1-2. ʼI tatatou fakatalitali ki te fakatuʼu ʼo te malama foʼou, kotea ʼae ʼe tonu ke tou fai?

 NEʼE fakapapau mai e Sehova ʼe ina fetogi anai te malama ʼaeni ʼaki he malama foʼou ʼe maʼu ai anai te faitotonu. (2 Pet. 3:13) ʼE maʼuhiga ʼaupito kia tatou tana fakapapau ʼaia. ʼE mole tou iloʼi pe ko ʼafea ʼae ka fakatuʼu ai anai te malama foʼou ʼaia, kae kua ovi mai pe ʼuhi ko te ʼu aluʼaga ʼae ʼe hoko ʼi te temi nei.​—Mat. 24:32-34, 36; Gaue 1:7.

² Kae ʼi tatatou fakatalitali ki te malama foʼou, ʼe tonu ke tou fakamalohi tatatou tui ki te fakapapau ʼaia, pe ʼe kua fualoa tatatou ʼi te moʼoni peʼe kailoa. Kotea tona tupuʼaga? Heʼe ko he tui ʼe malohi ʼe feala pe ke liliu ʼo vaivai. Neʼe fakamahino e te apositolo ko Paulo ko te mole maʼu ʼo te tui ʼe ko “te agahala ʼae ʼe ina taʼofi gafua tatou.” (Hep. 12:1) Ke mole liliu tatatou tui ʼo vaivai, ʼe tonu ke tou vakavakaʼi liuliuga te ʼu fakamoʼoni ʼae ʼe ha ai kua vave fakatuʼu te malama foʼou.​—Hep. 11:1.

3. Kotea ka tou vakaʼi anai ʼi te alatike ʼaeni?

³ ʼI te alatike ʼaeni, ʼe tou vakaʼi anai faʼahi ʼe tolu ʼe tonu ke tou fai ke malohi ai tatatou tui ki te fakapapau mai ʼa Sehova ʼo ʼuhiga mo he malama foʼou: (1) Tou metitasio ki te sakilifisio ʼo Sesu, (2) tou metitasio ki te malohi ʼo Sehova, pea (3) tou fakaʼaogaʼi he temi ki te ʼu gaue fakalaumalie. ʼE tou toe vakaʼi anai pe ʼe fakamalohi feafeaʼi tatatou tui ʼi te logo ʼae neʼe fakaha e Sehova kia Hapakuke. Kae tou palalau muʼa  ki ni aluʼaga ʼe lagi hoko kia tatou ʼi te temi nei pea ʼe ʼaoga ai ke malohi tatatou tui ki te fakapapau ʼo ʼuhiga mo he malama foʼou.

KO NI ALUʼAGA ʼE ʼAOGA AI KE MALOHI TATATOU TUI

4. Kotea te ʼu tonu ʼe tonu ke tou fai pea he koʼe ʼe maʼua ke malohi tatatou tui?

⁴ ʼI te ʼaho fuli ʼe tou fai he ʼu tonu ʼo ʼuhiga mo ʼotatou kaumeʼa, te ʼu fakafiafia, totatou maʼuli fakataumatuʼa, te ʼu fanau, tatatou gaue, pea mo tatatou filifili pe ʼe hoko atu tatatou ako. ʼE maʼua ai he tui ʼe malohi ke tou fai he ʼu tonu ʼe lelei. Koia, tou fai kia tatou te ʼu fehuʼi ʼaeni: “ ʼE ha koa ʼi te ʼu tonu ʼae ʼe au fai taku tui papau ʼae kua vave pulihi anai te malama ʼaeni pea ʼe fetogi anai ʼaki te malama foʼou? Peʼe ha koa ʼe au manatu ohage ko te hahaʼi ʼae ʼe mole tui ki te maʼuli heʼe gata?” (Mat. 6:19, 20; Luka 12:16-21) Kapau ʼe malohi tatatou tui ʼae kua ovi mai te malama foʼou, pea ʼe tou fai anai te ʼu tonu ʼae ʼe lelei tukupau.

5-6. He koʼe ʼe ʼaoga ke tou maʼu he tui ʼe malohi moka tou tau mo he ʼu faigataʼaʼia? Tuku mai he faʼifaʼitaki.

⁵ ʼE toe maʼuhiga ke malohi tatatou tui moka tou tau mo he ʼu faigataʼaʼia. ʼE feala hatatou lotovaivai moka fakatagaʼi tatou, peʼe tou tau mo he mahaki faigataʼa, peʼe ko he tahi atu ʼu fihifihia. ʼI te kamata, neʼe lagi tou manatu ʼe tou lava ʼutakiʼi te faigataʼaʼia ʼaia. Kae kapau kua loaloaga tatatou ʼutakiʼi, ʼe ʼaoga ke tou maʼu he tui ʼe malohi ke tou faʼa kataki pea mo haga tauhi kia Sehova mo he lotofiafia.​—Loma 12:12; 1 Pet. 1:6, 7.

⁶ Ka tou tau mo he faigataʼaʼia, ʼe feala ke tou manatu ʼe mole hoko mai anai te malama foʼou. Ko tona fakaʼuhiga koa kua vaivai tatatou tui? Kailoa ia. Tou toʼo he faʼifaʼitaki. Ka ʼua lolotoga ni vahaʼa, ʼe feala ke tou manatu ʼe mole toe laʼa anai ʼi he ʼaho. Kae ki muli age, ʼe toe laʼa pe. ʼO toe feia pe, ka lahi tatatou lotovaivai, ʼe feala ke tou manatu ʼe mole hoko mai anai te malama foʼou. Kae kapau ʼe malohi tatatou tui, ʼe tou iloʼi ʼe fakahoko pe anai e Sehova ʼana fakapapau. (Pes. 94:3, 14, 15; Hep. 6:17-19) Pea ʼuhi ko tatatou tui papau ʼaia, ʼe tou haga fakamuʼamuʼa aipe tatatou tauhi kia Sehova ʼi totatou maʼuli.

7. Kotea te manatu ʼa te tokolahi pea he koʼe ʼe tonu ke tou nofo tokaga?

⁷ Tou vakaʼi he tahi faʼahi ʼe ʼaoga ai he tui ʼe malohi: te faifakamafola. Tokolahi ʼe natou manatu ko te “logo lelei” ʼo ʼuhiga mo te malama foʼou ʼae ʼe tou fakamafola, ʼe mole moʼoni ia. (Mat. 24:14; Esk. 33:32) ʼE tonu ke tou nofo tokaga ke mole tou liliu ʼo mahalohalo ohage ko natou ʼaia. Ke mole hoko te faʼahi ʼaia, ʼe tonu ke tou fakamalohi tuʼumaʼu tatatou tui. Tou vakaʼi faʼahi ʼe tolu ʼe feala ke tou fai.

METITASIO KI TE SAKILIFISIO ʼO SESU

8-9. He koʼe ʼe tou ui ko te metitasio ki te sakilifisio ʼo Sesu ʼe fakamalohi ai tatatou tui?

⁸ Ko te ʼuluaki faʼahi ʼae ka tokoni mai ke malohi tatatou tui, ʼe ko te metitasio ki te sakilifisio ʼo Sesu. ʼE ko te fakamoʼoni ʼaia ʼe hoko anai te ʼu fakapapau ʼa Sehova. Ka tou fakakaukau lelei ki te ʼu tupuʼaga ʼo te foaki mai e te ʼAtua te sakilifisio ʼaia, pea mo te ʼu aluʼaga neʼe ina ʼutakiʼi, ʼe toe malohi age ai tatatou tui ki tana fakapapau ʼae ke tou maʼuʼuli ʼo heʼe gata ʼi he malama ʼe lelei age. He koʼe ʼe feala ke tou ui te faʼahi ʼaia?

⁹ Tou fakakaukauʼi pe kotea ʼae neʼe ʼutakiʼi e Sehova. Neʼe ina fekauʼi mai tona ʼAlo ʼulu tokotahi ʼae ʼe ʼofa mamahi ai mo felogoi lelei mo ia, ke haʼu ʼo tupu tagata ʼi te kele pea ke liliu ko he tagata haohaoa. ʼI tana maʼuli ʼi te kele, neʼe katakiʼi e Sesu te ʼu ʼahiʼahi kehekehe pea neʼe mamahi ʼaupito ʼi tona mate. ʼE mahino ia, ʼe mole tuku anai  e totatou ʼAtua ʼofa ke mamahi tona ʼAlo pea ke mate, kehe pe ke tou maʼu he maʼuli lelei kae nounou. (Soa. 3:16; 1 Pet. 1:18, 19) ʼUhi ʼae neʼe foaki mai e Sehova tona ʼAlo ʼofaina moʼo tokoni mai, ʼe ina fakahoko pe anai tana fakapapau ʼae ke tou maʼuʼuli ʼo heʼe gata ʼi te malama foʼou.

METITASIO KI TE MALOHI ʼO SEHOVA

10. ʼO mulimuli kia Efeso 3:20, kotea ʼae ʼe feala ke fakahoko e Sehova?

¹⁰ Ko te lua faʼahi ke tou fakamalohi ai tatatou tui ʼe ko te metitasio ki te malohi ʼo Sehova. ʼE feala pe ke ina fakahoko tana ʼu fakapapau fuli. ʼE moʼoni, ʼi te sio fakatagata, ʼe mole feala ia ke hoko te fakapapau ʼo ʼuhiga mo te maʼuli heʼe gata ʼi he malama foʼou. Kae ʼe lahi te ʼu fakapapau ʼa Sehova ʼe mole feala ki te tagata ke ina fakahoko. ʼAua naʼa galo kia tatou ko ia te ʼAtua Mafimafi. (Sopo 42:2; Mko. 10:27) Koia ʼe mole tou punamaʼuli ai moka ina fakapapau mai he ʼu aluʼaga fakaofoofo.​—Lau ia Efeso 3:20.

11. Fakaha mai he fakapapau fakaofoofo neʼe fai e Sehova. (Vakaʼi te fakamatala ʼae ʼe ʼa takai “ He ʼu Fakapapau Fakaofoofo Kua Hoko.”)

¹¹ Tokagaʼi ni fakapapau neʼe fai e Sehova ʼi temi muʼa ki ʼana kaugana, pea ʼi te sio fakatagata ʼe mole feala ia ke hoko. Neʼe ina ui age kia Apalahamo mo Sala ʼe nā maʼu anai hanā tamasiʼi tagata ʼi tanā kua mātua. (Sen. 17:15-17) Neʼe ina toe fakapapauʼi age kia Apalahamo ʼe ina foaki anai te fenua ʼo Kanaane ki tona hologa. Lolotoga te ʼu taʼu ʼae neʼe maʼuli popula ai te kau Iselaele, te hologa ʼo Apalahamo ʼi Esipito, neʼe hage ʼe mole hoko anai te fakapapau ʼaia. Kae neʼe hoko moʼoni ia. Ki muli age, neʼe fakaha e Sehova ʼe maʼu anai e Elisapeta hana tamasiʼi kae neʼe kua finematuʼa. Neʼe ina toe fakaha age kia Malia, ʼae neʼe kei taupoʼou ʼe ina fanauʼi anai tona ʼAlo. ʼE fakahoko ai te tahi fakapapau neʼe fai e Sehova ʼi ni taʼu ʼe lauʼi afe ki muʼa atu, ʼi te ʼoloto ʼo Eteni.​—Sen. 3:15.

12. Kotea ʼae ʼe fakaha lelei mai ia Sosue 23:14 mo Esaia 55:10, 11 ʼo ʼuhiga mo te malohi ʼo Sehova?

¹² Ka tou fakakaukauʼi te ʼu fakapapau ʼae neʼe fai e Sehova pea mo tana fakahoko, ʼe tou mahino ai ki te lahi ʼo tona malohi pea ʼe toe malohi ai tatatou tui ki tana fakapapauʼi mai he malama foʼou. (Lau ia Sosue 23:14; Esaia 55:10, 11.) ʼE feala ai ke tou tokoni ki te hahaʼi ke natou mahino ko te tui ʼae ki he malama foʼou ʼe mole ko he moemisi. Neʼe ui e Sehova totonu ʼo ʼuhiga mo tana fakapapau mai he lagi foʼou mo he kele foʼou: “Ko te ʼu folafola ʼaia ʼe agatonu pea mo moʼoni.”​—Apk. 21:1, 5.

KE LAHI ʼAU GAUE FAKALAUMALIE

13. ʼE fakamalohi feafeaʼi tatatou tui ʼi te ʼu fono? Fakamahino.

¹³ Ko te tolu faʼahi ke malohi ai tatatou tui ʼe ko te fakaʼaogaʼi he temi ki te ʼu gaue fakalaumalie. Ohage la, fakakaukauʼi te ʼu fua lelei ʼe tou maʼu ʼi tatatou kau ki te ʼu fono. Ko Anna ʼae neʼe kau ki te ʼu faʼahiga selevisi kehekehe temi katoa lolotoga ni taʼu, ʼe ina ui fenei: “ ʼE tokoni mai te ʼu fono ke malohi tuʼumaʼu taku tui. Maʼia pe la pe ʼe mole faiva he tehina ʼi te faiakonaki, peʼe mole ina tala he manatu ʼe foʼou, kae ʼe ʼi ai he manatu ʼe palalau ki ai pea ʼe tokoni mai ke au mahino lelei age ki te Tohi-Tapu. ʼE malohi ai taku tui.” b Pea ʼe feafeaʼi ki te ʼu tali ʼo ʼotatou tehina mo tuagaʼane? ʼE mole fakamalohi ai koa la tatatou tui.​—Loma 1:11, 12; 10:17.

14. ʼE fakamalohi feafeaʼi tatatou tui moka tou faifakamafola?

¹⁴ ʼE toe fakamalohi tatatou tui moka tou  faifakamafola. (Hep. 10:23) ʼE ui e Barbara, ʼae ʼe tauhi kia Sehova talu mai taʼu ʼe 70 tupu: “Neʼe au tokagaʼi tuʼumaʼu pe, ʼe malohi taku tui moka ʼe au faifakamafola. Ka lahi taku palalau ki te ʼu fakapapau taulekaleka ʼa Sehova, ʼe toe malohi age ai taku tui.”

15. ʼE fakamalohi feafeaʼi tatatou tui moka tou fai tatatou ako takitokotahi?

¹⁵ Tou vakaʼi he tahi gaue fakalaumalie ʼe fakamalohi ai tatatou tui: te ako takitokotahi. ʼE fua lelei ki te tuagaʼane ko Susan tana fakatuʼutuʼu tona ʼu temi ako. ʼE ina ui: “ ʼI te ʼAhotapu, ʼe au teuteuʼi te alatike ako ʼo Te Tule Leʼo ʼae ka vakaʼi ʼi te vahaʼa ka hoa mai. ʼI te Monite mo te Feliatolu, ʼe au teuteuʼi ai te fono ʼo te vahaʼa. Pea ʼi te ʼu ʼaho ʼae, ʼe au ako ai he manatu neʼe au filifili.” ʼI te mulimuli ʼa Susan ki tana fakatuʼutuʼu ʼaia, ʼe fakamalohi tuʼumaʼu ai tana tui. ʼE tokagaʼi e te tuagaʼane ko Irene, ʼae ʼe gaue ʼi te ʼu pilo lalahi talu mai ni taʼu, ʼe malohi tana tui moka ina ako te ʼu lea fakapolofeta. ʼE ina ui: “ ʼE au punamaʼuli ʼosi ʼi taku sio ʼae maʼia mo te ʼu kiʼi faʼahi liliki ʼo he lea fakapolofeta ʼe hoko.” c

“ ʼE HOKO MOʼONI ANAI”

16. He koʼe ʼe feala ke tou ui neʼe mole fai pe te ʼu palalau ʼa Sehova maʼa Hapakuke kae neʼe ina toe fai maʼa tatou? (Hepeleo 10:36, 37)

¹⁶ Kua fualoa te atali ʼa ʼihi kaugana ʼa Sehova ki te fakaʼosi ʼo te malama ʼaeni. ʼI te sio fakatagata, ʼe hage ʼe tuai mai te fakahoko ʼo te fakapapau ʼa te ʼAtua. Kae ʼe mahino ia Sehova ki te ʼu meʼa ʼae ʼe logoʼi e ʼana kaugana, pea neʼe ina ui fenei ki te polofeta ko Hapakuke: “ ʼE hoko anai te meʼa ʼaeni ʼe ha atu ʼi te temi ʼae kua fakatuʼutuʼu ki ai, ʼE hoko fakavilivili mai anai, pea ʼe mole loi anai ia. Ke ke haga atalitali ki ai, tatau aipe pe ʼe tuai mai! Koteʼuhi ʼe hoko moʼoni anai. Pea ʼe mole tauhala anai.” (Hap. 2:3) Neʼe fai pe koa e te ʼAtua te ʼu palalau ʼaia maʼa  Hapakuke? Pe neʼe ina toe fai koa maʼa tatou ia ʼaho nei? ʼAki te takitaki ʼa te ʼAtua, neʼe toe fai e te apositolo ko Paulo te ʼu palalau ʼaia ki te kau Kilisitiano, ʼae ʼe natou fakaʼamu lahi ke hoko mai la te malama foʼou. (Lau ia Hepeleo 10:36, 37.) ʼE feala ke tou tui, tatau aipe pe ʼe hage ʼe tuai mai te fakahoko ʼo te fakapapau ʼa Sehova ke ina haofaki tatou, kae “ ʼe hoko moʼoni anai. Pea ʼe mole tauhala anai.”

17. Neʼe mulimuli feafeaʼi he tuagaʼane ki te tokoni ʼae neʼe foaki e Sehova kia Hapakuke?

¹⁷ ʼE kaugamalie te ʼu kaugana ʼa Sehova ʼe mulimuli ki tana tokoni ʼae ke natou “haga atalitali,” pea ko ʼihi talu mai fualoa. Ohage la ko te tuagaʼane ko Louise, ʼae neʼe kamata tauhi kia Sehova ʼi te 1939. ʼE ina fakamatala fenei: “ ʼI te temi ʼaia, neʼe au manatu ʼe hoko mai anai ia Alamaketone ʼi taku kei ako ʼi te lise. Kae neʼe mole ko te meʼa ʼaia neʼe hoko. ʼI te fakalaka ʼo te ʼu taʼu, ko taku lau ʼi te Tohi-Tapu te fakatalitali ʼa ni hahaʼi ki te fakahoko e Sehova ʼana fakapapau, neʼe tokoni mai ke au atalitali. Neʼe au lau te ʼu hisitolia ʼo Noe, mo Apalahamo, mo Sosefo, mo ʼihi atu kaugana ʼa Sehova ʼae neʼe natou atali fualoa ʼi muʼa ʼo tanatou maʼu te fakapale ʼae neʼe fakapapauʼi age e Sehova. Ko taku haga atalitali neʼe tokoni mai ohage pe ko ʼihi ke malohi tuʼumaʼu pe taku tui ʼae kua ovi mai te malama foʼou.” Tokolahi te ʼu kaugana ʼae kua fualoa tanatou tauhi kia Sehova, ʼe natou manatu tahi mo Louise.

18. ʼE fakamalohi feafeaʼi tatatou tui ki te fakatuʼu ʼo he malama foʼou moka tou mamata ki te fakatupu?

¹⁸ ʼE moʼoni, heʼeki fakatuʼu te malama foʼou. Kae tokagaʼi te ʼu meʼa ʼae ʼe ke sio ki ai, ohage la ko te ʼu fetuʼu, te ʼu fuʼu ʼakau, te ʼu manu, pea mo te tagata. Neʼe mole ʼi ai te ʼu meʼa ʼaia ʼi te temi muʼa. Kae kua ke sio ki ai, he neʼe ko Sehova ʼae neʼe ina fakatupu. (Sen. 1:1, 26, 27) Neʼe toe fakapapau e totatou ʼAtua ʼe ina fakatuʼu anai he malama foʼou. ʼE maʼuli haohaoa ai anai te tagata ʼo talu ai. Pea ʼe ina fakahoko anai tana fakapapau ʼaia. ʼE feala ke tou tui papau ʼe fakatuʼu anai e te ʼAtua te malama foʼou ʼi te temi ʼae kua ina fakatuʼutuʼu ki ai.​—Esa. 65:17; Apk. 21:3, 4.

19. ʼE feafeaʼi hau fakamalohi tau tui?

¹⁹ ʼI tau atalitali ki te malama foʼou, fai ia meʼa fuli ʼe ke lavaʼi ke malohi tuʼumaʼu tau tui. Ke ke lotofakafetaʼi ki te sakilifisio ʼa Sesu. Metitasio ki te malohi ʼo Sehova. Pea ke lahi ʼau gaue fakalaumalie ʼi tou maʼuli. ʼI tau fai feia, ʼe ke kau anai “ia natou ʼae ʼe natou maʼu te ʼu fakapapau, ʼuhi ko tanatou tui pea mo tanatou kataki fualoa.”​—Hep. 6:11, 12; Loma 5:5.