Neʼe tuputupu te gaue faifakamafola, koia neʼe ʼaoga ai he ʼu tohi. ʼI te Petele ʼo Brooklyn, neʼe ta e te ʼu tehina ʼanatou nusipepa. Kae neʼe ta e he ʼu matani gaue maʼa natou he ʼu tohi ʼe fefeka ʼonatou takafi. Lolotoga ni mahina, neʼe mole lahi feʼauga te ʼu tohi ʼae ʼe natou foaki age, ʼo kamata faigataʼa ai ia te fakahoko ʼo te gaue faifakamafola. Neʼe kole leva e te ʼu tehina ko Rutherford ki te tehina ko Robert Martin, ʼae neʼe tokaga ki te fale ta tohi, pe ʼe feala ke ta te ʼu tohi ʼi te Petele.

Ki muli age, neʼe fakatokagaʼi fenei e te tehina ko Martin: “Neʼe ko he manatu fakafiafia ia he neʼe tonu leva ke ʼi ai he fale gaue, ʼe lava ta ai ia te ʼu tohi.” Neʼe lue leva e te tehina he ʼu fale ʼi Brooklyn, ʼi te 18 Concord Street pea neʼe natou totogi he ʼu meʼa gaue ʼe ʼaoga ki ai.

Kae neʼe mole leleiʼia e ʼihi ia te manatu ʼaia. Neʼe haʼu te pule ʼa he matani gaue, ʼae neʼe ta ai ʼamatou tohi ʼo sio ki ʼomatou fale foʼou. Pea neʼe ina fai leva ia te ʼu palalau ʼaeni: “ ʼE kotou maʼu he fale ta tohi ʼe lelei, kae ʼe mole poto he tahi ʼi heni ʼi tona fakahaʼele. ʼE ʼosi pe anai mahina ia ʼe ono, kua maumau fuli ʼakotou masini.”

Neʼe ui fenei e te tehina ko Martin: “Neʼe hage mai ʼe moʼoni ʼana palalau, kae neʼe matou iloʼi ʼe tokoni mai anai ia Sehova pea neʼe ina fakahoko te faʼahi ʼaia.” Neʼe moʼoni pe te tehina ko Martin. Neʼe mole faʼa fualoa ki ai neʼe ta tohi ʼe 2 000 ʼi te ʼaho ʼi te fale fakapipiki tohi.

ʼI te ʼosi ta e te ʼu kaugana ʼa Sehova ʼihi tohi, neʼe natou fakaʼaogaʼi leva he tahi faʼahiga fai foʼou ʼo te faifakamafola. Neʼe natou tala leva ia te logo lelei ʼi te latio. ʼI te ʼAhotapu hili hoʼata ʼaho 26 ʼo Apelili 1922, neʼe palalau ia te tehina ko Rutherford ʼi te latio pea neʼe ko tana hoki fai  ia te faʼahi ʼaia. ʼI te fale latio KOG, ʼi Los Angeles, ʼi Californie, ʼi Amelika neʼe ina fai ai te akonaki ʼaeni ko tona kupu tafito “Ko Te Toko Lauʼi Miliona Hahaʼi ʼe Mole Natou Mamate Anai.”

ʼE fakafuafua neʼe ko te toko 25 000 hahaʼi neʼe natou fakalogo te akonaki. Neʼe faitohi ʼihi ʼo fakamalo ki te tehina ko Rutherford. Ohage la, neʼe kau ia natou ʼaia ia Willard Ashford, ʼae neʼe maʼuli ʼi Santa Ana, ʼi Californie. Neʼe fakamalo ki te tehina ko Rutherford ki tana akonaki ʼaia “neʼe lelei mo maʼuhiga.” Pea neʼe ina toe ui fenei: “Neʼe ʼi ai te foʼi toko tolu neʼe mahahaki ʼi tomatou ʼapi, pea neʼe mole feala ai hamatou fakakaku atu ʼo fakalogo tau akonaki, tatau aipe pe neʼe ke fai ovi mai kio matou.”

ʼI te ʼu vahaʼa ʼae neʼe hoa mai ki ai, neʼe fai ʼihi akonaki ʼi te latio. ʼI te fakaʼosi ʼo te taʼu 1922, neʼe fakaha ʼi he Tule Leʼo “neʼe logo te toko 300 000 afe hahaʼi ki te logo ʼo te Puleʼaga ʼi te [latio].”

Neʼe lotomalohi te kau Ako ʼo Te Tohi-Tapu ʼi te ʼu fua lelei ʼaia neʼe maʼu. Koia ʼae neʼe natou fakatotonu ai ke natou laga he fale latio ʼi he moʼi kele ʼi Staten Island, ʼe ovi atu pe ki te Petele ʼo Brooklyn. ʼI te ʼu taʼu ʼae neʼe hoa mai ki ai, neʼe natou fakaʼaogaʼi ia te fale latio ʼaia ko te WBBR moʼo fakamafola te logo ʼo te Puleʼaga ki te tokolahi.

ʼI Te Tule Leʼo Fakapilitania ʼo te ʼaho 15 ʼo Sunio 1922, neʼe tala ai ʼe fakahoko anai he fakatahi lahi ʼi Cedar Point, ʼi Ohio, ʼi te ʼaho 5 ki te ʼaho 13 ʼo Sepetepeli 1922. Neʼe fiafia ʼaupito ia te kau Ako ʼo Te Tohi-Tapu ʼi tanatou tau mai ki Cedar Point.

Neʼe ui fenei e te tehina ko Rutherford ʼi tana ʼuluaki akonaki: “ ʼE au iloʼi papau, ʼe tapuakinaʼi anai e te ʼAliki . . . te fakatahi lahi ʼaeni pea ʼe tokaga anai ke fakahoko he faifakamafola neʼe heʼeki hoko ʼi muʼa atu ʼi te kele.” ʼI te fakatahi lahi ʼaia, neʼe fakalotomalohiʼi tuʼumaʼu e te kau faiakonaki ia te nofoʼaki ke natou faifakamafola.

ʼI te Feliaono ʼaho 8 ʼo Sepetepeli, neʼe fakahoahoa te toko 8 000 hahaʼi ke natou hu ki te fale he neʼe natou fia logo ki te akonaki ʼa te tehina ko Rutherford. Neʼe natou fakaʼamu ʼe ina fakamahino anai ia te fakaʼuhiga ʼo te ʼu mataʼi tohi ʼaeni “ADV” ʼae neʼe tuʼu ʼi te ʼu pepa fakaafe. Neʼe heheka ʼihi ʼo natou tokagaʼi neʼe ʼi ai  he meʼa neʼe takatakai ʼi ʼoluga ʼo te faiakonakiʼaga. Ko te tehina ko Arthur Claus, neʼe haʼu mai Tulsa, ʼi Oklahoma, ʼi Amelika, neʼe maʼu hona nofoʼaga ʼe ina logoʼi lelei ai te ʼu akonaki. Neʼe faigataʼa ʼaupito he ʼe ʼi te temi ʼaia neʼe mole feala ke logoʼi lelei ia te leʼo ʼo ia ʼae ʼe palalau mai muʼa.

Neʼe tala e te pelesita ʼo te fakatahi lahi ʼe mole tonu anai ke hu ia natou ʼae ʼe ʼomai tauhala ki te fale lolotoga te akonaki ʼa te tehina ko Rutherford ke mole fakalelu. ʼI te hola 9h30 neʼe kamata palalau leva te tehina ko Rutherford, ʼo ina lau te ʼu palalau ʼaeni ʼa Sesu ia Mateo 4:17, ʼae ʼe ui ai: “ ʼE kua ovi mai te Puleʼaga ʼo selo.” ʼI tana palalau ʼae pe ʼe logo feafeaʼi anai te tagata ki te Puleʼaga ʼaia, neʼe ina ui fenei: “Neʼe fakamahino e Sesu lolotoga tana ʼi heni ʼe ina tanaki anai tana hahaʼi. ʼE ina fakatahiʼi anai ia natou ʼae ʼe moʼoni mo agatonu.”

Neʼe manatuʼi e te tehina ko Claus, ʼae neʼe heka ʼi te fale lahi, te aluʼaga ʼaeni: “Neʼe matou fakalogo lelei te ʼu palalau fuli neʼe ina fai.” Kae foki fa pe, neʼe logo kovi ʼo alu ai ki tuʼa. Neʼe mole fia alu ia he neʼe ina iloʼi ʼe mole feala anai ke toe liliu mai.

Mole fualoa ki ai, neʼe kua logo lelei ia. Neʼe ina fakamatala ʼi tana alu ʼaia ki te fale neʼe logo ia ki he pasipasi. Neʼe fiafia ʼosi. Neʼe ina fakatotonu ʼe ina fakalogo anai te toega ʼo te akonaki ʼa te tehina ko Rutherford, tatau aipe pe ʼe tonu ke kake ki te ʼato. ʼI te temi ʼaia, neʼe ko tona taʼu 23. Neʼe ina maʼu ia te fealagia ʼae ke kake ki te ʼato. Neʼe tuku ava ia te ʼu matapa fakamalama pea ʼi tana fakaovi ki ai neʼe ina tokagaʼi “ ʼe feala hana logo lelei ki te akonaki.”

Kae neʼe mole ko Arthur tokotahi pe. Neʼe toe nonofo ʼihi ʼo ʼona kaumeʼa ʼi te ʼato. Neʼe alu fakavilivili age ia Frank Johnson ki ai ʼo fehuʼi fenei age: “ ʼE ʼi ai la hau kiʼi hele ʼe masila lelei?”

Neʼe tali fenei age e Arthur: “ ʼEi, koʼeni.”

Neʼe ui fenei age e Frank: “Neʼe matou faikole ke maʼu he tahi ʼe ʼi ai hana kiʼi hele. ʼE ke sio ki te meʼa ʼae ʼe takatakai ʼi ʼoluga ʼo te faiakonakiʼaga?  ʼE fakamaʼu ki te ʼu faʼo. Ke ke fakalogo lelei ki te Tuʼi Fakamau * moka ina fai te ʼu palalau ʼaeni ‘pea ʼe tonu ke kotou tala, kotou tala,’ pea ʼe ke tuʼusi anai ia te ʼu maea ʼaia ʼe fa.”

Neʼe toʼo pe e Arthur ʼi tona nima ia tana kiʼi hele mo fakatalitali mo ʼihi ki te fakailoga ʼaia. Neʼe kaku mai leva te tehina ko Rutherford ki te koga maʼuhiga ʼo tana akonaki. Neʼe fiafia ʼaupito te tehina ko Rutherford mo lotomalohi pea lagi neʼe kalaga ʼi tana fai te ʼu palalau ʼaeni: “Ke kotou liliu ko he kau fakamoʼoni agatonu mo moʼoni ʼa te ʼAliki. Kotou haʼele ki muʼa ʼi te tau ʼo kaku ki te pulihi ʼosi ʼo te lotu hala. Kotou fakamafola te logo ʼi te potu fuli pe. ʼE tonu ke iloʼi e te malamanei ko Sehova ʼe ko te ʼAtua pea ko Sesu Kilisito ʼe ko te Hau ʼo te ʼu hau pea mo te ʼAliki ʼo te ʼu ʼaliki. ʼE ko he temi maʼuhiga ʼo te hisitolia. Koʼeni kua ʼafio te Hau. Kua tuku atu te gaue ʼaia ke kotou fakaha ki te hahaʼi fuli. Koia ʼae kotou tala, kotou tala, kotou tala, te Hau pea mo tona Puleʼaga.”

Neʼe fakamatala e Arthur neʼe ina tuʼusi mo ʼona tehina te ʼu maea ʼo to ifo ai ki lalo te meʼa ʼae neʼe takatakai. Ko te fakaʼuhiga ʼo te ʼu mataʼi tohi ʼaeni “ADV” neʼe ko te fakanounou ʼaia ʼo te kupu Fakapilitania “advertise” ko tona fakaʼuhiga “tala.” Neʼe feala ke lau ʼi te meʼa ʼaia neʼe takatakai ia te ʼu palalau ʼaeni: “Kotou Tala Te Hau Pea Mo Tona Puleʼaga.”

Neʼe tokoni te fakatahi lahi ʼae neʼe fai ʼi Cedar Point ki te ʼu tehina mo tuagaʼane ke natou tokakaga tafito ki te gaue maʼuhiga ʼae ko te faifakamafola. Pea ko natou ʼae neʼe lotolelei ki ai neʼe natou fiafia ʼi te kau ki ai. Neʼe tohi fenei e he pionie neʼe maʼuli ʼi Oklahoma, ʼi Amelika: “Neʼe matou faifakamafola ʼi he fenua ʼe hahaʼi ai ia natou ʼe gaue ʼi te ʼu lameni pea neʼe masisiva ʼaupito te hahaʼi.” Neʼe ina ui tokolahi ia natou neʼe “fetagihi” ʼi tanatou logo ki te logo lelei ʼi te nusipepa L’Âge d’Or. Neʼe ina ui fenei: “Neʼe matou fiafia ʼaupito he neʼe feala ke matou fakalotofimalieʼi natou.”

Neʼe iloʼi e te kau Ako ʼo Te Tohi-Tapu ʼaia ia te maʼuhiga ʼo te ʼu palalau ʼa Sesu ia Luka 10:2, ʼae ʼe ui ai: “ ʼE lahi te taʼukai kaʼe ʼe tokosiʼi te kau gaue.” ʼI te fakaʼosiʼosi leva ʼo te taʼu, neʼe natou fakatotonu malohi ai ke natou tala te logo ʼo te Puleʼaga ʼi te potu fuli pe.