ALATIKE AKO 14
‘Tou Mulimuli Fakalelei Ki ʼOna Lakaʼaga’
“Neʼe toe mamahi foki mo Kilisito maʼa koutou, ʼo ina tuku atu kia koutou he faʼifaʼitakiʼaga ke kotou mulimuli fakalelei ki ʼona lakaʼaga.”—1 PET. 2:21, nota.
KATIKO 13 Ko Totatou Faʼifaʼitakiʼaga Ko Kilisito
TE ʼU MANATU FAKANOUNOU *
1-2. ʼO mulimuli kia 1 Petelo 2:21, ʼe feala ke tou fakatatau kia ai ia Sesu?
FAKAKAUKAUʼI age muʼa ko koe mo ʼihi atu hahaʼi ʼe kotou haʼele ʼi he toafa ʼe pela. Pea ʼe feala ke hoko kia koutou he tuʼutamaki. Kae meʼa lelei foki, ko te tagata ʼae ʼe ina iloʼi lelei te koga meʼa ʼaia, ʼe haʼele ʼi ʼokotou muʼa. Pea fokifa pe, ʼe mole kei kotou sisio ki ai. Kae ʼe mole kotou matataku, he ʼe iloga pe ʼona lakaʼaga pea ʼe feala hakotou mulimuli ki ai.
2 ʼO toe feia pe, ʼe hage ʼe haʼele te kau Kilisitiano moʼoni ʼi he toafa ʼe feala ke natou tuʼutamakiʼia. Ko te toafa ʼaia ʼe ko te malama agakovi ʼa Satana. Kae meʼa lelei foki, neʼe foaki mai e Sehova ia he tagata takitaki lelei, ia tona ʼAlo ko Sesu Kilisito. Pea ʼe feala ke tou mulimuli fakalelei ki ʼona lakaʼaga. (1 Pet. 2:21, nota) ʼE ui ʼi he tohi Fakatohi-tapu, ʼi te vaega ʼaia ʼo 1 Petelo 2:21, ʼe fakatatau e te apositolo ko Petelo ia Sesu ki he tagata takitaki. Ohage ko te tagata takitaki ʼi tatatou faʼifaʼitaki ʼi te kamata, ko Sesu ʼe haʼele ʼi ʼotatou muʼa, pea ʼe feala ke tou mulimuli ki ʼona lakaʼaga. ʼE tou vakaʼi anai ʼi te alatike ʼaeni te tali ki te ʼu fehuʼi ʼaeni ʼe tolu: Kotea te fakaʼuhiga ʼo te mulimuli ki te ʼu lakaʼaga ʼo Sesu? He koʼe ʼe tonu ke tou mulimuli ki ʼona lakaʼaga? Pea ʼe feafeaʼi hatatou mulimuli ki ai?
KOTEA TE FAKAʼUHIGA ʼO TE MULIMULI KI TE ʼU LAKAʼAGA ʼO SESU?
3. Kotea te fakaʼuhiga ʼo te mulimuli ki te ʼu lakaʼaga ʼo he tahi?
3 Kotea te fakaʼuhiga ʼo te mulimuli ki te ʼu lakaʼaga ʼo he tahi? ʼI te Tohi-Tapu, ko te ʼu kupu “haele” pea mo “vae” ʼe tau fakaʼaogaʼi moʼo talanoa ki te aga ʼae ʼe fakaha e he tahi ʼi tona maʼuli. (Sen. 6:9; Taag. 4:26) Ko te faʼifaʼitaki ʼae ʼe tuku e he tahi ʼi tona maʼuli, ʼe feala ke fakatatau ki ʼona lakaʼaga. Koia, ko te mulimuli ki te ʼu lakaʼaga ʼo he tahi, ko tona fakaʼuhiga ʼae ke tou faʼifaʼitakiʼi ia ia.
4. Kotea te fakaʼuhiga ʼo hatatou mulimuli ki te ʼu lakaʼaga ʼo Sesu?
4 Pea kotea la te fakaʼuhiga ʼo hatatou mulimuli ki te ʼu lakaʼaga ʼo Sesu? Ko tona fakaʼuhiga, ke tou mulimuli ki tana faʼifaʼitaki. ʼI te vaega ʼae ʼe fakatafito ki ai te alatike ʼaeni, ʼe palalau tafito ia te apositolo ko Petelo ki te faʼifaʼitaki lelei neʼe tuku mai e Sesu ʼi tana katakiʼi ʼona mamahi. Kae ʼe ʼi ai te tahi ʼu meʼa neʼe fai e Sesu ʼe feala ke tou faʼifaʼitakiʼi. (1 Pet. 2:18-25) ʼEi, ko te ʼu meʼa fuli ʼae neʼe ui pea mo fai e Sesu, ʼe feala ke tou faʼifaʼitakiʼi.
5. ʼE feala koa ki he ʼu hahaʼi heʼe haohaoa ke natou mulimuli ki te faʼifaʼitaki haohaoa ʼa Sesu? Fakamahino.
5 Kae ʼe feala koa ki he ʼu hahaʼi heʼe haohaoa ke natou mulimuli ki te faʼifaʼitaki ʼa Sesu? ʼEi, ʼe feala pe. ʼE fakalotomalohiʼi tatou e Petelo ke tou “mulimuli fakalelei” ki ai. Ko tona fakaʼuhiga, ke tou faiga malohi ke tou mulimuli ki te ʼu lakaʼaga ʼo Sesu, ʼo tou fai te meʼa ʼae ʼe tou lavaʼi, logo la totatou ʼuhiga agahala. Kapau ʼe tou fai feia, ʼe tou fakalogo ai anai ki te tokoni ʼaeni ʼa te apositolo ko Soane: ‘Ke kotou haga haʼele ohage pe ko te haʼele ʼa Sesu.’—1 Soa. 2:6.
HE KOʼE ʼE TONU KE TOU MULIMULI KI TE ʼU LAKAʼAGA ʼO SESU?
6-7. He koʼe ko te mulimuli ki te ʼu lakaʼaga ʼo Sesu ʼe tou fakaovi ai kia Sehova?
6 Kapau ʼe tou mulimuli ki te ʼu lakaʼaga ʼo Sesu, ʼe tou fakaovi ai kia Sehova. He koʼe ʼe feala ke tou ui te faʼahi ʼaia? ʼUluaki, neʼe fai tuʼumaʼu pe e Sesu te ʼu meʼa ʼae neʼe leleiʼia e te ʼAtua. (Soa. 8:29) Koia, kapau ʼe tou mulimuli ki te ʼu lakaʼaga ʼo Sesu, peʼe tou faʼifaʼitakiʼi ia ia, pea ʼe tou fai anai te ʼu meʼa ʼae ʼe leleiʼia e Sehova. Pea ʼe tou iloʼi, ko tatatou Tamai ʼae ʼi selo, ʼe fakaovi kia natou ʼae ʼe faiga ke natou kaumeʼa mo ia.—Sakp. 4:8.
7 Lua, neʼe faʼifaʼitakiʼi lelei ʼosi e Sesu ia te Soa. 14:9) Ohage la, ʼe fakamatala ʼi te Tohi-Tapu neʼe ʼofa mamahi ia Sesu ki te tagata kilia, neʼe lotomahino ki te fafine ʼae neʼe tau mo he mahaki faigataʼa, pea neʼe manavaʼofa ki te hahaʼi ʼae neʼe putu. Ka tou faʼifaʼitakiʼi te ʼu kalitate ʼo Sesu pea mo tana aga ʼae ki ʼihi, ʼe tou faʼifaʼitakiʼi ai ia Sehova. (Mko. 1:40, 41; 5:25-34; Soa. 11:33-35) Pea kapau ʼe tou faiga tuʼumaʼu ke tou hage ko Sehova, pea ʼe tou ʼasili fakaovi ai kia te ia.
ʼuluagaaga ʼo tana Tamai. Koia ʼae neʼe ina ui fenei ai: “Ko ʼae kua sio kia te au, kua toe sio ia ki te Tamai.” (8. Fakamahino mai pe ʼe koʼe ko tatatou mulimuli ki te ʼu lakaʼaga ʼo Sesu, ʼe tokoni mai ke tou “malo” ʼi te malama ʼaeni.
8 Kapau ʼe tou mulimuli ki te ʼu lakaʼaga ʼo Sesu, ʼe tou tokakaga tafito pe anai ki tatatou tauhi kia Sehova. ʼI tona po fakaʼosi ʼi te kele, neʼe ui fenei e Sesu: “Kua au malo ʼi te malama ʼaeni.” (Soa. 16:33) Ko tona fakaʼuhiga, neʼe mole tuku e Sesu ke fakahalaʼi ia ia e te ʼu manatu ʼa te hahaʼi ʼo te malama, ʼo feia mo ʼanatou fakatuʼutuʼu pea mo ʼanatou aga. Neʼe mole he temi neʼe galoʼi ai e Sesu neʼe fekauʼi ifo ia ia ki te kele moʼo fakalakatonuʼi te huafa ʼo Sehova. Kae ʼe feafeaʼi kia tatou? ʼE lahi te ʼu aluʼaga ʼi te malama ʼaeni ʼe feala ke natou taʼofi tatatou tauhi ʼae kia Sehova. Kae kapau ʼe tou hage ko Sesu, ʼo tou manatuʼi tuʼumaʼu tatatou fakahoko ia te finegalo ʼo te ʼAtua, pea ʼe tou “malo” anai mo tatou ʼi te malama ʼaeni.—1 Soa. 5:5.
9. Kotea ʼae ʼe tonu ke tou fai ke tou maʼu ai te maʼuli heʼe gata?
9 Kapau ʼe tou mulimuli ki te ʼu lakaʼaga ʼo Sesu, ʼe taki ai anai tatou ki te maʼuli heʼe gata. Ko te tagata tupulaga maʼu koloa neʼe ina kole age kia Sesu pe ʼe feafeaʼi tana maʼu te maʼuli heʼe gata. Pea neʼe tali fenei age e Sesu: “Haʼu ʼo mulimuli mai ia te au.” (Mat. 19:16-21) Neʼe ui fenei age e Sesu ki he ʼu Sutea neʼe mole natou tui ko ia ko Kilisito: “[Ko] ʼaku ovi . . . ʼe natou mulimuli ia te au. ʼE au foaki kia natou te maʼuli heʼe gata.” (Soa. 10:24-29) Pea neʼe fakamahino e Sesu kia Nikotemo, ʼae neʼe kau ʼi te Sanetualio pea neʼe ina leleiʼia te ʼu akonaki ʼa Sesu, ko natou ʼae ka “tui kia te ia” ʼe natou “maʼu anai te maʼuli heʼe gata.” (Soa. 3:16) ʼE tou fakaha ʼe tou tui kia Sesu moka tou maʼuliʼi te ʼu meʼa ʼae neʼe ina akoʼi mai kia tatou, pea mo faʼifaʼitakiʼi te ʼu meʼa ʼae neʼe ina fai. Kapau ʼe tou fai te faʼahi ʼaia, ʼe tou maʼu anai te maʼuli heʼe gata.—Mat. 7:14.
ʼE FEAFEAʼI HATATOU MULIMULI FAKALELEI KI TE ʼU LAKAʼAGA ʼO SESU?
10. Kotea ʼae ʼe tonu ke tou fai ke tou iloʼi lelei ai ia Sesu? (Soane 17:3)
10 Ke feala hatatou mulimuli fakalelei ki te ʼu lakaʼaga ʼo Sesu, ʼe tonu muʼa ke tou ako ke tou iloʼi ia ia. (Lau ia Soane 17:3.) ʼE ʼaoga ai he temi ke tou ako ke tou iloʼi lelei ia te ʼuluagaaga ʼo Sesu. Koia, ʼe tonu ke tou ako ʼona kalitate, tana faʼahiga manatu pea mo ʼana pelesepeto ʼo ʼuhiga mo te meʼa ʼae ʼe lelei mo ʼae ʼe kovi. Tatau aipe pe ʼe kua fualoa tatatou tauhi ʼae kia Sehova, kae kei tonu pe ke hoko atu tatatou ako ke tou iloʼi ia Sehova pea mo tona ʼAlo.
11. Kotea ʼae ʼe tou maʼu ʼi te ʼu tohi, peʼe ʼi te ʼu Evaselio ʼae ʼe fa?
11 Ke tou ako ke tou iloʼi tona ʼAlo, neʼe foaki mai e Sehova te ʼu tohi, peʼe ko Evaselio ʼe fa ʼi te Tohi-Tapu. ʼI te ʼu fakamatala ʼaia, ʼe tou iloʼi ai te ʼu meʼa ʼae neʼe ui e Sesu, mo te ʼu meʼa ʼae neʼe ina fai, pea mo te ʼu meʼa ʼae neʼe ʼi tona loto. ʼE tokoni mai ai ke tou “tokagaʼi lelei” tana faʼifaʼitaki. (Hep. 12:3) ʼE hage pe ʼe iloga ai te ʼu lakaʼaga ʼo Sesu. Koia, ka tou ako te ʼu Evaselio ʼaia, ʼe tou iloʼi lelei age ai ia Sesu, ʼo feala ai ke tou mulimuli fakalelei ki ʼona lakaʼaga.
12. Kotea ʼae ʼe tonu ke tou fai moka tou lau te ʼu Evaselio, ke tou iloʼi lelei age ai ia Sesu?
12 Ke tou iloʼi lelei ia Sesu, ʼe mole gata ʼaki pe tatatou lau ia te ʼu Evaselio. Kae ʼe tonu ke tou toʼo he temi ke tou ako fakaleleiʼi pea mo metitasio ki ai. (Vakaʼi mo Sosue 1:8.) ʼE tou vakaʼi anai faʼahiga fai ʼe lua ʼe tokoni mai ke tou metitasio pea mo maʼuliʼi te ʼu meʼa ʼae ʼe tou lau ʼi te ʼu Evaselio.
13. ʼE feafeaʼi hau faiga ke maʼuli te ʼu fakamatala ʼo te ʼu Evaselio ʼi tou ʼatamai?
13 ʼUluaki faʼahiga fai: Faiga ke maʼuli te ʼu fakamatala ʼo te ʼu Evaselio ʼi tou ʼatamai. Faiga ke ke sio mo logo ki te ʼu meʼa ʼae ʼe hoko, pea mo logoʼi te ʼu meʼa ʼae ʼi te loto ʼo te hahaʼi. Koia, ʼe lelei anai moka ke fai ni fekumi ʼi ʼatatou tohi. ʼE tokoni atu anai ke ke iloʼi te ʼu meʼa ʼae neʼe hoko ʼi muʼa pea ʼi te hili ʼo te fakamatala ʼae ʼe ke lau. Fai mo hau ʼu fekumi ʼo ʼuhiga mo te hahaʼi pea mo te ʼu koga meʼa ʼae ʼe palalau ki ai te fakamatala. Pea ke ke lau te fakamatala ʼaia ʼi he tahi age Evaselio. ʼE ke maʼu ai anai he tahi ʼu manatu maʼuhiga.
14-15. ʼE feafeaʼi hatatou maʼuliʼi te ʼu ako ʼae neʼe tou maʼu mai te ʼu fakamatala ʼo te ʼu Evaselio?
14 Lua faʼahiga fai: Maʼuliʼi te ʼu meʼa ʼae neʼe ke ako ʼi te ʼu fakamatala ʼo te ʼu Evaselio. (Soa. 13:17) Koia, ka kua ke ʼosi ako fakaleleiʼi he fakamatala ʼo he Evaselio, ke ke fai te ʼu fehuʼi ʼaeni: “ ʼE ʼi ai koa he manatu ʼe feala ke au maʼuliʼi? ʼE feafeaʼi haku fakaʼaogaʼi te fakamatala ʼaia moʼo tokoni ki he tahi?” Faiga ke ke manatuʼi he tahi ʼe ke iloʼi lelei. Pea ke filifili te temi ʼae ʼe ke fia fakaha age ki ai te manatu ʼae neʼe ke maʼu, ʼaki he agalelei mo he fakaʼapaʼapa.
15 Tou toʼo he faʼifaʼitaki moʼo vakaʼi pe ʼe feafeaʼi hatatou mulimuli ki te ʼu faʼahiga fai ʼaeni ʼe lua. ʼE tou vakaʼi anai te fakamatala ʼo te meʼa ʼofa ʼo te fafine vitua masiva.
TE FAFINE VITUA MASIVA
16. Lau ia Maleko 12:41, pea fakamatala te meʼa ʼae ʼe hoko.
16 Faiga ke maʼuli te fakamatala ʼi tou ʼatamai. (Lau ia Maleko 12:41.) Fakakaukauʼi te meʼa ʼaeni: Ko te ʼaho 11 ʼo Nisani, ʼo te taʼu 33 H.T.S. * Kei toe pe he ʼu ʼaho, pea matehi ia Sesu. Neʼe faiakonaki ia Sesu ʼi te fale lotu ʼo teitei ʼaho katoa. Kae neʼe fakafeagai kia te ia te kau takitaki lotu. ʼI muʼa atu, ko ʼihi neʼe natou fakalavelave age pe ko ai ʼae neʼe ina fakagafua age ke ina fai tana gaue. Pea ko ʼihi atu neʼe natou faiga ke natou kakaʼi ia ia ʼaki ni fehuʼi faigataʼa. (Mko. 11:27-33; 12:13-34) Pea neʼe alu leva ia Sesu ki te faʼahi ʼo te fale lotu ʼae ʼe tuʼu ai te ʼu puha tanaki paʼaga. Neʼe lagi ko te faʼahi ʼo te Malaʼe ʼo Te Hahaʼi Fafine. Pea neʼe heka ai ʼo sioʼi te hahaʼi ʼae neʼe olo age ʼo tuku meʼa ʼofa ki te ʼu puha ʼaia. Neʼe sio ai ki te tokolahi ʼo te kau maʼu koloa neʼe natou ʼai ni tuʼuga piesi. Lagi neʼe heka ovi ki ai, ʼo feala ai hana logo ki te patasi ʼo te ʼu piesi ʼae neʼe natou ʼai ki te ʼu puha.
17. ʼO mulimuli kia Maleko 12:42, kotea ʼae neʼe tokagaʼi leva e Sesu?
17 Lau ia Maleko 12:42. Hili ʼaia, neʼe tokagaʼi leva e Sesu ia he “fafine vitua masiva.” Neʼe faigataʼa tona maʼuli, pea neʼe lagi mole feala pe la ke ina totogi hana meʼa kai. Kae neʼe fakaovi ki he puha tanaki paʼaga, ʼo ʼai ki ai te ʼu kiʼi foʼi piesi ʼe lua. Neʼe iloʼi e Sesu neʼe ko te ʼu lepetone ʼe lua ʼae neʼe ina foaki, pea neʼe ko te ʼu kiʼi foʼi piesi ʼae neʼe liliki age ʼi te temi ʼaia. Neʼe mole feala pe la ke totogi ʼaki he kiʼi misi, ʼae neʼe malalo age tona totogi ʼi te ʼu manu lele.
18. ʼO mulimuli kia Maleko 12:43, 44, kotea ʼae neʼe ui e Sesu ʼo ʼuhiga mo te meʼa ʼofa ʼo te fafine vitua?
18 Lau ia Maleko 12:43, 44. Neʼe punamaʼuli ia Sesu ʼi te meʼa ʼae neʼe fai e te fafine vitua ʼaia. Koia neʼe ina pauʼi ai ʼana tisipulo. Neʼe ina fakaha age te fafine ʼaia, mo ui fenei age kia natou: “Ko te fafine vitua masiva ʼaeni, neʼe lahi age tana foaki ia natou fuli ʼae.” Pea neʼe ina fakamahino age pe ʼe kotea tona tupuʼaga. “Ko natou fuli ʼaia [tafito ia natou ʼae neʼe maʼu koloa] neʼe natou ʼai te tupu ʼo tanatou falā, kaʼe ko ia, neʼe ina foaki tona gataʼaga, ia meʼa fuli ʼae neʼe ʼaoga ki tona maʼuli.” ʼEi, ko te fafine vitua agatonu ʼaia neʼe ina foaki ia tona gataʼaga. Koia, neʼe ina tuku ai tona maʼuli katoa kia nima ʼo Sehova, he neʼe ina iloʼi ʼe “ ʼofa agatonu” pea ʼe tokaga anai kia ia.—Pes. 26:3, NWT.
19. Kotea te ako maʼuhiga ʼe tou taʼofi mai te ʼu palalau ʼa Sesu ʼo ʼuhiga mo te fafine vitua masiva?
19 Maʼuliʼi te ako mai te fakamatala ʼaia. Ke ke fai te fehuʼi ʼaeni: “Kotea la he ako ʼe feala ke au taʼofi mai te ʼu palalau ʼa Sesu ʼo ʼuhiga mo te fafine vitua masiva?” Faiga ke ke logoʼi te ʼu meʼa ʼae neʼe ʼi te loto ʼo te fafine vitua. Neʼe lagi loto ke ina foaki lahi maʼa Sehova. Kae neʼe ina foaki te meʼa lelei tukupau ʼae neʼe ina maʼu. Pea neʼe iloʼi e Sesu neʼe maʼuhiga ʼaupito tona molaga ʼaia kia mata ʼo tana Tamai. Koia, ko te ako maʼuhiga ʼaeni ʼe tou taʼofi mai te fakamatala ʼaia: ʼE fiafia ia Sehova moka tou foaki age te ʼu meʼa lelei tukupau, ko tona fakaʼuhiga ke tou tauhi kia te ia ʼaki totatou loto katoa mo totatou maʼuli katoa. (Mat. 22:37; Kol. 3:23) ʼE fiafia ia te ʼAtua moka tou fai ia meʼa fuli ʼae ʼe tou lavaʼi. Ko tona fakaʼuhiga, moka tou fakaʼaogaʼi totatou temi mo totatou malohi ʼi tatatou tauhi ʼae kia te ia, ohage la moka tou faifakamafola pea mo kau ki te ʼu fono.
20. ʼE feafeaʼi hau maʼuliʼi te ako ʼae neʼe tou taʼofi mai te fakamatala ʼo ʼuhiga mo te fafine vitua? Tuku mai he faʼifaʼitaki.
Efe. 4:29) Vaevae mo natou ʼaia te ako ʼae neʼe tou taʼofi mai te fakamatala ʼo te fafine vitua masiva. ʼI tau fai age te ʼu palalau fakalotomalohi ʼaia, ʼe natou manatuʼi ai ko Sehova ʼe fiafia moka ʼe tou foaki age te ʼu meʼa lelei tukupau ʼae ʼe tou maʼu. (Taag. 15:23; 1 Tes. 5:11) Koia, ka tou fakamalo kia natou ʼae ʼe natou foaki te meʼa ʼae ʼe natou lavaʼi kia Sehova, tatau aipe pe ʼe hage ʼe veliveli, ʼe tou mulimuli fakalelei ai ki te ʼu lakaʼaga ʼo Sesu.
20 ʼE feafeaʼi hau maʼuliʼi te ako ʼae neʼe tou taʼofi mai te fakamatala ʼaia? Faiga ke ke manatuʼi he ʼu tehina mo tuagaʼane ʼe feala ke fakalotomalohiʼi natou ʼi tau fakaha age ʼe fiafia ia Sehova moka ʼe natou fai te meʼa ʼae ʼe natou lavaʼi. Ohage la, ʼe lagi ke iloʼi he tuagaʼane kua matuʼa, ʼe ina ui ʼe mole kei ʼi ai hona ʼaoga he ʼe mole kei feala hana alu ʼo faifakamafola ohage ko te temi muʼa. Peʼe ko he tehina ʼi tau kokelekasio ʼe tau mo he mahaki faigataʼa pea kua lotovaivai he ʼe mole kei feala hana kau tuʼumaʼu ki te ʼu fono. ʼE feala ke ke tokoni ki ʼou tehina mo tuagaʼane ʼaia ʼaki hau ʼu ‘palalau fakalotomalohi.’ (21. Kotea ʼae ʼe ke fakatotonu ke ke fai?
21 ʼE lahi totatou fiafia ʼi tatatou lau te ʼu Evaselio. ʼE tou iloʼi ai te ʼu aluʼaga kehekehe ʼo te maʼuli ʼo Sesu. ʼE tokoni mai ke tou faʼifaʼitakiʼi ia ia, peʼe ke tou mulimuli fakalelei ki ʼona lakaʼaga. ʼE feala ke tou fakatuʼutuʼu ke tou ako te ʼu Evaselio ʼi tatatou ako takitokotahi peʼe ʼi tatatou ako Fakafamili. Pea ke ke manatuʼi, ke fua lelei kia koe tau ako ʼaia, faiga ke maʼuli te ʼu fakamatala ʼi tou ʼatamai pea mo ke maʼuliʼi te ako ʼae neʼe ke taʼofi mai ai. Kae ʼe mole gata ʼaki pe tatatou faʼifaʼitakiʼi te meʼa ʼae neʼe fai e Sesu. ʼE tonu foki ke tou toe fagono ki te ʼu meʼa ʼae neʼe ina ui. ʼI te alatike ka hoa mai, ʼe tou vakaʼi anai te ʼu ako ʼe feala ke tou taʼofi mai te ʼu palalau fakaʼosi ʼa Sesu ʼi muʼa ʼo tana mate.
KATIKO 15 Tou Vikiʼi Te ʼUluaki Tupu ʼa Sehova
^ pal. 5 ʼE tonu ki te kau Kilisitiano moʼoni ke natou ‘mulimuli fakalelei ki te ʼu lakaʼaga ʼo Sesu.’ Kotea tona fakaʼuhiga? ʼE fakamahino anai te faʼahi ʼaia ʼi te alatike ʼaeni. ʼE tou toe vakaʼi anai pe koʼe ʼe tonu ke tou mulimuli fakalelei ki ʼona lakaʼaga pea ʼe feafeaʼi ia tona fai.
^ pal. 16 Ko te ʼu mataʼi tohi ʼaeni H.T.S. ko tona fakaʼuhiga: Hili te Temi ʼo Sesu.
^ pal. 61 FAKAMATALA ʼO TE ʼU PĀKI: Ko he tuagaʼane ʼe metitasio ki te ʼu palalau ʼa Sesu ʼo ʼuhiga mo te fafine vitua masiva. Ki muli age, ʼe fakamalo ki he tuagaʼane kua matuʼa ʼi tana tauhi kia Sehova mo tona maʼuli katoa.