ALATIKE AKO 21
ʼE Foaki Atu Anai e Sehova Te Malohi
“ ʼE hoki au malohi moka ʼe au vaivai.”—2 KO. 12:10.
KATIKO 73 Ke Matou Lototoʼa
TE ʼU MANATU FAKANOUNOU *
1-2. Kotea te ʼu fihifihia ʼe tauʼi e te kau Fakamoʼoni ʼa Sehova e tokolahi?
NEʼE fakalotomalohiʼi e te apositolo ko Paulo ia Timoteo ke ina fakahoko katoa tona minisitelio. Pea ʼe tou toe mulimuli mo tatou ki te tokoni ʼaia ʼa Paulo. (2 Tim. 4:5) ʼE tou loto ke tou fai te ʼu meʼa fuli ʼe tou lavaʼi moʼo tauhi ki te ʼAtua, kae ʼe mole faigafua tuʼumaʼu. Tokolahi te ʼu tehina mo tuagaʼane ʼe natou matataku ʼi te faifakamafola, kae ʼe natou lototoʼa. (2 Tim. 4:2) Ohage la, ʼi te ʼu fenua ʼae ʼe mole feala hanatou faifakamafola faʼifaʼitaliha ai, ʼe feala ke pilisoniʼi natou ʼuhi ko tanatou palalau ki te moʼoni.
2 ʼE lahi te ʼu fihifihia ʼe tauʼi e te ʼu kaugana ʼa Sehova, pea ʼe feala ke natou lotovaivai ai. Ohage la, tokolahi ʼe tonu ke natou gaue ʼi ni lauʼi hola moʼo taupau tonatou kiʼi famili. Pea ʼe natou fia lagolago ki te gaue faifakamafola ʼi te fakaʼosi vahaʼa, kae kua natou gaʼegagaʼe. Ko ʼihi ʼe mole kei lahi te ʼu gaue ʼae ʼe natou fai ʼi te kokelekasio. Lagi kua mahahaki, peʼe kua matutuʼa, peʼe mole kei feala pe la hanatou olo ki tuʼa ʼi tonatou ʼapi. Pea ko ʼihi leva, ʼe natou lotomamahi tuʼumaʼu pe ʼuhi ko ʼanatou manatu, ohage ko te tuagaʼane ko Mary. * ʼE ina ui fenei: “ ʼE tonu ke au tauʼi malohi taku manatu ʼae ʼe mole hoku ʼaoga kia Sehova, pea ʼe au logoʼi ai leva toku gaʼegaʼe. ʼE au tukugakoviʼi leva au, heʼe mole kei ʼi ai hoku temi mo hoku malohi ke au alu ai ʼo faifakamafola.”
3. Kotea ʼae ka tou vakaʼi ʼi te alatike ʼaeni?
3 Kotea pe he fihifihia ʼe tou tau mo ia, kae ʼe feala ke foaki mai e Sehova te malohi ke tou tauhi kia te ia ʼo mulimuli ki ʼotatou fealagia. ʼI muʼa ʼo hatatou vakaʼi pe ʼe tokoni feafeaʼi mai ia Sehova kia tatou, tou vakaʼi pe neʼe feafeaʼi tana fakamalohiʼi
ia Paulo mo Timoteo ke nā fakahoko tanā faifakamafola logo la te ʼu faigataʼaʼia ʼae neʼe tau mo naua.TE MALOHI KE FEALA AI HATATOU FAIFAKAMAFOLA
4. Kotea te ʼu fihifihia neʼe tau mo Paulo?
4 Neʼe lahi te ʼu fihifihia neʼe tau mo Paulo. Ohage la, neʼe ta, mo tuki makaʼi pea mo pilisoniʼi. (2 Ko. 11:23-25) Pea neʼe ui fakalelei pe e Paulo neʼe tonu ke ina tauʼi he ʼu manatu fakatupu lotovaivai. (Loma 7:18, 19, 24) Neʼe toe tau foki mo he mahaki, ʼae neʼe hage ko he tala ʼi tona kakano. Pea neʼe ina kole kia Sehova ke ina toʼo te mahaki ʼaia.—2 Ko. 12:7, 8.
5. Logo pe la ʼona tuʼuga fihifihia, kae kotea ʼae neʼe fai e Paulo?
5 Neʼe foaki e Sehova te malohi kia Paulo ke feala hana faifakamafola logo la ʼona fihifihia. Ohage la, ʼi tana nofo pilisoni ʼi he ʼapi ʼi Loma, neʼe faifakamafola ia Paulo ki te kau takitaki Sutea, pea lagi mo te kau takitaki ʼo te puleʼaga. (Gaue 28:17; Flp. 4:21, 22) Pea neʼe toe faifakamafola ki ʼihi ʼo te Foʼi Solia ʼo te Hau Loma. (Gaue 28:30, 31; Flp. 1:13) ʼI te temi ʼaia neʼe pilisoni ai, neʼe fai e Paulo te ʼu tohi ʼe kei ʼaoga kia tatou ʼi te temi nei. Pea ko tana faʼifaʼitaki neʼe ina fakalotomalohiʼi ai ia te ʼu tehina mo tuagaʼane ʼo te kokelekasio ʼo Loma. Neʼe “natou tala ai te folafola ʼa te ʼAtua ʼaki he lototoʼa, ʼo mole natou matataku.” (Flp. 1:14) Logo pe la neʼe mole feala ke fai e Paulo te meʼa ʼae neʼe loto ki ai, kae neʼe ina fai te ʼu meʼa fuli ʼae neʼe ina lavaʼi. Pea ko tana fai ʼaia neʼe “lagolago ki te fakamafola ʼo te logo lelei.”—Flp. 1:12.
6. ʼO mulimuli kia 2 Kolonito 12:9, 10, kotea ʼae neʼe tokoni kia Paulo ke ina fakahoko tana minisitelio?
6 Neʼe mahino kia Paulo ko meʼa fuli ʼae neʼe ina fai, neʼe feala ʼuhi pe ko te malohi ʼae neʼe foaki age e Sehova, kae neʼe mole ʼaki tona malohi ʼo ia totonu. Neʼe ina ui neʼe liliu te malohi ʼo te ʼAtua ʼo katoa ʼi te ʼu temi ʼae neʼe vaivai ai. (Lau ia 2 Kolonito 12:9, 10.) Neʼe fakamalohiʼi e Sehova ia Paulo ʼaki tona laumalie maʼoniʼoni, ʼo feala ai ke ina fakahoko katoa tona minisitelio, logo la tona fakatagaʼi, mo tona pilisoniʼi, pea mo ʼihi atu fihifihia.
7. Kotea ʼae neʼe feala ke faigataʼa ai kia Timoteo tana fakahoko tona minisitelio?
7 Ko Timoteo, ʼae neʼe tupulaga age ia Paulo, neʼe toe ʼaoga pe kia ia te malohi ʼo te ʼAtua moʼo fakahoko tona minisitelio. Neʼe kauga alu mo Paulo ʼi tana ʼu faifolau fakamisionea 1 Ko. 4:17) Neʼe lagi manatu ia Timoteo ʼe mole feala ke ina fai te ʼu gaue ʼae neʼe tuku age e Paulo. Neʼe lagi ko te tupuʼaga la ʼaia ʼo te ui fenei e Paulo kia ia: “Ke ʼaua naʼa meʼa noaʼi koe e he tahi ʼuhi ko tau kei tupulaga.” (1 Tim. 4:12) Pea lolotoga te temi ʼaia, neʼe “tautau mahaki” ia Timoteo. Neʼe hage te aluʼaga ʼaia ko he tala ki tona kakano. (1 Tim. 5:23) Kae neʼe iloʼi e Timoteo ʼe ko te laumalie maʼoniʼoni ʼa Sehova ʼae ka ina foaki age te malohi ke faifakamafola pea mo tauhi ʼona tehina.—2 Tim. 1:7.
loaloaga. Pea neʼe kole age e Paulo kia ia ke toe faifolau moʼo fakalotomalohiʼi te ʼu kokelekasio. (TE MALOHI KE TOU NONOFO AGATONU LOGO LA TE ʼU FAIGATAʼAʼIA
8. ʼE fakamalohiʼi feafeaʼi e Sehova ʼana kaugana ia ʼaho nei?
8 Ia ʼaho nei, ʼe foaki e Sehova ki ʼana kaugana “te malohi makehe” ke feala hanatou hoko atu tanatou tauhi agatonu kia te ia. (2 Ko. 4:7) Ko te ʼu faʼahi ʼe fa ʼaeni ʼe fakaʼaogaʼi e Sehova moʼo fakamalohiʼi tatou pea mo tokoni mai ke tou nonofo agatonu kia te ia: te faikole, mo te Tohi-Tapu, mo ʼotatou tehina mo tuagaʼane, pea mo te faifakamafola.
9. ʼE tokoni feafeaʼi kia tatou te faikole?
9 ʼE tou maʼu te malohi ʼaki te faikole. Ia Efeso 6:18, ʼe fakalotomalohiʼi tatou e Paulo ke tou faikole “ ʼi te ʼu aluʼaga fuli.” Pea ʼe foaki mai anai e Sehova tona malohi. Ko totatou tehina ko Jonnie, ʼae ʼe maʼuli ʼi Amelika Saute, neʼe ina maʼu te tokoni ʼa Sehova ʼi tana tauʼi te ʼu tuʼuga fihifihia. Ko ʼona matuʼā mo tona ʼohoana neʼe natou mahahaki. Neʼe faigataʼa kia ia hana tauhi kia natou toko tolu. Neʼe mate leva tana faʼe. Kae ko tana tamai mo tona ʼohoana neʼe fualoa tanā fai mahaki. ʼE ui fenei e Jonnie: “ ʼI te temi ʼae neʼe au gaʼegaʼe ʼosi ai, neʼe au toe maʼu te malohi ʼi taku fakaha age kia Sehova te ʼu meʼa fuli ʼae ʼi toku loto.” ʼEi, neʼe foaki e Sehova kia Jonnie te malohi ke ina lava katakiʼi. Ko Ronald, ʼae ko he tagata ʼafeā ʼe toe maʼuli mo ia ʼi Amelika Saute, neʼe maʼu logo kua maʼu e tana faʼe te kosea. Hili te mahina katoa ki ai, pea neʼe mate leva tana faʼe. Kotea ʼae neʼe tokoni kia Ronald ke ina ʼutakiʼi tona mamahi? ʼE ina ui fenei: “Moka ʼe au faikole kia Sehova, ʼe au ui age te ʼu meʼa fuli ʼae ʼe au logoʼi ʼi toku loto. ʼE ko ia tokotahi pe ʼae ʼe mahino lelei ki toku aluʼaga.” ʼE moʼoni, ʼi ʼihi temi ʼe mole kei tou lava katakiʼi te ʼu mamahi, pea ʼe mole tou iloʼi pe la he ʼu meʼa ke tou ui ʼi ʼatatou faikole. Logo pe la te faʼahi ʼaia, kae ʼe fakalotomalohiʼi pe tatou e Sehova ke tou faikole.—Loma 8:26, 27.
10. ʼO mulimuli kia Hepeleo 4:12, he koʼe ʼe maʼuhiga te lau ʼo te Tohi-Tapu pea mo metitasio ki ai?
10 ʼE tou maʼu te malohi ʼaki te Tohi-Tapu. Neʼe maʼu e Paulo te malohi pea mo te fakafimalie ʼi tana lau te Tohi-Tapu. ʼE toe ʼaoga ke tou fai mo tatou te faʼahi ʼaia. (Loma 15:4) Moka tou lau te Tohi-Tapu pea mo metitasio ki ai, ʼe feala ke tokoni mai ia Sehova ʼaki tona laumalie ke tou mahino pe ʼe lava ʼaoga feafeaʼi kia tatou te Tohi-Tapu. (Lau ia Hepeleo 4:12.) ʼE ui fenei e Ronald, ʼae kua tou ʼosi palalau ki ai: “Meʼa lelei he neʼe ko taku agamahani te lau ʼo te Tohi-Tapu ʼi te ʼu afiafi fuli. ʼE lahi taku metitasio ki te ʼu kalitate ʼa Sehova, pea mo tana faʼahiga tokaga ki ʼana kaugana. ʼE au maʼu ai te malohi.”
11. Neʼe tokoni feafeaʼi te Tohi-Tapu ki he tuagaʼane neʼe mate tona ʼohoana?
11 Moka tou metitasio ki te Folafola ʼa te ʼAtua, ʼe feala ai ke tou maʼu te manatu ʼae ʼe lelei ʼo ʼuhiga mo ʼotatou fihifihia. Pea ko te faʼahi ʼaia neʼe hoko ki te tuagaʼane neʼe mate tona ʼohoana. Neʼe fakalotomalohiʼi ia ia e te tagata ʼafeā ke ina toe lau ʼi te Tohi-Tapu te tohi ʼo
Sopo, he ʼe fua lelei anai kia ia. Neʼe fai e te tuagaʼane te faʼahi ʼaia. ʼI te kamata, neʼe mole ina faʼa leleiʼia te manatu ʼa Sopo. Neʼe hage pe neʼe ina ui fenei kia Sopo: “Sopo, tuku tau manatu pe ki ʼou fihifihia.” Kae neʼe mahino age leva ki totatou tuagaʼane, neʼe tatau ʼosi tana manatu mo ʼae ʼa Sopo. Neʼe tokoni te faʼahi ʼaia ke ina fetogi tana faʼahiga manatu, pea neʼe ina maʼu ai te malohi moʼo katakiʼi tona lotomamahi.12. ʼE feafeaʼi te fakaʼaogaʼi e Sehova te ʼu tehina mo tuagaʼane moʼo ʼotatou fakamalohiʼi?
12 ʼE tou maʼu te malohi moka tou fakatahi mo te ʼu tehina mo tuagaʼane. Ko te tahi faʼahi ʼaia ʼe fakaʼaogaʼi e Sehova moʼo foaki mai te malohi. Neʼe maʼuhiga kia Paulo ʼona tehina mo tuagaʼane, he neʼe ina ui ʼe fakaʼamu ke sio kia natou, ke natou “fefakalotomalohiʼaki.” (Loma 1:11, 12) Neʼe toe manatu feia mo te tuagaʼane ko Mary, ʼae kua tou ʼosi palalau ki ai. ʼE ina ui fenei: “ ʼE fakaʼaogaʼi e Sehova te ʼu tehina mo tuagaʼane moʼo fakamalohiʼi au, logo la tanatou mole iloʼi te faigataʼa ʼae ʼe tau mo au. Neʼe natou fai mai he ʼu palalau fakalotomalohi peʼe natou momoli mai he kiʼi kate. Neʼe ko te meʼa ʼaia neʼe ʼaoga tafito kia au. Pea ko he meʼa lelei kia au haku faipalalau mo ni kiʼi tehina ʼe toe tatau tonatou aluʼaga mo au pea mo iloʼi pe ʼe natou lava tauʼi feafeaʼi te faigataʼa ʼaia. Pea ʼe fakamanatuʼi tuʼumaʼu mai pe e te ʼu tagata ʼafeā ʼe ʼofa te kokelekasio ia au.”
13. ʼE feafeaʼi hatatou fefakalotomalohiʼaki ʼi te ʼu fono?
13 Ko te ʼu fono ʼe ko he faigamalie ʼaia ke tou fefakalotomalohiʼaki. ʼE feala ai hau ui ki ʼou tehina mo tuagaʼane ʼe ke ʼofa mamahi ia natou pea mo ke fakamalo age ki te ʼu gaue ʼae ʼe natou fai. ʼE natou maʼu ai te malohi. Ohage la, ʼi muʼa ʼo te fai ʼo te fono, ko te tagata ʼafeā ko Peter neʼe ina ui fenei ki he tuagaʼane ʼae ko tona ʼohoana ʼe mole ʼi te moʼoni: “ ʼE ko he meʼa fakalotomalohi taku sio kia koe ʼi heni pea ʼe au fiafia ʼi taku toe sio ki ʼau fanau ʼe toko ono, tanatou teu lelei pea mo tanatou kua tokalelei ke fai hanatou ʼu kiʼi tali.” Neʼe malave te ʼu palalau ʼaia ki te tuagaʼane, pea neʼe tagi ʼo ui fenei: “Neʼe ko te ʼu palalau la ʼaia neʼe au fia logo ki ai ʼi te ʼaho ʼaeni.”
14. ʼE tokoni feafeaʼi ma kia tatou te faifakamafola?
14 ʼE tou maʼu te malohi ʼaki te faifakamafola. ʼE tou maʼu te malohi moka tou palalau ki ʼihi ʼo ʼuhiga mo te moʼoni, tatau aipe peʼe natou tali peʼe kailoa. (Taag. 11:25) Neʼe logoʼi te faʼahi ʼaia e te tuagaʼane ko Stacy. Neʼe ʼi ai he tahi ʼo tona famili neʼe fakamavae. Neʼe lotomamahi ʼaupito te tuagaʼane pea neʼe manatu tuʼumaʼu pe naʼa neʼe ʼi ai la he meʼa neʼe feala ke ina fai moʼo tokoni ki ai. Ke feala hana tauʼi te aluʼaga fakalotomamahi ʼaia, neʼe faifakamafola. Moka neʼe alu ia Stacy ʼo faifakamafola, neʼe manatu tafito ia ki te hahaʼi pea mo te ʼu meʼa ʼae ʼe ʼaoga kia natou. ʼE ina ui fenei: “ ʼI te temi faigataʼa ʼaia, neʼe tokoni mai ia Sehova he neʼe au fai te ako ʼa he kiʼi fafine neʼe tuputupu vave. Pea neʼe ko he fakalotomalohi ʼaia kia au. Ko te meʼa ʼae neʼe tokoni lahi kia au, neʼe ko taku alu ʼae ʼo faifakamafola.”
15. Kotea te ako ʼe tou maʼu mai te faʼifaʼitaki ʼa Mary?
15 ʼE manatu ʼihi ʼe mole honatou ʼaoga ʼi te faifakamafola. Kapau ʼe ko tau manatu ʼaia, ke ke manatuʼi ko Sehova ʼe fiafia moka ʼe ke fai ia meʼa fuli ʼe ke fealagia. Tou toe vakaʼi te faʼifaʼitaki ʼa te tuagaʼane ko Mary. Neʼe mavae ʼo alu ki he koga meʼa ke faifakamafola ai ʼi he tahi age lea. ʼI te kamata, neʼe manatu ia Mary ʼe mole hona ʼaoga. ʼE ina ui fenei: “Ko te meʼa pe ʼae neʼe feala ke au fai, neʼe ko he kiʼi tali ʼe faigafua, peʼe ko te lau ʼo he vaega Tohi-Tapu, peʼe ko te foaki ʼo he kiʼi pepa lotu.” Kia ia, neʼe mole faʼa maʼuhiga moka neʼe ina fakatatau mo natou ʼae neʼe palalau lelei te lea. Kae neʼe fetogi
leva tana faʼahiga manatu. Neʼe mahino kia ia neʼe fakaʼaogaʼi pe e Sehova ia ia, logo la tana mole palalau lelei te lea. ʼE hoko atu fenei e Mary: “ ʼE faigafua pe te ʼu moʼoni ʼae ʼi te Tohi-Tapu pea ʼe feala ke natou fetogi te maʼuli ʼo te hahaʼi.”16. Kotea ʼae ʼe feala ke fai ʼe natou ʼae ʼe mole feala ke olo ki tuʼa ʼi tonatou ʼapi, ke natou maʼu ai te malohi?
16 ʼE fiafia ia Sehova ʼi tana sio ʼae ki tatatou fia faifakamafola, logo pe la ʼe mole feala ke tou olo ki tuʼa ʼi totatou ʼapi. ʼE feala ke tokoni mai Sehova ke tou faifakamafola kia natou ʼae ʼe taupau kia tatou, peʼe ko natou ʼae ʼe ʼomai ʼo fai totatou faitoʼo. Kapau ʼe tou fakatatau te ʼu gaue ʼae ʼe tou fai ʼi te temi nei pea mo ʼae neʼe tou fai ʼi te temi muʼa, ʼe feala ke tou lotovaivai ai. Kae kapau ʼe tou manatuʼi ʼe tokoni tuʼumaʼu mai pe ia Sehova kia tatou, ʼe tou maʼu anai te malohi ke tou ʼutakiʼi te ʼu ʼahiʼahi fuli ʼi te fiafia.
17. ʼO mulimuli kia Ekelesiasi 11:6, he koʼe ʼe tonu ke hoko atu pe tatatou faifakamafola, logo la heʼeki ʼi ai hona ʼu fua?
17 Ka tou nunusi te ʼu pulapula ʼo te moʼoni, ʼe mole tou iloʼi pe ʼe ko te pulapula fea ʼae ka maʼuli pea mo liliu ko he fuʼu ʼakau. (Lau ia Ekelesiasi 11:6.) Ohage la ko te tuagaʼane ko Barbara, ʼae kua taʼu 80 tupu, ʼe faifakamafola ʼi te telefoni pea mo faitohi. ʼI tana tahi tohi neʼe ina fai, neʼe ina ʼai ki ai Te Tule Leʼo (Fakafalani) ʼo te 1 ʼaho ʼo Malesio 2014, pea neʼe ʼi ai te alatike ʼi loto ko tona kupu tafito “Te Meʼa ʼAe Neʼe Fai e Te ʼAtua Maʼa Koutou.” Neʼe mole iloʼi e Barbara, kae neʼe ina momoli te tohi ʼaia ki he taumatuʼa neʼe kua fakamavae ʼi te kokelekasio. Neʼe nā lau liuliuga te nusipepa ʼaia. Neʼe hage ki te tagata neʼe ko Sehova ʼae neʼe palalau fakahagatonu age kia ia. Ko te taumatuʼa ʼaia neʼe nā toe olo ki te ʼu fono, pea hili taʼu ʼe 27 ʼo tanā nonofo ʼi tuʼa, neʼe nā toe kau ki te kau Fakamoʼoni ʼa Sehova. Neʼe fakalotomalohiʼi ai ia Barbara ʼi tana sio ki te ʼu fua lelei ʼo tana tohi.
18. Kotea ʼae ʼe tonu ke tou fai, ke fakamalohiʼi ai tatou e te ʼAtua?
18 ʼE fakamalohiʼi tafito tatou e Sehova ʼaki te faikole, mo te Tohi-Tapu, mo te ʼu tehina mo tuagaʼane pea mo te faifakamafola. Tou fakaʼaogaʼi te ʼu faʼahi ʼaia. ʼE tou fakaha ai ʼe tou falala ʼe feala hana tokoni mai pea ʼe loto ki ai. Koia, tou falanaki tuʼumaʼu ki tatatou Tamai ʼae ʼi selo, ʼae ʼe fiafia ʼi te “tokoni kia natou ae e tuku katoa onatou loto kia ia.”—2 Klk. 16:9.
KATIKO 61 Haʼele Ki Muʼa, Kau Fakamoʼoni
^ pal. 5 ʼE tou maʼuʼuli ʼi te ʼu temi faigataʼa, kae ʼe foaki mai e Sehova te tokoni ʼae ʼe ʼaoga kia tatou. ʼI te alatike ʼaeni, ʼe tou vakaʼi pe neʼe tokoni feafeaʼi ia Sehova kia Paulo mo Timoteo ke hoko atu tanā tauhi ʼae kia te ia logo la ʼonā fihifihia. ʼE tou toe vakaʼi anai faʼahi ʼe fa ʼe fakaʼaogaʼi e Sehova ia ʼaho nei, moʼo fakamalohiʼi tatou ke tou tauhi agatonu kia te ia.
^ pal. 2 Neʼe fetogi te higoa.
^ pal. 53 FAKAMATALA ʼO TE ʼU PĀKI: Logo la te nofo pilisoni ʼa Paulo ʼi he ʼapi ʼi Loma, kae ʼe ina fai ai he ʼu tohi ki te ʼu kokelekasio pea mo faifakamafola kia natou ʼae ʼe ʼomai ʼo fakasiosio ia ia.
^ pal. 55 FAKAMATALA ʼO TE ʼU PĀKI: ʼE fakalotomalohi e Timoteo te ʼu tehina ʼo te ʼu kokelekasio ʼae ʼe ina ʼaʼahi.