TE PULEʼAGA ʼAE KA INA PULIHI TE ʼU FAIGATAʼAʼIA
“Ke Hoko Mai Tou Puleʼaga”
ʼE fakaʼamu e te Kautahi ʼo te ʼu Puleʼaga ke logo tahi te hahaʼi mo natou fefakaʼapaʼapaʼaki pea ke natou puipui te kele. Kotea ia tona tupuʼaga? Koteʼuhi “kua fetogi ia te ʼaele, kua lahi te ʼu kutuga faifakapo, te ʼu fihi mo te heʼe faitotonu, te ʼu fakahoko agatuʼu mo te ʼu mahaki faigataʼa. Pea kua kaugā malie ʼaupito te hahaʼi ʼe natou feholaki mai ʼonatou fenua.” Ko te tala manatu ʼaeni ʼo te tagata ko Maher Nasser ʼi te nusipepa Chronique ONU.
Neʼe loto e ʼihi ke fakatuʼu he puleʼaga ʼe tahi ke pule ai ki te malamanei katoa. Neʼe kau ia natou ʼaia ia te tagata faifilosofia mo faipolitike Italia ko Dante (1265-1321) pea mo te tagata poto ko Albert Einstein (1879-1955). Neʼe manatu ia Dante ʼe mole tologa anai he tokalelei koteʼuhi ʼe mole he logo tahi ʼi te faʼahi fakapolitike. Neʼe ina faʼifaʼitakiʼi te ʼu palalau ʼa Sesu ʼi tana ui ʼae “ ʼe to anai he puleʼaga mo kapau ʼe fetauʼaki pe tana hahaʼi.”—Luka 11:17.
Neʼe fai te tohi e Albert Einstein ki te Fakatahiʼaga ʼo te Kautahi ʼo te ʼu Puleʼaga ʼi te hili ʼo te Lua Tau Fakamalamanei, ʼae neʼe fakapa ai foʼi pulu fakanukeleʼea ʼe lua. Neʼe tohi fenei ai: “ ʼE tonu ki te Kautahi ʼo te ʼu Puleʼaga ke natou foimo fai he ʼu fakatuʼutuʼu ʼe ʼaoga moʼo lagaʼi he puleʼaga fakamalamanei. ʼE hoki fimalie ai anai te malamanei.”
Kae ʼe aga fakahagatonu koa anai te kau faipolitike ʼo te puleʼaga fakamalamanei ʼaia? ʼE natou agatonu koa anai ki ʼanatou fakapapau? Peʼe ʼe natou hage pe anai ko te ʼu pule ʼae ʼe kovi tanatou takitaki? Koʼeni te manatu ʼa te tagata faihisitolia Pilitania: Ko te maʼu tuʼulaga ʼa he tagata ʼe ina ʼekenaki te agakaka, kae ʼe feafeaʼi age la moka maʼoluga ake leva tona tuʼulaga.
Koia, ʼe tonu muʼa ke felogoi tahi te tagata pea hoki feala leva ke maʼuli ʼi te tokalelei mo te logo tahi. Kae ʼe feala koa ke hoko te faʼahi ʼaia? ʼE ʼio ki ai te Tohi-Tapu. ʼE hoko feafeaʼi anai? ʼAki he puleʼaga ʼe fakatuʼu e te ʼAtua kae mole ko he puleʼaga fakamalamanei ʼa he kau faipolitike agakaka. ʼE pule anai ia te ʼAtua ki te tagata, koteʼuhi ʼe ko ia pe ʼae ʼe tuha mo te fealagia ʼaia. Pea ʼe fakahigoa te puleʼaga ʼaia ʼi te Tohi-Tapu ko “te Puleʼaga ʼo te ʼAtua.”—Luka 4:43.
“KE HOKO MAI TOU PULEʼAGA”
Neʼe talanoa ia Sesu ki te Puleʼaga ʼo te ʼAtua ʼi tona faikole faʼifaʼitaki: “Ke hoko mai tou puleʼaga. Ke fai tou finegalo ʼi te kele.” (Mateo 6:9, 10) ʼEi, ʼe fakahoko anai e te Puleʼaga ʼo te ʼAtua ia te finegalo ʼo te ʼAtua ʼi te kele, kae mole ko te finegalo ʼo te tagata ʼae ʼe manatu pe kia ia totonu pea mo fia pule.
ʼE toe fakahigoa ia te Puleʼaga ʼo te ʼAtua ko “te Puleʼaga ʼo selo.” (Mateo 5:3) Kotea ia tona tupuʼaga? ʼE moʼoni ʼe pule anai ia te Puleʼaga ki te kele. Kae ʼe mole pule anai mai te kele, ʼe pule anai mai selo. Koia, ʼe mole kei ʼaoga leva ke fakapaʼaga te puleʼaga ʼaia. ʼE mole koa la ko he logo fakalotofimalie ʼaia ki te tagata?
Ka tou palalau ki he “puleʼaga,” ʼe maʼua ke ʼi ai he hau moʼona taki. Pea ʼe ko Sesu Kilisito te Hau ʼo te Puleʼaga ʼo te ʼAtua. Neʼe ko te ʼAtua ʼae neʼe ina foaki age te pule. ʼE ui fenei ʼi te Tohi-Tapu ʼo ʼuhiga mo Sesu:
-
“ ’E hili anai te pule ki tona fugaʼuma . . . ’E mole ’i ai anai he gata’aga ’o te lahi ʼo tona pule pea mo te tokalelei.”—Esaia 9:6, 7, MN.
-
Taniela 7:14, MN.
“Ne’e foaki kia te ia te pule, mo te fakaʼaliʼaliki pea mo he pule’aga, ʼo tupu ke tauhi kia te ia te haha’i, mo te ’u fenua, pea mo te ’u faʼahiga lea kehekehe. Ko tana pule . . . ʼe mole gata anai ia.”— -
“Kua pule ki te malamanei ia te Puleʼaga ʼo totatou ʼAliki pea mo tana Kilisito.”—Fakaha 11:15.
ʼO mulimuli ki te faikole faʼifaʼitaki ʼa Sesu, ʼe fakahoko katoa anai e te Puleʼaga ʼo te ʼAtua ia te finegalo ʼo te ʼAtua ʼi te kele. ʼI te afio ʼo te puleʼaga, ʼe akoako anai e te hahaʼi fuli te faʼahiga taupau ʼo te kele ke lelei mo maʼa.
Pea ʼe toe akoʼi anai ia te hahaʼi ki ni lekula ʼe tatau maʼa natou fuli. ʼE mole toe hoko anai ni fihi mo ni maveuveu. ʼE ui fenei ia Esaia 11:9, MN: “ ’E mole fai anai he meʼa ’e kovi pea ’e mole fakatupu anai he maumau . . . koteʼuhi ’e fonu moʼoni anai te kele ’i te ʼatamai malama ’o ʼuhiga mo Sehova ohage ko te ʼuʼufi ’o te tai e te ’u vai.”
ʼE logo tahi anai mo maʼuli tokalelei ia te hahaʼi fuli ʼi te kele. Ko he aluʼaga neʼe mole pe la lavaʼi e te Kautahi ʼo te ʼu Puleʼaga. ʼE ui fenei ia Pesalemo 37:11, MN: “ ’E natou fiafia moʼoni anai ’i te mahu ’o te tokalelei.” ʼAki te temi, ʼe mole kei tou puʼaki anai te ʼu kupu “fakapo,” “ ʼulihi ʼo te ulufenua,” “masiva,” “tau.” Kae ko ʼafea koa ʼae ka pule ai te Puleʼaga ʼo te ʼAtua? ʼE feafeaʼi anai hona pule ki te kele? Kotea anai te ʼu lelei ʼe tou maʼu ai? Tou vakaʼi ʼona tali ʼi te alatike ʼae ka hoa mai.