ALATIKE AKO 17
“ ʼE Au Fakahigoaʼi Koutou Ko ʼOku Kaumeʼa”
“ ʼE au fakahigoaʼi koutou ko ʼoku kaumeʼa koteʼuhi neʼe au fakaha atu kia koutou ia meʼa fuli neʼe au logo ki ai mai taku Tamai.”—SOA. 15:15.
KATIKO 13 Ko Totatou Faʼifaʼitakiʼaga Ko Kilisito
TE ʼU MANATU FAKANOUNOU *
1. ʼE lava feafeaʼi hau liliu ʼo kaumeʼa lelei mo he tahi?
ʼI TE agamahani, ke feala hatatou kaumeʼa lelei mo he tahi ʼe tonu ke tou toʼo he temi ke tou fakatahi ai mo ia, mo faipalalau mo ia, mo fevaevaeʼaki he ʼu manatu pea mo he ʼu meʼa ʼe kita logoʼi. Kae ʼe feala ke faigataʼa moka ʼe tou fia kaumeʼa lelei mo Sesu. Kotea tona tupuʼaga?
2. Kotea te ʼuluaki faʼahi ʼae ʼe feala ke faigataʼa ai hatatou kaumeʼa mo Sesu?
2 ʼUluaki, ʼe feala ke faigataʼa hatatou kaumeʼa mo Sesu koteʼuhi neʼe heʼeki tou felaveʼi mo ia. Ko te aluʼaga ʼaia neʼe toe hoko foki ki te kau Kilisitiano ʼe tokolahi ʼae neʼe maʼuʼuli ʼi te temi ʼo te kau apositolo. Logo la te faʼahi ʼaia, kae neʼe ui fenei e te apositolo ko Petelo: “Logo la neʼe heʼeki kotou sisio kia te ia, kaʼe ʼe kotou ʼoʼofa kia te ia. Logo la ʼe mole kotou sisio kia te ia ʼi te temi nei, kaʼe ʼe kotou tui kia te ia.” (1 Pet. 1:8) Koia, ʼe feala pe ke tou kaumeʼa lelei mo Sesu logo la neʼe heʼeki tou felaveʼi mo ia.
3. Kotea te lua faʼahi ʼae ʼe feala ke faigataʼa ai hatatou kaumeʼa mo Sesu?
3 Lua, ʼe feala ke faigataʼa hatatou kaumeʼa mo Sesu koteʼuhi ʼe mole feala ke tou palalau mo ia. Ka tou faikole, ʼe tou palalau kia Sehova. ʼE moʼoni ʼe tou momoli ʼatatou faikole ʼi te huafa ʼo Sesu, kae ʼe mole tou palalau kia Sesu. Pea ʼe mole loto e Sesu ke tou faikole age kia te ia. Kotea tona tupuʼaga? Koteʼuhi ʼe kau tatatou faikole ki tatatou tauhi, pea ʼe tou tauhi pe kia Sehova Mat. 4:10) Kae ʼe feala pe ke tou fakaha ʼe tou ʼoʼofa ia Sesu.
tokotahi. (4. (1) Kotea te tolu faʼahi ʼae ʼe feala ke faigataʼa ai hatatou kaumeʼa mo Sesu? (2) Kotea ʼae ka tou vakaʼi anai ʼi te alatike ʼaeni?
4 Tolu faigataʼa leva, ʼe maʼuli ia Sesu ʼi selo, pea ʼe mole feala ai hatatou toʼo he temi ke tou fakatahi mo ia. Kae logo la ʼe mole tou fakatahi mo ia, ʼe feala pe ke tou iloʼi lelei age ia ia. ʼE tou vakaʼi anai ʼi te alatike ʼaeni faʼahi ʼe fa ʼe feala ke tou fai ke malohi ai tatatou kaumeʼa mo ia. Kae tou talanoa muʼa pe ʼe koe ʼe maʼuhiga ke tou kaumeʼa lelei mo Kilisito.
HE KOʼE ʼE TONU KE TOU KAUMEʼA MO SESU?
5. He koʼe ʼe tonu ke tou kaumeʼa mo Sesu? (Vakaʼi mo te ʼu fakamatala ʼae ʼe ʼa takai “ Ka Tou Kaumeʼa Mo Sesu ʼe Tou Toe Kaumeʼa Ai Mo Sehova” pea “ He Manatu Fakapotopoto ʼo ʼUhiga Mo Sesu.”)
5 ʼE tonu ke tou kaumeʼa mo Sesu mo kapau ʼe tou fia felogoi lelei mo Sehova. Kotea tona tupuʼaga? Tou vakaʼi tupuʼaga ʼe lua. ʼUluaki, neʼe ui fenei e Sesu ki ʼana tisipulo: “ ʼE ʼofa te Tamai ia koutou, he neʼe kotou ʼoʼofa kia te au.” (Soa. 16:27) Pea neʼe ina toe ui fenei: “ ʼE mole he tahi ʼe haʼu ki te Tamai kaʼe ʼe mole fakalaka ia te au.” (Soa. 14:6) Kapau ʼe tou fia kaumeʼa mo Sehova kae heʼeki tou kaumeʼa lelei mo Sesu, ʼe hage pe ko hatatou fia ulu ki he loto fale kae ʼe mole tou ulu ʼi te matapa. Neʼe toe fakaʼaogaʼi e Sesu te fakata ʼaia, ʼi tana ui ʼo ʼuhiga mo ia totonu ko ia “te matapa ʼae ʼe fakalaka ai te ʼu ovi.” (Soa. 10:7) Lua tupuʼaga: Neʼe faʼifaʼitakiʼi lelei ʼosi e Sesu te ʼu kalitate ʼo tana Tamai. Neʼe ina ui fenei ki ʼana tisipulo: “Ko ʼae kua sio kia te au, kua toe sio ia ki te Tamai.” (Soa. 14:9) Koia, ke tou iloʼi lelei ia Sehova ʼe maʼuhiga ke tou ako ke tou iloʼi te maʼuli ʼo Sesu. ʼI tatatou ako he tahi ʼu faʼahi ʼo ʼuhiga mo Sesu, ʼe toe tuputupu ai totatou ʼofa kia te ia. Pea ka tuputupu totatou ʼofa ʼae kia Sesu, ʼe toe lahi ai mo totatou ʼofa ki tana Tamai.
6. Kotea te tahi tupuʼaga ke tou kaumeʼa ai mo Sesu? Kotou fakamahino.
6 ʼE tonu ke tou kaumeʼa mo Sesu ke feala ke tali e Sehova ʼatatou faikole. ʼE mole ko tona fakaʼuhiga ke tou ui pe ʼi te fakaʼosi ʼo ʼatatou faikole: “ ʼAki te huafa ʼo Sesu.” Kae ʼe tonu ke tou toe mahino pe ʼe fakaʼaogaʼi feafeaʼi e Sehova ia Sesu moʼo tali ki ʼatatou faikole. Neʼe ui fenei e Sesu ki te kau apositolo: “Ko te ʼu meʼa fuli ʼae ka kotou kole anai ʼi toku huafa, ʼe au fakahoko anai.” (Soa. 14:13) Logo la ko Sehova tokotahi pe ʼae ʼe fagono pea mo tali ʼatatou kole, kae neʼe ina foaki kia Sesu te malohi ʼae ke ina fakahoko ʼAna fakatuʼutuʼu. (Mat. 28:18) Koia, ʼi muʼa ʼo te tali e Sehova ki ʼatatou faikole, ʼe ina vakaʼi muʼa pe neʼe tou maʼuliʼi te ʼu fakatotonu ʼae neʼe fai e Sesu. Ohage la, neʼe ui fenei e Sesu: “Kapau ʼe kotou fakamolemole ki te hahaʼi ʼanatou hala, pea ʼe toe fakamolemole atu anai kia koutou ia takotou Tamai ʼae ʼe ʼi selo, kaʼe kapau ʼe mole kotou fakamolemole ki te hahaʼi ʼanatou hala, pea ʼe mole fakamolemole atu anai takotou Tamai ʼakotou hala.” (Mat. 6:14, 15) Koia ʼe maʼuhiga ʼaupito ai ke tou fai ki te hahaʼi te meʼa ʼae ʼe fai mai e Sehova mo Sesu kia tatou!
7. Ko ai ʼae ka ina maʼu te ʼu lelei ʼo te sakilifisio faitotogi ʼo Sesu?
7 ʼE gata pe anai kia natou ʼae ʼe kaumeʼa lelei mo Sesu ʼae ka natou maʼu te ʼu lelei ʼo tona sakilifisio faitotogi. ʼE tou iloʼi feafeaʼi te faʼahi ʼaia? Neʼe ui e Sesu ʼe ina ‘foaki tona maʼuli maʼa ʼona kaumeʼa.’ (Soa. 15:13) Ko te ʼu kaugana agatonu ʼae neʼe maʼuʼuli ʼi muʼa ʼo te haʼu ʼa Sesu ki te kele, ʼe fakatuʼuake anai natou, pea ʼe tonu anai ke natou ako ke natou iloʼi ia ia pea mo ʼoʼofa ki ai. Ko te ʼu tagata mo fafine ʼaia, ohage ko Apalahamo mo Sala, mo Moisese, pea mo Laape, ʼe toe ʼaoga pe foki anai ke natou kaumeʼa mo Sesu ke feala hanatou maʼu te maʼuli heʼe gata.—Soa. 17:3; Gaue 24:15; Hep. 11:8-12, 24-26, 31.
8-9. Ohage ko tona fakamahino ia Soane 15:4, 5, kotea ʼae ʼe tou lava fai mo kapau ʼe tou kaumeʼa mo Sesu, pea he koʼe ʼe maʼuhiga ke tou kaumeʼa mo ia?
8 ʼE tou fiafia ʼi tatatou gaue fakatahi mo Sesu ʼi te fakamafola te logo lelei ʼo te Puleʼaga pea mo akoʼi te hahaʼi. ʼI te kei nofo ʼa Sesu ʼi te kele, neʼe faiako. Pea talu mai tana toe liliu ki selo, ʼe hoko atu pe te takitaki e Sesu te gaue faifakamafola mo faiako, he ʼe ko ia te pule ʼo te kokelekasio. ʼE sio mai pea ʼe ina leleiʼia ʼaupito ʼau faiga ʼae ke ke tokoni ki te tokolahi ke natou iloʼi ia ia mo tana Tamai. Pea ʼe tou lava fakahoko te gaue ʼaia ʼaki pe te tokoni ʼa Sehova mo Sesu.—Lau ia Soane 15:4, 5.
9 ʼE akoʼi lelei mai ʼi te Folafola ʼa te ʼAtua, ʼe tonu ke tou ʼoʼofa kia Sesu ke feala ke ʼofa Sehova kia tatou. Koia, tou vakaʼi faʼahi ʼe fa ʼe tonu ke tou fai ke tou kaumeʼa ai mo Sesu.
ʼE FEAFEAʼI HATATOU KAUMEʼA MO SESU?
10. Kotea te ʼuluaki faʼahi ʼe feala ke tou fai ke tou kaumeʼa ai mo Sesu?
10 (1) Tou ako ke tou iloʼi lelei ia Sesu. ʼE feala hatatou iloʼi lelei ia Sesu ʼaki tatatou lau te ʼu tohi ʼo Mateo, mo Maleko, mo Luka pea mo Soane ʼi te Tohi-Tapu. ʼI tatatou metitasio ki te ʼu fakamatala Fakatohi-tapu ʼo te maʼuli ʼo Sesu, ʼe tou liliu ai ʼo ʼoʼofa pea mo fakaʼapaʼapa kia Sesu ʼuhi ko tana aga ki te hahaʼi. Ohage la, logo la neʼe ko te Pule ʼo ʼana tisipulo, kae neʼe mole ina gaohi natou ohage ko ni kaugana. Neʼe ina fakaha age kia natou ʼana manatu mo te ʼu meʼa ʼae neʼe ina logoʼi. (Soa. 15:15) Neʼe kaugā mamahi ia Sesu mo natou pea neʼe tagi fakatahi mo natou. (Soa. 11:32-36) Maʼiape la mo te ʼu fili ʼa Sesu, neʼe natou ui neʼe kaumeʼa ia ia mo natou ʼae neʼe natou tali tana logo. (Mat. 11:19) Ka tou faʼifaʼitakiʼi te aga ʼa Sesu ki ʼana tisipulo, ʼe toe lelei age ai ʼatatou felogoi mo ʼihi, mo tou fiafia lahi age, pea ʼe toe tuputupu ai totatou ʼofa mo tatatou fakaʼapaʼapa kia Kilisito.
11. Kotea te lua faʼahi ʼe feala ke tou fai ke tou kaumeʼa ai mo Sesu, pea he koʼe ʼe maʼuhiga te faʼahi ʼaia?
11 (2) Tou faʼifaʼitakiʼi te faʼahiga manatu ʼa Sesu pea mo tana aga. Kapau ʼe tou iloʼi te faʼahiga manatu ʼa Sesu pea mo tou faʼifaʼitakiʼi, pea ʼe toe malohi age anai tatatou kaumeʼa mo ia. (1 Ko. 2:16) ʼE tou lava faʼifaʼitakiʼi feafeaʼi ia Sesu? Ohage la, neʼe lahi age te manatu ʼa Sesu ki te hahaʼi ia ia totonu. (Mat. 20:28; Loma 15:1-3) ʼI te maʼu e Sesu te manatu ʼaia, neʼe lotolelei ai ke fakafisi kia ia totonu pea ke fakamolemole. Neʼe mole ita ʼi te ʼu palalau neʼe fai e te hahaʼi ʼo ʼuhiga mo ia. (Soa. 1:46, 47) Pea neʼe mole manatu ia ʼe kovi he tahi ʼuhi ko hana hala neʼe ina fai fualoa ki muʼa atu. (1 Tim. 1:12-14) ʼE maʼuhiga ke tou faʼifaʼitakiʼi te faʼahiga manatu ʼa Sesu, he neʼe ina ui fenei: “ ʼE iloʼi anai e te hahaʼi fuli ko koutou ko ʼaku tisipulo, mo kapau ʼe kotou feʼofaʼaki.” (Soa. 13:35) ʼE lelei ke ke fai te fehuʼi ʼaeni: “ ʼE au faʼifaʼitakiʼi koa ia Sesu, ʼo au faiga malohi ke au tokalelei mo ʼoku tehina mo tuagaʼane?”
12. Kotea te tolu faʼahi ʼe feala ke tou fai ke tou kaumeʼa ai mo Sesu, pea ʼe tou lava fakahoko feafeaʼi te faʼahi ʼaia?
12 (3) Tou lagolago ki te ʼu tehina ʼo Kilisito. Kia Sesu, ko te ʼu gaue ʼae ʼe tou fai moʼo lagolago ki ʼona tehina fakanofo, ʼe hage pe ʼe tou fai kia ia. (Mat. 25:34-40) ʼE tou lagolago tafito ki te kau fakanofo moka tou kau ki te gaue ʼae ko te fakamafola ia te Puleʼaga pea mo fai ʼo ni tisipulo. Neʼe ko te gaue ʼaia neʼe ui e Sesu ke fakahoko e ʼana tisipulo. (Mat. 28:19, 20; Gaue 10:42) ʼE lava fakahoko e te ʼu tehina ʼo Kilisito te toe gaue faifakamafola ʼaia ʼe lolotoga fai nei ʼi te malamanei ʼaki pe te tokoni ʼa “ ʼihi atu ovi.” (Soa. 10:16) Koia, kapau ʼe ke kau ʼi te kutuga ʼaia, ʼi te temi fuli pe ʼae ʼe ke fakahoko ai te gaue ʼaia, ʼe ke fakaha ai tou ʼofa kia Sesu mo ʼona tehina.
13. ʼE tou lava mulimuli feafeaʼi ki te tokoni ʼa Sesu ia Luka 16:9?
13 ʼE tou toe kaumeʼa mo Sehova pea mo Sesu moka tou fakaʼaogaʼi ʼotatou koloa moʼo lagolago ki te gaue ʼae ʼe nā takitaki. (Lau ia Luka 16:9.) Ohage la, ʼe feala ke tou foaki he falā maʼa te gaue fakamalamanei. ʼE fakaʼaogaʼi te falā ʼaia moʼo tokoni ki te fakamafola ʼo te logo lelei ʼi te ʼu koga meʼa ʼae ʼe tuʼu mamaʼo, mo laga pea mo taupau he ʼu Fale Fono pea mo ʼihi atu ʼu fale, pea mo foaki te tokoni ʼae ʼe ʼaoga hili he tuʼutamaki fakanatula. ʼE feala ke tou toe foaki he falā moʼo tokoni ki te ʼu meʼa ʼae ʼe totogi e tatatou kokelekasio pea mo tokoni kia natou ʼae ʼe faigataʼaʼia. (Taag. 19:17) Ko te ʼu faʼahi kehekehe ʼaia ʼe feala ke tou fai moʼo lagolago ki te ʼu tehina ʼo Kilisito.
14. Ohage ko tona tuʼu ia Efeso 4:15, 16, kotea te fa faʼahi ʼae ʼe feala ke tou fai ke tou kaumeʼa ai mo Sesu?
14 (4) Tou lagolago ki te ʼu fakatuʼutuʼu ʼae ʼe fai ʼi tatatou kokelekasio. ʼE tou kaumeʼa lelei anai mo Sesu, ʼae ko te pule ʼo te kokelekasio, moka tou lagolago kia natou ʼae neʼe filifili ke natou tokakaga kia tatou. (Lau ia Efeso 4:15, 16.) Ohage la, ʼe tou faiga ke tou fakaʼaogaʼi lelei ʼotatou Fale Fono fuli. Koia la ʼae neʼe fakatahiʼi ai he kokelekasio mo he tahi age kokelekasio, pea mo fai ni fetogi ʼi te ʼu telituale. ʼAki te ʼu fakatuʼutuʼu ʼaia, neʼe mole lahi ai te puli ʼo te falā ʼae neʼe foaki ki te kautahi ʼa Sehova. Kae neʼe maʼua foki ke mulimuli ʼihi kau faifakamafola ki te ʼu fetogi ʼae neʼe tonu ke fai. Neʼe lagi fakatahi te kau faifakamafola agatonu ʼaia lolotoga ni taʼu mo he kokelekasio, pea neʼe natou felogoi lelei mo te ʼu tehina mo tuagaʼane ʼi ai. Kae neʼe kole leva kia natou ʼaia ke olo ki he tahi age kokelekasio. ʼE mahino ia, ʼe fiafia lahi ia Sesu ʼi tana sio ʼae ʼe mulimuli lelei te ʼu tisipulo agatonu ʼaia ki te ʼu fakatuʼutuʼu.
TOU KAUMEʼA MO SESU ʼO TALU AI
15. ʼE malohi feafeaʼi age anai tatatou kaumeʼa mo Sesu ʼi te ka hau?
15 Ko natou ʼae neʼe fakanofo ʼaki te laumalie maʼoniʼoni, ʼe natou ʼamanaki maʼuʼuli anai mo Sesu ʼo talu ai pea mo kaugā hau mo ia ʼi te Puleʼaga ʼo te ʼAtua. ʼEi, ʼe natou sisio anai ki ai, mo palalau mo ia pea mo lahi tonatou temi ke natou fakatahi mo ia. (Soa. 14:2, 3) ʼE toe ʼofa anai ia Sesu pea mo tokaga kia natou ʼae ʼe ʼamanaki maʼuʼuli ʼi te kele. Logo la ʼe mole natou sisio anai kia Sesu, kae ʼe toe malohi anai tanatou kaumeʼa mo ia he ʼe natou fiafia anai ʼi te maʼuli ʼae neʼe teuteuʼi maʼa natou e Sehova pea mo Sesu.—Esa. 9:6, 7.
16. Kotea te ʼu tapuakina ʼe tou maʼu moka tou kaumeʼa mo Sesu?
16 Ka tou tali te fakaafe ʼae ʼa Sesu ke tou kaumeʼa mo ia, ʼe lahi ai te ʼu tapuakina ʼe tou maʼu. Ohage la, ʼe ʼofa ia Sesu kia tatou pea ʼe tokoni mai kia tatou ʼi te temi nei. ʼE tou maʼu te fealagia ʼae ke tou maʼuʼuli ʼo heʼe gata. Pea ko te faʼahi ʼae ʼe maʼuhiga, ka tou kaumeʼa mo Sesu pea ʼe tou toe kaumeʼa lelei ai mo Sehova, te Tamai ʼa Sesu. ʼE ko te koloa pe ʼaia ʼe tahi ʼe maʼuhiga ʼaupito. ʼE ko he toe pilivilesio lahi kia tatou moka tou kaumeʼa mo Sesu!
KATIKO 17 “ ʼE Au Loto Ki Ai”
^ pal. 5 Lolotoga ni taʼu neʼe faipalalau mo gaue fakatahi te ʼu apositolo mo Sesu, pea neʼe natou liliu ai ʼo kaumeʼa lelei. ʼE toe loto foki e Sesu ke tou kaumeʼa mo ia, kae ʼe feala ke faigataʼa age kia tatou. ʼE tou vakaʼi anai ʼi te alatike ʼaeni ʼihi ʼi te ʼu faigataʼa ʼaia, pea ʼe foaki mai ai he ʼu tokoni ke feala hatatou kaumeʼa lelei mo Sesu ʼo talu ai.
^ pal. 55 FAKAMATALA ʼO TE ʼU PĀKI: 1) ʼE feala ke tou ako ʼo ʼuhiga mo te maʼuli pea mo te minisitelio ʼa Sesu ʼi tatatou ako fakafamili. (2) ʼI te kokelekasio, ʼe tou faiga malohi ke tou fetokaleleiʼaki. (3) ʼE tou lagolago ki te ʼu tehina ʼo Kilisito ʼaki tatatou kau lahi ki te faifakamafola. (4) Ka fakatahiʼi he kokelekasio mo he tahi kokelekasio, ʼe feala ke tou lagolago ki te ʼu fakatuʼutuʼu ʼae ʼe fai e te kau tagata ʼafeā.