Kua Feafeaʼi Te Fakaʼapaʼapa Ki Tokita Tatau?
HE KOʼE ʼE MAʼUHIGA TE FAKAʼAPAʼAPA KI TOKITA TATAU?
Koteʼuhi ʼe puli ai te feitaʼaki pea ʼe mole ʼaʼasili kovi ai te ʼu aluʼaga fakatupu kē.
-
ʼE ui ʼi te Taʼaga Lea Fakatohi-tapu: “ ʼE puli te ita ʼi he tali ʼe malū, kae ʼe fakatupu ita he palalau fefeka.” (Taʼaga Lea 15:1) Ka mole fakaʼapaʼapa ʼatatou palalau mo tatatou aga, ʼe hage pe ʼe tou hokohokoʼi he afi pea ʼe tupu ai he ʼu nunuʼa kovi.
-
Neʼe ui e Sesu: “ ʼE haʼu mai te gutu te meʼa ʼae ʼe fonu ʼi te loto.” (Mateo 12:34) Ka mole palalau fakaʼapaʼapa he tahi, ʼe feala ke ui ʼe fehiʼa ki te hahaʼi ʼo he tahi age lanu, peʼe ko te hahaʼi ʼae ʼe mole tatau ʼonatou tuʼulaga mo gaue.
Mole faʼa fualoa, neʼe fai he ʼu fekumi ia fenua ʼe 28, pea ʼi te toko 32 000 hahaʼi ʼae neʼe fakafehuʼi neʼe ui e te toko 20 800, ʼe mole kei aga fakaʼapaʼapa mo agalelei te hahaʼi pea neʼe heʼeki natou sisio ki he aluʼaga feia ʼi muʼa atu.
TE MEʼA ʼAE ʼE FEALA KE KE FAI
Fakaʼapaʼapa ki te hahaʼi fuli pe ʼe ʼi te fale ako peʼe ʼi te fale gaue tatau aipe pe mole tatau ʼakotou manatu. Kumi te ʼu aluʼaga ʼae ʼe kotou manatu tahi ai. ʼE tokoni atu anai te faʼahi ʼaia ke mole ke faifatufatu peʼe ke foimo faifakamau atu aipe.
Ke ke fai ki ʼou tatau te aga ʼae ʼe ke loto ke natou fai atu. Kapau ʼe ke agalelei pea ʼe mole ke fakapalatahi kia natou, pea ʼe mahino ia, ʼe natou toe fai feia atu pe anai.
Ke ke lotofakamolemole. Ka fai atu e he tahi he meʼa peʼe ko ni palalau ʼe mole lelei, ʼaua naʼa ke tokagaʼi mo ke toe manatu ki ai.
TE MEʼA ʼAE ʼE MATOU FAI
ʼE maʼuhiga ki te kau Fakamoʼoni ʼa Sehova te fakaʼapaʼapa ki ʼonatou tatau.
ʼE matou fai he ʼu ako Fakatohi-tapu ki te hahaʼi fuli pe, pea ʼe mole totogi, kae ʼe mole matou fakalotoʼi he tahi ke tui ki te ʼu meʼa ʼae ʼe matou tui ki ai mo ʼamatou manatu. Kae ohage pe ko tona ui ʼi te Tohi-Tapu, ʼe matou faigaʼi ke matou tala te logo lelei “ ʼaki he agamalū pea mo he fakaʼapaʼapa lahi.”—1 Petelo 3:15; 2 Timoteo 2:24.
ʼE mole matou fehiʼa ki he lanu pea ʼe matou fiafia ʼi te fakatalitali ʼi ʼamatou fono ni hahaʼi mai te ʼu fenua kehekehe ʼe natou fia iloʼi pe kotea ʼae ʼe akoʼi ʼi te Tohi-Tapu. ʼE matou leleiʼia te ʼu lanu fuli pea ʼe matou faiga ke matou “fakaʼapaʼapa ki te ʼu faʼahiga tagata fuli pe.”—1 Petelo 2:17, New International Version.
ʼE matou fakaʼapaʼapa ki te puleʼaga ʼae ʼe matou maʼuʼuli ai. (Loma 13:1) ʼE matou fakalogo ki te lao mo totogi te ʼu tukuhau. Pea tahi, logo la ʼe mole matou kau ki he faʼahi fakapolitike, kae ʼe matou fakaʼapaʼapa ki te loto ʼo te takitokotahi ʼo ʼuhiga mo te faʼahi fakapolitike ʼae ʼe ina fili.