1-2. Kotea ʼae neʼe ui e tagata faitohi, pea kotea ʼae ka tou vakaʼi ʼi te alatike ʼaeni?

IA ʼAHO nei, ko te toko lauʼi miliona hahaʼi ʼe natou ui ʼe natou tui kia Sesu, kae ʼe mole natou mulimuli ki ʼana akonaki. (2 Tim. 4:3, 4) Neʼe ui fenei e te tagata faitohi: “Kapau la neʼe ʼi ai he tahi Sesu ʼi te temi nei, ʼe ina fai he ʼu palalau ohage pe ko te Sesu ʼo te temi muʼa, ʼe tou liʼaki anai koa ia ia, ohage ko tona fai e te hahaʼi kua hili ki ai taʼu ʼe lua afe? . . . ʼE tali fenei te tokolahi: ʼEi, ʼe tou liʼaki anai ia ia.”

² ʼI te temi ʼae neʼe maʼuli ai Sesu ʼi te kele, neʼe lahi te hahaʼi neʼe natou logo ki ʼana akonaki pea mo sisio ki ʼana milakulo. Kae neʼe mole tui natou kia te ia. Kotea tona tupuʼaga? ʼI te alatike ʼaeni kua ʼosi atu, neʼe tou vakaʼi ai fahaʼi ʼe fa neʼe tupu ai te tukia ʼa te hahaʼi ʼi te ʼu palalau pea mo te ʼu meʼa ʼae neʼe fai e Sesu. Tou vakaʼi leva te tahi ʼu fahaʼi ʼe fa. ʼE tou vakaʼi anai pe ʼe koʼe ʼe mole tui te tokolahi ki te ʼu tisipulo ʼa Sesu ʼi te temi nei, pea kotea ʼae ʼe tonu ke tou fai ke mole tou tukia ai.

3. Kotea ʼae neʼe fai e Sesu ʼo tupu ai te tukia ʼa ʼihi?

³ ʼI tana ʼi te kele, neʼe fakatahi ia Sesu mo te ʼu hahaʼi kehekehe. Ohage la, neʼe kai fakatahi mo he ʼu hahaʼi maʼu koloa, pea mo maʼu tuʼulaga, pea neʼe toe fakatahi mo he ʼu hahaʼi masisiva pea mo fakaʼofaʼofa. Pea tahi, neʼe manavaʼofa ki te hahaʼi ʼae neʼe ui ko he “kau agahala.” Pea ko natou ʼae neʼe fia meʼa lahi neʼe natou tukia ʼi te ʼu meʼa ʼaia neʼe fai e Sesu. Neʼe natou ui fenei ki ʼana tisipulo: “He koʼe ʼe kotou kakai mo iinu fakatahi mo te kau tanaki tukuhau pea mo te kau agahala?” pea neʼe  tali fenei age e Sesu: “ ʼE mole ko te hahaʼi malolohi ʼae ʼe ʼaoga ki ai he toketa, kaʼe ko natou ʼae ʼe mahahaki. Neʼe mole au haʼu ʼo pauʼi te kau faitotonu, kaʼe ko te kau agahala ke natou fakahemala.”—Luka 5:29-32.

4. ʼO mulimuli ki te meʼa ʼae neʼe fakakikite e te polofeta ko Esaia, kotea ʼae neʼe tonu ke iloʼi e te kau Sutea ʼo ʼuhiga mo te Mesia?

⁴ Kotea ʼae ʼe ui ʼi te Tohi-Tapu? ʼI muʼa ʼo te haʼu ʼo te Mesia, neʼe kua fakakikite e te polofeta ko Esaia ʼe mole tali lelei anai ia te Mesia e te hahaʼi. Neʼe ina ui fenei: “[Neʼe] fehiainai mo siakina e te u tagata . . . tatau mo ia ae e mafuli kehe i ai te u mata. Nee tou nukinuki kia ia, nee mole pe tou tokaga kia ia.” (Esa. 53:3) Neʼe tonu ke liʼakina ia te Mesia e te hahaʼi. Koia ʼae neʼe tonu ai ke iloʼi e te kau Sutea ʼo te temi ʼaia ʼe fehiʼaʼinaʼi anai ia Sesu.

5. Kotea te manatu ʼa te tokolahi ʼi te temi nei ʼo ʼuhiga mo te ʼu tisipulo ʼa Sesu?

⁵ ʼE toe feia koa te aga ʼa te hahaʼi kia tatou ʼi te temi nei? ʼEi. ʼE lahi te kau takitaki lotu ʼe natou fiafia moka kau ʼi tanatou hahaʼi, ni hahaʼi ʼe maʼuhiga mo maʼu koloa peʼe ko natou ʼae ʼe ui e te malama ʼe natou popoto. ʼE natou tali te ʼu hahaʼi ʼaia tatau aipe pe ʼe natou fai he ʼu meʼa ʼe fehiʼa ki ai te ʼAtua. Kae ko te kau takitaki lotu pe ʼaia, ʼe natou meʼa noaʼi te ʼu kaugana faʼafai mo maʼa ʼa Sehova, he ʼe mole ko ni hahaʼi ʼe maʼuhiga ia mata ʼo te malama. Ohage ko tona ui e Paulo, neʼe filifili e te ʼAtua ia natou “ ʼae ʼe fehiʼaʼinaʼi.” (1 Ko. 1:26-29) Kae kia Sehova ia, ko ʼana kaugana agatonu fuli ʼe natou maʼuhiga.

6. ʼE feafeaʼi hatatou faʼifaʼitakiʼi ia Sesu ʼo mulimuli kia Mateo 11:25, 26?

⁶ Kotea ʼae ʼe tonu ke tou fai ke mole tou tukia ai? (Lau ia Mateo 11:25, 26.) Tou tekeʼi te manatu ʼa te malama ʼo ʼuhiga mo te hahaʼi ʼa te ʼAtua. Tou mahino ʼe fakaʼaogaʼi pe e Sehova he ʼu hahaʼi agavaivai moʼo fai tona finegalo. (Pes. 138:6) Pea tou fakakaukauʼi age muʼa te ʼu gaue ʼae neʼe lava fakahoko e Sehova ʼi tana fakaʼaogaʼi he ʼu hahaʼi ʼe mole popoto ia mata ʼo te malama.

7. He koʼe neʼe ui e Sesu ʼe malualoi te kau Faliseo? Pea kotea ʼae neʼe natou fai?

⁷ ʼAki he lototoʼa neʼe fakaha e Sesu te malualoi ʼa te kau takitaki lotu ʼo tona temi. Ohage la, neʼe ina ui neʼe maʼuhiga age ki te kau Faliseo te fanofano ʼo ʼonatou nima ʼi te fakaʼapaʼapa ki te ʼu matuʼā. (Mat. 15:1-11) Neʼe lagi punamaʼuli te ʼu tisipulo ʼa Sesu ki ʼana palalau. Neʼe natou fehuʼi fenei age: “ ʼE ke iloʼi koa neʼe tukia te kau Faliseo ʼi tanatou logo ki ʼau palalau?” Kae neʼe tali fenei age e Sesu: “Ko te ʼakau fuli ʼae neʼe mole to e taku Tamai ʼae ʼe ʼi selo, ʼe taʼaki anai. Kotou tukunoaʼi natou. Ko natou ʼe ko he kau takitaki kivi. Pea kapau ʼe takitaki e he kivi he tahi age kivi pea ʼe nā fetoki anai ki he luo.” (Mat. 15:12-14) Logo la te iita ʼa te kau takitaki lotu, kae neʼe tala pe e Sesu ia te moʼoni.

8. Neʼe fakaha feafeaʼi e Sesu ʼe mole tali e te ʼAtua te ʼu akonaki fakalotu fuli?

⁸ Neʼe toe tala e Sesu ko ʼihi akonaki fakalotu neʼe hala. Neʼe mole ina ui ʼe tali e te ʼAtua te ʼu akonaki fakalotu fuli. Kae neʼe ina fakamahino ʼe tokolahi ia natou ʼae ʼe olo ʼi te ala laulahi ʼae ʼe ina taki ki te fakaʼauha. Pea ʼe tokosiʼi ia natou ʼae ʼe olo ʼi te ala ʼae ʼe lauveliveli, ʼae ʼe ina taki ki te maʼuli. (Mat. 7:13, 14) Neʼe ina toe fakaha fakaleleiʼi ko ʼihi ʼe natou ui ʼe natou tauhi ki te ʼAtua kae ʼe mole ko ia ia. Koia, neʼe ina fai ai te fakatokaga ʼaeni: “Kotou tokakaga ki te kau polofeta loi. Koteʼuhi ʼi tanatou olo atu kia koutou, ki tuʼa ʼe natou hage ko ni ovi, kaʼe ki loto ʼe natou hage ko ni lupo fekai. ʼE kotou iloʼi anai natou ʼi ʼanatou gaue.”—Mat. 7:15-20.

9. Kotea te ʼu akonaki fakalotu neʼe fakaha e Sesu neʼe hala?

 ⁹ Kotea ʼae ʼe ui ʼi te Tohi-Tapu? Neʼe fakakikite e te lea fakapolofeta ʼe faʼafai anai ia te Mesia ki te ʼapi ʼo Sehova. (Pes. 69:10; Soa. 2:14-17) Neʼe faʼafai ia Sesu, koia ʼae neʼe ina tala ai te ʼu hala ʼa te ʼu akonaki fakalotu. Ohage la, neʼe tui te kau Faliseo ka mate he tahi ʼe ʼi ai tona laumalie ʼe hoko atu tona maʼuli. Kae neʼe akoʼi ia e Sesu ko te kau mamate ʼe natou momoe, ʼe mole kei natou maʼuʼuli. (Soa. 11:11) Neʼe mole tui te kau Satuseo ki te fakatuʼuake, kae neʼe fakatuʼuake e Sesu tona kaumeʼa ko Lasalo. (Soa. 11:43, 44; Gaue 23:8) Neʼe ui e te kau Faliseo ko meʼa fuli ʼe hoko kia tatou ʼe kua hinoʼi ia mai lagi. Kae neʼe akoʼi ia e Sesu, ʼe feala pe ki he tahi ke ina filifili pe ʼe tauhi anai ki te ʼAtua, peʼe kailoa.—Mat. 11:28.

10. He koʼe ko te tokolahi ʼe natou fakafisi moka tou fakaha age te ʼu moʼoni ʼo te Tohi-tapu?

¹⁰ ʼE toe feia koa te aga ʼa te hahaʼi kia tatou ʼi te temi nei? ʼEi. Tokolahi ʼe natou fakafisi kia tatou ʼuhi ʼae ʼe tou fakaʼaogaʼi te Tohi-Tapu moʼo fakaha kia natou ko ʼihi akonaki fakalotu ʼe natou tui ki ai ʼe mole moʼoni. ʼE akoʼi e te kau takitaki lotu ʼe haga tauteaʼi e te ʼAtua te kau agakovi ʼi he ʼifeli. ʼE natou fakaʼaogaʼi te akonaki loi ʼaia ke fai e te hahaʼi te ʼu meʼa fuli ʼae ʼe loto ki ai te kau takitaki lotu. Kae ko tatou, te ʼu kaugana ʼa Sehova ʼae ʼe tou atolasio ki he ʼAtua ʼofa, ʼe tou fakaha ko te akonaki ʼaia ʼe hala. ʼE toe akoʼi e te kau takitaki lotu, moka mate he tahi, ʼe ʼi ai pe hona laumalie ʼe hoko atu pe tona maʼuli. Kae ʼe tou akoʼi tatou ko te akonaki ʼaia ʼe ko he akonaki fakapagani. Kapau foki la ʼe moʼoni, pea ʼe mole kei he ʼaoga ʼo te fakatuʼuake kia tatou. Pea ʼe lahi te ʼu lotu ʼe natou akoʼi, ko te ʼu meʼa fuli ʼae ʼe tou fai neʼe kua ʼosi tohi ia e te ʼAtua. Kae ʼe tou akoʼi tatou ʼe tahi fakalogo pe te tagata tona filifili pe ʼe tauhi ki te ʼAtua peʼe kailoa. ʼE feafeaʼi te kau takitaki lotu moka tou fakaha age ʼe hala tanatou akonaki? ʼE natou iita.

11. Kotea ʼae ʼe loto e te ʼAtua ke fai e ʼana kaugana, ʼo mulimuli ki te ʼu palalau ʼa Sesu ʼae ia Soane 8:45-47?

¹¹ Kotea ʼae ʼe tonu ke tou fai ke mole tou tukia ai? Kapau ʼe tou ʼoʼofa ki te moʼoni, ʼe tou tui pea mo fakalogo anai ki te ʼu folafola ʼa te ʼAtua.  (Lau ia Soane 8:45-47.) ʼE tou haga nonofo ʼi te moʼoni, ʼo mole hage ko Satana te Tevolo. ʼE mole tou fai anai he meʼa ʼe fakafeagai anai ki te ʼu meʼa ʼae ʼe tou tui ki ai. (Soa. 8:44) ʼE loto e te ʼAtua ke tou “fakalialia ki te meʼa ʼe kovi” pea ke tou “pipiki ki te meʼa ʼae ʼe lelei,” ohage ko tona fai e Sesu.—Loma 12:9; Hep. 1:9.

12. He koʼe neʼe lahi te kau Sutea neʼe natou tukia ʼi te mate ʼa Sesu ʼi te pou?

¹² Kotea te tahi tupuʼaga ʼo te liʼaki e te kau Sutea ia Sesu ʼi tona temi? Neʼe ui fenei e Paulo: “ ʼE tou fakamafola ia Kilisito ʼae neʼe tutuki ki te pou, pea ʼe tukia ai te kau Sutea.” (1 Ko. 1:23) He koʼe neʼe lahi te kau Sutea neʼe natou tukia ʼi te mate ʼa Sesu ʼi te pou? He ʼe kia natou neʼe mate Sesu ohage ko he tagata agakovi, pea mo agahala. Ko te tupuʼaga la ʼaia ʼo tanatou mole tui ko Sesu neʼe ko te Mesia.—Tet. 21:22, 23.

13. Kotea ʼae neʼe tui ki ai e natou ʼae neʼe tukia ʼuhi ko Sesu?

¹³ Ko ʼihi kau Sutea neʼe natou tukia, he neʼe natou tui neʼe fai e Sesu he aga ʼe kovi. Pea neʼe natou tui ki te ʼu tukugakoviʼi hala ʼae neʼe fai kia Sesu. Ko te fakamauʼi ʼa Sesu, neʼe mole mulimuli ki te ʼu lao ʼo ʼuhiga mo te faifakamau. Ohage la ko te kau tuʼi fakamau ʼo te Sanetualio neʼe natou fakatahitahi fakavilivili ʼo fakamauʼi ia Sesu. (Luka 22:54; Soa. 18:24) Ko te kau tuʼi fakamau ʼaia neʼe mole faitotonu ʼi tanatou fakalogo ʼae ki te ʼu tukugakovi ʼae neʼe fai kia Sesu. Neʼe natou faiga ia ke natou kumi “he ʼu fakamoʼoni loi ʼo ʼuhiga mo Sesu ke feala ai hona matehi.” ʼI te mole lava ʼo te fai te faʼahi ʼaia, neʼe faiga ia e te pelepitelo lahi ke fai e Sesu he ʼu palalau hala, ke feala ai hanatou tukugakoviʼi ia ia. (Mat. 26:59; Mko. 14:55-64) Pea hili te fakatuʼuake ʼo Sesu, ko te ʼu tuʼi fakamau heʼe faitotonu ʼaia, neʼe natou foaki “te ʼu tuʼuga piesi siliva” ki te kau solia Loma ʼae neʼe leʼo te fale maka, ke natou fakamafola ni loi pe ʼe koʼe neʼe tuʼu lavaki te fale maka.—Mat. 28:11-15.

14. Kotea neʼe fakakikite e te Tohi-Tapu ʼo ʼuhiga mo te mate ʼo te Mesia?

¹⁴ Kotea ʼae ʼe ui ʼi te Tohi-Tapu? Neʼe tokolahi te kau Sutea ʼi te temi ʼo Sesu neʼe natou  manatu neʼe mole tonu ke mate te Mesia. Kae tou tokagaʼi te lea fakapolofeta ʼaeni: “Nee ina tuku ia ia totonu ki te mate, pea nee lau ia ia i te kau fakapo, koteuhi nee ina amo te u agahala o te toko lahi, pea nee ina hufaki te kau agahala.” (Esa. 53:12) Koia neʼe mole tonu ai ke tukia ia te kau Sutea ʼi te mate ʼo Sesu ohage ko he tagata agahala.

15. Kotea te ʼu tukugakovi neʼe fai ki te kau Fakamoʼoni ʼa Sehova neʼe tukia ai ʼihi?

¹⁵ ʼE toe feia koa te aga ʼa te hahaʼi kia tatou ʼi te temi nei? ʼEi. Ohage ko Sesu, ko te kau Fakamoʼoni ʼa Sehova neʼe tukugakoviʼi pea mo tauteaʼi natou, kae neʼe mole natou fai he meʼa ʼe kovi. ʼI Amelika, lolotoga te ʼu taʼu 1930 mo 1940, neʼe tokolahi ʼi te kau Fakamoʼoni ʼa Sehova neʼe fakamauʼi natou ʼuhi pe ko tanatou tauhi ʼae ki te ʼAtua. Neʼe ha lelei pe ʼi ʼihi tuʼi fakamau tanatou mole ʼoʼofa ia tatou. ʼI te kolo ko Québec, ʼi Kanata, ko te lotu Katolika mo te puleʼaga neʼe natou gaue fakatahi ʼo fakafeagai mai kia tatou. Tokolahi te kau faifakamafola neʼe pilisoniʼi natou ʼuhi pe ko tanatou palalau ʼo ʼuhiga mo te Puleʼaga ʼo te ʼAtua. ʼI Siamani, ko te kau Nasi neʼe natou matehi te ʼu tehina tupulaga agatonu. Pea ʼi te ʼu taʼu pe ʼaeni, tokolahi te ʼu tehina mo tuagaʼane ʼi Lusia neʼe fakatuʼā mo pilisoniʼi ʼuhi pe he neʼe natou palalau ki te Tohi-Tapu. Pea ʼe ui e te puleʼaga ko te gaue ʼae ʼe natou fai ʼe ko hanatou agatuʼu. Maʼia pe la mo te Tohi-Tapu. Fakaliliu ʼo Te Malama Foʼou ʼi te lea Fakalusia neʼe tapuʼi, pea neʼe ui ko he “tohi agatuʼu,” he ʼe tuʼu ai te huafa ʼo Sehova.

16. He koʼe ʼe mole tou tui anai ki te ʼu loi ʼae ʼe fai ki te ʼu kaugana ʼa Sehova, ʼo mulimuli kia 1 Soane 4:1?

¹⁶ Kotea ʼae ʼe tonu ke tou fai ke mole tou tukia ai? ʼE tonu ke tou iloʼi te moʼoni. ʼI tana Akonaki ʼi te Moʼuga neʼe fakatokaga e Sesu ki ʼana tisipulo ʼe ʼi ai anai ʼihi ʼe natou “loi mo palalau kovi” ʼo ʼuhiga mo natou. (Mat. 5:11) Ko te ʼu loi ʼaia ʼe haʼu mai ia Satana. ʼE ina fakaneke tana hahaʼi ke natou fakamafola ni loi ʼo ʼuhiga mo natou ʼae ʼe ʼoʼofa ki te moʼoni. (Fkha. 12:9, 10) ʼE mole tonu ke tou tui ki te ʼu loi ʼo ʼotatou fili. Pea ʼe mole tonu ke tou tuku te ʼu loi ʼaia ke natou fakamatakuʼi tatou, peʼe ke fakavaivaiʼi ai tatatou tui.—Lau ia 1 Soane 4:1.

17. Kotea la he ʼu aluʼaga neʼe hoko ʼi muʼa ʼo te mate ʼa Sesu neʼe feala ai ke tukia ai ʼihi?

¹⁷ ʼI muʼa pe ʼo tana mate, neʼe lavakiʼi ia Sesu e he tahi ʼo ʼana apositolo ʼe toko 12. Ko te tahi apositolo neʼe fakafisi tuʼa tolu ʼe mole ina iloʼi ia ia. Pea neʼe liʼaki ia ia e ʼana apositolo fuli ʼi muʼa pe ʼo tana mate. (Mat. 26:14-16, 47, 56, 75) Pea neʼe mole punamaʼuli ia Sesu ki te faʼahi ʼaia. Neʼe kua ina fakaha ʼe hoko anai te ʼu aluʼaga ʼaia. (Soa. 6:64; 13:21, 26, 38; 16:32) ʼI tanatou sisio ki te faʼahi ʼaia neʼe feala pe ke tukia ʼihi, ʼo natou ui fenei: “Kapau la ko tona ʼae aluʼaga, ʼe mole au fia kau au mo natou.”

18. Ko te ʼu lea fakapolofeta fea neʼe hoko ʼi muʼa ʼo te mate ʼo Sesu?

¹⁸ Kotea ʼae ʼe ui ʼi te Tohi-Tapu? ʼI ni taʼu ʼi muʼa ʼo te haʼu ʼa Sesu ki te kele, neʼe fakaha e Sehova ʼi tana Folafola ʼe lavakiʼi anai te Mesia ʼaki he ʼu foʼi piesi siliva ʼe 30. (Sakl. 11:12, 13) Ko ia ʼae ka ina lavakiʼi anai ia Sesu ʼe ko he tahi ʼe kaumeʼa lelei mo ia. (Pes. 41:10) Pea neʼe toe tohi fenei e te polofeta ko Sakalia: “Taai te tagata tauhi manu, pea ke mavete te u ovi!” (Sakl. 13:7) Ko natou ʼae neʼe fakamalotoloto neʼe mole tonu ke natou tukia ʼi te ʼu aluʼaga ʼaia. Neʼe tonu ia ke toe malohi age tanatou tui ʼi tanatou sisio ki te hoko moʼoni ʼo te ʼu lea fakapolofeta ʼaia ʼo ʼuhiga mo Sesu.

19. Kotea ʼae ʼe iloʼi e natou ʼae ʼe fakamalotoloto?

¹⁹ ʼE toe feia koa te aga ʼa te hahaʼi kia tatou ʼi te temi nei? ʼEi. Ia ʼaho nei ko ʼihi Fakamoʼoni  ʼa Sehova kua mavae ʼi te moʼoni ʼo natou liliu ko he ʼu aposita. Pea ʼe natou faiga ke fakamavae ʼihi ʼi te kokelekasio. Neʼe natou fakamafola ni loi ʼo ʼuhiga mo te kau Fakamoʼoni ʼa Sehova ʼaki te sulunale, mo te latio, mo te televisio, pea mo te Neti. Kae ko natou ʼae ʼe fakamalotoloto ʼe mole natou tui anai ki te ʼu loi ʼaia. ʼE natou iloʼi neʼe kua fakakikite e te Tohi-Tapu te ʼu aluʼaga ʼaia.—Mat. 24:24; 2 Pet. 2:18-22.

20. ʼE feafeaʼi hatatou mole tukia ʼuhi ko natou ʼae kua mavae ʼi te moʼoni? (2 Timoteo 4:4, 5)

²⁰ Kotea ʼae ʼe tonu ke tou fai ke mole tou tukia ai? ʼE tonu ke tou taupau tatatou tui ke malohi ʼo tou ako te Tohi-Tapu tuʼumaʼu, mo faikole tuʼumaʼu pea mo tokakaga ki te gaue ʼae neʼe tuku mai e Sehova ke tou fai. (Lau ia 2 Timoteo 4:4, 5.) Kapau ʼe malohi tatatou tui, ʼe mole tou ‘matataku’ anai moka ʼe tou logo ki ni fakamatala kovi ʼe fai ʼo ʼuhiga mo tatou. (Esa. 28:16, NWT) Ko tatatou ʼofa ʼae kia Sehova, mo tana Folafola, pea mo ʼotatou tehina mo tuagaʼane ʼe tokoni mai anai ke mole tou tukia ʼuhi ko natou ʼae kua mavae ʼi te moʼoni.

21. Logo la te mole tali ʼa te tokolahi ki tatatou logo ia ʼaho nei, kotea ʼe feala ke tou tui papau ki ai?

²¹ ʼI temi ʼo Sesu, tokolahi neʼe mole tui kia te ia. Kae neʼe toe tokolahi pe ia natou ʼae neʼe mulimuli ia te ia. Pea ia natou ʼaia, neʼe ʼi ai te ʼu tagata neʼe kau ki te Sanetualio Sutea, ʼo toe feia mo he kau pelepitelo ʼe tokolahi. (Gaue 6:7; Mat. 27:57-60; Mko. 15:43) Pea ʼe toe feia ia ʼaho nei, ko te toko miliona hahaʼi ʼe natou mulimuli ia Sesu. Kotea tona tupuʼaga? Koteʼuhi ʼe natou iloʼi pea mo ʼoʼofa ki te ʼu moʼoni ʼae neʼe natou ako ʼi te Tohi-Tapu. ʼE ui fenei e te Folafola ʼa te ʼAtua: “E lahi aupito te tokalelei kia natou ae e oofa ki tau lao, pea e mole [“natou tukia anai,” NWT].”—Pes. 119:165.