1. Kotea ia te ʼahiʼahi ʼae neʼe tau mo Sosefo? Pea kotea ʼae neʼe ina fai?

 NEʼE tau te foha ʼo Sakopo ko Sosefo mo he ʼahiʼahi. Neʼe ui fenei age e he fafine: “Haʼu ke ta momoe.” Pea ko te fafine ʼaia neʼe ko te ʼohoana ʼo tona pule ko Potifale. Neʼe fakafisi ia Sosefo ki ai. ʼE feala pe ke feuiʼaki fenei e he tahi: ‘He koʼe neʼe tekeʼi e Sosefo ia te fakahala ʼaia?’ Neʼe mole nofo ʼi fale ia Potifale. Pea tahi, ko Sosefo neʼe ko te tagata kaugana ʼo te loto fale ʼaia. Neʼe feala pe ke fai e te fafine ʼaia ia meʼa fuli ke maʼuli mamahi ia Sosefo mo kapau neʼe fakafisi age. Kae neʼe haga fakafisi pe e Sosefo te ʼu faiga ʼaia ʼa te fafine ke nā momoe. Kotea tona tupuʼaga? He neʼe ina ui fenei: “ ʼE lava feafeaʼi haku fai te toe agakovi lahi ʼaia pea mo agahala moʼoni ki te ʼAtua?”​—Sen. 39:7-12.

2. Neʼe iloʼi feafeaʼi e Sosefo ko te tono ʼe ko he agahala mamafa ki te ʼAtua?

² Neʼe iloʼi feafeaʼi e Sosefo ia te manatu ʼa te ʼAtua ʼo ʼuhiga mo te tono, ʼae ko he “toe agakovi lahi”? Neʼe hoki maʼu e te kau Iselaele te Lao ʼa Moisese ʼae ʼe ui ai “ ʼE mole tonu ke ke tono” hili ki ai teitei taʼu ʼe luageau. (Eke. 20:14) Kae, neʼe iloʼi lelei e Sosefo ia te manatu ʼa Sehova ʼo ʼuhiga mo te fai ʼo he aga heʼe ʼaoga. Ohage la, neʼe kua iloʼi ia e Sosefo neʼe fakatuʼutuʼu e Sehova ia te ʼohoana ʼa he tagata mo he fafine. Pea lagi neʼe logo ki te faʼahiga puipui tuʼa lua e Sehova ia tana kui fafine ko Sala ʼi te temi ʼae neʼe meʼa ke fakaʼalikiʼi ai ia ia. Pea neʼe toe puipui e te ʼAtua ia Lepeka, te ʼohoana ʼo Isaake. (Sen. 2:24; 12:14-20; 20:2-7; 26:6-11) Neʼe fakakaukauʼi e Sosefo ia te ʼu aluʼaga ʼaia, pea neʼe mahino kia ia te meʼa ʼae lelei mo ʼae ʼe kovi ki te ʼAtua. Neʼe ʼofa ki tona ʼAtua koia neʼe ina leleiʼia ai te ʼu lekula faitotonu ʼa Sehova pea neʼe ina fakatotonu ai ke fakaʼapaʼapa ki ai.

3. Kotea ka tou vakaʼi ʼi te alatike ʼaeni?

 ³ ʼE mahino ia, ʼe ke leleiʼia ia te faitotonu. Kae ʼe tou agahala fuli pea kapau ʼe mole tou nofo tokaga ʼe feala pe ke tou maʼu ia te faʼahiga manatu ʼa te malamanei ʼo ʼuhiga mo te faitotonu. (Esa. 5:20; Loma 12:2) Koia, ʼe tou vakaʼi anai pe kotea te fakaʼuhiga ʼo te faitotonu pea mo feafeaʼi hatatou leleiʼia te kalitate ʼaia. Pea ʼe tou talanoa anai kia aluʼaga ʼe tolu ʼe tokoni mai ke malohi tuʼumaʼu tatatou leleiʼia te ʼu lekula faitotonu ʼa Sehova.

4. Kotea te manatu hala ʼe maʼu e te hahaʼi ʼo ʼuhiga mo te faitotonu?

⁴ Ka talanoa te hahaʼi ki he tahi ʼe faitotonu, pea ʼe natou manatu ko he tahi ʼe fiameʼalahi, peʼe ina valokiʼi ʼihi peʼe manatu ʼe lelei age ia natou. Kae ʼe fehiʼa ia te ʼAtua ki te taʼi ʼu aga ʼaia. ʼI te nofo ʼa Sesu ʼi te kele, neʼe ina valokiʼi te kau takitaki lotu ʼo tona temi ʼae neʼe natou fai pe ʼanatou lao ʼo ʼuhiga mo te faitotonu. (Ekl. 7:16; Luka 16:15) Koia, ka fai e he tahi te meʼa ʼae ʼe ui e Sehova ʼe faitotonu, ʼe mole manatu ia ʼe lelei age ia ʼi ʼihi.

5. Kotea te fakaʼuhiga ʼo te faitotonu ʼi te Tohi-Tapu? Tuku mai he ʼu faʼifaʼitaki.

⁵ Ko te faitotonu ʼe ko he kalitate maʼuhiga. ʼI te Tohi-Tapu, ʼe fakaʼuhiga te kalitate ʼaia ke tou fai te meʼa ʼae ʼe totonu kia mata ʼo Sehova ʼAtua. ʼI te ʼu kupu Fakahepeleo mo Fakakeleka, ʼe maʼu ai te manatu ʼae ke tou maʼuliʼi te ʼu lekula maʼoluga ʼa Sehova. Ohage la, neʼe fakatotonu e Sehova ke fakaʼaogaʼi e te kau faikoloa ‘he meʼa fua ʼe totonu.’ (Tet. 25:15) Koia, ka fia faitotonu he tehina ia muʼa ʼo te ʼAtua, pea ʼe tonu anai ke aga fakahagatonu ʼi ʼana gaue fakakoloa fuli. Pea tahi, ko he tahi ʼe ina leleiʼia te faitotonu, ʼe fehiʼa ia moka gaohi koviʼi he tahi kae neʼe mole ina fai hana hala. Pea ko te tagata ʼae ʼe faitotonu moʼoni, ʼe ina tokagaʼi te manatu ʼa Sehova ʼi te ʼu tonu ʼae ʼe ina toʼo koteʼuhi ʼe ina fia ‘fakafiafiaʼi te loto ʼo Sehova.’​—Kol. 1:10.

6. Ka tou lau ia Esaia 55:8, 9, he koʼe ʼe tou falala ki te ʼu lekula ʼa Sehova ʼo ʼuhiga mo te meʼa ʼae ʼe lelei mo ʼae ʼe kovi?

⁶ ʼE ui ʼi te Tohi-Tapu ko Sehova ʼe ko “te matapuna ʼo te faitotonu.” (Sel. 50:7) Ko Sehova ʼe ko te Tupuʼaga ʼo meʼa maʼuli fuli pea ʼe tuha pe mo ia ke ina fakaha mai ia te meʼa ʼae ʼe lelei mo ʼae ʼe kovi. ʼE tou agahala pea mo heʼe haohaoa, koia ʼe mole feala ke tou iloʼi te meʼa ʼae ʼe lelei mo ʼae ʼe kovi. Kae ʼe haohaoa ia Sehova koia ʼe ina iloʼi lelei age te meʼa ʼae ʼe lelei mo ʼae ʼe kovi. (Taag. 14:12; lau ia Esaia 55:8, 9.) Neʼe fakatupu tatou ki te pāki ʼo te ʼAtua, koia ʼe feala ke tou maʼuliʼi ʼana lekula faitotonu. (Sen. 1:27) Pea ʼe tou fia fai te faʼahi ʼaia. Ka tou ʼofa ʼi tatatou Tamai pea ʼe tou faiga anai ke tou faʼifaʼitaki ia ia.​—Efe. 5:1.

7. He koʼe ʼe ʼaoga kia tatou he ʼu lekula? Tuku mai he faʼifaʼitaki.

⁷ ʼE tou maʼu anai he ʼu fua lelei moka tou maʼuliʼi te ʼu lekula ʼa Sehova ʼo ʼuhiga mo te meʼa ʼae ʼe lelei mo ʼae ʼe kovi. Kotea tona tupuʼaga? Fakafuafua age muʼa koe pe kotea te aluʼaga ka hoko mo kapau ʼe tahi fakatuʼu pe e te ʼu fale paʼaga tana ia ʼu lao ke ina iloʼi te maʼuhiga ʼo te falā. ʼE mahino ia, ʼe ʼi ai anai hona ʼu nunuʼa. Pea kapau ʼe mole fakaʼapaʼapa ia te ʼu toketa mo te kau afilimie ki he ʼu lao ʼo ʼuhiga mo te faʼahiga tokaga ki te hahaʼi, pea ʼe feala ke mamate ai ʼihi kau mahaki. Koia, ka fakatuʼu ia he ʼu lekula pea ʼe ko hotatou puipuiʼaga ʼaia. Pea ʼe toe feia pe mo te ʼu lekula ʼa te ʼAtua ʼo ʼuhiga mo te meʼa ʼae ʼe lelei mo ʼae ʼe kovi, ʼe puipui ai pe tatou.

8. Kotea te ʼu tapuakina e maʼu e natou ʼae ʼe natou leleiʼia te fai ʼo te meʼa ʼae ʼe totonu?

⁸ ʼE tapuakinaʼi e Sehova ia natou ʼae ʼe faiga ke natou maʼuliʼi ʼana lekula. ʼE ina  fakapapau fenei: “ ʼE maʼu anai e te kau faitotonu te kele. Pea ʼe natou maʼuʼuli ai anai ʼo heʼe gata.” (Pes. 37:29) Fakakaukauʼi age muʼa koe moka ʼe fakalogo anai te hahaʼi fuli ki te ʼu lekula ʼa Sehova. ʼE mahino ia, ʼe logo tahi, mo maʼuli tokalelei pea mo fiafia ia te malamanei. Pea ʼe loto e Sehova ke tou maʼu te taʼi maʼuli ʼaia. Koia, ʼe lahi te ʼu tupuʼaga ke tou leleiʼia te faitotonu. Kotea ʼe feala ke tou fai ke malohi tuʼumaʼu tatatou leleiʼia te kalitate ʼaia? Tou vakaʼi aluʼaga ʼe tolu.

9. Kotea ʼae ka ina uga koe ke ke leleiʼia te faitotonu?

⁹ 1 Aluʼaga: Ke ke ʼofa kia ia ʼae ʼe ina fakatuʼu te ʼu lekula. ʼE tonu ke lahi age totatou ʼofa kia ia ʼae ʼe ina fakatuʼu te ʼu lekula ʼo ʼuhiga mo te meʼa ʼae ʼe lelei mo ʼae ʼe kovi ke tou leleiʼia ai te faitotonu. Ka lahi age totatou ʼofa kia Sehova, pea ʼe toe lahi age anai tatatou fia maʼuliʼi ʼana lekula faitotonu. Fakakaukauʼi age muʼa kapau la neʼe ʼoʼofa ia Atama mo Eva ia Sehova, neʼe mole talagataʼa naua ki tana lao faitotonu.​—Sen. 3:1-6, 16-19.

10. Kotea ʼae neʼe fai e Apalahamo ke mahino lelei ki te manatu ʼa Sehova?

¹⁰ ʼE mahino ia, ʼe mole tou fia hage ko Atama mo Eva. ʼE feala hatatou tekeʼi te aluʼaga ʼaia mo kapau ʼe tou haga ako ke tou iloʼi ia Sehova, mo leleiʼia ʼona kalitate pea mo faiga ke tou mahino ki tana faʼahiga manatu. Ka tou haga fai te faʼahi ʼaia pea ʼe tuputupu anai totatou ʼofa kia Sehova. Tou vakaʼi te faʼifaʼitaki ʼo Apalahamo. Neʼe ʼofa mamahi ia Sehova. ʼI ʼihi temi neʼe faigataʼa kia ia tana mahino ki te ʼu tonu ʼa Sehova, kae neʼe mole agatuʼu ia. Neʼe faiga ke ina iloʼi lelei ia Sehova. Ohage la, ʼi te iloʼi ʼae e Apalahamo ʼe meʼa ke fakaʼauha e Sehova ia Sotoma mo Komola, neʼe tuʼania ia naʼa pulihi fakatahi e “te Tuʼi Fakamau ʼo te kele katoa” ia te kau faitotonu mo te kau agakovi. Neʼe manatu ia Apalahamo ʼe mole feala ke hoko te faʼahi ʼaia. Koia, ʼaki he agavaivai neʼe lahi ai te ʼu fehuʼi neʼe ina fai kia Sehova. Neʼe faʼa kataki ia Sehova ʼo ʼuhiga mo ia pea neʼe tali ki ʼana fehuʼi. Neʼe mahino leva ia Apalahamo ʼe sivisivi e Sehova te loto ʼo te tagata takitahi pea ʼe mole ina fakatuʼā fakatahi ia natou ʼae neʼe mole natou fai he meʼa ʼe kovi mo natou ʼae ʼe agakovi.​—Sen. 18:20-32.

11. Neʼe fakaha feafeaʼi e Apalahamo tona ʼofa ia Sehova pea mo tana falala kia te Ia?

¹¹ Neʼe malave ʼaupito kia Apalahamo tanā felogoi ʼae mo Sehova ʼo ʼuhiga mo te ʼu kolo ko Sotoma mo Komola. ʼE mahino ia, neʼe toe lahi age tona ʼofa mo tana fakaʼapaʼapa ki tana Tamai. ʼE ha te faʼahi ʼaia ʼi te aluʼaga ʼae neʼe hoko ʼi ni taʼu ki ʼamuli, ʼae neʼe ʼahiʼahiʼi ai te falala ʼa Apalahamo kia Sehova. Neʼe kole age e Sehova ke ina momoli tona foha ʼofaina ko Isaake ohage ko he sakilifisio. Kae neʼe kua iloʼi lelei ia e Apalahamo ia tona ʼAtua koia neʼe mole kei ʼaoga ai ke faifehuʼi kia te ia. Neʼe ina fai pe te meʼa ʼae neʼe kole age e Sehova ki ai. Fakakaukauʼi age muʼa koe siʼi mamahi ʼo siʼona loto ʼi te temi ʼae ka ina fakahoko te faʼahi ʼaia. ʼE mahino ia, neʼe fakakaukauʼi tuʼu maʼu e Apalahamo te ʼu faʼahi ʼae neʼe ina ako ʼo ʼuhiga mo Sehova. Neʼe ina iloʼi ʼe mole fai anai e Sehova he meʼa ʼe heʼe faitotonu peʼe kovi. Neʼe ui e te apositolo ko Paulo, neʼe fakakaukauʼi e Apalahamo ʼe feala anai kia Sehova ke ina fakatuʼuake tona foha ʼofaina ko Isaake. (Hep. 11:17-19) Pea tahi, neʼe fakapapau e Sehova ʼe liliu anai ia Isaake ko he tamai ʼo he puleʼaga kae ʼi te temi ʼaia neʼe mole he fanau ʼa Isaake. Neʼe ʼofa ia Apalahamo kia Sehova koia neʼe falala  ʼe fai tuʼumaʼu anai e tana Tamai te meʼa ʼae ʼe totonu. Logo la neʼe faigataʼa, kae neʼe fakalogo ʼuhi pe ko tana tui.​—Gen. 22:1-12.

12. Ka tou lau ia Pesalemo 73:28, ʼe tou lava faʼifaʼitakiʼi feafeaʼi ia Apalahamo?

¹² ʼE tou lava faʼifaʼitakiʼi feafeaʼi ia Apalahamo? ʼE tonu ke tou haga ako ke tou iloʼi ia Sehova. Ka tou fai feia, pea ʼe tou fakaovi kia te ia pea mo toe lahi age anai totatou ʼofa kia te ia. (Lau ia Pesalemo 73:28.) Pea ʼe uga anai e totatou leʼo ʼo loto ke tou maʼu ia tana faʼahiga manatu. (Hep. 5:14) Ka fakaneke tatou e he tahi ke tou fai he meʼa ʼe kovi, ʼe tou fakafisi anai. ʼE mole tou fia fai anai he meʼa ʼe mamahi ai te loto ʼo tatatou Tamai pea mo fakatupu kovi ai ki ʼatatou felogoi mo ia. Kae kotea te tahi aluʼaga ʼe feala ke tou fakaha ai ʼe tou leleiʼia te faitotonu?

13. Ka tou lau ia Taʼaga Lea 15:9, ʼe tou kumi feafeaʼi te faitotonu?

¹³ 2 Aluʼaga: Faiga ke ke fakatuputupu tau leleiʼia te faitotonu ʼi te ʼaho fuli. Kapau ʼe tou loto ke malohi hotatou ivi pea ʼe tonu ke tou faiga ke tou akoako ʼi te ʼaho fuli. Pea ʼe toe feia pe, ʼe tonu ke tou faiga malohi ke tou fakatuputupu tatatou leleiʼia te ʼu lekula faitotonu ʼa Sehova. ʼE tonu ia ke tou fai te faʼahi ʼaia ʼi te ʼaho fuli. ʼE fakapotopoto ia Sehova pea ʼe mole ina loto ia ke tou fai he meʼa ʼe mole tou lavaʼi. (Pes. 103:14) ʼE ina ui mai “ ʼe ʼofa ia kia ia ʼae ʼe ina kumi te faitotonu.” (Lau ia Taʼaga Lea 15:9.) Kapau ʼe tou faiga ke tou fai hatatou fakatuʼutuʼu ʼi te tauhi kia Sehova, pea ʼe tou haga faiga malohi anai ke tou fakahoko. Pea ʼe toe feia pe moka tou faiga ke tou kumi te faitotonu. ʼE faʼa kataki ia Sehova ʼo ʼuhiga mo tatou pea ʼe tokoni mai anai ke tou tuputupu ʼaki te alu ʼo te temi.​—Pes. 84:5, 7.

14. Kotea ia “te kofu ukamea ʼo te faitotonu”? Pea he koʼe ʼe ʼaoga kia tatou?

¹⁴ ʼE fakamanatuʼi mai e Sehova ʼaki he manavaʼofa ʼe mole faigataʼa fau te fai ʼo te meʼa ʼae ʼe ina ui ʼe totonu. (1 Soa. 5:3) Ka tou fai te faʼahi ʼaia, ʼe ina puipui ai tatou pea ko he aluʼaga ʼe ʼaoga kia tatou ʼi te ʼaho fuli. Ke ke manatuʼi ia te teu tau katoa ʼae neʼe talanoa ki ai te apositolo ko Paulo. (Efe. 6:14-18) Ko te koga fea ʼo te teu tau  ʼae neʼe ina puipui te loto ʼo te tagata solia? Neʼe ko “te kofu ukamea ʼo te faitotonu,” ʼae ʼe ina fakata ia te ʼu lekula faitotonu ʼa Sehova. ʼE puipui e te kofu ukamea ia te mafu ʼo he tagata solia pea ʼe toe feia pe ki te ʼu lekula faitotonu ʼa Sehova. ʼE ina puipui ia totatou loto. Koia ʼe maʼuhiga ai ke kau ki tau teu tau ia te kofu ukamea ʼo te faitotonu.​—Taag. 4:23.

15. ʼE ke lava kofuʼi feafeaʼi te kofu ukamea ʼo te faitotonu?

¹⁵ ʼE ke lava kofuʼi feafeaʼi te kofu ukamea ʼo te faitotonu? ʼAki hau tokagaʼi te ʼu lekula ʼa te ʼAtua ʼi te ʼu tonu ʼae ʼe ke toʼo ʼi te ʼaho fuli. Ka ke fakatuʼutuʼu ke ke palalau ki he meʼa, peʼe fakalogo he musika, peʼe sioʼi he ʼata peʼe lau he ʼu tohi, ʼe lelei ke ke fai muʼa te ʼu fehuʼi ʼaeni: ‘Kotea ʼae ʼe au tuku ke hu ki toku loto? ʼE tali anai koa e Sehova te faʼahi ʼaia? ʼE maʼu ai koa ni aga heʼe ʼaoga, peʼe ko te agamalohi, te manumanū peʼe ko te manatu pe kia kita totonu, ʼae ko he ʼu aga ʼe ui e Sehova ʼe heʼe faitotonu?’ (Flp. 4:8) Kapau ʼe ke toʼo he ʼu tonu ʼe alu tahi mo te finegalo ʼo Sehova, pea ʼe ke puipui anai tou loto.

16-17. Ka tou lau ia Esaia 48:18, ʼe tokoni feafeaʼi mai ke tou maʼuliʼi te ʼu lekula ʼa Sehova ʼo talu ai?

¹⁶ Neʼe kua ke feuiʼaki koa pe ʼe feala hau maʼuliʼi te ʼu lekula faitotonu ʼa Sehova ʼi te temi fuli? Tou vakaʼi he faʼifaʼitaki neʼe fakaʼaogaʼi e Sehova, ʼe tou maʼu ia Esaia 48:18. (Lau.) ʼE fakapapau mai e Sehova ʼe feala ke hage tatatou faitotonu “ko te ʼu peau ʼo te tai.” Fakakaukauʼi age muʼa ʼe ke tuʼu ʼi he matatai lahi pea ʼe ke sio ki te fasi tuʼumaʼu mai ʼo te ʼu peau ki te mataʼone. ʼE ke tuʼania anai koa naʼa gata te fasi mai ʼaia ʼo te ʼu peau? Kailoa ia. ʼE ke iloʼi talu mai ni lauʼi taʼu ʼe afe mo te fasi mai pe ʼo te ʼu peau ki te mataʼone ʼaia pea ʼe mole gata anai ia.

¹⁷ ʼE feala ke hage tau faitotonu ko te ʼu peau ʼo te tai. ʼO feafeaʼi? Ka ke toʼo he tonu, fakakaukauʼi muʼa pe kotea ʼae ʼe loto e Sehova ke ke fai. Pea ke ke fakahoko te faʼahi ʼaia. Tatau aipe pe ʼe faigataʼa te tonu ʼae ka ke toʼo, kae ʼe nofo tuʼumaʼu anai tau Tamai mo koe. ʼE ina foaki atu anai te malohi pea mo tokoni atu ke ke haga fai te meʼa ʼae ʼe totonu ʼi te ʼaho fuli.​—Esa. 40:29-31.

18. He koʼe ʼe mole tonu ke tou fakamauʼi ʼihi ʼaki pe ʼatatou manatu fakatagata?

¹⁸ 3 Aluʼaga: Ke ke tuku pe kia Sehova ia te fakamau. Logo la ʼe tou faiga malohi ke tou maʼuliʼi te ʼu lekula faitotonu ʼa Sehova, kae ʼe mole tonu ke tou fakamauʼi ʼihi pea mo tou manatu ʼe tou faitotonu age ia natou. ʼE mole tonu ke tou manatu ʼe tou maʼoluga age ʼi ʼihi pea mo fakamauʼi natou ʼaki pe ʼatatou manatu fakatagata. Kae ʼe tonu ke tou manatuʼi ko Sehova ʼe ko “te Tuʼi Fakamau ʼo te kele katoa.” (Sen. 18:25) Neʼe mole fakagafua mai e Sehova ke tou fakamauʼi ʼihi. ʼE fakatotonu fenei mai e Sesu: “Tuku takotou fakamau, naʼa fakamauʼi koutou.”​—Mat. 7:1. *

19. Neʼe fakaha feafeaʼi e Sosefo tana falala ki te fakamau ʼa Sehova?

¹⁹ Tou toe vakaʼi te faʼifaʼitaki ʼa Sosefo, ʼae neʼe ina fai te meʼa ʼae ʼe totonu. Neʼe mole ina fakamauʼi ʼihi, maʼia mo natou ʼae neʼe natou gaohi koviʼi ia ia. Neʼe gaohi koviʼi ia ia e ʼona tehina totonu, mo natou fakatau ia ia ohage ko he tagata kaugana pea mo fakalotoʼi tanatou tamai kua mate ia Sosefo. Hili ki ai ni taʼu, neʼe toe felaveʼi leva ia Sosefo mo tona famili. Neʼe ina maʼu  he tuʼulaga maʼuhiga ʼi Esipito pea neʼe feala pe ke ina fakamauʼi fakamalohi ʼona tehina pea mo faiga ke lagavaka. Neʼe matataku te ʼu tehina ʼo Sosefo naʼa ina fai te faʼahi ʼaia, logo la neʼe natou fakahemala moʼoni ki te meʼa ʼae neʼe natou fai. Kae neʼe ui fenei age e Sosefo kia natou: “ ʼAua naʼa kotou matataku. ʼE ko au koa te ʼAtua?” (Sen. 37:18-20, 27, 28, 31-35; 50:15-21) Neʼe agavaivai ia Sosefo pea neʼe ina tuku kia Sehova ke ina fakamauʼi ia te aluʼaga ʼaia.

20-21. Kotea ʼe tonu ke tou fai ke mole tou manatu ʼe tou faitotonu age ʼi ʼihi?

²⁰ Ohage ko Sosefo, tou tuku kia Sehova te fakamau. Ohage la, ʼe mole tou iloʼi ia te ʼu tupuʼaga ʼo te aga feia ʼo ʼotatou tehina mo tuagaʼane. ʼE mole feala ke tou iloʼi te ʼu meʼa ʼae ʼi ʼonatou loto. ʼE ko Sehova pe ʼae ʼe ‘ina sivisivi te ʼu tupuʼaga ʼo tanatou aga.’ (Taag. 16:2) ʼE ʼofa ki te hahaʼi fuli, ʼae ʼe ʼomai mai te ʼu fenua mo agaʼi fenua kehekehe. Pea ʼe fakalotomalohiʼi tatou e Sehova ‘ke lahi age totatou ʼofa ʼae kia natou.’ (2 Ko. 6:13) Koia, ʼe tou faiga ke tou ʼoʼofa ki totatou famili fakalaumalie fuli, kae ʼaua tatatou fakamauʼi natou.

²¹ ʼE mole tonu ke tou toe fakamauʼi mo natou ʼae ʼe mole kau ʼi te kokelekasio. (1 Tim. 2:3, 4) ʼE ke fakamauʼi anai koa he tahi ʼo ʼau matuʼā ʼae ʼe mole tauhi kia Sehova, ʼo ke ui fenei: “ ʼE mole feala anai ia ke haʼu ki te moʼoni”? Kailoa ia, he ʼe ka tou fai te faʼahi ʼaia pea ʼe tou fakaha ai ʼe tou fialahi pea mo manatu ʼe tou faitotonu age ia ia. ʼE kei tuku e Sehova te fealagia ʼae “ki te hahaʼi ʼo te ʼu potu fuli” ke natou fakahemala. (Gaue 17:30) ʼAua naʼa galo kia koe ʼe fakaʼuhiga e Sehova ia natou ʼae ʼe manatu ʼe natou faitotonu age ʼi ʼihi ko he ʼu hahaʼi heʼe faitotonu.

22. He koʼe ʼe ke fakatotonu ke ke leleiʼia te faitotonu?

²² Ka tou leleiʼia te ʼu lekula faitotonu ʼa Sehova, ʼe tou fiafia anai pea mo tokoni mai ke tou tuku he faʼifaʼitaki lelei ki ʼihi ke feala ai hanatou ʼoʼofa ia tatou pea mo te ʼAtua. Koia, ke hoko atu pe tatatou “fia kakai pea mo fia iinu ki te faitotonu.” (Mat. 5:6) Ke ke manatuʼi ʼe tokagaʼi e Sehova ʼau faiga pea ʼe fiafia tuʼumaʼu ʼi tau tuputupu. ʼE kua ʼasili age te heʼe faitotonu ʼa te hahaʼi ʼo te malama ʼaeni, koia ke ke lotomalohi. ʼAua naʼa galo kia koe “ ʼe ʼofa ia Sehova ki te kau faitotonu.”​—Pes. 146:8.