1. He koʼe ʼe mole tou punamaʼuli tatatou sio ʼae ʼe kaugamalie natou ʼe mole falala ki he tahi?

 TOKOLAHI ʼe natou logoʼi ʼe mole kei feala hanatou falala ki he tahi. ʼE natou iita tuʼumaʼu ʼuhi ko te agakaka ʼi te ʼu faikoloa, pea mo te aga ʼa te kau takitaki politike pea mo te kau takitaki lotu. ʼI ʼihi temi, ʼe mole kei natou falala ki te hahaʼi, peʼe ki ʼonatou kaumeʼa maʼia mo natou ʼo tonatou famili. Kae ʼe mole tonu ke tou punamaʼuli ki ai. Neʼe kua fakakikite ʼi te Tohi-Tapu ‘ ʼi te ʼu ʼaho fakamuli ʼe heʼe agatonu anai te hahaʼi, mo faifasituʼu pea mo natou kakaʼi anai ʼonatou kaumeʼa.’ ʼE hage pe ʼe faʼifaʼitakiʼi e te hahaʼi ia te ʼatua ʼo te malama ʼaeni, ʼae ʼe mole tuha mo te falala.​—2 Tim. 3:1-4; 2 Ko. 4:4.

2. (1) Ko ai ʼae ʼe feala ke tou falala moʼoni ki ai? (2) Kotea ʼae ʼe feuiʼaki e ʼihi?

² ʼE tou iloʼi ko tatou ko te ʼu tisipulo ʼa Kilisito, pea ʼe feala ke tou tuku katoa tatatou falala kia Sehova. (Sel. 17:7, 8) ʼE tou falala ʼe ʼofa ia tatou pea ʼe ‘mole ina liʼaki anai ʼi he temi’ ʼona kaumeʼa. (Pes. 9:10) ʼE tou toe falala kia Sesu Kilisito he neʼe ina foaki tona maʼuli maʼa tatou. (1 Pet. 3:18) Pea neʼe tou tokagaʼi e tatou totonu ʼe foaki e te Tohi-Tapu he ʼu tokoni ʼe tuha mo te falala. (2 Tim. 3:16, 17) Koia, ʼe lahi ai te ʼu tupuʼaga ke tou falala ai kia Sehova, mo Sesu pea mo te Tohi-Tapu. Kae ʼe feuiʼaki e ʼihi pe ʼe feala moʼoni koa hanatou falala ki ʼonatou tehina mo tuagaʼane. Kapau koia, he koʼe ʼe feala ke tou falala kia natou?

3. Ka tou lau ia Maleko 10:29, 30, kotea ia te pilivilesio ʼae ʼe tou maʼu?

³ Neʼe taki mai tatou e Sehova kia te ia pea ʼe tou kau ia ʼaho nei ki he foʼi famili fakamalamanei, ʼae ʼe faʼufaʼu e ʼana kaugana. ʼE ko he toe pilivilesio lahi ia tana foaki mai ia he ʼu tuʼuga tapuakina. (Lau ia Maleko 10:29, 30.) ʼI te malamanei katoa, ʼe tou maʼu he ʼu tehina mo tuagaʼane ʼe hage ko tatou, ʼe ʼoʼofa ia Sehova pea mo faiga ke natou fakaʼapaʼapa ki ʼana lekula. Logo la te  kehekehe ʼo te lea, mo te ʼu agaʼi fenua pea mo ʼatatou faʼahiga teuteu, kae ʼe tou ʼoʼofa ia natou maʼia pe ko tatatou hoki felaveʼi ʼae mo natou. ʼE tou fiafia ʼi tatatou fakatahi mo natou ke tou fakavikiviki pea mo atolasio ki tatatou Tamai ʼofa ʼae ʼe ʼi selo.​—Pes. 133:1.

4. He koʼe ʼe ʼaoga kia tatou ʼotatou tehina mo tuagaʼane?

⁴ Ia ʼaho nei, ʼe tonu ke tou fakatahi tuʼumaʼu mo ʼotatou tehina mo tuagaʼane. ʼI ʼihi temi, ʼe natou tokoni mai ke natou ʼamo ʼatatou kavega. (Loma 15:1; Kal. 6:2) ʼE natou toe fakalotomalohiʼi tatou ke tou malohi tuʼumaʼu ʼi te faʼahi fakalaumalie pea mo faʼafai ʼi te tauhi kia Sehova. (1 Tes. 5:11; Hep. 10:23-25) Pea tahi, ʼe tou feafeaʼi anai mo kapau la ʼe tonu ke tou tauʼi ʼotatou fili, ia Satana, te Tevolo pea mo tona malama agakovi kae ʼe mole tokoni mai te kokelekasio? ʼE kua vave ʼohofi e Satana mo natou ʼae ʼe fakalogo ki ai ia te ʼu kaugana ʼa te ʼAtua. Koia, ʼe tou fiafia anai moka nonofo ʼotatou tehina mo tuagaʼane ʼi ʼotatou tafa ʼi te lakaga ʼaia.

5. He koʼe ʼe faigataʼa ki ʼihi tanatou falala ki ʼonatou tehina mo tuagaʼane?

⁵ ʼE faigataʼa ki ʼihi ia tanatou falala ki ʼonatou tehina mo tuagaʼane. Kotea tona tupuʼaga? He ʼe lagi neʼe fakaha e hotatou tehina peʼe tuagaʼane he meʼa neʼe mole tonu ke iloʼi peʼe ʼuhi neʼe mole ina fakahoko tana fakapapau. ʼE lagi neʼe natou lotomamahi ʼosi ʼuhi ko he ʼu palalau peʼe ko he meʼa neʼe fai e he tahi ʼo te kokelekasio. Ka hoko te faʼahi ʼaia, pea ʼe faigataʼa ai te falala ki ʼihi. Koia, kotea anai ka tokoni mai ke tou fakamalohiʼi tatatou falala ʼae ki ʼotatou tehina mo tuagaʼane?

6. Ka tou lau ia 1 Kolonito 13:4-8, he koʼe ʼe tou ui ka tou ʼofa ʼi ʼotatou tehina pea ʼe tokoni mai ke tou falala kia natou?

⁶ Ko te ʼofa ʼe ko te fakatafitoʼaga ʼaia ʼo te falala. ʼE lahi te ʼu koga ʼo te kalitate ʼaia ʼe talanoa ki ai ia 1 Kolonito kapite 13 ʼe tokoni mai  ke tou falala peʼe ke tou toe falala ki ʼihi. (Lau ia 1 Kolonito 13:4-8.) Ohage la, ʼe ui ʼi te vaega 4 “ko he tahi ʼe ʼofa, ʼe kataki fualoa ia pea mo agalelei.” ʼE kataki fualoa ia Sehova ʼo ʼuhiga mo tatou moka ʼe tou agahala kia te ia. Koia, ʼe tonu ke tou kataki fualoa ʼo ʼuhiga mo ʼotatou tehina mo tuagaʼane moka ʼe natou fai he ʼu palalau peʼe ko he ʼu meʼa ʼe tou iita ai peʼe tou mamahi ai. ʼE toe ui fenei ʼi te vaega 5: “[Ko he tahi ʼe ʼofa] ʼe mole hoko ita. ʼE mole ina manatuʼi te kovi ʼae neʼe fai age kia ia.” ʼE mole tou fia manatuʼi tuʼumaʼu anai he ʼu meʼa neʼe fai mai e ʼotatou tehina ʼo tou mamahi ai. ʼE ui ia Ekelesiasi 7:9 ke “ ʼaua naʼa tou hoko ita.” ʼE lelei ke tou maʼuliʼi ia te tokoni ʼaeni ʼe tou maʼu ia Efeso 4:26: “ ʼAua naʼa kotou iita ʼo kaku ki te to ʼo te laʼa.”

7. ʼE tokoni feafeaʼi mai ia te pelesepeto ʼae ia Mateo 7:1-5 ke tou falala ai ki ʼihi?

⁷ ʼE toe faigafua age anai tatatou falala ki ʼihi mo kapau ʼe tou maʼu ia te faʼahiga sio ʼa Sehova ʼo ʼuhiga mo natou. ʼE ʼofa ia natou pea ʼe mole ina manatuʼi tuʼumaʼu ʼanatou agahala. Koia, ʼe tonu ke tou toe fai feia. (Pes. 130:3) ʼE mole tonu ke tou tuʼu ʼi ʼonatou vaivaiʼaga, kae tou faiga ke tou sioʼi ʼonatou kalitate pea mo fakakaukauʼi te ʼu meʼa lelei fuli ʼe natou fealagia. (Lau ia Mateo 7:1-5.) ʼE tou iloʼi ʼe natou fia fai te meʼa ʼae ʼe lelei pea ʼe mole natou fia fakamamahiʼi tatou koteʼuhi ko he tahi ʼe ʼofa “ ʼe tui ia kia meʼa fuli.” (1 Ko. 13:7) ʼE mole fakaʼuhiga leva ʼe kole mai e Sehova ke tou falala kia natou kae mole hona tupuʼaga lelei. Kae ʼe ina loto ia ke tou falala kia natou he ʼe natou fakaha ʼe natou tuha mo te falala. *

8. ʼE feafeaʼi hau fakamalohiʼi tau falala ki ʼou tehina mo tuagaʼane?

⁸ ʼE hage pe te falala ko te fakaʼapaʼapa. Kapau ʼe kita loto ke falala mai he tahi pea ʼe tonu ke kita fakaha ʼe kita tuha mo te falala. Pea ʼe ʼaoga ki ai he temi. ʼE feafeaʼi hau fakamalohiʼi tau falala ki ʼou tehina mo tuagaʼane? Ke ke faiga ke ke iloʼi lelei natou. Ke ke faipalalau mo natou ʼi muʼa pea mo te ʼosi ʼo te fono. Fai hau fakatuʼutuʼu ke ke faifakamafola mo natou. Ke ke kataki fualoa ʼo ʼuhiga mo natou pea mo tuku he temi ke natou fakaha ai ʼe natou tuha mo te falala. Ka ke kamata feiloʼiʼaki mo he tahi, ʼe mole ke fakaha atu aipe te ʼu meʼa ʼae ʼi tou loto. Kae ka ke felogoi tuʼumaʼu mo ia, pea ʼe mole kei ke fakameʼameʼa anai tau fakaha age ki ai ia te ʼu meʼa ʼae ʼi tou loto. (Luka 16:10) Kotea ʼe feala ke ke fai mo kapau neʼe fakamamahiʼi koe e he tehina peʼe ko he tuagaʼane neʼe ke falala ki ai? ʼAua naʼa ke foimo fakagata ʼau felogoi pea mo ia. Kae ke ke tuku muʼa he kiʼi temi ke fakalaka. Pea ʼaua naʼa ke tuku he ʼu aga ʼe kovi ʼa he foʼi tokotahi peʼe laka atu ke tuku ai tau falala ki ʼou tehina mo tuagaʼane. Tou vakaʼi te manatu ʼaia ʼaki hatatou talanoa ki te faʼifaʼitaki ʼo he ʼu kaugana agatonu ʼa Sehova, ʼae neʼe hoko atu pe tanatou falala ki ʼihi logo la neʼe natou tali ni mamahi.

9. (1) Neʼe haga lagolago feafeaʼi ia Ana ki te ʼu fakatuʼutuʼu ʼo ʼuhiga mo te tauhi logo la neʼe fai e natou ʼae ʼe natou fakafofoga ia Sehova ni lakahala peʼe ko ni agahala? (2) Kotea ʼae ʼe tou ako mai te faʼifaʼitaki ʼa Ana? (Vakaʼi te pāki.)

⁹ Neʼe kua ke lotomamahi koa ʼuhi ko te aga ʼa he tehina ʼe ina fakahoko hona ʼu maʼua ʼi te kautahi ʼa Sehova? Kapau koia, pea ʼe tokoni atu anai ia te faʼifaʼitaki ʼa Ana. ʼI te temi ʼaia, neʼe ko te Pelepitelo Lahi ko Eli ʼae neʼe ina fakafofoga ia Sehova ʼi Iselaele. Kae neʼe mole tuku e natou ʼo tona famili ia he faʼifaʼitaki lelei. Neʼe tokaga ʼona foha ki he ʼu gaue maʼuhiga pea neʼe nā fai he aga fakaufiufi mo ni aga heʼe ʼaoga. Kae neʼe mole fai pe la e tanā tamai he meʼa ke feafeaʼi moʼonā fakatonutonuʼi.  Neʼe mole toʼo atu aipe e Sehova ia te ʼu gaue ʼae neʼe fakahoko e Eli. Neʼe hoko atu pe ia te lagolago ʼa Ana ki te ʼu fakatuʼutuʼu ʼa Sehova ʼo ʼuhiga mo te tauhi. Ohage la, neʼe haga tauhi pe kia te ia ʼi te tapenakulo kae neʼe ko Eli ia te pelepitelo lahi. ʼI te sio ʼa Eli ki te faikole ʼa Ana ʼi te lahi ʼo tona lotomamahi, neʼe manatu ia ʼe konahia. Neʼe mole ina toʼo he temi ke ina vakavakaʼi lelei te aluʼaga ʼae neʼe hoko, koia neʼe ina valokiʼi ai te fafine ʼaia neʼe lotomamahi ʼaupito. (1 Sam. 1:12-16) Neʼe fakapapau e Ana kapau hala ʼe ina maʼu hana kiʼi tama, ʼe gaue anai ʼi te tapenakulo. Pea neʼe ina fakahoko pe tana fakapapau tatau aipe pe ko Eli ʼae ʼe tokaga ki tana kiʼi tama. (1 Sam. 1:11) Neʼe tonu koa ke fakatuʼā te ʼu foha ʼo Eli ʼuhi ko tanā aga? ʼEi, pea neʼe fakahoko e Sehova ʼi tona temi totonu. (1 Sam. 4:17) ʼI te temi ʼaia, neʼe tapuakinaʼi e te ʼAtua ia Ana ʼo ina foaki age hana kiʼi tama, neʼe higoa ko Samuele.​—1 Sam. 1:17-20.

10. Neʼe tuku koa e Tavite ia tana falala ki ʼihi ʼi tona kakaʼi ʼae e hona kaumeʼa pea mo he tahi ʼo tona famili?

¹⁰ Neʼe ke falala koa ki hou kaumeʼa pea ki ʼamuli neʼe ina kakaʼi koe? Kapau koia, pea ʼe tokoni atu anai te faʼifaʼitaki ʼa te Hau ko Tavite. Neʼe ʼi ai tona kaumeʼa neʼe higoa ko Asitofele. Kae ʼi te faiga ʼae ʼa Apesalone, te foha ʼo Tavite ke liliu ʼo hau, neʼe kau ia Asitofele mo ia ki te fai ʼo te agatuʼu ʼaia. Neʼe lagi faigataʼa kia Tavite ia tana mole kei maʼu ia te tokoni ʼo tona foha pea mo he tagata neʼe ina ui ko hona kaumeʼa. Kae neʼe hoko atu pe e Tavite ia tana falala ki ʼihi logo foki la te aga fakakaka ʼaia. Neʼe haga falala pe ki hona tahi kaumeʼa lelei ko Usai, ʼae neʼe mole fia kau kia naua ʼaia neʼe agatuʼu. Pea neʼe tonu tana falala ʼaia kia Usai he neʼe liliu leva ko hona kaumeʼa moʼoni pea neʼe ina taliʼia ke mate maʼa ia.​—2 Sam. 17:1-16.

11. Neʼe fakaha feafeaʼi e te tagata faifekau ʼa Napale ia tana falala ʼae kia Apikaile?

¹¹ Tou toe vakaʼi leva te faʼifaʼitaki ʼa he tagata faifekau ʼa Napale. Neʼe agalelei pea mo puipui e Tavite mo ʼana tagata ia te ʼu tagata faifekau ʼa he tagata Iselaele neʼe higoa ko Napale. Hili ki ai he temi, neʼe kole e Tavite kia Napale, ʼae neʼe koloaʼia, ke ina foaki age he meʼa kai kia ia mo ʼana tagata, ia te meʼa pe ʼae neʼe feala ke ina foaki age kia natou. Kae neʼe mole tali e Napale ia tana kole ʼaia logo foki la neʼe mole ina kole age he meʼa ke feafeaʼi. Neʼe ita leva ia Tavite pea neʼe ina fakatotonu ke ina matehi ia te ʼu tagata fuli ʼo te loto fale ʼo Napale. Neʼe fakaha leva e he  tagata faifekau ʼa Napale ia te aluʼaga ʼaia kia Apikaile, te ʼohoana ʼo tona pule. Neʼe ina iloʼi ʼe ko Apikaile pe ʼae neʼe tonu ke ina fakaha ki ai ke haofaki ai tona maʼuli. Neʼe feala pe ke hola kae neʼe falala ia ʼe lava fakatokatoka anai e Apikaile ia te fihifihia ʼaia. Neʼe iloʼi ia ia ko he fafine ʼe ina maʼu ia te fakasiosio poto. Ko te aluʼaga ʼae neʼe hoko ki ʼamuli, ʼe ha ai neʼe ʼi ai he ʼu tupuʼaga lelei ʼo tana falala ʼae kia Apikaile. Neʼe lototoʼa ia Apikaile pea neʼe ina uga ia Tavite ke ʼaua tana fakahoko te faʼahi ʼaia. (1 Sam. 25:2-35) Pea neʼe falala kia Tavite ʼe ina maʼu anai te fakasiosio poto.

12. Kotea ʼae ʼe ha ai neʼe falala ia Sesu ki ʼana tisipulo logo la tonatou ʼuhiga agahala?

¹² Neʼe falala ia Sesu ki ʼana tisipulo logo la tonatou ʼuhiga agahala. (Soa. 15:15, 16) Logo la neʼe kole age e Sakopo mo Soane kia Sesu ke nā maʼu honā tuʼulaga makehe ʼi te Puleʼaga, kae neʼe falala pe ia kia naua ʼo ʼuhiga mo tanā tauhi kia Sehova pea neʼe ina foaki age ia te pilivilesio ʼae ke nā liliu ko he ʼu apositolo. (Mko. 10:35-40) Ki muli age, ʼi te po ʼae neʼe puke ai, neʼe liʼaki ia ia e ʼana tisipulo fuli. (Mat. 26:56) Kae neʼe falala tuʼumaʼu pe kia natou. Neʼe ina iloʼi pe ia tonatou ʼuhiga heʼe haohaoa, kae neʼe “haga ʼofa pe kia natou ʼo kaku ki te fakaʼosi.” (Soa. 13:1) Hili tona fakatuʼuake, neʼe ina foaki age ki ʼana apositolo ʼe toko 11 he toe gaue maʼuhiga. Ko te toe gaue ʼaia ʼe ko te tokaga ki te gaue faifakamafola pea mo te tokaga lelei ki ʼana ovi, ʼae ʼe maʼuhiga kia te ia. (Mat. 28:19, 20; Soa. 21:15-17) Pea neʼe lelei tana falala kia natou he neʼe natou tauhi agatonu fuli kia Sehova ʼo kaku ki tanatou mamate. Koia, neʼe falala ia Ana, mo Tavite, mo te tagata faifekau ʼa Napale, mo Apikaile pea mo Sesu ki he ʼu hahaʼi agahala. Neʼe natou tuku mai he faʼifaʼitaki lelei ke tou mulimuli ki ai.

13. He koʼe ʼe faigataʼa ki ʼihi ia tanatou falala ki niʼihi age?

¹³ Neʼe kua ke fakaha koa ki he tahi te ʼu meʼa ʼae neʼe ke logoʼi pea ki muli age neʼe ke tokagaʼi neʼe ina fakamatala ki he tahi? Ka hoko te faʼahi ʼaia, pea ko he aluʼaga ia ʼe fakatupu mamahi. ʼI te tahi ʼaho, neʼe palalau he tuagaʼane ki hona fihifihia ki he tagata ʼafeā. ʼI te ʼala uhu ake, neʼe pauʼi te ʼohoana ʼo te tagata ʼafeā ki te tuagaʼane ke ina fakalotomalohiʼi. Pea ʼe tou tokagaʼi neʼe kua ina iloʼi te meʼa ʼae neʼe fakamatala e te tuagaʼane ʼaia ki tona ʼohoana. Koia, ʼe tou mahino ai pe koʼe neʼe mole kei falala te tuagaʼane ki te tagata ʼafeā ʼaia. Kae logo la te faʼahi ʼaia, neʼe kumi tokoni ki he tahi age tagata ʼafeā. ʼI tana fai ʼaia, neʼe tokoni lahi ai ki ai ke toe falala ki te kau tagata ʼafeā.

14. Kotea ʼae neʼe tokoni ki he tehina ke toe falala ki te ʼu tagata ʼafeā ʼe toko lua?

¹⁴ Neʼe ʼi ai he fihifihia ʼa he tehina mo he ʼu tagata ʼafeā ʼe toko lua kua fualoa. Pea neʼe manatu ia ʼe mole feala ke toe falala kia naua. Kae neʼe ina manatuʼi leva he aluʼaga neʼe ui e he tehina neʼe ina fakaʼapaʼapaʼi ʼaupito. Neʼe ina ui: “Ko totatou fili ʼe ko Satana, kae ʼe mole ko ʼotatou tehina.” Neʼe mahino gafua te falasisi ʼaia pea neʼe ʼi ai tona fakaʼuhiga. Koia, neʼe fakakaukauʼi e te tehina te manatu ʼaia, neʼe faikole tuʼumaʼu pea neʼe ina kumi leva te tokalelei mo te ʼu tagata ʼafeā ʼaia ʼe toko lua.

15. He koʼe ʼe ʼaoga lahi kia tatou he temi ʼi muʼa ʼo hatatou toe falala ki he tahi? Tuku mai he faʼifaʼitaki.

¹⁵ Neʼe kua toʼo koa hou pilivilesio ʼi te kokelekasio? ʼE lagi ko he aluʼaga ia neʼe faigataʼa. ʼI te ʼu taʼu 1930, neʼe tapuʼi ai ʼatatou gaue ʼi Siamani. Logo pe la te faʼahi ʼaia, kae neʼe tauhi agatonu ia Grete mo tana faʼe kia Sehova. Neʼe tuku age kia Grete ia te pilivilesio ʼae ke tokaga ki te toe hiki ʼo Te Tule Leʼo. Kae ʼi te iloʼi leva e te ʼu tehina ʼe fakafeagai tana tamai ki te moʼoni, neʼe natou toʼo ai tona pilivilesio ʼaia naʼa fakaha e tana tamai te ʼu gaue ʼo te kokelekasio kia natou ʼae ʼe fakafeagai age. Kae neʼe mole gata ai. Lolotoga te Lua Tau Fakamalamanei, neʼe mole fia  foaki e te ʼu tehina he ʼu Tule Leʼo kia Grete pea mo siʼana faʼe. Pea ka natou felaveʼi ʼi te ala, ʼe mole kei natou fegufi age. Neʼe nā lotomamahi ʼaupito. Neʼe ko he aluʼaga ia neʼe faigataʼa ʼaupito pea neʼe fakamahino e Grete neʼe ʼaoga lahi kia ia he temi ke fakamolemole ai ki te ʼu tehina ʼaia pea ke toe falala kia natou. Koia, neʼe ina iloʼi leva neʼe fakamolemole e Sehova kia natou koia neʼe tonu ke toe fai feia mo ia. *

16. He koʼe ʼe tonu ke tou tauʼi he fihifihia pe ʼe feala ke ina taʼofi tatatou toe falala ki he tahi neʼe ina fakamamahiʼi tatou?

¹⁶ Kapau neʼe ke toe tau mo he aluʼaga fakalotovaivai feia, ke ke tauʼi he fihifihia pe ʼe feala anai hana taʼofi tau toe falala ki hou tehina peʼe ko hou tuagaʼane. ʼE lagi ʼaoga anai he temi kae ʼe maʼuhiga ʼau faiga. Tou toʼo he faʼifaʼitaki. Ka tou ʼosi kai he meʼa kai neʼe tou mahahaki ai, ʼe mahino ia ʼe tou tokakaga anai ki te meʼa ʼae ka tou kai. Kae ʼe mole ko te aluʼaga ʼaia ka ina taʼofi anai tatatou kakai. ʼO toe feia pe, ʼe mole tou tuku anai ia tatatou falala ʼae ki ʼotatou tehina mo tuagaʼane fuli, ʼae ʼe tou iloʼi ʼe natou heʼe haohaoa, ʼuhi pe he fakamamahi tatou e he foʼi toko tahi. Kapau ʼe tou toe falala ki te kilisitiano ʼaia pea ʼe tou fiafia anai. Pea ʼe tou tokaga tafito pe anai ke tou fai ia meʼa fuli ke maʼu te fefalalaʼaki ʼi te kokelekasio.

17. He koʼe ʼe maʼuhiga ke tou falala ki ʼotatou tehina mo tuagaʼane? Pea kotea ʼae ka tou vakaʼi ʼi te alatike ka hoa mai?

¹⁷ ʼI te malama ʼa Satana, tokolahi ʼe mole kei natou falala ki ʼihi. Kae ʼe falala tatou ki ʼotatou tehina mo tuagaʼane he ʼe tou feʼofaʼofani. Ka tou falala kia natou, pea ʼe tokoni mai ke tou fiafia pea mo logo tahi pea ʼe puipui ai anai tatou ʼi te ʼu temi faigataʼa ka tou tau anai mo ia. Kotea ʼe feala ke ke fai mo kapau neʼe kakaʼi koe e he tahi neʼe ke falala ki ai? Ke ke faiga ke ke maʼu ia te faʼahiga sio ʼa Sehova, mo maʼuliʼi te ʼu pelesepeto Fakatohi-tapu, mo haga gaueʼi ia te ʼofa moʼoni ki ʼou tehina mo tuagaʼane pea mo muliʼi te faʼifaʼitaki ʼo te ʼu kaugana agatonu ʼa Sehova ʼo te temi muʼa. Kapau ʼe tou mamahi, ʼe feala ke tou tauʼi te faʼahi ʼaia pea mo toe falala ki totatou tehina peʼe ki totatou tuagaʼane. Pea ʼe tou fiafia anai ʼi tatatou maʼu hotatou ʼu kaumeʼa ‘ ʼe ʼofa lahi age ia ʼi he ʼu tehina.’ (Taag. 18:24) Kae ʼe mole gata pe tatatou falala ʼae ki ʼihi, ʼe tonu ke natou iloʼi ʼe feala mo natou ke natou toe falala mai. ʼI te alatike ʼae ka hoa mai, ʼe tou vakaʼi ai anai pe kotea ʼe feala ke tou fai ke falala mai ʼotatou tehina mo tuagaʼane.