1-2. He koʼe ʼe tonu ke tou tokagaʼi tafito te tohi ʼo Apokalipesi?

 NEʼE kua fakaafe koa koe ke ke sioʼi he meʼa faʼo pāki ʼa he tahi? ʼI tau sioʼi te ʼu pāki, neʼe ke sio ki he ʼu pāki ʼo he ʼu hahaʼi ʼe mole ke iloʼi. Kae ʼe ʼi ai te pāki ʼe ke tokagaʼi tafito. Kotea tona tupuʼaga? He ʼe ke tuʼu ʼi te pāki ʼaia. Neʼe ke sioʼi lelei te pāki pea ke fakamanatu pe ko te koga meʼa fea mo te temi ʼae neʼe toho ai. Pea ʼe ke faiga ke ke iloʼi ia natou fuli ʼae ʼe tutuʼu ʼi te pāki. ʼE maʼuhiga te pāki ʼaia kia koe.

² Ko te tohi ʼo Apokalipesi ʼe hage pe ko te pāki. Kotea tona tupuʼaga? ʼUhi ko tupuʼaga ʼe lua. ʼUluaki, ko te tohi ʼaia, neʼe tohi maʼa tatou. ʼE tou lau fenei ʼi te ʼuluaki vaega: “Te ʼu meʼa ʼae neʼe fakaha age e Sesu Kilisito ki ʼana kaugana ʼae neʼe foaki age e te ʼAtua kia te ia, ke natou iloʼi ai te ʼu meʼa ʼae kua vave hoko mai.” (Apk. 1:1) Koia, ko te meʼa ʼae neʼe tohi ʼi te tohi ʼaia, neʼe mole fakahagahaga ki te hahaʼi kae kia tatou ʼae ko te ʼu kaugana ʼa te ʼAtua. ʼE mole tonu ke tou punamaʼuli ʼi tatatou kau ki te fakahoko ʼo te ʼu lea fakapolofeta ʼae ʼe tuʼu ʼi te tohi ʼaia. Ka tou lau te tohi ʼo Apokalipesi, ʼe tou lau ai he ʼu aluʼaga ʼe fakaʼuhiga kia tatou.

3-4. Ka tou lau te tohi ʼo Apokalipesi, ko ʼanafea ʼae neʼe hoko ai ia te ʼu lea fakapolofeta ʼae ʼe tuʼu ai? Kotea ʼae ʼe ina uga tatou ke tou fai?

³ Ko te lua tupuʼaga ʼae ʼe tonu ai ke tou tokagaʼi te ʼu lea fakapolofeta ʼo te tohi ʼo Apokalipesi, ʼe ko tatatou iloʼi te temi ʼae ʼe hoko anai te lea fakapolofeta ʼaia. Neʼe tohi fenei e te apositolo ko Soane: “Neʼe ʼave au e te laumalie maʼoniʼoni  ki te ʼaho ʼo te ʼAliki.” (Apk. 1:10) ʼI te tohi e Soane ia te ʼu palalau ʼaia ʼi te taʼu 96 H.T.S., neʼe kei mamaʼo ʼosi “te ʼaho ʼo te ʼAliki.” (Mat. 25:14, 19; Luka 19:12) Kae neʼe fai he ʼu fekumi ʼo ʼuhiga mo te ʼu lea fakapolofeta ʼa te Tohi-Tapu ʼo tou mahino ai neʼe kamata te ʼaho ʼaia ʼi te 1914. Ko te taʼu ʼaia, neʼe fakanofo Hau ai ia Sesu ʼi selo. Neʼe kamata mai ʼi te taʼu ʼaia ia te fakahoko ʼo te ʼu palalau fakapolofeta ʼo te tohi ʼo Apokalipesi ʼo ʼuhiga mo te hahaʼi ʼa te ʼAtua. ʼEi, ʼe tou maʼuʼuli nei ʼi “te ʼaho ʼo te ʼAliki.”

⁴ ʼE tou maʼuʼuli ʼi te temi maʼuhiga ʼaia. Koia ʼae ʼe tonu ai ke tou tokakaga ki te ʼu tokoni ʼofa ʼae ʼe tou maʼu ia Apokalipesi 1:3: “Fiafia ia ia ʼae ʼe ina lau leʼo lahi pea mo natou ʼae ʼe fagono ki te ʼu folafola ʼo te lea fakapolofeta ʼaeni pea mo natou mulimuli ki te ʼu meʼa ʼae ʼe tohi ai, he ʼe kua ovi mai te temi ʼae kua fakatuʼutuʼu.” ʼE ʼaoga ke tou ‘lau leʼo lahi’ mo fagono ki te ʼu “folafola ʼo te lea fakapolofeta ʼaeni,” pea mo fakalogo ki ai. Kotea ʼihi ʼo te ʼu folafola ʼaia ʼe tonu ke tou fakalogo ki ai?

5. He koʼe neʼe foaki e Sesu he ʼu tokoni ki te kau Kilisitiano ʼo te ʼuluaki sekulo?

⁵ ʼI te kapite ʼuluaki ʼo Apokalipesi, ʼe tou mahino ai neʼe iloʼi e Sesu te aluʼaga ʼae ʼe hoko ʼi te ʼu kokelekasio. (Apk. 1:12-16, 20; 2:1) Neʼe ina fakaha te faʼahi ʼaia ʼi te ʼu logo ʼae neʼe ina momoli ki te ʼu kokelekasio ʼe fitu ʼo Asia Veliveli. ʼI te ʼu logo ʼaia, neʼe ina foaki he ʼu tokoni ki te kau Kilisitiano ʼo te temi ʼaia ke tali e Sehova ia tanatou tauhi. Pea ko te ʼu tokoni ʼaia, ʼe toe fakaʼuhiga ki te ʼu kaugana fuli ʼa Sehova ia ʼaho nei. Kotea te ako maʼa tatou? ʼE iloʼi lelei e totatou Pule ʼae ko Sesu Kilisito ia totatou aluʼaga fakalaumalie. ʼE ina leʼoleʼo pea mo puipui tatou. ʼE sio kia meʼa fuli. Pea ʼe ina iloʼi te meʼa ʼae ʼe tonu ke tou fai ke tou maʼu te ʼofa ʼo Sehova. Koia, kotea ia te ʼu tokoni neʼe ina foaki ʼi te temi muʼa pea ʼe tonu ke tou fakalogo ki ai ia ʼaho nei?

6. (1) Ka tou lau ia Apokalipesi 2:3, 4, kotea te fihifihia ʼae neʼe hoko ʼi te kokelekasio ʼo Efeso? (2) Kotea te ako ʼe tou taʼofi mai ai?

⁶ Lau ia Apokalipesi 2:3, 4. ʼE mole tonu ke puli ia totatou ʼofa kia Sehova ʼae neʼe tou maʼu ʼi te kamata. ʼE ha ʼi te logo ʼa Sesu ki te kokelekasio ʼo Efeso ia tanatou faʼa kataki pea mo tanatou tauhi tuʼumaʼu kia Sehova logo la te ʼu faigataʼaʼia neʼe natou tau mo ia. Logo la te faʼahi ʼaia kae neʼe puli ia tonatou ʼofa ʼae neʼe natou maʼu ʼi te kamata. Kapau neʼe mole natou toe maʼu te ʼofa ʼaia, pea neʼe mole feala ke tali tanatou tauhi. ʼO toe feia pe ia ʼaho nei, ʼe mole tonu pe ke tou katakiʼi ia te ʼu ʼahiʼahi. ʼE tonu ke tou fakaha pe koʼe ʼe tou faʼa kataki. ʼE tokagaʼi e te ʼAtua ia te ʼu meʼa ʼae ʼe tou fai pea mo te tupuʼaga ʼo tatatou fai te faʼahi ʼaia. ʼE maʼuhiga kia Sehova ke ina iloʼi pe koʼe ʼe tou fai ia te ʼu faʼahi ʼaia maʼa ia. ʼE ina loto ke tou atolasio age kia te ia he ʼe tou ʼoʼofa ai.​—Taag. 16:2; Mko. 12:29, 30.

7. (1) Ka tou lau ia Apokalipesi 3:1-3, kotea te fihifihia neʼe tokagaʼi e Sesu ʼo ʼuhiga mo te kokelekasio ʼo Sate? (2) Kotea ʼae ʼe tonu ke tou fai?

⁷ Lau ia Apokalipesi 3:1-3. ʼE tonu ke tou haga nofo ʼalaʼala pea mo tokaga. Neʼe ʼi ai te tahi fihifihia neʼe tau mo te kokelekasio ʼo Sate. Logo la neʼe natou faʼafai ʼi tanatou tauhi kia Sehova ʼi te temi muʼa, kae neʼe mole kei tatau leva ʼi te temi nei. Koia, neʼe ui age ai e Sesu ke natou ‘ ʼaʼala ake.’ Kotea te fakatokaga kia tatou? ʼE mahino ia, ʼe mole galoʼi anai e Sehova ʼatatou gaue. (Hep. 6:10) Kae ʼe mole tonu  ke tou manatu kua feʼauga pe mo te ʼu gaue neʼe tou fai kia Sehova ʼi te temi muʼa. Logo la ʼe mole kei tou fai he ʼu gaue ohage ko te temi muʼa, kae ʼe tonu ke tou maʼumaʼua tuʼumaʼu ʼi te “gaue ʼi te ʼAliki.” ʼO feafeaʼi? ʼO tou nofo ʼalaʼala pea mo tokaga ʼo kaku ki te fakaʼosi.​—1 Ko. 15:58; Mat. 24:13; Mko. 13:33.

8. Ka tou lau ia Apokalipesi 3:15-17, kotea te ako ʼe tou taʼofi mai te ʼu palalau neʼe fai e Sesu ki te kau Laotise?

⁸ Lau ia Apokalipesi 3:15-17. ʼE tonu ke tou faʼafai ʼi tatatou tauhi pea mo fai ʼaki totatou loto katoa. ʼE ha ʼi te logo ʼa Sesu ki te kau Laotise, neʼe ʼi ai he tahi fihifihia. Neʼe kua natou “mafana” ʼi tanatou tauhi kia Sehova. Neʼe mole kei fia logo natou ki he meʼa, koia neʼe ui ai e Sesu kia natou neʼe natou ‘lotomamahi pea mo fakaʼofaʼofa.’ Neʼe tonu ke natou faʼafai maʼa Sehova pea mo tana tauhi. (Apk. 3:19) Kotea ia te ako maʼa tatou? Kapau ʼe mole kei tou faʼafai ke feafeaʼi, ʼe tonu ke tou faiga ke tou toe leleiʼia ia te ʼu koloa fakalaumalie ʼae ʼe tou maʼu. (Apk. 3:18) ʼE mole tonu ke tou faiga ke tou maʼu he maʼuli fimalie ʼi te temi nei. Kae ʼe tonu ke tou fakamuʼamuʼa ia tatatou tauhi ʼae kia Sehova.

9. Kotea ia te aluʼaga ʼae ʼe tonu ke tou tokakaga ki ai?

⁹ ʼE tonu ke tou liʼaki ia te ʼu akonaki ʼa te kau aposita. Neʼe fakatonutonuʼi e Sesu ʼihi ʼi Pelekame ʼuhi ko tanatou fakatupu maveuveu ʼi te ʼu tehina. (Apk. 2:14-16) Neʼe ina vikiʼi ia te kau Tiatile ʼae neʼe fakamamaʼo mai te ʼu “meʼa loloto ʼa Satana.” Pea neʼe ina fakalotomalohiʼi natou ke natou “taupau malohi” ia te moʼoni. (Apk. 2:24-26) Neʼe tonu ke fakahemala ia te kau Kilisitiano ʼae kua vaivai ʼi te faʼahi fakalaumalie pea neʼe natou muliʼi ia te ʼu akonaki hala. Kae ʼe feafeaʼi kia tatou ia ʼaho nei? ʼE tonu ke tou liʼaki ia te ʼu akonaki fuli ʼae ʼe fakafeagai ki te manatu ʼa Sehova. ʼE fia fakaha e te kau aposita “ ʼe natou pipiki ki te ʼAtua” kae “ ʼe mole natou fai ʼi ʼonatou maʼuli.” (2 Tim. 3:5) ʼE faigafua tatatou iloʼi pea mo liʼaki ia te ʼu akonaki hala moka ʼe tou ako fakamalotoloto ia te Folafola ʼa te ʼAtua.​—2 Tim. 3:14-17; Suta 3, 4.

10. Kotea te tahi ako ʼe tou taʼofi mai te ʼu palalau a Sesu ki te ʼu kokelekasio ʼo Pelekame pea mo Tiatile?

¹⁰ ʼE tonu ke tou liʼaki ia te ʼu aga heʼe ʼaoga fuli pe. Neʼe ʼi ai te tahi fihifihia ʼi Pelekame pea mo Tiatile. Neʼe tauteaʼi e Sesu  ʼihi ʼo natou ʼo te ʼu kokelekasio ʼaia ʼi tanatou mole liʼaki ia te ʼu aga heʼe ʼaoga. (Apk. 2:14, 20) Kotea te ako maʼa tatou? Kapau ʼe tou fai he ʼu aga heʼe ʼaoga, ʼaua naʼa tou manatu ʼe tali anai e Sehova ʼuhi he kua fualoa tatatou tauhi kia te ia peʼe ko tatatou maʼu pilivilesio ʼi te kokelekasio. (1 Sam. 15:22; 1 Pet. 2:16) ʼE ina loto ke tou taupau maʼu ʼana lekula maʼoluga ʼo ʼuhiga mo te aga ʼae ʼe tonu ke fai, tatau aipe pe ʼe mole kei fakaʼapaʼapa ki ai te malama ʼaeni.​—Efe. 6:11-13.

11. Kotea ia te ʼu ako ʼae neʼe tou taʼofi? (Vakaʼi mo te ʼa takai “ He ʼu Ako Maʼa Tatou.”)

¹¹ Kotea leva ia te ʼu ako ʼae neʼe tou taʼofi? Neʼe tou vakaʼi ia te maʼuhiga ʼae ke tou faiga ke tali e Sehova ia tatatou tauhi. Kapau ʼe tou fai he meʼa ʼo feala ai ke mole tali ia tatatou tauhi, ʼe tonu anai ke tou foimo fai he ʼu fetogi ke tou maʼu ai ia te ʼofa ʼo te ʼAtua. (Apk. 2:5, 16; 3:3, 16) Kae neʼe talanoa ia Sesu ki he tahi age aluʼaga ʼi te ʼu logo ʼae neʼe ina fakaha ki te ʼu kokelekasio Asia Veliveli. Kotea te aluʼaga ʼaia?

12. Ka tou lau ia Apokalipesi 2:10, kotea te ako ʼe tou maʼu mai te ʼu logo ʼa Sesu ki te ʼu kokelekasio ʼo Simena pea mo Filatelefia?

¹² Tou vakaʼi leva ia te ʼu logo ʼa Sesu ki te ʼu kokelekasio ʼo Simena pea mo Filatelefia. Neʼe ina ui ki te kau Kilisitiano ʼo te ʼu kokelekasio ʼaia, ke ʼaua tanatou tuʼania moka fakatagaʼi natou he ʼe fakapale anai ia tanatou nofo agatonu. (Lau ia Apokalipesi 2:10; 3:10) Kotea ia te ako maʼa tatou ia ʼaho nei? ʼE tou iloʼi ʼe fakatagaʼi anai tatou pea ʼe tonu ke tou nofo teuteu ke tou lava katakiʼi. (Mat. 24:9, 13; 2 Ko. 12:10) He koʼe ʼe maʼuhiga te fakamanatuʼi mai ʼo te faʼahi ʼaia?

13-14. Kotea ʼae neʼe hoko ki te hahaʼi ʼa te ʼAtua hili te ʼu aluʼaga ʼae neʼe talanoa ki ai ia te kapite 12 ʼo Apokalipesi?

¹³ Neʼe fakaha ʼi te tohi ʼo Apokalipesi ʼe fakatagaʼi anai te hahaʼi ʼa te ʼAtua ʼi “te ʼaho ʼo te ʼAliki,” ʼae ʼe tou lolotoga maʼuʼuli nei ai. ʼE talanoa ʼi te kapite 12 ʼo Apokalipesi ki he tau neʼe hoko ʼi selo hili pe te fakatuʼu ʼo te Puleʼaga ʼo te ʼAtua. Ko Mikaele ʼe ko Sesu Kilisito ʼae kua fakakololiaʼi. Pea ko ia mo ʼana ʼaselo neʼe natou tauʼi ia Satana mo te kau temonio. (Apk. 12:7, 8) Neʼe mole malo te ʼu fili ʼaia ʼo te ʼAtua pea neʼe li natou ki te kele. Neʼe natou fakatupu ai he ʼu aluʼaga fakalotomamahi ki te hahaʼi. (Apk. 12:9, 12) Kotea ʼae neʼe hoko ki te hahaʼi ʼa te ʼAtua hili te aluʼaga ʼaia?

¹⁴ ʼE mole kei feala he alu ʼa Satana ki selo, koia ʼe ina ʼohofi ai te ʼu kaugana fakanofo ʼa te ʼAtua ʼae ʼi te kele. Ko te kau fakanofo ʼaia, ʼe natou fakafofoga anai ia te Puleʼaga ʼo te ʼAtua pea ʼe “natou maʼu te  gaue ʼae ko te fakamoʼoni ʼo ʼuhiga mo Sesu.” (Apk. 12:17; 2 Ko. 5:20; Efe. 6:19, 20) Neʼe hoko feafeaʼi ia te lea fakapolofeta ʼaia?

15. Ko ai te ʼu “fakamoʼoni ʼe toko lua” ʼae ʼe talanoa ki ai te kapite 11 ʼo Apokalipesi? Pea kotea ʼae neʼe hoko kia natou?

¹⁵ Neʼe ʼohofi e Satana ia te ʼu tehina fakanofo, ʼae neʼe natou taki te kautahi. Neʼe fakata e te ʼu tehina ʼaia, ia te ʼu “fakamoʼoni ʼe toko lua” ʼo te tohi ʼo Apokalipesi ʼae ʼe matehi anai. * (Apk. 11:3, 7-11) ʼI te 1918, neʼe tukugakoviʼi hala ia te ʼu tehina ʼe toko valu ʼae neʼe kau ʼi te kau taki pea neʼe fakatuʼā ki te pilisoni pea ke fualoa tanatou nonofo ai. Neʼe feala pe ke ui kua “mate” peʼe kua taʼofi ia te gaue ʼa te kau fakanofo ʼaia.

16. Kotea te aluʼaga fakaofoofo neʼe hoko ʼi te 1919? Kotea neʼe haga fai e Satana talu mai te temi ʼaia?

¹⁶ Hili he kiʼi temi siʼi, neʼe toe fakaha e te lea fakapolofeta ʼo te kapite 11 ʼo Apokalipesi, ʼe fakatuʼuake anai te ʼu “fakamoʼoni ʼe toko lua.” Neʼe hoko te lea fakaplofeta ʼaia ʼi hona aluʼaga fakaofoofo kae heʼeki ʼosi he taʼu katoa ki te pilisoniʼi ʼo te ʼu tehina ʼaia. ʼI te kamata ʼo te 1919, neʼe fakaʼateainaʼi te ʼu tehina fakanofo ʼaia mai te pilisoni. Pea ki muli age, neʼe liʼaki leva te ʼu tukugakovi hala ʼae neʼe fai kia natou. Neʼe toe toʼo atu aipe e te ʼu tehina ia te gaue faifakamafola. Kae neʼe mole fakagata e Satana tana ʼohofi te hahaʼi ʼa te ʼAtua. Talu mai te temi ʼaia, neʼe hoko atu pe e Satana tana fakatagaʼi ia te hahaʼi ʼa te ʼAtua. (Apk. 12:15) Koia, ʼe maʼuhiga ai kia tatou fuli ke tou “faʼa kataki pea mo tui.”​—Apk. 13:10.

17. Kotea te tokoni neʼe maʼu e te hahaʼi ʼa te ʼAtua neʼe mole natou ʼamanaki ki ai?

¹⁷ Neʼe fakaha ʼi te kapite 12 ʼo Apokalipesi, ʼe maʼu anai e te hahaʼi ʼa te ʼAtua he tokoni neʼe mole natou ʼamanaki ki ai. ʼE fakamahino ai ʼe folo anai e “te kele” ia “te vai tafe,” ʼae ʼe ina fakata te fakataga. (Apk. 12:16) Pea ko te aluʼaga ʼaia neʼe hoko. ʼI ʼihi temi, neʼe tokoni ʼihi aluʼaga ʼo te malama ʼo Satana ki te hahaʼi ʼa te ʼAtua, ohage la ko ʼihi faifakamau. Neʼe tuʼa lahi te malo ʼa te ʼu kaugana ʼa Sehova ʼi he ʼu faifakamau, ʼo natou maʼu ai he ʼateaina. Neʼe natou fakaʼaogaʼi feafeaʼi te ʼateaina  ʼaia? Neʼe natou toʼo ia faigamalie fuli ke natou fai te gaue ʼae neʼe foaki age e Sehova. (1 Ko. 16:9) Kotea te gaue ʼaia?

18. Kotea te logo maʼuhiga ʼe tonu ke tala e te kau Kilistiano ʼi te ʼu ʼaho fakamuli ʼaeni?

¹⁸ Neʼe fakakikite e Sesu ʼe tala anai e ʼana tisipulo ia ‘te logo lelei ʼo te Puleʼaga [ʼo te ʼAtua]’ ʼi te kele katoa ʼi muʼa ʼo te hoko mai ʼo te fakaʼosi. (Mat. 24:14) Ka natou faifakamafola, ʼe tokoni age te kau ʼaselo, ʼae ʼe natou ‘maʼu he logo lelei ʼe heʼe gata ke natou tala kia natou ʼae ʼe nonofo ʼi te kele, ki te ʼu puleʼaga fuli, mo te ʼu telepi fuli, mo te ʼu lea fuli, pea mo te hahaʼi fuli.’​—Apk. 14:6.

19. Kotea te tahi logo ʼe tonu ke fakamafola e natou ʼae ʼe ʼoʼofa ia Sehova?

¹⁹ ʼE mole gata pe ki te logo lelei ʼo te Puleʼaga ʼo te ʼAtua ʼe tonu ke tala e te hahaʼi ʼa te ʼAtua. ʼE tonu ke natou toe lagolago ki te gaue ʼa te kau ʼaselo ʼae ʼe talanoa ki ai ʼi te tohi ʼo Apokalipesi kapite 8 ki te 10. ʼE tala e te ʼu ʼaselo ʼaia he ʼu malaʼia ʼo ʼuhiga mo natou ʼae ʼe natou fakafisi ki te Puleʼaga ʼo te ʼAtua. Koia, ʼe tala e te kau Fakamoʼoni ʼa Sehova he tautea ʼe hage ko te “ ʼuamaka pea mo te afi.” Pea ʼe fakaha ʼi te tautea ʼaia te ʼu fakamau ʼa te ʼAtua ki te malama ʼa Satana. (Apk. 8:7, 13) ʼE tonu ke iloʼi e te hahaʼi kua ovi mai te fakaʼosi ke natou fai ai he ʼu fetogi ʼi tonatou maʼuli pea mo hao mai te ʼaho hauhau ʼo Sehova. (Sofo. 2:2, 3) Kae ko te logo ʼaia ʼe mole mahani ki ai te tokolahi. Koia ʼe tonu ai ke tou lototoʼa ʼo fakaha ki ʼihi ia te logo ʼaia. ʼE toe fakamataku age anai ia te tautea fakaʼosi lolotoga te mamahi lahi.​—Apk. 16:21.

20. Kotea ka tou vakaʼi anai ʼi te ʼu alatike ʼe lua ka hoa mai?

²⁰ ʼE tonu ke tou fakalogo ki “te ʼu folafola ʼo te lea fakapolofeta ʼaeni” ʼo te tohi ʼo Apokalipesi he ʼe tou kau ki tona fakahoko. (Apk. 1:3) Pea ʼe feafeaʼi hatatou nofo agatonu mo katakiʼi te fakataga pea mo haga fakamafola ʼaki he lototoʼa te ʼu logo ʼaia? ʼE tou lotomalohi anai ʼuhi ko aluʼaga ʼe lua: ʼUluaki ʼuhi ko te aluʼaga ʼae ʼe fakaha mai ʼi te tohi ʼo Apokalipesi ʼo ʼuhiga mo te ʼu fili ʼo te ʼAtua. Pea lua, ʼuhi ko te ʼu tapuakina ka tou maʼu anai moka tou nofo agatonu. ʼE tou talanoa anai ki te ʼu manatu ʼaia ʼi te ʼu alatike ʼe lua ka hoa mai.