Te ’u Fehuʼi ʼa Te Kau Lautohi
Kotea ia “te folafola a te Atua” ʼae ʼe ui ia Hepeleo 4:12 “e mauli, mo malohi”?
Ka tou lau ia te kapite 4 ʼo te tohi ʼo Hepeleo, ʼe tou mahino ai neʼe palalau ia Paulo ki te logo ʼa te ʼAtua ʼo ʼuhiga mo tana fakatuʼutuʼu, ʼae ʼe tou maʼu ʼi te Tohi-Tapu.
ʼE tautau fakamahino ʼi ʼatatou tohi ia te vaega ʼo Hepeleo 4:12, ʼo ui ai ʼe maʼu e te Tohi-Tapu te malohi ke ina fetogi te ʼu maʼuli ʼo te hahaʼi. Pea ʼe moʼoni te fakamahino ʼaia. Kaʼe, ʼe lelei ke tou mahino pe kotea ʼae neʼe lolotoga palalau ki ai ia Paulo, ʼi te temi ʼae neʼe ina tohi ai ia te vaega ʼo Hepeleo 4:12. Neʼe ina fakalotomalohiʼi ia te kau Kilisitiano Hepeleo ke natou lagolago ki te ʼu fakatuʼutuʼu ʼa te ʼAtua. ʼE lahi te ʼu fakatuʼutuʼu ʼaia ʼe tou maʼu ʼi te Tohi-Tapu. Neʼe palalau ia Paulo ʼo ʼuhiga mo te kau Iselaele ʼi te temi ʼae neʼe fakaʼateainaʼi natou e te ʼAtua mai Esipito. Neʼe natou ʼamanaki ʼe natou ulu anai “ki he fenua ʼe tafe ai te huʼa pipi pea mo te meli,” pea ʼe natou maʼu anai te malolō moʼoni.—Ekesote 3:8, MN; Tetelonome 12:9, 10.
Neʼe ko te fakatuʼutuʼu ʼaia ʼa te ʼAtua. Kaʼe neʼe fakafisi te kau Iselaele ki te takitaki ʼa Sehova pea neʼe mole kei natou tui kia te ia. Koia, tokolahi ia natou neʼe mole natou ulu ai ki te maloloʼaga ʼaia. (Numelo 14:30; Sosue 14:6-10) Kaʼe neʼe ui e Paulo ʼe kei tuʼu pe ‘te fakapapau ke kotou ulu ki te maloloʼaga ʼo te ʼAtua.’ (Hepeleo 3:16-19; 4:1) Ko te “fakapapau” ʼaia ʼe kau ki te ʼu faʼahi ʼae neʼe fakaha e te ʼAtua ʼo ʼuhiga mo tana fakatuʼutuʼu. ʼE feala ke tou lau ia te ʼu faʼahi ʼaia pea mo lagolago ki tana fakatuʼutuʼu, ohage pe ko tona fai e te kau Kilisitiano Hepeleo. Neʼe talanoa e Paulo ki te ʼu vaega ʼo Senesi 2:2 pea mo Pesalemo 95:11, moʼo fakamoʼoni ai ko te fakapapau ʼaia ʼe fakatafito ki te Tohi-Tapu.
ʼE tou fiafia ʼi tatatou iloʼi ʼae ʼe ‘kei tuʼu ai te fakapapau ke kotou ulu ki te maloloʼaga ʼo te ʼAtua.’ ʼE tou tui ki te Tohi-Tapu moka ui mai ʼe kei feala pe ke tou ulu ki te maloloʼaga ʼo te ʼAtua. Pea ʼe tou faiga ke tou ulu ki ai. Kaʼe ʼe mole tou faiga ke tou fakalogo ki te Lao ʼa Moisese, pe ʼe fai he ʼu gaue ʼe lelei ke tupu ai te ʼofa ʼo Sehova kia tatou. Kailoa ia. Kaʼe ʼe tou haga lagolago ki te fakatuʼutuʼu ʼa te ʼAtua koteʼuhi ʼe tou tui kia te ia. Ko te toko lauʼi afe hahaʼi ʼi te malamanei katoa ʼe natou kamata ako te Tohi-Tapu pea mo ako pe kotea ʼae ʼe ui e Sehova ʼo ʼuhiga mo tana fakatuʼutuʼu. Koia, tokolahi ia natou ʼe natou fetogi tanatou faʼahiga maʼuli, mo fakaha tanatou tui pea mo papitema. ʼE ha mai ʼi te ʼu aluʼaga ʼaia “ko te folafola a te Atua e mauli, mo malohi.” Ko te ʼu faʼahi ʼae neʼe fakaha mai e te ʼAtua ʼi te Tohi-Tapu, neʼe ina fetogi ʼotatou maʼuli, pea ʼe hoko atu pe tana gaue ʼi ʼotatou maʼuli.