Te ’u Fehuʼi ’a Te Kau Lautohi
Kotea te fakaʼuhiga ʼo te ʼu palalau ʼaeni ʼa te apositolo ko Paulo: “Kua au mate ʼo ʼuhiga mo te Lao ʼuhi ko te Lao”?—Kal. 2:19.
Neʼe tohi fenei e Paulo: “Kua au mate ʼo ʼuhiga mo te Lao ʼuhi ko te Lao. Kaʼe ʼuhi ko te faʼahi ʼaia, kua au maʼuli maʼa te ʼAtua.”—Kal. 2:19.
Ko te meʼa ʼaia neʼe tohi e Paulo neʼe ʼi ai tona pikipikiga mo te manatu maʼuhiga ʼae neʼe palalau ki ai ʼi tana faitohi ki te ʼu kokelekasio ʼo te potu fenua Loma ko Kalate. Ko ʼihi Kilisitiano ʼi te potu fenua ʼaia neʼe natou tui ki te ʼu meʼa ʼae neʼe akoʼi e te kau faiako loi. Kia natou ʼaia, ke haofaki he tahi, neʼe tonu ke mulimuli ki te ʼu fakatotonu ʼo te Lao ʼa Moisese, tafito la ʼo ʼuhiga mo te silikosisio. Kae neʼe iloʼi e Paulo, neʼe mole kei fakamaʼua e te ʼAtua ke silikosisioʼi ʼana kaugana. ʼAki ni palalau poto, neʼe ina fakaha ai te hala ʼo te ʼu manatu ʼaia ʼa te kau faiako loi, pea neʼe ina fakamalohiʼi ai te tui ʼo ʼona tehina ki te sakilifisio ʼo Sesu Kilisito.—Kal. 2:4; 5:2.
ʼE fakaha lelei mai ʼi te Tohi-Tapu, moka mate he tahi ʼe mole kei ina iloʼi he meʼa pea ʼe mole malave he meʼa ki ai. (Ekl. 9:5) ʼI te ui fenei ʼa Paulo “kua au mate ʼo ʼuhiga mo te Lao,” ʼe ko tona fakaʼuhiga kua fakaʼateaina ia mai te Lao ʼa Moisese, pea ʼe mole kei pule ia kia Paulo. Kae neʼe tui papau ia, ʼuhi ko tana tui ki te sakilifisio ʼo Sesu, kua ‘maʼuli ia maʼa te ʼAtua.’
Neʼe hoko te fetogi ʼo te aluʼaga ʼo Paulo “ ʼuhi ko te Lao.” ʼO feafeaʼi? Neʼe hoki fakamahino age pe e Paulo “ ʼe mole faitotonu he tagata ia muʼa ʼo te ʼAtua ʼaki tana fai te ʼu gaue ʼo te lao, kaʼe ʼaki pe tana tui kia Sesu Kilisito.” (Kal. 2:16) ʼEi, neʼe fakahoko e te Lao he faʼahi ʼe maʼuhiga. ʼE ko te meʼa ʼaia neʼe fakaha e Paulo ʼi tana ui fenei: “Neʼe foaki mai ki ʼamuli te Lao moʼo fakaha te ʼu talagataʼa ʼo kaku ki te haʼu ʼo te hakoga ʼae neʼe fai ki ai te fakapapau.” (Kal. 3:19) Neʼe fakaha lelei e te Lao, neʼe mole feala ki he hahaʼi heʼe haohaoa pea mo agahala ke natou muliʼi fakalelei te ʼu pelesepeto ʼo te Lao. Kae neʼe ʼaoga kia natou he sakilifisio haohaoa neʼe tonu ke momoli tuʼa tahi ʼo talu ai. Koia, neʼe taki ai e te Lao ia te hahaʼi ki “te hakoga,” ʼae neʼe ko Kilisito. Ko ʼae neʼe tui kia Sesu Kilisito neʼe feala hana faitotonu ia muʼa ʼo te ʼAtua. (Kal. 3:24) Neʼe faitotonu ia Paulo ia muʼa ʼo te ʼAtua ʼuhi he neʼe ina tali ia Sesu pea mo tui kia te ia, ʼuhi ko te Lao. ʼI te temi ʼaia, neʼe ‘mate ai ia Paulo ʼo ʼuhiga mo te Lao’ kae neʼe “maʼuli maʼa te ʼAtua.” Neʼe mole kei pule ia te Lao kia ia kae neʼe ko te ʼAtua.
ʼE toe maʼu te manatu ʼaia ʼi te tohi ʼae neʼe fai e Paulo ki te kau Loma. ʼE ina ui fenei: “Kua fakaʼateainaʼi tatou mai te Lao he ʼe mole kei ina taʼofi tatou.” (Loma 7:6) Koia ia Kalate 2:19, neʼe mole talanoa ia Paulo ki te matehi ʼo he tahi neʼe talagataʼa ki te Lao. Kae neʼe talanoa ia ki he fakaʼateaina. Neʼe mole kei pule te Lao kia ia pea ki te kau Kilisitiano ʼae, ohage ko ia, neʼe fakaʼateainaʼi natou ʼuhi ko tanatou tui ki te sakilifisio ʼo Sesu.