1. Kotea ʼae neʼe ui e Sesu ki ʼana tisipulo ʼo ʼuhiga mo te temi fakaʼosi, pea kotea te fakatokaga neʼe ina fai kia natou?

 ʼI NI ʼu kiʼi ʼaho ʼi muʼa ʼo te mate ʼo Sesu, neʼe fehuʼi fenei age e ʼana tisipulo ʼe toko fa: “Kotea anai te fakailoga ʼo . . . te fakaʼosi ʼo te tuʼu ʼo te ʼu faʼahiga meʼa ʼaeni?” (Mat. 24:3) Neʼe lagi feʼekeʼaki e te ʼu tisipulo ʼaia pe ʼe feafeaʼi hanatou iloʼi te temi ʼae ka maumauʼi ai Selusalemi. ʼI te tali ʼae neʼe fai age e Sesu, neʼe mole palalau pe ʼo ʼuhiga mo te maumauʼi ʼo Selusalemi, kae neʼe toe palalau ʼo ʼuhiga mo “te fakaʼosi ʼo te tuʼu ʼo te ʼu faʼahiga meʼa” ʼaeni ʼe tou maʼuʼuli ai. ʼO ʼuhiga mo te temi fakaʼosi, neʼe ui e Sesu: “ ʼE mole iloʼi e he tahi te ʼaho pea mo te hola ʼaia, peʼe ko te kau ʼaselo ʼae ʼe ʼi selo, peʼe ko te ʼAlo, kaʼe gata pe ki te Tamai.” Pea neʼe ina fakatokaga ʼana tisipulo fuli ke natou “nonofo ʼalaʼala” pea mo “nonofo tokaga.”—Mko. 13:32-37.

2. He koʼe neʼe maʼuhiga ki te ʼu ʼuluaki Kilisitiano Sutea ke natou nonofo tokakaga?

² Neʼe tonu ke nonofo tokakaga te ʼu ʼuluaki Kilisitiano Sutea, he ʼe haofaki ai anai natou. Neʼe fakaha e Sesu ki ʼana tisipulo te ʼu faʼahi ʼae ka tokoni anai kia natou ke natou iloʼi kua ovi mai te maumauʼi ʼo Selusalemi. Neʼe ina ui fenei: “Ka kotou sisio anai ki te ʼa takatakai ʼo Selusalemi e te ʼu kautau, pea ke kotou iloʼi kua ovi mai tona maumauʼi.” Pea ka hoko te aluʼaga ʼaia, neʼe tonu ke natou fakalogo ki te fakatokaga ʼa Sesu ke natou “feholaki . . . ki te ʼu moʼuga.” (Luka 21:20, 21) Ko natou ʼae neʼe fakalogo, neʼe hao ʼi te maumauʼi ʼo Selusalemi e te kau Loma.

3. Kotea ʼae ka tou vakaʼi ʼi te alatike ʼaeni?

 ³ ʼE tou maʼuʼuli nei ʼi te temi ʼo te fakaʼosi ʼo te malama agakovi ʼaeni. Koia, ʼe tonu ai mo tatou ke tou fakapotopoto pea mo nonofo tokakaga. ʼI te alatike ʼaeni, ʼe tou vakaʼi anai pe ʼe feafeaʼi hatatou fakapotopoto moka tou sioʼi ʼi te televisio te ʼu aluʼaga ʼae ʼe hoko ʼi te malamanei. ʼE tou toe vakaʼi anai pe ʼe feafeaʼi hatatou tokakaga kia tatou totonu pea mo fakaʼaogaʼi lelei totatou temi.

4. He koʼe ʼe tou tokagaʼi te ʼu aluʼaga ʼi te malamanei ʼae ʼe fakahoko ai te ʼu lea fakapolofeta ʼi te Tohi-Tapu?

⁴ ʼE ʼi ai ni tupuʼaga lelei ke tou tokagaʼi te ʼu aluʼaga ʼi te malamanei ʼae ʼe fakahoko ai te ʼu lea fakapolofeta. Ohage la, neʼe fakakikite e Sesu ni aluʼaga ke tou iloʼi ai te temi fakaʼosi ʼo te malama ʼo Satana. (Mat. 24:3-14) Pea neʼe fakalotomalohiʼi tatou e te apositolo ko Petelo ke tou tokagaʼi te fakahoko ʼo te ʼu lea fakapolofeta, ke tou taupau he tui ʼe malohi. (2 Pet. 1:19-21) Tahi ʼae, ʼe kamata fenei te tohi fakamuli ʼo te Tohi-Tapu: “Te ʼu meʼa ʼae neʼe fakaha age e Sesu Kilisito ki ʼana kaugana, ʼae neʼe foaki age e te ʼAtua kia te ia, ke natou iloʼi ai te ʼu meʼa ʼae kua vave hoko mai.” (Apk. 1:1) Koia ʼe tou tokagaʼi te ʼu aluʼaga ʼae ʼe hoko ʼi te malamanei pea tou fia iloʼi pe ʼe fakahoko feafeaʼi ai te ʼu lea fakapolofeta ʼi te Tohi-Tapu. Pea ʼe lagi tou fia palalau mo te ʼu tehina mo tuagaʼane ki te ʼu aluʼaga ʼaia.

5. Kotea ʼae ʼe tonu ke tou tekeʼi, kae kotea ʼae ʼe tonu ke tou fai? (Vakaʼi mo te ʼu pāki.)

⁵ Kae ka tou palalau ki he ʼu lea fakapolofeta, ʼe tou tokakaga ke mole tou fakaha ʼatatou manatu huʼu mo te ʼu meʼa ʼae ka hoko. Kotea tona tupuʼaga? He ʼe mole tou loto ke logo kehekehe te kokelekasio ʼuhi ko ʼatatou palalau. Ohage la, ʼe lagi tou logo ki te ʼu puleʼaki e fai e te kau takitaki ʼo te malamanei moʼo fakatokatoka he tau pea mo fakatuʼu te tokalelei mo te fimalie. ʼE mole tou ui atu aipe ʼe fakahoko e te tala ʼaia te lea fakapolofeta ia 1 Tesalonika 5:3. Kae ʼe tonu ke tou iloʼi pe ʼe kotea te fakamahino fakamuli. Ka tou fakatafito ʼatatou faipalalau ki te ʼu tohi ʼa te kautahi ʼa Sehova, ʼe tou tokoni ai ki te kokelekasio ke “logo tahi ʼi he manatu ʼe tahi.”—1 Ko. 1:10; 4:6.

6. Kotea te ʼu ako ʼe tou maʼu mai ia 2 Petelo 3:11-13?

⁶ Lau ia 2 Petelo 3:11-13. ʼE tokoni ia te apositolo ko Petelo ke tou fakapotopoto moka tou tokagaʼi te ʼu lea fakapolofeta. ʼE ina fakalotomalohiʼi tatou ke tou “manatuʼi tuʼumaʼu ia te hoko mai ʼo te ʼaho ʼo Sehova.” Kotea tona tupuʼaga? Mole ʼuhi he tou fia iloʼi “te ʼaho pea mo te hola” ʼae ka fakahoko ai anai e Sehova ia Alamaketone. Kae ʼuhi he tou fia fakaʼaogaʼi te temi ʼae kei toe ke tou “agamaʼa pea mo fai he ʼu gaue ʼe ha ai [tatatou] pipiki ki te ʼAtua.” (Mat. 24:36; Luka 12:40) Ko tona fakaʼuhiga, ʼe tou fia aga fakahagatonu pea mo iloʼi papau ʼe ko totatou ʼofa mamahi kia Sehova ʼae ʼe ina uga ai tatou ke tou tauhi kia te ia. Ke tou haga tahi ki te ʼu faʼahi ʼaia, ʼe tonu ke tou tokakaga kia tatou totonu.

7. ʼE tou fakaha feafeaʼi ʼe tou tokakaga kia tatou totonu? (Luka 21:34)

⁷ Neʼe ui e Sesu ki ʼana tisipulo ke natou tokagaʼi te ʼu aluʼaga ʼae ʼe hoko ʼi te malamanei, pea ke natou toe tokakaga kia natou totonu. ʼE ha lelei te fakatokaga ʼaia ia  Luka 21:34. (Lau.) ʼE ui ai e Sesu: “Kotou tokakaga kia koutou.” Ko he Kilisitiano moʼoni ʼe tokaga kia ia totonu, ʼe ina iloʼi te ʼu faʼahi ʼae ʼe fakatupu tuʼutamaki ki ʼana felogoi mo Sehova, pea ʼe faiga ke ina tekeʼi. ʼI tana fai feia, ʼe haga nofo ʼi te ʼofa ʼo te ʼAtua.—Taag. 22:3; Suta 20, 21.

8. Kotea te fakalotomalohi neʼe fai e te apositolo ko Paulo ki te kau Kilisitiano?

⁸ Neʼe toe fakalotomalohiʼi e te apositolo ko Paulo te kau Kilisitiano ke natou tokakaga kia natou totonu. Ohage la, neʼe ina ui fenei ki te kau Kilisitiano ʼo Efeso: “Kotou tokakaga fakalelei ki takotou aga, ke mole kotou hage ko ni hahaʼi vavale kaʼe ke kotou hage ko ni hahaʼi popoto.” (Efe. 5:15, 16) ʼE faiga tuʼumaʼu pe e Satana ke ina maumauʼi tatatou fakakaumeʼa mo Sehova. Koia la ʼae ʼe tokoni mai ai ʼi te Tohi-Tapu ke tou haga “mahino pe kotea te finegalo ʼo Sehova,” ke puipui ai tatou mai te ʼu fakahala fuli ʼa Satana.—Efe. 5:17.

9. ʼE feafeaʼi hatatou mahino pe kotea te finegalo ʼo Sehova ʼo ʼuhiga mo tatou?

⁹ ʼE mole fakaha mai ʼi te Tohi-Tapu te ʼu tuʼutamaki fuli ʼae ʼe fakatupu kovi ki tatatou fakakaumeʼa mo Sehova. ʼI ʼihi temi, ʼe tonu ke tou fai he ʼu tonu ʼo ʼuhiga mo ni aluʼaga ʼe mole talanoa ki ai te Tohi-Tapu. Ke lelei ʼatatou tonu, ʼe tonu ke tou mahino pe kotea te finegalo ʼo Sehova. Pea ʼe feala ke tou mahino ki ai moka tou ako tuʼumaʼu te Folafola ʼa te ʼAtua pea mo metitasio ki ai. Ka tou mahino lelei age ki te finegalo ʼo te ʼAtua pea mo maʼu “te manatu ʼa Kilisito,” ʼe tou haʼele anai ohage ko ni hahaʼi popoto logo la ʼe mole ui fakahagatonu mai ʼi te Tohi-Tapu te meʼa ʼae ʼe tonu ke tou fai. (1 Ko. 2:14-16) ʼI ʼihi temi ʼe faigafua tatatou iloʼi te ʼu faʼahi ʼe tonu ke tou tekeʼi. Kae ʼi ʼihi temi ʼe mole faigafua.

10. Kotea te ʼu aluʼaga fakatupu tuʼutamaki ʼe tonu ke tou tekeʼi?

¹⁰ ʼI te ʼu aluʼaga fakatupu tuʼutamaki ʼae ʼe tonu ke tou tekeʼi ʼe kau ai te fia faiʼakau, te inu kava fakavale, te kai fakavale, te ʼu palalau kona, mo te sioʼi ʼo he ʼu ʼata ʼe ha ai te agamalohi, mo te ʼu ʼata kovi pea mo te tahi ʼu aga ʼe tatau. (Pes. 101:3) ʼE kumi tuʼumaʼu pe e totatou fili, ia Satana te Tevolo he ʼu faigamalie ke ina maumauʼi ʼatatou felogoi mo Sehova. (1 Pet. 5:8) Kapau ʼe mole tou nonofo tokaga, ʼe nunusi anai e Satana ki ʼotatou ʼatamai mo ʼotatou loto te pulapula ʼae ʼo te manumanū, te agakaka, te holi fakavale, te fehiʼa, te fia meʼa lahi, pea mo te lotokovi. (Kal. 5:19-21) ʼI te kamata, ʼe lagi mole malohi fau te ʼu agaaga ʼaia. Kae kapau ʼe mole tou foimo taʼaki, ʼe haga tuputupu anai ohage ko he fuʼu ʼakau kona, pea ʼe fakatupu ai ni mamahi.—Sakp. 1:14, 15.

11. Kotea te tahi tuʼutamaki, ʼe lagi mole tou tokagaʼi atu aipe, kae ʼe tonu ke tou tekeʼi, pea kotea tona tupuʼaga?

¹¹ Ko te tahi tuʼutamaki, ʼe lagi mole tou tokagaʼi atu aipe, ʼe ko te ʼu fakakaugā kovi. Tou toʼo he faʼifaʼitaki. ʼE ke gaue mo he tahi ʼe mole ko he Fakamoʼoni ʼa Sehova. ʼE ke agalelei mo fia tokoni ki ai he ʼe ke loto ke ina maʼu ni manatu lelei ʼo ʼuhiga mo tatou. Pea ʼi ʼihi temi ʼe kolua kakai fakatahi. Kae ʼe liliu vave leva ko he agamahani. ʼE tautau palalau atu ki he ʼu aga heʼe ʼaoga, pea ʼe mole ke fia tokagaʼi ʼi te kamata. Kae ʼaki te temi, kua ke mahani leva ʼi te ʼu taʼi fai palalau ʼaia, ʼo mole kei ke koviʼia. Pea ʼi te tahi ʼaho, ʼi takolua ʼosi gaue, ʼe ina fakaafe koe ke kolua olo ʼo iinu, pea ʼe ke tali. Ki muli age, kua ke manatu tahi mo ia. Pea faifai pe, kua tatau leva tau aga mo ia. ʼE moʼoni, ʼe tou agalelei mo fakaʼapaʼapa ki te hahaʼi fuli.  Kae tou manatuʼi, ʼe tou faʼifaʼitakiʼi pe anai te aga ʼo natou ʼae ʼe tou fakatahi mo ia. (1 Ko. 15:33) Kapau ʼe tou tokakaga kia tatou totonu, ohage ko te tokoni mai ʼa Sesu, ʼe mole tou fakatahi tuʼumaʼu anai mo natou ʼae ʼe mole mulimuli ki te ʼu lao ʼa Sehova. (2 Ko. 6:15) ʼE tou tokagaʼi anai te tuʼutamaki, pea ʼe tou faiga anai ʼo tekeʼi.

12. Kotea ʼae neʼe tonu ke fai e te ʼu tisipulo ʼa Sesu ʼi tanatou fakatalitali ki te maumauʼi ʼo Selusalemi mo tona fale lotu?

¹² Neʼe loto e Sesu ke maʼumaʼua ʼana tisipulo ʼi tanatou fakatalitali ki te maumauʼi ʼo Selusalemi mo tona fale lotu. Koia, neʼe ina tuku age he gaue ke natou fai. Neʼe ina fakatotonu ke natou fakamafola te logo lelei “ ʼi Selusalemi, mo Sutea katoa pea mo Samalia, ʼo kaku ki te ʼu potu taupotu ʼo te kele.” (Gaue 1:6-8) Neʼe ko he toe gaue! ʼI tanatou fakahoko te gaue ʼaia, neʼe fakaʼaogaʼi lelei ai e te ʼu tisipulo tonatou temi.

13. He koʼe ʼe tonu ke tou fakaʼaogaʼi lelei totatou temi? (Kolose 4:5)

¹³ Lau ia Kolose 4:5. Ke tou tokakaga kia tatou totonu, ʼe tonu ke tou fakakaukauʼi te faʼahiga fakaʼaogaʼi ʼo totatou temi. ʼE feala pe ke hoko “ni aluʼaga fakapunamaʼuli”  ki he tahi pe ia tatou. (Ekl. 9:11) Ohage la, ʼe feala pe ke tou mate fakapunamaʼuli.

14-15. ʼE feafeaʼi hatatou fakaʼaogaʼi lelei totatou temi? (Hepeleo 6:11, 12) (Vakaʼi mo te pāki.)

¹⁴ ʼE tou fakaʼaogaʼi lelei totatou temi moka tou fai te finegalo ʼo Sehova pea mo fakamalohi tatatou felogoi mo ia. (Soa. 14:21) ʼE tonu ke tou “tutuʼu malohi, mo taʼofi maʼu, pea ke lahi tuʼumaʼu [ʼatatou] gaue ʼi te ʼAliki.” (1 Ko. 15:58) Ka tou fai feia, ka hoko mai te mate peʼe ko te fakaʼosi ʼo te malama agakovi ʼaeni, ʼe mole tou fakahemala anai.—Mat. 24:13; Loma 14:8.

¹⁵ Ia ʼaho nei, ʼe haga takitaki e Sesu ʼana tisipulo ʼi tanatou fakamafola te Puleʼaga ʼo te ʼAtua ʼi te kele katoa. ʼE fakahoko e Sesu tana fakapapau. ʼE ina fakaʼaogaʼi te kautahi ʼa Sehova moʼo akoako ʼo tatou ki te faifakamafola, pea ʼe ina foaki mai te ʼu meʼa gaue ʼae ʼe ʼaoga moʼo tala te logo lelei. (Mat. 28:18-20) ʼE tou mulimuli ki te fakatotonu ʼa Sesu, ʼo tou faʼafai ʼi te faifakamafola mo te akoʼi ʼo te hahaʼi. Pea ʼe tou toe nonofo tokakaga ʼi tatatou atali ke pulihi e Sehova te malama ʼaeni. Ka tou fakalogo ki te tokoni ia Hepeleo 6:11, 12, ʼe tou taupau maʼu anai totatou ʼamanaki “ ʼo kaku ki te fakaʼosi.”—Lau.

16. Kotea ʼae ʼe tou fakatotonu ke tou fai?

¹⁶ Kua fakakatofa e Sehova te ʼaho mo te hola ʼae ka ina pulihi ai anai te malama ʼa Satana. Ka hoko mai te ʼaho ʼaia, ʼe fakahoko anai e Sehova te ʼu lea fakapolofeta ʼae neʼe ina tohi ʼi tana Folafola. ʼI muʼa ʼo te hoko mai ʼo te ʼaho ʼaia, ʼe lagi hage anai kia tatou ʼe tuai te fakaʼosi. Kae ko te ʼaho ʼo Sehova “ ʼe mole tauhala anai ia!” (Hap. 2:3) ʼOfa pe ke tou fakatotonu ke tou “nofo ʼo lamalama ia Sehova, mo kataki ʼo atalitali ki te ʼAtua ʼae ʼe ina haofaki [tatou].”—Mik. 7:7.