PELESEPETO FAKATOHI-TAPU: “Ko ia ae e tokaga o teuteui ana fakatuutuu e ina iloi anai te mau koloa; kae ko ia ae e gaohi mea fakavilivili e tau anai mo te hoge.”—Taaga Lea 21:5.

TONA FAKAʼUHIGA: Fai hau fakatuʼutuʼu pea ke mulimuli lelei ki ai. Koia, fai muʼa he lisi ʼo te ʼu meʼa ʼae ka ke toʼo anai. Manatuʼi, ʼe mole feala tuʼumaʼu ke ke toʼo te ʼu meʼa ʼae ʼe ke loto ki ai. Koia ʼe tonu ai ke ke fakaʼaogaʼi lelei tau foʼi falā.

TE ʼU TOKONI:

• Fakaʼaogaʼi lelei tau foʼi falā. Tohi te ʼu meʼa kehekehe fuli ʼae ʼe tonu ke totogi pea mo fakatuʼutuʼu ki ai he foʼi falā. Kapau ʼe fakalaka he totogi ʼo he meʼa, fakakatoa ʼaki he falā neʼe tanaki ki he tahi age koga. Ohage la ko te penisini ʼo tau motoka, fakaʼaogaʼi ki ai te foʼi falā ʼae neʼe vaheʼi ki he meʼa ʼe mole faʼa maʼuhiga, ohage la ko te olo ʼo fale kai.

• Tokaga naʼa lahi fau ʼou maʼua. Faiga ke mole ke tuʼu maʼua ki he tahi. Kapau ʼe ke fia totogi he meʼa ʼe ʼaoga kia koe, ke ke tatanaki he foʼi falā ki ai. Pea ka ke fakaʼaogaʼi he kate, fakapaʼaga tou foʼi numelo ʼi te mahina fuli naʼa ke tuʼu maʼua ki te fale paʼaga. Kapau neʼe ke toʼo maʼua, fai he polokalama ke huʼi mamalie te foʼi falā ʼaia.

  ʼE ui ʼi te sivi, kapau ʼe tou fakaʼaogaʼi te foʼi kate ʼe lahi fau ai te ʼu meʼa ʼae ʼe tou toʼo. Koia, ʼe tonu ke ke fakaʼaogaʼi fakapotopoto tau foʼi kate.

PELESEPETO FAKATOHI-TAPU: “O tupu ko te momoko, e mole teuteui e te tagata piko tana  gaueaga; I te temi tuusi fulumeto, e loto ia ke tuusi he mea, kae e mole he mea.”—Taaga Lea 20:4.

TONA FAKAʼUHIGA: Ko te tagata piko ʼe liliu ʼo masiva. Koia, ke ke faʼa gaue mo ke fakafuafua leleiʼi tau foʼi falā ki te hoko atu ʼo tou maʼuli.

TE ʼU TOKONI:

• Ke ke faʼa gaue. ʼUhi ko tau faʼa gaue, ʼe leleiʼia anai koe e tau patolo ke hoko atu tau gaue kia ia.

• Ke ke aga fakahagatonu. ʼAua naʼa ke kaihaʼa peʼe ke aga fakakaka ki tau patolo he ʼe ke matagafua kovi ai pea, ʼe faigataʼa ai hau toe maʼu hau gaue ki ʼamuli.

• ʼAua naʼa ke manako ki te paʼaga. Kapau ʼe ke kumi fakavale te paʼaga, ʼe ke mahamahaki anai pea kua faigataʼa tau felogoi mo ʼihi. Manatuʼi, ko te paʼaga ʼe mole ko te meʼa ʼaia ʼe maʼuhiga ʼaupito ki te maʼuli.

ʼAUA NAʼA KE MAUMAUʼI TOU TEMI MO TAU FOʼI FALĀ ʼI TE ʼU AGA ʼAE ʼE KOVI.

“Ko te tagata inu kava fakavale mo ia ʼae ʼe kai lahi fakavale ’e nā liliu anai ’o masisiva, pea ko te faʼa moe ’e ina kofu’i anai he tahi ʼaki he ’u meʼa popo.”​—TAAGA LEA 23:21, MN.

TUKU TAU HOHA FAU.

“Tuku takotou tuʼania ʼo ʼuhiga mo ʼokotou maʼuli pe kotea ʼae ka kotou kai anai, mo inu anai, pea mo laofi anai.”​—MATEO 6:25.

TEKEʼI TE MANUMANU.

“E faiga he tagata manumanu koloa ke maukoloa vave, kae e mole ina iloi ko te pakupaku ae ka kaku anai kia ia.”​—TAAGA LEA 28:22.