Tou Foimo Fakalogo Moka Pupuhi Te ʼu Fakatagi Pupuhi
ʼE TOU tui papau fuli ʼe takitaki e Sehova tana hahaʼi, pea ʼe ina foaki kia natou te meʼa ʼae ʼe ʼaoga ke natou nonofo ovi ai kia te ia lolotoga “te ʼu ʼaho fakamuli” ʼaeni. (2 Tim. 3:1) Kae ʼe tonu foki ke tou fakalogo kia Sehova. ʼE feala ke tou fakatatau totatou aluʼaga mo ʼae ʼa te kau Iselaele ʼi te toafa. Neʼe tonu ke natou foimo fakalogo moka natou logo ki te pupuhi ʼo te ʼu fakatagi pupuhi e te kau pelepitelo.
Neʼe fakatotonu e Sehova kia Moisese ke ina faʼu te ʼu fakatagi pupuhi siliva ʼe lua, moʼo fakatahiʼi te hahaʼi pea mo fakaha ai te mavae ʼa te nofoʼaga. (Num. 10:2) Neʼe pupuhi e te kau pelepitelo te ʼu fakatagi pupuhi ʼi he ʼu leʼo kehekehe, ʼo mulimuli ki te meʼa ʼae neʼe tonu ke fai e te hahaʼi. (Num. 10:3-8) ʼE toe feia ia ʼaho nei, ko te ʼu kaugana ʼa te ʼAtua ʼe takitaki natou ʼi ni faʼahiga fakatuʼutuʼu kehekehe. ʼE tou vakaʼi anai te ʼu fakatuʼutuʼu ʼaeni ʼe tolu, ʼe fakamanatuʼi mai ai te pupuhi ʼo te ʼu fakatagi pupuhi ʼo te temi muʼa: ʼE fakaafe te kau atolasio ʼa Sehova ke natou kau ki te ʼu fakatahi lalahi, ko te kau tagata ʼafeā ʼe akoako natou, pea ʼi ʼihi temi ʼe fai e te ʼu kokelekasio fuli he ʼu fetogi.
ʼE FAKAAFE TATOU KE TOU FAKATAHITAHI
Ka neʼe loto e Sehova ke fakatahitahi “te hahaʼi katoa” ʼi te huʼaga ʼo te tapenakulo, ʼae neʼe tuʼu ʼi te potu esite, neʼe pupuhi e te kau pelepitelo te ʼu fakatagi pupuhi ʼe lua. (Num. 10:3) Ko te ʼu telepi fuli ʼae neʼe vahe fa pea neʼe natou fakatuʼu tonatou nofoʼaga ʼi te takafoli ʼo te tapenakulo, neʼe natou logo ki te pupuhi ʼo te ʼu fakatagi pupuhi ʼaia. Ko natou ʼae neʼe nonofo ovi ki te huʼaga ʼo te tapenakulo, neʼe mole tuai tanatou ʼomai ki ai. Kae kia natou ʼae neʼe nonofo mamaʼo atu, neʼe ʼaoga kia natou he temi, pea neʼe tonu ke natou faiga malohi ke natou kaku mai. Neʼe loto e Sehova ke natou fakatahitahi fuli ʼo fakalogo ki te ʼu fakatotonu ʼae ka ina foaki age kia natou.
Ia ʼaho nei, ʼe mole tou fakatahitahi ki he tapenakulo. Kae ʼe kei fakaafe pe tatou ke tou fakatahitahi, ohage la moka hoko te ʼu fakatahi fakafenua peʼe ko he ʼu fono makehe. ʼE akoʼi ai tatou pea ʼe foaki mai he ʼu tokoni ʼe maʼuhiga. ʼI te malama katoa, ʼe tou maʼu ai he polokalama ʼe tahi. Ko natou ʼae ʼe natou tali ia te fakaafe ʼaia, ʼe natou fiafia ʼi tanatou toe fakatahi mo ʼihi atu kau atolasio ʼa Sehova. Ko ʼihi ʼe ʼomai mai mamaʼo. Kae ʼe natou fiafia fuli ʼi tanatou faiga ʼae ke natou kau ki ai.
Kae ʼe feafeaʼi kia natou ʼae ʼe nonofo ʼi he ʼu koga meʼa mamaʼo pea ʼe mole feala ke natou kau ki te ʼu fakatahi lalahi ʼaia? ʼAki te haʼele ki muʼa ʼo te tekenolosia, tokolahi ia natou ʼaia ʼe feala ke natou maʼu te polokalama ohage pe ko tatou, pea ʼe hage pe ʼe natou fakatahi mo tatou. Ohage la, ʼi te ʼaʼahi ʼo te fakafofoga ʼo te pilo fakamalamanei, neʼe fakatuʼutuʼu e te filiale ʼo Bénin he fono makehe, pea neʼe feala ke mulimuli ki ai ʼi te Neti ʼihi ʼo te kolo ko Arlit, ʼi Niger. Pea ʼi te kolo ʼaia, ʼae ʼe tuʼu ʼi te Toafa ʼo Sahara, ko te toko ʼuafulu-ma-tahi Kau Fakamoʼoni mo
ʼihi hahaʼi neʼe natou fia iloʼi te moʼoni, neʼe natou fakatahitahi ke natou mulimuli ki te polokalama ʼaia. Logo la tanatou nonofo mamaʼo ʼaia, kae neʼe hage pe neʼe natou fakatahi mo te toko 44 131 ʼi Bénin. Neʼe tohi fenei e te tehina: “ ʼE matou fakamalo lahi atu ʼi te fakatuʼutuʼu ʼaia ke feala ai hamatou mulimuli ki te polokalama. ʼE toe fakaha ai tokotou ʼofa mamahi kia matou.”ʼE FAKAAFE TE KAU TAGATA ʼAFEĀ
Ka pupuhi e te kau pelepitelo Iselaele he fakatagi pupuhi pe ʼe tahi, neʼe gata pe ki “te u pule o te toko afe o Iselaele” ʼae neʼe tonu ke fakatahitahi ʼi te muʼa tapenakulo. (Num. 10:4) Neʼe foaki ai e Moisese kia natou he ʼu fakatuʼutuʼu pea neʼe ina akoako natou. Neʼe tokoni ai kia natou ke natou lava fakahoko ʼonatou maʼua ʼi ʼonatou telepi. Ka na pau la neʼe ke kau ʼi te ʼu pule ʼaia, neʼe ke faiga malohi koa ke ke kau ki te ako ʼaia?
Ia ʼaho nei, ko te kau tagata ʼafeā ʼo te ʼu kokelekasio ʼe mole ko he ʼu “pule.” ʼE mole natou puleʼi te faga ovi ʼa te ʼAtua ʼae neʼe tuku age kia natou. (1 Pet. 5:1-3) Kae ko te kau tagata ʼafeā ʼe natou faiga fakamalotoloto ke natou taupau te faga ovi ʼa te ʼAtua. Koia ʼae ʼe natou tali leleiʼi ai te ʼu akoako ʼae ʼe fakaafe natou ki ai, ohage la ko te Ako ʼo Te Minisitelio ʼo Te Puleʼaga. ʼE akoʼi ai natou ke natou fakahoko ʼonatou maʼua. Kotea ʼona fua? ʼE malohi ai te maʼuli fakalaumalie ʼo te kokelekasio. Logo la neʼe mole ke kau ki te ako ʼaia, kae ʼe mahino ia ʼe ke maʼu ai ni fua lelei mai te ako ʼae neʼe kau ki ai te kau tagata ʼafeā ʼo tau kokelekasio.
ʼE FAKAAFE TATOU KE TOU FAI NI FETOGI
ʼI ʼihi temi, ko te kau pelepitelo Iselaele neʼe natou fetogitogi te malohi ʼo tanatou pupuhi te ʼu fakatagi pupuhi. ʼI te logo ki ai ʼo te nofoʼaga ʼo Iselaele, neʼe natou mahino ai neʼe loto e Sehova ke natou mavae. (Num. 10:5, 6) Neʼe kua ʼosi fakatuʼutuʼu lelei tanatou mavae ʼaia, kae ki te ʼu famili takitokotahi neʼe ko he toe gaue lahi neʼe tonu ke natou fai. ʼI ʼihi temi, ko ʼihi neʼe mole lagi natou fia mavae. Kotea tona tupuʼaga?
Neʼe lagi natou putuputuʼia te pupuhi ʼo te ʼu fakatagi pupuhi pea mo fakapunamaʼuli. ʼE ui fenei ʼi te Tohi-Tapu: “Kapau nee tuu te ao i oluga o te tapenakulo . . . nee nonofo te u fanau a Iselaele i onatou falela.” ʼI ʼihi temi, “nee tuu te ao mai te afiafi o kaku ki te uhu.” Pea ʼi ʼihi temi, neʼe tuʼu te ʼao “lolotoga aho e lua, pee ko he mahina e tahi,” peʼe laka atu. (Num. 9:21, 22) Neʼe tuʼa fia te fehikiʼaki ʼo te nofoʼaga ʼo Iselaele? Ia Numelo kapite 33 ʼe palalau ai ki te ʼu koga meʼa ʼe 40 neʼe fakatuʼu ai e te kau Iselaele tonatou nofoʼaga.
Ko ʼihi neʼe lagi natou maʼu he koga meʼa ʼe malumalu. Neʼe lagi natou leleiʼia te koga meʼa ʼaia ʼi te “toafa lahi mo fakamatakutaku” ʼaia. (Tet. 1:19) Neʼe feala ke natou manatu ai ʼe mole natou fimalie anai ʼaki te ʼu fetogi ʼaia.
ʼI te temi ʼae neʼe kamata mavae ai te ʼu telepi, neʼe lagi faigataʼa ki ʼihi tanatou talitali ki tonatou temi mavae. Neʼe natou logo fuli ki te pupuhi ʼo te ʼu fakatagi pupuhi, kae neʼe mole feala ke natou mavae fuli ai ʼi he temi ʼe tahi. ʼI te ʼuluaki pupuhi ʼo te ʼu fakatagi pupuhi, neʼe tonu ke mavae ai te ʼu telepi ʼo te esite, ʼae ko Suta, mo Isakale pea mo Sapulone. (Num. 2:3-7; 10:5, 6) Hili tanatou mavae ʼaia, neʼe tonu ki te kau pelepitelo ke natou pupuhi te ʼu fakatagi pupuhi, ko tona tuʼa lua ʼaia, moʼo fakaha ai ki te ʼu telepi ʼe tolu ʼo te saute ʼe tonu leva ke natou mavae. Ko te kau pelepitelo neʼe natou haga fai feia ʼo kaku ki te mavae ʼo te nofoʼaga katoa.
Ko ʼihi fetogi ʼi te kautahi neʼe faigataʼa koa kia koe? Neʼe lagi ke manatu ʼe lahi fau te ʼu fetogi pea ʼe fakapunamaʼuli. Peʼe lagi neʼe ke leleiʼia te faʼahiga fai ʼi muʼa atu, pea neʼe mole ke fia fetogi. Tatau aipe pe ʼe kotea te ʼu tupuʼaga, kae neʼe hage kia koe neʼe ʼahiʼahiʼi ai tau faʼa kataki, pea neʼe ʼaoga ai he temi fualoa ke ke fetogi ai. Kae kapau ʼe tou faiga ke tou mulimuli ki te ʼu fetogi ʼaia, ki muli age ʼe tou sisio pe anai ki te tapuakinaʼi ʼo tatou e te ʼAtua.
ʼI te temi ʼo Moisese, neʼe takitaki e Sehova te hahaʼi tagata, mo fafine pea mo te ʼu fanau ʼe toko miliona ʼi te toafa. Kapau neʼe mole foaki e Sehova ni fakatotonu, neʼe natou mamate ai. Ia ʼaho nei, ko te ʼu tokoni ʼae ʼe foaki mai e Sehova ʼe feala ke haofaki ai tatou ʼi te faʼahi fakalaumalie, ʼi te ʼu ʼaho fakamuli ʼaeni. ʼE toe tokoni mai ke tou fakaovi kia te ia pea mo taupau he tui ʼe malohi. Koia ʼae ʼe tonu ai ke tou mulimuli ki te faʼifaʼitaki ʼa te kau Iselaele. ʼI tanatou logo ki te pupuhi e te kau pelepitelo te ʼu fakatagi pupuhi, neʼe natou fakalogo atu aipe!