʼaia. Neʼe mole fakafeagai ia Sesu ki ai. Pea neʼe ina fakaha kia Petelo pe ʼe ina maʼu anai ʼifea he foʼi piesi moʼo totogi ʼaki te tukuhau ʼaia.—Mat. 17:24-27.
ʼI temi ʼaia, neʼe tonu ki te ʼu kaugana ʼa te ʼAtua ke natou foaki te vahe hogofulu ʼo tanatou taʼukai peʼe ʼo tonatou totogi. (Lev. 27:30-32; Num. 18:26-28) Neʼe fakamaʼua e te kau takitaki lotu ki te hahaʼi ke natou foaki te vahe hogofulu ʼo te ʼu kiʼi ʼakau fuli ʼae moʼo fakamagoni ʼaki te meʼa kai, maʼia pe la mo “te menite, mo te aneto pea mo te kumino.” Neʼe mole kovi ia kia Sesu te totogi ʼo te tukuhau ʼaia. Kae neʼe ina tala te malualoi ʼa te kau sekelipa pea mo te kau Faliseo.—Mat. 23:23.
Kae ʼi te temi ʼaia neʼe toe lahi te ʼu tukuhau ʼae neʼe tonu ke totogi e te kau Sutea ki te kau Loma ʼae neʼe pule kia natou. Ohage la, ko natou ʼae neʼe maʼu kele neʼe tonu ke natou foaki te vahe 20, pea mo te 25 ki te teau ʼo tonatou taʼukai, peʼe ko te tau paʼaga ʼo te ʼu vahe ʼaia. Pea neʼe ʼi ai te tahi tukuhau neʼe tonu ke totogi e te kau Sutea takitokotahi. Pea neʼe fakafehuʼi e te kau Faliseo ia Sesu ʼo ʼuhiga mo te tukuhau ʼaia. ʼI tana tali, neʼe fakaha e Sesu te faʼahiga manatu ʼae ʼe tonu ke tou maʼu ʼo ʼuhiga mo te totogi ʼo te ʼu tukuhau. Neʼe ina ui fenei: “Koia, kotou liufaki te ʼu meʼa ʼa Sesale kia Sesale, kaʼe ko te ʼu meʼa ʼa te ʼAtua ki te ʼAtua.”—Mat. 22:15-22.
Neʼe toe tonu ke totogi te ʼu tukuhau ʼa te ʼu koloa ʼae neʼe haʼu mai te tahi ʼu fenua, pea mo ʼae neʼe fakatau ki tuʼa puleʼaga. Pea neʼe totogi te tukuhau ʼaia ʼi te ʼu ʼuafu, peʼe ʼi te ʼu ʼaleso, peʼe ʼi te ʼu ala magafa, peʼe ʼi te huʼaga ʼo te ʼu kolo peʼe ʼo te ʼu fakatauʼaga koloa.
Ko te ʼu tuʼuga tukuhau ʼae neʼe fakamaʼua e te kau Loma neʼe ko he kavega mamafa ki te hahaʼi. Neʼe ui e te tagata Loma faihisitolia ko Tacite, ʼi te temi ʼo te Hau ko Tipele ʼae neʼe pule ʼi te kei maʼuli ʼa Sesu ʼi te kele, “ko te hahaʼi ʼo te ʼu potu fenua ʼo Silia pea mo Sutea ʼae neʼe mafasia ʼuhi ko te ʼu tukuhau, neʼe natou kole ke fakahifo.”
Neʼe toe faigataʼa te maʼuli ʼa te hahaʼi ʼuhi ko te faʼahiga tanaki ʼo te ʼu tukuhau. Ko ia ʼae neʼe ina fia maʼu te gaue ʼae ko te tanaki ʼo te ʼu tukuhau, neʼe tonu ke ina foaki he toe paʼaga lahi ke ina maʼu te gaue ʼaia. Pea neʼe ina fakagaueʼi te tahi ʼu hahaʼi ke natou tanaki te ʼu tukuhau. Pea ko natou fuli ʼaia, neʼe natou faiga ke natou maʼu he ʼu tupu mai te ʼu tukuhau ʼaia. Neʼe lagi ʼi ai he ʼu tagata tanaki tukuhau neʼe gaue maʼa Sakeo. (Luka 19:1, 2) Koia neʼe iita ai te hahaʼi ki tanatou faʼahiga fai ʼaia, pea mo natou fehihiʼa ai ki te ʼu tagata tanaki tukuhau.