ʼI te kamata ʼo te ʼu taʼu 1940, neʼe ako ʼaku matuʼā mo te kau Fakamoʼoni ʼa Sehova. Logo la neʼe nā taʼofi tanā ako, kae neʼe haga maʼu pe e taku faʼe ia te ʼu Tule Leʼo pea mo te ʼu Réveillez-vous ! ʼI te 1950, neʼe fakaafe toku famili ki he fakatahi fakafenua ʼi New York pea neʼe natou tali te fakaafe.

Mole fualoa ki ai, neʼe kamata ʼaʼahi matou e te tehina ko Lawrence Jeffries. Neʼe fia tokoni mai ke au iloʼi ia te moʼoni. ʼI te kamata, neʼe mole au manatu tahi mo ia ʼo ʼuhiga mo te manatu ʼa te kau Fakamoʼoni ʼa Sehova ki tanatou mole kau ki te politike pea mo te tau. Neʼe mole au mahino pe koʼe neʼe mole natou kau ki te faʼahi ʼaia. Neʼe au ui age ki ai kapau ʼe mole fia olo ia Amelika katoa ki te tau pea ʼe feala pe ke ʼomai ʼonatou fili ʼo puleʼi te fenua katoa. Neʼe faʼa kataki te tehina ko Jeffries mo au pea neʼe tokoni mai ke au fakakaukauʼi te aluʼaga ʼaeni: “Kia koe la, kotea anai ka fai e Sehova ʼAtua mo kapau ʼe tauhi ia te hahaʼi fuli mo Amelika kia te ia pea ʼe ʼomai ʼonatou fili ʼo tauʼi natou?” Ko tana tali ki te fehuʼi ʼaia pea mo ʼihi manatu neʼe tokoni mai ke au sio ki taku faihala. Koia, neʼe tupu ai leva taku fia mahino ki te moʼoni.

Neʼe au lau tuʼumaʼu he ʼu Tule Leʼo mo he ʼu Réveillez-vous ! kua ʼafeā neʼe tanaki e taku faʼe ʼi he koga fale ʼi te lalo fale. ʼAki te temi, neʼe au tokagaʼi leva ʼe au lolotoga ako ia te moʼoni. Koia, neʼe au tali leva ke fai e te tehina ko Jeffries haku ako. Pea neʼe au kau tuʼumaʼu leva ki te ʼu fono. Neʼe au leleiʼia ʼosi ia te ʼu meʼa ʼae neʼe au ako pea neʼe au liliu leva ko he kaugā fagona. Neʼe au fetogi leva ʼaku fakatuʼutuʼu ʼi taku mahino leva ʼae “kua ovi mai te ʼaho lahi ʼo Sehova.” (Sofo. 1:14) ʼE mole kei au tokaga leva au ke hoko atu taku ako ʼi te ʼu fale ako maʼoluga  kae neʼe au fia tokoni leva au ki ʼihi ke natou iloʼi ia te moʼoni.

Neʼe au fakaʼosi taku ako ʼi te ʼaho 13 ʼo Sunio 1956 pea ʼosi pe ki ai ʼaho ʼe tolu, neʼe au papitema leva ʼi he fakatahi lahi fakasiliko. Neʼe mole au ʼamanaki ʼe lahi anai he ʼu lelei ʼe au maʼu anai mai ia Sehova koteʼuhi neʼe au filifili ke au fakaʼaogaʼi toku maʼuli ke au iloʼi ia Sehova mo akoʼi ki ʼihi.

Hili pe mahina ʼe ono ki taku papitema, neʼe au pionie katoa leva. Neʼe maʼu ʼi Te Minisitelio ’o Te Pule’aga ʼo Tesepeli 1956 ia te alatike ʼaeni “Pouvez-vous aller là où on a besoin de renfort ?” Neʼe au fia fai te faʼahi ʼaia he neʼe au fia alu ki te ʼu koga meʼa ʼae neʼe mole hahaʼi ai ia natou ʼae ʼe natou tala te logo lelei.​—Mat. 24:14.

Neʼe au alu leva ʼo maʼuli ʼi Edgefield, ʼi te potu Saute ʼo Caroline. ʼI te kokelekasio ʼae neʼe tuʼu ʼi ai, neʼe ko kau faifakamafola pe ʼe toko fa pea nima kia au. Neʼe fai ʼamatou fono ʼi te salo ʼo te ʼapi ʼo he tehina. ʼI te mahina fuli, neʼe au fai hola ʼe 100. Neʼe au maʼumaʼua he neʼe au tokaga ki te gaue faifakamafola pea mo fai he ʼu akonaki ʼi te kokelekasio. Neʼe au tokagaʼi ka lahi te ʼu gaue ʼae ʼe au fai, pea ʼe toe lahi age te ʼu faʼahi ʼe au ako ʼo ʼuhiga mo Sehova.

Neʼe au fai he ako ʼa he fafine pea neʼe ʼi ai tana matani gaue ʼae ʼe maʼu ai te ʼu puha mate pea mo meʼa fuli ʼo ʼuhiga mo he tahi kua mate ʼi Johnston, ko he kolo ʼe tuʼu ovi mai pe kio ʼoku. Neʼe agalelei mo au pea neʼe ina foaki mai haku gaue ʼe mole au gaue ʼaho katoa ai pea neʼe ʼaoga mai ʼosi te kiʼi gaue ʼaia. Pea neʼe ina fakagafua mai ke matou fakaʼaogaʼi he kiʼi fale ke fai ai ʼamatou Fono.

Neʼe mavae leva te tehina ko Jolly Jeffries, te foha ʼo te tehina ʼae neʼe ina fai taku ako, ʼi Brooklyn, ʼi New York. Pea neʼe ma kaugā gaue fakatahi ʼi tamā selevisi pionie. Neʼe ma maʼuʼuli ʼi he kiʼi fale neʼe toho ʼaki te motoka neʼe tuku mai e he tehina ke ma fakaʼaogaʼi.

Ka gaue he tahi ʼi te potu Saute ʼe mole lahi ke feafeaʼi tona kiʼi totogi. Ka matou gaue ʼi he ʼaho katoa ʼe matou maʼu pe tola ʼe lua peʼe tolu. ʼI te tahi ʼaho, neʼe au alu leva ki koloa ʼo toʼo haku meʼa kai ʼaki pe te ʼu kiʼi foʼi piesi ʼae neʼe kei toe. ʼI taku hu ki tuʼa, neʼe haʼu he tagata ʼo fehuʼi mai: “ ʼE mole ke fia gaue? ʼE au totogi anai koe kia foʼi tola ʼe tahi ʼi te hola.” Neʼe ina kole mai ke au tuku mai ke au fakamaʼa he fale ʼe lolotoga laga pea ʼe tonu anai ke au fakamaʼa te fale ʼaia ia ʼaho ʼe tolu. Neʼe au sio ai neʼe loto e Sehova ke au nofo ʼi Edgefield. Logo la neʼe mole lahi ke feafeaʼi taku foʼi falā kae neʼe feala ke au kau ki te fakatahi lahi fakafenua ʼae neʼe fai ʼi te 1958, ʼi New York.

ʼI te lua ʼaho ʼo te fakatahi lahi, neʼe hoko he aluʼaga makehe. Neʼe au felaveʼi mo Ruby Wadlington, ʼae neʼe pionie katoa ʼi Gallatin, ʼi Tennessee. Neʼe ma fia fai toko lua ki te gaue misionea koia neʼe ma kau ai ki te fono kia natou ʼae ʼe fia kau ki te ako ʼo Kileate ʼi te fakatahi lahi ʼaia. Ki muli age, neʼe ma kamata fefaitohiʼaki. Pea neʼe kole mai ke au fai he akonaki ki te kaugamalie ʼi Gallatin. Neʼe au toʼo te faigamalie ʼaia ke au kole age ke ma ʼohoana. Hili ʼaia, neʼe au kau leva ki te kokelekasio ʼa Ruby, pea neʼe ma ʼohoana leva ʼi te 1959.

ʼI toku taʼu 23, neʼe fakanofo au ko he tagata faifekau ʼi te kokelekasio (ia ʼaho nei ʼe ui ko te kootinatea ʼo te kolesi ʼo te kau tagata ʼafeā) ʼi Gallatin. Neʼe ko tamatou ʼuluaki kokelekasio ʼae neʼe ʼaʼahi e Charles Thompson ʼi tona ʼuhiga taupau ʼo te siliko. Neʼe lahi ʼaupito ʼona fealagia. Kae neʼe ina kumi mai taku manatu ʼo ʼuhiga mo te ʼu meʼa ʼae ʼe ʼaoga ki te ʼu tehina pea mo te faʼahiga tokaga ʼa ʼihi taupau ʼo te siliko ki te ʼu aluʼaga ʼaia. Neʼe au ako mai ai ʼe lelei ke fai he ʼu fehuʼi pea mo iloʼi ia te ʼu ogaoga fuli ʼo he aluʼaga ʼi muʼa ʼo te toʼo he ʼu tonu.

ʼI Maio 1964, neʼe fakaafe au ke au kau ki te Ako ’o Te Minisitelio ’o Te Pule’aga ʼi te potu Saute ʼo Lansing, ʼi New York. Neʼe fai te ako ʼaia lolotoga he mahina katoa. Ko te ʼu tehina ʼae neʼe natou takitaki ia te ako ʼaia neʼe natou tokoni mai ke lahi age taku fia ako ʼo ʼuhiga mo Sehova pea ke au haga tuputupu ʼi te faʼahi fakalaumalie.

ʼI Sanualio 1965, neʼe hinoʼi maua mo Ruby ki te gaue taupau fakasiliko. Neʼe lahi ʼaupito te telituale ʼae ke ma gaueʼi, mai Knoxville, ʼi Tennessee ʼo kaku ki Richmond, ʼi Virginie. Neʼe kau ai te ʼu kokelekasio ʼo te potu Noleto ʼo Caroline, mo Kentucky pea mo te potu Uesite ʼo Viginie. Neʼe au ʼaʼahi pe te ʼu kokelekasio ʼo te kau ʼuli he neʼe mole fakagafua e te lao ʼo ʼuhiga mo te fakakeheʼi ʼo te tahi lanu ʼi te potu Saute ʼo Amelika ke fono fakatahi te kau ʼuli mo te kau papalagi. Neʼe masisiva ia te ʼu tehina pea neʼe matou ako ke matou vaevae te ʼu meʼa ʼae ʼe matou maʼu mo natou. Neʼe ʼi ai he tehina taupau ʼo te siliko kua fualoa tana fai te gaue ʼaia. Pea neʼe ina fakaha mai ia he ako maʼuhiga: “Ka ke alu ʼo ʼaʼahi he kokelekasio, fai te gaue ohage ko he tehina kae mole hage ko he patolo. ʼE feala tau tokoni kia natou mo kapau ʼe natou fakaʼuhiga ia koe ko honatou tehina.”

ʼI tamā ʼaʼahi ia he kiʼi kokelekasio, neʼe fai leva e Ruby he ako ʼa he fafine neʼe ʼi ai tana kiʼi taʼahine ʼe taʼu katoa. Neʼe mole feala ki he tahi ʼo te kokelekasio ke ina fai te ako. Koia, neʼe fai ai e Ruby ʼaki te faitohi. ʼI tamā toe liliu ʼo ʼaʼahi te kokelekasio, neʼe kau tuʼumaʼu te fafine ki te ʼu fono. Neʼe ʼaumai leva te ʼu tuagaʼane ʼe toko lua neʼe pionie makehe ki te kokelekasio. Pea neʼe nā hoko atu te fai ʼo tanā ako, ʼo mole fualoa pea neʼe papitema leva. Hili ki ai teitei taʼu ʼe 30, ʼi te 1995, ʼi te Petele ʼo Patterson, neʼe haʼu he kiʼi tuagaʼane ʼo palalau kia Ruby. Neʼe ko te taʼahine ʼa te fafine ʼae neʼe ako mo Ruby. Neʼe kau tana kiʼi taʼahine mo tona ʼohoana ʼi te kalasi 100 ʼo te Ako ʼo Kileate.

Neʼe ma fai leva tamā ʼaʼahi fakasiliko ʼi te loto kolo ko Floride. ʼI te temi ʼaia neʼe ʼaoga mai ai kia maua he motoka. Koia, neʼe ma toʼo ai he motoka ʼe totogi lelei. Kae ʼi te ʼuluaki vahaʼa pe, neʼe maumau leva he meʼa ʼo te masini. Neʼe mole kei ʼi ai hamā foʼi falā moʼo gaohi ʼaki te motoka. Neʼe au pauʼi ki he tehina pe ʼe feala hana tokoni mai. Neʼe kole e te tehina ki hona kauga gaue ke ina gaohi te motoka. Hili ʼaia, neʼe mole loto e te tehina ke ʼavage he foʼi falā ki te gaohi ʼo te motoka. Neʼe ina ui age: “Kua ʼosi tokalelei ia.” Pea neʼe ina toe foaki mai tama kiʼi foʼi falā. ʼI te hoko ʼo te aluʼaga ʼaia, neʼe ma sisio ai ki te tokaga lelei ʼa Sehova ki ʼana kaugana. Pea neʼe fakamanatuʼi mai ai kia maua ia te maʼuhiga ʼae ke tou agalelei ki ʼihi.

Ka ma ʼaʼahi he kokelekasio, ʼe fakaʼapi maua e te ʼu tehina. Pea neʼe lahi ai ʼomā kaumeʼa lelei. ʼI te tahi ʼaho, neʼe heʼeki ʼosi ia taku fai te tanaki gaue ʼo ʼuhiga mo te kokelekasio kae neʼe kei au tuku pe ʼi taku masini ta tohi. Neʼe heʼeki ʼosi pe la ʼi taku ta. Neʼe ʼi ai te kiʼi toe tagata ʼe taʼu tolu ʼo te kiʼi famili ʼae neʼe natou fakaʼapi maua. Pea ʼi taku haʼu leva ʼi te afiafi ʼaia, neʼe kua ʼosi ina gaohi ia siʼaku masini ta tohi, he neʼe fia tokoni mai ki tona fakaʼosi. Neʼe au toe ta ai taku tanaki gaue. Neʼe alu noa ʼosi ia ia ʼi taku fakakinakinaʼi ʼi te meʼa ʼaia neʼe ina fai.

ʼI te 1971, neʼe au maʼu leva he tohi neʼe kole mai ai ke au alu ʼo gaue taupau fakatisitilike ʼi New York. Neʼe ma punamaʼuli ʼosi. Neʼe kei au taʼu 34 ʼi tamā olo ʼo maʼuʼuli ai. Neʼe fakatalitali lelei maua e te ʼu tehina pea neʼe ko te hoki ʼi ai e he tehina taupau fakatisitilike ʼuli ʼi ai.

ʼI taku gaue taupau fakatisitilike, neʼe au fiafia ʼosi ʼi te palalau kia Sehova ʼi te fakaʼosi vahaʼa fuli moka hoko he fakatahi lahi fakasiliko. Neʼe kaugamalie te ʼu tehina taupau fakasiliko neʼe lahi age ʼonatou fealagia ia au. Neʼe fai e he tahi ia natou ia taku akonaki ʼo ʼuhiga mo te papitema. Pea ko te tehina ʼaeni ko Theodore Jaracz neʼe liliu leva ki ʼamuli ʼo kau ki te Kolesi Pule. Neʼe toe lahi leva mo te ʼu tehina faiva neʼe gaue ʼi te Petele ʼo Brooklyn. Neʼe au lotofakafetaʼi  lahi ki te ʼu taupau ʼo te siliko pea mo te kau Petelite he neʼe mole natou fai he meʼa ke au ufiufi ai. Neʼe au sio ko natou ʼaia neʼe ko he ʼu tauhi ovi ʼofa ʼe natou falala ki te Folafola ʼa Te ʼAtua pea mo lagolago agatonu ki tana kautahi. ʼAki tanatou agavaivai, neʼe faigafua ai kia au taku fakahoko taku gaue taupau fakatisitilike.

ʼI te 1974, neʼe hinoʼi leva e te Kolesi Pule he tahi kutuga taupau ʼo te siliko ki te gaue taupau fakatisitilike. Pea neʼe au toe liliu ʼo taupau fakasiliko ʼi te potu Saute leva ʼo Caroline. Meʼa lelei foki ʼi te temi ʼaia, neʼe kua fakatahiʼi te ʼu kokelekasio papalagi mo ʼuli ʼo te potu Saute ʼo Amelika. Pea neʼe fiafia ʼaupito ia te ʼu tehina.

ʼI te fakaʼosi ʼo te taʼu 1976, neʼe hinoʼi leva au ki te gaue fakasiliko ʼi Géorgie ʼi te vaha ʼo Atlanta mo Columbus. ʼE kei au manatuʼi lelei pe taku fai he akonaki ʼavaifo ʼo he ʼu fanau ʼuli ʼe toko nima neʼe mamate ʼi te vela ʼo tonatou ʼapi he neʼe tutu e he kau faifakapo. Neʼe lavea te faʼe pea neʼe tuku ʼi te lopitali. Neʼe lahi tuʼumaʼu te kau Fakamoʼoni ʼa Sehova ʼuli mo papalagi neʼe ʼomai ki lopitali ʼo fakalotofimalieʼi te ʼu matuʼā. Neʼe fakaofoofo ʼaupito taku sio ki te ʼofa ʼo te ʼu tehina. Ka fefakahaʼaki e te ʼu kaugana ʼa te ʼAtua ia te taʼi ʼofa ʼaia, pea ʼe feala hanatou katakiʼi he ʼu aluʼaga ʼe faigataʼa age.

ʼI te 1977 neʼe kole mai ai kia maua ke ma hu ki te Petele ʼo Brooklyn ki he ʼu kiʼi mahina pe ke ma kau ki te fai ʼo he gaue. ʼI te kua vave ʼosi leva ʼo te gaue ʼaia, neʼe ma felaveʼi mo he ʼu tehina ʼe toko lua ʼo te Kolesi Pule. Pea neʼe nā fehuʼi mai kia au mo Ruby pe ʼe feala hamā gaue ʼosi ʼi te Petele. Neʼe ma tali te fakaafe.

Lolotoga taʼu ʼe 24, neʼe au gaue ʼi te Selevisi Gaue, ʼae ʼe tokaga ai he ʼu tehina ki te fakatokatoka ʼo he ʼu aluʼaga faigataʼa. ʼAki te temi, neʼe foaki e te Kolesi Pule he ʼu fakatotonu ʼo mulimuli ki te ʼu pelesepeto Fakatohi-tapu. Pea neʼe tokoni ai ki te tali ki he ʼu fehuʼi ʼo feia mo te akoako ʼo te ʼu taupau ʼo te siliko, mo te kau tagata ʼafeā pea mo te kau pionie. Neʼe toe tokoni ai ki he tokolahi ke natou tuputupu ʼi te faʼahi fakalaumalie, ʼo feala ai ke fakamalohiʼi te kautahi ʼa Sehova.

Neʼe lahi te ʼu filiale neʼe au ʼaʼahi mai te 1995 ki te 2018 he neʼe ko au te fakafofoga ʼo te pilo fakamalamanei, ʼae neʼe ui ʼi muʼa atu ko te taupau ʼo te ʼu filiale. Neʼe au felaveʼi ai mo te ʼu Filiale, mo te kau Petelite, pea mo te kau misionea ʼo fakalotomalohiʼi mo tokoni kia natou moka natou tau mo he fihifihia pe. Kae neʼe fakalotomalohiʼi tuʼumaʼu maua mo Ruby ʼuhi ko te ʼu aluʼaga ʼae neʼe natou vaevae mo maua. Ohage la, neʼe ma ʼaʼahi ia Rwanda ʼi te 2000. Neʼe malave ʼosi kia maua ia tamā logo ʼae neʼe hao te ʼu tehina mo tuagaʼane mo te famili ʼo te Petele mai te faifakapo ʼae neʼe hoko ʼi te 1994. Tokolahi neʼe ʼi ai ʼonatou famili neʼe mamate ai. Logo la te ʼu aluʼaga neʼe natou tau mo ia, kae neʼe fakaha e te ʼu tehina ʼaia tanatou tui, mo te ʼi ai ʼo tanatou ʼamanaki pea mo tonatou fiafia.

ʼE kua ma taʼu 80 tupu nei. Kua taʼu 20 leva taku kau ki te Komite ʼo Te Filiale ʼo Amelika. Neʼe mole au alu ʼo ako ʼi he fale ako maʼoluga. Kae neʼe au maʼu he ako ʼe lelei age mai ia Sehova mo tana kautahi. Neʼe feala ke au akoʼi ki ʼihi te ʼu moʼoni Fakatohi-tapu, ʼae ʼe ʼaoga kia natou ʼo talu ai. (2 Ko. 3:5; 2 Tim. 2:2) Neʼe au sio ai ki te tokoni ʼa te logo ʼo te Tohi-Tapu ki te hahaʼi ke natou fetogi ʼonatou maʼuli pea mo maʼu he ʼu felogoi lelei mo tonatou Tupuʼaga. (Sakp. 4:8) Ka ma fealagia mo Ruby, ʼe ma haga fakalotomalohiʼi ʼihi ke natou leleiʼia tanatou ako ʼo ʼuhiga mo Sehova pea mo tanatou akoʼi te ʼu moʼoni ki ʼihi. Pea ʼe ko he toe pilivilesio lahi ia ʼe maʼu e he kaugana ʼa Sehova.