He koʼe neʼe ui e “te kaiga totonu ʼo Elimeleke” ʼe “puli” anai tona tofiʼa moka ʼohoana mo Lute? (Lute 4:1, 6)

ʼI te ʼu temi Fakatohi-tapu, ka mate he tagata kae neʼe mole hana fanau, neʼe lahi te ʼu aluʼaga neʼe tonu ke vakaʼi. Ohage la, ko ai ʼae ka ina maʼu tona kele? ʼE puli anai koa te higoa ʼo tona famili? Neʼe talanoa te Lao ʼa Moisese ki te ʼu aluʼaga ʼaia.

Ko ai ʼae neʼe ina maʼu te kele ʼo he tagata neʼe mate? Peʼe feafeaʼi ki he tagata neʼe ina fakatau tona kele he neʼe masiva? Neʼe feala ke toe totogi tona kele e hona tehina peʼe ko hona kaiga totonu. Neʼe feala ai ke taupau e te famili ʼaia tona kele.—Lev. 25:23-28; Num. 27:8-11.

Kotea ʼae neʼe tonu ke fai ke ʼaua naʼa puli te higoa ʼo te tagata ʼae kua mate? Neʼe tonu ke ʼohoana te tehina ʼo ia ʼae kua mate mo tona holotua. Ko te faʼahi la ʼaia neʼe hoko kia Lute. Pea ka maʼu hanā tama, neʼe toe fakamaʼuli e te tama ʼaia te higoa ʼo ia ʼae kua mate pea mo ina maʼu tona tofiʼa. ʼE toe fua lelei anai ki te fafine vitua te fakatuʼutuʼu ʼofa ʼaia.—Teu. 25:5-7; Mat. 22:23-28.

Tou toʼo te faʼifaʼitaki ʼo Naomi. Neʼe ʼohoana mo te tagata ko Elimeleke. ʼI te mate ʼa Elimeleke ʼo feia mo ʼana tama ʼe lua, neʼe mole kei ʼi ai he tagata ʼi te famili ke tokaga kia Naomi. (Lute 1:1-5) ʼI te toe liliu ʼa Naomi ki Suta, neʼe ina ui age kia Lute ke ina kole kia Poase ke ina toe totogi tonā kele, he neʼe kaiga mo Elimeleke. (Lute 2:1, 19, 20; 3:1-4) Kae neʼe iloʼi e Poase neʼe ʼi ai te tahi tagata neʼe kaiga totonu age ia mo Elimeleke. Pea neʼe ko te tagata ʼaia ʼae neʼe tonu muʼa ke ina filifili pe ʼe ina totogi te kele ʼo Elimeleke peʼe kailoa.—Lute 3:9, 12, 13.

ʼI te kamata, neʼe fia tokoni ia te tagata ʼaia kia Naomi pea mo Lute. (Lute 4:1-4) Logo la neʼe ina iloʼi ʼe puli ai anai tana falā, kae neʼe ina toe iloʼi neʼe mole kei feala ke maʼu e Naomi hana tamasiʼi tagata, ʼae ka ina maʼu anai te kele ʼo Elimeleke. ʼE toe fakalahi anai te tofiʼa ʼo te kaiga ʼaia ʼo Elimeleke. Neʼe ko he aluʼaga ke fakalahilahi aipe ʼona koloa.

Kae neʼe fetogi leva tana manatu ʼi tana iloʼi ʼae neʼe tonu ke ina ʼohoanaʼi ia Lute. Neʼe ina ui: “ ʼE mole feala ke au totogi te moʼi kele, naʼa lahi ai te puli ʼo toku tofiʼa.” (Lute 4:5, 6) He koʼe neʼe fetogi tana manatu?

Kapau ko te kaiga ʼaia ʼo Elimeleke peʼe ko he tahi kehe age neʼe ʼohoana mo Lute pea nā maʼu hanā tama, pea neʼe ko te tama ʼaia ka ina maʼu te kele ʼo Elimeleke. ʼE “puli” feafeaʼi anai te “tofiʼa” ʼo te kaiga ʼaia ʼo Elimeleke? ʼE mole talanoa te Tohi-Tapu ki ai kae ʼe lagi tupu ko te ʼu faʼahi ʼaeni.

• ʼUluaki, ʼe feala anai ke puli tana falā ʼi tana totogi te kele ʼo Elimeleke. Heʼe ka neʼe maʼu e Lute hana tama pea ʼe maʼu anai e tana tama ʼaia te kele ʼo Elimeleke.

• Lua, ʼe maʼua anai ke ina taupau ia Naomi pea mo Lute.

• Tolu, ka maʼu hana ʼu fanau mo Lute, pea ʼe maʼua anai ke vaevae te tofiʼa ʼi tanā ʼu fanau ʼaia pea mo ʼae ʼa te kaiga ʼo Elimeleke.

• Fa, kapau neʼe mole he fanau ʼa te kaiga ʼaia ʼo Elimeleke kae ʼi ai hana tama mo Lute, ʼe maʼu anai e te tama ʼaia te kele ʼo Elimeleke pea mo te kele ʼo te kaiga ʼaia ʼo Elimeleke. Pea ka mate te tagata ʼaia, ʼe maʼu anai tona kele e te tama pea ʼe toʼo e te tama ʼaia te higoa fakafamili ʼo Elimeleke kae mole ʼo ia. Neʼe mole fia pulihi e te tagata ʼaia tona tofiʼa moʼo tokoni kia Naomi. Neʼe ina tuku tona maʼua ʼaia kia Poase, te lua tagata ʼae neʼe feala ke ina toe totogi te kele ʼo Elimeleke. Neʼe fai ia Poase te faʼahi ʼaia “ke maʼu tuʼumaʼu pe te moʼi kele e te hologa ʼo te tagata ʼae kua mate, ke ʼaua naʼa puli ai” tona higoa.—Lute 4:10.

ʼE ha mai ai neʼe fia taupau e te kaiga ʼaia ʼo Elimeleke tona higoa pea mo tona tofiʼa. Neʼe manatu pe kia ia. Logo la te faiga ʼa te tagata ʼaia ke ina taupau tona higoa fakafamili kae ʼi te temi nei mole tou iloʼi pe la pe ko ai. Neʼe mole ina toe maʼu mo te pilivilesio ʼae neʼe maʼu e Poase, ʼae neʼe liliu ko te kui ʼa te Mesia ia Sesu Kilisito. ʼI aluʼaga fakaʼofaʼofa leva ki te kaiga ʼaia ʼo Elimeleke ʼi tana manatu pe kia ia kae neʼe mole fia tokoni ki he tahi neʼe tau mo he ʼu faigataʼaʼia!—Mat. 1:5; Luka 3:23, 32.