Kua Feafeaʼi Te Fakaʼapaʼapa ʼAe Ki Te Maʼuli?
HE KOʼE ʼE MAʼUHIGA TE FAKAʼAPAʼAPA KI TE MAʼULI?
Koteʼuhi ko te ʼu agamahani mo te ʼu aga ʼae ʼe mole fakaʼapaʼapa ki te maʼuli, ʼe fakatupu kovi ki tokita maʼuli malolo mo fimalie pea mo ʼihi.
-
ʼE maʼu ʼihi kosea ʼuhi ko te suluka. Pea tahi ʼe ina fakavaivaiʼi te sino ʼo mole kei ina mātauʼi ai te kosea. Ko te toko 90 ki te 100 ʼe mamate ʼi te kosea ʼo te fatafata koteʼuhi neʼe natou suluka peʼe manava ki te kokohu ʼo te suluka ʼa ʼihi.
-
ʼI te taʼu fuli, ʼe hahaʼi ia natou ʼae ʼe maʼuʼuli ʼi te mataku peʼe mahaki ʼulu ʼuhi ko te ʼu faifana neʼe hoko ʼo mamate ai te tokolahi. Ohage la neʼe fai te ʼu fekumi e te univelesite ʼo Stanford ʼo ʼuhiga mo te ʼu faifana ʼae ʼe hoko ʼi te ʼu fale ako. ʼE ui ai, ‘ko natou ʼae ʼe hao mai ai, tatau aipe pe ʼe mole natou lavevea, kae ʼe mole feala anai ke natou galoʼi ʼi he ʼaho ʼo natou maʼuli mamahi ai lolotoga ni taʼu.’
-
Ka uli motoka te hahaʼi konahihia mo toloke, ʼe feala ke tuʼutamakiʼia ai ʼihi ʼi te ʼu ala mo te ʼu haʼeleʼaga. ʼE mole natou fakaʼapaʼapa ki te maʼuli ʼo tau mamate ai ʼihi.
TE MEʼA ʼAE ʼE FEALA KE KE FAI
Puipui tou maʼuli malolo. Heʼeki tauhala ke ke tuku tau suluka peʼe ko te fakaʼaogaʼi ʼo te suluka hila, peʼe ko te inu kava fakavale, peʼe ko te fakaʼaogaʼi fakatemi ʼo te toloke. ʼE fakatupu tuʼutamaki te ʼu agamahani ʼaia ki tou maʼuli. Pea ʼe mole ke fakaʼapaʼapa ki te maʼuli ʼo natou ʼae ʼi ʼou tafa, ʼo kau ai tou kiʼi famili.
Nofo tokaga. Tekeʼi te ʼu tuʼutamaki ʼo ke tokaga ke lelei tou ʼapi. Tokaga ke haʼele lelei tau motoka pea ke ke sofea fakapotopoto. ʼAua naʼa ke tuku ke fakakinauʼi koe e he tahi ke ke fai he meʼa ʼe fakatupu lavea peʼe fakatupu mate.
Ke ke agalelei. Ka kita fakaʼapaʼapa ki te maʼuli pea ʼe ʼi ai ʼona fua ki takita faʼahiga sio ʼae ki te hahaʼi mai te ʼu lanu kehekehe, pe ʼe masiva peʼe maʼu koloa. ʼE mole hoko koa la te ʼu tau mo te ʼu agamalohi ʼi te malamanei ʼuhi ko te ʼu manatu fakapalatahi mo te fehiʼa?
TE MEʼA ʼAE ʼE MATOU FAI
ʼE fakalotomalohiʼi e te kau Fakamoʼoni ʼa Sehova ke lelei te maʼuli malolo ʼo te hahaʼi. ʼE tokoni tamatou polokalama ako Tohi-Tapu ki te hahaʼi ke natou tuku ʼanatou agamahani ʼae ʼe fakatupu tuʼutamaki.
ʼI te ʼu laga fale, ʼe matou mulimuli ki te ʼu lekula ʼo ʼuhiga mo te puipui ʼo te maʼuli. ʼE lotolelei ʼihi ke natou tokoni ki te laga ʼo te ʼu fale fono mo te tahi ʼu fale ʼe fakaʼaogaʼi ki te ako ʼo te Tohi-Tapu. ʼE natou kau ki te ako ʼo ʼuhiga mo te ʼu tuʼutamaki ʼae ʼe tonu ke tekeʼi. Pea ʼe vakaʼi tuʼumaʼu te ʼu fale ʼaia pe ʼe alu tahi mo te ʼu lekula ʼo ʼuhiga mo te puipui ʼo te maʼuli.
ʼE matou tokoni ke lelei te maʼuli ʼo te hahaʼi. Mole faʼa fualoa, neʼe matou tokoni ia mahina ʼe 12 ki te ʼu fenua kehekehe ʼi te malamanei neʼe hoko ai ni tuʼutamaki. Pea neʼe matou fakaʼaogaʼi te 1 miliale 330 miliona tupu meʼa ʼofa moʼo tokoni kia natou ʼae neʼe ʼaoga ki ai.
Neʼe mafola te mahaki Ebola ʼi Afelika ʼUesite (2014) mo République démocratique ʼo Congo (2018). Koia neʼe matou fakatuʼutuʼu ai ke iloʼi pe ʼe taʼofi feafeaʼi te mafola ʼo te mahaki fakatupu mate ʼaia. Neʼe lahi te ʼu koga meʼa neʼe palalau ai he ʼu fakafofoga ʼo tomatou kautahi ki te kupu tafito ʼae “Ka Kita Fakalogo ʼe Haofaki Ai Tokita Maʼuli.” Neʼe matou ʼai te ʼu kiʼi meʼa fufulu nima ʼi te huʼaga ʼo ʼamatou fale fono. Pea neʼe matou toe fakaha te maʼuhiga ʼo te fufulu ʼo te ʼu nima pea mo ʼihi atu faʼahi ʼe puipui ai te maʼuli malolo.
ʼI Sierra Leone, neʼe vikiʼi te kau Fakamoʼoni ʼa Sehova ʼi he fale latio. Neʼe fai te faʼahi ʼaia he neʼe natou tokoni ki tanatou hahaʼi pea mo ʼihi ʼo ʼuhiga mo te taʼofi ʼo te mafola ʼo te mahaki Ebola.
Ko te meʼa fufulu nima ʼi te huʼaga ʼo he Fale Fono ʼi Libéria, lolotoga te mafola ʼo te mahaki Ebola ʼi te fenua ʼaia ʼi te 2014
a Neʼe ko he fakamaʼua fakapotopoto ʼaia neʼe fai ʼi muʼa atu ki te hahaʼi ʼo te ʼu fenua Alape. Pea ʼe ha lelei ai te tokaga moʼoni ʼo ʼuhiga mo te maʼuli fimalie ʼo te ʼu famili pea mo te hahaʼi ʼae ʼe ʼomai ʼo ʼaʼahi natou.
