Te ʼu Fehuʼi ʼa Te Kau Lautohi
Neʼe ko ai te kau tagata leʼo Sutea ʼo te fale lotu? Neʼe kotea tanatou gaue?
Ko te hahaʼi ʼae neʼe kau ki te telepi ʼo Levi kae neʼe mole natou pelepitelo, neʼe natou fai te tahi age ʼu gaue. Ohage la, neʼe liliu ʼihi ko he ʼu tagata leʼo, peʼe natou tokakaga ke mole hoko he tuʼutamaki. Neʼe takitaki natou e te pule ʼo te kau tagata leʼo ʼo te fale lotu. ʼE ui fenei e te tagata faitohi Sutea ko Philon ʼo ʼuhiga mo ʼanatou gaue: “Ko ʼihi [ʼi te kau Levite ʼaia] neʼe natou tutuʼu ʼi te ʼu muʼa matapa, ʼo feia mo te ʼu huʼaga, ʼo natou leʼo ai. Ko ʼihi neʼe natou ʼi loto [ʼo te fale lotu] ʼo haga ki te sagatualio, ke natou puke he tahi neʼe mole gafua ke hu ki loto peʼe ko he tahi neʼe faihala ʼo hu ki loto. Pea ko ʼihi leva neʼe natou fesuisuiʼaki ʼi te ʼaho mo te po, ʼo feoloʼaki ʼi te ʼu tafaʼaki ʼo te fale lotu.”
Neʼe feala ke kole e te Sanetualio ki te ʼu tagata leʼo ʼaia ke natou fai he gaue. Neʼe ko te kutuga Sutea pe ʼaia ʼe tahi neʼe tali e te kau Loma.
ʼE ui fenei e te tagata sivi Tohi-Tapu ko Joachim Jeremias: “Kapau neʼe ko te ʼu tagata leʼo ʼo te Fale Lotu ʼae neʼe ʼomai ʼo puke ia Sesu, ʼe tou mahino lelei age leva te ʼu palalau ʼae neʼe fai e Sesu ʼi tona puke ʼaia, ʼi tana ui ʼae neʼe faiakonaki ʼi te Fale Lotu ʼi te ʼaho fuli, kae neʼe mole puke ia ia (Mat. 26:55).” ʼE toe ui e te tagata ʼaia, ko natou ʼae neʼe fekauʼi ke natou olo ʼo puke Sesu ki muʼa atu, neʼe toe kau ʼi te ʼu tagata leʼo ʼo te fale lotu. (Soa. 7:32, 45, 46) Ki muli age, neʼe fekauʼi e te Sanetualio he ʼu tagata leʼo mo tanatou pule ke natou taki mai te kau tisipulo ʼa Sesu ki ʼonatou muʼa, pea ʼe mahino ia neʼe ko natou ʼae neʼe natou taki te apositolo ko Paulo ki tuʼa ʼo te fale lotu.—Gaue 4:1-3; 5:17-27; 21:27-30.