ALATIKE AKO 41
ʼE Feala Ke Ke Fiafia Moʼoni
“Manuʼia te tagata fuli ʼae ʼe manavasiʼi kia Sehova, ʼae ʼe haʼele ʼi ona ala.”—PES. 128:1.
KATIKO 110 Te Fiafia ’o Sehova Ko Hotatou Tule
TE ʼU MANATU FAKANOUNOU *
1. Kotea ʼae neʼe fakatupu ʼaki tatou? Pea kotea te pikipikiga ʼo te ʼu meʼa ʼaia ʼe ʼaoga kia tatou mo totatou fiafia?
KO TE fiafia moʼoni ʼe mole ko he meʼa pe ʼe tou logoʼi ʼe lelei pea ʼe tou maʼu atu aipe pea puli atu. ʼE ko he meʼa ia ʼe feala ke logoʼi e he tahi ʼi tona maʼuli katoa. Neʼe fakamahino fenei e Sesu ʼi tana Akonaki ʼi te Moʼuga: “Manuʼia ia natou ʼae ʼe natou mahino ʼe ʼaoga kia natou te ʼu meʼa fakalaumalie.” (Mat. 5:3) Neʼe ina iloʼi neʼe fakatupu te tagata mo te ʼaoga ʼae ki ai te ʼu meʼa fakalaumalie pea ʼe natou fia iloʼi mo atolasio ki tonatou Tupuʼaga ko Sehova. Ko Sehova ʼe ko te “ ʼAtua fiafia” koia ʼe toe feala pe kia natou ʼae ʼe tauhi kia te ia ke natou fiafia.—1 Tim. 1:11.
2-3. (1) Ohage ko tona ui e Sesu, ko ai ʼae ʼe feala ke fiafia? (2) He koʼe ʼe fakaʼuhiga kia tatou fuli te manatu ka tou vakaʼi ʼi te alatike ʼaeni? Pea kotea ʼae ka tou vakaʼi ai anai?
2 ʼE tonu koa ke mole ʼi ai hotatou ʼu fihifihia ke tou fiafia ai? Kailoa. ʼI tana akonaki, neʼe palalau ia Sesu ki he meʼa maʼuhiga. Neʼe ina ui ʼe feala ke fiafia “ia natou ʼae ʼe lotomamahi” ko tona fakaʼuhiga ia natou ʼae ʼe natou tukugakoviʼi ia natou totonu ʼuhi ko ʼanatou agahala peʼe ko natou ʼae ʼe tau mo ni fihifihia. Neʼe ina toe fai te ʼu palalau ʼaia kia “natou ʼae neʼe fakatagaʼi ʼuhi ko te faitotonu” pea mo natou ʼae ʼe “laukoviʼi” ʼuhi ko natou ko te ʼu tisipulo ʼa Kilisito. (Mat. 5:4, 10, 11) Kae ʼe feafeaʼi hatatou fiafia moʼoni ʼi te ʼu aluʼaga ʼaia?
3 Neʼe akoʼi mai e Sesu ʼe mole fakalogo totatou fiafia ki totatou aluʼaga. ʼE feala ke tou fiafia mo kapau ʼe tou maʼu ia te ʼu meʼa ʼae ʼe ʼaoga kia tatou ʼi te faʼahi fakalaumalie pea mo fakaovi ki te ʼAtua. (Sakp. 4:8) ʼO feafeaʼi? ʼI te alatike ʼaeni, ʼe tou vakaʼi ai anai aluʼaga ʼe tolu ke tou fiafia moʼoni ai.
KE KE AKO MO LAU TE TOHI-TAPU
4. Ka tou lau ia Pesalemo 1:1-3, kotea ia te ʼuluaki aluʼaga ʼe tonu ke tou fai ke tou fiafia moʼoni ai?
4 1 ALUʼAGA: ʼE tonu ke tou ako mo lau te Tohi-Tapu ke tou fiafia moʼoni ai. E ʼaoga ke kai ia te tagata mo te ʼu manu ke maʼuʼuli. Kae ʼe gata pe ki te tagata ia tana maʼu ia te meʼa kai fakalaumalie. Pea ʼe ʼaoga kia natou ia te meʼa kai ʼaia. Koia ʼae neʼe ui fenei ai e Sesu: “ ʼE mole tonu ke maʼuli pe te tagata ki te pane kaʼe ki te ʼu folafola fuli ʼae ʼe haʼu mai ia Sehova.” (Mat. 4:4) Koia, ʼaua naʼa tou tuku ke fakalaka he ʼaho kae ʼe heʼeki tou kakai ʼi te faʼahi fakalaumalie, ko tona fakaʼuhiga kae heʼeki tou lau te Folafola ʼa Te ʼAtua, ʼae ʼe maʼuhiga. Neʼe ui fenei e he tagata faipesalemo: ‘ ʼE fiafia te tagata ʼae ʼe ʼi te lao ʼa Sehova, pea ʼe ina lau leʼo veliveli tana lao ʼi te ʼaho mo te po.’—Lau ia Pesalemo 1:1-3.
5-6. (1) Kotea ʼae ʼe tou ako ʼi te Tohi-Tapu? (2) Kotea ʼe feala ke tou maʼu moka tou ako te Tohi-Tapu?
5 ʼE ʼofa ia Sehova ia tatou koia ʼe ina fakamahino mai ʼi tana Folafola te meʼa ʼe tonu ke tou fai ke tou maʼuli fiafia ai. ʼE tou ako ai te meʼa ʼae ʼe ina loto ke tou fai ʼi totatou maʼuli. Ohage la, pe ʼe feafeaʼi hatatou fakaovi kia te ia, mo maʼu tana lotofakamolemole ki ʼatatou agahala. Pea ʼe tou toe ako ai mo he ʼamanaki taulekaleka ʼe ina fakapapauʼi mai. (Sel. 29:11) ʼE tou iloʼi ia te ʼu moʼoni ʼaia ʼi tatatou ako ia te Tohi-Tapu pea ʼe tou fiafia lahi ai.
6 ʼE tou iloʼi ʼe lahi te ʼu tokoni ʼaoga ʼe toe maʼu ʼi te Tohi-Tapu ki totatou maʼuli. Kapau ʼe tou mulimuli ki ai, pea ʼe tou fiafia anai. Ka ke lotovaivai ʼuhi ko te ʼu fihifihia ʼe ke tau mo ia, ʼe lelei age ke lahi tou temi ʼae ke ke lau ai te Tohi-Tapu mo metitasio ki ai. Neʼe ui fenei e Sesu: “Manuʼia ia natou ʼae ʼe natou logo ki te folafola ʼa te ʼAtua pea mo natou taupau!”—Luka 11:28.
7. Kotea ʼe feala ke ke fai ke ke maʼu ai he ʼu lelei ʼo tau lau ia te Tohi-Tapu?
7 Ka ke lau te Tohi-Tapu, ke ke toʼo he temi ke ke fakakaukauʼi ai te meʼa ʼae ʼe ke lau. Fakakaukauʼi age muʼa, ʼe teuteuʼi atu e he tahi he kiʼi meʼa kai ʼe ke fia kai mamahi ai. Kae ʼe lagi ke kai fakavilivili anai he ʼe ke maʼua. Pea ʼi te kua ʼosi ʼo tau pa, ʼe ke tokagaʼi ai neʼe ke kai fakavilivili pea neʼe mole ke toʼo he temi ke ke kai mamalie ai ke ke iloʼi tona kano lelei. Neʼe kua hoko koa kia koe ia te faʼahi ʼaia? ʼE toe feia pe mo tau lau te Tohi-Tapu. ʼE lagi neʼe ke lau fakavilivili te Tohi-Tapu ʼo mole ke toʼo he temi ke ke fakakaukauʼi te meʼa ʼae ʼe akoʼi atu e Sehova. Koia, ke ke toʼo he temi ke ke leleiʼia tau lau te Tohi-Tapu, fakakaukauʼi ia te ʼu aluʼaga ʼae ʼe hoko, mo te ʼu leʼo ʼo natou ʼo te hisitolia ʼo feia mo te ʼu meʼa ʼae ʼe ke lau. Ka ke fakahoko te faʼahi ʼaia, ʼe ke fiafia anai.
8. Kotea te gaue ʼe fakahoko e te “tagata faifekau agatonu mo poto”? (Vakaʼi mo te nota.)
8 Neʼe fakanofo e Sesu te “tagata faifekau agatonu mo poto” ke ina foaki mai te meʼa kai fakalaumalie ʼi tona temi totonu. Pea ʼe fafaga leleiʼi tatou ʼi te faʼahi fakalaumalie. * (Mat. 24:45) Ko te folafola ʼa te ʼAtua ʼe ko te koga tafito ʼaia ʼe teuteuʼi e te tagata faifekau agatonu. (1 Tes. 2:13) Koia, ʼe feala ʼaki te meʼa kai fakalaumalie ʼaia ke tou iloʼi ia te manatu ʼa Sehova, ʼae ʼe fakaha ʼi te Tohi-Tapu. Ko te tupuʼaga la ʼaia ʼo tatatou lau te ʼu Tule Leʼo mo Kotou ʼAʼala! (Réveillez-vous !) pea mo te ʼu alatike ʼi te jw.org. ʼE tou teuteuʼi mo te ʼu fono ʼo te vahaʼa mo te ʼu fakaʼosi vahaʼa. Pea ʼe tou toe sioʼi mo te ʼu polokalama Televisio JW ʼi te mahina fuli. Kapau ʼe tou lau mo ako tuʼumaʼu ia te Tohi-Tapu pea ʼe tou lava fai anai ia te lua aluʼaga ke tou fiafia moʼoni ai.
FAKAʼAPAʼAPA KI TE LAO ʼA SEHOVA
9. Kotea ia te lua aluʼaga ʼae ʼe tonu ke tou fai ke tou fiafia moʼoni ai?
9 2 ALUʼAGA: ʼE tonu ke tou fakaʼapaʼapa ki te ʼu lao ʼa Sehova ke tou fiafia moʼoni ai. Neʼe tohi fenei e he tagata faipesalemo: “Manuʼia te tagata fuli ʼae ʼe manavasiʼi kia Sehova, ʼae ʼe haʼele ʼi ʼona ala.” (Pes. 128:1) Ko te manavasiʼi kia Sehova ko tona fakaʼuhiga ʼe ko te fakaʼapaʼapa lahi kia te ia pea mo te mole fai ʼo he meʼa ke mamahi ai. (Taag. 16:6) Kapau ʼe tou manavasiʼi kia Sehova, ʼe tou faiga tuʼumaʼu anai ke tou fakaʼapaʼapa ki ʼana lao ʼo ʼuhiga mo te meʼa ʼae ʼe lelei mo ʼae ʼe kovi, ʼae ʼe tuʼu ʼi te Tohi-Tapu. (2 Ko. 7:1) ʼE tou fiafia lahi anai mo kapau ʼe tou fai ia te ʼu meʼa ʼae ʼe leleiʼia e Sehova kae ʼe tou liʼaki ia te ʼu meʼa ʼae ʼe fehiʼa ki ai.—Pes. 37:27; 97:10; Loma 12:9.
10. Ka tou lau ia Loma 12:2, kotea ʼae ʼe tonu ke tou fai?
10 Lau ia Loma 12:2. ʼE feala ki he tahi ke ina iloʼi ko Sehova pe ʼe tonu ke ina filifili te meʼa ʼae ʼe lelei mo ʼae ʼe kovi. Kae ʼe tonu ke toe fakaʼapaʼapa te kilisitiano ʼaia ki ʼana lao. Ohage la, ʼe feala ke iloʼi e he tahi ko te puleʼaga pe ʼae ʼe ina fakatuʼu te ʼu lao ʼo te ala. Kae ʼe lagi mole fia fakaʼapaʼapa anai ki ai. Ka tou fakalogo ki te ʼu lao ʼa Sehova ʼe ko he tonu lelei ʼaia. Pea ʼe tou fakaha ʼi ʼatatou aga ʼe tou fakamoʼoni ki ai. (Taag. 12:28) Neʼe toe maʼu e Tavite ia te manatu ʼaia. Neʼe ina ui fenei ʼo ʼuhiga mo Sehova: “ ʼE ke fakaha mai te ala ʼo te maʼuli. ʼE mahu te fiafia ʼi ʼou tafa. Ko ia ʼae ʼe nofo ʼi tou toʼomataʼu, ʼe manuʼia ʼo talu ai.”—Pes. 16:11.
11-12. (1) Ka tou hoha peʼe lotovaivai, kotea ʼae ʼe tonu ke tou tokakaga ki ai? (2) ʼE tokoni feafeaʼi mai ia Filipe 4:8 ki te filifili ʼo ʼatatou fakafiafia?
11 Ka tou hoha peʼe lotovaivai, ʼe tou ʼamusia age ke tou pupuli ke mole tou toe manatu ki ʼotatou fihifihia. ʼE ko he aluʼaga ʼe tou mahino ki ai, kae ʼe tonu ke tou tokaga naʼa tou fai he meʼa ʼe fehiʼa ki ai ia Sehova.—Efe. 5:10-12, 15-17.
12 Neʼe faitohi te apositolo ko Paulo ki te kau Kilisitiano ʼo Filipe. Neʼe ina fakalotomalohiʼi ai natou ke natou haga fai ia te ʼu meʼa ʼae ʼe ‘faitotonu, mo maʼa, mo tuha mo te ʼofa pea mo ʼae ʼe lelei.’ (Lau ia Filipe 4:8.) Logo la neʼe mole ina fakaha lelei mai ia te ʼu fakafiafia ʼae ʼe tonu ke tou fai, kae ʼe tokoni mai te ʼu manatu ʼaia ki te ʼu tonu ʼe tou fai ʼi te aluʼaga ʼaia. ʼE feala tau ʼahiʼahi te faʼahi ʼaeni: Ko te ʼu faʼahi ʼae ʼe ʼasi ai te kupu ʼaeni “te ʼu meʼa” ʼi te vaega, ʼe feala tau fetogi ʼaki te ʼu kupu ʼaeni “hiva,” “ ʼata,” “tohi” peʼe “gaoʼi viteo.” Kapau ʼe ke fai feia, ʼe ke iloʼi ai anai pe ko te faʼahiga fakafiafia fea ʼae ʼe leleiʼia e Sehova. Koia, ʼe tou fia maʼuliʼi fuli ia te ʼu lao maʼoluga ʼa Sehova. (Pes. 119:1-3) Kapau ʼe tou fakaʼapaʼapa ki ʼana lao ʼaia, ʼe tou maʼu ai anai he leʼo ʼo loto ʼe lelei pea mo tokoni mai anai ke tou fai ia te tolu aluʼaga ʼae ke tou fiafia moʼoni ai.—Gaue 23:1.
KE KE FAKAMUʼAMUʼA IA TE TAUHI ʼAE KIA SEHOVA
13. Ka tou lau ia Soane 4:23, 24, kotea ia te tolu aluʼaga ʼe tonu ke tou fai ke tou fiafia moʼoni ai?
13 3 ALUʼAGA: Tokaga ʼo fakamuʼamuʼa ia te tauhi kia Sehova. Ko Sehova ʼae neʼe ina fakatupu tatou, koia ʼe tuha ai mo ia ke tou atolasio ki te ia. (Apk. 4:11; 14:6, 7) Koia, ʼe tonu ke maʼuhiga age ki totatou maʼuli ia te tauhi ʼae neʼe ina leleiʼia, ko tona fakaʼuhiga ke tou tauhi kia te ia “ ʼaki te laumalie mo te moʼoni.” (Lau ia Soane 4:23, 24.) ʼE tou fia fai he tauhi kia te ia ʼe takitaki e tona laumalie maʼoniʼoni pea ʼe alu tahi mo te ʼu moʼoni ʼae ʼe tou maʼu ʼi tana Folafola. Pea ʼe tou fia fakamuʼamuʼa ia tatatou tauhi kia te ia logo la ʼe tou maʼuʼuli ʼi he fenua ʼe tapuʼi ai tatatou gaue. Ia ʼaho nei, ʼe pilisoniʼi ʼotatou tehina mo tuagaʼane ʼe toko 100 tupu ʼuhi pe ko natou ko te ʼu Fakamoʼoni ʼa Sehova. * Logo la te ʼu aluʼaga ʼaia, kae ʼe natou faikole, mo ako pea mo palalau ki te hahaʼi ki tonatou ʼAtua mo tona Puleʼaga, ʼo mulimuli pe ki ʼonatou fealagia. Pea ʼe natou fai ʼaki te fiafia. Ka leakoviʼi peʼe fakatagaʼi tatou, ʼe tou fiafia he ʼe tou iloʼi ʼe nofo Sehova mo tatou pea ʼe ina fakapale anai tatou.—Sakp. 1:12; 1 Pet. 4:14.
NEʼE INA MAʼU TE FIAFIA MOʼONI
14. Kotea ʼae neʼe hoko ki he tehina ʼo Tajikistan? Pea kotea tona tupuʼaga?
14 Neʼe tau ʼihi tehina mo tuagaʼane mo he ʼu aluʼaga faigataʼa, kae neʼe natou maʼu ia te fiafia moʼoni he neʼe natou fai ia te ʼu aluʼaga ʼaeni ʼe tolu neʼe tou vakaʼi. Ohage la, tou vakaʼi te aluʼaga neʼe hoko ki te tehina ʼaeni ko Djovidon Bobodjonov ʼi Tajikistan kae neʼe ko tona taʼu 19. Neʼe mole fia alu ʼo solia koia neʼe ʼave fakamalohi ai ia ia e te kau solia ʼi te ʼaho 4 ʼo Oketopeli 2019. Pea neʼe pilisoniʼi ia ia lolotoga ni mahina pea neʼe hage tona gaohi ko he tagata faifakapo. Neʼe lahi te ʼu fenua neʼe palalauʼi ai te aga heʼe faitotonu ʼaia. Neʼe natou fakamahino ʼi te ʼu talalogo neʼe ta ia ia he neʼe fakamaʼua age ke ina tui te teu solia pea ke ina fakapapau ʼe agatonu ki te solia. Pea neʼe fakaha ʼi te telepinale ko ia ʼae neʼe ina fai te aga kovi pea neʼe ʼave ai ia ia ki he lotoʼa fakamamahi. Neʼe nofo ʼi ai ʼo kaku ki te haga ʼa te pelesita ʼo tadjik ʼo toʼo ia tona tuʼā pea mo fakaʼateainaʼi ia ia. ʼI te temi katoa ʼaia, neʼe nofo agatonu pe pea mo taupau maʼu ia tona fiafia. ʼO feafeaʼi? Neʼe mahino tuʼumaʼu kia ia ia te ʼaoga kia ia te ʼu meʼa fakalaumalie.
15. Neʼe fafaga feafeaʼi e Djovidon ia tana tui ʼi tana ʼi te pilisoni?
15 ʼI te pilisoni, neʼe fafaga pe e Djovidon ia tana tui, logo la neʼe mole ʼi ai hana Tohi-Tapu peʼe ko hana tohi. He koʼe neʼe feala ia te faʼahi ʼaia? Neʼe ʼaumai e te ʼu tehina mo tuagaʼane ʼo te fenua hana meʼa kai pea neʼe natou tohi te koga tohi ʼo te ʼaho ʼi te ʼu kato meʼa kai ʼaia. Neʼe feala ia ke ina lau mo metitasio ki te Tohi-Tapu ʼi te ʼaho fuli. Hili tona fakaʼateainaʼi, neʼe ina fai te tokoni ʼaeni kia natou ʼae ʼe heʼeki natou tau mo he ʼu ʼahiʼahi fakamataku. Neʼe ina ui fenei: “Kotou toʼo ia te faigamalie ʼae ʼe kotou ʼateaina ai moʼo fakaloloto ia takotou ako ʼo ʼuhiga mo Sehova ʼaki takotou lau ia tana Folafola pea mo ʼatatou tohi.”
16. Kotea ʼae neʼe tokaga tafito ki ai ia Djovidon?
16 Neʼe fakaʼapaʼapa ia Djovidon ki te ʼu lao ʼa Sehova. Neʼe mole haga nofo pe ia ʼo manatu ki he ʼu holi ʼe kovi mo fai he ʼu aga ʼe kovi. Kae neʼe tokaga tafito pe ʼo ʼuhiga mo Sehova pea mo te ʼu meʼa ʼae ʼe maʼuhiga kia te Ia. Neʼe fiafia ʼi tana sio ki te taulekaleka ʼo te fakatupu ʼa te ʼAtua. ʼI te ʼuhu fuli, ka ʼala ake ʼe logo pe ki te tagi ʼo te ʼu manulele. Pea ʼi te poʼuli, ʼe sio ki te mahina mo te ʼu fetuʼu. ʼE ina ui fenei: “Ka au sio ki te ʼu meʼa ʼofa ʼaia ʼo Sehova, pea ʼe au fiafia ai mo fakalotomalohiʼi ai au.” Koia, ka tou lotofakafetaʼi lahi kia Sehova ki te ʼu meʼa ʼae ʼe ina foaki mai ʼi te faʼahi fakalaumalie mo fakasino, pea ʼe tou fiafia ai. ʼE tokoni mai totatou fiafia ʼaia ke tou faʼa kataki.
17. Ka tou lau ia 1 Petelo 1:6, 7, ʼe feala ke tokoni feafeaʼi ia te manatu ʼaia ki he tahi ʼe hage tona aluʼaga ko Djovidon?
17 Neʼe toe fakamuʼamuʼa e Djovidon ia te tauhi kia Sehova. Neʼe mahino kia ia te maʼuhiga ʼae ke tou nofo agatonu ki te ʼAtua. Koia, neʼe ui fenei e Sesu: “ ʼE tonu ke ke atolasio kia Sehova tou ʼAtua pea mo foaki kia te ia tokotahi pe he tauhi taputapu.” (Luka 4:8) Neʼe loto e te kau solia ke liʼaki e Djovidon ia tana lotu. Kae neʼe faikole mamahi totatou tehina ʼi te ʼaho fuli mo te po fuli. Neʼe ina kole age kia Sehova ke tokoni age ke ʼaua naʼa lotovaivai pea ke haga nofo agatonu. Logo la ia tona gaohi koviʼi, kae neʼe nofo agatonu aipe. Ia ʼaho nei, ʼe feala ke fakafiafia ʼi tana maʼu he koga neʼe mole ina maʼu ʼi muʼa ʼo tona puke, mo ta pea mo pilisoniʼi. ʼE kua malohi tana tui ia ʼaho nei he neʼe ʼahiʼahiʼi tana tui.—Lau ia 1 Petelo 1:6, 7.
18. Kotea ʼe feala ke tou fai ke tou fiafia ai?
18 ʼE iloʼi e Sehova te meʼa ʼae ʼe ʼaoga kia tatou ke tou fiafia moʼoni ai. Kapau ʼe ke maʼuliʼi te ʼu manatu ʼaeni ʼe tolu neʼe tou vakaʼi ʼi te alatike ʼaeni, pea ʼe ke fiafia anai moka ʼahiʼahiʼi koe. Koia, ʼe feala anai ke ke toe fai mo te ʼu palalau ʼaeni: “Manuʼia te hahaʼi ʼae ko Sehova tonatou ʼAtua!”—Pes. 144:15.
KATIKO 89 ʼE Tapuakinaʼi Te Fakalogo
^ Tokolahi ʼe mole natou maʼu ia te fiafia moʼoni he ʼe mole faiga pe natou ke natou maʼu. ʼE natou manatu ʼe maʼu te faʼahi ʼaia ʼi te ʼu fakafiafia, peʼe moka natou koloaʼia peʼe iloa peʼe moka natou maʼu he faʼahiga pule. Kae ʼi te nofo ʼa Sesu ʼi te kele, neʼe ina akoʼi ki te hahaʼi te meʼa ʼae ʼe tonu ke natou fai ke natou fiafia ai. ʼI te alatike ʼaeni, ʼe tou vakaʼi anai aluʼaga ʼe tolu ke tou fai ke tou maʼu ai te fiafia moʼoni.
^ Vakaʼi te alatike “ ʼE Kotou Maʼu Koa ‘Te Meakai i Tona Temi Totonu’?” ʼi Te Tule Leʼo ʼaho 15 ʼo ʼAukusito 2014.
^ Kapau ʼe kotou fia maʼu he tahi ʼu fakamahino, alu ki te neti ʼi te jw.org ʼi te Fakafalani “Emprisonnés en raison de leur foi.”
^ FAKAMATALA ʼO TE PĀKI: ʼI te pāki ʼaeni, ʼe fakaha e he ʼu tehina mo tuagaʼane ia tanatou lagolago ki he tehina neʼe puke mo ʼave ki te telepinale ʼo fakamauʼi ai.