Ka logo tahi he taumatuʼa pea ʼe nā hage pe ko he ʼu pailate ʼe lua ʼi he vakalele. ʼE nā mulimuli pe ki he alaga vaka ʼe tahi. Ka hoko he ʼu ʼahiʼahi, ʼe mole manatu pe anai te tagata ʼohoana peʼe ko te fafine ʼohoana kia ia totonu. Kae ʼe nā fetokoniʼaki anai.

PELESEPETO FAKATOHI-TAPU: “ ʼE mole kei nā toko lua, kaʼe kua nā liliu ko he kakano ʼe tahi.”—Mateo 19:6.

ʼE ui fenei e Christopher: “Ke maʼuli fiafia he taumatuʼa, ʼe tonu anai ke nā kaugā gaue fakatahi.”

Ka tokakovi he taumatuʼa ʼe mole felogoi tahi, ʼe nā tahi kumi aipe pe ko ai ia naua ʼae ʼe hala. Kae mole nā faigaʼi ke nā fakatokatoka te fihifihia. Pea ʼe liliu ai he kihiʼi meʼa noa ko he toe fihifihia lahi.

ʼE ui fenei e Alexandra: “ ʼE maʼuhiga te logo tahi ki te nofo ʼohoana. He kapau la ʼe mole mā felogoi tahi mo toku ʼohoana, ʼe mā hage leva ko he foʼi toko lua ʼe kaugā ʼapi fakatahi kae ʼe mole nā felogoi lelei moka ʼe toʼo he ʼu tonu maʼuhiga.”

SIVISIVI IA KOE

• ʼE au manatu koa ko toku totogi ʼe “ ʼa ʼaku pe ia”?

• ʼE hoki au lotofimalie pe koa moka ʼe au mamaʼo mo toku ʼohoana?

• ʼE au fakamamaʼo koa mai te famili ʼo toku ʼohoana tatau aipe pe ʼe felogoi lelei mo natou?

FAIPALALAU MO TOU HOA

• ʼI toma maʼuli fakataumatuʼa, ko te ʼu aluʼaga fea ʼae ʼe mā faigaʼi ke mā logo tahi ai?

• Ko te ʼu faʼahi fea ʼae ʼe tonu ke mā gaueʼi?

• Kotea he ʼu fakatuʼutuʼu ʼe tonu ke mā fai ke hikihiki ai tamā felogoi tahi?

TOKONI

• Fakakaukauʼi age muʼa ʼe kolua gaoʼi ʼi he malaʼe ta fitipolo ʼo kolua takitahi te faʼahi. Kotea anai he ʼu faiga ʼe ke fakaha ai ʼe ke fia kaugā gaoʼi fakatahi pe mo tou ʼohoana?

• ʼE mole ke manatu pe anai pe ʼe feafeaʼi hau malo kae pe ʼe feafeaʼi hakolua malo fakatahi.

ʼE ui fenei e Ethan: “ ʼAua naʼa ke kumi pe ko ai ʼae ʼe tonu peʼe ko ai ʼae ʼe hala. Ko te maʼuhiga ʼe ko tau tokalelei mo logo tahi mo tou ʼohoana.”

PELESEPETO FAKATOHI-TAPU: “ ʼAua naʼa kotou kumi pe te ʼu meʼa ʼae ʼe lelei kia koutou totonu, kaʼe ke kotou toe kumi foki mo te ʼu meʼa ʼae ʼe lelei ki ʼihi.”—Filipe 2:3, 4.