ALATIKE AKO 20
Tou Hoko Atu Tatatou Faifakamafola, Kae ʼAua Naʼa Tou Lotovaivai
“Nunusi tau pulapula . . . pea aua naa tuku ke malolo tou nima.”—EKL. 11:6.
KATIKO 70 Kotou Kumi Ia Natou ʼAe ʼe Tuha Mo Te Maʼuli
TE ʼU MANATU FAKANOUNOU *
ʼI te ʼosi hake ʼa Sesu ki selo, neʼe faifakamafola lahi ʼana tisipulo ʼi Selusalemi pea mo ʼihi atu kolo (Vakaʼi te palakalafe 1)
1. Kotea te faʼifaʼitaki lelei neʼe tuku e Sesu ki ʼana tisipulo, pea kotea ʼae neʼe natou fai? (Vakaʼi te pāki ʼo te takafi.)
ʼI TE maʼuli ʼa Sesu ʼi te kele, neʼe hoko atu pe tana faifakamafola mo te fakaʼamu ʼae ʼe fia logo anai te hahaʼi kia te ia. Pea neʼe ina loto ke toe feia pe mo ʼana tisipulo. (Soa. 4:35, 36) ʼI tana kei nofo ʼae mo natou, neʼe natou faifakamafola lahi. (Luka 10:1, 5-11, 17) Kae ʼi te puke ʼa Sesu pea mo matehi, neʼe mole kei natou fia faifakamafola ai. (Soa. 16:32) Koia, ʼi te kua ʼosi fakatuʼuake ʼa Sesu, neʼe ina fakalotomalohiʼi ia natou ke natou tokakaga tafito ki te faifakamafola. Pea ʼi te kua hake leva ʼa Sesu ki selo, neʼe faifakamafola lahi ʼana tisipulo, ʼo ui fenei ai e ʼonatou fili: “Koʼeni kua mafola ʼi Selusalemi katoa takotou akonaki.”—Gaue 5:28.
2. Neʼe tapuakiʼi feafeaʼi e Sehova te gaue faifakamafola?
2 Neʼe takitaki e Sesu te faifakamafola ʼa te ʼu ʼuluaki Kilisitiano ʼaia, pea neʼe tapuakiʼi natou e Sehova. Tokolahi neʼe natou tali te logo ʼae neʼe natou fakamafola. Ohage la, ʼi te Penikosite ʼo te taʼu 33 H.T.S. * neʼe ko te teitei toko 3 000 hahaʼi neʼe papitema. (Gaue 2:41) Pea neʼe haga tuputupu ʼo kauga malie te ʼu tisipulo. (Gaue 6:7) Pea neʼe fakakikite e Sesu, ʼi te ʼu ʼaho fakaʼosi, ʼe tokolahi age anai te hahaʼi ka natou tali te logo lelei.—Soa. 14:12; Gaue 1:8.
3-4. He koʼe ʼe feala ke faigataʼa ki ʼihi te faifakamafola, pea kotea ʼae ka tou vakaʼi anai ʼi te alatike ʼaeni?
3 ʼE tou faiga fuli ke hoko atu tatatou faifakamafola mo te
fakaʼamu ʼae ʼe fakalogo anai te hahaʼi ki te logo lelei. ʼI ʼihi fenua, ʼe faigafua. Kotea tona tupuʼaga? Koteʼuhi tokolahi ʼe natou fia fai ki hanatou ako Tohi-Tapu, pea ʼe tonu ke talitali ʼihi ke alu age he tehina peʼe ko he tuagaʼane ʼo fai tanatou ako. Kae ʼi ʼihi atu fenua, ʼe faigataʼa age ki te kau faifakamafola, koteʼuhi ʼe tahitahiga tanatou maʼu atu te hahaʼi ʼi ʼonatou ʼapi. Pea ka natou maʼu he tahi, ʼe mole fia palalau ki te Tohi-Tapu.4 Kapau ʼe tou maʼuʼuli ʼi he fenua ʼe faigataʼa ai te faifakamafola, ʼe ʼaoga mai anai te ʼu tokoni ʼae ʼe tuku mai ʼi te alatike ʼaeni. ʼE tou vakaʼi anai pe ʼe kotea ʼae ʼe fai e ʼihi ke natou maʼu te hahaʼi ʼi tanatou faifakamafola. Pea ʼe tou toe vakaʼi anai pe ʼe koʼe ʼe tonu ke hoko atu tatatou faifakamafola, pe ʼe tali e te hahaʼi te logo peʼe kailoa.
TOU HOKO ATU TE FAIFAKAMAFOLA LOGO LA TE FAIGATAʼA ʼO TE MAʼU ʼO TE HAHAʼI
5. Kotea he ʼu faigataʼaʼia ʼe tauʼi e ʼihi kau faifakamafola?
5 Kua faigataʼa ki te kau Fakamoʼoni e tokolahi hanatou maʼu te hahaʼi ʼi ʼonatou ʼapi. Ohage la, ʼi ʼihi koga meʼa, ʼe mole feala ki te kau faifakamafola hanatou feulufi ki te ʼu fale fata, peʼe mole fakagafua age e he tagata leʼo. Pea ko ʼihi ʼe feala pe tanatou faifakamafola ʼi te ʼu ʼapi, kae ʼe mole hahaʼi natou ʼae ʼe natou maʼu. Pea ko ʼihi leva kau faifakamafola ʼe natou olo ki he ʼu koga meʼa mamaʼo, kae ʼe mole hahaʼi natou ʼe nonofo ai. Pea ʼe lagi ko he foʼi tokotahi pe ʼae ʼe natou fia maʼu, kae lagi ʼe mole io ia. Kapau ʼe tou felaveʼi mo te ʼu faigataʼaʼia ʼaia ʼi totatou telituale, ʼe mole tonu ke tou tuku tatatou gaue faifakamafola. Kotea la he ʼu puleʼaki moʼo tauʼi te ʼu faigataʼaʼia ʼaia, pea ke feala ai hatatou palalau mo he tokolahi?
6. Kotea ʼae ʼe tatau ai te kau faifakamafola pea mo te kau gelu?
6 Neʼe fakatatau e Sesu te gaue faifakamafola ki te gaue ʼa he kau gelu. (Mko 1:17) Ko ʼihi ʼe feala ke natou gelu lolotoga ni ʼaho, pea ʼe mole maʼu hanatou ika. ʼE mole natou tuku, kae ʼe natou fai he ʼu fetogi. ʼE natou fetogi te hola ʼae ʼe natou olo ai ʼo gelu, peʼe ko te koga meʼa, peʼe ko te faʼahiga fai ʼo te gelu. Pea ʼe feala ke tou toe fai feia ʼi tatatou faifakamafola. Tou vakaʼi he ʼu tokoni ʼe feala ke tou mulimuli ki ai.
Ka tou faifakamafola ʼi he koga meʼa ʼe faigataʼa ai te maʼu ʼa te hahaʼi ki ʼonatou ʼapi, tou faiga ke tou fetofetogi te temi ʼae ʼe tou faifakamafola ai, mo te koga meʼa pea mo tatatou faʼahiga fai (Vakaʼi te palakalafe 7-10) *
7. Kotea ʼae ʼe feala ke hoko moka ʼe tou fetofetogi te temi ʼae ʼe tou faifakamafola ai?
7 Tou fetofetogi te temi ʼae ʼe tou faifakamafola ai. ʼE lahi anai te ʼu hahaʼi ka tou maʼu moka ʼe tou faifakamafola ʼi te ʼu temi ʼae ʼe natou nonofo ai ʼi ʼonatou ʼapi. ʼE mole natou tataka anai ʼi tuʼa ʼi te foʼi ʼaho katoa! Tokolahi te ʼu tehina mo tuagaʼane ʼe natou leleiʼia age te faifakamafola ʼi te hili hoʼata peʼe ko te afiafi, he ʼe natou maʼu ai ni hahaʼi. Pea ʼi te ʼu temi ʼaia, ko te hahaʼi ʼe natou fia palalau. Peʼe feala ke tou faʼifaʼitakiʼi te meʼa ʼae ʼe fai e te tagata ʼafeā ko David. ʼE ina ui, ka ʼosi he hola ʼe tahi peʼe lua ʼo tana faifakamafola mo he tahi tehina, ʼe nā toe liliu ʼo fai te ʼu ʼapi ʼae neʼe mole nā maʼu. ʼE ui fenei e David: “ ʼE au punamaʼuli he ʼe ma maʼu atu te hahaʼi ʼo te ʼu ʼapi ʼaia.” *
Ka tou faifakamafola ʼi he koga meʼa ʼe faigataʼa ai te maʼu ʼa te hahaʼi ki ʼonatou ʼapi, tou faiga ke tou fetofetogi te temi ʼae ʼe tou faifakamafola ai (Vakaʼi te palakalafe 7-8)
8. Kotea te ako ʼe tou lava taʼofi mai ia Ekelesiasi 11:6 ʼo ʼuhiga mo te faifakamafola?
8 ʼE mole tonu ke tou tuku tatatou faifakamafola. Ko te ako ʼaia ʼe tou taʼofi mai te vaega ʼae ʼe fakatafito ki ai tatatou alatike. (Lau ia Ekelesiasi 11:6.) Pea ko te meʼa pe ʼaia neʼe fai e te tehina ko David, ʼae kua tou ʼosi palalau ki ai. Neʼe liuliuga tana alu ʼo fai te ʼapi neʼe lavaki, pea ki muli age, neʼe ina maʼu leva te tagata ʼo te ʼapi ʼaia. Neʼe fia palalau te tagata ʼaia ki te Tohi-Tapu, pea neʼe ina ui fenei: “Kua taʼu valu taku maʼuli ʼi heni, pea neʼe heʼeki au faipalalau mo he Fakamoʼoni ʼa Sehova ʼi toku ʼapi.” ʼE ui fenei e David: “Ka tou maʼu te hahaʼi ʼo te ʼu ʼapi ʼae neʼe lavaki, ʼe au tokagaʼi ʼe natou fia logo ki te logo ʼae ʼe tou fakamafola.”
Ka tou faifakamafola ʼi he koga meʼa ʼe faigataʼa ai te maʼu ʼa te hahaʼi ki ʼonatou ʼapi, tou faiga ke tou fetofetogi te temi ʼae ʼe tou faifakamafola ai (Vakaʼi te palakalafe 9)
9. Kotea ʼae neʼe fai e ʼihi kau Fakamoʼoni ʼa Sehova ke natou maʼu ai te hahaʼi?
9 Tou fetofetogi te koga meʼa ʼae ʼe tou faifakamafola ai. Ko ʼihi kau faifakamafola ʼe natou fetofetogi te koga meʼa ʼae ʼe natou faifakamafola ai ke feala hanatou felaveʼi mo te hahaʼi. Ohage la, ʼe natou faifagonogono ʼi te ala peʼe natou fai laupapa. ʼE feala ai ke natou faipalalau mo te hahaʼi ʼae ʼe nonofo ʼi te ʼu fale fata ʼe tapuʼi ai tatatou gaue. Pea ʼe tokagaʼi e te ʼu tehina mo tuagaʼane, ʼe toʼo e te hahaʼi ʼatatou ʼu tohi moka tou olo ʼo faifakamafola ʼi te ʼu malaʼe, peʼe ko te ʼu fakatauʼaga meʼa kai, peʼe ko te ʼu matani gaue. ʼE ui fenei e te tehina taupau ʼo te siliko ʼi Bolivie: “ ʼE matou olo ki te ʼu fakatauʼaga meʼa kai peʼe ko te ʼu matani gaue, ʼi te hola 1 hili hoʼata ki te hola 3, he ʼe mole maʼumaʼua lahi ai te kau gaue. ʼI te agamahani, ʼe matou faipalalau, pea ʼe matou kamata mo he ʼu ako Tohi-Tapu.”
Ka tou faifakamafola ʼi he koga meʼa ʼe faigataʼa ai te maʼu ʼa te hahaʼi ki ʼonatou ʼapi, tou faiga ke tou fetofetogi tatatou faʼahiga fai (Vakaʼi te palakalafe 10)
10. Kotea la he tahi faʼahiga fai ke logo te hahaʼi ki te logo lelei?
10 Tou fetogi tatatou faʼahiga faifakamafola. Neʼe lagi kotou ʼaʼahi tuʼa lahi he ʼapi, ʼi he ʼu temi kehekehe, kae neʼe mole kotou maʼu. Kotea la he tahi faʼahiga fai ke kotou fakaha te logo ki te hahaʼi? ʼE ui fenei e te tuagaʼane ko Katarina: “ ʼE au fai ni tohi ki te ʼu ʼapi ʼae neʼe mole au maʼu. Pea ʼe au faitohi ohage ʼe au palalau mo ia ʼo te ʼapi.” Kotea te ako ʼe tou maʼu mai ai? Tou fai ia meʼa fuli ke tou maʼu ai te hahaʼi.
TOU HOKO ATU TE FAIFAKAMAFOLA LOGO LA TE MOLE FIA LOGO ʼA TE HAHAʼI
11. Kotea he ʼu tupuʼaga ʼo te mole tali ai e ʼihi hahaʼi te logo ʼae ʼe tou tala?
11 ʼE lahi te ʼu tupuʼaga ʼo te mole tali e ʼihi hahaʼi te logo ʼae ʼe tou tala. Ohage la, ʼe natou manatu ʼe mole he ʼaoga ke natou iloʼi te ʼAtua peʼe ko te Tohi-Tapu. ʼE mole natou tui ki te ʼAtua ʼuhi ko te ʼu mamahi ʼae ʼe hoko ʼi te malamanei. Ko ʼihi ʼe mole natou tui ki te Tohi-Tapu, ʼuhi ko te malualoi ʼa te kau takitaki lotu, ʼae ʼe natou ui ʼe natou mulimuli ki te Tohi-Tapu, kae ʼe natou fai he ʼu aga ʼe kovi. Pea ko ʼihi atu leva, ʼe natou manatu pe ki tanatou gaue, peʼe ki ʼonatou maʼua fakafamili, peʼe ko ʼonatou fihifihia. Kia natou ʼaia, ʼe mole feala ke tokoni te Tohi-Tapu kia natou. Kae ʼe feafeaʼi hatatou taupau totatou fiafia mo kapau la ʼe mole tokagaʼi e te hahaʼi te logo ʼae ʼe tou fakamafola?
12. ʼE tokoni feafeaʼi mai ia Filipe 2:4 moka tou faifakamafola?
12 Tou fakaha ʼe tou tokagaʼi tonatou aluʼaga. Tokolahi ʼi te kamata neʼe mole natou fia logo ki tatatou faifakamafola. Kae neʼe natou fetogi leva ʼi tanatou sisio mai ʼae ʼe tou tokagaʼi tonatou aluʼaga. (Lau ia Filipe 2:4.) Ohage la, ʼe ui fenei e David, ʼae neʼe kua ʼosi tou palalau ki ai: “Kapau ʼe ui mai e he tahi ʼe mole fia logo, pea ʼe matou fafaʼo tomatou Tohi-Tapu peʼe ko ʼamatou tohi ki ʼamatou kato. Pea ʼe matou fakalavelave age leva pe ʼe kotea la te tupuʼaga ʼo tana mole fia logo.” Logo la ʼe feala anai ke ina galoʼi ʼatatou palalau, kae ʼe malave anai ki tona loto tatatou tokagaʼi ia ia. Tatau aipe pe ʼe mole natou loto ke tou palalau age ki te Tohi-Tapu, kae ʼe tou fakaha anai ʼi totatou fofoga mo tatatou agalelei, ʼe tou tokagaʼi tonatou aluʼaga.
13. ʼE feafeaʼi hatatou fetogi ʼatatou palalau ke fia logo mai te hahaʼi?
13 ʼE tou fakaha ʼe tou tokagaʼi he tahi moka tou fetogi ʼatatou palalau ke alu tahi mo tona aluʼaga. Ohage la, kapau ʼe tou sisio ki he ʼu kiʼi meʼa gaoʼi ʼi tuʼa, ʼe tou iloʼi ai ʼe ʼi ai he ʼu fanau ʼi te ʼapi ʼaia. ʼE mahino ia ʼe fia logo anai te ʼu matuʼā moka tou palalau ki te akoʼi ʼo te fanau, peʼe ko te ʼu tokoni ke natou maʼu he maʼuli fakafamili fiafia. Peʼe lagi tou tokagaʼi he matapa ʼe lahi ʼona loka ʼe fakamaʼumaʼu ʼaki. ʼE feala anai ke tou palalau ʼo ʼuhiga mo te agamalohi pea mo te kua matataku ʼa te hahaʼi. Pea ʼe fiafia anai ʼi tana logo ʼae ʼe fakagata anai ia te agamalohi. Ka tou maʼu he tahi ʼe fia logo, tou faiga ke tou fakaha age ʼe feala ke tokoni te Tohi-Tapu kia ia. ʼE ui fenei e Katarina ʼae neʼe kua tou ʼosi palalau ki ai: “ ʼE au manatuʼi te tokoni lahi ʼa te Tohi-Tapu kia au.”
Koia, ʼe iloga te tui papau ʼa Katarina ki te faʼahi ʼaia moka palalau ki te hahaʼi, pea ʼe natou tokagaʼi mo natou.14. ʼE feafeaʼi hatatou fetokoniʼaki ʼi te faifakamafola, ʼo mulimuli kia Taaga Lea 27:17?
14 Ke tou fetokoniʼaki. Neʼe akoʼi e te apositolo ko Paulo kia Timoteo te faifakamafola pea mo te faiako. Pea neʼe ina fakalotomalohiʼi ia Timoteo ke toe tokoni feia ki ʼihi atu. (1 Ko. 4:17) Ohage ko Timoteo, ʼe feala ke tokoni mai kia tatou te kau faifakamafola ʼae kua mahani ʼo te kokelekasio. (Lau ia Taaga Lea 27:17, NWT.) * Tou toʼo te faʼifaʼitaki ʼa te tehina neʼe pionie ʼi he koga meʼa neʼe ui ai e te tokolahi ʼe feʼauga pe natou mo tonatou lotu. Neʼe feafeaʼi tana taupau tona fiafia? ʼE ina ui fenei: “Neʼe au faiga tuʼumaʼu pe ke au faifakamafola mo he tahi. Ka ʼosi hamā ʼapi kae ma toe olo ki he tahi ʼapi, ʼe ma fakaʼaogaʼi te faigamalie ʼaia ke ma fetokoniʼaki ke lelei age tamā faiako. Ohage la, ʼe ma palalau ʼo ʼuhiga mo te tali ʼae neʼe ma fai ki he tahi, pea ʼe ma vakaʼi leva pe ʼe ko te tali fea ʼae neʼe tonu ia ke ma fai age.”
15. He koʼe ʼe maʼuhiga te faikole moka tou faifakamafola?
15 Tou kole kia Sehova ke tokoni mai. Tou kole kia Sehova ke ina takitaki tatou ʼi te temi fuli pe ʼae ʼe tou faifakamafola ai. ʼE ʼaoga kia tatou tona laumalie maʼoniʼoni ke tou fakahoko ʼatatou gaue fuli. (Pes. 127:1; Luka 11:13) Ka tou kole te tokoni ʼa Sehova, tou fakaha lelei te meʼa ʼae ʼe tou loto ki ai. Ohage la, tou kole kia Sehova ke ina taki tatou ki he tahi ʼe fia logo. Pea tou mulimuli leva ki tatatou faikole ʼaia, ʼo tou fakamafola ki te hahaʼi fuli pe ʼae ʼe tou felaveʼi mo ia.
16. He koʼe ko tatatou ako takitokotahi ʼe maʼuhiga ki te faifakamafola?
16 Tou toʼo he temi ki tatatou ako takitokotahi. ʼE ui fenei ʼi te Folafola ʼa te ʼAtua: “Kotou vakavakaʼi pea mo iloʼi e koutou totonu ia te finegalo ʼo te ʼAtua, ʼae ʼe lelei, mo haohaoa pea mo ina leleiʼia.” (Loma 12:2) Ka tou ako te Tohi-Tapu, ʼe tou iloʼi lelei ai ia te ʼAtua. Pea ka tou palalau leva ki he tahi ʼo ʼuhiga mo te ʼAtua, ʼe ina fakatokagaʼi tatatou tui ki te meʼa ʼae ʼe tou fakaha age. ʼE ui fenei e Katarina, ʼae kua tou ʼosi palalau ki ai: “Heʼeki faʼa fualoa, neʼe au tokagaʼi neʼe ʼaoga ke malohi age taku tui ʼae ki te ʼu akonaki tafito ʼo te Tohi-Tapu. Koia, neʼe au ako fakalelei ai te ʼu fakamoʼoni ʼae neʼe fakatupu e te ʼAtua ia meʼa fuli, pea ko te Tohi-Tapu ʼe ko te Folafola moʼoni ʼa te ʼAtua. Neʼe au toe vakaʼi mo te ʼu fakamoʼoni ʼe maʼu e te ʼAtua tana kautahi ʼi te kele ia ʼaho nei.” ʼE ui e Katarina, ʼi tana fai te ako ʼaia, neʼe toe malohi age ai tana tui pea mo toe lahi age tona fiafia ʼi te faifakamafola.
TOU HOKO ATU TE FAIFAKAMAFOLA
17. He koʼe neʼe hoko atu pe e Sesu tana faifakamafola?
17 Neʼe hoko atu pe e Sesu tana faifakamafola, logo pe la neʼe mole fia logo e ʼihi ki te logo ʼae neʼe ina tala. Neʼe mahino kia te ia, neʼe ʼaoga ke iloʼi e te hahaʼi te moʼoni, pea neʼe fia tokoni ki te tokolahi ke natou tali te logo ʼo te Puleʼaga. Neʼe ina toe iloʼi, ko natou ʼae neʼe mole natou tali ʼi te kamata ia te moʼoni, neʼe feala pe ke natou tali ki ʼamuli. Ohage ko te meʼa ʼae neʼe hoko ʼi tona famili. Lolotoga te ʼu taʼu ʼe tolu vaelua ʼae neʼe faifakamafola ai, neʼe mole he tahi ʼi ʼona tehina neʼe liliu ko hana tisipulo. (Soa. 7:5) Kae ʼi tana kua ʼosi fakatuʼuake, neʼe natou liliu leva ko he ʼu Kilisitiano.—Gaue 1:14.
18. He koʼe ʼe hoko atu pe tatatou faifakamafola?
18 ʼE mole tou iloʼi pe ʼe ko ai ʼae ka liliu anai ko he kaugana ʼa te ʼAtua. ʼE mole ko te hahaʼi fuli ʼae ʼe natou mahino atu aipe ʼe ko te moʼoni 1 Pet. 2:12.
ʼae ʼe tou fakamafola. Pea maʼia pe la mo natou ʼae ʼe mole fia logo ʼi te kamata, ʼe feala ke natou tokagaʼi tatatou aga pea mo tatatou hoko atu te faifakamafola. Pea ʼe feala ai ki muli age ke natou “fakakololiaʼi te ʼAtua.”—19. Kotea ʼae ʼe tonu ke tou manatuʼi, ʼo mulimuli kia 1 Kolonito 3:6, 7?
19 ʼE tou to pea mo fakavai, kae ʼe tonu ke tou manatuʼi ʼe ko te ʼAtua ʼae ʼe ina fakatuputupu. (Lau ia 1 Kolonito 3:6, 7.) ʼE ui fenei e te tehina ʼe maʼuli ʼi Afelika: “Lolotoga taʼu e 20 tupu, neʼe ko au tokotahi pe ʼae neʼe ko he Fakamoʼoni ʼa Sehova ʼi te koga meʼa ʼae ʼe au maʼuli ai. Kae ʼi te temi nei, kua matou toko 14 ʼu kauga fagona. Ko te toko 13 ia natou ʼaia kua papitema, ʼo kau ai toku ʼohoana mo ʼama toe ʼe tolu. Pea ko te toko 32 hahaʼi ʼe natou kau ki te ʼu fono.” ʼE fiafia te tehina ʼaia he neʼe hoko atu pe tana faifakamafola pea neʼe fakatalitali ki te ʼaho ʼae neʼe taki mai ai leva e Sehova te hahaʼi ki Tana kautahi.—Soa. 6:44.
20. He koʼe ʼe tou tatau mo he ʼu hahaʼi haofaki maʼuli?
20 Kia Sehova, ko te ʼu hahaʼi fuli ʼe maʼuhiga kia te ia. ʼE ina foaki mai te pilivilesio ke tou gaue fakatahi mo tona ʼAlo, moʼo fakatahitahi mai te hahaʼi ʼo te atu puleʼaga, ʼi muʼa ʼo te fakaʼosi ʼo te tuʼu ʼaeni. (Ake. 2:7) ʼE fakatatau tatatou gaue faifakamafola ki he kutuga ʼe fekauʼi ke olo ʼo haofaki te hahaʼi mai he vaka neʼe mou. Logo la ʼe tokosiʼi natou ʼae ka haofaki, kae ko te gaue ʼa te kau haofaki maʼuli ʼaia ʼe maʼuhiga. ʼE toe tatau pe mo tatatou faifakamafola. ʼE mole tou iloʼi pe ʼe ko te tokofia ʼae kei toe ke haofaki mai te malama ʼa Satana. Kae ʼe feala ke fakaʼaogaʼi e Sehova he tahi pe ia tatou moʼo tokoni kia natou. ʼE ui fenei e te tehina ko Andreas, ʼae ʼe maʼuli ʼi Bolivie: “ ʼE au iloʼi, ka mahino he tahi kua ina maʼu te moʼoni pea mo papitema, ʼe mole ko te gaue ʼa he tokotahi, kae neʼe tou gaue fuli moʼo tokoni ki ai.” Koia, tou hoko atu tatatou faifakamafola he ʼe tapuakiʼi anai tatou e Sehova pea ʼe tou taupau anai totatou fiafia.
KATIKO 66 Kotou Tala Te Logo Lelei
^ pal. 5 ʼE feafeaʼi hatatou hoko atu tatatou faifakamafola, logo la ʼe mole tou maʼu te hahaʼi ʼi ʼonatou ʼapi, peʼe mole natou fia logo ki totatou logo ʼae ʼe tou fakamafola age? ʼE tou vakaʼi anai ʼi te alatike ʼaeni he ʼu tokoni ʼo ʼuhiga mo te faʼahi ʼaia, pea ke tou taupau ai tatatou fiafia.
^ pal. 2 Ko te ʼu mataʼi tohi ʼaeni H.T.S. ko tona fakaʼuhiga: Hili te Temi ʼo Sesu.
^ pal. 7 ʼE ʼahiʼahi anai te kau faifakamafola te ʼu tokoni ʼae ʼe tuku mai ʼi te alatike ʼaeni, ʼo mulimuli pe ki te lao ʼo ʼuhiga mo te fakaʼapaʼapa ki te maʼuli takitokotahi ʼo te hahaʼi.
^ pal. 14 Taaga Lea 27:17, NWT: “Ko te ukamea ʼe fakamasila ʼaki te ukamea. Koia, ʼe tokoni he tagata ki tona kaumeʼa ke tuputupu.”
^ pal. 62 FAKAMATALA ʼO TE ʼU PĀKI: (mai ʼoluga ki lalo): Ko te taumatuʼa ʼe nā faifakamafola ʼi he koga meʼa ʼe faigataʼa te maʼu ʼa te hahaʼi ki ʼonatou ʼapi. Ko te tagata ʼo te ʼuluaki ʼapi ʼe gaue. Ko te fafine ʼo te lua ʼapi ʼe ʼi te fale mahaki. Pea ko te fafine ʼo te tolu ʼapi ʼe faifakatau. ʼE maʼu leva e te taumatuʼa te tagata ʼo te ʼuluaki ʼapi ʼi tanā faifakamafola ʼi te afiafi. ʼE nā felaveʼi mo te fafine ʼo te lua ʼapi ʼi tanā fai laupapa. Pea ʼe nā faitelefoni ʼo maʼu atu te fafine ʼo te tolu ʼapi.