ALATIKE AKO 23
ʼU Matuʼā, Kotou Tokoni Ki ʼAkotou Fanau Ke ʼOʼofa Ia Sehova
“ ʼE tonu ke ke ʼofa kia Sehova tou ʼAtua, ʼaki tou loto katoa, mo tou maʼuli katoa pea mo tou ʼatamai katoa.”—MAT. 22:37.
KATIKO 134 Ko Te Fanau ’e Ko He Tofi’a Mai Te ʼAtua
TE ʼU MANATU FAKANOUNOU *
1-2. He koʼe ʼe feala leva ke maʼuhiga age kia tatou ʼihi vaega Tohi-Tapu?
FAKAKAUKAUʼI age muʼa koe ia te ʼaho ʼae ʼe ʼohoana ai te tagata mo te fafine. ʼI tonā ʼaho ʼohoana, ʼe nā fakalogo lelei ki te akonaki ʼae ka fai kia naua ʼo ʼuhiga mo te nofo ʼohoana. ʼE mole mata foʼou kia naua te ʼu pelesepeto ʼae ʼe talanoa ki ai te akonaki. Kae ʼi te lakaga leva ʼaia, kua maʼuhiga age leva kia naua te ʼu pelesepeto ʼaia. Kotea tona tupuʼaga? He ʼe nā maʼuliʼi leva ʼi tonā ʼuhiga taumatuʼa.
2 ʼE toe feia pe moka liliu leva he taumatuʼa Kilisitiano ko he ʼu matuʼā. ʼE lagi neʼe kua tuʼa lahi tanā logo ʼi te ʼu akonaki ki te manatu ʼae ke akoʼi te ʼu fanau. Kae ʼi te temi leva ʼaia, kua toe maʼuhiga age leva kia naua te ʼu tokoni ʼe foaki ʼi te ʼu akonaki ʼaia. ʼE nā pusiaki leva tanā fanau. Pea ʼe ko he toe maʼua maʼuhiga ia. Koia, ka hoko ni fetogi ʼi totatou maʼuli, ʼe maʼuhiga age leva ʼihi vaega Tohi-Tapu kia tatou. Koia ʼae ʼe maʼuhiga ai ke lau e te ʼu kaugana ʼa Sehova ia te Tohi-Tapu. ʼE tonu ke natou metitasio ki ai “ ʼi te ʼaho fuli,” ohage pe ko tona ui age ki te ʼu hau ʼo Iselaele ke natou fai.—Tet. 17:19.
3. Kotea ka tou talanoa ki ai ʼi te alatike ʼaeni?
3 ʼU matuʼā, ka kotou akoʼi ia Sehova ki ʼakotou fanau, ʼe ko he toe pilivilesio maʼuhiga ia ʼe kotou maʼu. Kae ʼe mole kotou loto ke gata pe ki takotou akoʼi age te ʼu moʼoni ʼo totatou ʼAtua. ʼE kotou fia tokoni ki ʼakotou fanau ke natou ʼoʼofa ia Sehova. Kotea ʼe feala ke kotou fai? ʼI te alatike ʼaeni, ʼe tou talanoa anai kia pelesepeto ʼe fa ʼe tokoni atu anai ʼi tokotou ʼuhiga matuʼā. (2 Tim. 3:16) ʼE tou toe vakaʼi ai anai pe kotea te ʼu fua lelei neʼe maʼu e ʼihi matuʼā ʼi tanatou maʼuliʼi te ʼu tokoni ʼo te Tohi-Tapu.
HE ʼU PELESEPETO ʼE FA ʼE TOKONI ANAI KI TE ʼU MATUʼĀ
4. Ka tou lau ia Sakopo 1:5, kotea te pelesepeto ʼe tokoni anai ki te ʼu matuʼā ke natou akoʼi ʼanatou fanau ke natou ʼoʼofa kia Sehova?
4 1 Pelesepeto: Kotou kumi te ʼu tokoni ʼa Sehova. Kotou kole kia Sehova ke ina foaki atu te poto ke kotou tokoni ki ʼakotou fanau ke natou fakaha tonatou ʼofa kia te ia. (Lau ia Sakopo 1:5.) ʼE tuha pe ia mo ia ke ina foaki atu he ʼu tokoni. ʼE lahi tona ia ʼu tupuʼaga. Tou vakaʼi tupuʼaga ʼe lua. ʼUluaki, ʼe iloʼi lelei age e Sehova te gaue ʼaia ʼa te ʼu matuʼā. (Pes. 36:9) Pea lua, ʼe fua lelei tuʼumaʼu pe kia tatou ʼana tokoni.—Esa. 48:17.
5. (1) Kotea ʼe foaki e te kautahi ʼa Sehova moʼo tokoni ki te ʼu matuʼā? (2) Kotea ʼae neʼe kotou ako mai te faʼahiga pusiaki e te tehina mo tuagaʼane Amorim ʼanā fanau, ohage ko tona fakaha ʼi te ʼata viteo?
5 ʼE fakaʼaogaʼi e Sehova tana Folafola pea mo tana kautahi moʼo foaki mai he meʼa kai fakalaumalie. ʼE fakatafito te meʼa kai fakalaumalie ʼaia ki te Tohi-Tapu. Pea ʼe feala ke tokoni atu ki te pusiaki ʼo ʼakotou fanau ke ʼoʼofa kia Sehova. (Mat. 24:45) Ohage la, ʼe lahi te ʼu tokoni ʼaoga ʼe kotou maʼu ʼi te ʼu alatike ʼaeni “De lʼaide pour les familles” (He Tokoni Ki Te ʼu Famili). Neʼe kua fualoa tona ta ʼi te nusipepa ʼaeni ko te Réveillez-vous ! (Kotou ʼAʼala!) pea kua tou maʼu leva ʼi tatatou tuʼasila ʼi te neti. ʼE lahi te ʼu ʼata viteo ʼe tou maʼu ʼi te jw.org, ʼe ko he ʼu fakafehuʼi pea mo he ʼu ʼata. ʼE tokoni anai ki te ʼu matuʼā ke natou maʼuliʼi te ʼu tokoni ʼa Sehova moka natou pusiaki ʼanatou fanau. *—Taag. 2:4-6.
6. Kotea te manatu ʼa he ʼu matuʼā ki te ʼu tokoni ʼe foaki e te kautahi ʼa Sehova?
6 ʼE lahi te ʼu matuʼā ʼe natou lotofakafetaʼi ki te tokoni ʼae neʼe foaki e Sehova ʼaki tana kautahi. ʼE ui fenei e te tamai ʼaeni ko Joe: “ ʼE mole ko he gaue faigafua ia te pusiaki ʼo he ʼu fanau ʼe toko tolu ʼi te moʼoni. ʼE au faikole tuʼumaʼu mo toku ʼohoana ke tokoni mai ia Sehova. Pea ʼe ma tau tokagaʼi ʼe ha he alatike peʼe ko he ʼata viteo ʼi tona temi totonu. Pea ʼe tokoni mai ke ma katakiʼi he aluʼaga ʼe ma tau mo ia. Neʼe ma falala tuʼumaʼu ki te ʼu tokoni ʼa Sehova.” Neʼe tokagaʼi e Joe pea mo tona ʼohoana ʼe tokoni te ʼu alatike mo ʼata viteo ʼaia ki ʼanā fanau ke fakaovi kia Sehova.
7. Ka tou lau ia Loma 2:21, he koʼe ʼe maʼuhiga ke tuku e te ʼu matuʼā he faʼifaʼitaki lelei?
7 2 Pelesepeto: Kotou tuku he faʼifaʼitaki lelei. ʼE sioʼi tuʼumaʼu e te ʼu fanau ʼanatou matuʼā pea ʼe natou faʼifaʼitakiʼi ia natou. ʼE moʼoni, ʼe mole he ʼu matuʼā ʼe haohaoa. (Loma 3:23) Kae ʼe tonu ke fai e te ʼu matuʼā ia meʼa fuli ke natou tuku he faʼifaʼitaki lelei ki ʼanatou fanau. (Lau ia Loma 2:21.) ʼE ui fenei e he tamai ʼo ʼuhiga mo te ʼu fanau: “ ʼE natou hage ko ni moʼi vavae. Ka ʼai ki he moʼi vai pea ʼe ina homi fuli.” ʼE ina toe ui fenei: “ ʼE natou ui mai anai te temi ʼae ʼe mole tou fai ai te meʼa ʼae ʼe tou akoʼi age.” Koia, kapau ʼe tou loto ke ʼoʼofa ʼatatou fanau kia Sehova, ʼe tonu ke malohi mo iloga totatou ʼofa kia te ia.
8-9. Kotea neʼe kotou ako mai te ʼu tala manatu ʼa Adrew mo Emma?
8 ʼE lahi te ʼu aluʼaga ʼe feala ki te ʼu matuʼā ke natou akoʼi ki ʼanatou fanau ke ʼoʼofa kia Sehova. Koʼeni te aluʼaga ʼe ui e te tehina ko Andrew, ʼe taʼu 17: “Neʼe akoʼi tuʼumaʼu mai e ʼaku matuʼā ia te maʼuhiga ʼae ʼo te faikole. ʼI te afiafi fuli, ʼe faikole taku tamai mo au, logo la kua ʼosi au faikole. ʼE fakamanatuʼi tuʼumaʼu mai e ʼaku matuʼā kia au mo toku kiʼi tokolua: ‘ ʼE feala tau palalau kia Sehova ʼi he temi pe ʼe ke loto ki ai.’ ʼAki te ʼu palalau ʼaia neʼe maʼuhiga ʼaupito kia au te faikole. ʼI te temi nei, kua au faikole faʼifaʼitaliha pea mo logoʼi ko Sehova ʼe ʼofa ia au.” ʼU matuʼā, ʼaua naʼa kotou meʼa noaʼi tokotou ʼofa kia Sehova he ʼe malave ia ki ʼakotou fanau.
9 Tou toe talanoa ki te faʼifaʼitaki ʼo Emma. Neʼe liʼaki e tana tamai ia ia, mo tana faʼe pea mo tona kiʼi tehina. Neʼe lahi ʼona maʼua ki ʼihi pea ko tana faʼe ʼae neʼe ina huʼi. ʼE ui fenei e Emma: “Neʼe tau taku faʼe mo tona ʼu fihifihia fakapaʼaga. Kae neʼe talanoa tuʼumaʼu pe ki te faʼahiga tokaga ʼa Sehova ki ʼana kaugana pea mo tana foaki te ʼu meʼa ʼae ʼe ʼaoga kia natou. Neʼe au tokagaʼi ʼi tona faʼahiga maʼuli ʼe tui moʼoni ki te faʼahi ʼaia. Neʼe maʼuliʼi e taku faʼe te ʼu faʼahi fuli ʼae ʼe ina akoʼi mai kia au.” Kotea te ako maʼa tatou? ʼE feala ki te ʼu matuʼā ke natou tuku he faʼifaʼitaki lelei, maʼia ʼi te ʼu aluʼaga faigataʼa.—Kal. 6:9.
10. Ka tou lau ia Tetelonome 6:6, 7, kotea te ʼu faigamalie neʼe maʼu e te ʼu matuʼā Iselaele ke natou palalau ai mo ʼanatou fanau?
10 3 Pelesepeto: Kotou palalau tuʼumaʼu mo ʼakotou fanau. Neʼe ui e Sehova ki te kau Iselaele ke natou akoʼi tuʼumaʼu ʼanatou fanau ke natou iloʼi ia ia. (Lau ia Tetelonome 6:6, 7.) Neʼe lahi te ʼu faigamalie ke palalau ai te ʼu matuʼā ki ʼanatou fanau ʼi te ʼaho katoa pea mo akoʼi natou ke natou ʼoʼofa kia Sehova. Ohage la, neʼe feala ki he tama Iselaele ke lahi age tona temi ʼae ʼe tokoni ai ki tana tamai ʼi te gaueʼaga peʼe ko te ʼutu ʼo te taʼukai. Kae neʼe lahi age leva te temi ʼo tona kiʼi tokolua ke tokoni ai ki tana faʼe ʼi te faitui mo te fakahoko ʼo ʼihi atu ʼu gaue fakaloto fale. Ka gaue fakatahi te ʼu matuʼā mo te ʼu fanau, pea ʼe feala ke natou faipalalau ki he ʼu manatu maʼuhiga. Ohage la, ʼe feala tanatou faipalalau ki te kalitate ʼaeni ʼo Sehova ko te agalelei pea mo vakaʼi pe ʼe feafeaʼi tana tokoni ki te ʼu famili.
11. Ko te faigamalie fea ʼae ʼe feala ai ki te ʼu matuʼā ke natou palalau ai mo ʼanatou fanau?
11 ʼI te temi nei, ʼe mole kei tatau te maʼuli mo te temi muʼa. ʼE lahi te ʼu fenua, ʼe mole kei lahi te temi ʼe fakatahi ai te ʼu matuʼā mo te ʼu fanau ʼi te ʼaho katoa. ʼE olo te ʼu matuʼā ʼo gaue kae olo te ʼu fanau ia ʼo ako. Koia, ʼe tonu ki te ʼu matuʼā ke natou kumi he ʼu faigamalie ke natou palalau ai mo ʼanatou fanau. (Efe. 5:15, 16; Flp. 1:10) ʼE maʼu te faigamalie ʼaia ʼi te Ako Fakafamili. ʼE ui fenei e te tehina tupulaga ko Alexander: “ ʼE fai tuʼumaʼu e taku tamai he ʼu fakatuʼutuʼu ki te ako fakafamili. Pea ʼe ina fai ia meʼa fuli ke matou fakatahitahi ʼi te lakaga ʼaia. ʼI te ʼosi ʼo tamatou ako fakafamili, ko te meʼa pe ʼe matou fai ko te faipalalau.”
12. Kotea ʼe tonu ke manatuʼi e he pule famili moka fai te ako fakafamili?
12 Kapau ko koe ko he pule famili, kotea ʼe feala ke ke fai ke leleiʼia e ʼau fanau te ako fakafamili? He koʼe ʼe mole ke ako mo ʼau fanau ia te tohi foʼou ʼaeni Ke Ke Fiafia ʼo Heʼe Gata? Ka kotou ako te tohi ʼaia, ʼe ko he faigamalie lelei anai ke kotou faipalalau ai. ʼE ke loto ke fakaha e ʼau fanau ia te ʼu meʼa ʼe natou logoʼi mo hoha ki ai. ʼAua naʼa ke fakaʼaogaʼi te temi ʼae ʼe fai ai te ako fakamili moʼo natou fakatonutonuʼi peʼe munaʼi. Pea ʼaua naʼa ke ita moka ʼe fakaha e tau ʼu fanau ia tanatou mole manatu tahi mo te ʼu pelesepeto Fakatohi-tapu. Kae ke ke fakamalo ʼi tanatou fakaha fakahagatonu atu ia te ʼu meʼa ʼae ʼe natou logoʼi. Pea ke ke fakalotomalohiʼi natou ke natou palalau faʼifaʼitaliha. ʼE hoki feala ke ke tokoni ki ʼau fanau mo kapau ʼe ke iloʼi ʼanatou manatu mo te ʼu meʼa ʼae ʼe natou logoʼi.
13. Kotea te tahi ʼu faigamalie ʼe maʼu e te ʼu matuʼā moʼo tokoni ki ʼanatou fanau ke natou fakaovi kia Sehova?
13 ʼU matuʼā, kotou kumi he ʼu faigamalie ʼi te ʼaho katoa ke kotou tokoni ai ki ʼakotou fanau ke fakaovi kia Sehova. ʼE mole ʼaoga ke kotou atali ki te ʼaho ʼae ʼe fai ai ʼanatou ako moʼo akoʼi age ia totatou ʼAtua ʼofa. ʼE ui fenei e te faʼe ʼe higoa ko Lisa: “ ʼE ma fakaʼaogaʼi te ʼu meʼa ʼae neʼe fakatupu moʼo tokoni ki ʼamā fanau ke natou iloʼi ia Sehova. Ohage la, ka fai e tamatou kuli he meʼa ʼo kokolo ai ʼamā fanau, ʼe ma ui age ki ʼamā fanau ʼe ha ai ko Sehova ʼe ko te ʼAtua fiafia. Pea neʼe ina fakafealagia ke tou toe fiafia mo leleiʼia te ʼu meʼa fakakata.”
14. Ka tou lau ia Taʼaga Lea 13:20, he koʼe ʼe maʼuhiga ke tokoni te ʼu matuʼā ki ʼanatou fanau ke natou filifili leleiʼi ʼonatou kaumeʼa?
14 4 Pelesepeto: Kotou tokoni ki ʼakotou fanau ke natou filifili leleiʼi ʼonatou kaumeʼa. ʼE fakaha lelei mai ʼi te Folafola ʼa te Tohi-Tapu ko tatatou fakakaumeʼa ʼe ʼi ai anai ʼona fua lelei peʼe fua kovi kia tatou. (Lau ia Taʼaga Lea 13:20.) ʼU matuʼā, ʼe kotou iloʼi lelei koa te ʼu kaumeʼa ʼo takotou ʼu fanau? Kua kotou felaveʼi mo fakatahi koa mo natou? Kotea ʼe feala ke kotou fai moʼo tokoni ki ʼakotou fanau ke natou maʼu honatou ʼu kaumeʼa ia natou ʼae ʼe ʼoʼofa ia Sehova? (1 Ko. 15:33) ʼE feala hakotou tokoni kia natou ke natou toʼo he ʼu tonu fakapotopoto. ʼO feafeaʼi? ʼO kotou fakaafe ia natou ʼae ʼe natou maʼu he ʼu felogoi lelei mo Sehova ke kotou fai fakatahi he ʼu kiʼi gaue mo ʼakotou fanau.—Pes. 119:63.
15. Kotea ʼe feala ke fai e te ʼu matuʼā moʼo tokoni ki ʼanatou fanau ke natou filifili leleiʼi ʼonatou kaumeʼa?
15 Tou vakaʼi te faʼifaʼitaki ʼa te tamai ʼaeni ʼe higoa ko Tony. ʼE ina fakamahino te aluʼaga neʼe ina fai mo tona ʼohoana moʼo tokoni ki ʼanā fanau ke natou filifili leleiʼi ʼonatou kaumeʼa. ʼE ina ui fenei: “Lolotoga ni taʼu, neʼe ma fakaafe ki toma ʼapi ni tehina mo tuagaʼane kua vaivavai pea mai te ʼu fenua kehekehe. ʼE matou kakai fakatahi pea ʼe natou kau ki tamatou ako fakafamili. ʼE ko he faigamalie lelei ʼaia ke matou iloʼi ia natou ʼae ʼe ʼoʼofa mo tauhi fiafia kia Sehova. ʼE ma toe fiafia ʼi te fakaʼapi ʼo te ʼu tehina taupau fakasiliko, mo te kau misionea pea mo ʼihi atu tehina mo tuagaʼane. ʼE malave ʼaupito ki ʼamā fanau tanatou faʼifaʼitaki, mo tanatou faʼafai pea mo te ʼu sakilifisio ʼae neʼe natou fai. Pea neʼe tokoni ai ki ʼamā fanau ke fakaovi kia Sehova.” ʼU matuʼā, kotou fakatotonu ke kotou tokoni ki ʼakotou fanau ke natou maʼu honatou ʼu kaumeʼa ʼe lelei.
ʼAUA NAʼA KOTOU LOTOVAIVAI
16. Kotea ʼe tou fai moka ui mai e hatatou fanau ʼe mole fia tauhi kia Sehova?
16 ʼE feafeaʼi moka ʼe ui atu e he tahi ʼo ʼakotou fanau ʼe mole fia tauhi kia Sehova, logo te ʼu faiga fuli ʼe kotou fai? ʼAua naʼa kotou manatu neʼe mole kotou fakahoko lelei ʼokotou maʼua. Neʼe foaki mai e Sehova kia tatou fuli ia te loto faʼitaliha, ʼo kau mo ʼakotou fanau. ʼEi, neʼe ina foaki mai te fealagia ʼae ke tou filifili pe ʼe tou tauhi anai kia te ia peʼe kailoa. Kapau neʼe filifili e takotou fanau ke mavae mai ia Sehova, ʼaua naʼa kotou lotovaivai ʼo manatu ʼe mole toe liliu mai anai ʼi he ʼaho. Kotou manatuʼi ia te lea fakatata ʼo te foha ʼae neʼe puli. (Luka 15:11-19, 22-24) Neʼe lahi te ʼu aga ʼe kovi neʼe fai e te tama tupulaga ʼaia, kae ki muli age neʼe toe liliu mai. ʼE lagi ui anai e ʼihi “ ʼe lelei foki ia neʼe ko te lea fakatata ia. Kae ʼe feala koa ke toe liliu mai taku fanau kia Sehova?” ʼEi, ʼe feala pe ia. Pea ko te aluʼaga ʼaia neʼe hoko ki te tupulaga ʼe higoa ko Elie.
17. He koʼe ʼe fakalotomalohi kia koutou ia te faʼifaʼitaki ʼo Elie?
17 ʼE ui fenei e Elie ʼo ʼuhiga mo ʼana matuʼā: “Neʼe nā fai ia meʼa fuli ke nā akoʼi au ke au ʼofa ia Sehova mo tana Folafola, te Tohi-Tapu. Kae ʼi taku kua lahi leva, neʼe au kamata agatuʼu.” Neʼe kamata faifakafufu leva e Elie he ʼu aga ʼe kovi. Neʼe tokoni ʼana matuʼā ki ai ke nofo ovi kia Sehova kae neʼe mole fia fakalogo kia naua. ʼI tana mavae ʼi fale, neʼe ina fai leva he ʼu aga ʼe kovi. Logo la te faʼahi ʼaia, kae neʼe faipalalau mo hona kaumeʼa ki te Tohi-Tapu. ʼE ui fenei e Elie: “Ka au palalau tuʼumaʼu ki toku kaumeʼa ʼo ʼuhiga mo Sehova, pea ʼe toe lahi age taku manatuʼi ʼae ia Sehova. Neʼe tuputupu mamalie te pulapula ʼo te moʼoni ʼae neʼe faiga malohi e ʼaku matuʼā ke nā akoʼi mai.” ʼAki te temi, neʼe toe liliu ia Elie ki te moʼoni. * Fakakaukauʼi age muʼa ia te fiafia ʼae neʼe logoʼi e ʼana matuʼā ʼi tanā faiga ke nā akoʼi talu tana kei veliveli ke ʼofa ia Sehova.—2 Tim. 3:14, 15.
18. Kotea tau manatu ʼo ʼuhiga mo te ʼu matuʼā ʼae ʼe faiga ke natou akoʼi ʼanatou fanau ke ʼoʼofa ia Sehova?
18 ʼU matuʼā, neʼe foaki atu e Sehova he meʼa ʼofa taulekaleka ke kotou pusiaki he taʼiake foʼou ko he kau atolasio ʼa Sehova. (Pes. 78:4-6) ʼE mole ko he gaue ʼe faigafua. Koia, ʼe matou fakamalo lahi atu ki te ʼu faiga ʼe kotou fai ke kotou tokoni ki ʼakotou fanau. Kapau ʼe kotou haga fai ia meʼa fuli ʼe kotou lavaʼi moʼo tokoni ki ʼakotou fanau ke ʼoʼofa ia Sehova pea mo akoʼi ke natou fakalogo kia te ia, ʼe mahino ia ʼe fiafia anai tatatou Tamai ʼofa ʼae ʼi selo.—Efe. 6:4.
KATIKO 135 “Ke Ke Fakapotopoto, Siʼoku Foha”
^ ʼE ʼofa mamahi te ʼu tehina mo tuagaʼane ʼae kua matuʼā ʼi ʼanatou fanau. ʼE natou faiga malohi ke natou tokakaga lelei ki ʼanatou fanau ke natou maʼu te ʼu meʼa ʼae ʼe ʼaoga kia natou pea mo fiafia. Pea ʼe natou fai ia meʼa fuli ke natou akoʼi ʼanatou fanau ke natou ʼoʼofa ia Sehova. ʼE talanoa anai te alatike ʼaeni kia pelesepeto ʼe fa ʼe tokoni ki te ʼu matuʼā ke natou lava fakahoko te faʼahi ʼaia.
^ Vakaʼi ʼi te jw.org te ʼata viteo Neʼe Akoʼi Mai e Sehova Te Faʼahiga Takitaki ʼo Tomatou Famili.
^ Vakaʼi te alatike “La Bible transforme des vies” ʼi Te Tule Leʼo (Fakafalani) ʼaho 1 ʼo Apelili 2012.
^ FAKAMATALA ʼO TE ʼU PĀKI: ʼE fakatuʼutuʼu e he tamai ke ina iloʼi te ʼu kaumeʼa ʼo tana fanau. Koia, ʼe gaoʼi ai mo tona foha pea mo tona kaumeʼa ʼi te basket.