1. He koʼe ʼe maʼuhiga te ʼu tehina tupulaga ʼi te kokelekasio?

ʼU TEHINA tupulaga, ʼe kotou maʼuhiga ki te kokelekasio, pea ʼe feala ke kotou tokoni lahi ki ai, he ʼe kotou malolohi. (Taag. 20:29) Pea ʼe kotou fakaʼamu ke foaki atu ia he ʼu gaue maʼuhiga ke kotou fai. Kae ʼe lagi ui ia e ʼihi ʼe kei kotou tupulaga fau, pea heʼeki feala ke kotou fai te ʼu gaue ʼaia. Kae ʼe feala ke kotou fai ni gaue ke falala ai te kokelekasio kia koutou.

2. Kotea ʼe tou vakaʼi anai ʼi te alatike ʼaeni?

² ʼI te alatike ʼaeni, ʼe tou vakaʼi anai te aluʼaga neʼe hoko kia Tavite, pea mo te ʼu Hau ʼe lua ʼo Suta ko Asa mo Sosafate. ʼE tou vakaʼi anai te ʼu fihifihia neʼe tau mo natou, pea neʼe feafeaʼi tanatou tauʼi, pea mo te ʼu ako ʼe feala ke taʼofi e te ʼu tehina tupulaga.

3. Kotea ʼe feala ke fai e te ʼu tehina tupulaga moʼo tokoni ki te ʼu tehina mo tuagaʼane matutuʼa?

³ ʼI te kei tupulaga ʼa Tavite, neʼe felogoi lelei mo te ʼAtua, pea neʼe ʼi ai te ʼu faʼahi neʼe faiva ai, ohage ko te faimaholo. Neʼe ina fakaʼaogaʼi ʼona faiva moʼo tokoni ki ʼihi. (1 Sam. 16:16, 23) Ko te kau tupulaga ʼe natou popoto ʼi te fakaʼaogaʼi te ʼu kiʼi masini toʼotoʼo. Pea ʼe feala ke  natou tokoni ki te ʼu tehina mo tuagaʼane matutuʼa ʼo te kokelekasio pe ʼe feafeaʼi hanatou fakaʼaogaʼi ki te ʼu fono.

4. Ohage ko Tavite, kotea te ʼu kalitate ʼe tonu ke maʼu e te ʼu tehina tupulaga? (Vakaʼi te pāki ʼo te takafi)

⁴ Ko Tavite neʼe ko he tupulaga neʼe tuha mo te falala. Ohage la, neʼe tokaga lelei ki te faga ovi ʼo tana tamai, kae neʼe ko he gaue fakatupu tuʼutamaki. Neʼe ui fenei e Tavite kia Saulo: “Nee tauhi e tau tagata faifekau te u ovi a tana tamai. Pea ka hau he laione pee ko he uluso, o puke o ave he ovi i te faga manu, e au tuli ia ia, pea e au tamatei ia ia, pea e au taaki mai te ovi mai tona gutu.” (1 Sam. 17:34, 35) Koia, neʼe fakaha ai e Tavite tana lototoʼa ʼi tona fakahoko lelei tona maʼua. ʼO toe feia pe, ʼe feala ki te ʼu tehina tupulaga ke natou faʼifaʼitakiʼi ia Tavite, ʼi tanatou fakahoko lelei te ʼu gaue ʼae neʼe tuku age.

5. Kotea te meʼa maʼuhiga ʼe tonu ke fai e te ʼu tehina tupulaga ʼo mulimuli kia Pesalemo 25:14?

⁵ Neʼe toe felogoi lelei ia Tavite mo Sehova. Neʼe ko tona “Kaumeʼa” lelei, pea neʼe maʼuhiga age ia ʼi ʼona faiva. (Lau ia Pesalemo 25:14, NWT.) * ʼO toe feia pe, ʼu tehina tupulaga ʼe tonu ke kotou maʼu he ʼu felogoi lelei mo te ʼAtua. He ʼe kapau ko ia, ʼe feala leva ke foaki atu ni gaue.

6. Kotea te ʼu manatu hala neʼe maʼu e ʼihi ʼo ʼuhiga mo Tavite?

⁶ Ko Tavite neʼe tau mo he aluʼaga faigataʼa, he neʼe manatu hala ʼihi ʼo ʼuhiga mo ia. Ohage la, neʼe mole loto e te Hau ko Saulo ke alu ʼo tauʼi ia Koliate, he ʼe kia ia neʼe kei tupulaga fau. (1 Sam. 17:31-33) Pea neʼe ui age e tona taʼokete neʼe mole ina fakahoko lelei te gaue ʼae neʼe tuku age ki ai. (1 Sam. 17:26-30) Kae neʼe mole ko te manatu ʼaia ʼa Sehova, he neʼe ina iloʼi lelei ia Tavite. Pea neʼe ina fakaha tana falala ʼae kia Sehova ʼi tana matehi ia Koliate.—1 Sam. 17:45, 48-51.

7. Kotea te ʼu ako ʼe feala ke taʼofi e he tehina tupulaga mai te faʼifaʼitaki ʼo Tavite?

⁷ Kotea te ʼu ako ʼe feala ke taʼofi e he tehina tupulaga mai te faʼifaʼitaki  ʼo Tavite? Ohage la, ʼe tonu ke kataki fualoa, he ʼe ko ʼihi ʼe lagi natou manatu ʼe kei tupulaga fau. Kae ʼe mole ko te manatu ʼaia ʼa Sehova, he ʼe ina iloʼi lelei te ʼu meʼa fuli ʼae ʼe feala ke fai e he tehina tupulaga. (1 Sam. 16:7) Pea ʼe toe tonu foki ke ina fakamalohiʼi ʼana felogoi mo Sehova, ʼaki tana metitasio ki te ʼu meʼa ʼae neʼe ina fakatupu, ohage ko Tavite. (Pes. 8:4, 5; Pes. 139:14; Loma 1:20) ʼE feala ke toe faiga ke lahi age tana falala kia Sehova. Ohage la, moka tau mo he fihifihia, ʼe feala ke ina kole tana tokoni pea mo tona malohi. Ka tokagaʼi e ʼihi te ʼu faiga ʼa te tehina tupulaga ʼaia, ʼe natou falala anai ki ai.

8-9. Kotea ʼae neʼe tokoni kia Tavite ke fakatalitali fualoa ʼi muʼa ʼo tana kamata pule ki Suta? Kotea te tahi ako ʼe feala ke taʼofi e he tehina tupulaga mai te faʼifaʼitaki ʼa Tavite?

⁸ Neʼe toe tau ia Tavite mo te tahi fihifihia. Neʼe tonu ke fakatalitali fualoa ʼi muʼa ʼo tana pule ki Suta. (1 Sam. 16:13; 2 Sam. 2:3, 4) Koia ʼae neʼe tonu ke kataki fualoa. Logo la tana fakatalitali ʼaia, neʼe mole lotovaivai ia Tavite mo nofo noa. Ohage la, ʼi tana nofo ʼi te fenua ʼo te kau Filisitini, neʼe ina tauʼi ai te ʼu fili ʼo Iselaele.—1 Sam. 27:1-12.

⁹ Kotea te tahi ako ʼe feala ke taʼofi e he tehina tupulaga mai te faʼifaʼitaki ʼa Tavite? ʼE lahi te ʼu gaue ʼe feala ke ina fai maʼa Sehova, pea mo ʼona tehina mo tuagaʼane. Tou vakaʼi te faʼifaʼitaki ʼaeni ʼo te tehina ko Ricardo. * ʼI tana teitei taʼu hogofulu, neʼe kua fia pionie. Kae neʼe fakamahino age e te ʼu tagata ʼafea, ʼe tamasiʼi fau. Neʼe mole lotovaivai peʼe ita, kae neʼe faiga ia ke lahi age tana faifakamafola. ʼE ui fenei e Ricardo: “ ʼI te temi nei, kua au mahino leva neʼe tonu pe ke au hikihiki taku faifakamafola. Ohage la, ke au fai fuli ʼaku ʼaʼahi pea mo teuteu ki ai. ʼI taku fai ʼaia, neʼe au kamata ai leva haku ako Tohi-Tapu, pea neʼe mole kei au mataku.” ʼI te temi nei, kua pionie katoa ia Ricardo, pea ʼe fua lelei tana selevisi. Pea kua tagata faifekau fakaminisitelio.

10. Kotea ʼae neʼe fai e Tavite ʼi muʼa ʼo hana toʼo he tonu ʼe maʼuhiga?

¹⁰ Koʼeni te tahi aluʼaga neʼe hoko kia Tavite. ʼI te tahi ʼaho, neʼe olo ia Tavite mo ʼana tagata ʼo tau. Kae neʼe natou tuku ʼonatou famili. Pea neʼe ʼomai ʼonatou fili ʼo ʼohofi tonatou nofoʼaga ʼo ʼave ai ʼonatou famili. ʼI te aluʼaga ʼaia, neʼe kumi e Tavite te takitaki ʼa Sehova, kae neʼe mole falala ia ki tona faiva ʼae ʼi te tau. Neʼe kole e Tavite kia Sehova pe ʼe tonu ke ina tuli te ʼu tagata kaihaʼa ʼaia. Pea neʼe ui age e Sehova ke alu, pea ʼe ina fakaʼateainaʼi anai ʼonatou famili. (1 Sam. 30:7-10) Kotea ʼe tou ako mai te fakamatala ʼaeni?

11. Kotea ʼae ʼe tonu ke fai e te ʼu tehina tupulaga ʼi muʼa ʼo hanatou fai he tonu?

¹¹ ʼE tonu ki te ʼu tehina tupulaga ke natou kumi tokoni ʼi muʼa ʼo hanatou fai he tonu. Kumi tokoni kia ai? ʼUluaki, ki ʼanatou matuʼā. Pea ʼe toe feala ke natou kumi tokoni ki te ʼu tagata ʼafea, he ko natou ko he ʼu “meʼa ʼofa” mai ia Sehova. Koia, ʼe feala ai ke natou falala kia natou. (Efe. 4:8) ʼE kotou fai anai he ʼu tonu ʼe lelei mo kapau ʼe kotou faʼifaʼitakiʼi tanatou tui pea mo mulimuli ki ʼanatou tokoni. Tou vakaʼi leva te ʼu ako ʼe feala  ke tou taʼofi mai te faʼifaʼitaki ʼa te Hau ko Asa.

12. Kotea te ʼu kalitate neʼe maʼu e Asa ʼi tana kamata hau?

¹² ʼI tana kei tupulaga, ko te Hau ko Asa neʼe agavaivai mo lototoʼa. ʼI tana kamata hau hili te mate ʼo tana tamai, neʼe ina fakamaʼa te fenua ʼo Suta mai te tauhi taula ʼatua. Pea neʼe ina toe fakatotonu ki te hahaʼi ʼo Suta ke natou kumi ia Sehova, pea ke natou mulimuli ki tana Lao pea mo ʼana fakatotonu. (2 Klk. 13:23–14:6) ʼI te temi ʼae neʼe ʼohofi ai natou e te Hau Etiopea ko Selake mo ʼana solia kaugamalie, neʼe kumi tokoni ia Asa kia Sehova. Neʼe ina ui fenei: “[“Sehova,” NWT], ko koe toko tahi e feala ke hau o tokoni kia ia ae e vaivai mo ia ae e malohi: Hau o tokoni mai kia matou, [“Sehova,” NWT], tomatou Atua! Koteuhi ko koe ae e matou falala ki ai.” ʼE ha ʼi ʼana palalau malie ʼaia, neʼe falala katoa ia te Hau ko Asa kia Sehova tana Tamai ʼae ʼi selo, ʼe ina haofaki anai natou. Pea neʼe tokoni ia Sehova kia Asa ke malo ʼi te kau Etiopea.—2Klk. 14:7-11.

13. Kotea neʼe hoko leva kia Asa, pea kotea tona tupuʼaga?

¹³ Neʼe lagi mataku ia Asa ʼi tona ʼohofi e te kau solia kaugamalie ʼaia. Kae neʼe kumi tokoni kia Sehova. Kae ki muli age, ʼi tona ʼohofi e te Hau ko Paesa mo ʼana kau solia ʼae neʼe tokosiʼi age, neʼe mole ina kumi leva te tokoni ʼa Sehova, kae ko te tokoni ʼa te Hau ʼo Silia. Pea neʼe fua kovi tana tonu ʼaia. Talu mai te ʼaho ʼaia, neʼe hoholo atu te tauʼi ʼo Asa e ʼona fili ʼo kaku ki tona mate. Neʼe fakaha age e Sehova tona tupuʼaga ʼaki te polofeta ko Anani, ʼo ina ui fenei: “O tupu nee ke falala ki te hau o Silia, kae nee mole ke falala [“kia Sehova,” NWT], tou Atua.” (2 Klk. 16:7, 9; 1 Hau 15:32) Kotea te ʼu ako maʼa tatou?

14. Kapau ʼe falala he tehina tupulaga kia Sehova, kotea ʼae ʼe ina fai anai? Pea kotea ʼona fua lelei ʼo mulimuli kia 1 Timoteo 4:12?

¹⁴ ʼU tehina tupulaga, kotou agavaivai pea mo haga falala kia Sehova. Neʼe kotou fakaha te faʼahi ʼaia ʼi takotou papitema, pea neʼe fiafia ai ia Sehova. ʼI te  temi leva ʼaeni, kotou haga hoko atu takotou falala kia Sehova. ʼI te ʼu tonu fuli ʼae ka kotou fai anai pe ʼe maʼuhiga, pe ʼe mole faʼa maʼuhiga, ohage la ko te gaue, ʼakotou fakatuʼutuʼu, peʼe ko te ʼu fakafiafia, ʼe tonu ai ke kotou kumi tokoni kia Sehova, kae mole kotou falala ki ʼokotou poto. Kotou kumi te ʼu tokoni ʼi te Tohi-Tapu ʼe alu tahi mo tokotou aluʼaga, pea kotou mulimuli ki ai. (Taag. 3:5, 6) ʼE kotou fakafiafiaʼi anai ia Sehova, pea ʼe falala atu anai kia koutou te ʼu tehina mo tuagaʼane ʼo te kokelekasio.—Lau ia 1 Timoteo 4:12.

15. Kotea te ʼu lakahala neʼe fai e te Hau ko Sosafate ʼo mulimuli kia 2 Koloniko 18:1-3; 19:2?

¹⁵ ʼUhi ʼe tou agahala fuli, ʼe feala pe ke tou fai ni lakahala, ʼo toe feia pe mo te ʼu tehina tupulaga. Kae ʼe hoko atu pe tatatou tauhi ʼae kia Sehova. Tou vakaʼi te faʼifaʼitaki ʼaeni ʼa te Hau ko Sosafate. ʼI tana kamata hau, neʼe ina kumi te ʼAtua ʼo tana tamai pea mo fakaʼapaʼapa ki ʼana fakatotonu. Pea neʼe ina toe fekauʼi he ʼu pule ke natou akoʼi te Lao ʼa Sehova ki te hahaʼi. (2 Klk. 17:4, 7) Logo la tana fia fakafiafiaʼi te loto ʼo Sehova, kae neʼe ina toʼo leva he ʼu tonu ʼe mole lelei. Pea neʼe fakatonutonuʼi ia ia e te polofeta ʼa Sehova. (Lau ia 2 Koloniko 18:1-3; 19:2.) Kotea te ako maʼa tatou?

16. Kotea te ʼu ako ʼe feala ke taʼofi e te ʼu tehina tupulaga mai te faʼifaʼitaki ʼo Rajeev?

¹⁶ ʼU tehina tupulaga, ʼe moʼoni ʼe feala ke faigataʼa hakotou fai ni tonu ʼe lelei. Kae ʼaua naʼa kotou lotovaivai ai. Kotou tali te ʼu tokoni ʼae ʼe fai atu, pea mo mulimuli ki ai. ʼE fakamatala fenei e te tehina tupulaga ko Rajeev: “ ʼI ni taʼu ki muʼa atu, neʼe mole au faʼa iloʼi te meʼa ʼae neʼe au fia fai ʼi toku maʼuli. Neʼe au leleiʼia age pe te faigaoʼi mo te ʼu fakafiafia, ʼi taku alu ki te ʼu fono mo taku faifakamafola.” Neʼe foaki leva e te tagata ʼafea kia ia he tokoni, ke metitasio ki te vaega ʼo 1 Timoteo 4:8. Neʼe tali leva e Rajeev te tokoni ʼaia ʼo ina filifili ai ke ina fakamuʼamuʼa tana tauhi ʼae kia Sehova. Hili ki ai ni taʼu, neʼe tagata faifekau fakaminisitelio ia Rajeev.

17. Kotea te manatu ʼa te ʼu tehina mo tuagaʼane ʼo ʼuhiga mo te ʼu tehina tupulaga ʼae ʼe natou fakahoko lelei tanatou gaue ʼi te kokelekasio?

¹⁷ ʼU tehina tupulaga, ʼe fiafia ia te ʼu tehina mo tuagaʼane ʼi te gaue fakatahi mo koutou. (Sofo. 3:9) ʼE natou leleiʼia takotou fiafia pea mo takotou faʼafai ʼi takotou fakahoko leleiʼi te ʼu gaue ʼae neʼe foaki atu. Pea ʼe natou ʼoʼofa ia koutou.—1 Soa. 2:14.

18. Kotea te manatu ʼa Sehova ʼo ʼuhiga mo te ʼu tehina tupulaga ʼae ʼe natou fakahoko lelei tanatou gaue ʼo mulimuli kia Taaga Lea 27:11?

¹⁸ Kotou manatuʼi ʼe ʼofa ia Sehova ia koutou. Pea ʼe falala atu he ʼe ina iloʼi ʼi te ʼu ʼaho fakamuli, ʼe ʼi ai anai he ʼu tupulaga kaugamalie ʼe natou tauhi fakafiafia anai kia te ia. (Pes. 110:1-3) Koia, kotou kataki fualoa ki ʼihi, pea mo lotolelei ʼo talitali ke foaki atu ni gaue. Moka kotou fai ni lakahala, kotou tali te ʼu tokoni ʼae ʼe fai atu, ohage pe ʼe ko Sehova ʼae ʼe ina akoʼi koutou. (Hep. 12:6) Pea kotou fakahoko lelei te ʼu gaue ʼae neʼe foaki atu, ke fiameʼameʼa ai ia Sehova ʼuhi ko koutou.—Lau ia Taaga Lea 27:11.