ALATIKE AKO 16
Tou Taupau Tatatou Lotofakafetaʼi Ki Te Totogi ʼAe Neʼe Foaki e Sesu
“Ko te Foha ʼo te tagata, neʼe . . . haʼu ia ke . . . foaki tona maʼuli ko he totogi maʼa te tokolahi.”—MKO. 10:45.
KATIKO 18 Fakafetaʼi Ki Te Totogi
TE ʼU MANATU FAKANOUNOU *
1-2. Kotea te totogi ʼae neʼe foaki e Sesu, pea he koʼe neʼe ʼaoga ke foaki te totogi ʼaia?
ʼI TE agahala ʼa Atama, ʼae neʼe haohaoa, neʼe mole kei feala ai leva hana maʼuli ʼo heʼe gata. Pea neʼe mole toe feala ai foki ki tona hologa ke natou maʼuʼuli mo natou ʼo heʼe gata. Neʼe filifili e Atama ke agahala ʼi tana talagataʼa ʼae ki te ʼAtua. Kae neʼe mole he pikipikiga ʼo tona hologa mo te agahala ʼaia neʼe ina fai. (Loma 5:12, 14) Neʼe feala koa ke fai e Sehova he puleʼaki, ke feala ai hanatou maʼuʼuli ʼo heʼe gata? ʼEi. Hili pe te agahala ʼaia ʼa Atama, neʼe ina kamata fakaha pe ʼe feafeaʼi anai hana fakaʼateainaʼi te toko miliona hahaʼi mai te agahala mo te mate. (Sen. 3:15) Neʼe fakatuʼutuʼu ai e Sehova he temi ke ina fekauʼi ifo ki te kele ia tona ʼAlo ke ina “foaki tona maʼuli ko he totogi maʼa te tokolahi.”—Mko. 10:45; Soa. 6:51.
2 Kotea te totogi ʼaia neʼe foaki e Sesu? ʼI te Koga Tohi-Tapu Fakakeleka Fakakilisitiano, ʼe fakaha ai neʼe foaki e Sesu tona maʼuli moʼo totogi ʼaki te meʼa ʼae neʼe puli ia Atama. (1 Ko. 15:22) Pea he koʼe neʼe ʼaoga ke foaki te totogi ʼaia? ʼI te Lao ʼae neʼe foaki kia Moisese, neʼe fakatuʼu ai e Sehova te lekula ʼae ke foaki he maʼuli ʼaki he tahi age maʼuli. (Eke. 21:23, 24) Neʼe pulihi e Atama tona maʼuli haohaoa. Koia moʼo mulimuli ki te faitotonu ʼa te ʼAtua, neʼe tonu ai ke foaki e Sesu ia tona maʼuli haohaoa. (Loma 5:17) Neʼe liliu ai Sesu ko he “Tamai heegata” kia natou fuli ʼae ʼe tui ki te totogi ʼaia neʼe ina foaki.—Esa. 9:5; Loma 3:23, 24.
3. He koʼe neʼe lotolelei ia Sesu ke ina sakilifisioʼi tona maʼuli haohaoa, ʼo mulimuli kia Soane 14:31 pea mo 15:13?
3 Neʼe lotolelei ia Sesu ke ina sakilifisioʼi tona maʼuli he neʼe ʼofa mamahi ʼi tana Tamai pea mo te hahaʼi. (Lau ia Soane 14:31; 15:13.) Neʼe loto moʼoni ai ke nofo agatonu ʼo kaku ki tona mate, pea ke ina fakahoko te finegalo ʼo tana Tamai. ʼI te nofo agatonu ʼaia ʼa Sesu, kua feala leva ke fakahoko te meʼa ʼae neʼe loto ki ai e te ʼAtua ʼi te kamata maʼa te tagata pea mo te kele. ʼI te alatike ʼaeni, ʼe tou vakaʼi anai pe ʼe koʼe neʼe fakagafua e te ʼAtua ke mamahi tona ʼAlo ʼi muʼa ʼo tana mate. ʼE tou toe vakaʼi anai te faʼifaʼitaki ʼa te apositolo ko Soane, koteʼuhi neʼe lotofakafetaʼi ki te totogi ʼae neʼe foaki e Sesu. Pea ʼe tou toe vakaʼi anai pe ʼe feafeaʼi hatatou lotofakafetaʼi kia Sehova pea mo Sesu, pea mo feafeaʼi hona haga taupau.
HE KOʼE NEʼE FAKAGAFUA E TE ʼATUA KE MAMAHI TONA ʼALO?
Manatuʼi te ʼu mamahi ʼae neʼe ʼutakiʼi e Sesu ke tou maʼu ai ni lelei mai te totogi ʼae neʼe ina foaki! (Vakaʼi te palakalafe 4)
4. Fakamatala pe neʼe feafeaʼi te mate ʼa Sesu.
4 Fakakaukauʼi age muʼa te ʼu mamahi ʼae neʼe ʼutakiʼi e Sesu ʼi tona ʼaho fakaʼosi ʼae ʼi te kele. Neʼe feala pe ke ina kole ke puipui ia ia e te ʼu ʼaselo ʼe kauga malie. Kae neʼe ina tuku ke puke ia ia e te kau solia Loma. Pea neʼe natou huipiʼi ia ia, ʼo ha te kakano ʼi tona tuʼa. (Mat. 26:52-54; Soa. 18:3; 19:1) Ki muli age, neʼe natou hili he foʼi pou mamafa ki tona tuʼa ʼae kua lavelavea. Neʼe toho e Sesu te pou ki te koga meʼa ʼae neʼe tonu ke matehi ai. Kae neʼe kua gaʼegaʼe, koia neʼe fakamaʼua ai ki he tagata ke ina ʼamo te pou. (Mat. 27:32) ʼI te kaku ʼa Sesu ki te koga meʼa ʼaia, neʼe tutuki e te kau Loma ʼona nima mo ʼona vaʼe ki te pou. Pea neʼe natou fakatuʼu leva te pou. ʼUhi ko te mamafa ʼo te sino ʼo Sesu, neʼe ʼasili ava ai ʼona lavea. Neʼe fetagihi ʼona kaumeʼa pea mo lotomamahi ʼaupito ia tana faʼe. Kae neʼe manukiʼi ia ia e te kau pule Sutea. (Luka 23:32-38; Soa. 19:25) Neʼe mamahi te sino ʼo Sesu lolotoga ni hola. Neʼe kua vaivai tona mafu pea mo faigataʼa hana manava. Logo la te faʼahi ʼaia, kae ʼi muʼa pe ʼo tana mate neʼe faikole fakaʼosi ki tana Tamai, he neʼe kua ina iloʼi neʼe nofo agatonu. Hili ʼaia, neʼe maleʼe ifo tona ʼulu pea mate leva. (Mko. 15:37; Luka 23:46; Soa. 10:17, 18; 19:30) Neʼe fualoa te mamahi ʼa Sesu ʼi muʼa ʼo tana mate, pea neʼe fakalainoaʼi tona faʼahiga matehi ʼaia!
5. Kotea ʼae neʼe tuʼania ki ai ia Sesu?
5 Neʼe mole tuʼania ia Sesu ʼo ʼuhiga mo tona faʼahiga matehi, kae ʼo ʼuhiga mo te tupuʼaga ʼo tona matehi. ʼEi, he neʼe ui ko Sesu ʼe ko he tagata neʼe mole fakaʼapaʼapa ia ki te ʼAtua mo tona huafa. (Mat. 26:64-66) Koia la ʼae, neʼe fakaʼamu ai ia Sesu ke mole tuku e tana Tamai ke fakalainoaʼi feia ia ia. (Mat. 26:38, 39, 42) Kae he koʼe neʼe fakagafua e Sehova ke mamahi pea mo mate ia Sesu? ʼE tou vakaʼi anai tupuʼaga ʼe tolu.
6. He koʼe neʼe tonu ke tautau ia Sesu ʼi he pou fakamamahi?
6 ʼUluaki, neʼe tonu ke tautau ia Sesu ʼi he pou ke fakaʼateainaʼi ai te kau Sutea mai tonatou fakamalaʼiaʼi. (Kal. 3:10, 13) Neʼe fakamalaʼiaʼi te kau Sutea, he neʼe natou fakapapau ʼe natou fakaʼapaʼapa ki te Lao ʼa te ʼAtua, kae neʼe mole natou fakalogo ki ai. Koia, ʼo hilifaki ki tonatou malaʼia ʼaia, neʼe natou toe tau mo te ʼu fua kovi ʼo te agahala ʼa Atama. (Loma 5:12) ʼO mulimuli ki te Lao ʼae neʼe foaki e te ʼAtua ki te kau Iselaele, moka neʼe agahala mamafa he tahi neʼe tonu ke matehi. Hili tona matehi ʼaia, neʼe tautau leva ʼi he pou. * Pea neʼe ui ʼi te Lao pe ʼaia, ko he sino mate neʼe tautau ʼi he pou neʼe ko he malaʼia ia ia muʼa ʼo te ʼAtua. (Tet. 21:22, 23; 27:26) Koia, ʼi te tautau ʼo Sesu ʼi te pou, neʼe ina fakaʼateainaʼi ai te kau Sutea mai tonatou fakamalaʼiaʼi ʼaia logo la neʼe natou fehihiʼa ia ia. Pea neʼe toe feala foki ke natou maʼu te ʼu fua lelei ʼo tona sakilifisio.
7. Kotea te lua tupuʼaga ʼo te fakagafua e te ʼAtua ke mamahi ia tona ʼAlo?
7 Lua, neʼe fakagafua e Sehova ke mamahi Hep. 2:17, 18; 4:14-16; 5:7-10.
ia tona ʼAlo, ke feala hana fakahoko lelei ki muli age tana gaue ʼi tona ʼuhiga Pelepitelo Lahi. Neʼe iloʼi ai e Sesu ʼe mole faigafua tana fakalogo ki te ʼAtua moka tau mo he ʼahiʼahi faigataʼa. Pea ʼi te kua faigataʼa ʼaupito kia ia, neʼe ina kole “ ʼaki he leʼo malohi pea mo ni loʼimata” ke tokoni age tana Tamai. Koia, kua iloʼi ai e Sesu pe ʼe kotea ʼae ʼe ʼaoga kia tatou pea feala ai hana tokoni mai moka ʼe ʼahiʼahi tatou. ʼE tou lotofakafetaʼi kia Sehova ʼi tana foaki mai he Pelepitelo Lahi manavaʼofa “ ʼe lotomahino ki ʼotatou vaivaiʼaga.”—8. Kotea te tolu tupuʼaga ʼo te fakagafua e Sehova ke fakamamahiʼi ia Sesu?
8 Tolu, neʼe fakagafua e Sehova ke fakamamahiʼi tona ʼAlo moʼo tali ki te fehuʼi maʼuhiga ʼaeni: ʼE nonofo agatonu anai koa te hahaʼi ki te ʼAtua moka natou tau mo he ʼu ʼahiʼahi faigataʼa? ʼE lau ia e Satana ʼe tauhi te hahaʼi kia Sehova ʼuhi pe ko te ʼu lelei ʼae ʼe ina foaki age kia natou. Pea ʼe ina ui ʼe mole natou ʼoʼofa kia Sehova, ohage pe ko Atama. (Sopo 1:9-11; 2:4, 5) Neʼe tui papau ia Sehova ʼe nofo agatonu anai tona ʼAlo kia te ia. Koia neʼe ina fakagafua ai ke fakamamahiʼi ia Sesu. Pea neʼe nofo agatonu ia Sesu, ʼo ina fakaha ai ko Satana ʼe gutuloi.
NEʼE LOTOFAKAFETAʼI TE APOSITOLO KO SOANE KI TE TOTOGI ʼAE NEʼE FOAKI E SESU
9. Kotea te faʼifaʼitaki lelei neʼe tuku mai e te apositolo ko Soane?
9 Ko te tui ʼa te kau Kilisitiano ʼe tokolahi neʼe liliu ʼo malohi ʼuhi ko te akonaki ʼo ʼuhiga mo te totogi ʼae neʼe foaki e Sesu. Neʼe feala ai ke hoko atu tanatou faifakamafola logo la tonatou fakatagaʼi, pea neʼe natou katakiʼi ʼonatou faigataʼaʼia ʼi tonatou maʼuli katoa. Tou vakaʼi te faʼifaʼitaki ʼa te apositolo ko Soane. Neʼe ina fakaha tana agatonu ki te ʼAtua koteʼuhi neʼe ina fakamafola lolotoga taʼu ʼe 60 tupu te moʼoni ʼo ʼuhiga mo Kilisito pea mo te totogi ʼae neʼe ina foaki. Pea ʼi tona teitei taʼu 100, neʼe pilisoniʼi ia ia e te kau Loma ʼi te motu ko Patemosi, he neʼe natou matataku naʼa fakatapu maveuveu. Kae kotea te meʼa kovi ʼae neʼe ina fai? Neʼe ‘palalau ia ʼo ʼuhiga mo te ʼAtua pea mo fakamoʼoni ʼo ʼuhiga mo Sesu.’ (Fkha. 1:9) Ko he faʼifaʼitaki lelei ʼo he tahi neʼe tui pea mo faʼa kataki.
10. Neʼe ha feafeaʼi ʼi te ʼu tohi ʼa Soane tana lotofakafetaʼi ki te totogi ʼae neʼe foaki e Sesu?
10 ʼI te ʼu tohi ʼae neʼe fai e Soane, neʼe ha ai tona ʼofa mamahi ia Sesu pea mo tona lotofakafetaʼi ki te totogi ʼae neʼe ina foaki. ʼEi, neʼe tuʼa teau tupu tana palalau ʼo ʼuhiga mo te totogi ʼaia pea mo tona ʼu fua lelei kia tatou. Ohage la neʼe ina tohi fenei: “Kapau ʼe agahala he tahi, ʼe ʼi ai totatou tokoni ia muʼa ʼo te Tamai, ʼe ko Sesu Kilisito, te tagata faitotonu.” (1 Soa. 2:1, 2) Neʼe ina toe fakamanatuʼi ʼi tana ʼu tohi ʼaia te maʼuhiga ʼae ke tou “fakamoʼoni ʼo ʼuhiga mo Sesu.” (Fkha. 19:10) ʼE mahino ia, neʼe lahi te lotofakafetaʼi ʼa Soane ki te totogi ʼae neʼe foaki e Sesu. Pea ʼe feafeaʼi hatatou fakaha mo tatou tatatou lotofakafetaʼi?
ʼE FEAFEAʼI HATATOU LOTOFAKAFETAʼI KI TE TOTOGI ʼAE NEʼE FOAKI E SESU?
Kapau ʼe tou lotofakafetaʼi ki te totogi ʼae neʼe foaki e Sesu, ʼe tou tekeʼi anai te fakahala (Vakaʼi te palakalafe 11) *
11. Kotea ʼae ʼe feala ke tokoni mai ke tou tauʼi te fakahala?
11 Tou tekeʼi te fakahala. Kapau ʼe tou lotofakafetaʼi ki te totogi ʼae neʼe foaki e Sesu, ʼe mole tou manatu fenei anai: “Kapau ʼe fakahalaʼi au, ʼe mole au faiga malohi anai ke au tekeʼi. ʼE feala pe ke au fai te meʼa ʼaia ʼe kovi, pea ka ʼosi pe, hoki au kole ke fakamolemole mai.” Kae ʼe tou manatu fenei anai mo kapau ʼe fakahalaʼi tatou: “ ʼOho ia, ʼe lava feafeaʼi haku fai te taʼi aga ʼaia ʼo mole kei au manatuʼi ai leva ia meʼa fuli neʼe fai e Sehova mo Sesu maʼaku.” Pea ʼe feala ke tou kole kia Sehova tona malohi, ʼo tou kole mamahi Mat. 6:13.
fenei age: ‘ ʼAua naʼa ke tuku au ki te fakahala.’—12. ʼE feafeaʼi hatatou maʼuliʼi te tokoni ʼae ia 1 Soane 3:16-18?
12 Tou ʼoʼofa ki ʼotatou tehina mo tuagaʼane. Ko tatatou ʼoʼofa ia natou ʼe ha ai tatatou lotofakafetaʼi ki te totogi ʼae neʼe foaki e Sesu. ʼO feafeaʼi? Neʼe mole foaki e Sesu tona maʼuli maʼa tatou pe. Kae neʼe toe mate foki maʼa ʼotatou tehina mo tuagaʼane, he ʼe natou maʼuhiga kia te ia. (Lau ia 1 Soane 3:16-18.) ʼE ha totatou ʼofa ki ʼotatou tehina mo tuagaʼane ʼi tatatou faʼahiga aga kia natou. (Efe. 4:29, 31–5:2) Ohage la, ʼe tou tokoni kia natou moka natou mahahaki peʼe moka natou tau mo he faigataʼaʼia, ohage la ko he tuʼutamaki fakanatula. Kae ʼe feafeaʼi moka ʼe tou mamahi ʼuhi ko he palalau peʼe ko he aga neʼe fai mai e he tahi?
13. He koʼe ʼe tonu ke tou fakamolemole?
13 ʼE faigataʼa koa ʼi ʼihi temi hau fakamolemole ki he tehina peʼe ko he tuagaʼane? (Lev. 19:18) Kapau koia, mulimuli ki te tokoni ʼaeni ʼa te apositolo ko Paulo: “Kotou haga fekatakiʼaki, pea mo fefakamolemoleʼaki ʼaki he lotolelei, tatau aipe pe ʼe ʼi ai hokotou fihifihia mo he tahi. Ohage pe ko te lotolelei ʼa Sehova ke fakamolemole kia koutou, ʼe tonu ke kotou toe fai feia mo koutou.” (Kol. 3:13) ʼE tou fakaha ki tatatou Tamai ʼae ʼi selo tatatou lotofakafetaʼi ki te totogi ʼae neʼe foaki mai e Sesu, moka ʼe tou fakamolemole tuʼumaʼu ki ʼotatou tehina mo tuagaʼane. Kae ʼe feafeaʼi hatatou taupau tatatou lotofakafetaʼi ki te meʼa ʼofa ʼaia mai totatou ʼAtua?
ʼE FEAFEAʼI HATATOU TAUPAU TATATOU LOTOFAKAFETAʼI KI TE TOTOGI ʼAE NEʼE FOAKI E SESU?
14. ʼE feafeaʼi hatatou taupau tatatou lotofakafetaʼi ki te totogi ʼae neʼe foaki mai e Sesu?
14 Tou fakamalo kia Sehova. ʼE ui fenei e te tuagaʼane ko Joanna, ʼe taʼu 83 pea ʼe maʼuli ʼi Initia: “ ʼI te ʼaho fuli, moka ʼe au faikole, ʼe maʼuhiga kia au haku palalau ʼo ʼuhiga mo te totogi ʼae neʼe foaki e Sesu, pea mo au fakamalo kia Sehova.” Ka tou faikole, tou fakaha kia Sehova te ʼu hala ʼae neʼe tou fai, pea tou kole tana fakamolemole. Kae kapau neʼe agahala mamafa he tahi, ʼe tonu ke kumi tokoni ki te kau tagata ʼafeā. ʼE natou fagono lelei anai ki ai, pea mo foaki he ʼu tokoni ʼofa ʼe toʼo mai te Folafola ʼa te ʼAtua. ʼE natou toe faikole anai mo ia, ʼo natou kole kia Sehova tana fakamolemole ke toe felogoi lelei ai mo ia.—Sakp. 5:14-16.
15. He koʼe ʼe tonu ke tou toʼo he temi moʼo lau te ʼu tohi ʼae ʼe palalau ai ki te totogi ʼae neʼe foaki e Sesu pea ke tou metitasio ki ai?
15 Tou metitasio ki te totogi ʼae neʼe foaki e
Sesu. ʼE ui fenei e te tuagaʼane ko Rajamani, ʼae kua taʼu 73: “ ʼE au tagi tuʼumaʼu pe moka au lau te ʼu mamahi ʼae neʼe ʼutakiʼi e Sesu.” ʼE lagi toe malave anai kia koe moka ke lau te ʼu mamahi fuli ʼae neʼe tau mo Sesu. Pea kapau ʼe lahi age tau metitasioʼi ki te sakilifisio ʼae neʼe ina foaki, ʼe toe lahi age ai tou ʼofa kia Sesu pea mo tana Tamai. ʼE lelei ke ke vakaʼi ʼi tau ako tokotahi te akonaki ʼo ʼuhiga mo te totogi, ke feala ai leva hau metitasio ki ai.ʼAki pe he moʼi pane mo he moʼi vino, neʼe akoʼi e Sesu ʼana tisipulo pe ʼe feafeaʼi hanatou fakamanatu tona sakilifisio (Vakaʼi te palakalafe 16)
16. Kotea te ʼu lelei ʼe tou maʼu moka tou palalau ki te hahaʼi ʼo ʼuhiga mo te totogi ʼae neʼe foaki e Sesu? (Vakaʼi te pāki ʼo te takafi.)
16 Tou palalau ki ʼihi ʼo ʼuhiga mo te totogi ʼae neʼe foaki e Sesu. Ka tou palalau ki he tahi ʼo ʼuhiga mo te totogi ʼae neʼe foaki e Sesu, ʼe toe lahi age ai tatatou lotofakafetaʼi ki te meʼa ʼofa ʼaia. ʼE tou maʼu he ʼu tohi pea mo ni ʼata viteo ʼe tokoni mai ke tou fakamahino ki ʼihi pe ʼe koe neʼe mate ia Sesu maʼa tatou. Ohage la, ʼe feala ke tou fakaʼaogaʼi te ako 4 ʼo te kaupepa lahi Te ʼu Logo Lelei Mai Te ʼAtua, pea ko tona kupu tafito “Ko Ai Koa Ia Sesu Kilisito?” Peʼe ko te kapite 5 ʼo te tohi Kotea ʼAe ʼe Akoʼi Mai ʼi Te Tohi-Tapu? pea ko tona kupu tafito “Te Totogi ʼe Ko Te Meʼa ʼOfa Lahi ʼo Te ʼAtua.” Pea ʼi te taʼu fuli, ʼe feala ke tou fakaha tatatou lotofakafetaʼi ʼi tatatou kau ki te ʼAho Fakamanatu ʼo te Mate ʼo Sesu pea mo fakaafe te tokolahi ke natou kau ki ai. ʼE foaki mai e Sehova te pilivilesio ʼae ke tou palalau ki te hahaʼi ʼo ʼuhiga mo tona ʼAlo.
17. He koʼe ko te totogi ʼae neʼe foaki e Sesu ʼe ko te meʼa ʼofa lahi ʼo te ʼAtua ki te hahaʼi?
17 ʼE lahi te ʼu tupuʼaga ke tou lotofakafetaʼi ai ki te totogi ʼae neʼe foaki e Sesu. ʼAki te totogi ʼaia, kua feala ke tou kaumeʼa mo Sehova logo la totatou ʼuhiga agahala. Aki te totogi ʼaia, ʼe toe feala anai ke maumauʼi te ʼu gaue fuli ʼa te Tevolo. (1 Soa. 3:8) Pea ʼaki pe te totogi ʼaia, ʼe feala anai ke fakahoko te fakatuʼutuʼu ʼa te ʼAtua ʼo ʼuhiga mo te kele. ʼE liliu anai te kele katoa ko he palatiso. ʼE ʼoʼofa pea mo tauhi anai te hahaʼi fuli kia Sehova. Koia, tou faiga ʼi te ʼaho fuli, ke tou fakaha tatatou lotofakafetaʼi ki te totogi ʼae neʼe foaki e Sesu, te meʼa ʼofa lahi ʼo te ʼAtua ki te hahaʼi!
KATIKO 20 Neʼe Ke Momoli Tou ʼAlo ʼUlu Tokotahi
^ pal. 5 He koʼe neʼe tonu ke mamahi ia Sesu pea mo mate? ʼE tali anai e te alatike ʼaeni ki te fehuʼi ʼaia. ʼE toe tokoni mai anai ke tou taupau tatatou lotofakafetaʼi ki te totogi ʼae neʼe foaki e Sesu.
^ pal. 6 ʼI te agamahani, neʼe tutuki peʼe haʼi e te kau Loma ki he pou te kau agakovi kae kei maʼuʼuli. Pea neʼe fakagafua e Sehova ke hoko te faʼahiga mate ʼaia ki tona ʼAlo.
^ pal. 55 FAKAMATALA ʼO TE ʼU PĀKI: Ko te ʼu tehina ʼe natou tekeʼi te fakahala: ʼE mole fia sio te tehina ki he pāki ʼe kovi, ʼe fakafisi te tahi tehina ki he foʼi suluka, pea ʼe mole tali e te tahi age tehina ke aga fakakaka.