ALATIKE AKO 20
Kotea ʼe Ui Ia Apokalipesi ʼo ʼUhiga Mo Te ʼu Fili ʼo Te ʼAtua?
“Neʼe fakatahitahiʼi e te ʼu folafola ʼaia te ʼu hau ki te koga meʼa ʼe higoa ʼi te Fakahepeleo ko Alamaketone.”—APK. 16:16.
KATIKO 150 Kotou Kumi Te ʼAtua Ke Haofaki Ai Koutou
TE ʼU MANATU FAKANOUNOU *
1. Kotea ʼae ʼe ui ʼi tohi ʼo Apokalipesi ʼo ʼuhiga mo te hahaʼi ʼa te ʼAtua?
KO TE tohi ʼo Apokalipesi ʼe ina fakaha mai kua tuʼu te Puleʼaga ʼo te ʼAtua ʼi te lagi pea kua kapu ifo Satana mai te lagi. (Apk. 12:1-9) Kua tokalelei te lagi talu te kapu ifo ʼo Satana kae neʼe ina fakatupu he ʼu mamahi lahi ke tou tau mo ia. Kotea tona tupuʼaga? He ʼe ita ia Satana kia tatou ʼaeni ʼe tauhi agatonu kia Sehova ʼi te kele.—Apk. 12:12, 15, 17.
2. Kotea ka tokoni mai ke tou nofo agatonu kia Sehova?
2 ʼE feafeaʼi hatatou nofo agatonu kia Sehova logo la totatou ʼohofiʼi e Satana? (Apk. 13:10) Ko te faʼahi ʼae ka tokoni mai anai,ʼe ko tatatou iloʼi te meʼa ʼae ka hoko ʼi te ka haʼu. Ohage la, neʼe palalau te apositolo ko Soane ʼi te tohi ʼo Apokalipesi ki ʼihi tapuakina kua tou vave maʼu. Pea ʼe kau ʼi te ʼu tapuakina ʼaia ia te pulihi ʼo te ʼu fili ʼo te ʼAtua. Tou vakaʼi pe kotea ʼae ʼe ui ʼi te tohi ʼo Apokalipesi ʼo ʼuhiga mo te ʼu fili ʼaia mo te aluʼaga ʼae ka hoko kia natou.
ʼE ʼI AI TE ʼU “FAKAILOGA” ʼO ʼUHIGA MO TE ʼU FILI ʼO TE ʼATUA
3. Kotea te ʼu fakailoga ʼe fakaʼaogaʼi ʼi te tohi ʼo Apokalipesi moʼo talanoa ki te ʼu fili ʼo te ʼAtua?
3 ʼI te ʼuluaki vaega ʼo Apokalipesi, ʼe tou ako ai ko te ʼu meʼa ʼae neʼe ha kia Soane neʼe fakaha “ ʼaki ni fakailoga,” ko tona fakaʼuhiga ko he ʼu palalau fakata. (Apk. 1:1) Ohage la, ʼe talanoa ai ki he ʼu manu fekai ʼe natou fakata te ʼu fili ʼo te ʼAtua. ʼE ui ʼe ʼi ai te “manu fekai ʼe hake ake mai te tai” mo “ ʼona tala ʼe hogofulu pea mo ʼona ʼulu ʼe fitu.” (Apk. 13:1) ʼE muliʼi mai te manu ʼaia e te “tahi age manu fekai ʼe hake ake mai te kele.” ʼE palalau te manu fekai ʼaia ohage ko he talakone pea mo ina “fakahifo mai te lagi he afi.” (Apk. 13:11-13) Pea neʼe sio Soane ki he tahi manu fekai ʼe ko “he manu fekai lanu kula” pea ʼe heka ai he fafine paomutu. ʼE fakata e te ʼu manu fekai ʼaia ʼe tolu te ʼu fili ʼo Sehova ʼAtua. Neʼe kua fualoa te fakafeagai ʼo tona ʼu fili ʼaia kia te ia mo tona Puleʼaga. Koia, ʼe maʼuhiga ai ke tou iloʼi pe ko ai ia natou.—Apk. 17:1, 3.
4-5. Ka tou lau ia Taniela 7:15-17, ʼe tokoni feafeaʼi mai ke tou mahino pe ko ai te ʼu fili ʼaia ʼo te ʼAtua ʼae ʼe natou fakata te ʼu manu fekai?
4 Kapau ʼe tou fia iloʼi pe ko ai ia te ʼu fili ʼaia, ʼe tonu ke tou mahino pe kotea te fakaʼuhiga ʼo te ʼu palalau fakata ʼaia. Koia tou tuku te Tohi-Tapu ke ina fakamahino mai. ʼE lahi te ʼu fakata neʼe fakaʼaogaʼi ʼi te tohi ʼo Apokalipesi kua ʼosi fakamahino ʼi te tahi atu ʼu tohi ʼo te Tohi-Tapu. Ohage la, neʼe fai e te polofeta ko Taniela he moemisi, neʼe sio ai neʼe “hake ake mai te tai ni manu lalahi ʼe fa.” (Tan. 7:1-3) Neʼe fakamahino e Taniela pe ko ai ʼae ʼe natou fakata. ʼE fakata e te ʼu manu lalahi ʼaia ia he ʼu “hau” peʼe ko puleʼaga ʼe fa. (Lau ia Taniela 7:15-17.) ʼE tokoni mai ia te fakamahino ʼaia ke tou iloʼi ko te ʼu manu fekai ʼae ʼe palalau ki ai ia Apokalipesi ʼe ko he ʼu malohi fakapolitike.
5 ʼE tou vakaʼi leva ʼihi fakailoga ʼe palalau ki ai ia Apokalipesi. ʼAki tatatou fai te faʼahi ʼaia, ʼe tou iloʼi ai anai pe ʼe tokoni feafeaʼi mai te Tohi-Tapu ke tou iloʼi te fakaʼuhiga ʼo te ʼu fakailoga ʼaia. ʼE tou kamataʼaki anai ia te ʼu manu fekai. ʼUluaki, ʼe tou vakaʼi anai pe ko ai ʼae ʼe natou fakata. Hili ia, ʼe tou vakaʼi anai pe kotea ʼae ʼe hoko ki te ʼu manu fekai ʼaia. Pea ʼe tou vakaʼi fakaʼosi anai pe kotea te fakaʼuhiga ʼo te ʼu aluʼaga ʼaia kia tatou.
ʼE TOU ILOʼI PE KO AI TE ʼU FILI ʼO TE ʼATUA
6. Ka tou lau ia Apokalipesi 13:1-4, ko ai ʼe ina fakata te manau fekai ʼae ko ʼona ʼulu ʼe fitu?
6 Ko ai ʼe ina fakata te manu fekai ʼae ko ʼona ʼulu ʼe fitu? (Lau ia Apokalipesi 13:1-4.) ʼE tou tokagaʼi ʼe hage te manu fekai ʼaia ko he leopa. Kae ko ʼona vaʼe ʼe hage ko te ʼu vaʼe ʼo he uluso pea ko tona gutu ʼe hage ko te gutu ʼo he laione pea ʼe ʼi ai ʼona tala ʼe hogofulu. ʼE tou toe maʼu te ʼu agaaga ʼaia ʼi te ʼu manu ʼe fa ʼae ʼe talanoa ki ai ʼi te kapite fitu ʼo te tohi ʼo Taniela. Kae ʼi te tohi ʼo Apokalipesi ʼe maʼu te ʼu agaaga fuli ʼaia ʼi he manu fekai pe ʼe tahi kae mole ko he ʼu manu fekai kehekehe ʼe fa. ʼE mole fakata pe e te manu fekai ʼaia he puleʼaga peʼe ko he malohi fakamalamanei ʼe tahi. Neʼe toe ui e Soane ʼe pule “ki te ʼu telepi fuli, mo te hahaʼi fuli, mo te ʼu lea fuli, pea mo te ʼu puleʼaga fuli.” Koia ʼe maʼoluga ake ʼi te ʼu puleʼaga fuli ake ʼae. (Apk. 13:7) ʼE fakata e te manu fekai ʼaia ia te ʼu malohi fakapolitike fuli ʼae neʼe natou puleʼi te tagata ʼo aʼu mai ki te temi nei. *—Ekl. 8:9.
7. Ko ai ʼae ʼe ina fakata te ʼu ʼulu ʼe fitu ʼo te manu fekai?
7 Ko ai ʼae ʼe ina fakata te ʼu ʼulu ʼe fitu ʼo te manu fekai? ʼE tokoni mai te kapite 17 ʼo Apokalipesi ke tou maʼu tona tali he ʼe ʼi te kapite 13 ʼo Apokalipesi ʼe fakamatala ai ki te fakatata ʼo te manu fekai. ʼE tou lau fenei ia Apokalipesi 17:10: “ ʼE natou fakata te ʼu hau ʼe toko fitu: Ko te toko nima kua to, pea kei tuʼu te tahi, pea ʼe heʼeki haʼu te tahi. Kaʼe ka haʼu anai, ʼe tonu ke nofo ʼi he kiʼi temi nounou pe.” ʼI te ʼu malohi fakapolitike fuli ʼae neʼe fakaʼaogaʼi e Satana, ʼe ʼi ai malohi fakapolitike ʼe fitu ʼe hage ko he ʼu “ ʼulu” ʼuhi he ʼe maʼoluga age tanatou pule. ʼE ko he ʼu malohi fakamalamanei ʼe natou puleʼi ia te hahaʼi ʼa te ʼAtua. ʼI te kei maʼuli ʼa te apositolo ko Soane, neʼe kua pule he toko nima ia natou ki te malamanei: ko Esipito, mo Asilia, mo Papiloni, mo Metia mo Pelesia, pea mo Keleka. Neʼe kei pule pe ia Loma, ʼae ko te ono malohi fakamalamanei ʼi te temi ʼae neʼe fakaha age kia Soane te meʼa ʼae neʼe ha ʼi te tohi ʼo Apokalipesi. Ko ai anai te fitu malohi fakamalamanei fakamuli?
8. Ko ai ʼe ina fakata ia te fitu ʼulu ʼo te manu fekai?
8 ʼE tou vakaʼi anai, ʼe tokoni mai ia te ʼu lea fakapolofeta ʼo te tohi ʼo Taniela ke tou iloʼi pe ko ai te fitu ʼulu fakamuli ʼo te manu fekai. Ko ai te malohi fakamalamanei ʼae neʼe pule lolotoga te ʼu temi fakamuli ʼaeni peʼe ʼi “te ʼaho ʼo te ʼAliki”? (Apk. 1:10) ʼE ko Pilitania mo Amelika ʼae ʼe toe ui ko te malohi fakamalanei ʼo Pilitania mo Amelika. Koia ʼe feala ke tou ui ʼe ko te fitu ʼulu ʼo te manu fekai, ʼae ʼe talanoa ki ai ia Apokalipesi 13:1-4.
9. Ko ai ʼae ʼe ina fakata te manu fekai ʼae ʼe ʼi ai “ ʼona tala ʼe lua ohage ko he akeno”?
9 ʼE kua tou iloʼi leva ko te fitu ʼulu ʼaia ʼe ko te malohi fakamalamanei ʼo Pilitania mo Amelika. ʼI te kapite 13 ʼo Apokalipesi, ʼe tou ako ai ʼe gaue ohage ko he manu fekai, ʼe ʼi ai “ ʼona tala ʼe lua ohage ko he akeno, kaʼe neʼe kamata palalau ia ohage ko he talakone.” Ko te manu fekai ʼaia neʼe ina fai te “ ʼu fakailoga lalahi pea mo ina fakahifo mai te lagi he afi ki te kele ia muʼa ʼo te tagata fuli.” (Apk. 13:11-15) ʼE ui ʼi te kapite 16 mo 19 ʼo Apokalipesi, ko te manu fekai ʼaia ʼe ko “te polofeta loi.” (Apk. 16:13; 19:20) ʼE talanoa ia Taniela ki he aluʼaga ʼe tatau, ko tona fakaʼuhiga ʼe ‘fakamataku anai te ʼu maumau’ ʼae ka fakahoko e te Malohi Fakamalamanei ʼo Pilitania mo Amelika. (Tan. 8:19, 23, 24, nota.) Pea ko te aluʼaga ʼaia neʼe hoko moʼoni lolotoga te Lua Tau Fakamalamanei. Neʼe faʼu e te kau popoto ʼo Pilitania pea mo Amelika he ʼu foʼi pulu hila ʼe lua, ʼae neʼe fakagata ai te tau ʼaia ʼi te Pasifika. Koia ʼe feala pe ke tou ui neʼe “fakahifo mai te lagi he afi ki te kele” e te malohi fakamalamanei ʼo Pilitania mo Amelika.
10. Ka tou lau ia Apokalipesi 13:14, 15; 17:3, 8, 11, ko ai ʼe ina fakata ia te “fakatata ʼo te manu fekai”?
10 ʼE sio leva Soane ki he tahi manu fekai. ʼE hage ko te manu fekai ʼae ʼe ʼi ai ʼona ʼulu ʼe fitu kae ʼe lanu kula leva ia. ʼE fakahigoa ko te “fakatata ʼo te manu fekai “ pea ʼe ui ko ia ko “te valu hau.” * (Lau ia Apokalipesi 13:14, 15; 17:3, 8, 11.) ʼE ui ko te “hau” ʼaia ʼe ʼasi mai pea puli atu pea ki muli age ʼe toe ʼasi mai. Pea ʼe ina fakata lelei te Kautahi ʼo Te ʼu Puleʼaga, ʼae ʼe tokaga ki te ʼu meʼa fakapolitike ʼo te malamanei. Neʼe ʼuluaki higoa ko te Sosiete ʼo Te ʼu Puleʼaga pea neʼe mole kei tuʼu te kautahi ʼaia lolotoga te Lua Tau Fakamalamanei. Ki muli age, neʼe toe ha mai ʼae ʼe ui leva ʼi te temi nei ko te Kautahi ʼo Te ʼu Puleʼaga.
11. Kotea ʼae ʼe fai e te ʼu manu fekai? Pea he koʼe ʼe mole ʼaoga ke tou matataku ia natou?
11 ʼE fakata e te ʼu manu fekai ia te ʼu malohi fakapolitike. Pea ʼe natou uga ia te hahaʼi ke natou fakafeagai kia Sehova mo tana hahaʼi. Neʼe ui e Soane ʼe hage pe ʼe natou fakatahitahiʼi “te ʼu hau ʼo te kele katoa” ki te tau ʼo Alamaketone, ia “te ʼaho lahi ʼo te ʼAtua te Mafimafi.” (Apk. 16:13, 14, 16) Kae ʼe mole ʼaoga ke tou matataku. Kotea tona tupuʼaga? He ʼe haʼu fakavilivili anai ia totatou ʼAtua lahi ʼo haofaki ia natou fuli ʼae ʼe lagolago ki tana pule.—Esk. 38:21-23.
12. Kotea ka hoko ki te ʼu manu fekai fuli?
12 Kotea ka hoko ki te ʼu manu fekai fuli? ʼE tou maʼu tona tali ia Apokalipesi 19:20. ʼE ui fenei ai: “Pea neʼe puke te manu fekai, ʼo feia mo te polofeta loi ʼae neʼe ina fakahoko ni meʼa fakaofoofo ʼi ʼona muʼa moʼo fakaheʼi ia natou ʼae neʼe natou maʼu te fakailoga ʼo te manu fekai pea mo natou ʼae ʼe atolasio ki tona fakatata. Neʼe li maʼuli ia naua ki te vai ʼae ʼe vela ai te afi kakaha.” Koia, ʼe pulihi anai ʼo talu ai ia te ʼu puleʼaga ʼaia, ʼae ko te ʼu fili ʼo te ʼAtua.
13. Kotea te ʼu fihifihia ʼe tau mo te kau Kilisitiano ʼuhi ko te ʼu puleʼaga fakatagata?
13 Kotea tona fakaʼuhiga kia tatou? Tou manatuʼi ko tatou ko te kau Kilisitiano moʼoni. Koia ʼe tonu ke tou nofo agatonu ki te ʼAtua pea mo tona puleʼaga. (Soa. 18:36) ʼE mole tonu ke tou kau ki te ʼu fihi fakapolitike ʼo te malama ʼaeni. Kae ʼe faigataʼa ia tatatou mole kau ki te ʼu faʼahi ʼaia he ʼe fakamaʼua e te ʼu puleʼaga ke tou lagolago age ʼaki ʼatatou palalau mo gaue. Pea ko natou ʼae ʼe fakalogo kia natou ʼe natou maʼu ia te fakailoga ʼo te manu fekai. (Apk. 13:16, 17) Kae ko natou ʼaia ʼe mole natou maʼu anai te ʼofa ʼo Sehova ʼo feia mo te maʼuli heʼe gata. (Apk. 14:9, 10; 20:4) Koia, ʼe maʼuhiga ai kia tatou ke tou ʼateaina mai te ʼu fihi fakapolitike ʼo te malama ʼaeni, maʼia pe ʼe natou fakaneke tatou ke tou lagolago age.
ʼE PULIHI ANAI TE FAFINE PAOMUTU
14. Ka tou lau ia Apokalipesi 17:3-5, kotea te tahi meʼa neʼe sio ki ai ia Soane?
14 Neʼe ui e te apositolo ko Soane neʼe “punamaʼuli ʼaupito” ʼi te tahi meʼa neʼe sio ki ai. Kotea ʼae neʼe sio ki ai? ʼE heka he fafine ʼi he manu fekai lanu kula. (Apk. 17:1, 2, 6) ʼE ko he “fafine paomutu” pea ʼe higoa ko “Papiloni Lahi.” ʼE ina fai “he ʼu felaveʼi fakasino heʼe ʼaoga” mo “te ʼu hau ʼo te kele.”—Lau ia Apokalipesi 17:3-5.
15-16. Ko ai ia “Papiloni Lahi”? Pea ʼe tou iloʼi feafeaʼi te faʼahi ʼaia?
15 Ko ai ia “Papiloni Lahi”? ʼE mole feala ke fakata e te fafine ʼaia he kautahi fakapolitike he ʼe ui ʼi te tohi ʼo Apokalipesi ʼe ina fai he ʼu felaveʼi fakasino heʼe ʼaoga mo te ʼu hau ʼo te kele. (Apk. 18:9) Neʼe ui e Soane ʼe heka ʼi te manu fekai, ko tona fakaʼuhiga ʼe faiga ke ina puleʼi te kau takitaki politike ʼaia. ʼE mole feala ke ina fakata ia te ʼu kautahi fakakoloa ʼo te malama ʼaeni ʼa Satana, ʼae ʼe natou fakata ia “te hahaʼi fakatau koloa ʼo te kele.”—Apk. 18:11, 15, 16.
16 ʼI te Tohi-Tapu, ko te kupu “agapaomutu” ʼe feala ke fakaʼuhiga ki te aga ʼa natou ʼae ʼe natou ui ʼe natou tauhi ki te ʼAtua kae ʼe natou atolasio ki he tahi ʼu ʼatua peʼe natou kaumeʼa mo te malamanei. (1 Klk. 5:25; Sakp. 4:4) Kae ʼe ui ʼi te Tohi-Tapu ko natou ʼae ʼe tauhi agatonu ki te ʼAtua ʼe natou “maʼa.” (2 Ko. 11:2; Apk. 14:4) ʼI te temi muʼa, ko Papiloni neʼe ko te koga meʼa tafito ʼae neʼe fai ai te tauhi hala. Koia ʼae ʼe fakata tonu ai e Papiloni Lahi ia te ʼu faʼahiga tauhi hala fuli pe. ʼEi, ʼe ina fakata te kautahi fakamalamanei ʼo te lotu hala.—Apk. 17:5, 18; vakaʼi te alatike “Qu’est-ce que Babylone la Grande?” ʼi te jw.org.
17. Kotea ka hoko ki Papiloni Lahi?
17 Kotea ka hoko ki Papiloni Lahi? ʼE tou maʼu tona tali ia Apokalipesi 17:16, 17. ʼE ui fenei ai: “Pea ko te ʼu tala ʼe hogofulu ʼae neʼe ke sio ki ai pea mo te manu fekai, ʼe natou fehihiʼa anai ʼi te fafine paomutu, pea ʼe natou toʼo anai ʼana meʼa fuli pea mo tuku telefua ia ia, pea ʼe natou kai anai tona kakano pea mo tutu katoa ia ia ʼaki te afi. Koteʼuhi neʼe ʼai e te ʼAtua ki ʼonatou loto te manatu ʼae ke natou fakahoko tana fakatuʼutuʼu.” ʼEi, ʼe uga anai e Sehova te ʼu puleʼaga ke natou fakaʼaogaʼi te manu fekai lanu kula, ia te Kautahi ʼo te ʼu Puleʼaga, ke natou ʼohofi te kautahi fakamalamanei ʼo te lotu hala pea mo pulihi ʼosi ia natou.—Apk. 18:21-24.
18. Kotea ʼe tonu ke tou liʼaki mo kapau ʼe mole tou fia kau mo Papiloni Lahi?
18 Kotea tona fakaʼuhiga kia tatou? ʼE tonu ke tou taupau maʼu “te manatu ʼo totatou ʼAtua pea mo Tamai ʼo ʼuhiga mo te faʼahiga tauhi ʼae ʼe maʼa pea mo heʼe mele.” (Sakp. 1:27) Koia, tou liʼaki te ʼu akonaki hala ʼa Papiloni Lahi, mo ʼana fakafiafia fakapagani, mo te faʼahiga maʼuli ʼa te hahaʼi ʼo te malamanei pea mo ʼana gaohi meʼa faifakalauʼakau. Pea ʼe tonu ke tou fakalotomalohiʼi tuʼumaʼu te hahaʼi ke natou “mavae mai ia ia” ke mole natou kau ki ʼana agahala pea ke tauteaʼi ai natou e Sehova.—Apk. 18:4.
ʼE PULIHI IA TE FILI LAHI ʼO TE ʼATUA
19. Ko ai te “talakone lahi ʼe lanu kula”?
19 ʼE toe talanoa te tohi ʼo Apokalipesi ki “he talakone lahi ʼe lanu kula.” (Apk. 12:3) ʼE tauʼi e te talakone ʼaia ia Sesu mo ʼana ʼaselo. (Apk. 12:7-9) ʼE ina ʼohofi te hahaʼi ʼa te ʼAtua, pea ʼe ina foaki te malohi ki te ʼu manu fekai, ia te ʼu puleʼaga fakatagata. (Apk. 12:17; 13:4) Ko ai te talakone ʼaia? ʼE ko te “gata ʼafeā, ia ia ʼae ʼe higoa ko te Tevolo mo Satana.” (Apk. 12:9; 20:2) ʼE ko ia ʼae ʼe ina puleʼi te ʼu fili fuli ʼo Sehova.
20. Kotea ka hoko ki te talakone?
20 Kotea ka hoko ki te talakone? ʼE ui ia Apokalipesi 20:1-3 ʼe li e he ʼaselo ia Satana ki he vanu. ʼE hage anai kia ia te vanu ʼaia ko he pilisoni. ʼE nofo ʼi ai ‘lolotoga taʼu ʼe 1 000 pea ʼi te temi ʼaia ʼe mole ina toe fakaheʼi te ʼu puleʼaga.’ Hili ia, ʼe li leva anai ia ia mo ʼana temonio “ki te vai ʼae ʼe vela ai te afi kakaha.” ʼE fakaʼauha anai natou ʼo talu ai. (Apk. 20:10) Fakakaukauʼi age muʼa koe te fiafia ʼe tou logoʼi moka tou maʼuʼuli ʼi he malama ʼe kua pulihi ai ia Satana mo ʼana temonio.
21. He koʼe ʼe tou fiafia?
21 Neʼe tokoni mai te alatike ʼaeni ke tou mahino ki te fakaʼuhiga ʼo te ʼu fakailoga ʼo te tohi ʼo Apokalipesi. Neʼe feala ke tou iloʼi pe ko ai te ʼu fili ʼo Sehova pea mo te aluʼaga ʼae ka hoko kia natou. ʼE mole koa la fakalotomalohi tatatou iloʼi te ʼu faʼahi ʼaia? Ohage pe ko tona ui ʼi te Tohi-Tapu “fiafia ia ia ʼae ʼe ina lau leʼo lahi pea mo natou ʼae ʼe fagono ki te ʼu folafola ʼo te lea fakapolofeta ʼaeni.” (Apk. 1:3) Kae ka ʼosi pulihi pe te ʼu fili ʼo te ʼAtua, kotea te ʼu tapuakina ka maʼu e te hahaʼi agatonu? ʼE tou talanoa anai ki te faʼahi ʼaia ʼi te alatike fakaʼosi.
KATIKO 23 Kua Kamata Pule Ia Sehova
^ ʼE fakaʼaogaʼi e te tohi ʼo Apokalipesi he ʼu fakailoga ke iloʼi ai te ʼu fili ʼo te ʼAtua. ʼE tokoni mai te tohi ʼo Taniela ke tou mahino ki te fakaʼuhiga ʼo te ʼu fakailoga ʼaia. ʼI te alatike ʼaeni, ʼe tou vakaʼi anai he ʼu lea fakapolofeta ʼo te tohi ʼo Apokalipesi mo Taniela ʼe tatau. Pea ʼe feala ai ke tou iloʼi pe ko ai te ʼu fili ʼo te ʼAtua pea kotea te aluʼaga ka hoko kia natou.
^ ʼE ʼi ai te tahi faʼahi ʼe fakata ai e te manu fekai ʼae ko ʼona ʼulu ʼe fitu ia te ʼu malohi fakapolitike fuli, he ʼe ʼi ai “ ʼona tala ʼe hogofulu.” ʼE tau fakaʼaogaʼi ʼi te Tohi-Tapu te mataʼi numelo hogofulu moʼo fakaha he aluʼaga ʼe katoa.
^ ʼE mole hage ia te fakatata ʼo te manu fekai ko te manu fekai mo ʼona ʼulu ʼe fitu he ʼe ko te fakatata ʼo te manu fekai ʼe mole ʼi ai “he ʼu kolona” ʼi ʼona tala. (Apk. 13:1) Pea ʼe “haʼu mai te ʼu hau ʼe toko fitu” ʼae pea neʼe natou foaki age ki ai te pule.—Vakaʼi te alatike “Qu’est-ce que la bête de couleur écarlate de l’Apocalypse chapitre 17?” ʼi te jw.org