1. Kotea ʼae neʼe ui e te ʼu tisipulo ʼa Sesu ki he hahaʼi kauga malie ke natou fai?

KO TE toe hahaʼi kauga malie, tagata mo fafine, neʼe natou fakatahitahi ki Selusalemi. Neʼe natou ʼomai mai te tahi ʼu kolo pea neʼe natou palalau ʼi ni lea kehekehe. Neʼe hoko leva he aluʼaga fakaofoofo ʼi te ʼaho ʼaia. Neʼe feala ki ʼihi kau Sutea ke natou palalau ʼi te lea ʼo te hahaʼi ʼaia. Neʼe natou punamaʼuli ai. Kae neʼe malave ʼaupito age ki te hahaʼi ʼaia te logo ʼae neʼe fakamafola e te kau Sutea ʼaia pea mo te apositolo ko Petelo. Neʼe natou iloʼi ai ʼe feala ke haofaki natou ʼaki tanatou tui ʼae kia Sesu Kilisito. Koia neʼe natou fehuʼi fenei ai leva: “Kotea ʼae ʼe tonu ke matou fai?” Neʼe ui fenei age e Petelo: “Kotou tahi papitema.”—Gaue 2:37, 38.

2. Kotea ʼae ka tou vakaʼi anai ʼi te alatike ʼaeni? (Vakaʼi te pāki ʼo te takafi.)

² Neʼe hoko leva he meʼa fakaofoofo, he neʼe ko te toko 3 000 hahaʼi neʼe papitema ʼi te ʼaho ʼaia, ʼo natou liliu ai ko he ʼu tisipulo ʼa Kilisito. Neʼe kamata ai te fakahoko ʼo te gaue ʼae ko te fai ʼo ni tisipulo, ʼae neʼe fakatotonu e Sesu ke fai. ʼE kei hoko atu pe ia ʼaho nei te gaue ʼaia. Kae ʼe mole tou palalau pe mo he tahi lolotoga ni hola pea papitema atu aipe. ʼE lagi ʼaoga anai ni mahina, peʼe ko he taʼu katoa, peʼe laka atu pea feala ai ki he tahi ʼe ina ako te Tohi-Tapu ke papitema. ʼE tonu ke tou gaue lahi moʼo tokoni ki ai ke liliu ko he tisipulo. Ko he faʼahi ʼe mahino lelei ki ai natou ʼae ʼe ʼi ai hanatou ako Tohi-Tapu! ʼI te alatike ʼaeni, ʼe tou vakaʼi anai pe ʼe kotea ʼae ʼe feala ke tou fai moʼo tokoni kia ia ʼae ʼe ako mo tatou ke papitema.

3. ʼO mulimuli kia Mateo 28:19, 20, kotea ʼae ʼe tonu muʼa ke fai e ia ʼae ʼe ako ke feala ai leva hana papitema?

³ Ke feala ke papitema he tahi, ʼe tonu muʼa ke ina maʼuliʼi te ʼu  meʼa ʼae ʼe ina ako ʼi te Tohi-Tapu. (Lau ia Mateo 28:19, 20.) Kapau ʼe ina fai te faʼahi ʼaia, ʼe liliu anai ohage ko te “tagata poto” ʼi te lea fakatata ʼa Sesu, ʼae ʼe keli loloto moʼo fakatuʼu tona ʼapi ʼi te fuga maka. (Mat. 7:24, 25; Luka 6:47, 48) ʼE feafeaʼi hatatou tokoni ki he tahi ʼe ako ke ina maʼuliʼi te ʼu meʼa ʼae ʼe ina ako? Tou vakaʼi faʼahi ʼe tolu.

4. ʼE feafeaʼi hatatou tokoni ki hatatou ako Tohi-Tapu ke hoko atu ʼana faiga ke kaku ki te papitema? (Vaka’i mo te fakamatala ʼae ʼi te ʼa takai “ Tokoni Ki Tau Ako Ke Ina Fai He ʼu Fakatuʼutuʼu Pea Ke Ina Fakahoko.”)

⁴ Tokoni ki tau ako ke ina fai he ʼu fakatuʼutuʼu. He koʼe ʼe maʼuhiga te faʼahi ʼaia? Ohage la, ʼe ke fakatuʼutuʼu ke ke alu motoka ki he koga meʼa mamaʼo. ʼE lagi ke loto anai ke ke malolo ʼi ʼihi koga meʼa matalelei ʼi tau alu ʼaia. ʼI tau fai feia, ʼe mole kei ke manatuʼi ai leva ʼe kei mamaʼo te koga meʼa ʼae ʼe ke fia alu ki ai. ʼO toe feia mo ia ʼae ʼe ako, kapau ʼe ina fai he ʼu fakatuʼutuʼu ʼe faigafua hana fakahoko, ʼe ina tokagaʼi leva anai ʼe feala hana kaku ki te papitema. Moʼo tokoni ki tau ako ke tuputupu, ʼe feala ke ke fakaʼaogaʼi te tohi Ke Ke Fiafia ʼo Heʼe Gata, te koga ʼae “Taku Fakatuʼutuʼu.” ʼI te ʼosi pe ʼo he kapite, kolua vakaʼi he fakatuʼutuʼu ʼe feala ke ina fakahoko, ke ina maʼuliʼi ai te ʼu meʼa ʼae ʼe ina ako. Kapau ʼe ke loto ke fai e tau ako he tahi age fakatuʼutuʼu, ʼe feala ke ke tohi ʼi te koga ʼae “Te Tahi Fakatuʼutuʼu.” Fakaʼaogaʼi te ʼu koga ʼaia ʼo te tohi ke ke vakaʼi ai mo tau ako he ʼu fakatuʼutuʼu faigafua ʼe feala ke ina fakahoko, pea mo ʼae ʼe ʼaoga anai he temi ʼe loaloaga.

5. ʼO mulimuli kia Maleko 10:17-22, kotea ʼae neʼe ui e Sesu ki te tagata maʼu koloa ke ina fai, pea kotea tona tupuʼaga?

⁵ Tokoni ki tau ako ke ina fai he ʼu fetogi. (Lau ia Maleko 10:17-22.) Neʼe iloʼi e Sesu ʼe mole faigafua anai ki he tahi ʼe maʼu koloa hana fakatau ʼona koloa fuli. (Mko. 10:23) Kae he koʼe neʼe ina ui age ki te tagata maʼu koloa ʼae neʼe alu age kia te ia, ke ina fai te fetogi ʼaia?  Koteʼuhi neʼe ʼofa Sesu ia ia. ʼI ʼihi temi, ʼe lagi mole tou fakalotomalohi tatatou ako ke ina maʼuliʼi te ʼu meʼa ʼae ʼe ina ako, he ʼe kia tatou ia heʼeki feala ke ina fai he ʼu fetogi. ʼE moʼoni, ʼe ʼaoga he temi ki te hahaʼi ke natou tuku ʼanatou aga ʼafeā pea ke natou kofuʼi te ʼuluagaaga foʼou. (Kol. 3:9, 10) Kae kapau ʼe ke foimo fakaha age ki tau ako te ʼu fetogi ʼae ʼe tonu ke ina fai, pea ʼe mole tuai anai tana tuputupu. ʼAki takolua faipalalau ʼaia, ʼe ke fakaha ai tou ʼofa ia ia.—Pes. 141:5.

6. He koʼe ʼe tonu ke tou fai he ʼu fehuʼi ke tou iloʼi ai te manatu ʼa tatatou ako?

⁶ ʼE maʼuhiga ke ke fai ni fehuʼi ki tau ako, pe ʼe kotea la tana manatu ʼo ʼuhiga mo he faʼahi neʼe ina ako. ʼE feala ai hau iloʼi te ʼu meʼa ʼae ʼe mahino pea mo tui ki ai. Kapau ʼe ke fai tuʼumaʼu te faʼahi ʼaia, ʼe faigafua anai hakolua faipalalau ki he ʼu meʼa ʼe faigataʼa hana tui ki ai. ʼE lahi te ʼu fehuʼi ʼe ke maʼu anai ʼi te tohi Ke Ke Fiafia ʼo Heʼe Gata, ʼe feala ke ke iloʼi ai tana manatu. Ohage la, ʼi te kapite 04 ʼe fai ai te fehuʼi ʼaeni: “Kotea ʼae ʼe logoʼi e Sehova moka ke toʼo tona huafa?” Pea ʼi te kapite 09, ʼe fai ai te fehuʼi ʼaeni: “Kotea ʼae ʼe ke fia kole ki te ʼAtua?” ʼI te kamata, ʼe lagi faigataʼa anai ki tau ako ke ina tali ki te ʼu fehuʼi ʼaia. ʼE feala ke ke tokoni ki ai, ʼo ke akoʼi age ke fakakaukau ki te ʼu vaega Tohi-Tapu pea mo te ʼu pāki ʼo te tohi.

7. ʼE feafeaʼi hatatou fakaʼaogaʼi te faʼifaʼitaki ʼa ʼihi tehina mo tuagaʼane?

⁷ Kapau kua mahino tau ako ki te meʼa ʼae ʼe tonu ke ina fai, ʼe feala ke ke tokoni ki ai ke ina maʼuliʼi. ʼE feala hau fakaʼaogaʼi te ʼu faʼifaʼitaki ʼa ʼihi tehina mo tuagaʼane. Ohage la, kapau ʼe mole kau tuʼumaʼu tau ako ki te ʼu fono, ʼe feala ke ke fakaha age te ʼata viteo Neʼe Tokaga Ia Sehova Kia Au, ʼae ʼe tuʼu ʼi te koga “Te Tahi ʼu Manatu” ʼi te kapite 14 ʼo te tohi Ke Ke Fiafia ʼo Heʼe Gata. ʼE lahi te ʼu kapite ʼi te tohi ʼaia ʼe ke maʼu ai ni fakamatala feia ʼa ʼihi tehina mo tuagaʼane, ʼi te koga “Ta Fakaloloto” peʼe ko “Te Tahi ʼu Manatu.” * Kae tokaga foki naʼa ke fakatatau tau ako mo he tahi age, ʼaki hau ui fenei age: “Kapau neʼe ina lava fai, ʼe toe feala pe la mo koe ke ke fai.” Tuku ke mahino ia ia totonu ki te faʼahi ʼaia. ʼE lelei age hau faipalalau mo ia ʼo ʼuhiga mo te tehina peʼe ko te tuagaʼane ʼi te ʼata viteo, ohage la pe ʼe kotea ʼae neʼe tokoni kia ia ke ina maʼuliʼi te ʼu meʼa ʼae neʼe ina ako. Lagi feala ke ke palalau ki he vaega Tohi-Tapu maʼuhiga ʼi te ʼata peʼe ko he puleʼaki neʼe ina fai. Peʼe kapau ʼe feala, fakaha lelei pe neʼe tokoni feafeaʼi ia Sehova kia ia ʼae ʼi te ʼata.

8. ʼE feafeaʼi hatatou tokoni ki tatatou ako ke ʼofa kia Sehova?

⁸ Tokoni ki tau ako ke ʼofa kia Sehova. ʼO feafeaʼi? Kumi he ʼu faigamalie ke ke palalau ai mo tau ako ki te ʼu kalitate ʼo Sehova. Tokoni kia ia ke mahino ko Sehova ʼe ko he ʼAtua fiafia pea ʼe lagolago kia natou ʼae ʼe ʼoʼofa kia te ia. (1 Tim. 1:11; Hep. 11:6) Fakaha kia ia te ʼu fua lelei ʼae ka ina maʼu anai mo kapau ʼe ina maʼuliʼi te ʼu meʼa ʼae ʼe ina ako. Pea ke ke fakamahino age ʼe ko he fakamoʼoni ʼaia ʼe ʼofa Sehova kia ia. (Esa. 48:17, 18) Kapau ʼe lahi age tona ʼofa kia Sehova, ʼe ina fia fai anai he ʼu fetogi ʼi tona maʼuli.—1 Soa. 5:3.

9. ʼO mulimuli kia Maleko 10:29, 30, kotea ʼae ʼe feala ke tokoni kia ia ʼae ʼe ako ke ina fai he ʼu sakilifisio ke feala ai hana papitema?

⁹ Ke tuputupu ia ia ʼae ʼe ako ʼo kaku ki te papitema, ʼe tonu ke ina fai ni sakilifisio. Ohage ko te tagata maʼu koloa ʼae neʼe kua tou ʼosi palalau ki ai, ʼe lagi tonu ki ʼihi kau ako ke natou  fakafisi ki he ʼu koloa. Kapau ʼe mole alu tahi tana gaue mo te ʼu meʼa ʼae ʼe tuʼu ʼi te Tohi-Tapu, ʼe lagi tonu anai ke ina kumi he tahi gaue. Pea tokolahi te kau ako ʼe lagi tonu anai ke natou tuku tanatou fakatahi mo natou ʼae ʼe mole ʼoʼofa ia Sehova. Pea ko ʼihi age kau ako, ʼe liʼakina natou e tonatou famili ʼae ʼe mole ʼoʼofa ki te kau Fakamoʼoni ʼa Sehova. Neʼe ui e Sesu ʼe faigataʼa anai ki ʼihi hanatou fai te ʼu sakilifisio ʼaia. Kae neʼe ina fakapapauʼi kia natou ʼae ʼe mulimuli ia te ia, ʼe mole natou lotomamahi anai. ʼE fakapale anai natou e Sehova ʼaki hana foaki age he famili ʼofaina fakalaumalie. (Lau ia Maleko 10:29, 30.) ʼE ke lava tokoni feafeaʼi ki tau ako ke fua lelei kia ia te meʼa ʼofa taulekaleka ʼaia?

10. Kotea ʼae ʼe tou ako mai te tala manatu ʼa te tehina ko Manuel?

¹⁰ Ke ke kaumeʼa mo tau ako. ʼE maʼuhiga ke ke fakaha age ki tau ako ʼe ke tokaga kia ia. Kotea tona tupuʼaga? Kotou tokagaʼi te tala manatu ʼa te tehina ko Manuel, ʼae ʼe maʼuli ʼi Mekesike. ʼE ina manatuʼi te temi ʼae neʼe kei fai ai tana ako Tohi-Tapu. ʼE ina ui fenei: “Tuʼumaʼu pe ʼi muʼa ʼo te fai ʼo taku ako, neʼe fehuʼi mai e te tehina ʼae neʼe ina fai taku ako pe ʼe au lelei pe. Neʼe tokoni mai ke mole au tuʼania ʼi te palalau age kia meʼa fuli. Neʼe au iloʼi ai neʼe tokaga moʼoni mai kia au.”

11. Kotea te ʼu lelei ʼe maʼu e hatatou ako moka ʼe tou fakatahi mo ia?

¹¹ Toʼo hou temi ke ke fakatahi ai mo tau ako, ohage ko tona fai e Sesu mo ʼana tisipulo. (Soa. 3:22) Kapau ʼe feala, fakaafe ki tou ʼapi tau ako ʼae ʼe tuputupu ke kolua inu kafe, peʼe kolua kakai, peʼe kolua sioʼi te Televisio JW. ʼE fiafia anai tau ako ʼi tau fakaafe ia ia, tafito la ʼi te ʼu temi ʼo te ʼu ʼaho lalahi, he ʼe lagi nofo tokotahi anai ʼi te ʼu temi ʼaia. Koʼeni te meʼa ʼae ʼe ui e te tehina ʼe maʼuli ʼi Afelika: “Kia au neʼe lahi age pe te ʼu meʼa ʼae neʼe au ako ʼo ʼuhiga mo Sehova moka neʼe au fakatahi ai mo te tehina ʼae neʼe ina fai taku ako, kae kehe pe te temi ʼae neʼe ina fai ai taku ako. Neʼe au sio ki te ʼofa ʼa Sehova ki  tana hahaʼi pea mo tanatou fiafia ʼaupito. Neʼe ko te meʼa ʼaia neʼe au loto ki ai ʼi toku maʼuli.”

12. He koʼe ʼe lelei ke tou fetofetogi ia ia ʼae ʼe tou olo mo ia ʼo fai te ako?

¹² Ke ke fetofetogi ia ia ʼae ʼe alu mo koe ʼo fai te ako. ʼI ʼihi temi, ʼe lagi tou manatu ʼe lelei age takita alu tokotahi ʼo fai te ako, peʼe kita alu tuʼumaʼu pe mo ia ʼae ʼe kita alu mo ia ʼo fai te ako. Kae ʼe mahino ia, ʼe fua lelei anai ki tatatou ako mo kapau ʼe tou fetofetogi ia ia ʼae ʼe tou kauga olo ʼo fai te ako. ʼE ui fenei e te tehina ko Dmitrii ʼe maʼuli ʼi Eulopa: “Ko natou ʼae neʼe ʼomai ki taku ako, neʼe takitahi mo ia tana faʼahiga fakamahino ʼo te ʼu manatu. Neʼe natou tahi fakaha mai pe ʼe feafeaʼi haku maʼuliʼi te ʼu meʼa ʼae neʼe au ako. Pea neʼe mole au mataku ʼi taku ʼuluaki alu ʼae ki te ʼu fono, he neʼe kua au ʼosi feiloʼiʼaki mo ʼihi tehina mo tuagaʼane.”

13. He koʼe ʼe tonu ke tou fakalotomalohiʼi tatatou ako ke kau ki te ʼu fono?

¹³ Fakalotomalohi tau ako ke kau ki te ʼu fono ʼo te kokelekasio. Kotea tona tupuʼaga? Koteʼuhi ʼe fakatotonu e Sehova ki ʼana kaugana ke natou fakatahi. Pea ʼe ko te koga ʼaia ʼe kau ki tatatou tauhi. (Hep. 10:24, 25) Tahi ʼae meʼa, ko ʼotatou tehina mo tuagaʼane ʼe ko totatou famili fakalaumalie. Moka tou fakatahi mo natou ʼi te ʼu fono, pea ʼe hage pe ʼe tou vaevae fakatahi he meʼa kai kano lelei. Kapau ʼe ke fakalotomalohi tau ako ke kau ki te ʼu fono, ʼe ko hau tokoni ʼaia kia ia ke ina fai he faʼahi ʼe maʼuhiga ʼaupito, ke feala ai hana papitema. Kae ʼe lagi ko he faʼahi ʼe faigataʼa kia ia hana fai. ʼE lava tokoni feafeaʼi te tohi Ke Ke Fiafia ʼo Heʼe Gata ki tau ako?

14. ʼE feafeaʼi hatatou uga tatatou ako ke kau ki te ʼu fono?

¹⁴ ʼE feala ke ke fakaʼaogaʼi te kapite 10 ʼo te tohi Ke Ke Fiafia ʼo Heʼe Gata moʼo uga tau ako ke kau ki te ʼu fono. Neʼe kole ki he kau faifakamafola faiva ke natou vakavakaʼi mo ʼanatou ako te kapite ʼaia, ʼi muʼa ʼo te fakaha ʼo te tohi ʼaia. Neʼe natou ui neʼe ʼaoga ʼosi tanatou ako te kapite ʼaia pea neʼe kau leva ʼanatou ako ki te ʼu fono. Kae ʼaua naʼa ke fakatalitali ke ke vakaʼi mo tau ako te kapite 10 pea hoki ke fakaafe leva ia ia ke kau ki te ʼu fono. ʼE feala pe ke ke fai ʼi muʼa atu. Ko te kau ako ʼe natou tau mo ni fihifihia. Koia ʼae, ʼe tonu ai ke ke iloʼi pe ʼe kotea ʼae ʼe ʼaoga ki tau ako pea mo tokoni leva ki ai. ʼAua naʼa ke lotovaivai mo kapau ʼe mole ina tali atu aipe tau fakaafe ia ia ki te ʼu fono. Ke hoko atu pe koe tau fakaafe ia ia.

15. Kotea ʼae ʼe feala ke mataku ki ai tatatou ako?

¹⁵ Neʼe lagi ke mataku mo koe ʼi te kamata, ʼi tau liliu ko he Fakamoʼoni ʼa Sehova. Neʼe lagi ke ui ʼe mole feala anai hau alu ʼo faifakamafola ʼi te ʼu ʼapi. Peʼe lagi neʼe ke mataku naʼa fakafeagai tou famili peʼe ko ʼou kaumeʼa kia koe. Kapau koia, ʼe feala ke ke mahino ki te meʼa ʼae ʼe logoʼi e tau ako. Neʼe ui e Sesu ʼe feala ki ʼihi ke natou matataku. Kae neʼe ina fakalotomalohiʼi ʼana tisipulo ke mole natou tuku te mataku ke ina taʼofi tanatou tauhi ʼae kia Sehova. (Mat. 10:16, 17, 27, 28) Neʼe tokoni feafeaʼi ia Sesu ki ʼana tisipulo ke mole natou matataku, pea ʼe lava feafeaʼi hatatou faʼifaʼitakiʼi ia ia?

16. ʼE feafeaʼi hatatou tokoni ki tatatou ako ke palalau ki ʼihi ʼo ʼuhiga mo te ʼu meʼa ʼae neʼe ina ako?

¹⁶ Akoako tau ako ke palalau ki ʼihi ʼo ʼuhiga mo te ʼu meʼa ʼae neʼe ina ako. Neʼe lagi tuʼania te ʼu tisipulo ʼa Sesu ʼi tana fekauʼi natou ke olo ʼo faifakamafola. Kae neʼe tokoni ia Sesu kia natou ʼo ina fakaha age pe ʼe kofea ʼae neʼe tonu ke olo ʼo faifakamafola ai, pea kotea ʼae neʼe tonu ke natou ui. (Mat. 10:5-7) ʼE feafeaʼi hatatou faʼifaʼitakiʼi ia Sesu? Tokoni ki tau ako ke ina iloʼi pe ʼe ko ai ʼae ʼe feala ke faifakamafola ki ai. Ohage la, kole age ki ai pe ʼe ina iloʼi la he  tahi ʼe fiafia anai ʼi tana iloʼi he moʼoni ʼi te Tohi-Tapu. Pea teuteuʼi mo tau ako te ʼu meʼa ʼae ʼe feala ke ina ui, ʼo ke fakaha age he faʼahiga palalau faigafua ʼe feala ke ina fai. Kapau ʼe feala, fai mo ia he ʼu faʼifaʼitaki, ʼo ke fakaʼaogaʼi te tohi Ke Ke Fiafia ʼo Heʼe Gata, ʼi te koga “ ʼE Ui e ʼIhi.” Ka kolua fai te ʼu faʼifaʼitaki ʼaia, tokoni ki tau ako ke ina fakaʼaogaʼi te Tohi-Tapu moʼo fai he ʼu tali ʼe faigafua pea mo fakaʼapaʼapa.

17. ʼE feafeaʼi hatatou fakaʼaogaʼi ia Mateo 10:19, 20, 29-31 moʼo tokoni ki tatatou ako ke falala kia Sehova?

¹⁷ Tokoni ki tau ako ke falala kia Sehova. Neʼe ui e Sesu ki ʼana tisipulo ʼe tokoni anai ia Sehova kia natou heʼe ʼofa ia natou. (Lau ia Mateo 10:19, 20, 29-31.) Fakamanatuʼi age ki tau ako ʼe toe tokoni anai ia Sehova kia ia. ʼE feala ke ke tokoni ki ai ke falala kia Sehova moka ke faikole mo ia ʼo ke palalau ai ki te ʼu fakatuʼutuʼu ʼae ʼe ina fai. ʼE ui fenei e te tehina ʼe maʼuli ʼi he fenua ʼi Eulopa: “Moka neʼe faikole taku tagata faiako, neʼe palalau ai ki ʼaku fakatuʼutuʼu. ʼI taku sio ʼae neʼe tali e Sehova ki ʼana faikole, neʼe au kamata faikole ai mo au. Neʼe au logoʼi te tokoni mai ʼa Sehova ʼi taku kole ʼae ki taku patolo hoku ʼu ʼaho malolo ke au kau ki te fakatahi, pea mo fetogi taku ʼu hola gaue ke au kau ki te ʼu fono, logo la neʼe ko he gaue neʼe au hoki kamata age pe.”

18. Kotea te manatu ʼa Sehova ʼo ʼuhiga mo te gaue ʼa te kau faiako Tohi-Tapu?

¹⁸ ʼE ʼofa lahi ia Sehova kia natou ʼae ʼe ako mo tatou te Tohi-Tapu. Pea ʼe ina iloʼi tatatou gaue kinakina moʼo tokoni ki te hahaʼi ke natou fakaovi kia te ia. ʼE toe ʼofa lahi foki kia tatou. (Esa. 52:7) Kapau ʼe mole hau ako Tohi-Tapu ʼi te temi nei, ʼe feala pe ke ke tokoni ki te kau ako ke natou tuputupu ki te papitema, ʼo ke alu mo natou ʼae ʼe ʼi ai hanatou ako.