1-2. ʼE feafeaʼi te lakaga ʼae ʼe fai ai te ʼu papitema, pea kotea ka tou vakaʼi anai ʼi te alatike ʼaeni?

 NEʼE ke tokagaʼi koa pe ʼe feafeaʼi ia natou ʼae ʼe ʼamanaki papitema? ʼE iloga tanatou tui malohi ʼi tanatou tali ʼae ki te ʼu fehuʼi ʼe lua ʼi muʼa ʼo tonatou papitema. ʼE ke sio ʼe fiafia tonatou famili mo ʼonatou kaumeʼa. Ka hake ake ia natou ʼae neʼe papitema mai te vai, ʼe ke logo ki te pasipasi pea mo sio ki te fiafia ʼo natou ʼaia neʼe papitema. ʼE fuafua ʼi te vahaʼa fuli, ko te toko lauʼi afe hahaʼi ʼe natou foaki tonatou maʼuli kia Sehova pea mo papitema.

² ʼE feafeaʼi kia koe? Kapau ʼe ke manatu ke ke papitema, pea ʼe ke kehe age mo te hahaʼi ʼo te malama agakovi ʼaeni, he ʼe ke “kumi ia Sehova.” (Pes. 14:1, 2) Neʼe fai te alatike ʼaeni maʼa koe, pe ʼe kei ke tupulaga peʼe kua ke fotufotuʼa. Kae ko natou ʼae kua papitema, ʼe natou toe loto foki ke fakamalohi tanatou fia tauhi kia Sehova ʼo talu ai. Koia, tou vakaʼi tupuʼaga ʼe tolu ʼe uga ai tatou ke tou tauhi kia Sehova.

3. He koʼe ʼe manako te ʼu kaugana ʼa Sehova ki te moʼoni mo te faitotonu? (Pesalemo 119:128, 163)

³ Neʼe fakatotonu e Sehova ki tana hahaʼi ke natou “manako ki te moʼoni.” (Sakl. 8:19) Neʼe fakalotomalohiʼi e Sesu ʼana tisipulo ke natou kumi te faitotonu. (Mat. 5:6) Ko tona fakaʼuhiga ʼae, ʼe natou loto moʼoni ke natou fai te meʼa ʼae ʼe faitotonu, mo lelei pea mo maʼa kia mata ʼo te ʼAtua. ʼE ke manako koa ki te moʼoni mo te faitotonu? ʼE mahino ia. ʼE ke fehiʼa ki te loi, ʼo feia mo te kaka pea mo te agakovi. (Lau ia Pesalemo 119:128, 163.) Ko he tahi ʼe loi, ʼe ina faʼifaʼitakiʼi ia Satana, ʼae ko te pule ʼo te malama ʼaeni. (Soa. 8:44; 12:31) ʼE fai e Satana he ʼu fasituʼu moʼo ʼulihi te huafa maʼoniʼoni  ʼo Sehova ʼAtua. Talu mai te agatuʼu ʼi Eteni, ʼe fakamafola e Satana ni loi ʼo ʼuhiga mo totatou ʼAtua. ʼE faiga ke tui te hahaʼi ko Sehova ʼe ko he Pule ʼe manatu pe kia ia mo kaka, pea ʼe mole ina loto ke natou fiafia. (Sen. 3:1, 4, 5) ʼUhi ko te ʼu loi ʼaia ʼa Satana, ʼe fehihiʼa te hahaʼi ki te ʼAtua. Ka mole “manako [te hahaʼi] ki te moʼoni” pea ʼe feala ai leva kia Satana ke ina fakaneke natou ke natou fai he ʼu aga heʼe faitotonu mo fakalialia.—Loma 1:25-31.

4. Neʼe fakaha feafeaʼi e Sehova ʼe ko ia te “ ʼAtua ʼo te moʼoni”? (Vakaʼi mo te pāki.)

⁴ Ko Sehova ʼe ko te “ ʼAtua ʼo te moʼoni” pea ʼe ina akoʼi te moʼoni kia natou ʼae ʼe ʼoʼofa kia te ia. (Pes. 31:5) ʼI tana fai te faʼahi ʼaia, ʼe mole kei natou tuku ke kakaʼi natou e Satana. ʼE toe akoʼi e Sehova ʼana kaugana ke natou aga fakahagatonu pea mo faitotonu. ʼE natou maʼu ai he ʼu manatu ʼe lelei ʼo ʼuhiga mo natou totonu pea mo te tokalelei ʼi tonatou loto. (Taag. 13:5, 6) Neʼe fai koa e Sehova te faʼahi ʼaia maʼa koe ʼi tau ako te Tohi-Tapu? Neʼe ke ako ko te ʼu ʼala ʼa Sehova ʼe fua lelei ki te hahaʼi fuli pea kia koe. (Pes. 77:13) Koia, ʼe ke fia fakalogo ai ki te ʼu lao faitotonu ʼa te ʼAtua. (Mat. 6:33) ʼE ke fia tala te moʼoni pea mo fakaha ko te ʼu meʼa ʼae neʼe lau e Satana ʼo ʼuhiga mo Sehova totatou ʼAtua ʼe ko ni loi. ʼE feafeaʼi hau fai te faʼahi ʼaia?

5. ʼE feafeaʼi hau lagolago ki te moʼoni mo te faitotonu?

⁵ ʼE feala ke ke filifili he maʼuli ʼe ha ai ʼe ke fakafisi ki te ʼu loi ʼa Satana, kae ʼe ke lagolago ki te moʼoni. ʼE feala ke ke fakaha ʼe ke loto ke liliu ia Sehova ko tou Pule, pea ʼe ke fia mulimuli ki ʼana lao faitotonu. Kotea ʼae ʼe tonu ke ke fai? Faikole kia Sehova, ʼo ke fakapapau age ʼe ke fia tauhi kia te ia ʼo talu ai, pea ke ke papitema. Kapau ʼe ʼofa he tahi ki te moʼoni mo te faitotonu, pea ʼe ko he tupuʼaga malohi ʼaia ke papitema.

6. Kotea te ʼu tupuʼaga ʼe ke maʼu ia Pesalemo 45:4 ke ke ʼofa ai kia Sesu Kilisito?

⁶ He koʼe ʼe ke ʼofa kia Sesu Kilisito? Tokagaʼi ni tupuʼaga ʼe ke maʼu ia Pesalemo 45:4. (Lau.) ʼE ʼofa ia Sesu ki te moʼoni, mo te agavaivai, pea mo te faitotonu. Kapau ʼe ke ʼofa ki te moʼoni mo te faitotonu, ʼe mahino ia ʼe ke toe ʼofa kia Sesu Kilisito. Manatuʼi te lototoʼa ʼa Sesu ʼi tana fakaha te moʼoni mo te faitotonu. (Soa. 18:37) Kae neʼe akoʼi feafeaʼi e Sesu te agavaivai?

7. He koʼe ʼe ke leleiʼia te agavaivai ʼo Sesu?

 ⁷ ʼE akoʼi e Sesu te agavaivai ʼaki tana faʼifaʼitaki. Ohage la, neʼe loto tuʼumaʼu pe ke fakakololiaʼi tana Tamai kae mole ko ia. (Mko. 10:17, 18; Soa. 5:19) Kotea ʼae ʼe ke logoʼi ʼi tau iloʼi te agavaivai ʼaia ʼo Sesu? ʼE mole uga ai koa koe ke ke ʼofa ki te ʼAlo ʼo te ʼAtua pea mo ke faʼifaʼitakiʼi ia ia? ʼE mahino ia. He koʼe ʼe agavaivai ia Sesu? Heʼe ʼofa pea mo ina faʼifaʼitakiʼi tana Tamai, ʼae ʼe agavaivai. (Pes. 18:35; Hep. 1:3) ʼE mole ke fia fakaovi ai koa la kia Sesu, ʼae neʼe ina fakaha lelei te ʼu kalitate ʼo Sehova?

8. He koʼe ʼe tou ʼoʼofa kia Sesu pea mo tou loto ke liliu ko totatou Hau?

⁸ ʼE tou ʼoʼofa kia Sesu pea mo tou loto ke liliu ko totatou Hau heʼe ko ia te pule ʼae ʼe lelei tokotahi. Neʼe akoʼi e Sehova totonu tona ʼAlo pea neʼe ina fakanofo ke pule. (Esa. 50:4, 5) Pea manatuʼi neʼe fakaha e Sesu tona ʼofa ʼi tana sakilifisioʼi tona maʼuli. (Soa. 13:1) ʼUhi ʼae ko Sesu ko tou Hau, ʼe tuha ai mo ia ke ke ʼofa kia te ia. Neʼe ina fakamahino, ko natou ʼae ʼe ʼoʼofa moʼoni kia te ia, ʼae ko ʼona kaumeʼa, ʼe natou fakaha te ʼofa ʼaia ʼaki tanatou fakalogo ki ʼana fakatotonu. (Soa. 14:15; 15:14, 15) Ke tou liliu ko he ʼu kaumeʼa ʼo te ʼAlo ʼo Sehova ʼe ko he fealagia taulekaleka!

9. Kotea ʼae ʼe tatau ai te papitema ʼo Sesu pea mo ʼae ʼo ʼana tisipulo?

⁹ Neʼe fakatotonu e Sesu ki ʼana tisipulo ke papitema. (Mat. 28:19, 20) Pea neʼe ina tuku he faʼifaʼitaki. ʼE ʼi ai te ʼu faʼahi ʼe kehekehe ai te papitema ʼo Sesu pea mo ʼae ʼo ʼana tisipulo. (Vakaʼi te fakamatala ʼae ʼe ʼa takai “ Te Kehekehe ʼo Te Papitema ʼo Sesu Mo Te Papitema ʼo ʼAna Tisipulo.”) Kae ʼe ʼi ai te ʼu faʼahi ʼe nā tatau ai. ʼI tona papitema, neʼe fakaha ai e Sesu ki tana Tamai ʼe ina fai anai tona finegalo. (Hep. 10:7) ʼO toe feia aipe, ʼe papitema te ʼu tisipulo ʼa Kilisito moʼo fakaha ia muʼa ʼo te hahaʼi kua natou foaki tonatou maʼuli kia Sehova ʼAtua. ʼE natou fakamuʼamuʼa anai ʼi tonatou maʼuli te fai ʼo tona finegalo, kae mole ko te ʼu meʼa ʼae ʼe natou loto ki ai. ʼE natou mulimuli ai ki te faʼifaʼitaki ʼo tanatou Pule.

10. He koʼe ʼe ke ʼofa ia Sesu, pea kotea ʼe uga ai koe ʼe tou ʼofa ʼaia ke ke fai?

¹⁰ ʼE ke tui ko Sesu ʼe ko te ʼAlo ʼulu tokotahi ʼo Sehova, pea ʼe ko te Hau ʼae neʼe fakanofo e te ʼAtua ke pule kia tatou. ʼE ke iloʼi ko Sesu ʼe agavaivai pea ʼe ina faʼifaʼitakiʼi lelei tana Tamai. Neʼe ke ako tana fafaga ia natou ʼae neʼe halofia, mo tana fakalotomalohiʼi ia natou ʼae neʼe lotovaivai, pea mo tana fakamalolo te kau mahahaki. (Mat. 14:14-21) ʼE ke sio pe ʼe feafeaʼi tana takitaki tana kokelekasio ia ʼaho nei. (Mat. 23:10) Pea kua ke mahino ʼe lahi age anai te ʼu gaue taulekaleka ka ina fai ʼi te ka haʼu, ʼi tona ʼuhiga Hau ʼo te Puleʼaga ʼo te ʼAtua. ʼE feafeaʼi hau fakaha tou ʼofa kia te ia? ʼAki tau mulimuli ki tana faʼifaʼitaki. (Soa. 14:21) Ko te ʼuluaki faʼahi ʼe feala ke ke fai, ko tau foaki tou maʼuli kia Sehova pea mo ke papitema.

11. Kotea te tahi tupuʼaga ʼe ina uga ai he tahi ke papitema, pea he koʼe ʼe maʼuhiga?

¹¹ Kotea te tupuʼaga maʼuhiga ʼae ʼe uga ai he tahi ke papitema? Neʼe fakaha e Sesu te fakatotonu ʼa te ʼAtua ʼae ʼe lahi age. Neʼe ina ui fenei: “ ʼE tonu ke ke ʼofa kia Sehova tou ʼAtua, ʼaki tou loto katoa, mo tou maʼuli katoa, mo tou ʼatamai katoa pea mo tou malohi katoa.” (Mko. 12:30) ʼE feia koa tou ʼofa ʼae ki te ʼAtua?

12. He koʼe ʼe ke ʼofa kia Sehova? (Vakaʼi mo te pāki.)

¹² ʼE lahi te ʼu tupuʼaga ke tou ʼoʼofa ai kia Sehova. Ohage la, kua ke mahino ʼe ko ia  “te matapuna ʼo te maʼuli” pea ʼe ina foaki “te ʼu meʼa ʼofa lelei fuli mo haohaoa.” (Pes. 36:9; Sakp. 1:17) Ko te ʼu lelei fuli ʼae ʼe ke fiafia ai ʼe haʼu mai totatou ʼAtua ʼofa mo lotofoaki.

13. He koʼe ko te totogi ʼe ko he meʼa ʼofa taulekaleka?

¹³ Ko te foaki ʼae e Sehova tona ʼAlo ko he totogi, ʼe ko he meʼa ʼofa taulekaleka ʼaia. Kotea tona tupuʼaga? Fakakaukauʼi age muʼa te felogoi lelei ʼa Sehova mo tona ʼAlo. Neʼe ui fenei e Sesu “[ʼE] ʼofa . . . te Tamai ia au” pea “ ʼe au ʼofa ʼi te Tamai.” (Soa. 10:17; 14:31) Pea neʼe toe malohi age tonā feʼofaʼofani ʼaia lolotoga te ʼu lauʼi miliale taʼu ʼae neʼe nā fakatahi ai. (Taag. 8:22, 23, 30) Koia, ʼe feala ke ke mahino ki te toe mamahi neʼe logoʼi e te ʼAtua ʼi tana tuku ʼae ke gaohi koviʼi tona ʼAlo pea ke matehi. ʼUhi ʼae ʼe ʼofa mamahi ia Sehova ki te hahaʼi fuli, ʼo kau ai mo koe, koia neʼe ina foaki ai tona ʼAlo ʼofaina ko he sakilifisio, ke feala ai hau maʼu te maʼuli heʼe gata ʼo feia mo ʼihi atu. (Soa. 3:16; Kal. 2:20) ʼE ko te tupuʼaga lahi tokotahi ʼaia ke ke ʼofa ai ki te ʼAtua.

14. Kotea te fakatuʼutuʼu lelei tukupau ʼae ʼe feala ke ke filifili ʼi tou maʼuli?

¹⁴ ʼI tau ako ke ke iloʼi lelei age ia Sehova ʼe toe tuputupu ai tou ʼofa kia te ia. ʼE mahino ia ʼe ke fia fakaovi kia te ia ʼi te temi nei pea ʼo talu ai. Pea ʼe feala pe ke ke fai. ʼAki te ʼofa, ʼe ina fakalotomalohiʼi koe ke ke  fakafiafiaʼi tona loto. (Taag. 23:15, 16) Pea ʼe feala ke ke fai ʼaki ʼau palalau mo ʼau gaue. ʼE ha anai ʼi tou faʼahiga maʼuli ʼe ke ʼofa moʼoni ia Sehova. (1 Soa. 5:3) ʼE ko te fakatuʼutuʼu lelei tukupau ʼaia ʼe feala ke ke filifili ʼi tou maʼuli.

15. ʼE ke lava fakaha feafeaʼi ʼe ke ʼofa ia Sehova?

¹⁵ ʼE ke lava fakaha feafeaʼi ʼe ke ʼofa ia Sehova? ʼE tonu muʼa ke ke faikole. Pea ʼe ko he faikole ʼe makehe heʼe ke fakapapau ai kia Sehova ʼe ke foaki tou maʼuli kia te ia. (Pes. 40:8) Pea ʼe ke fakaha leva ia muʼa ʼo te hahaʼi ʼo ke papitema. Ohage ko tatatou vakaʼi ʼi muʼa atu ʼi te alatike ʼaeni, ko tau papitema ʼe ko he aluʼaga fakafiafia pea mo maʼuhiga ʼi tou maʼuli. ʼE ko te kamata ʼaia ʼo he maʼuli foʼou, heʼe mole kei ke maʼuli maʼa koe kae ʼe ke maʼuli maʼa Sehova. (Loma 14:8; 1 Pet. 4:1, 2) ʼE lagi ke manatu ʼe ko he faʼahi ʼe tonu ke ke fakakaukau lelei ki ai, pea ʼe ke moʼoni. Kae kapau ʼe ke toʼo te tonu ʼae ke ke papitema, pea ʼe ke maʼu anai te maʼuli ʼae ʼe lelei ʼaupito. Kotea te ʼu tapuakina ka ke maʼu anai?

16. ʼO mulimuli kia Pesalemo 41:12, ʼe tapuakinaʼi feafeaʼi e Sehova ia natou ʼae ʼe foaki tonatou maʼuli moʼo tauhi kia te ia?

¹⁶ ʼE mole he tahi ʼe lotofoaki ohage ko Sehova. Tatau aipe pe kotea ʼae ʼe ke foaki age kia te ia, kae ʼe lahi tuʼumaʼu age pe te ʼu meʼa ʼae ʼe ina liufaki atu. (Mko. 10:29, 30) ʼE ina foaki atu anai te maʼuli ʼae ʼe fiafia mo lelei ʼaupito, pea ʼe lahi ai ʼou tapuakina logo la ʼe kei ke maʼuli ʼi te malama agakovi ʼaeni. Pea ʼe ko te kamataʼaga pe ʼaia. ʼI tau papitema, ʼe ke kamata he maʼuli ʼe ke tauhi ai ki tau Tamai ʼofa pea ʼe feala ke hoko atu ʼo talu ai. ʼE tuputupu pe anai tokolua feʼofaʼofani pea ʼe ke maʼuli anai ʼo heʼe gata, ohage pe ko tau Tamai.—Lau ia Pesalemo 41:12.

17. Kotea te faʼahi ʼe feala ke ke foaki kia Sehova heʼeki ina maʼu?

¹⁷ Ka ke foaki tou maʼuli kia Sehova pea mo ke papitema, ʼe ke foaki ai he meʼa ʼofa taulekaleka ki tau Tamai. ʼE ina tapuakinaʼi koe ʼaki te ʼu meʼa lelei fuli pea mo te ʼu aluʼaga fakafiafia fuli. Neʼe ke fakaha tou lotofakafetaʼi ki te Tupuʼaga ʼo te lagi mo te kele, ʼo ke foaki age te faʼahi heʼeki ina maʼu,  tou lotolelei ʼo tauhi kia te ia mo tou loto katoa. (Sopo 1:8; 41:11; Taag. 27:11) ʼE mahino ia, ʼe ko te faʼahiga maʼuli lelei ʼaupito ʼaia ʼe feala ke ke maʼu. Ko tou ʼofa ia Sehova, ʼe ko te tupuʼaga lelei ʼaupito ʼaia ʼe uga ai koe ke ke papitema.

18. Kotea te ʼu fehuʼi ʼe feala ke ke fai?

¹⁸ Koia, ʼe ke papitema anai koa? Ko koe pe ʼae ʼe feala ke tali ki ai. Kae ʼe tokoni atu anai moka ʼe ke fakakaukauʼi pe koʼe ʼe ke fakatuatuai. (Gaue 8:36) Manatuʼi te ʼu tupuʼaga ʼe tolu ʼae neʼe tou vakaʼi. ʼUluaki ʼe ke ʼofa ki te moʼoni mo te faitotonu. Ke ke fai te fehuʼi ʼaeni: “ ʼE au fia maʼuli koa ʼi te temi ʼae ka tala anai e te hahaʼi fuli te moʼoni, pea mo natou fai te meʼa ʼae ʼe totonu?” Lua, ʼe ke ʼofa kia Sesu Kilisito. Ke ke fai te fehuʼi ʼaeni: “ ʼE au loto koa ke liliu te ʼAlo ʼo te ʼAtua ko toku Hau pea ʼe au fia mulimuli koa ki tana faʼifaʼitaki?” Tolu, ʼe ke ʼofa kia Sehova, pea ʼe ko te faʼahi ʼaia ʼe maʼuhiga age. Ke ke fai te fehuʼi ʼaeni: “ ʼE au fia fakafiafiaʼi koa te loto ʼo Sehova ʼo au tauhi kia te ia?” Kapau ʼe ke ʼio ki te ʼu fehuʼi ʼaia, he koʼe ʼe ke fakatuatuai ke ke papitema?—Gaue 16:33.

19. He koʼe ʼe mole tonu ke ke fakatuatuai ke ke papitema? Tuku mai he faʼifaʼitaki. (Soane 4:34)

¹⁹ Kapau kei ke fakatuatuai ke ke papitema, tokagaʼi te fakata ʼae neʼe fakaʼaogaʼi e Sesu. (Lau ia Soane 4:34.) Neʼe fakata e Sesu te fai ʼo te finegalo ʼo tana Tamai ki he meʼa kai. Kotea tona tupuʼaga? ʼE lelei te meʼa kai kia tatou. Neʼe iloʼi e Sesu ko meʼa fuli ʼe kole mai e Sehova ke tou fai ʼe ʼi ai tona fua lelei kia tatou. ʼE mole loto e Sehova ke tou fai he meʼa ʼe tou mamahi ai. ʼE kau koa te papitema ki te ʼu meʼa ʼae ʼe loto e Sehova ke ke fai? ʼEi. (Gaue 2:38) Ke ke tui papau, kapau ʼe ke fakalogo ki te fakatotonu ʼae ke ke papitema, ʼe fua lelei anai kia koe. Kapau la ʼe foaki atu he meʼa kai kano lelei, ʼe mole tume anai tau kai. Pea ʼe tatau ʼosi, he koʼe koa ʼe ke fakatuatuai tau papitema?

20. Kotea ka tou vakaʼi anai ʼi te alatike ka hoa mai?

²⁰ He koʼe ʼe fakatuatuai ʼihi? ʼE lagi natou tali anai: “Heʼeki feala ia ke au papitema.” ʼE moʼoni ko tau filifili ʼae ke ke foaki tou maʼuli kia Sehova pea mo papitema, ʼe ko te tonu maʼuhiga ʼaupito ʼaia ʼi tou maʼuli. Koia, ʼe tonu ai ke ke toʼo hou temi moʼo fakakaukau lelei, pea mo faiga malohi ke ke tokalelei ki te papitema. Kae kapau ʼe ke loto moʼoni ke ke papitema, kotea ʼae ʼe feala ke ke fai ʼi te temi nei ke ke teuteu ki ai? ʼE tou tali anai ki ai ʼi te alatike ka hoa mai.