1. Ka tou lau ia Taʼaga Lea 1:20, 21, ʼe tali feafeaʼi e te tokolahi ia te poto ʼo te ʼAtua ia ʼaho nei?

 ʼE LAHI te ʼu fenua neʼe tou sisio ai ki ʼotatou tehina mo tuagaʼane, ʼe tutuʼu ʼi he ʼu koga meʼa ʼe kaugamalie ai te fakalaka ʼa te hahaʼi. ʼE natou mata malimali pea mo foaki age hanatou ʼu tohi. Neʼe kua ke kau koa ki te faʼahiga faifakamafola ʼaia? Kapau koia, ʼe lagi ke manatuʼi te ʼu palalau fakata ʼae ʼi te tohi ʼo Taʼaga Lea, ʼae ʼe ui ai ʼe kalaga malohi te poto ke logo te hahaʼi ki ʼana tokoni. (Lau ia Taʼaga Lea 1:20, 21.) ʼE tou maʼu ʼi te Tohi-Tapu mo ʼatatou tohi ia “te poto moʼoni,” ʼae ʼe haʼu mai ia Sehova. ʼE ʼaoga ki te hahaʼi ia te poto ʼaia ke natou maʼu ia te maʼuli heʼe gata. ʼE tou fiafia moka fia toʼo e he tahi hana tohi. Kae ʼe mole ko te hahaʼi fuli ʼe natou fai feia. ʼE mole fia iloʼi e ʼihi pe kotea ʼae ʼe ui ʼi te Tohi-Tapu. Pea ko ʼihi ia ʼe natou vaʼi tatou. ʼE natou manatu kua ʼafeā te Tohi-Tapu. Pea ʼe manukiʼi leva ia e ʼihi te ʼu akonaki Fakatohi-tapu ʼo ʼuhiga mo te aga ʼae ʼe tonu ke fai. ʼE natou manatu ko natou ʼae ʼe mulimuli ki ai ʼe natou agakovi pea fia faitotonu fau. Kae ʼe ʼofa ia Sehova he ʼe ina haga foaki pe te poto moʼoni ki te hahaʼi fuli. ʼO feafeaʼi?

2. Kofea ʼae ʼe tou maʼu ai te poto moʼoni ia ʼaho nei? Kae kotea ʼe fai e te tokolahi?

² ʼE fakaʼaogaʼi e Sehova ia tana Folafola, te Tohi-Tapu ke tou maʼu ia te poto moʼoni. ʼE feala ke maʼu e te hahaʼi fuli ia te tohi ʼaia. Kae ʼe feafeaʼi la ia ki ʼatatou tohi ʼae ʼe fakatafito ki te Tohi-Tapu? ʼAki te tapuakina ʼa Sehova, kua tou maʼu ia lea ʼe 1 000 tupu. Ko natou ʼae ʼe fakalogo, ko tona fakaʼuhiga ia ʼae ʼe natou lau pea mo maʼuliʼi te meʼa ʼae ʼe natou ako, ʼe natou maʼu anai te poto moʼoni. Kae tokolahi ʼe mole natou fia logo ki te poto ʼaia. Ka natou toʼo he ʼu tonu, ʼe leleiʼia age pe natou tanatou falala kia natou totonu peʼe fakalogo ki ʼihi.  ʼE natou meʼa noaʼi tatou koteʼuhi ʼe tou filifili ke tou fakalogo ki te meʼa ʼae ʼe ui mai ʼi te Tohi-Tapu. ʼI te alatike ʼaeni, ʼe tou vakaʼi anai pe koʼe ʼe aga feia te hahaʼi. Kae tou vakaʼi muʼa pe ʼe feafeaʼi hatatou maʼu ia te poto ʼo Sehova.

3. Kotea ʼe tonu ke tou fai ke tou maʼu te poto moʼoni?

³ ʼE feala ke fakaʼuhiga te poto ki te fealagia ʼae ʼe tou fakaʼaogaʼi te meʼa ʼe tou iloʼi moʼo toʼo he ʼu tonu. Kae ʼe toe fakaʼuhiga te poto moʼoni ki he tahi aluʼaga. ʼE ui fenei ʼi te Tohi-Tapu: “Ko te kamataʼaga ʼo te poto ʼe ko te manavasiʼi kia Sehova, pea ko te iloʼi ʼo te ʼAtua Maʼoniʼoni ʼe ko te ʼatamai ʼaia.” (Taag. 9:10) Koia, ka tou toʼo he tonu maʼuhiga, pea ʼe tonu ke tou kumi te manatu ʼa Sehova. ʼE feala ke tou fai te faʼahi ʼaia ʼo tou ako te Tohi-Tapu mo ʼatatou tohi. Kapau ʼe tou fai feia, pea ʼe tou maʼu anai te poto moʼoni.—Taag. 2:5-7.

4. He koʼe ʼe ko Sehova tokotahi pe ʼe feala ke ina foaki mai te poto moʼoni?

⁴ ʼE ko Sehova tokotahi pe ʼe feala ke ina foaki mai te poto moʼoni. (Loma 16:27) He koʼe ko ia te Matapuna ʼo te poto? ʼUluaki, ko Sehova ʼe ko totatou Tupuʼaga pea ʼe ina iloʼi lelei ia te ʼu meʼa fuli ʼae neʼe ina fakatupu. (Pes. 104:24) Lua, ʼe ha ʼi te ʼu gaue fuli ʼa Sehova tona poto. (Loma 11:33) Tolu, ka maʼuliʼi e te hahaʼi te ʼu tokoni fakapotopoto ʼa Sehova pea ʼe fua lelei tuʼumaʼu pe kia natou. (Taag. 2:10-12) Kapau ʼe tou fia maʼu te poto moʼoni, ʼe tonu ke tou tali ia te ʼu moʼoni tafito ʼaia pea mo tuku ke ina takitaki tatou moka tou toʼo he ʼu tonu pea mo te ʼu gaue ʼe tou fai.

5. Kotea ʼe hoko moka ʼe mole fia fakamoʼoni e te hahaʼi ko Sehova ʼe ko te Matapuna ʼo te poto moʼoni?

⁵ Ka tou felaveʼi mo niʼihi ʼi te faifakamafola, pea ʼe natou fakamoʼoni ʼe matalelei ʼosi te ʼu meʼa ʼae ʼe natou sisio ki ai ʼi te natula. Kae ʼe natou ui neʼe mole he tahi neʼe ina fakatupu te ʼu koga ʼaia. Pea ko ʼihi ia ʼe natou tui ki te ʼAtua, kae kia natou ʼe mole kei he ʼuhiga ʼo te ʼu lekula ʼo te Tohi-Tapu koia ʼe natou filifili ke natou fai te meʼa ʼae ʼe natou loto ki ai. Neʼe kotea ʼona fua? ʼE maʼuli lelei koa ia te malamanei ʼuhi ko te falala ʼa te hahaʼi ki ʼonatou poto fakatagata kae mole ki te poto ʼo te ʼAtua? Kua natou maʼu koa ia te fiafia moʼoni peʼe ko he ʼamanaki moʼoni ki te ka haʼu? Ka tou tokagaʼi ia te ʼu aluʼaga ʼe hoko ʼi ʼotatou tafa, pea ʼe tou fakamoʼoni ki te ʼu palalau ʼaeni: “ ʼE mole maʼu he poto, mo he fakasiosio tonu, mo he tokoni moka fakafeagai kia Sehova.” (Taag. 21:30) ʼI tatatou mahino ki te faʼahi ʼaia, ʼe ina ʼekenaki tatou ke tou haga kole kia Sehova ke ina foaki mai ia te poto moʼoni. Kae meʼa fakaʼofaʼofa foki he ʼe tokolahi ʼe mole natou fai te faʼahi ʼaia. Kotea tona tupuʼaga?

6. Ka tou lau ia Taʼaga Lea 1:22-25, ko ai ʼae ʼe mole fia fakalogo ki te poto ʼo Sehova?

⁶ Tokolahi ʼe mole natou fia logo ki te poto moʼoni ʼae ʼe ‘kalagaʼi malohi ʼi te ala.’ ʼI te Tohi-Tapu, ʼe talanoa ai kia faʼahiga hahaʼi ʼe tolu ʼe natou liʼaki te poto. ʼE ko te “kau vale,” mo te “kau vava” pea mo te “kau agavale.” (Lau ia Taʼaga Lea 1:22-25.) Tou vakaʼi pe koʼe ʼe liʼaki e natou ʼaia ia te poto ʼo Sehova pea kotea ʼe feala ke tou fai ke mole tou hage ko natou ʼaia.

7. He koʼe ʼe filifili e ʼihi ke natou hage ko ‘te kau vale’?

⁷ Ko te kau ‘vale’ ʼe ko ni hahaʼi ʼe natou hoko tui pe ki te ʼu meʼa ʼae ʼe natou logo ki ai pea ʼe kakaʼi gafua pe natou ia. (Taag. 14:15) ʼE tou tau felaveʼi mo ni hahaʼi feia  ʼi tatatou faifakamafola. Ohage la, kotou fakakaukauʼi age muʼa ia te toko lauʼi miliona hahaʼi ʼe kakaʼi e te kau takitaki lotu peʼe politike. Ko ʼihi ʼe natou punamaʼuli ʼi tanatou iloʼi ʼae neʼe kakaʼi natou e he ʼu hahaʼi feia. Kae ko natou ʼae ʼe talanoa ki ai ia Taʼaga Lea 1:22, ʼe natou filifili ke natou nonofo vale feia he ʼe leleiʼia pe natou te faʼahi ʼaia. (Sel. 5:31) ʼE natou fai pe te meʼa ʼae ʼe natou loto ki ai pea ʼe mole fia ako natou ia te meʼa ʼae ʼe ui ʼi te Tohi-Tapu pea mo fakalogo ki ʼana lao. Tokolahi ʼe natou maʼu ia te manatu ʼaeni neʼe maʼu e he fafine tauhi lotu lelei ʼi Kanata. Neʼe ina ui fenei ki he Fakamoʼoni ʼa Sehova: “Kapau ʼe kakaʼi matou e tomatou patele, pea ko tana ia hala ʼe mole ko hamatou ia hala.” ʼE mahino ia, ʼe mole tou fia hage ko natou ʼae ʼe natou iloʼi lelei pe ʼe mole lelei kae natou fai pe.—Taag. 1:32; 27:12.

8. Kotea ʼae ʼe tokoni mai ke tou maʼu ia te poto?

⁸ ʼE fakalotomalohiʼi tatou ʼi te Tohi-Tapu ke ʼaua naʼa tou hage ko te kau vale kae “ke [tou] fakakaukau ohage ko he ʼu hahaʼi kua fotufotuʼa.” (1 Ko 14:20) ʼE tou maʼu te poto moka tou maʼuliʼi te ʼu pelesepeto Fakatohi-tapu ʼi totatou maʼuli. Kapau ʼe tou fai feia, pea ʼe tou sio anai ki te tokoni mai ʼa te Tohi-Tapu ke tou tauʼi te ʼu fihifihia pea mo toʼo he ʼu tonu ʼe lelei. ʼE lelei ke tou fakakaukauʼi te ʼu tonu ʼae neʼe tou fai. Ohage la, kapau kua fualoa tatatou ako te Tohi-Tapu mo kau ki te ʼu fono, ʼe feala pe ke tou feuiʼaki pe koʼe heʼeki tou fakatuʼutuʼu ke tou foaki totatou maʼuli kia Sehova pea mo papitema. Kapau kua tou papitema, ʼe tou faiga koa ke tou hikihiki ia tatatou faʼahiga fakamafola te logo lelei pea mo faiakonaki? ʼE ha koa ʼi te ʼu tonu ʼae ʼe tou fai ʼe tou maʼuliʼi te meʼa ʼae ʼe tou ako ʼi te Tohi-Tapu? ʼE hage koa tatatou tokaga ki ʼihi ko tona fai e Sesu? Kapau ʼe tonu ke tou fai he ʼu fetogi, ʼe tonu anai ke tou fakakaukauʼi lelei ia te ʼu fakamanatu ʼa Sehova, ʼae “ ʼe ina fakaliliu ʼo poto ia ia ʼae ʼe vale.”—Pes. 19:7.

9. ʼE fakaha feafeaʼi e te “kau vava” ʼe natou liʼaki te poto Fakaʼatua?

⁹ Ko te lua hahaʼi ʼae ʼe natou meʼa noaʼi te poto Fakaʼatua ʼe ko te “kau vava.” ʼI ʼihi temi, ʼe tou felaveʼi mo he ʼu hahaʼi feia ʼi tatatou faifakamafola. ʼE natou leleiʼia moka natou vaʼi ʼihi. (Pes. 123:4) Neʼe kua fakakikite ʼi te Tohi-Tapu, ʼi te ʼu ʼaho fakamuli ʼe lahi anai he kau vava. (2 Pet. 3:3, 4) ʼE hage ʼihi ia ʼaho nei ko te ʼu ʼohoana ʼo te ʼu ʼofafine ʼo Lote. ʼE mole natou fia tokagaʼi ia te ʼu fakatokaga ʼa te ʼAtua. (Sen. 19:14) Tokolahi ʼe natou vaʼi ia natou ʼae ʼe natou fakalogo ki te ʼu pelesepeto Fakatohi-tapu. ʼE natou fai te faʼahi ʼaia he ʼe natou fia mulimuli “ki ʼonatou holi ʼae ʼe kovi.” (Suta 7, 17, 18) Ka talanoa ʼi te Tohi-Tapu ki te agaaga ʼo te kau vava ʼaia pea ʼe natou hage pe ko te kau aposita mo natou ʼae ʼe natou liʼaki ia Sehova.

10. Ka tou lau ia Pesalemo 1:1, ʼe feafeaʼi hatatou mole liliu ko he kau vava?

¹⁰ Kotea ʼe feala ke tou fai ke mole tou liliu ʼo vava? ʼE mole tonu ke tou fakatahi tuʼumaʼu mo natou ʼae ʼe meo tuʼumaʼu. (Lau ia Pesalemo 1:1.) Ko tona fakaʼuhiga ʼe mole tou fakalogo peʼe lau he ʼu meʼa mai te kau aposita. ʼE tou mahino ai anai kapau ʼe mole tou nofo tokaga, pea ʼe feala pe ke tou kamata fatufatu mo lotolotolua ʼo ʼuhiga mo Sehova pea mo te ʼu fakatotonu ʼae ʼe tou maʼu mai tana kautahi. Koia, ʼe tonu ke tou fai ia te ʼu fehuʼi ʼaeni: ‘ ʼE ko haku agamahani koa ʼi te meo tuʼumaʼu moka foaki mai he ʼu fakatotonu peʼe ko he ʼu fakamahino foʼou? ʼE au faiga koa ke au sioʼi ia te ʼu vaivaiʼaga ʼo ʼihi?’ Kapau ʼe tou tuku fakavilivili te fai ʼo te ʼu faʼahi ʼaia, pea ʼe fiafia anai ia Sehova ʼo ʼuhiga mo tatou.—Taag. 3:34, 35.

11. Kotea te manatu ʼa te “kau agavale” ʼo ʼuhiga mo te ʼu lao ʼa Sehova ki te aga ʼae ʼe tonu ke fai?

 ¹¹ Ko te tolu hahaʼi ʼae ʼe natou liʼaki ia te poto Fakaʼatua ʼe ko te “kau agavale.” ʼE natou agavale he ʼe mole natou fia fakalogo ki te ʼu lao ʼa te ʼAtua ʼo ʼuhiga mo te aga ʼae ʼe tonu ke fai. ʼE fai pe natou te meʼa ʼae ʼe totonu kia natou. (Taag. 12:15) ʼE liʼaki e te hahaʼi ia Sehova, te Matapuna ʼo te poto. (Pes. 53:1) Ka tou felaveʼi mo natou ʼi te faifakamafola, ʼe natou valokiʼi tatou ʼi tatatou fakaʼapaʼapa ki te ʼu lao ʼo te Tohi-Tapu. Kae ʼe mole feala ke natou foaki mai he meʼa ʼe lelei age maʼa tatou. ʼE ui fenei ʼi te Tohi-Tapu: “ ʼE mole maʼu e te vale te poto moʼoni, pea ʼe mole palalau ia ʼi te matapa ʼo te kolo.” (Taag. 24:7) ʼE mole feala ki te kau agavale ke natou foaki he ʼu tokoni fakapotopoto. Koia, ʼe mole tou punamaʼuli ai ki te fakatokaga mai ʼa Sehova ke tou fakamamaʼo mai te “tagata agavale.”—Taag. 14:7.

12. Kotea ʼae ka tokoni mai ke mole tou hage ko te kau agavale?

¹² ʼE mole tou hage ko natou ʼae ʼe natou liʼaki ia te ʼu tokoni ʼa te ʼAtua. Kae ʼe tou ako ke tou leleiʼia ia te faʼahiga manatu ʼa te ʼAtua, ʼo feia pe mo ʼana lao fuli. ʼE feala ke malohi tuʼumaʼu totatou ʼofa ki te ʼu lao ʼaia ʼa te ʼAtua, moka tou fakatatau ia te ʼu fua ʼae ʼe maʼu e natou ʼae ʼe fakalogo mo natou ʼae ʼe mole fakalogo. Ohage la, kotou tokagaʼi ia te ʼu fihifihia ʼe tau mo te hahaʼi ʼuhi pe ko tanatou mole tali ia te ʼu tokoni fakapotopoto ʼa Sehova. Kae ʼe mole kotou maʼuli fiafia koa la ʼuhi ko takotou fakalogo ki te ʼAtua?—Pes. 32:8, 10.

13. ʼE fakamaʼua mai koa e Sehova ke tou fakalogo ki ʼana tokoni fakapotopoto?

¹³ ʼE foaki mai e Sehova ia tona poto kia tatou fuli, kae ʼe mole ina fakakinauʼi he tahi ke ina tali. ʼE ina fakaha pe kotea ʼe hoko moka ʼe mole fakalogo ia te hahaʼi ki tona poto. (Taag. 1:29-32) Ko natou ʼae ʼe filifili ke mole natou fakalogo kia Sehova “ ʼe natou utu pe anai te ʼu fua ʼo ʼanatou aga.” Ki muli age, ʼe natou maʼuli mamahi anai ʼuhi ko tanatou faʼahiga maʼuli pea pulihi leva natou e Sehova. Kae ko natou ʼae ʼe fakalogo ki te ʼu tokoni fakapotopoto ʼa Sehova pea mo maʼuliʼi, ʼe natou iloʼi anai ia te fakapapau ʼaeni: “ ʼE maʼuli fimalie pe anai ia ia ʼae ʼe fakalogo mai, ʼe mole tuʼania anai ki te malaʼia.”—Taag. 1:33.

14-15. Kotea ʼe tou ako mai ia Taaga Lea 4:23?

¹⁴ Ka tou fakalogo ki te poto ʼo te ʼAtua, pea ʼe fua lelei tuʼumaʼu pe kia tatou. Ohage pe ko tatatou vakaʼi, ʼe faiga ia Sehova ke tou maʼu gafua ʼana tokoni fakapotopoto. Ohage la, ʼe foaki mai e Sehova he ʼu tokoni ʼaoga ʼi te tohi ʼo Taʼaga Lea ʼe fua lelei tuʼumaʼu pe kia tatou. Tou vakaʼi aluʼaga ʼe fa.

¹⁵ Kotou puipui tokotou loto. ʼE ui fenei ʼi te Tohi-Tapu: “Puipui tou loto ʼo laka age ia meʼa fuli, he ʼe maʼu ai te ʼu matapuna ʼo te  maʼuli.” (Taag. 4:23) Kotea la ʼe tonu ke tou fai ke mole hoko he meʼa ki totatou mafu? ʼE mahino ia, ʼe tonu ke tou tokakaga ki tatatou kai, mo faigaoʼi pea mo liʼaki te ʼu agamahani ʼae ʼe mole lelei. Pea ʼe tou toe fai feia pe ki totatou loto. ʼE tou fafaga anai ʼaki tatatou lau ʼi te ʼaho fuli te Folafola ʼa Te ʼAtua. ʼE tou teuteuʼi anai ʼatatou fono, mo kau pea mo lagolago ki ai. ʼE tou kau tuʼumaʼu anai ki te faifakamafola. Pea ʼe tou tokakaga anai ki te ʼu agamahani ʼae ʼe kovi, ʼo tou fakamamaʼo mai te ʼu aluʼaga fuli ʼe feala ke kakaʼi ai totatou ʼatamai, ohage la ko te ʼu fakafiafia heʼe ʼaoga pea mo te ʼu fakakaugā kovi.

16. He koʼe ʼe ʼaoga kia tatou ia te tokoni ʼaeni ia Taʼaga Lea 23:4, 5, ia ʼaho nei?

¹⁶ Ke kotou fiafia ʼi te ʼu meʼa pe ʼae ʼe kotou maʼu. ʼE tou maʼu te tokoni ʼaeni ʼi te Tohi-Tapu: “ ʼAua naʼa ke kinakina fau ʼi te kumi koloa. . . . ʼE ke sio anai, kua puli ia, he ʼe ʼi ai ʼona pakakau ohage ko te akuila pea ʼe lele ia ʼi te lagi.” (Taag. 23:4, 5) ʼE feala ke puli vave ia te ʼu falā mo te ʼu koloa ʼa te hahaʼi. Koia ʼae ʼe natou fai ai he ʼu meʼa ʼe ʼulihi ai ʼonatou matagafua, mo fakatupu kovi ai ki ʼanatou felogoi mo ʼihi ʼo feia pe mo tonatou maʼuli malolo. (Taag. 28:20; 1 Tim. 6:9, 10) Kae ʼe tokoni mai te poto Fakaʼatua ke tou maʼu he manatu fakapotopoto ʼo ʼuhiga mo te falā. ʼE feala ai anai ke mole tou manumanū kae ke tou maʼuli fakafeʼauga pea mo fiafia ʼi te ʼu meʼa ʼae ʼe tou maʼu.—Ekl. 7:12.

17. ʼE feafeaʼi hatatou maʼu ia “te ʼu palalau ʼa te kau popoto” ohage ko tona ui ia Taʼaga Lea 12:18?

¹⁷ Kotou fakakaukau ʼi muʼa ʼo takotou palalau. Kapau ʼe mole tou nofo tokaga, ʼe feala ke tou fakamamahiʼi he tahi ʼaki ʼatatou palalau. ʼE ui fenei ʼi te Tohi-Tapu: “ ʼE hage ko he heleta te ʼu palalau ʼae ʼe mole fakakaukauʼi, kae ʼe fakamalolo te ʼu palalau ʼa te kau popoto.” (Taag. 12:18) ʼE tou taupau he ʼu felogoi lelei mo ʼihi moka ʼe mole tou fakamafola ni loi ʼo ʼuhiga mo ʼanatou hala. (Taag. 20:19) Kapau ʼe tou loto ke fakalotofimalie ʼatatou palalau ki te hahaʼi pea ke mole fakamamahiʼi ai natou, ʼe tonu ke tou lau tuʼumaʼu te Folafola ʼa Te ʼAtua mo metitasio ki ai. (Luka 6:45) Ka tou metitasio ki te meʼa ʼae ʼe tou lau ʼi te Tohi-Tapu, ʼe feala  ke hage ʼatatou palalau ko he matapuna ʼo te poto, ʼe ina fakalotomalohiʼi ai ʼihi.—Taag. 18:4.

18. ʼE tokoni feafeaʼi mai te manatu ʼae ia Taʼaga Lea 24:6 ke tou faiva ʼi te faifakamafola?

¹⁸ Kotou mulimuli ki te ʼu fakatotonu ʼa te kautahi. ʼE tou maʼu te tokoni ʼaoga ʼaeni ʼi te Tohi-Tapu: “ ʼE maʼuhiga ni tokoni fakapotopoto moka hoko he tau, pea ʼe maʼu te haofaki ʼi te lahi ʼo te kau faitokoni.” (Taag. 24:6, nota.) ʼE feafeaʼi hatatou maʼuliʼi te pelesepeto ʼaeni ke tou faiva ʼi te faifakamafola mo te faiakonaki? ʼE mole tou fai anai tatatou faifakamafola ʼo mulimuli ki tatatou faʼahiga fai, kae ʼe tou faiga anai ke tou mulimuli ki te ʼu tokoni ʼae ʼe foaki mai. ʼE tou maʼu he ʼu tokoni fakapotopoto ʼi ʼatatou fono, ʼae ʼe fai ai e he ʼu tehina faiva he ʼu akonaki mo he ʼu faʼifaʼitaki ʼe fakatafito ki te Tohi-Tapu moʼo akoako ʼo tatou. Pea tahi, ʼe foaki mai e te kautahi ʼa Sehova he ʼu tohi pea mo he ʼu ʼata viteo ʼe tokoni ai ki te hahaʼi ke natou mahino ki te Tohi-Tapu. ʼE kotou fakaʼaogaʼi lelei koa ia te ʼu meʼa gaue ʼaia?

19. Ka tou lau ia Taʼaga Lea 3:13-18, kotea ʼae ʼe kotou logoʼi ʼi takotou iloʼi ʼae ʼe foaki mai e Sehova he ʼu tokoni fakapotopoto?

¹⁹ Lau ia Taʼaga Lea 3:13-18. ʼE tou lotofakafetaʼi ki te ʼu tokoni lelei ʼae ʼe tou maʼu ʼi te Folafola ʼa Te ʼAtua. Kapau la neʼe mole tou iloʼi te ʼu tokoni lelei ʼaia, ʼe feafeaʼi anai totatou maʼuli? ʼI te alatike ʼaeni, neʼe tou vakaʼi ai he ʼu tokoni ʼaoga mo fakapotopoto ʼi te tohi ʼo Taʼaga Lea. ʼE mahino ia, neʼe foaki mai e Sehova he ʼu tokoni fakapotopoto ʼi te Tohi-Tapu katoa. ʼE tonu ke tou maʼuliʼi ʼana tokoni ʼi totatou maʼuli. Tokolahi ʼe mole natou leleiʼia te poto ʼo te ʼAtua, kae ʼe tou tui papau “ ʼe kalagaʼi anai te manuʼia ʼo natou ʼae ʼe natou puke maʼu te [poto].”