1-2. Kotea te manatu ʼe lagi tou maʼu ʼi ʼihi temi?

 ʼE KE manatu koa ʼi ʼihi temi, ʼe mole tali atu Sehova ki ʼau faikole? Kapau ko ia, ʼe mole ko koe tokotahi pe. Tokolahi te ʼu tehina mo tuagaʼane neʼe natou manatu feia, tafito la moka natou lolotoga tau mo he aluʼaga faigataʼa. Ka tou mamahi, ʼe lagi faigataʼa tatatou mahino ʼae ʼe tali mai ia Sehova ki ʼatatou faikole.

² ʼI te alatike ʼaeni, ʼe tou vakaʼi anai pe koʼe ʼe feala ke tou tui ʼe tali mai Sehova ki te ʼu faikole ʼa ʼana kaugana. (1 Soa. 5:15) ʼE tou toe vakaʼi anai te ʼu fehuʼi ʼaeni: He koʼe ʼe tou manatu ʼi ʼihi temi ʼe mole tali mai Sehova ki ʼatatou faikole? ʼE tali feafeaʼi mai Sehova ki ʼatatou faikole ia ʼaho nei?

3. He koʼe ʼe loto e Sehova ke tou faikole kia te ia?

³ ʼE ui lelei mai ʼi te Tohi-Tapu ʼe ʼofa mamahi ia Sehova ia tatou pea ʼe tou maʼuhiga kia te ia. (Ake. 2:7; 1 Soa. 4:10) Koia ʼe loto ai e Sehova ke tou kole tokoni age kia te ia. (1 Pet. 5:6, 7) ʼE fia tokoni mai ke tou nofo ovi kia te ia pea ke tou lava katakiʼi ʼotatou faigataʼaʼia.

4. He koʼe ʼe tou iloʼi ʼe tali e Sehova te ʼu faikole ʼa ʼana kaugana? (Vakaʼi mo te pāki.)

⁴ ʼE lahi te ʼu fakamatala ʼi te Tohi-Tapu ʼe ha ai ʼe tali Sehova te ʼu faikole ʼa ʼana kaugana. ʼE ʼi ai he faʼifaʼitaki ʼe ke manatu ki ai? Tou vakaʼi te faʼifaʼitaki ʼo te Hau ko Tavite. Lolotoga tona maʼuli, neʼe lahi ʼona fili, pea neʼe ina kumi tuʼumaʼu pe te tokoni ʼa Sehova ʼi te faikole. ʼI te tahi ʼaho, neʼe faikole mamahi kia Sehova ʼo ina ui: “Sehova e, fagono mai ki taku faikole. Fagono mai ki taku kole tokoni. Tali mai  kia au ʼuhi ko tau agatonu mo tau faitotonu.” (Pes. 143:1) Neʼe tali e Sehova ki te ʼu faikole ʼa Tavite, ʼo ina haofaki mai ʼona fili. (1 Sam. 19:10, 18-20; 2 Sam. 5:17-25) Koia, neʼe ui ai e Tavite mo he lotofalala: “ ʼE ovi ia Sehova kia natou fuli ʼae ʼe pauʼi kia te ia.” ʼE feala ke tou maʼu mo tatou te lotofalala ʼaia.​—Pes. 145:18.

5. Neʼe tali tuʼumaʼu koa Sehova ki te ʼu faikole ʼa ʼana kaugana ʼo te temi muʼa ohage ko te meʼa neʼe natou loto ki ai? Tuku mai he faʼifaʼitaki. (Vakaʼi mo te pāki.)

⁵ ʼE mole tali tuʼumaʼu mai Sehova ki ʼatatou faikole ohage ko te meʼa ʼae ʼe tou loto ki ai. Ohage la ko te apositolo ko Paulo. Neʼe ina kole ki te ʼAtua ke ina toʼo te ‘tala ʼi tona kakano.’ Neʼe tuʼa tolu te faikole mamahi ʼa Paulo kia Sehova ʼo ʼuhiga mo te faigataʼaʼia ʼaia. Neʼe tali koa Sehova ki ʼana faikole? ʼEi, kae neʼe mole hage ko te meʼa ʼae neʼe loto ki ai Paulo. Neʼe mole pulihi e Sehova tona mamahi, kae neʼe ina foaki age te malohi ke lava tauhi agatonu kia te ia.​—2 Ko. 12:7-10.

6. He koʼe ʼe feala ʼi ʼihi temi ke tou manatu ʼe mole tali Sehova ki ʼatatou faikole?

⁶ ʼO toe feia pe, ʼe feala ʼi ʼihi temi ke tali mai Sehova ki ʼatatou faikole kae mole hage ko te meʼa ʼe tou loto ki ai. Kae ʼe feala ke tou tui papau ʼe iloʼi lelei e Sehova te meʼa ʼae ʼe ʼaoga moʼoni kia tatou. ʼE feala pe la ke ina “fakahoko ʼo lahi maumau age ʼi te ʼu meʼa ʼae ʼe tou kole peʼe tou manatu ki ai.” (Efe. 3:20) Koia, ʼe feala ke tali mai ki ʼatatou faikole ʼi te temi pea ʼi hona aluʼaga ʼe mole tou ʼamanaki ki ai.

7. He koʼe ʼi ʼihi temi ʼe tonu ke tou fetogi te ʼu meʼa ʼae ʼe tou kole kia Sehova? Tuku mai he faʼifaʼitaki.

⁷ Ka tou mahino lelei age ki te finegalo ʼo Sehova, ʼe feala pe ke tou fetogi te ʼu meʼa ʼae ʼe tou kole kia te ia. Tou toʼo te faʼifaʼitaki ʼo te tehina ko Martin Poetzinger. Mole faʼa fualoa ki tana ʼosi ʼohoana, neʼe pilisoniʼi ʼi he lototoʼa fakamamahi ʼo te kau Siamani. ʼI te kamata neʼe ina kole kia Sehova ke fakamavae ia ia mai te lototoʼa ʼaia, ke feala hana tokaga ki tona ʼohoana pea mo hoko atu tana gaue faifakamafola. Kae hili ki ai vahaʼa ʼe lua, neʼe hage neʼe mole he meʼa neʼe fai e Sehova ke fakaʼateainaʼi ai ia ia. Koia neʼe fenei leva te ʼu faikole ʼa te tehina: “Sehova, fakalelei, kae ke ke fakaha mai pe kotea te meʼa ʼae ʼe ke loto ke au fai.” Pea neʼe fakakaukau te tehina ki te ʼu mamahi ʼae ʼe tau mo te tahi ʼu tehina ʼi te lototoʼa fakamamahi. Tokolahi neʼe natou tuʼania ki ʼonatou ʼohoana mo ʼanatou fanau.  Neʼe ui leva e te tehina ʼaia ko Poetzinger kia Sehova: “Sehova, ʼe au fakamalo atu ki te gaue foʼou ʼaeni neʼe ke tuku mai. Tokoni mai ke au fakalotomalohiʼi ʼoku tehina.” Pea ʼi te ʼu taʼu ʼe hiva ʼae neʼe nofo pilisoni ai, ko te faʼahi ʼaia neʼe ina fai.

8. Ka tou faikole, kotea ʼae ʼe tonu ke tou manatuʼi?

⁸ Tou manatuʼi kua ʼi ai te fakatuʼutuʼu ʼa Sehova pea ʼe ina fakahoko anai ʼo mulimuli ki tana kaletalio. ʼE ina fakatuʼutuʼu ke pulihi katoa pea ʼo talu ai te ʼu mamahi fuli ʼae ʼe tau mo tatou ʼi te temi nei, ohage ko te ʼu tuʼutamaki fakanatula, te mahaki pea mo te mate. Pea ʼe ina fakahoko anai ʼaki tona Puleʼaga. (Tan. 2:44; Apk. 21:3, 4) Kae ʼi muʼa ʼo tana fakahoko te faʼahi ʼaia, ʼe ina tuku ke pule Satana ki te malamanei. b (Soa. 12:31; Apk. 12:9) Ka na pau la ʼe ina fakatokatoka te ʼu fihifihia fuli ʼi te temi nei, pea ʼe hage leva ia ʼe lelei te pule ʼa Satana. Koia, ʼe tonu ai ke tou atali ke fakahoko e Sehova ʼana ʼihi fakapapau ʼi te ka haʼu. Kae mole ui leva kua ina tuku feiaʼi tatou. Tou vakaʼi ʼihi faʼahiga tokoni mai ʼa Sehova.

9. ʼE tokoni feafeaʼi mai ia Sehova moka maʼua ke tou fai he tonu? Tuku mai he faʼifaʼitaki.

⁹ ʼE ina foaki mai te poto. ʼE fakapapau e Sehova ʼe ina foaki mai te poto ʼae ʼe ʼaoga ke tou fai ai he ʼu tonu ʼe lelei. ʼE ʼaoga tafito kia tatou tona poto moka maʼua ke tou fai ni tonu ʼe feala ke fetogi ai totatou maʼuli, ohage la pe tou nofo selipatea peʼe tou ʼohoana. (Sakp. 1:5) Tou palalau ki te meʼa neʼe hoko kia Maria c te tuagaʼane selipatea. Neʼe pionie katoa pea neʼe fiafia ʼi tana selevisi ʼaia. Pea neʼe feiloʼiʼaki leva mo te tehina. ʼE ina ui fenei: “Neʼe ma liliu ʼo kaumeʼa lelei, pea neʼe ma femanakoʼaki leva. Neʼe au iloʼi neʼe maʼua ke au fai he tonu. Neʼe au faikole loaloaga pea mo fakamalotoloto huʼu mo te faʼahi ʼaia. Neʼe ʼaoga ke taki au e Sehova, kae neʼe au iloʼi ʼe ko au pe ka maʼua ke au toʼo te tonu.” Neʼe iloʼi e Maria neʼe tali age e Sehova ki ʼana faikole pea mo ina foaki age te poto. ʼO feafeaʼi? Neʼe fai e Maria ʼana kumi ʼi ʼatatou tohi, pea neʼe ina maʼu ni alatike neʼe tali ki ʼana fehuʼi. Neʼe toe mulimuli ki te ʼu tokoni lelei ʼa tana faʼe, ʼae ʼe tauhi agatonu kia Sehova. ʼAki te ʼu tokoni ʼaia, neʼe mahino lelei age Maria ki te ʼu meʼa ʼae neʼe ina logoʼi ʼi tona loto. Neʼe feala ai ke ina toʼo he tonu fakapotopoto.

10. ʼO mulimuli kia Filipe 4:13, ʼe tokoni feafeaʼi ia Sehova ki ʼana kaugana? Tuku mai he faʼifaʼitaki. (Vakaʼi mo te pāki.)

¹⁰ ʼE ina foaki mai te malohi ke tou faʼa kataki. Ohage ko tana fai ki te apositolo ko Paulo, ʼe foaki mai anai e Sehova te malohi  ʼae ʼe ʼaoga ke tou ʼutakiʼi ʼotatou faigataʼaʼia. (Lau ia Filipe 4:13.) Tou vakaʼi pe neʼe tokoni feafeaʼi ia Sehova ki te tehina ʼe higoa ko Benjamin. ʼI tana kei tupulaga, neʼe maʼuli mo tona famili ʼi he nofoʼaga ʼi Afelika maʼa te hahaʼi neʼe feholaki mai te tahi fenua. ʼE ina fakamatala: “Neʼe au faikole tuʼumaʼu kia Sehova. Neʼe au kole age ke ina foaki mai te malohi ke au fai te meʼa ʼae ʼe lelei kia te ia. Neʼe tali Sehova ki ʼaku faikole ʼo ina foaki mai te tokalelei, mo te lotomalohi ke au hoko atu taku faifakamafola. Neʼe ina toe foaki mai mo te ʼu tohi neʼe tokoni mai ke au nofo ovi kia te ia.” ʼE ina hoko atu fenei: “Ko taku lau te fakamatala ʼo te ʼu meʼa ʼae neʼe hoko ki ʼihi Fakamoʼoni pea mo te tokoni ʼa Sehova kia natou ke natou faʼa kataki, neʼe fakamalohi ai taku fakatotonu ʼae ke au nofo agatonu kia te ia.”

11-12. ʼE fakaʼaogaʼi feafeaʼi e Sehova ʼotatou tehina mo tuagaʼane moʼo tali ki ʼatatou faikole? (Vakaʼi mo te pāki.)

¹¹ ʼE ina fakaʼaogaʼi totatou famili fakalaumalie. ʼI te po ʼi muʼa ʼo tona mate, neʼe faikole fakamalotoloto ia Sesu. Neʼe kole mamahi kia Sehova ke haofaki ia ia mai tona fakalainoaʼi e te hahaʼi, ʼi tanatou lau ko he tahi ʼe laukovi ki te ʼAtua. Kae neʼe fai e Sehova te tahi age faʼahi ke tokoni kia Sesu. Neʼe ina fekauʼi age he ʼaselo, he tahi ʼi te ʼu tehina ʼo Sesu, moʼona fakalotomalohiʼi. (Luka 22:42, 43) ʼE toe feala pe ke tokoni mai ia Sehova kia tatou ʼaki tana uga he tehina peʼe ko he tuagaʼane ke pauʼi mai peʼe haʼu ʼo fakalotomalohiʼi tatou. Koia, ʼe feala ke tou faiga fuli ke tou maʼu ni faigamalie ke tou ‘fakafiafiaʼi’ ʼotatou tehina mo tuagaʼane ʼaki “he palalau lelei.”​—Taag. 12:25.

¹² Tou vakaʼi te faʼahi neʼe hoko ki te tuagaʼane ko Miriam. Hili ni vahaʼa ʼo te kua ʼosi mate ʼo tona ʼohoana, neʼe nofo tokotahi ʼio ia pea neʼe lotovaivai mo lotomamahi ʼaupito. Ko te meʼa pe ʼe ina fai ko te tagi. Neʼe fia palalau mo he tahi, kae ʼe ina ui neʼe mole pe la ina maʼu te malohi ke pauʼi ki he tahi. ʼE ina ui fenei: “Koia neʼe au faikole kia Sehova. Neʼe kei au lolotoga faikole mo tagi, kae tagi mai te telefoni. Neʼe ko te tagata ʼafea, te kaumeʼa lelei.” Neʼe fakafimalieʼi ia Miriam e te tagata ʼafea ʼaia mo  tona ʼohoana. Neʼe tui papau neʼe uga e Sehova te tehina ʼaia ke pauʼi age ki ai.

13. Tuku mai he faʼifaʼitaki ʼe fakaha ai ʼe feala ke fakaʼaogaʼi e Sehova ni hahaʼi ʼe mole tauhi kia te ia moʼo tali ki ʼatatou faikole.

¹³ ʼE feala ke ina fakaʼaogaʼi ni hahaʼi ʼe mole tauhi kia te ia. (Taag. 21:1) ʼI ʼihi temi, ʼe tali Sehova ki te ʼu faikole ʼo ʼana kaugana ʼaki hana uga ni hahaʼi ʼe mole tauhi kia te ia ke tokoni kia natou. Ohage la neʼe ina uga te Hau ko Aletasese ke ina tuku age ia Nehemia ke liliu ki Selusalemi ʼo toe laga te kolo. (Nee. 2:3-6) ʼO toe feia ia ʼaho nei, ʼe feala ke uga e Sehova ni hahaʼi ʼe mole tauhi kia te ia ke tokoni mai kia tatou.

14. Kotea ʼae ʼe fakalotomalohiʼi ai koe ʼi te faʼahi ʼae neʼe hoko ki te tuagaʼane ko Soo Hing? (Vakaʼi mo te pāki.)

¹⁴ ʼE tui papau te tuagaʼane ko Soo Hing neʼe fakaʼaogaʼi e Sehova te toketa moʼo tali ki ʼana faikole. Neʼe mole māu te ʼu mahaki neʼe tau mo tana tama. Tahi ʼae, neʼe lavea kovi ʼuhi he neʼe to. Neʼe nā tuku taumatuʼa ʼanā gaue ke nā tauhi ki tanā tama. Kae neʼe nā tau leva mo ni fihifihia fakapaʼaga. Neʼe mole kei lava katakiʼi e te tuagaʼane he tahi age mamahi. Neʼe ina avahi tona loto kia Sehova mo kole mamahi ke tokoni age. Pea neʼe tokagaʼi leva e he toketa tonā aluʼaga pea neʼe fia tokoni kia naua. Neʼe nā maʼu ai he tokoni mai te puleʼaga pea mo he nofoʼaga neʼe mole faʼa totogi kovi. Ki muli age neʼe ui e te tuagaʼane ko Soo Hing: “Neʼe ma sio lelei ai ki te tokoni mai ʼa Sehova. Ko ia moʼoni ‘ ʼae ʼe fagono ki te faikole.’ ”​—Pes. 65:2.

15. Kotea ʼae neʼe tokoni ki he tuagaʼane ke mahino neʼe tali Sehova ki ʼana faikole?

¹⁵ ʼI te agamahani, ʼe mole tali Sehova ki ʼatatou faikole ʼi hona aluʼaga fakaofoofo. Kae ʼe tali moʼoni mai, ʼo ina foaki mai te tokoni ʼae ʼe ʼaoga ke tou nofo agatonu kia te ia. Koia, faiga ke ke mahino ki te faʼahiga tali atu ʼa Sehova ki ʼau faikole. Neʼe hage ki te tuagaʼane ʼe higoa ko Yoko neʼe mole tali age Sehova ki ʼana faikole. Neʼe ina kamata tohi leva te ʼu meʼa ʼae neʼe ina kole kia Sehova. Ki muli age, neʼe ina toe lau te ʼu faʼahi ʼaia, pea neʼe ina tokagaʼi neʼe tali e Sehova ki tana ʼu faikole, maʼia pe la mo ʼihi neʼe kua ina galoʼi. ʼO toe feia mo tatou, tou toʼo he temi ke tou fakakaukauʼi ai ki te faʼahiga tali mai ʼa Sehova ki ʼatatou faikole.​—Pes. 66:19, 20.

16. He koʼe ʼe maʼuhiga te tui ke tou tali te faʼahiga tokoni mai ʼa Sehova? (Hepeleo 11:6)

 ¹⁶ ʼE tou fakaha tatatou tui moka tou faikole kia Sehova. Pea ʼe tou toe fakaha tatatou tui moka tou tali te faʼahiga tokoni mai ʼa Sehova. (Lau ia Hepeleo 11:6.) Tou vakaʼi te faʼifaʼitaki ʼo Mike mo tona ʼohoana ko Chrissy. Neʼe nā fia gaue ʼi te Petele. ʼE ui fenei e Mike: “ ʼI te taʼu fuli, neʼe ma fai tamā kole. Pea neʼe ma faikole tuʼumaʼu kia Sehova huʼu mo tamā fakatuʼutuʼu ʼaia. Kae neʼe mole pauʼi maua ki te Petele.” Neʼe tui papau pe ia Mike mo Chrissy ʼe iloʼi lelei age e Sehova te selevisi ʼae ʼe ʼaoga kia naua. Neʼe hoko atu tanā fai te ʼu meʼa ʼae neʼe nā lavaʼi, ʼo nā pionie katoa ʼi he koga meʼa neʼe ʼaoga ai he tokoni, pea neʼe nā kau ki te ʼu gaue laga fale ʼi totatou tauhi. ʼI te temi nei, kua nā kau ki te gaue fakasiliko. ʼE ui e Mike: “Neʼe mole tali tuʼumaʼu mai Sehova ki ʼama faikole ohage ko te meʼa ʼae neʼe ma loto ki ai. Kae neʼe tali pe ia ki ai, pea neʼe lelei age ia ʼi te ʼu meʼa ʼae neʼe ma ʼamanaki ki ai.”

17-18. Ohage ko tona fakaha ia Pesalemo 86:6, 7, kotea ʼae ʼe feala ke tou tui papau ki ai?

¹⁷ Lau ia Pesalemo 86:6, 7. Ko Tavite, ʼae neʼe ina tohi te pesalemo ʼaia, neʼe tui papau ʼe fagono ia Sehova ki ʼana faikole pea mo tali ki ai. ʼE feala mo koe ke ke tui papau ki ai. Ko te ʼu faʼifaʼitaki ʼae neʼe tou vakaʼi ʼi te alatike ʼaeni, ʼe fakamoʼoni ai ʼe foaki mai e Sehova te poto pea mo te malohi ke tou faʼa kataki. ʼE feala ke ina fakaʼaogaʼi totatou famili fakalaumalie, ʼo feia pe la mo ni hahaʼi ʼe mole tauhi kia te ia ʼi te temi nei, moʼo tokoni mai.

¹⁸ ʼE mole tali tuʼumaʼu mai Sehova ki ʼatatou faikole ohage ko te meʼa ʼae ʼe tou loto ki ai, kae ʼe tou iloʼi ʼe tali moʼoni mai. ʼE ina foaki mai te meʼa ʼae ʼe ʼaoga moʼoni kia tatou ʼi tona temi totonu. Koia, haga faikole kia Sehova ʼaki te tui, mo ke falala ʼe tokaga anai kia koe ʼi te temi nei pea ‘ ʼe ina fakahoko anai te fakaʼamu ʼo te ʼu meʼa maʼuli fuli’ ʼi te malama foʼou.​—Pes. 145:16.