ALATIKE AKO 23
“Ke Tapuha Tou Huafa”
“[“Sehova,” MN], e tuu tou huafa o heegata!”—PES. 135:13.
KATIKO 10 Tou Vikiʼi Ia Sehova, Totatou ʼAtua
TE ʼU MANATU FAKANOUNOU *
1-2. Kotea te ʼu aluʼaga ʼae ʼe maʼuhiga ki te Kau Fakamoʼoni ʼa Sehova?
ʼE MAʼUHIGA kia tatou te fakalakatonuʼi ʼo te pule faʼitaliha ʼa te ʼAtua pea mo te fakatapuha ʼo tona huafa. ʼE tou leleiʼia te palalau ki te ʼu aluʼaga maʼuhiga ʼaia he ʼe ko tatou ko te Kau Fakamoʼoni ʼa Sehova. Kae ʼe tonu koa ke tou fakakehekeheʼi te ʼu aluʼaga maʼuhiga ʼaia? Kailoa ia.
2 ʼE tou mahino fuli ʼe tonu ke fakatapuha, peʼe fakamaʼa ia te huafa ʼo te ʼAtua mai te ʼu loi fuli ʼae neʼe fai ki tona huafa. ʼE tou toe iloʼi foki ʼe tonu ke fakalakatonuʼi te pule faʼitaliha ʼa Sehova, ko tona fakaʼuhiga ke fakamoʼoni ai ʼe ko tana pule ʼae ʼe lelei tokotahi. ʼE tonu ke tou tokaga lelei ki te ʼu aluʼaga maʼuhiga ʼaia ʼe lua.
3. Ka tou logo ki te huafa ʼae ko Sehova, ʼe tou manatu atu aipe kitea?
3 Ka tou logo ki te huafa ʼae ko Sehova, ʼe tou manatu atu aipe ki te ʼu meʼa fuli ʼo ʼuhiga mo ia, ʼo kau ki ai mo tana faʼahiga pule. Koia, ko te fakatapuha ʼo te huafa ʼo te ʼAtua, peʼe ko tona fakamaʼa mai te ʼu loi fuli neʼe fai ki ai, ʼe toe kau foki ki ai te fakamoʼoni ʼe ko tana pule ʼae ʼe lelei tokotahi. Ko te huafa ʼae ko Sehova ʼe ʼi ai tona pikipikiga mo tana faʼahiga pule ʼi tona ʼuhiga Tui ʼAliki mafimafi.—Vakaʼi te fakamatala ʼae ʼi te ʼa takai “ Te ʼu Faʼahi Kehekehe ʼo Te Fehuʼi Maʼuhiga.”
4. Kotea ʼae ʼe ui mai ia Pesalemo 135:13 ʼo ʼuhiga mo te huafa ʼo te ʼAtua? Pea kotea te ʼu fehuʼi ʼe tou tali anai ki ai ʼi te alatike ʼaeni?
4 Ko te huafa ʼo Sehova ʼe maʼoluga age ʼi te ʼu higoa fuli. (Lau ia Pesalemo 135:13.) He koʼe ʼe maʼuhiga ʼaupito te huafa ʼaia? Ko ʼanafea ʼae neʼe ʼuluaki fai ai ki tona huafa he ʼu fasituʼu? ʼE feafeaʼi tona fakatapuha e te ʼAtua? Pea kotea ʼae ʼe feala ke tou fai moʼo fakaha te moʼoni ʼo ʼuhiga mo tona huafa? Tou tali ki te ʼu fehuʼi ʼaia.
TE MAʼUHIGA ʼO HE HIGOA
5. Kotea te fehuʼi ʼe feala ke fai e ʼihi?
5 “Ke tapuha tou huafa.” (Mat. 6:9) Ko te faʼahi ʼaia ʼe kau ki te ʼu faʼahi maʼuhiga ʼae neʼe akoʼi mai e Sesu ke tou faikole ki ai. Kotea te fakaʼuhiga ʼo te ʼu palalau ʼaia ʼa Sesu? Ko te fakatapuha ʼe ko tona fakaʼuhiga ke fakamaʼoniʼoniʼi peʼe ke fakamaʼa. Kae ʼe feala ke ui fenei e ʼihi: “Ko te huafa ʼo te ʼAtua ʼe maʼoniʼoni mo maʼa, koia he koʼe koa ʼe tonu ke fakatapuha?” Ke tou tali ki te fehuʼi ʼaia, ʼe tonu ke tou mahino ki te maʼuhiga ʼo he higoa.
6. He koʼe ʼe maʼuhiga ia he higoa?
6 Ko he higoa ʼe mole ko he kupu pe ʼe tou tohi peʼe tou puʼaki. Tou tokagaʼi te meʼa ʼaeni ʼe ui ʼi te Tohi-Tapu: “Ko he matagafua ʼe lelei ʼe maʼuhiga age ia ʼi he ʼu koloa lahi.” (Taag. 22:1, MN; Ekl. 7:1) Ko te kupu Fakahepeleo ʼae neʼe fakaliliu ʼaki te kupu “matagafua” ʼe fakaʼuhiga ki “he higoa.” He koʼe ʼe maʼuhiga ʼaupito feia he higoa? Koteʼuhi ʼe tauhoa te higoa ʼo he tahi mo tona matagafua, ʼo feia mo te manatu ʼa te hahaʼi ʼo ʼuhiga mo ia. Koia, ko te meʼa ʼae ʼe maʼuhiga, ʼe mole ko te faʼahiga tohi peʼe puʼaki ʼo he higoa, kae ko te manatu ʼae ʼe maʼu e te hahaʼi moka natou logo ki te higoa ʼaia.
7. ʼE ʼulihi feafeaʼi e ʼihi ia te huafa ʼo te ʼAtua?
7 Ka tala e te hahaʼi ni loi ʼo ʼuhiga mo Sehova, ʼe natou ʼulihi ai tona huafa, peʼe ko tona matagafua. ʼI te ʼoloto ʼo Eteni, neʼe ʼuluaki ʼulihi ia te huafa ʼo te ʼAtua peʼe ko tona matagafua ʼaki ni loi. Tou vakaʼi pe ʼe kotea ʼae ʼe feala ke tou ako mai te meʼa ʼae neʼe hoko.
TE ʼULUAKI FAIFASITUʼU ʼO ʼUHIGA MO TE HUAFA ʼO TE ʼATUA
8. Kotea ʼae neʼe iloʼi e Atama mo Eva, pea kotea te ʼu fehuʼi ʼae ʼe feala ke tou fai?
8 Ko Atama mo Eva neʼe nā iloʼi ko te huafa ʼo te ʼAtua ko Sehova, pea neʼe lahi te ʼu aluʼaga neʼe nā iloʼi ʼo ʼuhiga mo Ia. Ohage la, neʼe ko Ia ʼae neʼe ina fakatupu ia meʼa fuli, pea neʼe Ina foaki te maʼuli kia naua, mo he Palatiso ke nā maʼuʼuli ai pea mo he ʼohoana haohaoa. (Sen. 1:26-28; 2:18) Kae neʼe nā haga fakaʼaogaʼi koa tonā ʼatamai haohaoa moʼo metitasioʼi te ʼu meʼa fuli ʼae neʼe fai e Sehova maʼa naua? Neʼe hoko atu koa tanā fakamalohiʼi tonā ʼofa mo tanā lotofakafetaʼi kia Ia ʼae ʼe ina fua te huafa ʼaia ko Sehova? ʼI te temi ʼae neʼe ʼahiʼahiʼi ai naua e te fili ʼo te ʼAtua, neʼe iloʼi lelei ai leva te tali ki te ʼu fehuʼi ʼaia.
9. ʼO mulimuli kia Senesi 2:16, 17 pea mo 3:1-5, kotea ʼae neʼe ui e Sehova ki te ʼuluaki taumatuʼa? Pea kotea ʼae neʼe fai e Satana ke mole kei nā maʼu ai he ʼu manatu ʼe lelei ʼo ʼuhiga mo Sehova?
9 Lau ia Senesi 2:16, 17 pea mo 3:1-5. Neʼe fakaʼaogaʼi e Satana ia he gata, pea mo fehuʼi fenei kia Eva: “Pe nee ui mooni atu e te Atua: E mole kolua kai anai ki te u akau fuli o te oloto?” ʼI tana fai te fehuʼi ʼaia, neʼe loi ia Satana ʼo ʼuhiga mo Sehova, ʼo tupu ai te mole kei maʼu e Eva he ʼu manatu ʼe lelei ʼo ʼuhiga mo te ʼAtua. ʼI tona fakahagatonu, neʼe ui age e Sehova neʼe feala hanā kai ki te ʼu fuʼu ʼakau fuli, gata pe ki te fuʼu ʼakau ʼe tahi. Pea neʼe lahi ʼosi te ʼu fuʼu ʼakau kehekehe neʼe maʼu ʼi te ʼoloto ʼo Eteni! (Sen. 2:9) Koia, ko Sehova ʼe ko he ʼAtua lotofoaki. Neʼe ko he fuʼu ʼakau pe ʼe tahi neʼe tapuʼi age e te ʼAtua kia Atama mo Eva ke mole nā kai ki ai. Koia, ʼaki te fehuʼi ʼae neʼe fai e Satana, neʼe nā manatu ai ko te ʼAtua ʼe mole lotofoaki. Neʼe lagi feʼekeʼaki fenei e Eva: “ ʼE ʼi ai koa he meʼa lelei ʼe mole loto e te ʼAtua ke au maʼu?”
10. Neʼe ʼulihi feafeaʼi e Satana te huafa ʼo te ʼAtua, pea kotea ʼona fua kovi?
10 ʼI te temi ʼae neʼe fai ai e Satana te fehuʼi ʼaia, neʼe kei fakalogo pe ia Eva kia Sehova. Neʼe ina tali age kia Satana ʼo ina toe ui te fakatotonu ʼae neʼe fai age e te ʼAtua. Pea neʼe ina toe ui age neʼe mole tonu ke nā fāfā ki te fuʼu ʼakau. Neʼe iloʼi lelei e Eva, kapau ʼe nā talagataʼa, pea ʼe nā mamate anai, ohage ko tona fakatokaga age e Sehova. Kae neʼe ui fenei age e Satana: “E mole kolua mamate anai.” (Sen. 3:2-4) ʼAki tana palalau ʼaia, neʼe ina ui ai ko Sehova ʼe gutuloi, pea neʼe ina ʼulihi ai te huafa ʼo te ʼAtua. Neʼe liliu ai ia Satana ko he tevolo, peʼe faifasituʼu. Ko Eva ʼae neʼe kakaʼi he neʼe tui kia Satana. (1 Tim. 2:14) Neʼe lahi age tana falala kia Satana ia Sehova. Neʼe ina fai ai te tonu ʼae ʼe kovi ʼosi, ke talagataʼa kia Sehova. Neʼe ina kamata kai ki te fuaʼi ʼakau ʼae neʼe tapuʼi. Hili ʼaia, neʼe ina foaki kia Atama.—Sen. 3:6.
11. Kotea te meʼa ʼae neʼe tonu ke fai e Atama mo Eva?
11 Fakakaukauʼi age muʼa te meʼa ʼae neʼe tonu ke ui age e Eva kia Satana. Ohage la, neʼe feala pe ke ina ui fenei: “ ʼE mole au iloʼi au koe, kae ʼe au iloʼi taku Tamai, ʼae ko Sehova. Pea ʼe au ʼofa ai mo au falala kia te ia. Ko meʼa fuli ʼae ʼe ma maʼu neʼe ina foaki mai. ʼI ʼau palalau pauʼu leva! Alu nei!” Neʼe lagi fiafia ia Sehova ʼi hana logo mai ki te fakaha e tona ʼofafine ʼofaina tona ʼofa mo tana nofo agatonu kia te ia. (Taag. 27:11) Kae neʼe mole ʼoʼofa ia Atama mo Eva kia Sehova. ʼI tanā mole ʼoʼofa agatonu ki tana Tamai, neʼe mole nā puipui ai tona huafa mai te ʼu faifasituʼu ʼa Satana.
12. Kotea ʼae neʼe fai e Satana ke lotolotolua ai ia Eva? Pea kotea ʼae neʼe mole fai e Atama mo Eva?
12 Ohage ko te ʼu faʼahi ʼae neʼe tou vakaʼi, ko Satana neʼe ina kamata ʼulihi ia te huafa ʼo te ʼAtua ʼi tana faiga ʼae ke lotolotolua ia Eva ʼo ʼuhiga mo Sehova. Kae meʼa fakaʼofaʼofa neʼe mole
puipui e Atama mo Eva te huafa ʼo Sehova peʼe ko tona matagafua. Neʼe nā fakalogo kia Satana kae nā talagataʼa ki tanā Tamai. ʼE toe tatau pe ia te faʼahiga fai ʼa Satana ia ʼaho nei. ʼE ina ʼulihi te huafa ʼo Sehova ʼaki ni fasituʼu. Ko natou ʼae ʼe natou tui ki te ʼu loi ʼaia ʼe faigafua pe tanatou fakafisi ki te pule faitotonu ʼa Sehova.KO SEHOVA ʼE INA FAKATAPUHA TONA HUAFA
13. ʼE fakaha feafeaʼi ia Esekiele 36:23 te logo maʼuhiga ʼae ʼe tuʼu ʼi te Tohi-Tapu?
13 ʼE mole fai koa e Sehova he meʼa ki te ʼu fasituʼu ʼae ʼe fai ʼo ʼuhiga mo ia? ʼE fakaha lelei ʼi te Tohi-Tapu te meʼa ʼae ʼe fai e Sehova moʼo fakamaʼa tona huafa mai te ʼu fasituʼu ʼae neʼe fai ki ai ʼi Eteni. (Sen. 3:15) ʼI tona fakahagatonu, ʼe feala ke tou fakanounou fenei te logo ʼae ʼe tuʼu ʼi te Tohi-Tapu: Ko Sehova ʼe ina fakatapuha tona huafa ʼaki te Puleʼaga ʼae ʼe takitaki e tona ʼAlo, pea ko tona finegalo ʼe ko te toe fakatuʼu ia te faitotonu mo te tokalelei ʼi te kele. Ko te Tohi-Tapu ʼe tokoni mai ke tou iloʼi pe ʼe kotea ʼae ʼe fai e Sehova moʼo fakatapuha, peʼe “fakamaʼoniʼoniʼi” tona huafa.—Lau ia Esekiele 36:23.
14. Ko te tali ʼa Sehova ki te agatuʼu ʼae ʼi Eteni, ʼe fakatapuha feafeaʼi ai tona huafa?
14 Ko Satana ʼe ina faiga malohi ke ina taʼofi te fakahoko e Sehova Tana fakatuʼutuʼu. Kae ʼe to noa ʼana faiga fuli. ʼE fakaha ʼi te Tohi-Tapu te meʼa ʼae ʼe fai e Sehova, pea ʼe fakamoʼoni ai ʼe ko he Tamai ʼe ʼofa moʼoni ia tatou pea ʼe ko he Takitaki ʼe lelei. ʼI tona fakahagatonu, ʼe lotomamahi ia Sehova ʼi te agatuʼu ʼa Satana pea mo natou ʼae neʼe lagolago ki ai. (Pes. 78:40) Kae ʼe ina fakatokatoka te aluʼaga ʼaia ʼaki te poto, mo te faʼa kataki pea mo te faitotonu. ʼE ina toe fakaʼaogaʼi tona mafimafi ʼi hona ʼu aluʼaga kehekehe. Kae tafito, ʼe ha lelei tona ʼofa ʼi te ʼu meʼa fuli ʼae ʼe ina fai. (1 Soa. 4:8) Neʼe mole he temi neʼe fakagata ai e Sehova ia tana fakatapuha tona huafa.
15. ʼE feafeaʼi te hoko atu e Satana tana faifasituʼu ki te huafa ʼo te ʼAtua ia ʼaho nei, pea kotea tona fua?
15 Ia ʼaho nei, kei hoko atu pe e Satana tana faifasituʼu ki te huafa ʼo te ʼAtua. ʼE ina kakaʼi te hahaʼi ke natou tui ko Sehova ʼe mole ko he ʼAtua ʼe mafimafi, mo poto, mo faitotonu pea mo fonu ʼi te ʼofa. Ohage la, ʼe faigaʼi e Satana ke tui te hahaʼi ko Sehova neʼe mole ina Fakatupu
ia meʼa fuli. Pea ʼe ina toe faigaʼi ke ina fakalotoʼi ia natou ʼae ʼe tui ki te ʼAtua, ko te ʼu lao ʼa te ʼAtua ʼe mole faitotonu pea ʼe mamafa fau. ʼE ina toe akoʼi ki te hahaʼi ko Sehova ʼe ko he ʼAtua agakovi, he ʼe ina tutu te hahaʼi ʼi ʼifeli. Ko natou ʼae ʼe tui ki te ʼu loi ʼaia, ʼe faigafua pe tanatou fakafisi ki te pule faitotonu ʼa Sehova. ʼO kaku pe ki tona pulihi, ʼe hoko atu pe anai e Satana tana faigaʼi ke faifasituʼu ki te ʼAtua pea mo fakamaliu kehe tatou mai ia Sehova. ʼE ke lava tekeʼi anai koa ʼana faiga?TE MEʼA ʼAE ʼE TONU KE KE FAI ʼO ʼUHIGA MO TE FEHUʼI MAʼUHIGA ʼAIA
16. Kotea te meʼa ʼae ʼe feala ke ke fai, kae neʼe mole fai e Atama mo Eva?
16 Ko Sehova ʼe ina fakagafua ki he ʼu hahaʼi agahala ke natou tokoni ki te fakatapuha ʼo tona huafa. Koia, ʼe feala ke ke fai te meʼa ʼae neʼe mole fai e Atama mo Eva. ʼE feala ke ke fakaha te moʼoni ʼo ʼuhiga mo Sehova, ʼe ko he ʼAtua maʼoniʼoni, mo faitotonu, mo agalelei pea mo fonu ʼi te ʼofa. (Esa. 29:23) Pea ʼe feala ke ke fakaha ʼe ke loto ke liliu ia Sehova ko tou pule. Ohage la, ʼe feala ke ke fakamahino ki te hahaʼi ko tana pule ʼe faitotonu, ʼe feala ke ina fakatuʼu te tokalelei, pea mo foaki mai te maʼuli fiafia ki te hahaʼi fuli.—Pes. 37:9, 37; 146:5, 6, 10.
17. Neʼe fakaha feafeaʼi e Sesu te huafa ʼo tana Tamai?
17 Ka tou fakaha te moʼoni ʼo ʼuhiga mo te huafa ʼo Sehova, ʼe tou faʼifaʼitakiʼi ai ia Sesu. (Soa. 17:26) Neʼe fakaha e Sesu te huafa ʼo tana Tamai. ʼO feafeaʼi? Neʼe ina fakaʼaogaʼi, pea neʼe ina fakaha ki te hahaʼi pe ʼe ko ai moʼoni ia Sehova. Ohage la, neʼe fakafeagai ki te kau Faliseo he neʼe natou ui ko Sehova ʼe ko he ʼAtua ʼe agakovi, ʼe mole manavaʼofa, ʼe mamafa fau ʼana fakatotonu, pea ʼe mamaʼo mai te hahaʼi. Neʼe tokoni ia Sesu ki te hahaʼi ke natou mahino ko tana Tamai ʼe fakapotopoto, mo faʼa kataki, mo fonu ʼi te ʼofa pea mo lotofakamolemole. Pea ʼaki tana fakaha te ʼu kalitate ʼo tana Tamai ʼi te ʼaho fuli, neʼe toe tokoni ia Sesu ki te hahaʼi ke hage ʼe natou “sio” kia Sehova.—Soa. 14:9.
18. ʼE feala ke tou fakaha feafeaʼi te ʼu loi pea mo te ʼu fasituʼu ʼae neʼe fai kia Sehova?
18 Ohage ko Sesu, tou akoʼi ki te hahaʼi te ʼu meʼa ʼae kua tou iloʼi ʼo ʼuhiga mo Sehova, ʼo fakamahino age ʼe agalelei pea mo fonu ʼi te ʼofa. ʼE tou fakaha ai te ʼu loi mo te ʼu fasituʼu ʼae neʼe fai ki te ʼAtua. ʼE tou fakatapuha ai tona huafa, he ʼe tou tokoni ki te hahaʼi ke natou mahino ko Efe. 5:1, 2) Ka tou tokoni ki te hahaʼi, ʼaki ʼatatou palalau mo tatatou aga, ke natou iloʼi pe ko ai moʼoni te ʼAtua, ʼe tou kau ai ki te fakatapuha ʼo tona huafa. Ka tou tokoni ki te hahaʼi ke natou liʼaki te ʼu manatu hala ʼo ʼuhiga mo te ʼAtua, ʼe tou fakalakatonuʼi ai tona huafa. * Pea ʼe tou toe fakamoʼoni ai ʼe feala pe ki te ʼu hahaʼi heʼe haohaoa ke natou nonofo agatonu.—Sopo 27:5.
tona huafa ʼe maʼoniʼoni. Pea ʼe feala ke tou faʼifaʼitakiʼi mo tatou ia Sehova, logo la ʼe tou heʼe haohaoa. (19. ʼE tokoni feafeaʼi mai ia Esaia 63:7 ke tou mahino pe ʼe kotea tatatou fakatuʼutuʼu tafito moka tou akoʼi te hahaʼi?
19 ʼE ʼi ai te tahi faʼahi ʼe feala ke tou fai moʼo fakatapuha te huafa ʼo te ʼAtua. Ka tou akoʼi ki te hahaʼi te ʼu moʼoni ʼae ʼi te Tohi-Tapu, ʼe tou fakamaʼuhigaʼi te manatu ʼae ʼe tonu ke pule ia Sehova ʼi te ʼatulaulau, koteʼuhi ko ia te Tuʼi ʼAliki ʼo te ʼatulaulau. ʼE moʼoni te manatu ʼaia. Logo la ʼe maʼuhiga ke tou akoʼi ki te hahaʼi te ʼu lao ʼa te ʼAtua, kae ko tatatou fakatuʼutuʼu tafito ke tou tokoni kia natou ke natou ʼoʼofa kia Sehova tatatou Tamai pea mo nonofo agatonu. Koia, ʼe tou palalau tafito anai ki ʼona kalitate, ʼo fakamahino te ʼuhiga moʼoni ʼo tona huafa, ʼae ko Sehova. (Lau ia Esaia 63:7.) ʼE tou tokoni ai ki te hahaʼi ke natou ʼoʼofa kia Sehova pea ke natou nonofo agatonu kia te ia.
20. Kotea ʼae ka tou palalau anai ki ai ʼi te alatike ʼae ka hoa mai?
20 ʼI te alatike ka hoa mai, ʼe tou vakaʼi lelei age anai pe ʼe feafeaʼi hatatou fakakololiaʼi te huafa ʼo te ʼAtua pea mo taki mai te hahaʼi kia te ia ʼaki tatatou aga mo tatatou faiako.
KATIKO 2 Ko Tou Huafa Ko Sehova
^ pal. 5 Ko te fehuʼi fea ʼae ʼe maʼuhiga ki te hahaʼi mo te ʼu ʼaselo fuli? He koʼe ʼe maʼuhiga pea kotea ʼae ʼe tonu ke tou fai ke tou tali ki ai? ʼE fakamalohi anai ʼatatou felogoi mo Sehova moka tou vakaʼi lelei te fehuʼi ʼaia.
^ pal. 18 Neʼe tau ui ʼi ʼatatou tohi ʼe mole tonu ke fakalakatonuʼi te huafa ʼo Sehova, koteʼuhi neʼe heʼeki he tahi neʼe ina fakafihiʼi te toʼo e te ʼAtua te huafa ʼae ko Sehova. Kae neʼe fetogi te manatu ʼaia ʼi te taʼu 2017, ʼi te fakatahi ʼae ʼe fai ʼi te taʼu fuli. Neʼe ui fenei e te pelesita: “Moʼo fakanounou, ʼe mole hala tatatou faikole ke fakalakatonuʼi te huafa ʼo te ʼAtua, peʼe ko tona matagafua, ʼuhi ko te ʼu fasituʼu fuli neʼe fai kia te ia.”—Vakaʼi te emisio Televisio JW ʼo Sanualio 2018 (Fakafalani). Alu ki te jw.org®, ʼi te BIBLIOTHÈQUE > JW TÉLÉDIFFUSION.
^ pal. 62 FAKAMATALA ʼO TE ʼU PĀKI: Ko te Tevolo neʼe faifasituʼu ki te ʼAtua ʼi tana ui ʼae kia Eva ko te ʼAtua ʼe gutuloi. Hili ʼaia, neʼe hoko atu pe te fakamafola e Satana te ʼu loi ʼo ʼuhiga mo te ʼAtua, ʼo ina faiga tafito ke tui te hahaʼi neʼe mole ko te ʼAtua ʼae neʼe ina fakatupu te tagata, pea ʼe agakovi.
^ pal. 64 FAKAMATALA ʼO TE ʼU PĀKI: ʼE taki e he tehina he ako Tohi-Tapu, pea ʼe ina fakamaʼuhigaʼi te ʼu kalitate ʼo te ʼAtua.