ALATIKE AKO 34
‘Haga Mulimuli Ki Te Ala ʼo Te Moʼoni’
“Haga mulimuli . . . ki te ala ʼo te moʼoni.”—3 SOA. 4.
KATIKO 111 Te ʼu Tupuʼaga ʼAe Ke Tou Fiafia Ai
TE ʼU MANATU FAKANOUNOU *
1. He koʼe ʼe tou fiafia moka tou fakamatala pe neʼe tou iloʼi feafeaʼi ia te moʼoni?
ʼE LAGI kua fai atu ia te fehuʼi ʼaeni kia koe: “Neʼe ke iloʼi feafeaʼi te moʼoni?” ʼE mahino ia, neʼe kua tuʼa lahi pe tau tali ki te fehuʼi ʼaia. ʼE ko te faʼahi ʼaia ʼe tou ʼuluaki fakalavelave moka tou faipalalau mo he ʼu tehina mo tuagaʼane. ʼE tou fiafia moka natou fakamatala mai pe neʼe natou iloʼi feafeaʼi ia Sehova pea mo ʼoʼofa ki ai. Pea ʼe tou fiafia ʼi te fakamatala age ia te ʼu fua lelei neʼe tou maʼu ʼuhi ko te moʼoni. (Loma 1:11) ʼAki te ʼu faipalalau ʼaia, ʼe tou manatuʼi ai te maʼuhiga ʼo te moʼoni. ʼE ina fakamalohiʼi tatatou fakatotonu ʼae ke tou ‘haga mulimuli ki te ala ʼo te moʼoni,’ ko tona fakaʼuhiga ke tou taupau he faʼahiga maʼuli ʼe tou maʼu ai te tapuakina pea mo te ʼofa ʼo Sehova.—3 Soa. 4.
2. Kotea ʼae ka tou palalau anai ki ai ʼi te alatike ʼaeni?
2 ʼI te alatike ʼaeni, ʼe tou vakaʼi anai ni tupuʼaga ʼe tou ʼoʼofa ai ki te moʼoni. Pea ʼe tou vakaʼi pe ʼe feafeaʼi anai hatatou haga fakaha ʼe tou ʼoʼofa ki te moʼoni. ʼI te hili ʼo te vakaʼi ʼo te ʼu puani ʼaia, ʼe toe ʼaʼasili age anai tatatou lotofakafetaʼi kia Sehova ʼi tana taki mai tatou kia te ia. (Soa. 6:44) Pea ʼe toe ʼaʼasili age anai tatatou fia fakaha ia te moʼoni ki ʼihi.
HE KOʼE ʼE TOU ʼOFA KI “TE MOʼONI”?
3. Kotea ia te tupuʼaga tafito ʼo tatatou ʼofa ki te moʼoni?
3 ʼE lahi te ʼu tupuʼaga ʼe tou ʼofa ai ki te moʼoni. Kae ko te tupuʼaga tafito, he ʼe tou ʼoʼofa ia Sehova, ia te matapuna ʼo te moʼoni. ʼI tatatou akoʼi tana Folafola, te Tohi-Tapu, neʼe tou mahino ai, ʼe mole gata ʼaki pe te ui ko ia te Tupuʼaga Mafimafi ʼo te lagi mo te kele, kae ʼe ko he Tamai ʼe ʼi selo ʼe tokaga lelei kia tatou. (1 Pet. 5:7) Neʼe tou toe mahino, ko totatou ʼAtua ʼe “manavaʼofa, tuai ʼi te ʼita pea mo fonu ʼi te agatonu mo te moʼoni.” (Eke. 34:6) ʼE leleiʼia e Sehova ia te faitotonu. (Esa. 61:8) ʼE lotomamahi moka sio mai ʼe tou mamahi pea kua fakaʼamu la ke ina fakagata la ʼotatou mamahi fuli pea ʼe ina fakahoko anai ʼi tona temi totonu. (Sel. 29:11) ʼI ʼamanaki taulekaleka leva! ʼE mole feala ke tou fehiʼa kia Sehova.
4-5. He koʼe neʼe fakatatau e te apositolo ko Paulo ia tatatou ʼamanaki ki he foʼi tau?
4 Kotea te tahi tupuʼaga ʼe tou ʼofa ai ki te moʼoni? ʼE lahi te ʼu lelei ʼe tou maʼu mai ai. Tou toʼo he faʼifaʼitaki, ohage la ko tatatou ʼamanaki. ʼE kau ia te ʼamanaki ki te moʼoni. Moʼo fakaha tona maʼuhiga, neʼe tohi fenei e te apositolo ko Paulo: “ ʼE tou maʼu te ʼamanaki ʼaia ohage ko he foʼi tau ki ʼotatou maʼuli, ʼe tuha mo te falala pea mo tuʼu malohi.” (Hep. 6:19) Ohage pe ko he foʼi tau ʼe ina taʼofi te vaka ke ʼaua naʼa tafea, ʼe tokoni mai tatatou ʼamanaki Fakakilisitiano ke tou tutuʼu malohi moka tou tau mo he ʼu ʼahiʼahi.
5 Ka tou vakaʼi te ʼu manatu fuli ʼo tana tohi ʼaia, neʼe talanoa ia Paulo ki te ʼamanaki ʼa te kau Kilisitiano fakanofo ke natou olo ki te lagi. Kae neʼe toe fakahagahaga ia tana ʼu palalau ʼaia ki te kau Kilisitiano ʼae ka maʼuʼuli anai ʼi te palatiso fakakelekele. (Soa. 3:16) ʼE mahino ia, ʼi tatatou iloʼi ia te ʼamanaki ki te maʼuli heʼe gata, neʼe ʼi ai leva te ʼuhiga ʼo totatou maʼuli.
6-7. Kotea ʼae neʼe logoʼi e Yvonne ʼi tana iloʼi te moʼoni ʼo ʼuhiga mo te ka haʼu?
6 Tou vakaʼi te faʼifaʼitaki ʼa Yvonne. Neʼe mole tauhi ʼana matuʼā kia Sehova pea ʼi tana kei veliveli, neʼe mataku ki te mate. ʼE ina manatuʼi, neʼe ina lau te falasisi ʼaeni pea neʼe mole feala ke ina galoʼi: “ ʼE hoko mai anai he ʼaho, ʼe gata anai te maʼuli.” ʼE ina fakamatala fenei: “ ʼUhi ko te palalau ʼaia, neʼe faigataʼa ʼosi taku moe, pea ʼi ʼihi po, ʼe au nofo pe ʼo fakakaukauʼi te ka haʼu. Neʼe au ui pe maʼa ʼaku: ‘ ʼE lagi ʼi ai pe he ʼaoga ʼo te maʼuli. He koʼe ʼe au maʼuli?ʼ Neʼe mole au fia mate.”
7 ʼI tona temi tupulaga, neʼe faipalalau leva ia Yvonne mo te ʼu Fakamoʼoni ʼa Sehova. ʼE ina fakamatala fenei: “Neʼe au kamata tui ai leva ʼe feala ke au maʼu te maʼuli heʼe gata ʼi he palatiso fakakelekele.” Kotea ʼae neʼe ina logoʼi ʼi tana iloʼi te moʼoni? ʼE ina ui fenei: “Ko te mataku ki te ka haʼu peʼe ko te mate ʼe mole kei ina taʼofi toku fia moe.” ʼE mahino ia, ʼe maʼuhiga kia Yvonne ia te moʼoni pea ʼe fiafia ʼi te vaevae ʼo tana ʼamanaki mo ʼihi atu.—1 Tim. 4:16.
8-9. (1) Kotea ia te sakilifisio neʼe lotolelei ke fai e te tagata ʼo te lea fakata ʼo te koloa neʼe fufu? (2) ʼE maʼuhiga feafeaʼi kia koe ia te moʼoni?
8 ʼE toe kau ia te logo lelei ʼo te Puleʼaga ʼo te ʼAtua ki te moʼoni. Neʼe fakatatau e Sesu ia te koga ʼaia ʼo te moʼoni ki he koloa neʼe fufu. Ohage ko tatatou lau ia Mateo 13:44, neʼe ina ui fenei ai: “ ʼE feala ke fakatatau te Puleʼaga ʼo selo ki he koloa neʼe fufu ʼi he gaueʼaga, pea maʼu e he tagata ʼo ina toe fufu. Pea ʼi tana fiafia, ʼe alu ʼo fakatau ia meʼa fuli ʼe ina maʼu pea ina totogi ia te gaueʼaga ʼaia.” ʼE tou tokagaʼi, neʼe mole kumi e te tagata ʼaia ia he koloa. Kae ʼi tana maʼu, neʼe ina fai he toe sakilifisio ke ina maʼu maʼa ia. Koia, neʼe ina fakatau fuli ʼona koloa. Kotea tona tupuʼaga? Koteʼuhi neʼe mahino ki tona maʼuhiga. Neʼe maʼuhiga age te koloa ʼaia ʼi te ʼu meʼa fuli ʼae neʼe ina fakatau.
9 ʼE maʼuhiga ʼaupito koa kia koe ia te moʼoni? ʼE mahino ia. ʼE tou iloʼi ʼe mole he meʼa ʼe foaki mai e te malama ʼe tou maʼu ai he toe fiafia lahi. ʼE tou fiafia lahi age tatou ʼi tatatou tauhi ʼae kia Sehova, mo te ʼamanaki ki te maʼuli heʼe gata ʼi te takitaki ʼo te Puleʼaga. ʼE maʼuhiga age ia te pilivilesio ʼae ko te maʼu ʼo he ʼu felogoi lelei mo Sehova ʼi te ʼu sakilifisio fuli. Ko te faʼahi ʼe tou fiafia lahi ai, ʼe ko tatatou “fakafiafiaʼi tona loto.”—Kol. 1:10.
10-11. Kotea ʼae neʼe ina uga ia Michael ke ina fetogi tona faʼahiga maʼuli?
10 Tokolahi ia tatou neʼe tou fai ia he ʼu toe sakilifisio ke tou maʼu ia te ʼofa ʼo Sehova. Ko ʼihi neʼe natou fakafisi ki he gaue ʼe totogi lelei. Ko ʼihi neʼe natou fakafisi ki he maʼuli koloaʼia. Pea ko ʼihi neʼe natou fetogi tonatou faʼahiga maʼuli. Ko te faʼahi ʼaia neʼe fai e Michael. Neʼe mole tauhi ʼana matuʼā kia Sehova, pea ʼi tana kei veliveli, neʼe mamana ki te fai kalate. ʼE ina fakamatala fenei: “Neʼe au fiameʼameʼa pea neʼe au malohi. ʼI ʼihi temi, ʼe au manatu, ʼe mole au mataku ʼi he meʼa.” Kae ʼi tana kamata ako te Tohi-Tapu, neʼe mahino ai ki te manatu ʼa Sehova ʼo ʼuhiga mo te agamalohi. (Pes. 11:5) ʼO ʼuhiga leva mo te taumatuʼa ʼae neʼe ina fai tana ako Tohi-Tapu, neʼe ina ui fenei: “Neʼe mole he temi neʼe nā ui mai ai ke au liʼaki te fai kalate, neʼe nā haga akoʼi mai ia te moʼoni ʼae ʼe tuʼu ʼi te Tohi-Tapu.”
11 ʼI te tuputupu ʼo te mahino ʼa Michael kia Sehova, neʼe toe malohi ai mo tona ʼofa kia te ia. Neʼe malave ki ai ia te ʼofa mamahi ʼa Sehova ki Tana kau atolasio. ʼAki te temi, neʼe mahino ʼe tonu ke ina toʼo he tonu maʼuhiga. ʼE ina fakamatala fenei: “Neʼe au iloʼi neʼe faigataʼa kia au taku liʼaki te fai kalate. Kae neʼe au iloʼi ʼe fiafia anai ia Sehova pea neʼe au tui papau ʼe maʼuhiga taku tauhi kia te ia ʼi te ʼu sakilifisio ʼae neʼe au fai.” Neʼe iloʼi e Michael ia te maʼuhiga ʼo te moʼoni ʼae neʼe ina maʼu pea ʼe ko te tupuʼaga la ʼaia ʼo tana fai he ʼu toe fetogi ʼi tona maʼuli.—Sakp. 1:25.
12-13. Neʼe inaina feafeaʼi e te moʼoni ia te maʼuli ʼo Mayli?
12 Moʼo fakamahino ia te maʼuhiga ʼo te moʼoni, ʼe toe fakatatau ʼi te Tohi-Tapu ia te faʼahi ʼaia ki he malama taki ʼe mu ʼi te fakapoʼuli. (Pes. 119:105; Efe. 5:8) Neʼe fakatokagaʼi e Mayli, ʼae neʼe lahilahi ake ʼi Azerbaïdjan, ia te inaina ʼo tona maʼuli e te Folafola ʼa te ʼAtua. Neʼe kau ia tana tamai ʼi te lotu Mahometa pea neʼe Sutea tana faʼe. ʼE ina fakamatala fenei: “Logo la neʼe mole au lotolotolua ʼe maʼuli moʼoni te ʼAtua, kae neʼe au fia mahino pe ki ʼihi aluʼaga. Neʼe au fai ia te fehuʼi ʼaeni: ‘He koʼe neʼe fakatupu e te ʼAtua ia te hahaʼi pea kotea te ʼuhiga ʼo te mamahi ʼo ʼihi ʼi tonatou maʼuli katoa pea toe fakamamahiʼi natou ʼo heʼe gata ʼi te ʼifeli?’ Tokolahi ʼe natou lau ko meʼa fuli ʼe hoko kia tatou ʼe ko te finegalo ʼo te ʼAtua, koia neʼe au fai ai ia te fehuʼi ʼaeni: ‘ ʼE puleʼi koa e te ʼAtua ia te hahaʼi pea mo fiafia ʼi tana sio ki tanatou maʼuli mamahi?’ ”
13 Lolotoga he ’u ta’u, neʼe kumi e Mayli ia te ʼu tali ki ʼana fehuʼi. Neʼe ina tali leva ke fai tana ako Tohi-Tapu pea neʼe liliu leva ko te Fakamoʼoni ʼa Sehova. ʼE ina fakamatala fenei: “Ko te tasilo ʼo te Tohi-Tapu neʼe ina fetogi taku faʼahiga sio ki te maʼuli. Ko te totonu ʼo te ʼu fakamahino ʼae neʼe au maʼu, neʼe au maʼu ai te tokalelei ʼo te loto.” Ohage ko Mayli, ʼe tou fakavikiviki fuli kia Sehova, ‘ia Ia ʼae neʼe ina pauʼi tatou mai te fakapoʼuli ki tona malama taulekaleka.ʼ—1 Pet. 2:9.
14. ʼE tou lava fakamalohiʼi feafeaʼi totatou ʼofa ki te moʼoni? (Vakaʼi mo te ʼa takai “ ʼIhi Faʼifaʼitaki.”)
14 Koʼena he ʼu faʼifaʼitaki ʼe ha lelei ai te maʼuhiga ʼo te moʼoni. ʼE lagi ke manatu ki ʼihi atu faʼifaʼitaki. He koʼe ʼe mole ke fakatafito ki ai tau ako pea mo ke kumi ʼihi atu tupuʼaga ʼe maʼuhiga ai te moʼoni? Kapau ʼe malohi totatou ʼofa ki te moʼoni, ʼe toe lahi age anai te ʼu fealagia ke tou fakaha ai totatou ʼofa kia te ia.
ʼE TOU FAKAHA FEAFEAʼI ʼE TOU ʼOFA ʼI TE MOʼONI?
15. ʼE tou fakaha feafeaʼi anai ʼe tou ʼofa ki te moʼoni?
15 ʼE tou lava fakaha ʼe tou ʼofa ki te moʼoni ʼaki tatatou ako tuʼumaʼu te Tohi-Tapu pea mo te ʼu tohi Fakatohi-tapu. Koia, pe ʼe kei tou foʼofoʼou ʼi te moʼoni peʼe kua tou fualoa, ʼe ʼi ai pe te ʼu faʼahi ʼe tonu ke tou ako. ʼE ui fenei ʼi te ʼuluaki Tule Leʼo neʼe ta: “ ʼE lahi ʼaupito te ʼu loi ʼe fakamafola ʼi te malama ʼaeni ʼo faigataʼa ai te iloʼi ʼo te moʼoni. Ke feala ke tou maʼu, ʼe tonu ke tou mata ʼalaʼala. . . . ʼE tonu ke tou faiga malohi ke tou maʼu. ʼAua naʼa kotou fakafeʼauga pe ki he matalaʼi ʼakau ʼe tahi ’o te moʼoni. . . . Kotou toli, ʼo kotou kumi ke lahi.” Ko te ako, ʼe ʼaoga ki ai he ʼu faiga, pea ʼe fua anai te ʼu faiga ʼaia.
16. Ka tou lau ia Taʼaga Lea 2:4-6, ko te faʼahiga ako fea ʼe ke leleiʼia?
16 ʼE mole tou leleiʼia fuli ia te lautohi pea mo te ako. Kae ʼe kole mai e Sehova ke tou ‘haga kumi’ mo ‘kumi tuʼumaʼu’ ke tou mahino lelei age ki te moʼoni. (Lau ia Taʼaga Lea 2:4-6.) Kapau ʼe tou faigaʼi te faʼahi ʼaia, ʼe lahi anai te ʼu tapuakina ʼe tou maʼu mai ai. ʼI tana lolotoga lau te Tohi-Tapu, ʼe tuʼu ia Corey ʼi te ʼu vaega fuli. ʼE ina ui fenei: “ ʼE au lau te ʼu nota fuli, ʼe au toʼo te ʼu vaega fuli ʼe ʼi ai tona pikipikiga mo te vaega ʼaia pea ʼe au fai taku ʼu fekumi. . . . ʼI taku fai te faʼahi ʼaia, ʼe lahi te ʼu fua lelei ʼe au maʼu ʼi taku lautohi.” Pe ʼe tou fakaʼaogaʼi te faʼahiga fai ʼaia peʼe ko he tahi age, ʼe tou fakaha ai ʼe maʼuhiga kia tatou ia te moʼoni ʼaki tatatou toʼo he temi ke tou akoʼi fakalelei ai te Tohi-Tapu.—Pes. 1:1-3.
17. Ka tou lau ia Sakopo 1:25, kotea te fakaʼuhiga ʼo te mulimuli ki te ala ʼo te moʼoni?
17 ʼE tou iloʼi fuli ʼe mole feʼauga pe te akoʼi ʼo te ʼu moʼoni Fakatohi-tapu. ʼE tonu ke tou toe mulimuli ki te ala ʼo te moʼoni, ko tona fakaʼuhiga ke tou maʼuliʼi ia te ʼu meʼa ʼae ʼe tou ako. ʼI tatatou fai te faʼahi ʼaia, ʼe tou maʼu ai ʼi te moʼoni he ʼu tapuakina pea ʼe tou fiafia moʼoni anai. (Lau ia Sakopo 1:25.) ʼE tou lava iloʼi feafeaʼi ʼe tou mulimuli ki te ala ʼo te moʼoni? Neʼe ui e he tehina, ke tou vakavakaʼi ʼi totatou maʼuli ia te ʼu aluʼaga ʼe tou maʼuliʼi ai te ʼu meʼa ʼe tou ako pea mo te ʼu aluʼaga leva ʼe tonu ke tou fetogi ai. ʼE alu tahi mo te fakatotonu ʼa te apositolo ko Paulo: “Tatau aipe pe neʼe tou tuputupu, kaʼe ʼe tonu ke tou haga haʼele ohage pe ko te mahani.”—Flp. 3:16.
18. He koʼe ʼe tou fia ‘haga mulimuli ki te ala ʼo te moʼoni’?
18 Ko tatatou faiga ʼae ke tou ‘haga mulimuli ki te ala ʼo te moʼoni’ ’e tou ma’u ai he ’u tu’uga tapuakina. ’E mole gata pe ki te lelei ’o totatou maʼuli, kae ʼe tou fakafiafiaʼi ia Sehova pea mo ʼotatou tehina mo tuagaʼane. (Taag. 27:11; 3 Soa. 4) ʼE ko te ʼu tupuʼaga lelei ʼaia ke tou ʼofa ki te moʼoni pea mo tou mulimuli ki te ala ʼo te moʼoni.
KATIKO 144 Haga Sio Ki Te Totogi
^ ʼE tou fakaʼuhiga tuʼumaʼu tatatou tui pea mo totatou faʼahiga maʼuli ki te kupu ʼae ko “te moʼoni.” Pe ʼe heʼeki fualoa tatatou papitema peʼe kua tou iloʼi ia Sehova talu mai tatatou kei veliveli, kae ʼe lelei ke tou feuiʼaki pe koʼe ʼe tou ʼofa ki te moʼoni. Koia, ʼe ina fakamalohiʼi ai tatatou fakatotonu ʼae ke tou maʼu ia te ʼofa ʼo Sehova.