ALATIKE AKO 21
Kotea ʼe Ui Ia Apokalipesi ʼo ʼUhiga Mo Totatou Ka Haʼu?
“Ameni! Haʼu, ʼAliki Sesu.”—APK. 22:20.
KATIKO 142 Tou Taupau Ma’u Totatou ʼAmanaki
TE ʼU MANATU FAKANOUNOU *
1. Kotea te tonu maʼuhiga ʼe tonu ke toʼo e te hahaʼi fuli?
IA ʼAHO nei, ʼe tonu ki te hahaʼi ke natou toʼo he tonu maʼuhiga. ʼE tonu ke natou filifili pe ʼe natou lagolago anai kia Sehova ʼi tona ʼuhiga Tuʼi ʼAliki ʼo te ʼatulaulau peʼe natou lagolago anai ki tona fili ia Satana te Tevolo. ʼE mole feala ke ui e he tahi ʼe mole lagolago ki he tahi ia naua. Kapau ʼe mole lagolago he tahi kia Sehova he ʼe lagolago ia kia Satana. ʼE fakalogo ia tonatou ka haʼu ki te tonu ʼae ka natou toʼo. (Mat. 25:31-33, 46) Lolotoga ia “te toe mamahi lahi” ʼe fakailoga anai natou ki te haofaki peʼe ki te fakaʼauha.—Apk. 7:14; 14:9-11; Esk. 9:4, 6.
2. (1) Ka tou lau ia Hepeleo 10:35-39, kotea ʼae ʼe fakalotomalohiʼi ai tatou ke tou fai? (2) He koʼe ʼe maʼuhiga te tohi ʼo Apokalipesi?
2 Lau ia Hepeleo 10:35-39. Kapau neʼe ke filifili ke ke lagolago ki te pule ʼa Sehova, neʼe ke toʼo he tonu fakapotopoto. ʼE mahino ia, ʼe ke fia tokoni leva ki ʼihi ke natou toʼo he tonu ʼe lelei. ʼE feala hau fakaha age kia natou te meʼa ʼae ʼe tohi ʼi te tohi ʼo Apokalipesi. ʼE fakaha ʼi te tohi ʼaia te aluʼaga ka hoko kia natou ʼae ʼe fakafeagai kia Sehova. Kae ʼe toe fakamaʼuhigaʼi ai ia te ʼu tapuakina ka maʼu e natou ʼe lagolago ki tana pule. ʼE maʼuhiga ke tou vakavakaʼi ia te ʼu moʼoni tafito ʼaia. ʼE tokoni mai anai ke tou haga tauhi kia Sehova. ʼE feala ke tou toe fakaʼaogaʼi ia te ʼu faʼahi ʼae neʼe tou ako moʼo tokoni ki ʼihi ke natou toʼo he ʼu tonu ʼe lelei pea ke natou nofo agatonu.
3. Kotea ka tou vakaʼi ʼi te alatike ʼaeni?
3 ʼI te alatike ʼaeni, ʼe tou tali anai ki te ʼu fehuʼi ʼaeni: Kotea ka hoko kia natou ʼe lagolago ki te pule ʼa te ʼAtua? Kae ʼe feafeaʼi anai kia natou ʼae ʼe lagolago ki te manu fekai ʼe lanu kula, ʼae ʼe talanoa ki ai ia te tohi ʼo Apokalipesi?
KOTEA KA HOKO KIA NATOU ʼE NOFO AGATONU?
4. Kotea te kutuga ʼae neʼe sio ki ai te apositolo ko Soane ʼe fakatahi mo Sesu ʼi selo?
4 ʼI te meʼa neʼe ha ki te apositolo ko Soane, neʼe sio ai kia kutuga ʼe lua ʼe lagolago ki te pule ʼa Sehova pea mo maʼu te ʼu tapuakina heʼe gata. Ko te ʼuluaki kutuga ʼe lau ko te 144 000. (Apk. 7:4) Neʼe toʼo natou mai te kele ke natou faʼufaʼu fakatahi mo Sesu he Puleʼaga ʼi selo. ʼE natou puleʼi anai te kele. (Apk. 5:9, 10; 14:3, 4) ʼI te meʼa ʼae neʼe ha kia Soane, neʼe sio ai ʼe natou tutuʼu mo Sesu ʼi te Moʼuga ʼo Sione ʼae ʼi selo.—Apk. 14:1.
5. Kotea ʼae kua vave hoko ki te toe ʼo te toko 144 000?
5 Talu mai te temi ʼo te kau apositolo ʼo kaku mai ki te temi nei, neʼe filifili he toko lauʼi afe hahaʼi ke natou kau ki te toko 144 000. (Luka 12:32; Loma 8:17) Kae neʼe ui kia Soane ʼe ko he kiʼi kutuga pe ʼae ka maʼuʼuli ʼi te kele ʼi te ʼu ʼaho fakamuli. ʼE maʼu anai e te “toe” ʼo te kau fakanofo ʼaia ia te ‘fakailoga’ fakaʼosi ʼo tanatou maʼu ia te ʼofa ʼo Sehova ʼi muʼa ʼo te kamata ʼo te mamahi lahi. (Apk. 7:2, 3; 12:17) Pea lolotoga ia te mamahi lahi ʼe ʼave anai te toe ʼaia ki selo ke natou fakatahi mo te toe ʼo te toko 144 000, ʼae neʼe mamate agatonu. ʼE natou kaugā hau anai mo Sesu ʼi te Puleʼaga ʼo te ʼAtua.—Mat. 24:31; Apk. 5:9, 10.
6-7. (1) Kotea te tahi kutuga neʼe sio ki ai ia Soane? Pea kotea ʼe tou ako ʼo ʼuhiga mo natou? (2) He koʼe ʼe tonu ke tokagaʼi e te toe ʼo te kau fakanofo pea mo te “toe hahaʼi tokolahi” ia te kapite 7 ʼo Apokalipesi?
6 ʼI te ʼosi sio ʼa Soane ki te kutuga ʼae ʼi selo, neʼe sio leva ki he “toe hahaʼi tokolahi.” ʼE mole hage ia ko te 144 000, he ko te kutuga ʼaia ʼe mole feala ia ke lau e he tahi. (Apk. 7:9, 10) Kotea ʼe tou ako ʼo ʼuhiga mo natou aia? Neʼe ui fenei kia Soane: “ ʼE ʼomai ia natou ʼaeni mai te toe mamahi lahi, pea neʼe natou fo ʼonatou teu pea mo fakahihina ʼi te taʼataʼa ʼo te Akeno.” (Apk. 7:14) Hili tanatou hao mai te mamahi lahi, ʼe maʼuʼuli anai ia te “toe hahaʼi tokolahi” ʼi te kele pea ʼe lahi anai te ʼu tapuakina ka natou maʼu.—Pes. 37:9-11, 27-29; Taag. 2:21, 22; Apk. 7:16, 17.
7 Tatau aipe pe ʼe fili tatou ke tou olo ki selo peʼe ke tou maʼuʼuli ʼi te kele, kae ʼe tou tui papau koa ʼe tou kau anai ki te fakahoko ʼo te ʼu palalau ʼae ʼe tou lau ʼi te kapite 7 ʼo te tohi ʼo Apokalipesi? ʼE mahino ia, ʼe ko he temi fakafiafia anai ki te ʼu kutuga ʼaia ʼe lua ʼo te ʼu kaugana ʼa te ʼAtua. ʼE tou fiafia anai ʼi tatatou filifili ke tou lagolago ki te pule ʼa Sehova. Kotea ʼae ʼe toe ui mai ʼi te tohi ʼo Apokalipesi ʼo ʼuhiga mo te mamahi lahi?—Mat. 24:21.
KOTEA KA HOKO KIA NATOU ʼAE ʼE FAKAFEAGAI KI TE ʼATUA?
8. ʼE kamata feafeaʼi anai ia te mamahi lahi? Pea kotea anai ʼe fai e te tokolahi?
8 ʼI te alatike ʼaeni kua ʼosi, neʼe tou ako ai ʼe kua vave ʼohofi e te kau takitaki politike ia Papiloni Lahi, te kautahi fakamalamanei ʼo te lotu hala. (Apk. 17:16, 17) ʼE ko te kamataʼaga anai ʼaia ʼo te mamahi lahi. Ka hoko te faʼahi ʼaia, ʼe maliu mai anai koa te hahaʼi ʼo tauhi kia Sehova? Kailoa ia. ʼE fakaha ʼi te kapite 6 ʼo Apokalipesi, ʼi te temi ʼaia ʼe kumi anai e te hahaʼi ʼae ʼe mole tauhi kia Sehova ia te puipui ʼo te ʼu kautahi fakapolitike pea mo faikoloa ʼo te malama ʼaeni. ʼE fakatatau ia te ʼu kautahi ʼaia ki he ʼu moʼuga. ʼE mole lagolago anai te hahaʼi ʼaia ki te Puleʼaga ʼo te ʼAtua. Koia ʼe fakaʼuhiga anai natou e Sehova ko he kau fakafeagai.—Luka 11:23; Apk. 6:15-17.
9. ʼE tou iloʼi feafeaʼi anai ia te hahaʼi ʼa Sehova lolotoga ia te mamahi lahi? Pea kotea ka hoko anai kia natou?
9 ʼE tou tokagaʼi anai ʼi te temi faigataʼa ʼaia ʼo te mamahi lahi pe ko ai ia te ʼu kaugana agatonu ʼa Sehova. ʼE ko te hahaʼi pe anai ʼaia ʼe tauhi kia Sehova ʼAtua ʼi te kele pea ʼe mole natou lagolago ki “te manu fekai.” (Apk. 13:14-17) ʼE natou nofo agatonu kia Sehova. Koia ʼe kovi ʼosi anai te iita ʼa natou ʼae ʼe fakafeagai kia Sehova. Pea ʼe fakatahitahi anai ia te ʼu puleʼaga ke natou ʼohofi te hahaʼi ʼa te ʼAtua ʼi te kele katoa. ʼE ui ʼi te Tohi-Tapu ko te ʼohofi ʼaia ʼe ko te ʼohofi ʼo Koke ʼo Makoke.—Esk. 38:14-16.
10. Ka tou lau ia Apokalipesi 19:19-21, kotea ka fai e Sehova ʼi te temi ʼae ʼe ʼohofi ai tana hahaʼi?
10 Kotea ka fai e Sehova ki te ʼohofi ʼaia? ʼE ina ui fenei mai: “ ʼE hake anai toku ita.” (Esk. 38:18, 21-23) ʼE talanoa te kapite 19 ʼo Apokalipesi ki te ʼu aluʼaga ka hoko ki ʼamuli. ʼE fekauʼi ifo e Sehova ia Tona ʼAlo ke ina puipui tana hahaʼi pea mo tauʼi ʼona fili. ʼE kau anai “te ʼu kautau ʼae ʼi te lagi,” ia te kau ʼaselo agatonu ʼo feia mo te toko 144 000 mo Sesu ki te fakahoko ʼo te tau ʼaia kia Koke ʼo Makoke. (Apk. 17:14; 19:11-15) ʼE fakaʼosi feafeaʼi anai te tau ʼaia? ʼE fakaʼauha anai ʼo talu ai ia te hahaʼi mo te ʼu puleʼaga fuli ʼae ʼe fakafeagai kia Sehova.—Lau ia Apokalipesi 19:19-21.
ʼE ʼI AI ANAI HE FAIʼOHOANA HILI TE TAU
11. Kotea te aluʼaga maʼuhiga ʼe talanoa ki ai te tohi ʼo Apokalipesi?
11 Fakakaukauʼi age muʼa koe ia te aluʼaga ʼe logoʼi e te ʼu kaugana agatonu ʼa Sehova ʼi te kele ʼi tanatou sio ʼae ki te pulihi ʼo te ʼu fili fuli ʼo te ʼAtua. ʼI te temi ʼaia, ʼe natou fiafia lahi anai. ʼE kalaga fakafiafia anai te lagi moka pulihi ia Papiloni Lahi. Kae ʼe ʼi ai te tahi faʼahi ʼe natou toe fiafia lahi ai anai. (Apk. 19:1-3) ʼE ko he aluʼaga maʼuhiga ʼaupito ʼe talanoa ki ai te tohi ʼo Apokalipesi, ʼe ko “te ʼohoana ʼo te Akeno.”—Apk. 19:6-9.
12. Ka tou lau ia Apokalipesi 21:1, 2, ʼe hoko anai ʼafea te ʼohoana ʼo te Akeno?
12 ʼE hoko anai ʼafea te faiʼohoana? ʼE katoa anai te toko 144 000 ʼi selo ʼi muʼa pe ʼo te kamata ʼo te tau ʼo Alamaketone. Kae ʼe mole ko te temi anai ʼaia ʼe fai ai te ʼohoana ʼo te Akeno. (Lau ia Apokalipesi 21:1, 2.) ʼE tonu muʼa ke hoko te tau ʼo Alamaketone pea ke pulihi te ʼu fili fuli ʼo te ʼAtua. Hili ʼaia, pea ʼe hoko anai te faiʼohoana.—Pes. 45:3, 4, 13-17.
13. Kotea ka hoko ʼi te ʼohoana ʼo te Akeno?
13 Kotea ka hoko ʼi te ʼohoana ʼo te Akeno? Ohage ko te ʼu ʼohoana fuli, ka fai he ʼohoana ʼe fakatahiʼi ai te tagata mo te fafine. Pea ʼe toe feia pe mo te ʼohoana ʼo te Akeno, ʼe fakatahiʼi ai ia te Hau ko Sesu Kilisito mo te toko 144 000, ʼae ko tona ‘ ʼohoana.’ ʼI te hoko ʼo te aluʼaga maʼuhiga ʼaia, ʼe fakatuʼu ai anai he puleʼaga foʼou ʼe pule anai ki te kele lolotoga taʼu ʼe 1 000.—Apk. 20:6.
HE KOLO ʼE MATALELEI ʼAUPITO PEA MO TOU KA HAʼU
14-15. ʼI te kapite 21 ʼo Apokalipesi, ʼe fakatatau ai ia te toko 144 000 kitea? (Vakaʼi te pāki ʼo te takafi.)
14 ʼI te kapite 21 ʼo Apokalipesi, ʼe fakatatau ai te toko 144 000 ki he kolo ʼe matalelei ʼaupito, ia “te Selusalemi Foʼou.” (Apk. 21:2, 9) ʼE fakatuʼu te kolo ʼaia ki ni maka fakatafito ʼe 12 ʼe tohi ai “te ʼu higoa ʼe 12 ʼo te ʼu apositolo ʼe toko 12 ʼa te Akeno.” He koʼe neʼe tokagaʼi e Soane te faʼahi ʼaia? He neʼe sio ki te tohi ʼo tona higoa ʼi he maka ʼo te ʼu maka ʼaia. ʼE ko he toe pilivilesio ia.—Apk. 21:10-14; Efe. 2:20.
15 Ko te kolo fakata ʼaia ʼe mole hage ko ʼihi atu kolo. ʼE ʼi ai tona ala lahi neʼe fai ʼaki te aulo maʼa, mo te ʼu matapa mataʼi tofe ʼe 12, mo te ʼu kaupa pea mo te ʼu fakatafito neʼe fai ʼaki te ʼu maka maʼuhiga pea neʼe toe lelei foki mo te ʼu fakafuafua neʼe fai ki ai. (Apk. 21:15-21) Kae neʼe tokagaʼi e Soane ʼe ʼi ai te meʼa ʼe puli. Koʼeni te aluʼaga neʼe ui e Soane: “Neʼe mole au sio ki he fale lotu ʼi te loto kolo, koteʼuhi ko tona fale lotu ʼe ko Sehova ʼAtua, te Mafimafi, ʼo toe feia mo te Akeno. Pea ʼe mole ʼaoga te laʼa pea mo te mahina moʼo fakamalamaʼi te kolo, koteʼuhi neʼe fakamalamaʼi e te kololia ʼo te ʼAtua, pea ko tona malama neʼe ko te Akeno.” (Apk. 21:22, 23) Ko natou ʼae ʼe kau ʼi te Selusalemi Foʼou ʼe fakatahi anai mo Sehova. (Hep. 7:27; Apk. 22:3, 4) Koia, ko Sehova mo Sesu ʼe ko te fale lotu ʼo te kolo ʼaia.
16. ʼE feafeaʼi anai te maʼuli ʼa te hahaʼi lolotoga te Pule ʼa Te Puleʼaga ʼo Te ʼAtua Ia Taʼu ʼe Afe?
16 ʼE fakafiafia ki te kau fakanofo ia tanatou mamata ki te kolo ʼaia. Kae ʼe tonu ke toe tokagaʼi te faʼahi ʼaia e natou ʼae ʼe natou maʼu ia te ʼamanaki ke natou maʼuʼuli ʼi te kele. ʼE lahi anai te ʼu tapuakina ka foaki e te Selusalemi Foʼou lolotoga te Pule ʼa Te Puleʼaga ʼo Te ʼAtua Ia Taʼu ʼe Afe. ʼE sio ia Soane ki te tafe ʼo te ʼu tapukina ʼaia ohage ko “te vai tafe ʼo te vai ʼo te maʼuli.” Pea ʼi te ʼu kauvai ʼo te vai tafe ʼe ʼi ai “te ʼu fuʼu ʼakau ʼo te maʼuli” ʼe failau “moʼo fakamalolo te ʼu puleʼaga.” (Apk. 22:1, 2) ʼE maʼu anai e te hahaʼi fuli ia te ʼu lelei ʼaia. ʼE liliu mamalie anai te hahaʼi fakalogo fuli ʼo haohaoa. ʼE mole toe ʼi ai anai te mahaki, mo te mamahi pea ʼe mole toe tagi mamahi he tahi.—Apk. 21:3-5.
17. Ko ai ka ina maʼu te ʼu tapuakina taulekaleka lolotoga te ʼAfio ʼa Sesu Ia Taʼu ʼe Afe, ohage pe ko tona fakaha ia Apokalipesi 20:11-13?
17 Ko ai ka ina maʼu te ʼu tapuakina taulekaleka ʼaia? ʼUluaki, ko te toe hahaʼi tokolahi ʼae ʼe hao mai Alamaketone ʼo feia mo te ʼu fanau ka tutupu anai ʼi te malama foʼou. Kae ʼe toe fakapapau mai e te ʼAtua ʼi te kapite 20 ʼo Apokalipesi ʼe fakatuʼuake anai te kau mate. (Lau ia Apokalipesi 20:11-13.) ʼE toe fakatuʼuake anai ʼi te kele ia te “kau faitotonu,” ʼae neʼe mamate ʼi te temi muʼa ʼo feia mo te “kau heʼe faitotonu,” ʼae neʼe mole natou maʼu te fealagia ʼae ke natou iloʼi ia Sehova. (Gaue 24:15; Soa. 5:28, 29) Ko tona fakaʼuhiga koa ʼe fakatuʼuake te hahaʼi fuli ʼi te kele lolotoga te ʼAfio ʼa Sesu Ia Taʼu ʼe Afe? Kailoa. Ko natou ʼae neʼe mole natou fia toʼo te faigamalie ke natou tauhi kia Sehova ʼi muʼa tanatou mamate ʼe mole fakatuʼuake anai natou. Neʼe tuku age kia natou te faigamalie ʼaia pea neʼe natou fakaha ʼe mole natou tuha ke natou maʼuʼuli ʼi te Palatiso ʼi te kele.—Mat. 25:46; 2 Tes. 1:9; Apk. 17:8; 20:15.
TE ʼAHIʼAHI FAKAʼOSI
18. Kotea te aluʼaga anai ka hoko ʼi te kele ʼi te ʼosi ʼo taʼu ʼe 1 000?
18 ʼI te ʼosi ʼo taʼu ʼe 1 000, ʼe liliu anai te hahaʼi fuli ʼo te kele ʼo haohaoa. ʼE mole kei he tahi ʼe agahala ʼuhi ko te agahala ʼa Atama. (Loma 5:12) ʼE pulihi anai ʼo talu ai te ʼu nunuʼa ʼo te agahala ʼa Atama. Koia, ʼe “toe maʼuʼuli ake” anai ia te hahaʼi ʼae ʼi te kele he ʼe natou haohaoa anai ʼi te ʼosi ʼo taʼu ʼe 1 000.—Apk. 20:5.
19. He koʼe ʼe ʼaoga ke ʼi ai he ʼahiʼahi fakaʼosi?
19 ʼE tou iloʼi neʼe nofo agatonu ia Sesu ki te ʼAtua, logo la te ʼu faiga ʼa Satana ke ina ʼahiʼahiʼi ia ia. Kae ʼe nofo agatonu anai koa ia te hahaʼi haohaoa fuli kia Sehova moka faiga ia Satana ke ina ʼahiʼahiʼi natou? ʼI te temi ʼaia, ʼe tou tahi fakaha anai pe ʼe tou nofo agatonu kia Sehova moka fakaʼateainaʼi ia Satana mai te vanu ʼi te ʼosi ʼo taʼu ʼe 1 000. (Apk. 20:7) ʼE maʼu anai e natou ʼae ʼe nofo agatonu ʼi te ʼahiʼahi fakaʼosi ʼaia ia te maʼuli heʼe gata pea mo fiafia anai ʼi tanatou maʼu ia te ʼateaina moʼoni. (Loma 8:21) ʼE pulihi anai ʼo talu ia natou ʼae ʼe agatuʼu kia Sehova, ʼo feia mo Satana mo ʼana temonio.—Apk. 20:8-10.
20. Kotea tau manatu ki te ʼu lea fakapolofeta ʼae ʼe tou maʼu ʼi te tohi ʼo Apokalipesi?
20 Kotea ʼe ke logoʼi hili tatatou vakaʼi te ʼu manatu ʼo te tohi ʼo Apokalipesi? ʼE mole koa la fakafiafia tatatou iloʼi ʼae ʼe tou kau mo tatou ki te ʼu lea fakapolofeta ʼaia? ʼE mole tupu ai koa la hatatou fakaafe ʼihi ke natou kau mo tatou ki te tauhi maʼa ki totatou ʼAtua? (Apk. 22:17) Neʼe tou vakaʼi ia te ʼu aluʼaga ka hoko ʼi te ka haʼu, koia ʼe tou fiafia pea mo fia fai te ʼu palalau ʼaeni neʼe ui e te apositolo ko Soane: “Ameni! Haʼu, ʼAliki Sesu.”—Apk. 22:20.
KATIKO 27 Te Fakaha ʼo Te ʼu Foha ʼo Te ʼAtua
[Nota ’i te lalo pasina]
^ ʼE ko te alatike fakaʼosi ʼaeni ʼo te ʼu alatike ʼe tolu ʼo te tohi ʼo Apokalipesi. ʼE tou vakaʼi anai ʼi te alatike ʼaeni, ʼe maʼu anai e natou ʼae ʼe nofo agatonu kia Sehova he ka haʼu taulekaleka, kae ʼe pulihi anai ia natou fuli ʼae ʼe fakafeagai ki tana pule.