1. Ka tou lau ia 1 Tesalonika 5:11, kotea te gaue ʼae ʼe tou kau fuli ki ai?

 NEʼE kua kau koa tau kokelekasio ki te laga peʼe ki te toe fakafoʼou ʼo he Fale Fono? Kapau koia, ʼe lagi ke manatuʼi tau ʼuluaki fono ʼi te Fale Fono foʼou ʼaia. Neʼe ke lotofakafetaʼi lahi kia Sehova. Neʼe lagi ke tagi ʼi te lahi ʼo tou fiafia ʼo faigataʼa ai tau hiva te ʼuluaki katiko. Ko ʼotatou Fale Fono ʼae neʼe laga ʼe ko he fakavikiviki ʼaia kia Sehova. Kae ʼe feala ke tou toe fakavikiviki kia te ia moka tou fai he tahi gaue. Ko te gaue ʼaia ʼe ko te fakalotomalohiʼi ʼo te hahaʼi ʼae ʼe ʼomai ki ʼotatou Fale Fono. Neʼe ko te manatu ʼaia neʼe maʼu e te apositolo ko Paulo ʼi tana tohi te ʼu palalau ʼae ia 1 Tesalonika 5:11 (lau), ia te vaega tafito ʼo te alatike. Koia, ko te kupu ʼae neʼe fakaliliu ʼaki te kupu ‘fakalotomalohi’ ko tona fakaʼuhiga laga ʼo he mea.

2. Kotea ʼae ka tou talanoa ki ai ʼi te alatike ʼaeni?

² ʼE tuku mai e te apositolo ko Paulo he faʼifaʼitaki lelei he neʼe ina iloʼi pe ʼe fakalotomalohiʼi feafeaʼi ʼona tehina mo tuagaʼane. Neʼe lotomahino kia natou. ʼI te alatike ʼaeni, ʼe tou vakaʼi anai pe neʼe tokoni feafeaʼi ki ʼona tehina mo tuagaʼane (1) ke natou katakiʼi ʼonatou ʼahiʼahi, (2) ke natou fetokaleleiʼaki ia natou, pea (3) ke natou fakamalohiʼi tanatou tui kia Sehova. Tou vakaʼi pe ʼe feafeaʼi hatatou faʼifaʼitakiʼi ia ia pea mo fakalotomalohiʼi ʼotatou tehina mo tuagaʼane ia ʼaho nei.​—1 Ko. 11:1.

3. Kotea te manatu fakapotopoto neʼe maʼu e Paulo?

³ Neʼe ʼofa mamahi ia Paulo ʼi ʼona tehina. Neʼe toe tau pe la mo ia mo ni ʼahiʼahi. Koia, neʼe feala ai ke manavaʼofa mo lotomahino ki ʼona tehina mo tuagaʼane moka natou tau mo ni ʼahiʼahi. ʼI te tahi ʼaho, neʼe mole kei ʼi ai hana foʼi falā pea neʼe  tonu ke ina kumi hana gaue ke ina maʼu te ʼu meʼa ʼae ʼe ʼaoga kia ia pea mo ʼona tehina mo tuagaʼane. (Gaue 20:34) Ko te gaue ʼae neʼe ina fai neʼe ko te faʼu fale la. ʼI tana tau ki Kolonito, neʼe gaue muʼa mo Akila pea mo Pilisila, ʼae neʼe nā toe fai te gaue ʼaia ko te faʼu fale la. Kae neʼe faifakamafola ki te kau Sutea mo te kau Keleka “ ʼi te sapato fuli.” Pea ʼi te tau mai leva ʼa Silasi mo Timoteo, “neʼe tokaga tafito leva ia Paulo ʼo fakamafola te folafola.” (Gaue 18:2-5) Neʼe manatuʼi tuʼumaʼu pe e Paulo ko te faʼahi tafito ʼae ʼe maʼuhiga kia ia ʼe ko tana tauhi kia Sehova. Neʼe maʼu e Paulo he sio fakapotopoto ki te gaue fakamalama pea mo te ʼu gaue fakalaumalie, koia neʼe tuha pe mo ia ke ina fakalotomalohiʼi ʼona tehina mo tuagaʼane. Neʼe tau te ʼu tehina mo tuagaʼane ʼaia mo ni fihifihia pea neʼe tonu ke natou taupau ʼonatou kiʼi famili ʼi te faʼahi fakasino. Kae neʼe fakamanatuʼi age e Paulo ke ʼaua tanatou meʼa noaʼi “te ʼu meʼa ʼae ʼe maʼuhiga ʼaupito,” ia te ʼu faʼahi fuli ʼo te tauhi kia Sehova.​—Flp. 1:10.

4. Neʼe tokoni feafeaʼi ia Paulo mo Timoteo ki te ʼu tehina mo tuagaʼane ke natou tauʼi te fakataga?

⁴ Hili pe te akoako ʼo te kokelekasio ʼo Tesalonika, neʼe natou tau leva mo he toe fakafeagai lahi. ʼI te tahi ʼaho, neʼe kumi leva e he hahaʼi kaugamalie mo agamalohi ia Paulo mo Silasi. Kae neʼe mole natou maʼu, koia neʼe natou toho ai “ ʼihi tehina kia muʼa ʼo te ʼu pule ʼo te kolo,” ʼo natou kalaga fenei: “Ko te ʼu tagata . . . ʼaeni ʼe natou fakafeagai ki te ʼu fakatotonu ʼa Sesale.” (Gaue 17:6, 7) ʼE mahino ia, neʼe matataku ia te ʼu tehina mo tuagaʼane ʼaia ʼi tanatou iloʼi ʼae neʼe ko te ʼu tagata pe ʼo te kolo ʼae neʼe fakafeagai kia natou. Neʼe feala pe ke mole kei natou faʼafai ʼi te tauhi kia Sehova. Kae neʼe mole tuku e Paulo ke hoko te faʼahi ʼaia. Logo la neʼe nā mavae leva o Silasi ʼi te kolo, kae neʼe nā tokaga pe ke mole liʼaki te kiʼi kokelekasio foʼou ʼaia. Neʼe fakamanatuʼi age e Paulo ki te kau Tesalonika: ‘ ʼE matou fekauʼi atu ia Timoteo, tomatou tehina ke ina fakalotomalohiʼi pea mo fakafimalieʼi koutou ʼo ʼuhiga mo takotou tui, pea ke ʼaua naʼa vaivai he tahi ʼuhi ko te ʼu mamahi ʼaia.’ (1 Tes. 3:2, 3) ʼE mahino ia, neʼe kua iloʼi e Timoteo pe kotea ia te fakataga he neʼe hoko kia ia te faʼahi ʼaia ʼi te kolo ʼae neʼe tupu ai, ʼi Lisitia. Neʼe sio ki te fakalotomalohiʼi e Paulo te ʼu tehina ʼo te kolo ʼaia pea mo te tokoni ʼa Sehova. Koia neʼe feala ai hana ui ki ʼona tehina mo tuagaʼane ʼaia ke ʼaua tanatou tuʼania he ʼe natou toe lava tauʼi anai ia te fakataga.​—Gaue 14:8, 19-22; Hep. 12:2.

5. Neʼe tokoni feafeaʼi he tagata ʼafeā ki te tehina ko Bryant?

⁵ Kotea te tahi aluʼaga neʼe fakalotomalohiʼi ai e Paulo ʼona tehina mo tuagaʼane? ʼI te toe liliu ʼa Paulo mo Palenapa ki Lisitia, mo Ikoniome pea mo Atiokia, neʼe nā “fakanofo mo he ʼu tagata ʼafeā ʼi te ʼu kokelekasio takitahi.” (Gaue 14:21-23) ʼE mahino ia, neʼe liliu te ʼu tagata ʼafeā ʼaia ko he fakalotomalohi ki te ʼu kokelekasio, ohage pe ko te kau tagata ʼafeā ʼo te temi nei. Tou vakaʼi te ʼu talamanatu neʼe fai e te tehina ko Bryant. ʼE ina ui fenei: “ ʼI toku taʼu 15, neʼe mavae ai taku tamai ʼi tomatou ʼapi pea neʼe fakamavae taku faʼe ʼi te moʼoni. Neʼe au logoʼi hoku liʼakina pea mo lotovaivai.” Kotea ʼae neʼe tokoni kia Bryant ʼi te temi faigataʼa ʼaia? ʼE ina ui fenei: “Neʼe haʼu te tagata ʼafeā ko Tony ʼo faipalalau mo au ʼi te ʼu fono pea mo ʼihi atu lakaga. Neʼe ina fakamatala mai te ʼu ʼahiʼahi neʼe tau mo ʼihi kae neʼe natou fiafia pe. Neʼe ina vaevae mo au ia te vaega ʼo Pesalemo 27:10. Pea neʼe tau palalau mai kia Esekiasi, ʼae neʼe tauhi agatonu kia Sehova logo la neʼe mole tuku e tana tamai he faʼifaʼitaki lelei.” Neʼe malave feafeaʼi kia Bryant te ʼu tokoni ʼaia? ʼE ui fenei e Bryant: “ ʼAki te ʼu fakalotomalohi ʼaia ʼa Tony, neʼe au gaue temi katoa leva maʼa Sehova ʼo au logoʼi ai he toe fiafia lahi.” Koia, ʼu tagata  ʼafeā, kotou tokaga ʼo tokoni kia natou ʼae ʼe hage ko Bryant. ʼE lagi ʼaoga kia natou ʼaia he ʼu “palalau lelei” mo fakalotomalohi.​—Taag. 12:25.

6. Neʼe fakaʼaogaʼi feafeaʼi e Paulo he ʼu hisitolia moʼo fakalotomalohiʼi ʼona tehina mo tuagaʼane?

⁶ Neʼe fakamanatuʼi e Paulo ki ʼona tehina mo tuagaʼane neʼe ʼi ai he ‘kau fakamoʼoni ohage ko he ʼao lahi’ neʼe natou katakiʼi he ʼu ʼahiʼahi he neʼe lahi te malohi ʼae neʼe foaki age e Sehova. (Hep. 12:1) Neʼe fakamatala e Paulo ia te lava tauʼi e natou ʼo te temi muʼa ʼonatou ʼahiʼahi fuli. ʼI tana fai te faʼahi ʼaia, neʼe mahino ai ʼe feala ke lotomalohi ai ʼona tehina mo tuagaʼane pea ke tokoni kia natou ke natou haga tokakaga pe ki “te kolo ʼo te ʼAtua maʼuli.” (Hep. 12:22) Pea ʼe toe feia pe ia ʼaho nei. ʼE mahino ia, neʼe tou lotomalohi ʼi tatatou lau te ʼu fakamatala ʼo ʼuhiga mo te faʼahiga tokoni ʼa Sehova kia Seteone, mo Palake, mo Tavite, mo Samuele pea mo ʼihi atu. (Hep. 11:32-35) Kae ʼe feafeaʼi ki te ʼu faʼifaʼitaki ʼo te ʼu kaugana agatonu ʼo te temi nei? ʼE tau maʼu e te ʼu pilo lalahi he ʼu tohi mai ni ʼu tehina mo tuagaʼane neʼe fakamalohiʼi tanatou tui ʼi tanatou ʼosi lau he hisitolia ʼo he kaugana agatonu ʼa Sehova ʼo te temi nei.

7. Kotea te ako ʼe kotou taʼofi mai te tokoni ʼa Paulo ʼae ia Loma 14:19-21?

⁷ ʼE tou toe fakalotomalohiʼi ʼotatou tehina mo tuagaʼane moka tou fai ia mea fuli ke maʼu te tokalelei ʼi te kokelekasio. ʼE mole tou tuku ke fakamavetevete tatou ʼuhi ko te kehekehe ʼo ʼatatou faʼahiga manatu ki he aluʼaga. Pea ʼaua naʼa tou fefeka fau moka ʼe mole maumauʼi he pelesepeto Fakatohi-tapu. Tou toʼo he faʼifaʼitaki. ʼI te kokelekasio ʼo Loma, neʼe kau ai te ʼu tehina mo tuagaʼane Sutea pea mo ʼihi neʼe mole ko he kau Sutea. Neʼe mole kei maʼua leva ke fakalogo ki te Lao ʼa Moisese. Koia neʼe mole kei ʼaoga leva ke fakalogo te ʼu kaugana ʼa Sehova ki te ʼu lao ʼae ʼo ʼuhiga mo te fakaʼogaʼi ʼo ʼihi meʼa kai. (Mko. 7:19) Pea talu mai ai, neʼe kai faʼifaʼitaliha leva e ʼihi tehina mo tuagaʼane Sutea ia faʼahiga meʼa kai kehekehe. Kae neʼe manatu ʼihi tehina mo tuagaʼane Sutea neʼe mole lelei te kai ʼo te ʼu meʼa kai ʼaia. Neʼe mavetevete ai te kokelekasio ʼuhi ko te fihifihi ʼaia. Neʼe fakaha ai e Paulo ia te maʼuhiga ʼae ke taupau maʼu ia te tokalelei pea neʼe ina ui fenei: “ ʼE lelei ke mole ke kai he kanoʼi manu peʼe ke inu he moʼi vino peʼe ke fai he meʼa ʼe feala ke tukia ai tou tehina.” (Lau ia Loma 14:19-21.) Neʼe tokoni ai ia Paulo ki ʼona tehina mo tuagaʼane ke natou mahino ʼe fakatupu tuʼutamaki ia te taʼi ʼu fihi ʼaia ki te hahaʼi pea mo te kokelekasio katoa. Neʼe toe lotolelei ke ina fetogi ia tana aga ke mole tukia ai ʼihi. (1 Ko. 9:19-22) Koia, ʼe feala ke tou fakalotomalohiʼi ʼihi pea mo taupau te tokalelei mo kapau ʼe mole tou fihi ʼuhi pe ko he ʼu meʼa ʼe tou leleiʼia.

8. Kotea ʼae neʼe fai e Paulo ke taupau maʼu te tokalelei ʼi te kokelekasio?

⁸ Neʼe tuku mai e Paulo he faʼifaʼitaki lelei ʼaki tana taupau te tokalelei mo natou ʼae neʼe mole manatu tahi ki he ʼu aluʼaga maʼuhiga. Ohage la, neʼe ui e ʼihi tehina ʼo te kokelekasio ʼo te ʼuluaki sekulo neʼe tonu kia natou ʼae neʼe mole Sutea kae kua liliu ko ni tisipulo ʼa Sesu ke natou silikosisio. Neʼe lagi natou fai te faʼahi ʼaia ke mole valokiʼi natou e te kau Sutea. (Kal. 6:12) Neʼe mole alu ai te manatu ʼa Paulo. Neʼe mole faiga ia ke mulimuli ki tana faʼahiga manatu. Kae ʼaki he agavaivai, neʼe kole tokoni ki te kau apositolo pea mo te kau tagata ʼafeā ʼo Selusalemi. (Gaue 15:1, 2) ʼI te fakahoko e Paulo ia te faʼahi ʼaia, neʼe tokoni ai ke maʼu tuʼumaʼu pe te fiafia mo te tokalelei ʼi te kokelekasio.​—Gaue 15:30, 31.

9. ʼE feafeaʼi hatatou faʼifaʼitakiʼi ia Paulo?

⁹ Kapau ʼe hoko he fihi, ʼe tou faiga anai ke  tou kumi te tokalelei. ʼO feafeaʼi? ʼAki hatatou kole tokoni kia natou ʼae neʼe fakanofo e Sehova ke tokakaga ki te kokelekasio. ʼE tou maʼu tuʼumaʼu he ʼu tokoni ʼe fakatafito ki te Tohi-Tapu ʼi ʼatatou tohi peʼe ʼi te ʼu fakatotonu ʼae ʼe foaki mai e te kautahi. Koia, kapau ʼe tou fakalogo ki te ʼu tokoni ʼaia kae mole ki ʼatatou manatu fakatagata, ʼe tou lagolago anai ki te tokalelei ʼo te kokelekasio.

10. Kotea te tahi aluʼaga neʼe fai e Paulo ke maʼu te tokalelei ʼi te kokelekasio?

¹⁰ Neʼe toe faiga ia Paulo ke maʼu te tokalelei ʼi te kokelekasio ʼaki tana fakamaʼuhigaʼi ia te ʼu kalitate ʼo ʼona tehina mo tuagaʼane, kae mole ko ʼonatou vaivaiʼaga. Ohage la, ʼi te fakaʼosi e Paulo tana tohi ki te kau Loma, neʼe lahi te ʼu tehina mo tuagaʼane neʼe talanoa ki ai, ʼo ina toʼo ʼonatou higoa takitahi. Neʼe ina fai he ʼu palalau lelei ʼo ʼuhiga mo natou. ʼE feala ke tou faʼifaʼitakiʼi ia Paulo ʼo tou talanoa ki te ʼu kalitate ʼo ʼotatou tehina mo tuagaʼane. Ka tou fai feia, pea ʼe tou fakamalohiʼi ai ia te felogoi mo te feʼofaʼofani ʼa te kokelekasio.

11. Kotea ʼe feala ke tou fai ke maʼu te tokalelei moka hoko he ʼu fihi?

¹¹ ʼI ʼihi temi, ʼe feala ki he ʼu tehina mo tuagaʼane kua fakapotopoto ke mole natou manatu tahi peʼe ke natou fihi. Neʼe ko te aluʼaga ʼaia neʼe hoko kia Paulo mo tona kaumeʼa ko Palenapa. Neʼe mole nā loto tahi ke nā ʼave ia Maleko ʼi te folau misionea ka nā fai. Neʼe hoko ai he “toe ita lahi ia naua” ʼo nā fakatotonu ai ke mole nā toe faifolau fakatahi. (Gaue 15:37-39) Kae neʼe faiga leva ia Paulo, mo Palenapa pea mo Maleko ke natou toe fakatokatoka. ʼI tanatou fai te faʼahi ʼaia, neʼe maʼuhiga kia natou ia te tokalelei mo te logo tahi ʼi te kokelekasio. Ki muli age, neʼe palalau lelei leva ia Paulo ʼo ʼuhiga mo Palenapa pea mo Maleko. (1 Ko. 9:6; Kol. 4:10) Koia, kapau ʼe ʼi ai hotatou fihifihia mo ʼihi ʼo te kokelekasio, pea ʼe tonu ke tou fakatokatoka, ʼo tou haga tokagaʼi tafito ʼonatou kalitate. Kapau ʼe tou fai feia, pea ʼe tou taupau anai te tokalelei mo te logo tahi.​—Efe. 4:3.

12. Kotea ʼihi fihifihia ʼe tau mo ʼotatou tehina mo tuagaʼane?

¹² ʼE tou toe fakalotomalohiʼi ʼotatou tehina mo tuagaʼane moka tou tokoni kia natou ke malohi tuʼumaʼu tanatou tui kia Sehova. Ko ʼihi ʼe fakalainoaʼi natou e tonatou ʼu famili ʼae ʼe mole tauhi kia Sehova peʼe ko ʼonatou kauga gaue peʼe kauga ako. Ko ʼihi ʼe natou tau mo ni mahaki faigataʼa peʼe ʼe natou faiga ke natou tauʼi he ʼu manatu fakalotovaivai. Pea ko ʼihi leva kua fualoa tanatou papitema pea mo ʼatali ke pulihi te malama agakovi ʼaeni. ʼE feala ki te ʼu aluʼaga ʼaia ke ʼahiʼahiʼi ai tatatou tui ia ʼaho nei. Neʼe ko te ʼu fihifihia pe ʼaia neʼe toe tau mo natou ʼo te kokelekasio ʼo te ʼuluaki sekulo. Kotea ʼae neʼe fai e Paulo moʼonatou fakalotomalohiʼi?

13. Neʼe tokoni feafeaʼi ia Paulo kia natou ʼae neʼe fakalainoaʼi ʼuhi ko tanatou tui?

¹³ Neʼe fakaʼaogaʼi e Paulo ia te Tohi-Tapu moʼo fakamalohiʼi te tui ʼo ʼona tehina mo tuagaʼane. Ohage la, neʼe ui e te ʼu famili ʼae ʼe mole tauhi kia Sehova ʼo te ʼu tehina mo tuagaʼane Sutea neʼe maʼoluga age te lotu Fakasutea ʼi te lotu Fakakilisitiano. Koia neʼe lagi mole iloʼi ai e te ʼu tehina mo tuagaʼane Sutea ʼaia pe kotea ka natou tali age. ʼE mahino ia, neʼe fakalotomalohi ki te ʼu tehina mo tuagaʼane ʼaia ia te tohi ʼa Paulo ki te kau Hepeleo. (Hep. 1:5, 6; 2:2, 3; 9:24, 25) Neʼe tokoni kia natou ia te ʼu manatu fakalotomalohi ʼaia ʼa Paulo ke natou iloʼi pe kotea ka natou ui age ki ʼonatou famili ʼe mole tauhi kia Sehova. Ia ʼaho nei, ʼe tou tokoni ki ʼotatou tehina mo tuagaʼane ʼae ʼe fakalainoaʼi ke natou fakaʼaogaʼi ʼatatou tohi Fakatohi-tapu moʼo fakamahino te ʼu tupuʼaga ʼo tanatou tui. Pea kapau ʼe vaʼi te  kau tupulaga ʼuhi ko tanatou tui ʼae neʼe fakatupu e he tahi ia meʼa maʼuli fuli, ʼe tou tokoni anai kia natou ke natou maʼu he ʼu manatu ʼi te ʼu kaupepa ʼaeni La vie a-t-elle été créée ? mo Cinq questions à se poser sur l’origine de la vie.

14. Logo la neʼe maʼumaʼua ia Paulo ʼi tana faifakamafola pea mo faiakonaki, kae kotea ʼae neʼe ina fai?

¹⁴ Neʼe fakalotomalohiʼi e Paulo ʼona tehina mo tuagaʼane ke natou fakaha tonatou ʼofa ʼaki he ʼu “gaue lelei.” (Hep. 10:24) Neʼe tokoni ki ʼona tehina mo tuagaʼane ʼaki ʼana palalau ʼo feia pe mo ʼana gaue. Ohage la, neʼe tau ʼona tehina mo tuagaʼane Sutea mo he toe hoge lahi, pea neʼe tokoni ia Paulo kia natou ʼo ina foaki te ʼu meʼa ʼae ʼe ʼaoga kia natou. (Gaue 11:27-30) Koia, logo la neʼe maʼumaʼua ia Paulo ʼi tana faifakamafola pea mo faiakonaki, kae neʼe faiga tuʼumaʼu pe ke tokoni kia natou ʼi te faʼahi fakasino. (Kal. 2:10) ʼI tana fai ʼaia, neʼe tokoni ki ʼona tehina mo tuagaʼane ke natou falala ko Sehova ʼe tokaga tuʼumaʼu pe anai kia natou. Ia ʼaho nei, ka tou fakaʼaogaʼi totatou temi, mo totatou malohi pea mo ʼotatou fealagia ki te ʼu gaue haofaki maʼuli, ʼe tou toe fakamalohiʼi ai te tui ʼo ʼotatou tehina mo tuagaʼane. Pea ʼe feala ke tou toe fai te faʼahi ʼaia ʼaki te ʼu meʼa ʼofa ʼae ʼe tou foaki tuʼumaʼu ki te gaue fakamalamanei. Koia, ka tou fai te ʼu aluʼaga ʼaia, ʼe tou tokoni ki ʼotatou tehina mo tuagaʼane ke natou tui ʼe mole liʼakina anai natou e Sehova.

15-16. ʼE tonu ke tou tokaga feafeaʼi kia natou ʼae kua vaivai tanatou tui?

¹⁵ Neʼe mole liʼaki e Paulo ia natou ʼae neʼe kua vaivai tanatou tui. Neʼe manavaʼofa kia natou pea mo palalau lelei mo fakalotomalohi kia natou. (Hep. 6:9; 10:39) Ohage la, ʼi tana tohi ki te kau Hepeleo, neʼe ina tau fakaʼaogaʼi te ʼu kupu “tatatou” peʼe “tou.” Neʼe ina fakaha ai neʼe toe ʼaoga mo ia ke ina maʼuliʼi te ʼu tokoni ʼae neʼe ina foaki. (Hep.  2:1, 3) Ohage ko Paulo, ʼe mole tou liʼaki ia natou ʼae kua vaivai tanatou tui. Kae ʼe tou fakalotomalohiʼi natou ʼaki hatatou tokagaʼi moʼoni natou. Ka tou fai feia, ʼe tou fakaha ai totatou ʼofa kia natou. ʼE feala pe ki tatatou faʼahiga palalau ke toe fakalotomalohiʼi ai ʼihi.

¹⁶ Neʼe ui age e Paulo ki ʼona tehina mo tuagaʼane ʼe iloʼi e Sehova ʼanatou gaue lelei. (Hep. 10:32-34) ʼE feala ke tou fai feia ki he tehina kua vaivai tana tui. ʼE feala ke tou ui age ki ai ke ina fakamatala mai pe neʼe ina iloʼi feafeaʼi ia te moʼoni peʼe fakalotomalohiʼi ia ia ke ina manatuʼi te ʼu temi ʼae neʼe tokoni age ai ia Sehova. ʼE feala ke tou toʼo te faigamalie ʼaia ke tou ui age ki ai ʼe mole galoʼi e Sehova tona ʼofa ʼae neʼe ina fakaha ki tona huafa ʼi muʼa atu pea ʼe mole ina liʼaki anai ia ia ʼi he temi. (Hep. 6:10; 13:5, 6) Koia, ka tou faipalalau feia, pea ʼe tokoni anai ki te ʼu tehina mo tuagaʼane ʼaia ke hoko atu pe tanatou fia tauhi kia te Ia.

17. Kotea ia te ʼu fealagia ʼe feala ke tou gaueʼi?

¹⁷ ʼE hikihiki e he tagata gaue fale ʼona fealagia ʼaki te temi. Pea ʼe toe feia pe mo tatou, ʼe feala ke tou liliu ʼo faiva ʼaki tatatou fefakalotomalohiʼaki. ʼE feala ke tou tokoni ki ʼihi ke natou maʼu te malohi moʼo katakiʼi te ʼu ʼahiʼahi. ʼO feafeaʼi? ʼAki hatatou vaevae mo natou he ʼu faʼifaʼitaki ʼo natou neʼe natou katakiʼi te ʼu ʼahiʼahi ʼi te temi muʼa. ʼE feala ke tou taupau te tokalelei moka tou tokagaʼi ia te ʼu kalitate ʼo ʼihi, moka hoko he maveuveu peʼe ko he ʼu fihi. Pea ʼe tou haga fakamalohiʼi te tui ʼo ʼotatou tehina mo tuagaʼane ʼaki hatatou vaevae mo natou he ʼu moʼoni Fakatohi-tapu, mo tokoni kia natou pea mo lagolago kia natou ʼae kua vaivai ʼi te faʼahi fakalaumalie.

18. Kotea ʼae ʼe kotou fakatotonu ke kotou fai?

¹⁸ ʼE fiafia ia natou ʼae ʼe gaue ki te ʼu laga fale. Pea ʼe tou fiafia mo tatou moka tou tokoni ki te fakamalohiʼi ʼo te tui ʼo ʼotatou tehina mo tuagaʼane. ʼE tou iloʼi ka laga he ʼu fale, ʼe maumau leva ia ʼaki te temi. Kae ko te ʼu fua ia ʼo tatatou gaue ʼe heʼe gata ia. Koia, tou fakatotonu ke tou “haga fefakalotomalohiʼaki pea mo fetokoniʼaki.”​—1 Tes. 5:11.