Te ʼu Fehuʼi ʼa Te Kau Lautohi
Ko te ʼu kalitate ʼae ʼe tuʼu ia Kalate 5:22, 23, ʼe ko te ʼu kalitate pe koa ʼaia ʼae ʼe kau ki “te fua ʼo te laumalie”?
Ko te ʼu vaega ʼaia ʼe palalau kia kalitate ʼe hiva ʼe kau ki “te fua ʼo te laumalie”: Ko “te ʼofa, te fiafia, te tokalelei, te kataki fualoa, te agaʼofa, te agalelei, te tui, te agamalū pea mo te lotololomi.” Kae, ʼe mole ko te gataʼaga pe ʼaia ʼo te ʼu kalitate ʼae ʼe feala ke tokoni mai e te laumalie ʼa te ʼAtua ke tou maʼu.
Koʼeni te ʼu meʼa ʼae neʼe tohi e te apositolo ko Paulo ʼi te ʼu vaega ʼi muʼa atu ʼo ʼuhiga mo te ʼu gaue ʼo te kakano. Ko “te ʼu gaue ʼo te kakano . . . ʼe ko te ʼu felaveʼi fakasino heʼe ʼaoga, mo te ʼu aga heʼe maʼa, mo te ʼu aga fakalialia, mo te tauhi taula ʼatua, mo te faifakalauʼakau, mo te fehiʼa, mo te kē, mo te maheka, mo te itaita, mo te fefihiʼaki, mo te ʼu maveuveu, mo te ʼu magaʼi lotu, mo te manumanū, mo te inu kava fakavalevale, mo te ʼu fakafiafia fakavalevale pea mo te tahi ʼu aga ʼe tatau.” (Kal. 5:19-21) Neʼe feala pe kia Paulo ke ina hilifaki ʼihi atu aga ʼe kau ki “te ʼu gaue ʼo te kakano,” ohage ko ʼae ʼe tuʼu ia Kolose 3:5. ʼO toe feia, hili tana fakaha te ʼu kalitate ʼe hiva ʼo te fua ʼo te laumalie, neʼe ina ui fenei: “ ʼE mole he lao ʼe fakafeagai ki te ʼu faʼahi ʼaia.” Koia, ko Paulo neʼe mole fia palalau ki te ʼu kalitate fuli ʼae ʼe feala ke tou maʼu ʼaki te tokoni ʼo te laumalie maʼoniʼoni.
ʼE tou mahino ki te faʼahi ʼaia, ka tou fakatatau te fua ʼo te laumalie mo te fua ʼo te malama ʼae neʼe palalau ki ai e Paulo ki te kokelekasio ʼo Efeso. Neʼe ina tohi fenei: “ ʼE ha te ʼu fua ʼo te malama ʼi te ʼu agalelei fuli, mo te faitotonu pea mo te moʼoni.” (Efe. 5:8, 9) Koia ko te “agalelei,” ʼo feia mo te faitotonu pea mo te moʼoni, ʼe kau ki “te fua ʼo te malama” pea mo “te fua ʼo te laumalie.”
ʼE toe feala ke tou mahino ki te faʼahi ʼaia, ka tou fakatautau te fua ʼo te laumalie mo te ʼu kalitate ʼe ono ʼaeni, ʼae neʼe fakalotomalohiʼi e Paulo ke maʼu e Timoteo: “Ke ke faiga fakamalotoloto ke ke fakaha te faitotonu, mo te pipiki ʼae ki te ʼAtua, mo te tui, mo te ʼofa, mo te faʼa kataki pea mo te agamalū.” (1 Tim. 6:11) Ko te ʼu kalitate pe ʼe tolu ʼae ko te ʼofa, mo te agamalū ʼae ʼe kau ki “te fua ʼo te laumalie.” Kae neʼe toe ʼaoga kia Timoteo te tokoni ʼa te laumalie, ke ina maʼu te tahi ʼu kalitate ʼae ko te faitotonu, mo te pipiki ʼae ki te ʼAtua, pea mo te faʼa kataki.—Vakaʼi mo Kolose 3:12; 2 Petelo 1:5-7.
Koia ia Kalate 5:22, 23, ʼe mole palalau ai ki te ʼu kalitate fuli ʼae ʼe tonu ke maʼu e te kau Kilisitiano. Ko te laumalie ʼa te ʼAtua ʼe feala ke tokoni mai ke tou maʼu te ʼu kalitate hiva ʼaia. Kae ʼe tonu ke tou gaueʼi te tahi ʼu kalitate, ke tou liliu ai ko he ʼu Kilisitiano fotufotuʼa pea mo “kofuʼi ia te ʼulugaaga foʼou ʼae neʼe fakatupu ʼo mulimuli ki te finegalo ʼo te ʼAtua pea ʼe fakatafito ki te faitotonu mo te agatonu moʼoni.”—Efe. 4:24.