1. He koʼe neʼe kole e Sesu kia Sehova ke ina puipui ʼana tisipulo?

ʼI TONA po fakaʼosi, neʼe hufakiʼi e Sesu ʼana tisipulo, he neʼe ina iloʼi ʼe natou tau anai mo ni ʼahiʼahi. Pea neʼe ʼofa ia natou, koia la ʼae neʼe ina kole ai ki tana Tamai ke ina puipui ia natou. (Soa. 17:14, 15) Neʼe ina iloʼi, ka hake anai ki selo, ʼe hoko atu pe e Satana, te Tevolo ia tana tauʼi te ʼu kaugana ʼa Sehova. Koia ʼae ʼe ʼaoga ai ke puipui natou.

2. He koʼe ʼe tou tui papau ʼe tali anai e Sehova ʼatatou faikole?

² Neʼe tali e Sehova ki te faikole ʼa Sesu he neʼe ʼofa ai. Kapau ʼe tou fai ia meʼa fuli ke fiafia ai ia Sehova, ʼe toe ʼofa anai kia tatou, pea ʼe ina tali anai moka tou kole age ke tokoni mai pea mo puipui tatou. Ko Sehova ʼe ko he Tamai agalelei, ʼe ʼofa mo tokaga ki ʼana fanau. Koia, ʼe tou tui papau ai ʼe tokaga tuʼumaʼu pe anai kia tatou, he ʼe kapau ʼe mole ina fai te faʼahi ʼaia, ʼe ʼulihi ai anai tona huafa.

3. He koʼe ʼe ʼaoga ia ʼaho nei ke puipui tatou e Sehova?

³ ʼE maʼuhiga tafito age ia ʼaho nei ke puipui tatou e Sehova, he neʼe kapu ifo ia Satana mai te lagi “mo tona ita lahi.” (Fkha. 12:12) Neʼe lava fakahalaʼi e Satana ʼihi ke natou tui, ʼe leleiʼia e te ʼAtua tanatou fakatagaʼi tatou. (Soa. 16:2) Pea ko ʼihi ʼe mole natou tui ki te ʼAtua, ʼe natou fakatagaʼi tatou he ʼe mole tatau tatatou aga mo natou. Kae ʼaua naʼa tou matataku, he ʼe ui ʼi te Folafola ʼa te ʼAtua: “Ko te ʼAliki ʼe agatonu, pea ʼe ina fakamalohiʼi anai koutou pea mo haofaki koutou mai te Agakovi.” (2 Tes. 3:3) ʼE tou vakaʼi faʼahi ʼe lua ʼe foaki mai e Sehova moʼo haofaki, peʼe puipui tatou.

4. Kotea ʼae ʼe foaki mai e Sehova moʼo puipui ʼo tatou, ʼo mulimuli kia Efeso 6:13-17?

⁴ ʼE foaki mai e Sehova he teu tau fakalaumalie, moʼo puipui ʼo tatou mai te ʼu ʼohofi ʼa Satana. (Lau ia Efeso 6:13-17.) Ko te teu tau ʼaia ʼe malohi, pea ʼe ina puipui leleiʼi anai tatou moka ʼe tou tui tona ʼu koga kehekehe fuli. Kotea ʼae ʼe fakata ki ai te ʼu koga kehekehe ʼaia?

5. Kotea ʼae ʼe fakata ki ai te kiliʼi pipi ʼo te moʼoni, pea he koʼe ʼe tonu ke tou haʼi?

⁵ Ko te kiliʼi pipi ʼo te moʼoni ʼe ina fakata te ʼu moʼoni ʼae ʼe tuʼu ʼi te Tohi-Tapu. ʼE tonu ke tou haʼi te kiliʼi pipi ʼaia he ʼe ko Satana “te tamai ʼo te loi.” (Soa. 8:44) Talu mai fualoa mo tana loiʼi pea mo fakahalaʼi “te kele katoa.” (Fkha. 12:9) Koia, ko te ʼu moʼoni ʼae ʼe tuʼu ʼi te Tohi-Tapu ʼe tokoni mai ke mole tou tui ki te ʼu loi ʼaia. ʼI hona aluʼaga fakata, ʼe tou haʼi te kiliʼi pipi ʼaia moka ʼe tou ako te ʼu moʼoni ʼo ʼuhiga mo Sehova, moka tou tauhi kia te ia “ ʼaki te laumalie mo te moʼoni,” pea moka tou aga fakahagatonu ia meʼa fuli.—Soa. 4:24; Efe. 4:25; Hep. 13:18.

6. Kotea ʼae ʼe fakata ki ai te kofu ukamea ʼo te faitotonu, pea he koʼe ʼe tonu ke tou kofuʼi?

⁶ Ko te kofu ukamea ʼo te faitotonu ʼe ina fakata te ʼu lao faitotonu ʼa Sehova. Ko he kofu ukamea ʼe ina puipui te mafu ʼo he tagata solia. ʼO toe feia pe, ʼe puipui ʼotatou loto e te kofu ukamea ʼo te faitotonu ke mole tou to ki te ʼu fakahala ʼo te malama. (Taag. 4:23) ʼE loto e Sehova ke tou ʼoʼofa pea mo tauhi kia te ia ʼaki totatou loto katoa. (Mat. 22:36, 37) Koia ʼae ʼe faiga ai e Satana ke mole katoa ʼotatou loto, kae ke tou manako ki te ʼu meʼa ʼo te malama ʼae ʼe fehiʼa ki ai ia Sehova. (Sakp. 4:4; 1 Soa. 2:15, 16) Pea ka ʼe mole hona fua, ʼe ina fakatagaʼi tatou ke tou talagataʼa ki te ʼu lao ʼa Sehova.

7. ʼE feafeaʼi hatatou kofuʼi te kofu ukamea ʼo te faitotonu?

⁷ ʼE tou kofuʼi te kofu ukamea ʼo te faitotonu moka tou fakalogo ʼi totatou maʼuli ki te ʼu lao ʼa Sehova ʼo ʼuhiga mo te meʼa ʼae ʼe lelei pea mo ʼae ʼe kovi. (Pes. 97:10) ʼE lagi faigataʼa ki ʼihi hanatou mulimuli ki ai he ʼe fia faʼifaʼitaliha pe natou. Kae kapau ʼe mole kei tou fia mulimuli ki te ʼu pelesepeto Fakatohi-tapu, pea ʼe tou hage pe ko he tagata solia ʼe ina huʼi tona kofu ukamea lolotoga te tau he ʼe mamafa. ʼE feala ke mate ai! Kia natou ʼae ʼe natou tauhi ki te ʼAtua, “ ʼe mole faigataʼa fau” ʼana fakatotonu pea ʼe natou iloʼi ʼe haofaki ai natou.—1 Soa. 5:3.

8. ʼE feafeaʼi hatatou tui te ʼu taka, peʼe ko te ʼu sulie ʼo te logo lelei?

⁸ ʼE toe tokoni mai te apositolo ko Paulo ke tou tui te ʼu taka ʼo te logo lelei ʼo te tokalelei. Ko tona fakaʼuhiga ʼe tou fakaʼaogaʼi te ʼu faigamalie fuli moʼo fakamafola te logo lelei ʼo te Puleʼaga. Ka tou fai te faʼahi ʼaia, ʼe malohi ai tatatou tui. ʼE fakalotomalohi tatatou iloʼi ʼae ko te ʼu kaugana ʼa Sehova ʼi te malamanei katoa, ʼe natou fai te faʼahi ʼaia. Ohage la, ʼe natou faifakamafola ʼi tanatou fale gaue, peʼe ʼi te fale ako, peʼe ko te ʼu matani gaue, peʼe ʼi te ʼu ʼapi, peʼe moka natou olo ʼo faifakatau, peʼe natou olo ki ʼonatou famili ʼae ʼe mole ko he kau Fakamoʼoni, peʼe moka natou palalau ki ʼonatou kaumeʼa. Kapau ʼe tou tuku tatatou faifakamafola he ʼe tou matataku, ʼe tou hage pe ko he tagata solia ʼe ina huʼi ʼona taka peʼe ko ʼona sulie lolotoga te tau. ʼE feala ke lavea ai ʼona vaʼe! Pea ʼe faigataʼa anai hana fakalogo ki te ʼu fakatotonu ʼo tona kamutoa.

9. He koʼe ʼe tonu ke tou puke maʼu te meʼa tali tau lahi ʼo te tui?

 ⁹ Ko te meʼa tali tau lahi ʼo te tui ʼa he Kilisitiano ʼe ina fakata tana tui ʼae kia Sehova. ʼE tou tui papau ʼe fakahoko anai e Sehova ʼana fakapapau fuli. Pea kapau ʼe tou maʼu te tui ʼaia, ʼe feala anai ke tou “tamateʼi te ʼu kauʼi nahau ulo fuli ʼa te Agakovi.” ʼE tonu ke tou puke maʼu te meʼa tali tau ʼaia, ke mole tou tui ai ki te kau aposita pea mo lotovaivai moka manukiʼi tatou. Kapau ʼe mole tou tui, ʼe faigataʼa anai hatatou fakalogo kia Sehova moka uga tatou e ʼihi ke tou fai he meʼa ʼe kovi. ʼE puipui tatou e tatatou tui moka ʼe tou fakafisi ʼi te fale gaue peʼe ʼi te fale ako ke tou fai he agahala, pea moka tou fakafisi ki he gaue ʼe totogi lelei kae ʼe fua kovi anai ki totatou maʼuli fakalaumalie. (1 Pet. 3:15; Hep. 13:5, 6) Pea ʼe toe puipui anai tatou e tatatou tui moka ʼe tou haga tauhi kia Sehova logo la totatou fakatagaʼi.—1 Tes. 2:2.

10. Kotea ʼae ʼe fakata ki ai te puloga tau ʼo te haofaki, pea he koʼe ʼe tonu ke tou ʼai?

¹⁰ Ko te puloga tau ʼo te haofaki ʼe ina fakata tatatou ʼamanaki ʼae ʼe fakapale anai e Sehova ia natou fuli ʼae ʼe tauhi kia te ia,  pea kapau ʼe tou mamate ʼe ina fakatuʼuake anai tatou. (1 Tes. 5:8; 1 Tim. 4:10; Tito 1:1, 2) Ohage pe ko he tagata solia ʼe ina ʼai tona puloga tau moʼo puipui tona ʼulu, ʼo toe feia aipe, ko te ʼamanaki ʼo te haofaki ʼe ina puipui tatatou fakakaukau. Koia ʼe tokoni mai ia te ʼamanaki ʼo te haofaki ke tou manatuʼi tuʼumaʼu te ʼu fakapapau ʼa te ʼAtua pea ke mole tou hoha fau. ʼE tou ʼai te puloga tau ʼaia ʼo te haofaki moka tou faiga ke tou manatu ohage ko Sehova. Ohage la, ʼe mole tou falala anai ki te ʼu koloa ʼae ʼe fakatemi, kae ki te ʼAtua.—Pes. 104:34; 1 Tim. 6:17

11. Kotea ʼae ʼe fakata ki ai te heleta ʼo te laumalie, pea he koʼe ʼe tonu ke tou fakaʼaogaʼi?

¹¹ Ko te heleta ʼo te laumalie ʼe ina fakata te Folafola ʼa te ʼAtua, ia te Tohi-Tapu. ʼE tou fakaʼaogaʼi te heleta ʼaia moʼo fakaha te ʼu loi ʼo te ʼu akonaki kehekehe ʼo te malama. ʼE tou toe fakaʼaogaʼi te heleta ʼaia moʼo tokoni ki te hahaʼi ke natou liʼaki te ʼu loi ʼaia pea mo ʼanatou aga ʼae ʼe kovi. (2 Ko. 10:4, 5; 2 Tim. 3:16, 17; Hep. 4:12) ʼE tou faiva anai ʼi te fakaʼaogaʼi te heleta ʼaia moka ʼe tou ako ia te Folafola ʼa te ʼAtua, pea mo mulimuli ki te ʼu akoako ʼae ʼe foaki mai e te kautahi ʼa Sehova. (2 Tim. 2:15) ʼI te lakaga leva ʼaeni, tou vakaʼi te tahi puipuiʼaga ʼe foaki mai e Sehova.

12. Kotea te tahi tokoni ʼe ʼaoga kia tatou, pea kotea tona tupuʼaga?

¹² Ko te tagata solia faiva ʼe ina iloʼi ʼe mole feala ke ina tauʼi tokotahi he foʼi kautau. ʼE ʼaoga ke tokoni age te tahi kau solia. ʼO toe feia aipe, ʼe ʼaoga ke tokoni mai ʼotatou tehina mo tuagaʼane ke tou malo ʼi tatatou tauʼi ia Satana mo tana hahaʼi. ʼE feala ke tou falala ki totatou “fale tau tehina” katoa, ʼae ʼe ko he meʼa ʼofa mai ia Sehova.—1 Pet. 2:17.

13. Kotea te ʼu lelei ʼe tou maʼu ʼi tatatou ʼu fono, ʼo mulimuli kia Hepeleo 10:24, 25?

¹³ ʼE tou maʼu te tokoni ʼae ʼe ʼaoga kia tatou ʼi ʼatatou fono. (Lau ia Hepeleo 10:24, 25.) Ka tou lotovaivai kae ʼe tou kau ki he fono, ʼe feala ke tou fiafia ai. ʼE fakalotomalohi tatou e te ʼu tali ʼo ʼotatou tehina mo tuagaʼane. Ko te ʼu akonaki pea mo te ʼu faʼifaʼitaki ʼae ʼe natou fai ʼe uga ai tatou ke hoko atu tatatou tauhi kia Sehova. Pea ko tatatou faipalalau mo natou ʼi muʼa pea ʼi te ʼosi ʼo te ʼu fono, ʼe fakalotofimalieʼi ai tatou. (1 Tes. 5:14) ʼE toe feala foki ʼi te ʼu fono ke tou tokoni ki ʼihi atu. (Gaue 20:35; Loma 1:11, 12) Pea ko te tahi lelei ʼe tou maʼu ʼi te ʼu fono, he ʼe akoako ai tatou ke tou liliu ʼo faiva ʼi te faifakamafola pea mo te faiako. Ohage la, ʼe akoʼi mai ke tou fakaʼaogaʼi lelei ʼatatou tohi ki te ʼu ako Tohi-Tapu. Koia, ke ke teuteuʼi lelei ʼau fono. Ke ke fakalogo lelei lolotoga te ʼu fono. Pea ke ke maʼuliʼi leva te ʼu meʼa ʼae neʼe ako. ʼE ke liliu anai ko “he tagata solia lelei ʼa Kilisito Sesu.”—2 Tim. 2:3.

14. Ko ai ʼae ʼe feala ke toe tokoni mai?

¹⁴ ʼE feala ke toe tokoni mai te ʼu lauʼi miliona ʼaselo. Fakakaukauʼi age te meʼa ʼae ʼe lava fai e he ʼaselo ʼe tahi. (Esa. 37:36) Pea ʼe feafeaʼi age la moka ko he foʼi kautau ʼaselo! Ko he tagata peʼe ko he temonio ʼe mole malohi age ia ʼi te ʼu ʼaselo ʼa Sehova. Neʼe ui e he tahi, ko Sehova ʼe mafimafi. Pea ka tou kau mo Sehova, ʼe tou malohi age ʼi ʼotatou fili. (Tfm. 6:16) Ke ke tui papau ki te faʼahi ʼaia moka ʼe ke lotovaivai ʼuhi ko he aga peʼe ko he palalau ʼo hau kauga gaue, peʼe ko he tahi ʼo  tau fale ako, peʼe ko he tahi ʼo tou famili ʼe mole ko he Fakamoʼoni ʼa Sehova. Pea manatuʼi, kapau ʼe ke mulimuli ki te ʼu fakatotonu ʼa Sehova, ʼe tokoni atu anai pea ʼe mole ke tau tokotahi anai.

15. ʼO mulimuli kia Esaia 54:15, 17, he koʼe ʼe mole he tahi ʼe feala ke ina fakagata te faifakamafola ʼa te ʼu kaugana ʼa te ʼAtua?

¹⁵ ʼE lahi te ʼu tupuʼaga ʼo te fehiʼa ʼa te malama ʼa Satana ia tatou. ʼE natou fehihiʼa ia tatou he ʼe mole tou kau ki te faipolitike pea mo te ʼu tau. Kae ʼe tou tala te huafa ʼo te ʼAtua, pea mo fakaha ʼe ko tona Puleʼaga pe ʼae ka ina lava fakatuʼu te tokalelei, pea ʼe tou fakalogo ki ʼana lao. ʼE tou toe tokoni ki te hahaʼi ke natou iloʼi ko te pule ʼo te malamanei ʼe gutuloi pea mo agakovi. (Soa. 8:44) Pea ʼe tou toe tala kua vave pulihi te malama ʼa Satana. ʼE mole feala kia Satana mo tana hahaʼi ke natou fakagata tatatou faifakamafola. Kae ʼe tou fakaʼaogaʼi anai te ʼu faigamalie fuli moʼo vikiʼi ia Sehova. Logo la ʼe malohi ia Satana, kae ʼe mole lava anai ʼana faiga he ʼe puipui tatou e Sehova.—Lau ia Esaia 54:15, 17.

16. Kotea anai ka fai e Sehova lolotoga te mamahi lahi?

¹⁶ Pea kotea anai ka fai e Sehova maʼa tatou lolotoga te mamahi lahi? ʼE ina haofaki pe anai tatou. ʼUluaki, ʼe ina haofaki anai tatou ʼi te temi ʼae ka ina uga anai te ʼu hau ʼo te kele ke natou maumauʼi ia Papiloni Lahi, peʼe ko te ʼu lotu hala fuli. (Fkha. 17:16-18; 18:2, 4) Pea lua, ʼe ina toe haofaki anai tatou ʼi Alamaketone, moka ina pulihi anai te ʼu koga ʼae ka toe ʼo te malama ʼa Satana.—Fkha. 7:9, 10; 16:14, 16.

17. He koʼe ʼe maʼuhiga ke tou nonofo ovi kia Sehova?

¹⁷ Kapau ʼe tou nonofo ovi kia Sehova, ʼe mole feala kia Satana ke ina fakamamahiʼi tatou ʼo talu ai. Kae ʼe ko ia ia ʼae ka pulihi anai ʼo talu ai. (Loma 16:20) Koia, ke ke tui te teu tau katoa pea ʼaua naʼa ke huʼi. ʼAua naʼa ke tauʼi tokotahi ia Satana mo tona malama, pea ke ke toe tokoni ki ʼou tehina mo tuagaʼane. Mulimuli ki te ʼu fakatotonu ʼa Sehova. Kapau ʼe ke fai te ʼu faʼahi fuli ʼaia, ʼe fakamalohiʼi pea mo puipui anai koe e tau Tamai ʼae ʼi selo.—Esa. 41:10.