1. Kotea ʼae ʼe tou tui papau ki ai?

 ʼE TOU iloʼi e ʼofa ia Sehova ki ʼana kaugana fuli pea ʼe loto ke tou maʼuli fiafia. (Loma 8:35-39) Pea ʼe tou tui papau ʼe fua lelei tuʼumaʼu pe kia tatou te ʼu pelesepeto ʼi te Tohi-Tapu moka tou mulimuli ki ai. (Esa. 48:17, 18) Kae ʼe feafeaʼi moka hoko ni faigataʼaʼia neʼe mole tou ʼamanaki ki ai?

2. Kotea te ʼu faigataʼaʼia ʼe feala ke tou tau mo ia, pea kotea te ʼu fehuʼi ʼe lagi tou fai ʼuhi ko te ʼu faigataʼaʼia ʼaia?

² ʼE tou tau fuli mo ni faigataʼaʼia. Ohage la, ʼe tou lotovaivai koa ʼuhi ko he meʼa neʼe fai mai e he tahi ʼo totatou famili? ʼE tou tau koa mo he mahaki faigataʼa ʼo mole feala ke lahi age te ʼu gaue ʼae ʼe tou fia fai maʼa Sehova? Neʼe hoko koa he tuʼutamaki fakanatula ʼi te potu ʼae ʼe tou nonofo ai? Peʼe fakatagaʼi koa tatou ʼuhi ko tatatou tui? Ka hoko he ʼu faigataʼaʼia feia, ʼe feala pe ke tou feʼekeʼaki: “He koʼe ʼe hoko kia au te aluʼaga ʼaeni? Neʼe au fai koa he meʼa ʼe kovi? Mole kei ʼofa koa ia Sehova ia au?” Neʼe kua ke fai koa te ʼu fehuʼi ʼaia? Kapau koia, ʼaua naʼa ke lotovaivai. Neʼe toe tokolahi pe la te ʼu kaugana agatonu ʼa Sehova neʼe natou fai te ʼu taʼi fehuʼi ʼaia.​—Pes. 22:1, 2; Hap. 1:2, 3.

3. Kotea ʼae ʼe tou ako mai te Pesalemo 34:19?

³ Lau ia Pesalemo 34:19. Ko te ʼu manatu maʼuhiga ʼaeni ʼe lua ʼe tou maʼu ʼi te pesalemo ʼaia: (1) ʼE hoko ki te kau faitotonu ni ʼahiʼahi. (2) ʼE haofaki tatou e Sehova mai ʼotatou ʼahiʼahi. ʼO feafeaʼi? ʼE tokoni tafito mai ke tou maʼu he manatu fakapotopoto ʼo ʼuhiga mo totatou maʼuli ʼi te malama  ʼaeni. ʼE moʼoni, ʼe fakapapau mai e Sehova he maʼuli fiafia moka tou tauhi kia te ia, kae ʼe mole ina fakapapau mai ʼe tou hao anai mai te ʼu faigataʼaʼia. (Esa. 66:14) ʼE ina fakalotomalohiʼi tatou ke tou sioʼi fakamamaʼu totatou ka haʼu, ia te maʼuli ʼae ʼe ina loto ke tou maʼu ʼo talu ai. (2 Ko. 4:16-18) Kae ʼi te temi nei, ʼe tokoni mai ke hoko atu pe tatatou tauhi kia te ia ʼi te ʼaho fuli.​—Tgl. 3:22-24.

4. Kotea ka tou vakaʼi anai ʼi te alatike ʼaeni?

⁴ ʼE tou vakaʼi anai ʼi te alatike ʼaeni te faʼifaʼitaki ʼo he ʼu kaugana agatonu ʼa Sehova ʼi te temi muʼa pea ʼi totatou temi. ʼE tou toe vakaʼi anai ʼe feala ke hoko kia tatou he faigataʼaʼia neʼe mole tou ʼamanaki ki ai. Kae kapau ʼe tou falala kia Sehova, pea ʼe tokoni mai anai. (Pes. 55:22) ʼI tatatou vakaʼi te ʼu faʼifaʼitaki ʼaia, fai te ʼu fehuʼi ʼaeni: “Ka na pau la neʼe hoko te aluʼaga ʼaia kia au, kotea ʼape neʼe au fai? ʼE fakamalohi feafeaʼi ʼe te ʼu faʼifaʼitaki ʼaia taku falala ʼae kia Sehova? Kotea te ʼu ako ʼe au maʼu mai ai pea ʼe feafeaʼi haku maʼuliʼi?”

5. Kotea te ʼu fihifihia neʼe tau mo Sakopo ʼuhi ko Lapane? (Vakaʼi te pāki ʼo te takafi.)

⁵ Neʼe hoko ni faigataʼaʼia ki te ʼu kaugana ʼa Sehova ʼi te temi muʼa neʼe mole natou ʼamanaki ki ai. Tou vakaʼi te faʼifaʼitaki ʼo Sakopo. Neʼe ui age e tana tamai ke alu ʼo ʼohoana mo he ʼofafine ʼo Lapane, te tokolua ʼo tana faʼe neʼe tauhi kia Sehova, pea neʼe ina fakapapauʼi age ʼe tapuakina lahi anai ia ia e Sehova. (Sen. 28:1-4) Neʼe mulimuli ki ai ia Sakopo. Neʼe mavae ʼi Kanaane tona fenua, ʼo alu kio Lapane. Neʼe ko ʼona ʼofafine ʼe lua, ia Lea mo Lasele. Pea neʼe manako leva Sakopo ia Lasele, te taʼahine muli ʼa Lapane. Ke feala hanā ʼohoana, neʼe tonu ke gaue Sakopo ia taʼu ʼe fitu maʼa Lapane. (Sen. 29:18) Kae neʼe mole ko te faʼahi ʼaia neʼe hoko. Neʼe kakaʼi ia ia e Lapane, he neʼe ina foaki age tana taʼahine lahi ko Lea. Pea neʼe foaki age leva e Lapane ia Lasele ke nā ʼohoana hili te vahaʼa, kae neʼe tonu ke toe gaue ia Sakopo maʼa ia ia taʼu ʼe fitu. (Sen. 29:25-27) Neʼe toe kakaʼi e Lapane ia Sakopo ʼi te ʼu taʼu ʼe 20 ʼae neʼe gaue ai maʼa ia.​—Sen. 31:41, 42.

6. Kotea te tahi ʼu faigataʼaʼia neʼe tau mo Sakopo?

⁶ Neʼe hoko kia Sakopo te tahi ʼu faigataʼaʼia. Neʼe lahi ʼana fanau pea neʼe natou tau fihi. Neʼe fakatau pe la ia Sosefo e ʼona tehina ohage ko he kaugana. Ko Simeone mo Levi neʼe nā ʼulihi te higoa ʼo te famili mo te huafa ʼo te ʼAtua. Ko Lasele, te ʼohoana ʼofaina ʼo Sakopo neʼe mate ʼi tana fanauʼi tanā tama lua. Pea neʼe hoko leva te hoge, ʼo maʼua ai ke alu ia Sakopo ʼo maʼuli ʼi Esipito kae neʼe kua matuʼa.​—Sen. 34:30; 35:16-19; 37:28; 45:9-11, 28.

7. Neʼe fakaha feafeaʼi e Sehova tona ʼofa ia Sakopo?

⁷ Logo la te ʼu malaʼia fuli ʼaia, kae neʼe haga tui pe ia Sakopo kia Sehova mo ʼana fakapapau. Pea neʼe fakaha lelei age e Sehova tona ʼofa ia ia. Ohage la, neʼe lahi ʼona koloa he neʼe tapuakinaʼi ia ia e Sehova, logo la te agakaka ʼa Lapane. Pea fakakaukauʼi age muʼa te lotofakafetaʼi ʼa Sakopo kia Sehova ʼi tana toe fesioʼaki mo Sosefo, tona foha ʼofaina ʼae neʼe manatu kua mate. Neʼe lava ʼutakiʼi e Sakopo te ʼu ʼahiʼahi ʼaia he neʼe kaumeʼa lelei mo Sehova. (Sen. 30:43; 32:9, 10; 46:28-30) Kapau ʼe tou kaumeʼa lelei mo Sehova, ʼe toe feala pe anai ke tou ʼutakiʼi te ʼu faigataʼaʼia ʼae ʼe feala ke hoko ʼi totatou maʼuli.

8. Kotea ʼae neʼe fia fai e Tavite maʼa Sehova?

⁸ Ko te hau ko Tavite neʼe mole feala ke ina fakahoko te ʼu meʼa ʼae neʼe fakaʼamu ki ai ʼi tana tauhi ʼae kia Sehova. Ohage la,  neʼe ina fia laga he fale lotu maʼa tona ʼAtua pea ʼi tana fakaha age ki te polofeta ko Natane, neʼe ui fenei age e te polofeta: “Fai te meʼa ʼae ʼe ke loto ki ai, he ʼe nofo ia te ʼAtua moʼoni mo koe.” (1 Klk. 17:1, 2) ʼE mahino ia, neʼe fakalotomalohiʼi e te ʼu palalau ʼaia ia Tavite. Lagi neʼe ina fakakaukauʼi atu aipe pe ʼe feafeaʼi hana fakahoko te gaue taulekaleka ʼaia.

9. Kotea ʼae neʼe fai e Tavite ʼi te fakaha age ʼo te logo fakalotovaivai?

⁹ Kae neʼe toe alu ia Natane kia Tavite ʼo fakaha age te logo fakalotovaivai. “ ʼI te po pe ʼaia,” neʼe tala age e te ʼAtua kia Natane ʼe mole ko Tavite ʼae ka ina laga te fale lotu, kae ko he tahi ʼi ʼona foha. (1 Klk. 17:3, 4, 11, 12) Kotea ʼae neʼe fai e Tavite ʼi tana maʼu te logo ʼaia? Neʼe ina fetogi tana ʼu fakatuʼutuʼu. Neʼe ina tanaki te paʼaga, mo te ʼu meʼa gaue ʼae ka ʼaoga anai kia Salomone moʼo laga te fale lotu.​—1 Klk. 29:1-5.

10. Neʼe tapuakinaʼi feafeaʼi e Sehova ia Tavite?

¹⁰ ʼI tana ʼosi fakaha kia Tavite ʼe mole ko ia ʼae ka ina laga te fale lotu, neʼe fai atu aipe e Sehova he fuakava mo ia. Neʼe ina fakapapauʼi age ʼe ʼafio anai he tahi ʼo tona hologa ʼo talu ai. (2 Sam. 7:16) ʼI te malama foʼou, ʼi te ʼafio ʼa Sesu ia taʼu ʼe afe, ʼe mahino ia ʼe fiafia lahi anai ia Tavite moka ina iloʼi ko te Hau ʼaia ʼo te Puleʼaga ʼe ko he tahi ʼo tona hologa. Ko te ako ʼae ʼe tou maʼu mai te faʼifaʼitaki ʼa Tavite kapau ʼe mole feala ke tou fai te ʼu gaue fuli ʼae ʼe tou fakaʼamu ki ai maʼa Sehova, ʼe lagi foaki mai pe e totatou ʼAtua he tahi ʼu tapuakina neʼe mole tou manatu ki ai.

11. Neʼe tapuakinaʼi feafeaʼi e Sehova te ʼu ʼuluaki Kilisitiano logo la neʼe mole hoko mai te Puleʼaga ʼi te temi ʼae neʼe natou fakaʼamu ki ai?

¹¹ Neʼe toe hoko ki te ʼu ʼuluaki Kilisitiano he ʼu faigataʼaʼia neʼe mole natou ʼamanaki ki ai. Ohage la, neʼe natou fakaʼamu ke hoko mai la te Puleʼaga ʼo te ʼAtua, kae neʼe mole natou iloʼi pe hoko mai anai ʼafea. (Gaue 1:6, 7) Koia, kotea ʼae neʼe natou fai? Neʼe hoko atu tanatou faifakamafola mo he faʼafai. ʼI tanatou haga fakamafola te logo lelei ʼi te tahi age ʼu potu, neʼe natou sio ki te tapuakinaʼi e Sehova ʼanatou faiga.​—Lau ia Gaue 6:7.

12. Kotea ʼae neʼe fai e te ʼu ʼuluaki Kilisitiano ʼi te temi ʼae neʼe to ai te hoge?

¹² ʼI te temi ʼaia, neʼe to te “toe hoge lahi ʼi te kele katoa.” (Gaue 11:28) Pea neʼe mole hao te ʼu ʼuluaki Kilisitiano. Fakakaukauʼi age muʼa tonatou lotomamahi ʼi te mole kei ʼi ai he meʼa kai. Neʼe lagi tuʼania te ʼu pule famili pe ʼe feafeaʼi hanatou fafaga tonatou kiʼi famili. Pea neʼe feafeaʼi ki te kau tupulaga ʼae neʼe natou fakatuʼutuʼu ke lahi age tanatou faifakamafola? Neʼe lagi natou manatu ke ʼosi muʼa te hoge pea natou fakahoko tanatou fakatuʼutuʼu ʼaia. Kotea pe te aluʼaga ʼo te ʼu ʼuluaki Kilisitiano ʼaia, kae neʼe natou fai ni fetogi. Neʼe hoko atu tanatou faifakamafola ʼo mulimuli ki ʼonatou fealagia, pea neʼe natou vaevae ʼonatou koloa mo te ʼu tehina mo tuagaʼane ʼo Sutea.​—Gaue 11:29, 30.

13. Neʼe tapuakinaʼi feafeaʼi e Sehova te ʼu ʼuluaki Kilisitiano ʼi te temi neʼe to ai te hoge?

¹³ Neʼe tapuakinaʼi feafeaʼi e Sehova te ʼu ʼuluaki Kilisitiano ʼi te temi neʼe to ai te hoge? Ko natou ʼae neʼe fai ki ai te ʼu tokoni neʼe natou sio ki te tokaga age ʼa Sehova. (Mat. 6:31-33) Neʼe toe malohi age ai ʼanatou felogoi mo te ʼu tehina mo tuagaʼane ʼae neʼe tokoni age. Pea ko natou ʼae neʼe foaki meʼa ʼofa ʼo feia mo natou ʼae neʼe natou ʼave te ʼu meʼa ʼofa ʼaia, neʼe fiafia ʼi tanatou foaki. (Gaue 20:35) Neʼe toe fiafia mo Sehova ʼi tana sio ki te ʼu fetogi ʼae neʼe  fai e te ʼu ʼuluaki Kilisitiano ʼaia pea neʼe ina tapuakinaʼi ia natou fuli.

14. Kotea ʼae neʼe hoko kia Palenapa mo Paulo, pea kotea te ʼu fua lelei ʼo tanā faʼa kataki ʼaia? (Gaue 14:21, 22)

¹⁴ Neʼe tau fakatagaʼi te ʼu ʼuluaki Kilisitiano pea ʼi ʼihi temi neʼe hoko fakafokifa. Tou vakaʼi te meʼa ʼae neʼe hoko kia Palenapa mo te apositolo ko Paulo ʼi tanā faifakamafola ʼi te potu fenua ʼo Lisitia. ʼI te kamata, neʼe fakatalitali leleiʼi naua e te hahaʼi kauga malie, pea neʼe natou fakalogo ki tanā fakamafola age te logo lelei. Kae ki muli age, ko he ʼu Sutea fakafeagai neʼe “natou fakaneke te hahaʼi” pea ko ʼihi ia natou ʼae neʼe natou fakatalitali leleiʼi naua, neʼe natou taumakaʼi ia Paulo pea neʼe natou manatu kua mate. (Gaue 14:19) Kae neʼe olo ia Palenapa mo Paulo ki te tahi kolo ʼo hoko atu tanā faifakamafola. Kotea te ʼu fua lelei ʼo tanā faʼa kataki ʼaia? Neʼe nā fai ni tisipulo ʼe kauga malie, pea ʼaki ʼanā palalau mo tanā faʼifaʼitaki, neʼe nā fakalotomalohiʼi ʼonā tehina mo tuagaʼane. (Lau ia Gaue 14:21, 22.) Logo la tonā fakatagaʼi, kae neʼe mole fakagata e Palenapa mo Paulo tanā faifakamafola ʼo fua lelei ai ki te tokolahi. ʼO toe feia pe, kapau ʼe tou haga fakahoko te gaue ʼae neʼe foaki mai e te ʼAtua, ʼe toe tapuakinaʼi anai mo tatou.

15. Kotea ʼae ʼe ke ako mai te faʼifaʼitaki ʼa te tehina ko Macmillan?

¹⁵ ʼI muʼa ʼo te taʼu 1914, neʼe fakaʼamu te ʼu kaugana ʼa Sehova ke hoko ni aluʼaga. Ohage la ko te tehina ko Macmillan. Neʼe manatu, ʼo feia mo ni tokolahi, kua natou vave hake ki selo. Neʼe ina ui ʼi tana akonaki neʼe ina fai ʼi Sepetepeli 1914: “Ko te lagi akonaki fakamuli pe ʼaeni ʼe au fai.” Kae kua tou iloʼi pe, neʼe mole ko tana akonaki fakamuli ʼaia. Ki muli age, neʼe tohi e te tehina ko Macmillan: “Neʼe lagi kua loto la e ʼihi ia matou ke natou hake ki selo.” ʼE hoko atu te tehina: “Koia, neʼe tonu ke matou maʼumaʼua ʼi te ʼu gaue maʼa te ʼAliki.” Pea ko te faʼahi ʼaia neʼe ina fai. Neʼe faʼafai ʼi te faifakamafola. Neʼe feala ke ina fakalotomalohiʼi he ʼu tehina ʼe tokolahi neʼe pilisoniʼi he neʼe mole natou fia kau ʼi te tau. Pea neʼe kau tuʼumaʼu pe ki te ʼu fono maʼia ʼi tana kua vaivai matuʼa. Koia, neʼe lahi pe te maʼumaʼua ʼa te tehina ko Macmillan ʼi tana tauhi kia Sehova, ʼo atali ki tona fakapale. Neʼe kotea te ʼu fua lelei neʼe ina maʼu? ʼI muʼa ʼo tona mate ʼi te taʼu 1966, neʼe ina tohi fenei: “Kua malohi age taku tui ʼi temi nei.” Ko he faʼifaʼitaki lelei ʼaia maʼa tatou, tafito la pe kua fualoa tatatou katakiʼi ni faigataʼaʼia.​—Hep. 13:7.

16. Kotea te aluʼaga faigataʼa neʼe hoko ki te tehina ko Jennings mo tona ʼohoana?

¹⁶ Tokolahi ʼi te ʼu kaugana ʼa Sehova ʼe natou tau mo he mahaki neʼe mole natou ʼamanaki ki ai. Ko te faʼahi ʼaia neʼe hoko ki te tehina ko Herbert Jennings. b ʼI tana fakamatala tona maʼuli, neʼe palalau ki te ʼu fiafia neʼe nā maʼu mo tona ʼohoana ʼi tanā gaue misionea ʼi Ghana, ʼi Afelika. Kae neʼe ina maʼu leva he mahaki faigataʼa. ʼO mulimuli kia Sakopo 4:14, neʼe ina ui ʼo ʼuhiga mo te aluʼaga ʼaia, ko “he apogipogi neʼe mole nā ʼamanaki ki ai.” (Lau.) Neʼe ina toe ui fenei: “ ʼI tamā fakakaukauʼi lelei te aluʼaga ʼaia, neʼe ma fakatuʼutuʼu ke ma mavae ʼi Ghana pea mo mamaʼo mo ʼoma kaumeʼa lelei tokolahi kae ma toe liliu ki Kanata ke faitoʼo ai au.” Neʼe tokoni ia Sehova ki te tehina ko Jennings mo tona ʼohoana ke hoko atu tanā tauhi agatonu kia te ia, logo te faigataʼaʼia ʼaia.

17. Neʼe fakalotomalohiʼi feafeaʼi e te faʼifaʼitaki ʼa te tehina ko Jennings he ʼu tehina mo tuagaʼane?

 ¹⁷ Neʼe tokoni lahi ki ʼihi te fakamatala ʼe te tehina ko Jennings te meʼa ʼae neʼe hoko kia ia. Neʼe tohi e he tuagaʼane: “Ko te hoki ai ʼe he alatike neʼe malave ʼosi kia au! . . . ʼI taku lau ʼae neʼe tuku e te tuagaʼane ko Jennings tana gaue misionea kae alu ʼo faitoʼo, neʼe au maʼu he manatu fakapotopoto ʼo ʼuhiga mo toku aluʼaga.” Pea neʼe ui fenei e he tehina: “Neʼe au tagata ʼafeā ia taʼu ʼe hogofulu. Kae neʼe au maʼu leva te mahaki ʼulu, ʼo mole kei feala ai ke au tagata ʼafeā. Neʼe au manatu neʼe mole kei ʼi ai hoku ʼaoga pea neʼe mole kei au fia lau te ʼu alatike ʼae ʼe fakamatala ai e te ʼu tehina mo tuagaʼane tonatou maʼuli. . . . Kae neʼe fakalotomalohi kia au te faʼa kataki ʼa te tehina ko Jennings.” ʼE fakamanatuʼi mai e te aluʼaga ʼaia, ka tou ʼutakiʼi he ʼu faigataʼaʼia neʼe mole tou ʼamanaki ki ai, ʼe feala ke tou fakalotomalohiʼi ʼihi. Logo la ʼe feala ke hoko ʼi totatou maʼuli he ʼu aluʼaga fakapunamaʼuli, kae ʼe feala pe ke tou liliu ko he faʼifaʼitakiʼaga ʼo te tui mo te faʼa kataki.​—1 Pet. 5:9.

18. Kotea te ako ʼe ke taʼofi mai te tuagaʼane vitua ʼi Nigéria? (Vakaʼi te pāki.)

¹⁸ ʼE mole hao te ʼu kaugana tokolahi ʼa Sehova mai te ʼu nunuʼa kovi ʼo he tuʼutamaki, ohage la ko te COVID-19. Ko te tuagaʼane vitua ʼi Nigéria, ʼi Afelika, neʼe mole kei ʼi ai hana meʼa kai. Neʼe ina fakamoho ʼi te tahi ʼuhu te moʼi laisi ʼae neʼe kei toe pea neʼe fehuʼi age e tana kiʼi taʼahine pe ʼe kotea anai tanā meʼa kai ki te fetapa. Neʼe tali age e totatou tuagaʼane, ʼe mole kei ʼi ai hanā foʼi falā mo hanā meʼa kai. Kae neʼe tonu ke nā faʼifaʼitakiʼi te fafine vitua ʼo Salepate. Neʼe tonu ke nā fakamoho te meʼa kai ʼae kei toe pea ke nā falala kia Sehova. (1 Hau 17:8-16) Neʼe heʼeki pe la nā iloʼi pe kotea tanā meʼa kai ki te fetapa, mo te tuku age ʼo tana kato meʼa kai neʼe feʼauga kia vahaʼa ʼe lua, neʼe momoli age e te ʼu  tehina mo tuagaʼane. Neʼe ui e te tuagaʼane neʼe mole ina manatu pe la neʼe lolotoga fakalogo lelei ia Sehova ʼi tana faipalalau mo tana taʼahine. ʼE moʼoni, ka tou falala kia Sehova ʼi te ʼu temi ʼae ʼe tou tau ai mo ni faigataʼaʼia, ʼe tou fakaovi lahi age kia te ia.​—1 Pet. 5:6, 7.

19. Kotea ʼae neʼe hoko ki te tehina ko Aleksey Yershov?

¹⁹ ʼI te ʼu taʼu pe ʼaeni, neʼe fakatagaʼi te tokolahi ʼi ʼotatou tehina mo tuagaʼane, kae neʼe mole natou ʼamanaki ki ai. Tou vakaʼi te meʼa ʼae neʼe hoko ki te tehina ko Aleksey Yershov, ʼe maʼuli ʼi Lusia. ʼI tona papitema ʼi te 1994, neʼe faʼifaʼitaliha te tauhi ʼa te kau Fakamoʼoni ʼa Sehova ʼi te fenua ʼaia. Kae ʼi te temi nei kua fetogi. ʼI te 2020, neʼe hūfi te ʼapi ʼo te tehina ko Yershov, pea neʼe lahi ʼona koloa ʼae neʼe toʼo. Hili ki ai ni mahina, neʼe tukugakoviʼi ia ia e te puleʼaga takua ʼe agatuʼu. Pea ko te meʼa ʼae neʼe kovi age, he neʼe tukugakoviʼi ia ia ʼuhi ko te ʼu viteo neʼe puke e he tahi neʼe ina ako te Tohi-Tapu lolotoga te taʼu mo ni mahina, kae neʼe ko he fasituʼu.

20. Kotea ʼae neʼe fai e te tehina ko Yershov ke malohi age tana felogoi mo Sehova?

²⁰ Neʼe ʼi ai koa ni fua lelei ʼo te fakatagaʼi ʼaia ʼo te tehina ko Yershov? ʼEi. Neʼe toe malohi age tana felogoi mo Sehova. ʼE ina ui fenei: “Kua lahi age tamā faikole mo toku ʼohoana. ʼE au iloʼi ʼe au lava ʼutakiʼi te ʼahiʼahi ʼaia ʼaki te tokoni ʼa Sehova.” ʼE ina hoko atu fenei: “Ko taku fai taku ako tokotahi ʼe tokoni mai ke mole au lotovaivai. ʼE au metitasio ki te faʼifaʼitaki ʼa te ʼu kaugana agatonu ʼi te temi muʼa. ʼE lahi te ʼu fakamatala fakatohi-tapu ʼe fakaha ai te maʼuhiga ʼae ke mole au hoha kae ke au falala kia Sehova.”

21. Kotea ʼae neʼe tou ako ʼi te alatike ʼaeni?

²¹ Kotea ʼae neʼe tou ako ʼi te alatike ʼaeni? ʼI te malama ʼaeni, ʼe tou tau ʼi ʼihi temi mo ni faigataʼaʼia neʼe mole tou ʼamanaki ki ai. Kae ʼe tokoni tuʼumaʼu ia Sehova ki ʼana kaugana ʼae ʼe falala kia te ia. Ohage ko tona ui ʼi te vaega tafito ʼo te alatike ʼaeni: “ ʼE lahi te ʼu ʼahiʼahi ʼae ʼe tau mo te tagata faitotonu, kae ʼe haofaki e Sehova ia ia mai te ʼu ʼahiʼahi fuli ʼaia.” (Pes. 34:19) ʼAua naʼa tou haga manatu pe ki ʼotatou ʼahiʼahi kae ki te malohi ʼae ʼe foaki mai e Sehova. Pea ohage ko Paulo, ʼe feala anai ke tou ui: “ ʼE au maʼu te malohi kia meʼa fuli ʼuhi ko ia ʼae ʼe ina foaki mai te malohi.”​—Flp. 4:13.