1. He ko’e neʼe kole e Sesu kia Sehova ke ina puipui ʼana tisipulo?

 ʼI TE po ʼi muʼa ʼo te mate ʼo Sesu, neʼe ina fai he kole maʼuhiga ki tana Tamai ʼae ʼe ʼi selo. Neʼe ina kole age kia te ia ke ina puipui ʼana tisipulo. (Soa. 17:15, 20) Neʼe puipui tuʼumaʼu e Sehova ʼana kaugana. Neʼe tokaga lelei kia natou pea mo ina puipui natou. Kae neʼe iloʼi e Sesu ʼe fakafeagai malohi anai ia Satana ki ʼana tisipulo. Koia, ʼe ʼaoga lahi anai kia natou ia te tokoni ʼa Sehova.

2. Ka tou lau ia Pesalemo 33:18-20, he koʼe ʼe mole tonu ke tou tuʼania ki te ʼu fihifihia ʼae ʼe feala ke hoko kia tatou?

² Ia ʼaho nei, ʼe fakatupu e te malama ʼa Satana ia he ʼu toe fihifihia lahi ki te kau Kilisitiano moʼoni. ʼE tou tau mo he ʼu fihifihia ʼe feala ke tou lotovaivai pea mo ʼahiʼahiʼi ai tatatou nofo agatonu kia Sehova. Kae ʼe tou vakaʼi anai ʼi te alatike ʼaeni ʼe mole ʼaoga hatatou tuʼania. ʼE puipui tatou e Sehova. Ko tona fakaʼuhiga ʼe ina iloʼi te ʼu ʼahiʼahi ʼae ʼe tou tau mo ia pea ʼe lotolelei tuʼumaʼu ke tokoni mai kia tatou. Koia, tou vakaʼi he ʼu faʼifaʼitaki ʼe lua ʼi te Tohi-Tapu ʼe fakaha mai ai “ ʼe sio ia Sehova kia natou ʼae ʼe manavasiʼi kia te ia.”​—Lau ia Pesalemo 33:18-20.

3. Kotea la he ʼu aluʼaga ʼe feala ke tou logoʼi ai ʼe tou nofo tokotahi?

³ Logo la ʼe lahi ʼotatou tehina mo tuagaʼane ʼi te kokelekasio kae ʼe feala pe ke tou logoʼi tatatou nofo tokotahi. Ohage la, ʼe feala ke logoʼi e te kau tupulaga tanatou nofo tokotahi moka ʼe natou fakamahino tanatou tui ki ʼonatou kauga ako peʼe moka ʼe fetogi kokelekasio. Ko ʼihi ia tatou ʼe lagi lotomamahi peʼe natou tauʼi he ʼu manatu fakalotovaivai. Pea ʼe feala leva ke natou manatu ke natou fakatokatoka ʼateaina pe ʼonatou fihifihia. Ka tou tau mo te faʼahi ʼaia, ʼe lagi mole tou fia fakaha ki ʼihi te ʼu meʼa ʼae ʼe tou logoʼi naʼa mole natou lotomahino  mai. Pea ʼi ʼihi temi, ʼe feala ke tou feuiʼaki pe ʼe tokaga moʼoni mai koa he tahi kia tatou. Kotea pe te tupuʼaga ʼo tatatou logoʼi tatatou nofo tokotahi, kae ʼi ʼihi temi ʼe tou toe logoʼi te lotovaivai pea mo te hoha. Kae ʼe mole loto e Sehova ke tou maʼu he ʼu manatu feia. ʼE tou iloʼi feafeaʼi te faʼahi ʼaia?

4. He koʼe neʼe ui fenei e te polofeta ko Elia: “ ʼE ko au tokotahi pe ʼae ʼe kei toe”?

⁴ Tou vakaʼi pe kotea ʼae neʼe hoko ki te polofeta ko Elia. Neʼe fakatotonu e Sesapele ke ina matehi ia ia, koia neʼe feholaʼaki ai lolotoga ʼaho ʼe 40. (1 Hau 19:1-9) Neʼe nofo tokotahi leva ʼi he ʼana pea neʼe ina ui fenei kia Sehova ʼi te lahi ʼo tona lotomamahi: “ ʼE ko au [te polofeta] tokotahi pe ʼae ʼe kei toe.” (1 Hau 19:10) Kae, neʼe lava fakanono e Opatia ia te ʼu polofeta ʼe toko 100 ke natou hao mai te faifakapo ʼa te fineʼaliki. (1 Hau 18:7, 13) He koʼe neʼe logoʼi e Elia tana nofo tokotahi? Neʼe manatu koa ia kua mamate te ʼu polofeta fuli ʼae neʼe haofaki e Opatia? Neʼe ina logoʼi koa hana nofo tokotahi ʼuhi ʼae neʼe mole he tahi neʼe tauhi mo ia kia Sehova, maʼia ʼi te ʼosi fakaha e Sehova ʼe ko ia te ʼAtua moʼoni ʼi te Moʼuga ʼo Kalemelo? Lagi neʼe manatu koa ia neʼe mole iloʼi e he tahi ia te faiga ʼae ʼe ʼona fili ke natou matehi ia ia peʼe mole tuʼania he tahi kia ia? ʼE mole fakaha fakahagatonu mai ʼi te hisitolia te faʼahi ʼaia. Kae ko te faʼahi ʼae ʼe tou iloʼi papau, neʼe mahino ia Sehova pe koʼe neʼe logoʼi e Elia tana nofo tokotahi pea neʼe ina iloʼi lelei pe feafeaʼi hana tokoni ki ai.

5. Neʼe tokoni feafeaʼi ia Sehova kia Elia ke mahino neʼe mole nofo tokotahi?

⁵ Neʼe lahi te ʼu aluʼaga neʼe tokoni ai ia Sehova kia Elia. ʼUluaki, neʼe ina fakalotomalohiʼi ia ia ke ina fakaha te ʼu meʼa ʼae neʼe ina logoʼi. Neʼe ina fehuʼi tuʼa lua age ki ai: “Kotea ʼae ʼe ke fai ʼi heni?” (1 Hau 19:9, 13) Pea neʼe fagono ki ai ʼi tana fakamahino age te ʼu meʼa ʼae ʼi tona loto. Neʼe tali ia Sehova kia Elia ʼo ina fakaha age ʼe nofo mo ia pea ʼe mafimafi. Neʼe ina toe fakaha age ki ai ʼe kei hahaʼi ia natou ʼae ʼe natou fai te tauhi moʼoni ʼi Iselaele. (1 Hau 19:11, 12, 18) ʼE mahino ia, neʼe logoʼi e Elia hona fimalie ʼi tana ʼosi fakaha kia Sehova te ʼu meʼa ʼae neʼe ina logoʼi pea mo tana logo ki Tana tali age. Pea tahi, neʼe foaki age e Sehova he ʼu gaue maʼuhiga ʼe tolu ke ina fakahoko. Neʼe ina kole age ke ina  fakanofo ia Hasaele ko he hau ʼo Silia, pea mo Seu ko he hau ʼo Iselaele ʼo feia mo Eliseo ko he polofeta. (1 Hau 19:15, 16) Neʼe tokoni ai ki ai ke tokaga tafito pe ki he ʼu manatu ʼe lelei. Neʼe toe fakafealagia e Sehova ke ʼi ai hona kaumeʼa ʼe nā feoloʼaki fakatahi. Ko tona kaumeʼa ʼaia ko Eliseo. Kae ʼe tokoni feafeaʼi atu ia Sehova moka ʼe ke logoʼi ʼe ke nofo tokotahi?

6. Ka tou lau ia Pesalemo 62:8, kotea ʼe feala ke tou ui kia Sehova ʼi ʼatatou faikole moka ʼe tou logoʼi ʼe tou nofo tokotahi?

⁶ ʼE loto e Sehova ke ke faikole age kia te ia. ʼE ina iloʼi ia te ʼu aluʼaga ʼe ke tau mo ia. Pea ʼe ina ui atu ʼe fagono ki ʼau faikole ʼi he lakaga pe. (1 Tes. 5:17) ʼE fiafia ʼi te fagono ki te ʼu faikole ʼo ʼana kaugana. (Taag. 15:8) Koia, ka ke logoʼi ʼe ke nofo tokotahi, kotea ʼe feala ke ke ui age ki ai? Ohage ko Elia, fakaha age kia te ia te ʼu meʼa ʼae ʼi tou loto. (Lau ia Pesalemo 62:8.) ʼEi, fakaha age kia te ia ʼou tuʼania mo te mamahi ʼae ʼe ke logoʼi. Kole kia te ia ke tokoni atu ke ke iloʼi pe kotea ʼe ke fai moka ke logoʼi hau nofo tokotahi peʼe lotomamahi. Ohage la, kapau ʼe ke logoʼi hau nofo tokotahi pea mo mataku ʼi te fakamahino tau tui ki hou ʼu kauga ako, ke ke kole kia Sehova ke ina foaki atu te lototoʼa ke ke lava palalau. ʼE feala hau toe kole kia te ia ke ina foaki atu mo te poto ke ke fakahoko te faʼahi ʼaia ʼaki he aga fakaʼeteʼete. (Luka 21:14, 15) Peʼe kapau ʼe ke tauʼi he ʼu manatu fakalotovaivai, ke ke kole kia te ia ke ina foaki atu te malohi ke ke lava palalau mo he tehina peʼe tuagaʼane kua fakapotopoto. ʼE feala hau toe kole kia te ia ke tokoni ki te tehina peʼe tuagaʼane ʼaia ke fiafia ʼi te fagono atu pea mo ke lotomahino. Koia, fakaha kia Sehova te ʼu meʼa fuli ʼae ʼe ke logoʼi, mo tokagaʼi ia tana faʼahiga tali atu ki ʼau faikole pea mo ke tali ia te tokoni ʼo ʼou tehina mo tuagaʼane. ʼE mahino ia, ʼe mole ke logoʼi ai anai hau nofo tokotahi.

7. Kotea ʼae ʼe tou ako mai te faʼifaʼitaki ʼa Mauricio?

⁷ ʼE foaki mai e Sehova kia tatou fuli ia he ʼu gaue maʼuhiga ke tou fai. Pea ʼe ina tokagaʼi mo fiafia ʼi te ʼu meʼa fuli ʼe ke fai ke ke lagolago ai ki te ʼu gaue ʼo te kokelekasio ʼo feia mo te faifakamafola. (Pes. 110:3) He koʼe ʼe maʼuhiga ke ke maʼumaʼua ʼi te ʼu gaue ʼaia moka ʼe ke logoʼi ʼe ke nofo tokotahi? Tou vakaʼi te aluʼaga neʼe hoko ki te tehina tupulaga ko Mauricio. * Hili pe tana papitema, neʼe ina tokagaʼi kua kamata fakamamaʼo hona kaumeʼa ʼi te moʼoni. ʼE ui fenei e Mauricio: “ ʼI taku sio leva ʼae kua mavae mai ia Sehova, neʼe au lotolotolua leva mo feuiʼaki pe ʼe au nofo agatonu anai kia Sehova. Neʼe au feuiʼaki pe ʼe au agatonu anai ki te fakapapau ʼae neʼe au fai kia Sehova pea mo haga nofo ʼi tana kautahi. Neʼe au logoʼi haku nofo tokotahi pea neʼe hage ʼe mole lotomahino mai he tahi.” Kotea ʼae neʼe tokoni kia Mauricio ke lotomalohi tuʼumaʼu? ʼE ina ui fenei: “Neʼe au faifakamafola tuʼumaʼu. Neʼe tokoni mai ai ke ʼaua naʼa au manatu pe kia au totonu  pea mo nofo mo he ʼu manatu fakalotovaivai. ʼI taku faifakamafola tuʼumaʼu mo ʼihi, neʼe au logoʼi ai hoku toe fiafia lahi pea neʼe mole au logoʼi au haku nofo tokotahi.” ʼE feala pe ke toe hoko kia tatou te faʼahi ʼaia. ʼE moʼoni, ʼe heʼeki feala ke tou olo fakatahi mo ʼotatou tehina mo tuagaʼane ʼo faifakamafola ʼi te ʼu ʼapi. Kae ʼe feala ke tou fefakalotomalohiʼaki ʼaki hatatou kau fakatahi ki te faifakamafola ʼaki te faitohi peʼe ko te faitelefoni. Kotea te tahi aluʼaga neʼe toe fiafia ai ia Mauricio? ʼE ina toe ui fenei: “Neʼe au toe maʼumaʼua ʼi te ʼu gaue ʼo te kokelekasio. Neʼe au teuteuʼi lelei ʼaku kiʼi akonaki pea mo faiga ke au fakahoko fakalelei. ʼI taku fakahoko te faʼahi ʼaia, neʼe au logoʼi ʼe au maʼuhiga kia Sehova ʼo feia mo ʼoku tehina mo tuagaʼane.”

8. Kotea te ʼu faʼahi ʼe feala ke tou logoʼi moka tou tau mo he ʼu ʼahiʼahi fakamataku?

⁸ ʼE tou maʼuʼuli ʼi te ʼu ʼaho fakamuli. Koia, ʼe tou tau anai mo ni ʼahiʼahi. (2 Tim. 3:1) Kae ʼi ʼihi temi, ʼe tou punamaʼuli ʼi te agaaga ʼo te ʼu ʼahiʼahi ʼaia peʼe ko te temi ʼae ʼe hoko mai ai. Ohage la, ʼe feala ke tou tau mo ni fihifihia fakapaʼaga kae neʼe mole tou ʼamanaki ki ai, peʼe fakaha mai ʼe tou tau mo he mahaki kovi peʼe mate he tahi ʼe tou ʼofa mamahi ai. ʼE ko he ʼu aluʼaga ia ʼe feala ke tou taʼomia ai, tafito la moka ʼe hoko hoholo te ʼu ʼahiʼahi ʼaia peʼe hoko fuli pe ʼi he moʼi temi ʼe tahi. Kae tou manatuʼi ʼe tokaga ia Sehova kia tatou pea ʼe tokoni mai ke tou lotomalohi ʼo tauʼi he faʼahiga ʼahiʼahi pe.

9. Fakamatala te ʼu ʼahiʼahi neʼe tau mo Sopo.

⁹ Tou vakaʼi pe neʼe tokoni feafeaʼi ia Sehova kia Sopo. Neʼe lahi te ʼu ʼahiʼahi fakamataku neʼe tau mo Sopo ʼi he kiʼi temi nounou pe. ʼI te ʼaho pe ʼe tahi, neʼe maʼu logo kua mate tana faga manu fuli, mo ʼana hahaʼi kaugana ʼo feia mo ʼana fanau ʼofaina. (Sopo 1:13-19) Mole faʼa fualoa ki ai, neʼe tau leva mo he mahaki fakamataku. Neʼe ʼi ʼai ʼona foʼi polo mai tona ʼulu ki ʼona ʼalofi vaʼe. Kae ʼi te temi ʼaia neʼe kei lotomamahi ʼaupito ia Sopo. (Sopo 2:7) Neʼe faigataʼa ʼaupito ia tona aluʼaga koia neʼe ui fenei ai e Sopo: “Kua au fakalialia ki toku maʼuli. ʼE mole kei au fia maʼuli.”​—Sopo 7:16.

10. Neʼe tokoni feafeaʼi ia Sehova kia Sopo? (Vakaʼi te pāki ʼo te takafi.)

¹⁰ Neʼe tokaga ia Sehova kia Sopo. Neʼe ʼofa ia ia pea neʼe tokoni ki ai ke ina katakiʼi ʼona ʼahiʼahi pea ke nofo agatonu kia te ia. Neʼe ina fakamanatuʼi age ki ai ʼe mole he gataʼaga ʼo tona poto pea ʼe tokaga lelei ki ʼAna fakatupu fuli. Neʼe talanoa ki he ʼu manu fakaofoofo. (Sopo 38:1, 2; 39:9, 13, 19, 27; 40:15; 41:1, 2) Neʼe ina toe fakaʼaogaʼi ia te tupulaga agatonu ko Eliu ke ina fakalotomalohiʼi mo fakalotofimalieʼi ia Sopo. Neʼe ui age e Eliu kia Sopo ʼe fakapale tuʼumaʼu e Sehova ʼana kaugana ʼuhi ko tanatou faʼa kataki. Kae neʼe toe uga e Sehova ia Eliu ke ina foaki he ʼu tokoni ʼofa kia Sopo. Neʼe tokoni ia Eliu kia Sopo ke ʼaua tana manatu fau kia ia totonu. Neʼe ina fakamanatuʼi age ʼe maʼoluga ʼaupito ia Sehova, te Tupuʼaga ʼo te ʼatulaulau, ia tatou. (Sopo 37:14) Neʼe toe foaki age e Sehova kia Sopo he gaue ke ina fai. Neʼe ina kole age ki ai ke ina hufakiʼi ʼona kaumeʼa ʼe toko tolu ʼae neʼe agahala. (Sopo 42:8-10) Kae ʼe tokoni feafeaʼi mai ia Sehova ia ʼaho nei moka tou tau mo ni ʼahiʼahi?

11. Kotea te fakalotofimalie ʼe tou maʼu ʼi te Tohi-Tapu moka tou tau mo ni ʼahiʼahi?

¹¹ ʼE mole palalau fakahagatonu mai ia Sehova ohage ko tana fai kia Sopo. Kae ʼe palalau mai kia tatou ʼaki Tana Folafola, ia te Tohi-Tapu. (Loma 15:4) ʼE ina fakalotofimalieʼi tatou ʼaki hana foaki mai he ʼamanaki taulekaleka ʼi te ka haʼu. Koʼeni he ʼu manatu Fakatohi-tapu ʼe feala ke tou maʼu ai he fimalie moka ʼe tou tau mo ni ʼahiʼahi. Ohage la, ʼe fakapapau mai e Sehova ʼe mole feala ki he meʼa, maʼia mo he ʼu ʼahiʼahi fakamataku, “ ʼe  feala anai ke ina fakamavae tatou mai [tona] ʼofa.” (Loma 8:38, 39) ʼE ina fakafimalieʼi tatou ʼo ina ui mai ʼe ‘ovi kia natou fuli ʼae ʼe pauʼi kia te ia’ ʼi te faikole. (Pes. 145:18) ʼE ina fakapapau mai kapau ʼe tou falala kia te ia, ʼe tou lava katakiʼi he faʼahiga ʼahiʼahi pe pea mo fiafia. (1 Ko. 10:13; Sakp. 1:2, 12) ʼE toe fakamanatuʼi mai ʼi te Folafola ʼa te ʼAtua ʼe fakatemi pe ia te ʼu ʼahiʼahi ʼe tou tau mo ia moka tou fakatatau atu ki te maʼuli heʼe gata ʼae ʼe ina fakapapauʼi mai. (2 Ko. 4:16-18) Pea tahi, ʼe pulihi anai e Sehova ia natou ʼae ʼe natou fakatupu ʼotatou mamahi fuli, ia Satana te Tevolo ʼo feia mo natou ʼae ʼe agakovi ohage ko ia. (Pes. 37:10) ʼE kua ke maʼu loto koa he ʼu vaega Fakatohi-tapu ʼe fakalotofimalieʼi ai koe moka ke tau mo he ʼahiʼahi?

12. Kotea ʼae ʼe kole mai e Sehova ke tou fai?

¹² ʼE kole mai e Sehova ke tou toʼo tuʼumaʼu he temi ke tou lau ai te Tohi-Tapu pea mo fakakaukauʼi lelei te ʼu meʼa ʼae ʼe tou lau ʼi ai. Ka tou maʼuliʼi te ʼu faʼahi ʼae ʼe tou ako, ʼe malohi anai tatatou tui pea mo fakaovi lahi ai ki tatatou Tamai ʼae ʼe ʼi selo. Pea ʼe tokoni mai ai ke tou maʼu te malohi moʼo katakiʼi te ʼu ʼahiʼahi. ʼE toe foaki e Sehova ia tona laumalie maʼoniʼoni kia natou ʼae ʼe natou tuku ke takitaki natou e tana Folafola. Pea kotea pe he ʼahiʼahi ʼe tou tau mo ia, ʼe foaki mai anai e te laumalie ʼaia he “malohi makehe” moʼona tauʼi.​—2 Ko. 4:7-10.

13. Ka tou maʼu te meʼa kai fakalaumalie ʼae ʼe foaki mai e “te tagata faifekau agatonu mo poto,” ʼe tokoni feafeaʼi mai ke tou tauʼi ʼotatou ʼahiʼahi?

¹³ ʼE tokoni ia Sehova ki “te tagata faifekau agatonu mo poto.” ʼE lahi te ʼu alatike, mo te ʼu ʼata viteo pea mo te ʼu hiva ʼe foaki mai e te tagata faifekau ʼaia. Pea ʼe tokoni mai ki te fakamalohiʼi ʼo tatatou tui pea ke tou nofo ʼalaʼala ʼi te faʼahi fakalaumalie. (Mat. 24:45) ʼE tonu ke tou fakaʼaogaʼi lelei te meʼa kai fakalaumalie ʼaia ʼe foaki mai ʼi tona temi totonu. Neʼe fakaha e he tuagaʼane ʼe maʼuli ʼi Amelika ia tana lotofakafetaʼi ki te ʼu meʼa fuli ʼe foaki mai e Sehova. ʼE ina ui fenei: “Kua taʼu 40 taku tauhi kia Sehova pea neʼe tuʼa lahi te ʼahiʼahiʼi ʼo taku nofo agatonu ki te ʼAtua.” Neʼe maʼuli mamahi ʼosi te tuagaʼane ʼaia. Neʼe mate siʼana kui tagata he neʼe fakaʼi e he tagata konahia. Neʼe mahahaki toko lua ʼana matuʼā pea neʼe mamate leva. Pea neʼe tuʼa lua tana tauʼi he kosea. Kotea ʼae neʼe tokoni ki ai ke faʼa kataki? ʼE ina ui fenei: “Neʼe tokaga tuʼumaʼu pe ia Sehova kia au. Neʼe tokoni mai kia au ia te meʼa kai fakalaumalie ʼae ʼe ina foaki mai ʼaki te tagata faifekau agatonu mo poto ke au faʼa kataki. Pea neʼe feala ai ke au manatu tahi mo Sopo, ʼae neʼe ina ui: ‘ ʼO kaku ki toku mate, ʼe mole  au fakafisi anai ki taku agatonu.’ ”​—Sopo 27:5.

14. Ka tou lau ia 1 Tesalonika 4:9, ʼe fakaʼaogaʼi feafeaʼi e Sehova ʼotatou tehina mo tuagaʼane ke tokoni mai ʼi te ʼu temi faigataʼa?

¹⁴ Neʼe akoʼi e Sehova ʼana kaugana ke natou feʼofaʼofani pea mo fefakalotofimalieʼaki ʼi te ʼu temi faigataʼa. (2 Ko. 1:3, 4; lau ia 1 Tesalonika 4:9.) Ohage ko Eliu, ʼe fia tokoni mai ʼotatou tehina mo tuagaʼane ke tou nofo agatonu logo la ʼotatou ʼahiʼahi. (Gaue 14:22) Tou vakaʼi te faʼifaʼitaki ʼa Diane. Neʼe fakalotomalohiʼi ia ia e tana kokelekasio ʼi te temi ʼae neʼe mahaki kovi ai tona ʼohoana. ʼE ina fakamatala pe neʼe natou tokoni feafeaʼi age ki ai ke nofo ovi tuʼumaʼu kia Sehova. Neʼe ina ui fenei: “Neʼe ko he temi faigataʼa ia. Kae neʼe ma logoʼi ia te malohi ʼo Sehova pea mo tana tokaga ʼofa kia maua lolotoga te ʼu mahina ʼaia neʼe ʼahiʼahiʼi ai maua. Neʼe tokoni mai ʼoma tehina mo tuagaʼane ʼo toma kokelekasio. Neʼe ʼomai ʼo fakasiosio maua, mo faitelefoni mai pea mo faʼufua mai kia maua. Neʼe ko te aluʼaga ʼaia neʼe tokoni mai ke ma haga haʼele ki muʼa. Neʼe mole au sofea he neʼe mole hoku pelemi. Koia neʼe tokaga ai te ʼu tehina mo tuagaʼane ke au lava kau ki te ʼu fono pea mo te faifakamafola moka au fealagia.” ʼI meʼa fakafiafia leva hatatou kau ki he foʼi famili fakalaumalie ʼe manavaʼofa.

15. He koʼe ʼe tou falala ʼe tou lava katakiʼi ʼotatou ʼahiʼahi?

¹⁵ ʼE tou tau fuli mo ni ʼahiʼahi. Kae, neʼe tou vakaʼi ʼe mole feala anai ke tou tauʼi tokotahi te ʼu ʼahiʼahi. Ko Sehova ʼe ko he tamai fonu ʼi te ʼofa pea ʼe tokaga tuʼumaʼu kia tatou. ʼE nofo ʼi ʼotatou tafa, pea ʼe fiafia ʼi te fagono ki ʼatatou kole tokoni age pea ʼe fia tokoni mai. (Esa. 43:2) He koʼe ʼe tou falala ʼe tou lava katakiʼi ʼotatou ʼahiʼahi? Koteʼuhi ʼe foaki mai e Sehova te ʼu meʼa ʼae ʼe ʼaoga kia tatou. ʼE ina foaki mai te pilivilesio ʼae ko te faikole, mo te Tohi-Tapu, mo te meʼa kai fakalaumalie ʼae kua mahu pea mo he ʼu tehina mo tuagaʼane ʼe tokoni mai ʼi te ʼu temi faigataʼa.

16. Kotea ʼae ʼe tonu ke tou fai ke tou maʼu tuʼumaʼu te tokoni ʼa Sehova?

¹⁶ ʼE tou fiafia ʼi tatatou maʼu hatatou Tamai ʼe ʼi selo ʼe tokaga kia tatou. “ ʼE fakafiafia ʼotatou loto ʼo ʼuhiga mo ia.” (Pes. 33:21) Tou fakaha tatatou lotofakafetaʼi kia Sehova ʼo tou fakaʼaogaʼi lelei ia meʼa fuli ʼe ina foaki mai moʼo tokoni kia tatou. ʼE tonu ke tou toe tokaga ke tou haga maʼu pe tana tokoni. Koia, tou fai ia meʼa fuli ke tou fakalogo kia te ia pea mo fai te meʼa ʼae ʼe totonu kia te ia. Pea ʼe tokaga anai kia tatou ʼo talu ai.​—1 Pet. 3:12.