ALATIKE AKO 18
“Fakaʼosi Te Lele”
“Neʼe au fakaʼosi te lele.”—2 TIM. 4:7.
KATIKO 129 Tou Haga Faʼa Kataki
TE ʼU MANATU FAKANOUNOU *
1. Kotea ʼae ʼe tonu kia tatou fuli ke tou fai?
ʼE KE fia kau anai koa ki he lele ʼe ke iloʼi ʼe faigataʼa, tafito la moka ʼe ke mahamahaki peʼe ke gaʼegaʼe? ʼE mahino papau, kailoa ia. Kae neʼe ui e te apositolo ko Paulo ko te kau Kilisitiano fuli ʼe natou kau ki he lele. (Hep. 12:1) Pea ko tatou fuli, pe ʼe tou tupulaga peʼe kua tou vaivai matuʼa, pe ʼe kei tou malolohi peʼe kua tou gaʼegagaʼe, kae ʼe tonu ke tou faʼa kataki ʼo kaku ki te fakaʼosi, mo kapau ʼe tou fia maʼu te fakapale ʼae ʼe foaki e Sehova.—Mat. 24:13.
2. ʼO mulimuli kia 2 Timoteo 4:7, 8, he koʼe neʼe feala ke palalau ia Paulo ʼaki he lotofalala?
2 Neʼe fakaʼosi e Paulo te lele, ko te tupuʼaga la ʼaia ʼo tana palalau ʼaki he lotofalala. (Lau ia 2 Timoteo 4:7, 8.) Kae neʼe palalau koa ia Paulo ki te lele fea?
KOTEA TE LELE?
3. Kotea te lele ʼae neʼe palalau ki ai ia Paulo?
3 ʼI ʼihi temi, neʼe tohi e Paulo he ʼu meʼa neʼe tau hoko ʼi te ʼu faigaoʼi ʼi te temi muʼa ʼi Keleka, moʼo foaki he ʼu ako maʼuhiga. (1 Ko. 9:25-27; 2 Tim. 2:5) Neʼe tuʼa lahi te fakatatau e Paulo te maʼuli ʼa he Kilisitiano ki he lele. (1 Ko. 9:24; Flp. 2:16) ʼE kamata e he tahi te “lele” ʼaia ʼi te temi ʼae ʼe ina foaki ai tona maʼuli kia Sehova pea mo papitema. (1 Pet. 3:21) Pea ʼe ina fakaʼosi tana lele ʼi te temi ʼae ʼe foaki age ai e Sehova te fakapale, ʼae ko te maʼuli heʼe gata.—Mat. 25:31-34, 46; 2 Tim. 4:8.
4. Kotea ʼae ka tou vakaʼi anai ʼi te alatike ʼaeni?
4 Kotea ʼae ʼe tatau ai ʼihi faʼahi ʼo te lele manava pea mo te maʼuli ʼo he Kilisitiano? ʼE lahi te ʼu aluʼaga ʼe nā tatau ai. Tou vakaʼi aluʼaga ʼe tolu. ʼUluaki, ʼe tonu ke tou muliʼi lelei te ala ʼae ʼe totonu. Lua, ʼe tonu ke tou sioʼi fakamamaʼu te fakaʼosiʼaga ʼo te
lele. Pea tolu leva, ʼe tonu ke hoko atu tatatou lele tatau aipe pe ʼe tou tau mo he ʼu faigataʼa.TOU MULIʼI TE ALA ʼAE ʼE TOTONU
ʼE tonu ke tou kau fuli ki te lele Fakakilisitiano ʼae ki te maʼuli (Vakaʼi te palakalafe 5-7) *
5. Kotea te faʼahiga maʼuli ʼe tonu ke tou muliʼi, pea kotea tona tupuʼaga?
5 ʼI he lele, ʼe tonu ke muliʼi lelei e te kau lele te ala ʼae kua ʼosi teuteuʼi maʼa natou, ke natou maʼu ai te fakapale. ʼO toe feia pe, kapau ʼe tou fia maʼu te fakapale ʼae ko te maʼuli heʼe gata, ʼe tonu ke tou muliʼi lelei te faʼahiga maʼuli Fakakilisitiano. (Gaue 20:24; 1 Pet. 2:21) Kae ko Satana mo natou ʼae ʼe natou muliʼi tana faʼifaʼitaki ʼe natou loto ke tou filifili he maʼuli ʼe kehe age. ʼE natou loto ke tou haga lele mo natou ʼi te faʼahiga maʼuli ʼafeā. (1 Pet. 4:4) ʼE natou vaʼi te faʼahiga maʼuli ʼae ʼe tou muliʼi pea ʼe natou ui ʼe lelei age tonatou maʼuli he ʼe ina taki ki te ʼateaina. Kae ʼe hala tanatou ui ʼaia.—2 Pet. 2:19.
6. Kotea ʼae ʼe ke ako mai te faʼifaʼitaki ʼa Brian?
6 Ko natou fuli ʼae ʼe maʼuli ohage ko natou ʼae ʼe mulimuli ki te malama ʼa Satana, ʼe natou mahino vave ko te ala ʼae neʼe natou filifili ʼe mole ina taki ki te ʼateaina, kae ki te maʼuli popula. (Loma 6:16) Tou vakaʼi muʼa te faʼifaʼitaki ʼo Brian. Neʼe fakalotomalohiʼi ia ia e ʼana matuʼā ke ina muliʼi te maʼuli Fakakilisitiano. Kae ʼi tana kua tupulaga, neʼe ina feʼekeʼaki pe ʼe fiafia anai ʼi te mulimuli ki te ala ʼaia. Neʼe filifili leva e Brian ke maʼuli ohage ko natou ʼae ʼe natou muliʼi te ʼu lekula ʼa Satana. ʼE ina ui fenei: “ ʼAki te temi, neʼe au tokagaʼi leva ko te ʼateaina ʼae neʼe au loto ki ai neʼe ina taki au ke au kaugana ki te tahi ʼu aga ʼe kovi.” ʼE ina hoko atu fenei: “ ʼAki te temi, neʼe au fakaʼaoga fakavale ia te ʼu toloke, mo te kava pea mo te fai ʼo te ʼu aga heʼe maʼa. ʼI te ʼu taʼu ʼae neʼe hoa mai ki ai, neʼe au ʼahiʼahiʼi leva te ʼu toloke ʼe malohi age pea neʼe au liliu ʼo popula ki te ʼu meʼa ʼaia. . . . ʼI te lahi ʼo taku popula, neʼe au kamata fakatau te ʼu toloke ke feala haku taupau toku faʼahiga maʼuli ʼaia.” Ki muli age, neʼe fakatotonu leva e Brian ke ina muliʼi te ʼu lekula ʼa Sehova ʼi tona maʼuli. Neʼe ina fetogi leva tona maʼuli ʼo papitema ai ʼi te taʼu 2001. Kua fiafia lahi ʼi te temi nei he ʼe kua ina muliʼi te faʼahiga maʼuli Fakakilisitiano. *
7. Kotea te ʼu ala ʼe lua ʼae ʼe tou maʼu ia Mateo 7:13, 14?
7 ʼE maʼuhiga ʼaupito ke tou filifili ke tou mulimuli ki te ala ʼae ʼe lelei! ʼE loto e Satana ke tuku tatatou lele ʼae ʼi te ala lauveliveli “ ʼae ʼe ina taki ki te maʼuli,” kae tou olo ʼi te ala ʼae ʼe laulahi pea tokolahi te hahaʼi ʼe natou haʼele ai, pea ʼe faigafua. Kae “ ʼe ina taki ki te fakaʼauha.” (Lau ia Mateo 7:13, 14.) Ke tou nonofo maʼu ʼi te ala ʼae ʼe lelei pea ke mole fakahalaʼi tatou, ʼe tonu ke tou falala kia Sehova pea mo tou fakalogo kia te ia.
TOU SIOʼI FAKAMAMAʼU TE FAKAʼOSIʼAGA MO TOKAKAGA NAʼA TOU FETOKAʼI
ʼE tonu ke tou sioʼi fakamamaʼu te fakaʼosiʼaga ʼo te lele pea ke ʼaua naʼa tou fakatukia ʼihi (Vakaʼi te palakalafe 8-12) *
8. Ka toka he tagata lele, kotea ʼae ʼe ina fai?
8 ʼE tokakaga ia natou ʼae ʼe lele ʼi he lele manava ki ʼonatou muʼa ke ʼaua naʼa natou fetokaʼi. Kae ʼe feala pe ke toka he tahi ʼuhi ko he tahi age ʼi te kau lele peʼe ʼuhi ko he foʼi pu ʼi te ala. Kae kapau ʼe toka, ʼe toe tuʼu ake anai ʼo hoko atu tana lele. ʼE ina sioʼi fakamamaʼu te fakaʼosiʼaga ʼo te lele pea mo te fakapale ʼae ʼe ʼamanaki ki ai, kae mole ki te tupuʼaga ʼae ʼo tana toka.
9. Ka tou fetokaʼi, kotea ʼae ʼe tonu ke tou fai?
9 ʼI tatatou lele, ʼe feala pe ke tou tukia tuʼa lahi, ʼuhi he neʼe mole lelei ʼatatou palalau peʼe ko tatatou aga. Peʼe ko natou ʼae ʼe lele fakatahi mo tatou ʼe natou fai ni lakahala ʼe tou mamahi ai. Ko he ʼu aluʼaga ʼe tonu ia ke hoko. ʼE tou agahala fuli, pea ʼe tou lele fuli ʼi te ala lauveliveli ʼae ʼe ina taki ki te maʼuli. Ko te tupuʼaga la ʼaia ʼi ʼihi temi, ʼe tou mamahi ai. Neʼe iloʼi e Paulo ʼi ʼihi temi, ‘ ʼe ʼi ai hotatou ʼu fihifihiaʼ ia tatou. (Kol. 3:13) Kae ʼe mole tonu ke tou tuʼu ʼi te aluʼaga ʼaia, kae tou sioʼi fakamamaʼu te fakapale ʼae ʼe tou ʼamanaki ki ai. Kapau ʼe tou fetokaʼi, tou filifili ke tou toe tutuʼu ake pea mo hoko atu tatatou lele. Kae kapau ʼe tou nofo ita ki he tahi, mole anai tou toe fia tutuʼu ake ʼo hoko atu tatatou tauhi kia Sehova. ʼE mole tou kakusia ai anai ki te fakaʼosiʼaga ʼo te lele ʼo mole tou maʼu ai te fakapale. Pea tahi, ʼe feala pe ke tou fakatupu tukia kia natou ʼae ʼe lolotoga lele ʼi te ala ki te maʼuli.
10. Kotea te tahi puleʼaki ke ʼaua naʼa tou “fakatupu tukia” ki ʼihi?
10 Ko te tahi faʼahiga puleʼaki ke ʼaua naʼa tou “fakatupu tukia” ki ʼotatou tehina mo tuagaʼane, tou tuku ke natou fai te meʼa ʼae ʼe natou loto ki ai moka ʼe feala, kae ʼaua naʼa tou fakamaʼua ke natou fai te meʼa ʼae ʼe tou loto ki ai. (Loma 14:13, 19-21; 1 Ko. 8:9, 13) ʼI te aluʼaga maʼuhiga ʼaia, ʼe mole tou hage ko natou ʼae ʼe kau ki he lele ʼi he faigaoʼi. ʼE natou fai pe ʼe ko ai ʼae ʼe muʼa, pea ʼe faiga pe te takitokotahi ke ina maʼu te fakapale. Pea ko te kau lele ʼaia ʼe natou manatu tafito pe kia natou totonu. Koia la ʼae ʼe natou humuhumuki ai ʼihi tagata lele, ke feala hanatou muʼa ʼi te lele. Kae ko tatou, ʼe mole tou fakataupiepie. (Kal. 5:26; 6:4) Pea ko tatatou fakatuʼutuʼu ke tou tokoni ki ʼotatou tehina mo tuagaʼane ke tou kaku fuli ki te fakaʼosiʼaga ʼo te lele pea mo maʼu te fakapale ʼae ko te maʼuli. Koia la ʼae ʼe tou faiga ai ke tou maʼuliʼi te tokoni ʼa Paulo ke “ ʼaua naʼa [tou] kumi pe te ʼu meʼa ʼae ʼe lelei kia [tatou] totonu, kaʼe ke [tou] toe kumi foki mo te ʼu meʼa ʼae ʼe lelei ki ʼihi.”—Flp. 2:4.
11. Kotea ʼae ʼe sioʼi fakamamaʼu ki ai te tagata lele, pea kotea tona tupuʼaga?
11 Ko natou ʼae ʼe kau ki he lele ʼe natou tokakaga ki ʼonatou muʼa pea mo natou toe sioʼi fakamamaʼu te fakaʼosiʼaga ʼo te lele. Tatau aipe pe ʼe mole feala hanatou sisio ki te fakaʼosiʼaga ʼo te lele, kae ʼe feala pe hanatou fakakaukauʼi ʼe natou fakalaka pea mo natou maʼu te fakapale. ʼE natou lotomalohi koteʼuhi ʼe natou manatuʼi tuʼumaʼu te fakapale.
12. Kotea ʼae ʼe foaki fakaʼofa mai e Sehova?
12 ʼI te lele ʼae ʼe tou kau ai, ʼe foaki fakaʼofa mai e Sehova he fakapale kia natou ʼae ʼe natou fakaʼosi tanatou lele. Ko te fakapale ʼaia ʼe ko te maʼuli heʼe gata ʼi selo peʼe ʼi te palatiso ʼi te kele. ʼE fakamahino ʼi te Tohi-Tapu pe ʼe feafeaʼi te fakapale ʼaia, koia la ʼae ʼe feala pe ke tou fakakaukauʼi te taulekaleka anai ʼo te maʼuli. Kapau ʼe hoko atu tatatou manatuʼi te ka haʼu ʼae ʼe fakapapauʼi mai e Sehova, ʼe tou lotomalohi anai ʼo tauʼi te ʼu fihifihia.
TOU HAGA LELE LOGO LA TE ʼU FIHIFIHIA
ʼE tou fia hoko atu tatatou kau ki te lele ʼae ki te maʼuli tatau aipe pe ʼe tou tau mo he ʼu fihifihia (Vakaʼi te palakalafe 13-20) *
13. He koʼe ʼe lelei age tatatou lele ia natou ʼae ʼe kau ki he lele ʼi he faigaoʼi?
13 ʼI te ʼu faigaoʼi ʼi Keleka, neʼe tonu ki te ʼu tagata lele ke natou tauʼi he ʼu aluʼaga faigataʼa, ohage la ko te gaʼegaʼe pea mo te ʼu mamahi ʼo te sino. Kae neʼe natou falala fuli ki tanatou akoako faigaoʼi pea mo tonatou malohi totonu. ʼE tou hage ko te kau lele ʼaia, ʼe toe akoako mo tatou pe ʼe feafeaʼi hatatou fakahoko tatatou lele. Kae ʼe lelei age tatatou lele ia natou ʼae ʼe kau ki he lele ʼi he faigaoʼi. ʼE feala ke tou falala ʼe foaki mai e Sehova te malohi ʼae ʼe mole hona tuʼakoi. Kapau ʼe tou falala kia Sehova, pea ʼe ina fakapapau mai ʼe ina akoako tatou pea mo fakamalohiʼi tatou!—1 Pet. 5:10.
14. ʼE tokoni feafeaʼi mai te vaega ʼo 2 Kolonito 12:9, 10 ke tou lava tauʼi te ʼu fihifihia?
14 Neʼe tonu ke tauʼi e Paulo te ʼu fihifihia lahi. Neʼe mole gata pe ki tona leakoviʼi pea mo tona gaohi koviʼi, kae ʼi ʼihi temi neʼe ina logoʼi tona gaʼegaʼe pea neʼe tonu ke ina ʼutakiʼi te meʼa ʼae neʼe ina higoaʼi ko “te tala ki toku kakano.” (2 Ko. 12:7) Neʼe mole ina tuku te ʼu aluʼaga ʼaia ke taʼofi ai tana tauhi ʼae kia Sehova. Kae kia ia, neʼe ko he ʼu faigamalie ʼaia ke falala kia Sehova. (Lau ia 2 Kolonito 12:9, 10.) Neʼe taupau e Paulo te faʼahiga manatu ʼaia, koia ʼae neʼe tokoni ai Sehova kia ia ʼi ʼona fihifihia fuli.
15. Kapau ʼe tou faʼifaʼitakiʼi ia Paulo, kotea anai ka hoko kia tatou?
15 ʼE feia mo tatou, ʼe feala pe ke leakoviʼi peʼe gaohi koviʼi tatou ʼuhi ko tatatou tui. ʼE toe feala pe ke tou ʼutakiʼi he mahaki peʼe tou gaʼegaʼe. Kae kapau ʼe tou faʼifaʼitakiʼi ia Paulo, ʼe feala pe ke liliu te ʼu fihifihia takitahi ʼaia ko he faigamalie ke tou logoʼi ai te tokoni ʼofa ʼo Sehova.
16. Logo la ʼe ke mahamahaki, kae kotea ʼae ʼe feala ke ke fai?
16 ʼE ke takoto mahaki koa ʼi he palepale peʼe ke heka ʼi he saliote toho? ʼE mamahi koa ʼou tuli peʼe mole ke sio lelei? Kapau koia, ʼe feala koa ke ke tauhi kia Sehova fakatahi mo natou ʼae kei tupulaga mo malolohi? ʼE mahino papau, ʼe feala pe! Tokolahi natou kua vaivai matuʼa mo mahamahaki ʼe natou lele ʼi te ala ʼae ki te maʼuli. ʼE mole feala ke natou fakahoko ʼaki pe tonatou malohi. Kae ʼe natou maʼu te malohi mai ia Sehova, ʼaki tanatou fakalogo te ʼu fono ʼi te telefoni peʼe natou sioʼi ʼi te Neti. Pea
ʼe natou kau ki te gaue ʼae ko te fai ʼo ni tisipulo ʼaki tanatou faifakamafola ki te ʼu toketa, mo te ʼu afilimie, pea mo ʼonatou famili.17. Kotea ʼae ʼe logoʼi e Sehova ʼo ʼuhiga mo natou ʼae ʼe mahamahaki?
17 Kapau ʼe mole feala hau fai ia meʼa fuli ʼe ke loto ki ai maʼa Sehova, ʼaua naʼa ke lotovaivai pea ʼaua naʼa ke manatu ʼe mole feala ke ke ʼutakiʼi ʼo kaku ki te fakaʼosi. ʼE ʼofa Sehova kia koe ʼuhi ko tau tui pea mo meʼa fuli neʼe ke fai maʼa ia talu mai fualoa. ʼE ʼaoga kia koe tana tokoni ʼi te temi nei ʼo laka age ʼi te temi kua hili, pea ʼe mole ina liʼakina anai koe. (Pes. 9:11) Kae ʼe fakaovi atu anai kia koe. Tokagaʼi te ʼu palalau ʼaeni ʼa te tuagaʼane ʼe mahamahaki: “ ʼUhi ko taku mahamahaki tuʼumaʼu, ʼe au fakatokagaʼi ʼe mole kei lahi te ʼu faigamalie ʼae ke au palalau ai ki ʼihi ʼo ʼuhiga mo te moʼoni. Kae ʼe au iloʼi, ko te ʼu kiʼi gaue ʼae ʼe au lava fai, ʼe fakafiafiaʼi te loto ʼo Sehova, pea ʼe au toe fiafia ai.” Ka ke lotovaivai, manatuʼi ʼe mole ke nofo tokotahi. Manatuʼi te faʼifaʼitaki ʼa Paulo, pea mo ʼana palalau fakalotomalohi ʼaeni: “ ʼE au fiafia ai ʼi te ʼu vaivaiʼaga, . . . Koteʼuhi ʼe hoki au malohi moka ʼe au vaivai.”—2 Ko. 12:10.
18. Kotea te fihifihia tafito ʼe tonu ke tauʼi e ʼihi?
18 Ko ʼihi ʼe kau ki te lele ʼae ʼe ina taki ki te maʼuli, ʼe toe tau ia mo he tahi fihifihia. ʼE tonu ke natou tauʼi he ʼu aluʼaga ʼi tonatou maʼuli ʼe mole feala ke iloʼi peʼe mahino ki ai ʼihi. Ohage la, ʼe natou tauʼi te lotomamahi peʼe ko te lotohoha. He koʼe ʼe faigataʼa tafito ki te ʼu kaugana ʼofaina ʼaia ʼa Sehova hanatou tauʼi te ʼu fihifihia ʼaia? Koteʼuhi kapau ʼe fasi he nima ʼa he tahi peʼe heka ʼi tona saliote toho, ʼe feala ke sisio fuli te hahaʼi ki tona fihifihia ʼaia pea mo natou fia tokoni anai ki ai. Kae ko natou ʼae ʼe tau mo te mahaki ʼae ko te lotomamahi, ʼe hage mai ʼe mole natou mahaki. Kae ʼe natou mamahi pe ohage ko natou ʼae neʼe fasi honatou nima peʼe ko honatou vaʼe. ʼUhi ʼae he ʼe mole feala ke sio te hahaʼi ki te mamahi ʼae ʼe tau mo natou, ʼe mole natou fakaha ai te ʼofa pea mo te tokoni ʼae ʼe ʼaoga kia natou ʼaia ʼe mamahi.
19. Kotea ʼae ʼe tou ako mai te faʼifaʼitaki ʼo Mefiposete?
19 Kapau ʼe ke tau mo he mahaki, pea ʼe ke manatu ʼe mole mahino he tahi ki tou aluʼaga, ʼe feala pe ke tokoni atu te faʼifaʼitaki ʼo Mefiposete. (2 Sam. 4:4) Neʼe tonu ke ina ʼutakiʼi tona maʼimoa, pea mo te faihala ʼa te Hau ko Tavite ʼo ʼuhiga mo ia. Neʼe mole fai e Mefiposete he meʼa ʼe kovi ke tau ai mo te ʼu faigataʼaʼia ʼaia. Kae neʼe mole ita. Neʼe lotofakafetaʼi ki te ʼu lelei ʼae neʼe hoko kia ia ʼi tona maʼuli. Neʼe lotofakafetaʼi ki te agalelei ʼa Tavite kia ia ʼi te temi muʼa. (2 Sam. 9:6-10) Koia la ʼae, ʼi te faihala ʼae ʼa Tavite ʼo ʼuhiga mo ia, neʼe mole tuʼu ia Mefiposete ʼi te aluʼaga ʼaia. Neʼe mole ina tuku te faihala ʼaia ʼa Tavite ke itaita ai. Pea neʼe mole ina tukugakoviʼi ia Sehova ʼo ʼuhiga mo te aga ʼaia ʼa Tavite. Neʼe tokaga tafito ia Mefiposete ki te meʼa ʼae neʼe feala ke ina fai moʼo lagolago ki te hau ʼae neʼe fakanofo e Sehova. (2 Sam. 16:1-4; 19:24-30) Neʼe fakafealagia e Sehova ke tohi te faʼifaʼitaki lelei ʼo Mefiposete ʼi Tana Folafola ke tou taʼofi he ʼu ako mai ai.—Loma 15:4.
20. ʼE feafeaʼi ʼihi ʼuhi ko te lotohoha, kae kotea ʼae ʼe feala ke natou tui papau ki ai?
20 Ko ʼihi tehina mo tuagaʼane ʼe matataku moka hahaʼi peʼe mole natou faʼa leleiʼia, koteʼuhi ʼe natou lotohoha fau. ʼE feala pe ke faigataʼa kia natou kae ʼe hoko atu tanatou kau ki te ʼu fono pea mo te ʼu fakatahi lalahi. ʼE toe feala ke faigataʼa hanatou palalau ki te hahaʼi ʼae ʼe mole natou iloʼi, kae ʼe natou faifakamafola pe. Kapau ʼe ke feia, ke ke tui papau ʼe mole ko koe tokotahi. Tokolahi ʼe natou hage ko koe. Manatuʼi ʼe fiafia ia Sehova ʼi ʼau faiga ʼae ʼe ke fai ʼaki tou malohi katoa. ʼI tau lava katakiʼi te faʼahi ʼaia, ko he fakamoʼoni ʼaia ʼe tapuakina koe e Sehova pea ʼe ina foaki atu te malohi ʼae ʼe ʼaoga kia koe. * (Flp. 4:6, 7; 1 Pet. 5:7) Kapau ʼe ke tauhi kia Sehova logo la ʼou mahaki fakasino peʼe lotomamahi, ke ke tui papau ʼe ke fakafiafiaʼi ia Sehova.
21. ʼAki te tokoni ʼa Sehova, kotea ʼae ʼe tou lava fai fuli anai?
21 Meʼa lelei foki, koteʼuhi ʼe ʼi ai te ʼu kehekehe ʼo te lele ʼi he faigaoʼi pea mo te lele ʼae neʼe palalau ki ai ia Paulo. ʼI te temi muʼa, ʼi te lele ʼi he faigaoʼi, neʼe ko te tokotahi pe ʼe ina maʼu te fakapale. Kae ko natou ʼae ʼe natou kataki ʼi te lele Fakakilisitiano ʼe natou maʼu fuli anai te fakapale ʼae ko te maʼuli heʼe gata. (Soa. 3:16) Pea ʼi te lele ʼae ʼi he faigaoʼi, ʼe tonu ke maʼu e te kau lele fuli he maʼuli malolo ʼe lelei, koteʼuhi ʼe mole feala anai ke natou maʼu te fakapale. Kae ʼi te tahi faʼahi, tokolahi ia tatou ʼe mole natou maʼu he maʼuli malolo ʼe lelei, kae ʼe natou faʼa kataki pe. (2 Ko. 4:16) ʼAki te tokoni ʼa Sehova, ʼe tou lava lele fuli anai ki te fakaʼosi!
KATIKO 144 Haga Sio Ki Te Totogi
^ pal. 5 Tokolahi ʼi te ʼu kaugana ʼa Sehova ia ʼaho nei ʼe mamahi koteʼuhi kua natou vaivai matuʼa pea tau ʼihi mo he ʼu mahaki ʼe fakatupu vaivai ai kia natou. Pea ko tatou fuli ʼe tou gaʼegaʼe ʼi ʼihi temi. Koia, ko te manatu ʼae ke tou kau ki he lele ʼe feala ke faigataʼa kia tatou. ʼE tou vakaʼi anai ʼi te alatike ʼaeni pe ʼe feafeaʼi hatatou lele fuli ʼaki te faʼa kataki pea ke tou fakaʼosi te lele ʼae ki te maʼuli, ʼae neʼe palalau ki ai te apositolo ko Paulo.
^ pal. 6 Vakaʼi te alatike “ ʼE Fetogi Te ʼu Maʼuli ʼuhi ko te Tohi-Tapu,” ʼi Te Tule Leʼo ʼo te ʼaho 1 ʼo Sanualio 2013.
^ pal. 20 Ke feala hakotou maʼu he ʼu tokoni ʼaoga ʼo ʼuhiga mo te tauʼi ʼae ʼo te lotohoha pea mo te ʼu faʼifaʼitaki ʼo natou ʼae neʼe natou lava tauʼi te lotohoha. Vakaʼi BIBLIOTHÈQUE > JW Télédifusion ʼo Maio 2019. ʼE maʼu ʼi te Fakafalani ʼi te jw.org®.
^ pal. 63 FAKAMATALA ʼO TE ʼU PĀKI: Ko te tehina ʼaeni kua matuʼa ʼe maʼumaʼua ʼi te gaue faifakamafola, ʼe feala ai hana nofo maʼu ʼi te lele Fakakilisitiano.
^ pal. 65 FAKAMATALA ʼO TE ʼU PĀKI: ʼE feala ke tou fakatukia ʼihi, mo kapau ʼe tou uga ke lahi tanatou inu kava peʼe moka mole tou fakaʼaogaʼi fakapotopoto te kava.
^ pal. 67 FAKAMATALA ʼO TE ʼU PĀKI: Tatau aipe pe ʼe takoto mahaki he tehina ʼi te lopitali, kae ʼe nofo maʼu pe ʼi te lele Fakakilisitiano ʼaki tana faifakamafola kia natou ʼae ʼe tokakaga kia ia.